India votes in the First Phase, Lok Sabha Elections-2019 on 11th April, 2019

CCpur, April 10: First Phase, Lok Sabha Elections-2019 ah Lok Sabha constituencies 543 umte lak ah ah Lok Sabha constituencies 91 ah tuni, 11th April 2019 ah vote khiak hiding a hi. Polling hours ahileh kibanglo ding zingkal dak 7:00 apat nitaklam dak 4:00 p.m., 5:00 p.m. leh 6:00 p.m. tiang ah vote khiak hiding a hi. North-eastern states pathum - Nagaland, Manipur leh Meghalaya ah nisa a suak vak ziak, nisa a tum vak ziak ah dakkal 9 sung vote khiak hiding, state dang panga (5) - Arunachal Pradesh, Assam, Mizoram, Sikkim leh Tripura ah dakkal 10 sung vote khiak hiding ahi. Election Commission (EC) notification dungzui ah Nagaland, Manipur leh Meghalaya ah zingkal dak 7:00 ah vote khiakna kipan ding nitaklam dak 4:00 ah khak hiding a hi. Arunachal Pradesh, Assam, Mizoram, Sikkim leh Tripura ah zingkal dak 7:00 ah vote khiakna kipan ding, nitaklam dak 5:00 ah khak hiding a hi.

First Phase, Lok Sabha Elections-2019 ah vote khiakna ding state te chu Andhra Pradesh, Arunachal Pradesh, Meghalaya, Uttarakhand, Mizoram, Nagaland, Sikkim, Lakshadweep, Andaman and Nicobar Islands leh Telangana parliamentary constituencies zosia ah vote khiak hiding, state dang - Assam, Bihar, Chhattisgarh, Jammu and Kashmir, Maharashtra, Manipur, Odisha, Tripura, Uttar Pradesh leh West Bengal ah le vote khiak hiding himaleh zia state te a hi, constituency khenkhat bep ah vote khiakna um ding a hi. Lok Sabha Elections-2019 vote khiakna ahileh 11th April to 19th May 2019 sung ah um ding, 11 April, April 18, April 23, April 29, May 6, May 12 leh May 19 ah vote khiak hiding leh 23rd May ah vote sim hiding a hi. First Phase ah States/UTs chuamchuam ah vote khiakna ding constituencies te ahileh - Andhra Pradesh ah parliamentary constituencies 25 - Araku, Srikakulam, Vizianagaram, Visakhapatnam, Kakinada, Anakapalle, Amalapuram, ajahmundry, Narsapuram, Eluru, Machilipatnam, Vijayawada, Guntur, Narasaraopet, Bapatla, Ongole, Nandyal, Kurnool, Anantapur, Hindupur, Kadapa, Nellore, Titupati, Rajampet, Chittoor te hiding, Arunachal Pradesh ah seat 2 - Arunachal Pradesh West leh Arunachal Pradesh East hiding a hi.

Assam ah seat 5 - Tezpur, Kalibor, Jorhat, Dibrugarh leh Lakhimpur hiding; Bihar ah seat 4 -Aurangabad, Gaya, Nawada leh Jamui hiding; Chhattisgarh ah seat 1 - Bastar; Jammu and Kashmir ah seat 2- Baramulla, Jammu; Maharashtra ah seat 7 - Wardha, Ramtek, Nagpur, Bhandara- Gondiya, Gadchiroli-Chimur, Chandrapur, Yavatmal-Washim; Manipur ah seat 1- Outer Manipur; Meghalaya ah seat 2 - Shillong, Tura; Mizoram ah seat 1- Mizoram; Nagaland ah seat 1- Nagaland; Odisha ah seat 4 - Kalahandi, Nabarangpur, Berhampur, Koraput; Sikkim ah seat 1 - Sikkim; Telangana ah seat 17 - Adilabad, Peddapalle, Karimnagar, Nizamabad, Zahirabad, Medak, Malkagiri, Secunderabad, Hyderabad, Chevella, Mahbubnagar, Nagarkurnool, Nalgonda, Bhongir, Waranagal Mahabubabad, Khammam; Tripura ah seat 1- Tripura West; Uttar Pradesh ah seat 8 - Saharanpur, Kairana, Muzaffarnagar, Bijnor, Meerut, Baghpat, Ghaziabad, Gautam Buddha Nagar; Uttarakhand ah seat 5- Tehri Garhwal, Garhwal, Almora, Nainital- Udhamsingh Nagar, Hardwar; West Bengal ah seat 2 - Coochbehar, Alipurduars; Lakshadweep ah seat 1- Lakshadweep; Andaman and Nicobar Islands ah seat 1- Andaman and Nicobar Islands te hiding a hi.

College Gate zosia chabi kam

CCpur, April 10: Students’ Union, Churachandpur Government College in regular ah principal hi’na tu ding, ei thingtangmi hileh ti dawina in, government kiang ah phutna ala bawl uh sunzawm in, tuni’n College Gate zosia chabi a kamkit ui. Za’ni khanle college gate kam maleu, polling personnel dingte’n training a neiding ziak un, police te’n chabi ala khensia’u hi. Tuni’n chabi bep ah kamtalo in, college huangsung ah kikoi, alkatara (bitumen) bawm zosia in gate sunglam apat in a nang ui. Students’ Union in a thilphut utawh kisai in district in-charge minister, V. Hangkhanlian, Chief Minister, N. Biren Singh leh Thokchom Radeshyam Singh, Minister, Education, Labour & Employment, Government of Manipur tawh holimna ala neita maleu, bangma lawtin ahilo ziak in college a khak uh hi’n a kigen hi. Students’ Union in ahileh Manipur Solkal in college principal ding ah thingtangmi, regular a sem ding MPSC exam tungtawn a University Grant Commission (UGC) Regulation (2018) dungzui ah, appointment a bawl ding phutna a nei uh ahia, a tup uh lawtin ahi machan college khak ding uh hi’n le a kigen hi.

Election duty ziak ah deptt. khenkhat lemchanglo

CCpur, April 10: Zing April 11, 2019 ah Lok Sabha election ding tawh kisai in niching ah pawimaw enkawl, department khenkhat ah lemchanlona liantak a tung hi. Election duty ding ziak in police personnel tamtak a khualzin ua, lampi enkawl Traffic Control Police (TCP) ding kidailo ziak in nidang ah One Way Traffic umsek khale thakawl in a um hi. Chun, nek ding tui tawh kisai inle ni bangzat hem tui kaitalo hi’n a kigen hi. Manipur State Power Distribution Company Limited (MSPDCL) nuai a post-paid leh prepaid recharge counter ah staff kidailo ziak in April 10-13, 2019 sung khak ding alakiti himaleh, District Election Officer (DEO), Churachandpur in staff khat a awlsak ziak in Police Station mun ah Recharge Point hawn in a umthei a, himaleh Gouchinkhup Veng, New Lamka leh SP Office mun a Recharge Point-te khak ahi. Huipi ziak ah mutsiat ah um, 33/11 Khenjang Power Station tungtawn a IB Feeder leh Singngat Feeder bawltu ding staff a kidailo ziak in, lineman 4 bep in a bawl ua, tuni’n Singngat Feeder bawlhawi maleu tutiang hin IB Feeder siamphat hinailo ahi. Election phatleh matding ah school naupang pua gari khenkhat a mat ziak un, tuni’n school khenkhat a kikhak ban ah half holiday puang le a um ui. Hiatding khat chu, district sung ah lung-awilona ziak ah strike, shutdown leh a dangdang um phatleh, nicheng ah pawimaw - tui, medical, telecom, electricity tihaw tha’kawl in a umsek a, himaleh tuchung election ahin tha’kawl ahilo ziak un, mipite a ding ah nawngkaina tamtak muthei in a um hi.

Assembly cum Election nei ding
CCpur, April 10: Senior Citizens Welfare Association, Churachandpur in a hungtung ding April 13, 2019 zingkallam dak 11:00 in Simte inn, Simveng ah a 8-veina Senior Citizens Welfare Association Ccpur Annual Assembly 2018-2019 leh General Election 2019-2021 nei ding ahiu a, T. Paukhanlian, Chairman, ADC, CCpur in Chief guest hina tawh uap ding ahi. Unit tin ah member zosia pangkim chiat ding in, Senior Citizens Welfare Association, Churachandpur in news mangcha in hiatsakna leh chialna a bawl hi.

CCpur District ah total voters 1,99,373 ten vote khia ding

CCpur, April 10: 17th Lok Sabha Election, First Phase ah vote khiakna ding in tuni’n election duty ding personnel leh security te’n a mau duty mun ding chiat uh a zuan kim vek ui. Shyam Lal Poonia, IAS, DC/District Election Officer (DEO) Churachandpur panlakna nuai ah CCpur leh Pherzawl district sung a assembly constituency 6 ah election thiangtho leh zalentak ah nei a hitheina ding ah kum 2018 kum tawp lam apat kisak lawkna kipan in, awareness programme chuamchuam nei in a la um hi. Churachandur leh Pherzawl districts ah Outer Manipur Parliamentary Constituency ah polling station 333 ah polling duty ding ten EVM, VVPAT te panna ah van mat pawimaw chuamchuam te tawh Peace Ground, Tuibong apat in a duty na ding mun chiat uh a zuan ua, Shyam lal Poonia, IAS DC/DEO CCpur leh Mannuamching, IAS DC Pherzawl district ten polling personnel vaikuan ding te etzuina nei in van mat ding uh leh batch banah T-Shirt-te piakdawna nei in, a thakdawna a nei bawk ui. Hiatthei khat chu Churachandur leh Pherzawl districts sung ah Assembly Constituency 6 - 55-Tipaimukh(ST), 56-Thanlon (ST), 57- Henglep (ST), 58-Churachandpur (ST), 59-Saikot (ST) leh 60-Singhat (ST) um in, Polling Station 333 a um a, total voters 1,99,373 ten 17th Lok Sabha Election ah vote khia ding a hiu. Chun, tuchung Lok Sabha election ah Churachandpur leh Saikot Assembly Constituency nuai ah polling stations 100 te numei ten a etkawl ding ua guanggal in a um a, 2014 ah Parliamentary Election a um hun a khah vote khia, voters 81.95 percent tung ah record a hi. 2017 Assembly Election ah 69.33 percent a tung hi.

Alangkhatlam ah Shyam lal Poonia, IAS DC/DEO CCpur in ama office chamber ah thuthak lakhawm mite kimupi in thiangtho leh zalen tak ah vote khiak a hitheina ding ah mipi te kithuapina pawimaw a hidan gen in, 11th April, 2019 zingkal dak 7:00 apat nitaklam dak 4:00 tiang ah mipi te a polling station chiat ua vote khia ding in chialna a bawl hi.

APWC, CCPur annual general body meeting nei ding
CCpur, April 10: M/S All Pensioners Welfare Council (APWC), CCPur in a hungtung ding April 12, 2109 zingkallam dak 10 in YPA GHQ Hall, Hiangtam Lamka ah APWC, CCPur annual general body meeting nei ding ahiu. Zingkal dak 10-11 kikal in preliminary hun mang ding ahiu a, zia hun achun, Ginvum Ngaihte, President, APWC in mapui ding ahia, zingkal dak 11:30 ah business session kipan intin, zia hun achun, Khamzadinga. Vice President Organization in mapui ding ahi. Rev. Dr. Th. Lamboi Vaiphei, Ex-committee member in member mualliamta-te sûnna hun mang ding ahi. Hun tawpna ding ah Upa Dr. Saidokhum Joute, Treasurer, APWC in pauchapna ah hun khak ding ahi.

Ropiang Foundation Trust in panpina pia

CCpur, April 10: Ropiang Foundation Trust in district sung a gentheidiakte panpina ding ah van chuamchuam tukum bul apat khan naupang leh chaga etkawlna, children home leh orphanage home-te ah zânpuan, Quilt leh Bedsheets ala hawmsek ua, tuni’n le Happiness Home, Pangzawl leh Mercy Home, Thingkangphai inle zanpuan a hawmdawk kit ui. A chiata March 30, 2019 akhan le, nauchaga etkawlna mun 3, Sangga muon Inn, Bijang ; Tunnu Limbel, Zo Colony leh Vondei Sauliim, Zo Colony ah Quilt leh Bedsheets ala hawmdawk ui.

CCpur ah People with Disability (PwD) 615 in vote kheding
CCpur, April 10: Centre for Community Initiative (CCI) in tuzingkal dak 11:00 in maban election ah gualbanlote a ding tawh kisai ah District Monitoring on Accessible Election (DMCAE) kisingsakna dungzui ua a mudaw te’u genkhawmna a nei ui. Pauzagin Tonsing, Director, CCI in a gendan in, Churachandpur leh Pherzawl district a Disability tawh kisai a Socio-Economic Survey a bawl dungzui ua, vote khethei ding ah min khumthak tamtak kibelap in, tuchung Lok Sabha election ah gualbanlo, People with Disability (PwD) vote 615 in vote kheding ding uh hi’n a gen a, zia lak achun, 55 Tipaimukh Assembly Constituency ah mi 120, 56 Thanlon Assembly Constituency ah mi 59, 57 Henglep Assembly Constituency ah mi 81, 58 Churachandpur Assembly Constituency ah mi 150, 59 Saikot Assembly Constituency ah mi 107 ban ah 60 Singngat Assembly Constituency ah mi 98 a ting ua, zia lak achun, Visual Impaired 40, Speech/Hearing Impaired 196, Locomotor Disability 202 leh Other Disability ah mi 98 hi’n a gen hi. Disability kiti Locomotor disability (gamtat-khawhei) bep hilo in, nakhang hiatna, khua mutheina, awsuak leh a dangdang um maleh, gamtat-khawhei a gualbanlo tawh kisai etchianna a neina ua, polling station a ramp (wheelchair mang ah mani kitailut theinading) tamtak umlo ahi ban ah, khenkhat kȇn(steep) talua hi’n a gen a, toilet tamzaw ah wheelchair accessible lo hi’n le a gen hi. Election phatleh gualbanlo te’n haksatna umlo ah vote khiakding ti, Election Commission of India in ngaikhawk maleh, polling personnel dingte training piak ahilai ua, gualbanlo a ding tawh kisai ah training piak hilo uh hi’n a kigen hi.

CEO Manipur in candidate disqualification tawh kisai hilchian

Imphal, April 10: Chief Electoral Officer (CEO), Manipur, P. K. Singh in tuni'n media person te kiang ah election ah candidate te disqualify kibawldan tawh kisai in hilchianna a bawl hi. Ama'n a genna a chun, formal scrutiny leh contesting candidate te final list publication bawlzaw nung ah Chief Electoral Officer (CEO) ahiloleh Returning Officer (RO) in amawk disqualified thei uh hilo a hidan gen in, Chief Electoral Officer (CEO) level ah complaints ahiloleh counter complaints piaklut ah um te CEO in chiapidan tangpi tawh kituak ah akisaipi RO te kiang ah a hunhun ah complaint etzui a hitheina ding ah complaint lekha pesawn sek hin a gen hi. Zia chu tawh kisai in electronic leh print media houses te chu political news te publication / telecast bawl masang ah enchian leh kanzui masa sek ding in chialna a bawl hi. 2-Outer Manipur Parliamentary Constituency ah vote khiak ah a umna ding tawh kisai a genna a chun, thiangtho leh zalen tak ah vote khiak ah a um theina ding ah panlakna umzo ta a hidan gen in, polling station zosia ah para military leh state forces te kining ting tak ah DEO te panlakna tawh kawi a hidan a gen hi. Chun, dan lo gual tak ah vote khiakna a um a, vote khiakna chawbuai ahileh a kituakpi Rules leh sections um te mang ah khautak ah action lak hiding in a gen hi.

Jail apat journalist Kishorechandra Wangkhem thadaw hita

Imphal, April 10: National Security Act nuai ah hentang ah um leh tha 4 sung lam Sajiwa Central Jail, Imphal ah umta, Imphal based journalist Kishorechandra Wangkhem in Manipur High Court released order sua dungzui in tuni'n Sajiwa Central Jail a pawtsan hi. Jail apat a patdaw tak tawjh kitawn in journalist Kishorechandra Wangkhem in jail ah apawtdaw theina ding ah panlakna nei, a zi Ranjita banah a seppi, media, rights bodies leh activist te chung in kipakthu a gen hi. Journalist Kishorechandra Wangkhem ahileh Chief Minister N Biren Singh leh Prime Minister Narendra Modi banah RSS te demna a bawlna video, Facebook ah apost ziak ah mat ah um a hia, tha 12 sung jail tang ding ah thutanna siamkhum ah um himaleh jail ah kawi ah a umna dan diklo hi ah December 20, 2018 ah High Court ah a tut tawh kitawn ah a chungthu court in a lel thak nung ah Manipur High Court in 8th April 2019 ah released order a sua a hi.

ATRPFM in candidate te lak ah titna neipen teldaw ding a dawi thu taklang
Imphal, April 10: All Tribal Rights’ Protection Forum (ATRPFM) in Outer Manipur Parliamentary seat ah mipi te chu candidate lak ah titna neipen te en ah vote khia ding in chialna a bawl a, thiamna sangtak nei leh khangthak mipi palai ding pawimaw a hidan a taklang hi. Lekha helo te Grade IV employees ding ah le dawi hilo a hina chung ua lekha helo te palai ah teldaw lo ding a nawp thu taklang in, MP kiti dan (law) leh Constitution siamhawi thak ding a hina chung ua, candidate te lak ah India gamsung kivaipuakna, dan leh mual um te hethiam te teltin a hi ding uh a nawp thu a taklang hi. Chun, Citizenship (Amendment) Bill (CAB), 2016 panna, mipi a bik tak ah tribal te haksatna dinpi ah dan phalo leh dawi umlo te dodal leh tangko thei ding palai pawimaw a hidan gen in, mipi te kingakna kham ting ding candidate teldaw ding a nawp thu le a taklang hi.

National party ten remote control gual ah nasem: MPP
Imphal, April 10: Manipur People’s Party (MPP) ,Advisor A. Amutombi Singh in Inner Manipur Parliamentary Constituency ah MPP candidate Oinam Jugindro a ding ah Top Siphai Laxmi Bazar ah Flag Hoisting ceremony a nei hun ua a thugenna a chun, BJP leh Congress party demna bawl in, Indian Union ah kum 1949 ah Manipur thuneikhum ah a um zaw apat khangthak te beidawng tak ah um zing a hidan uh gen in, Congress ruled hi'n, BJP government hita leh Manipur in haksatna tuak zing in a gen a, National Political party kiti ten state ah amau dawidan ah nasem theilo, New Delhi ah party high command te apat “Yes” ti dungzui ah remote control gual ah nasep thilbawl nei un a gen hi. Regional party MPP kiti 1968 ah kiphutdawk himaleh chief minister lui Alimumudin mapuina nuai ah Manipur ah tha 11 sung vai a la hawm in a gen a, state mipi te ding ah a pawimaw dungzui ah panlakna leh thupukna siamthei party a hidan a gen hi. Zia ah flag hoisting ceremony chu MPP President Y. Bhim Singh, Vice President S. Ibomcha leh S. Brojen Singh ten le a uap ui.