Nagaland, Manipur & Meghalaya ah LS polling hours dakkal 9 sung hiding
Imphal/Kohima, April 8 (Nisin Thuhiltu) : 17th Lok Sabha election 2019 ah North-eastern states pathum - Nagaland, Manipur leh Meghalaya ah nisa a suak vak ziak, nisa a tum vak ziak ah dakkal 9 sung vote khiak hiding, state dang panga (5) - Arunachal Pradesh, Assam, Mizoram, Sikkim leh Tripura ah dakkal 10 sung vote khiak hiding ahi. Election Commission (EC) notification dungzui ah Nagaland, Manipur leh Meghalaya ah zingkal dak 7:00 ah vote khiakna kipan ding nitaklam dak 4:00 ah khak hiding a hi. Arunachal Pradesh, Assam, Mizoram, Sikkim leh Tripura ah zingkal dak 7:00 ah vote khiakna kipan ding, nitaklam dak 5:00 ah khak hiding a hi. Nagaland Chief Electoral Officer (CEO) Abhijit Sinha in vote khiak ding hun sung kibanglo ah a umna tawh kisai a genna a chun, state pathum ah dakkal 9 sung vote khiak ding ah guanggalna a umna ziak, a ziak dang hilo ah nisa a suak vak ziak, nisa a tum vak ziak hipen in a gen a, 7:00 a.m. - 4:00 p.m. polling hours chu hun sawtpi apat nidang ah le chiapi ah a la umzing sek hi'n a gen hi. A ziak ding dang a genna a chun, tanggam leh mun haksa taktak ah le polling stations a um ziak hi'n a gen hi. Sumit Mukherjee, Principal Secretary to Election Commission in tumasang ah thusua a la bawlna a khan, polling hours kibanglo ding leh nitaklam dak 4:00 p.m., 5:00 p.m. leh 6:00 p.m. ah official polling hours kichai ding in a la gen a, Subhash Das, retired senior EC official in official polling hours tawh kisai a genna, security issues, remoteness of polling stations, volume of voters, traditional polling system dungzui ah polling hours bithiat hisek in a gen hi. North-eastern states ah Lok Sabha seats tamzaw ah April 11, 2019 leh first phase ah vote khiak hiding a hia, Tripura leh Manipur ah second phase, April 18 ah le vote khiak hiding a hi. Hiatthei khat chu, northeast ah nisa suak leh nisa tum hun, India gamsung mun dang tawh tekak ah 60-90 minutes in amasa zaw sek hi.
Polling station zuan ah election duty ding te kipan dawk
Ccpur, April 8 (Nisin Thuhiltu) : Lok Sabha election 1st phase ah 11 April 2019 leh vote khiak ah a umna ding tawh kisai in tuni'n Churachandur leh Pherzawl districts ah Outer Manipur Parliamentary Constituency ah polling station 62 ah polling duty ding ten Peace Ground, Tuibong apat in a duty na ding mun chiat uh a zuan ui. Election duty ding ah tuni ah kipan dawk te chu Tipaimukh Assembly Constituency nuai ah um polling station 31 ah duty ding, Thanlon Assembly Constituency nuai ah polling station 22 ah duty ding leh Henglep Assembly Constituency nuai ah polling station 9 ah duty ding te ahiu a, District Election Officer/DC, Churachandpur Mr Shyam Lal Poonia in ama mimal tak ah polling personnel vaikuan ding te etzuina nei in a thakdawna a nei bawk hi. A langkhatlam ah Tipaimukh, Thanlon, Henglep leh Singngat Assembly Constituency nuai ah polling station 56 ah duty ding te zing 9th April 2019 ah kipandawk kit ding a hiu. Hiatthei khat chu Churachandur leh Pherzawl districts sung ah Assembly Constituency 6 - 55-Tipaimukh(ST), 56-Thanlon (ST), 57- Henglep (ST), 58-Churachandpur (ST), 59-Saikot (ST) leh 60-Singhat (ST) um in, Polling Station 333 a um a, total voters 1,99,373 a um hi. Chun, tuchung Lok Sabha election ah Churachandpur leh Saikot Assembly Constituency nuai ah polling stations 100 te numei ten a etkawl ding ua guanggal in a um a, 2014 ah Parliamentary Election a um hun a khah vote khia, voters 81.95 percent tung ah record a hi. 2017 Assembly Election ah 69.33 percent a tung hi.
Minister V. Hangkhanlian in workers meet nei
CCpur, April 8 (Nisin Thuhiltu) : Outer Manipur Parliamentary Election. 2019 ding tawh kisai a kisakhawlna chiatha zing in, tuni'n Agriculture Minister V. Hangkhanlian in Zenhang Lamka ah workers meet a nei hi. Workers meet hun ah Minister V. Hangkhanlian in a bial sung a polling station chuamchuam ah polling agent ding guatna le a nei ngal hi.
SVEEP campaign bawlna essay leh painting competition
CCpur, April 8 (Nisin Thuhiltu) : District Election Officer (DEO), Churachandpur malatna leh Lamka ArtCon kithuapina in tuzingkal dak 9:30 in YPA GHQ Hall, Hiangtam Lamka ah Systematic Voter’s Education and Electoral Participation (SVEEP) campaign-na’n Lok Sabha Election 2019 ding tawh kisai in essay leh painting competition a nei ui. Zia kidemna achun, kum 18-te a pang ua, essay competition ahileh "Vote for Tomorrow" ti thupi mang ah thuzik kidemna ahia, painting competition ahileh "Hope for Tomorrow the Right Direction Time for Change" ti thupi mang ah milimzik kidemna ahi. Kidemna neizaw in laa sathiam chuamchuam apat lasakna a um a, zia zaw chun kidemna result puanna leh kipakman hawpdawna a nei ui. Kipakman ah mi khat in Rs. 4,000 a dawng a, a dang pani in Rs. 500 gel a dawng ui.
Malaria Deptt. in khua chuamchuam pha
CCpur, April 8 (Nisin Thuhiltu) : Thokang apat natna kikaisawnthei, malaria sukbeina ding tupna in tulai in District Malaria Officer (DMO) panlakna’n nna tamtak a semdawk ui. Zia tawh kisai a chun, Malaria Department apat Malaria team khat in April 5-8, 2019 sung in Henglep, Thanlon, Sinzawl leh PHC Singngat in a huapsung khuate a vachuan ua, malaria dodalna naa chuamchuam a vasemdawk ui. Malaria team-te ahiu leh – L. Singhjit Sing, AMO; S Thangthianmuan, DPO; Raymond, MHS, Henglep PHC; Samte Chin, MHS, Thanlon PHC leh Driver Ramhlun ahiu a, longlasting insecticidal net, Information Education and Communication (IEC), Interpersonal Communization (IPC) ban ah community awareness tihaw ah malaria apat kivenbit dingdan a ziltîl ui. ASHA worker-te tawle pangkhawm in, Hiangkot, P. Sezol, Hengkom, Thingkeu, Chiangpi, Sainoujang, Sinzawl, Phaitong, Sumtuk, Leijangphai leh Santing ah Malaria Test Kit a hawm ua, chuleh Malaria Department in ala piak uh, kangkal-te a mat dingdan in a mang nau em ti etchianna le nei in, kangkal hawle damdawi in a vadia ui.
TLYC in Prize hawpdawna nei
CCpur, April 8 (Nisin Thuhiltu) : Thengra Leirak Youth Club (TLYC) saina ah Thengra Leirak Annual Sport Meet 2019 a nei lai ua kipakman-te za’ni April 7, 2019 nitaklam 2:30 khan Thengra Community Hall ah hawpdawna a nei ui. Zia hun achun, RK Inao, Secretary Meitei Society, Ccpur in Chief Guest hina tawh a uap a, Soibam Amureisang in Guest of Honour leh Ranjit Khumanthem, President, TKYC in Functional President hina tawh a uap ban un, Robin Toijam, Assistant Commandant (BSF) inle a uap hi. Zia hun chu, Moirangthem Yoyo, Yumna, Dickson, Khumanthem Mangal, Pukhrambam Yohenba, Moirangthem Johnson, Toijam Miranda leh Toijam Purnima te’n lâm chi chuamchuam a thaw ui. Zia sports meet hi, TLYC in Thengra Leirak sung a naupang-te tawh kithuakhawm ah, lâm chi chuamchuam zilna ding ah march 21-24, 2019 sung ah ala nei uh hi’n a kigen hi.
Hun-Thadou Cultural festival 2019 mang ding
CCpur, April 8 (Nisin Thuhiltu) : Thadou Innpi GHQ saina in za’ni April 7, 2019 in Taloulong khua, Damdei Christian Collge kiang ah um, Kangpokpi district ah My Culture My Identity ti thupi mang in Hun-Thadou Cultural festival 2019 hun a mang ui. Zia hun achun, Haokholet Kipgen, Former Minister, Government of Manipur in Chief Guest hina tawh a uap a, Robert Sitlhou, Chief of Taloulong in Chief Host leh Tongpu Kipgen, President Chief Association, Manipur in Hunpa hina tawh a uap ui. Hun matsung in Wilson Sitlhou leh Aavah Lhouvum te’n a mapui ua, Rev. Hekai Simte, Area Pastor, K. Geljang, TBAI in hun patna a nei a, Thadou Artiste Association in Thadou laapi sakna a mapui ui. Chuleh, TK Sema, Vice President, Thadou Innpi GHQ in vaidawnna thu a gen a, Thadou Cultural Organization in pu-pa lam a thaw ua, Lienna Singson, Speaker, Thadou Innpi GHQ in hun kimatna ziak a gen ban in, Stephen T. Haokip, President, Thadou Innpi GHQ in presidential address a gen hi. Chun, Guest-te apat thugenna a um a, hun tawp ah Kamboi Kipgen, Secretary General, Thadou Innpi GHQ in kipakthu genna leh, Rev. Sitlhou, President, TBAI-I in hun khakna pauchapna a nei hi.
Khawpi sung ah Flag march bawl
CCpur, April 8 (Nisin Thuhiltu) : Churachandpur District Police mapuina’n zani, April 7, 2019 zingkal in a 17-veina Lok Sabha Election hunsung ah security lam mawpaw ding a hung, Border Security Force (BSF) apat 402 Battalion te'n khawpi sung ah Flag march a nei ui. Zia hun achun, 402 Battalion, BSF-te se’ni in a kikhen ua, pawlkhat in STC/BSF Mualkoi apat Pearsonmun, Bungmual, D. Phailian, Chiengkonpang, District Hospital, Zellang Veng, Zomi Colony, Hiangtam Lamka, Tipaimukh Road, Thengra Leirak, Marian Street, Dorcas Road, Chimtung Veng, Leipi Veng, Mualkoi a zui ua, a pawl dang khat in STC, BSF apat Lanva, Tedim Road, Nghathal, PT Complex, V. Munhoih, Bible Hill, Khumujamba, Police Station, New Bazaar, Hmuia Veng, Damkam Bazaar, Lanva leh Gangpimual zui in STC, BSF chan keng in lampi a zawt ua, Flag March a nei ui. Chun, district police apat Shivanand Surve, IPS, SDPO Churachandpur leh Chinneihlam, OC, Women Police te'n Police personnel-te a mapui ua, BSF lam apat T. Douminlian, Assistant Commandant, BSF leh Ajay Kumar, Assistant, Commandant, BSF te'n BSF personnel-te a mapui ui. Shivanand Surve in a gendan in, Election Commission of India thupiak dungzui a Flag march kibawl hi’n a gen a, mipite’n security force chung ah muanngamna a nei ua, zalen leh thamuang tak ah mani dawitelna chiat ah vote khiakding dawina ah Flag March a nei uh hi’n a gen hi.
Sr. SP/CCpur in District NPF President ki butluna kanzui
CCpur, April 8 (Nisin Thuhiltu) : Melhiatlo pawsal 10 vel in a chiata April 6, 2019 nitak dak 9:10 vel ah Genlunthang, District President, Naga People's Front (NPF) chenna inn pawl khat in vabutlu nau tawh kisai ah Churachandpur Police Station ah FIR ziklut in a um a, FIR ah inn bulu lak ah pang mi 2 min a chuang hi. Kabib K., IPS, Senior Superintendent of Police, Churachandpur in Genlunthang' chenna inn vapha’n thil umdan etzuina a nei a, election chai machan Police Department apat Quick Response Team (QRT) 2 te duty ah kawi ding a hithu a gen hi. Hiatthei khat chu, 6th April 2019 zan dak 9:30 tuam ah kua ahi hiatlo car 2 ah chia, pawsal 10 vel in Red Cross Lane, Churachandpur ah S. Genlunthang, President, Naga People's Front (NPF), Churachandpur District chenna inn vabulu ah common room Almirah kaihawng in document pawimaw hunkhawp kaizak piak in printers 2 leh Plastic Stool a suksiat banua a chanu leh anau (numei) in liamna a tuak ui. Zialo a chu NPF support leh supportlo thu ah tha ding tiang ah vauna bawl un le a kigen hi.
Cannan Academy School building hawndawna nei
CCpur, April 8 (Nisin Thuhiltu) : Presbyterian Church in India-Reformed (PCI-R) etkawlna nuai a school thak khat tuni’n Hiangdung khua ah Cannan Academy School building hawndawna leh Pathian kiang ah latna a nei ui. Zia hun ahun, PCI-R apat mapuitute ban ah khawsung mipite le a pang ua, Rev. M. Khamliangman, Coordinator Institution in hun matna puihuai in, Rev. Dr. Khen P. Tombing, Chief Coordinator, PCI-R in school building hawnna a nei a, chuleh, Rev. Goukhansiam Guite, Superintendent, SLP in Pathian kiang ah latna a nei hi. Zia mun hi Rev. M. Khamlianmang, Coordinator Institutions in March 8, 2019 ah ground breaking ala bawl a, school building sakpat ngal ahia, tuhin sakzaw hinailo maleh naupangte khualna ah lua kawm ah sakzawm ding hi’n a kigen hi. Tulaitak in teacher 5 ahia, student mi 35 val in admission a bawl ua, zing ah school kaipan ngal ding ahiu.
Manipur HC in journalist Wangkhem thasuak ding ah order sua
Imphal, April 8 (Nisin Thuhiltu) : Manipur High Court in National Security Act (NSA) nuai ah mat ah um leh jail ah kikawi journalist Kishorchandra Wangkhem thasuak ding in order a sua hi. Journalist Wangkhem ahileh local news channel ah anchor-reporter ah sem a hia, a chiata November 21, 2019 ni ah Facebook video post ah Manipur chief minister N Biren Singh leh Prime Minister Narendra Modi demna a bawl ziak ah mat ah um a hi. Social media, Wangkhem in Bharatiya Janata Party (BJP) leh Rashtriya Swayamsevak Sangh le demna bawl in, chief minister N Biren Singh chu Hindutva ngaisang in a la dem hi. National Security Act (NSA) nuai ah November 27, 2018 ah mat ah a um tawh kitawn ah December 13, 2018 ah a chungchang thu lel ding board siamdaw ah um in, zia board chun, tha 12 sung jail ah um ding ah thutanna a siamkhawm a hi. A langkhatlam ah National Security Act (NSA) nuai ah journalist Kishorchandra Wangkhem mat ah a um banah jail term maitua ding ah thutanna siamkhum ah a umna chung in, organisations chuamchuam in thasuak ding phutna a la nei ua, national media ah headlines in a pang hial hi.