63rd Wildlife Week Celebration khak hita; Commercial hunting banned ding pawimaw: Governor

Imphal, Oct. 8 *(Nisin Thuhiltu)* : State Forest and Environment Department organised bawlna' Manipur State Film Development Society, Palace Compound, Imphal East District ah 63rd Wildlife Week celebration mat ah um chu tuni'n khak in a um hi. Zia hun chu Manipur Governor Najma Heptulla in khuallian hina tawh a uap a, ama'n a thugenna a chun, State Government in sum mutheina ding ah gamsa thana a dodal ding a nawp thu gen in, commercial hunting banned ding pawimaw in a gen a, khawvel in biodiversity hotspots 34 a nei lak ah India in biodiversity hotspots 4 - Manipur chu two hotspots pani - Himalayan leh Indo-Myanmar biodiversity hotspots ah pangkha a hidan gen in, Manipur’s biodiversity lak ah pakcha chi chuamchuam (angiosperms) 4,000, medicinal plants 1200, edible fungi 34, orchids 500 val, gua (bamboo) chi 55, vacha (birds) 695, Sanga 160, migratory aquatic birds, pengpelet leh ganhing chi dang 21 um in a gen a, zia te venbit ding chu mipi leh government mawpuakna ti'n a gen hi. Bishnupur district ah wetland liantak um a hidan gen in, zia mun chu China, Mongolia leh Siberia apat vacha tamtak in kumsin October - February ah ve'tha sek a hidan uh a gen a, himaleh tuhun ah Ithai Barrage siam ziak ahileh vacha te ding ah nek leh chak ding haksat ziak a hi diam ti hiatlo ah vacha kiam chuam mama ta ti'n a gen hi. Loktak Lake, Sangai umna Keibul Lamjao ti te kituptak ah venbit pawimaw in le a gen hi.

Hun matna uap, Chief Minister N. Biren Singh in a genna a chun, hill districts chuamchuam ah um te'n wildlife leh environment protection pawimaw dan a hiatdaw thakna chung ua kipak mama a hidan gen in, hun chawmkhat sung migratory bird Amur Falcon in Manipur’s Tamenglong district phatalo himaleu tukum ah muthei ah a um kitttakna chung ah organisations leh villager te'n hiatlo ah panlakna nasatak nei a hidan uh kilang in a gen a, mihing te khawsakna'n, gamsa, thing leh gua nasatak ah pawimaw a hidan gen in, thing leh gua nasatak ah chiin be ding pawimaw ti'n a gen hi. Government bep in policy kisiam te kituptak ah sukpitin theilo ding a hina chung ah mipi te panpina leh kithuapina pawimaw in a gen hi. Gua zuk dan kituplo ziak ah lobawlmi te'n haksatna a tuak sek teu sukven theina ding ah State level committee in thil umdan etzuina nei ah Minor Irrigation Department in district chuamchuam ah mun 51 ah tui piakna a hawilo ziak ah lo bawlna lemchanglo ah a mudaw uh tawh kitawn ah Public Health Engineering Department (PHED) in Minor Irrigation Department in a pawimaw dungzui ah tui piakna amat ding ah water pipes peding tin a gen hi. Imphal East, Kumbi village ah lobawlna tui taksapna lian mama a hina chung ah Rashtriya Krishi Vikas Yojana (RKVY) nuai ah water pump sets piak theidan tiang ah piak hiding, Thoubal Dam left leh right canals pat tui laksawn hiding in a gen hi.
Zia ah hun matna chu, Forest and Environment Minister Th. Shyamkumar, CAF and PD Minister Karam Shyam, Tribal Affairs and Hills Minister N. Kayisii, Additional Chief Secretary (Forest and Environment) Dr. Suhel Akhtar leh Principal Chief Conservator of Forests K. Angami te'n le a uap ui.

Hun mat sung in, Governor Najma Heptulla in Animal Attendant of Manipur Zoological Garden, Angam Komodan, Rainforest Club, Tamenglong leh Th. Shamungou Singh of Bishnupur District te kiang in incentive awards Rs. 5000 leh citation piakna a nei a, 12 Assam Rifles, Khudengthabi, Animal & Husbandry Department, The Sangai Express, Imphal Fress Press, People’s for Animal and Sub-Inspector Y. Motilal of Bishnupur Police te kiang in Appreciation Certificates piakna le a nei hi. Chuleh, Wildlife Week celebration ding ziak ah kibawl, State level photography, quiz leh debate competition prize piakdawna le a um hi.

ATSUM in economic blockade chawlsan phawt; Govt. in Committee siamdawk
Imphal, Oct. 08 *(Nisin Thuhiltu)* : All Tribal Students’ Union Manipur (ATSUM) in Manipur University buaina sukven ding panna demand chuamchuam nei ah state government kiang ah Charter of Demands a piak state government in a limsaklo ziak ah ni 5 sung economic blockade bawl ding ah thupuan a bawl chu state government tawh kiho thei ah a um kittakna chung ua hunchawmkhat sung a ding in chawlsan kit phawt hi. Hiatthei khat chu, ATSUM, ANSAM leh KSO GHQ lawiupa te'n Chief Minister of Manipur, N. Biren Singh tawh CM Secretariat ah dakkal 2 phial kihon a nei nung ua, government in ATSUM, ANSAM leh KSO GHQ , Charter of Demands enzui ding, committee siamdaw ding ah lemsakna a nei tawh kitawn ah economic blockade chawlsan kit ah um a hi. Charter of Demands enzui ding committee member ding a chun, Additional Chief Secretary, M.H. Khan (Chairman); Secretary, Government of Manipur, Athem Muivah (Convenor) leh Principal Secretaries- Rakesh Ranjan leh Vumlunmang Vualnam banah Commissioner of Higher Education, H. Deleep Singh te chu member ding ah guat in a um ui. Zia commitee chun, tribal students’ organizations te Charter of Demands etzuina nei ding leh tha khat sung ah report piaklutna nei ding a hiu. Tribal students’ organizations te Charter of Demands lak a chun, separate Hill Central University umsak ding, Manipur Universitybuaina um zing sukven ding ti te le pansak in a um hi. ATSUM Office, Adimjati Boys Hostel complex, Imphal ah ATSUM general secretary, Seiboi Haokip in Press confernce ah thuthak lakhawm mite kiang ah a genna a chun, Chief Minister in separate Hill Central University ahiloleh Indira Gandhi National Tribal University (IGNTU) kiti full-fledged university ah up-gradate ding ah a genpi banah Manipur University buaina a vaima theilam ah sukven ding government ngaikhawk a hina chung ah kiphinna nei ding chawlsan phawt ah um in a gen hi. Finance Secretary of ATSUM, S.R. Andria in a genna a chun, Manipur University ah buaina um mun mama a hina chung ah hill areas ah students leh colleges te'n nasatak ah buaina a tuak zing uh sukven theina lampi umsun, separate Hill Central University umsak ding hin a gen hi.

Pepe Recreation Centre hawn hita

CCpur, Oct. 8 *(Nisin Thuhiltu)* : PK Neihsial in Khuga Dam leh Mohan Junction kikal, Khuga Canal, Mata ah Pepe Recreation Centre a siam chu a chiata 6 October 2018 ah hawn in a um hi. Rev.Lamkhogin Khaute in Pepe Recreation Centre hawnna leh Pathian kiang in a latna a nei hi. Pepe Recreation Centre a chun, Picnic bawltheina ding, Kuang ah kitawl theina ding, naupang kigel theina ding ti te a um a, kihuithana matthei zing hita ding ti a hi. Chuleh nisin ah zingkallam dak 10:00 apat nitaklam dak 4:00 kikal ah kihawng ding, a lutman mi piting te Rs 30 hiding, naupang te Rs 20 hiding leh tui ah ki zap, kuang ah kitawl ti te chu mani sia leh pha hiatna hiding, picnic bawlna ding ah ni khat ah Rs.2000/- hiding, um leh bel, thing (firewood) a thawn hiding a hi. Booking leh thuchian hiatbe nuam te'n contact No. 8729881189 ah thuhiat thei ding a hi.

Award sâng ding

CCpur, Oct. 8 *(Nisin Thuhiltu)* : Churachandpur District ah nasep hawi ziak in, Poshan Maah Award Best AASHA leh Best ANM Award sâng ding in Dimkhanman w/o Tualchin Neihsial, New Lamka leh Naotin Vaiphei w/o Ngamjang Baite of D. Harmon Village, Sagang te teldaw in a um ui. Mi 2 te'n New Delhi ah 10th October 2018 leh Award sâng ding a hiu.

LIC, Churachandpur Branch in office thak ah nasep panta

CCpur, Oct. 8 *(Nisin Thuhiltu)* : Life Insurance Corporation of India (LIC), Churachandpur Branch in Hmarveng ah a office thak uh lua nasep a pan ui. Himaleh Internet lam a buaina a um naklai ziak in premium sung dingte a ding in counter khat bep hawn in a um nalai hi. Building Complex ah staff quarter ding 4 le siam in a um a, office building ahileh asawng ah kisa, Ground Floor ah Branch Manager, Claims Department, Policy Servicing Department, Finance & Accounts Department leh Information & Technology Department ti te um in, First Floor ah Salary Saving Scheme Department, Sales Department, Office Service Department, Agent Lounge leh Conference Hall ti te a um hi. LIC Churachandpur Branch ahileh Silchar Division nuai ah um, Branch Manager etkawlna nuai ah staff 39 leh Agent 200 val umna a um hi. Hiatthei khat chu, LIC Churachandpur Branch a umpatna' kum 1987 apat Hiangtam Lamka ah rent ah office a lua zing uh, Hmarveng ah office mun ding a chawkdaw uh tawh kitawn ah kum 2016 apat office leh staff quarter ding sakna kipan ah a zawthian uh tawh kitawn ah October 5, 2018 ah office kichawn a hiu.

Food Safety Display a bawl chiat ding ua hiatsak
CCpur, Oct. 8 *(Nisin Thuhiltu)* : Designated Officer, Food Safety & Standard Wing, Churachandpur in khawpi sung ah nekthei siamna, Hotel, Restaurant leh Bakery neite hiat ding ah thusua a bawlna a chun, nekthei siamna zosia'n FSSAI Licence Number leh FSS (Licensing & Registration of Food Business) Regulation, 2011 tawh kituak ah nek leh chak ding a siam ngeinau ti muthei ding ah a dawr sung ua bailam tak ah muthei ding ah Food Safety Display Board (FSDB) ah a tak chiat ding un hiatsakna a bawl hi. FSDB copy ahileh FSSAI webpage ah download thei ding, FSDB chu A4 size ah, dawr lutna, Reception Area, Billing Area leh a dangdang ah takdaw ding, zia hiatsakna zuilo te chu FSS Rule leh Regulation dungzui ah action lakkhum hiding ti'n K. Sunita Devi, Designated Officer, Food Safety, Churachandpur suaikaina press release in a taklang hi.

YPA GHQ in hiatsakna thusua bawl
CCpur, Oct. 8 *(Nisin Thuhiltu)* : Young Paite Association (YPA) General Headquarter in khawsung-vengsung thianthona ding ah YPA GHQ mapuina nuai ah YPA Lamka Block, YPA Lanva Block leh YPA New Lamka Block leh a nuai ah Unit zosia'n Joint Meeting a nei hun ua thupukna a siam gual ua, gamsung ah khamthei zuak leh Physical Training (PT) paulap ah khawvakma naupang zalentak ah vakdawk sek te a nu leh pa, piting khat etzuina nuai ahiloleh naupang khawvak masang ah pawt phal hitalo ding in thusua a bawl a, khawsung-vengsung a gamtatna kilawmlo leh patauna thei thil piansak a um a, patau dak khet a um leh mipi 'n delkhawm ding in hiatsakna leh chialna a bawl hi.

Electoral Roll Special Summary Revision Campaign bawlna chiatha zing

CCpur, Oct. 8 *(Nisin Thuhiltu)* : Election Department, Churachandpur leh Pherzawl District in tulai in Special Summary Revision a nei uh chiatha zing in mun chuamchuam in campaign a bawl a ui. Election Department in Special Summary Revision a nei uh October 31, 2018 a bei ding a hitak tawh kitawn in Electoral Roll a min um nailo, January 1, 2019 ah kum 18 ting thei ding te min khum lutna, umna kichawn ziak ah min khumthak ngai leh paithak ngai ti te hawlna a nei zing ui. Zia dungzui a chun, hospital ah OPD Counter ah ticket la te leaflet piakna nei in, gas agency chuamchuam ah le piakna a nei ua, High School chuamchuam in le campaign a bawl ui. Zialo a chun, government program chuamchuam mat hun in le campaign a chiapi zing ui. Tuzingkal in le Khrishna Kumar, IAS, AC to DC, Election in-charge leh Dingluai, Assistant Election Supervisor te’n gas agency chuamchuam ah gas late kiang ah Campaign bawl in, Electoral Roll a min khulut ding, sukdik ngai um te leh paithak ngai te amau huapsung ah Assistant Electoral Registration Officer (AERO/ERO/SDO)-te kiang ah siamthak thei, a lemchanglo te'n DC Office ah Election Department siam thak sak thei ding uh ti'n a taklang ui.

ZYA Tuivai Block in election nei

CCpur, Oct. 8 *(Nisin Thuhiltu)* : Zomi Youth Association ZYA Tuivai Block in Tonzang khua ah kum 2019-2021 sung block lawiupa thak ding telna a nei hi. Zia hun a chu, ZYA GHQ in amapui a, ZYA Tuivai Block huapsung ah Unit 9 apat palai te chiakhawm in lawiupa thak ding a tel ui. President ding ah Khaikhankhup, Zecretary: Zamsuanlam, Finance: Mangchinkhup leh Treasurer ding ah P. Pauzalian te a telting ui. ZYA Tuivai Block in Cabinet member ding Vice President, Joint Secretary Information leh a dangdang te amau lemchan dan zil ah a guat ding uh ti a hi.

Gorkha FC leh SSPP FC in gualzo
CCpur, Oct. 8 *(Nisin Thuhiltu)* : North East India apat Delhi tualpi ah government nasem Innkuan ah um te banah thiamzil te a ding ah kum sin leh um sek, ONGC Northeast Tamchon Football Tournament 2018 kiti Dr BR Ambedkar Stadium, New Delhi ah October 6 a pat October 20, 2018 sung um ding chu a chiatha zing hi. 12th ONGC Northeast Tamchon Football Tournament 2018 a chun, northeast state apat football club/team 16-a pang ua, group 4 ah kikhen in, kihelna chiapi in a um hi. Tuni'n sunma dak 10:30 in Hmar FC leh Senapati Red Star FC kimawl te a kihel ua, sun dak 12:30 in Zogene FC leh Gorkha United FC te a kihel in, match pathumna nitaklam dak 2:30 in SSPP FC leh Muvanlai Athletics FC te a kihel ui. Ziana a chun, Hmar FC leh Senapati FC te goal kikhum tualo in 0-0 in a ki kidraw ua, Zogene FC leh Gorkha FC kihelna Gorkha FC in 2-1 ah gualzawna chang in, SSPP FC leh Muvanlai Athletics FC kihelna', SSPP FC in 1-0 ingualzawna a chang hi. Churachandpur apat SSPP FC in October 11, 2018 nitaklam dak 2:30 leh Sikkim FC maitua ding a hi.

SDFK, chairman leh commander in chief mat ah um
CCpur, Oct. 8 *(Nisin Thuhiltu)* : Shangshak Battalion of Assam Rifles in Socialist Democratic Front of Kukiland (SDFK), chairman leh commander in chief Boithang Haokip chu October 7, 2018 in Philengkot village in aman hi. Socialist Democratic Front of Kukiland (SDFK) ahileh March 2018 ah kiphutdawk a hi. Boithang Haokip alias Letminthang Haokip ahileh tumasang ah General Secretary of KNF (N) le a hi. A kigendan ah SDFK in armed cadres 25 nei ding ah ginchat hin a kigen a, galvan ah sumkawl veina leh sum demand bawl ti te chiapi sek un le a kigen hi.

Miss Kut second screening um ding
CCpur, Oct. 8 *(Nisin Thuhiltu)* : P. Doungel ,IPS, Secretary, State Level Kut Committee, Manipur in thusua a bawlna a chun, Miss Kut candidates ding second screening, 10th October 2018 ( Wednesday),11 am leh 1st MR Banquet Hall ah um ding a hi. Zia hun a chu 7th October 2018 ah first screening ah pangtheilo te pangthei ding uh ti'n a taklang hi.

Kangpokpi District ah Saktiman accident ah mi 5 liam

CCpur, Oct. 8 *(Nisin Thuhiltu)* : Bongjang khua, Island Sub-Division, Kangpokpi District ah tuni nitak lam dak 2:00 vel in Shaktiman khat a accident hi. Ziana a chun, mi 5 ten liamna a tuak ua, amau lak a chun, Beulahland Village apat Letlal Vaiphei (50 yrs), Haumin Vaiphei (43), Tv Hauginlian Vaiphei (27 yrs) te JMINS Casualty tut a hi nung un, Raj Medicity tut in a um ui.

Gari accident ah pawsal 1 thi

CCpur, Oct. 8 *(Nisin Thuhiltu)* : DTO opposite, Tedim Road ah tuni nitaklam dak 4:30 vel in Bike leh Shaktiman kiphutua in, ziana a chun bike hektu'n thina a tuak hi. Bike hektu ahileh Saithangvung Hramgchal (31) s/o Hrangchal Sharon, Saikot Homeland, Lallawmum (44) s/o Chawithang of New Saikot tawh kipua a hiu. Thiluang ahileh Police te'n la'n District morgue in a kawi ua, gari 2-te le police station in a kawi ui. A langkhatlam ah bike ah chuang, Lallawmum (44) ahileh bangma a ti puai. Chun, zia thu zik a hi tiang ah banggual ah kihona nei, banggual ah police in accident case bawzuina nei ti hiat a hi puai.

Sports item piakdawna nei

CCpur, Oct. 8 *(Nisin Thuhiltu)* : SHQ, Border Security Force, Koirengei nuai ah 54 Bn BSF in tuni'n THQ Loktak ah civic action programme chiapi in Suneel Kumar Singh, Commandant leh VLK Vaiphei, Dy. Commandant, 54 Bn BSF in 'LFC' (Loktak Football Club), Komkeirap, CCpur te khut in Sports item chuamchuam piakdawna a nei hi. Zia program chu civil mite tawh kinaizawk semna ding ah Border Security Force in a bawl a hi.

7th Pay Demand JAC in Mass Casual Leave ding ah vau
Imphal, Oct. 08 *(Nisin Thuhiltu)* : State Government in 7th central pay chiapi ding ah phutna tuni tiang ah a limsaklona chung ah October 18, 2018 tiang ah limsak a hi diaklo leh Joint Administrative Council (JAC) of All Manipur Trade Unions’ Council (AMTUC) leh All Manipur Government Employees’ Organisation (AMGEO) in lung-awilo suklatna October 19 leh 20 ah ni 2 sung mass casual leave la ding leh office ah nasemlo ding un, State Government vauna a bawl hi.