State in National Cleanliness Day ah Mahatma Gandhi 149th birth anniversary mang:
Bandh leh Blockade apat kikawi kang ding ah Chief Minister in mipi te chial

Imphal, Oct. 02 *(Nisin Thuhiltu)* : Gandhi Memorial Hall, Imphal ah tuni'n Mahatma Gandhi birth anniversary tawh kituak in National Cleanliness Day & Declaration of ODF Manipur ti mat in a um hi. Zia hun matna chu Manipur Governor Dr. Najma Heptulla in khuallian hina tawh a uap a, ama'n a thugenna a chun, tukhang ah Mahatma Gandhi ziltilna a la um te kituptak ah chiapi ding leh mihing te kihepi tua chiat ding pawimaw a hidan gen in, Gandhi in khutmat thupipen ah a nei, non-violence kikawppi chiat ding a nawp thu a gen hi. Mahatma Gandhi philosophy, non-violent ah kiphinna leh civil disobedience chu India ah zelenna muna ding mai hilo ah khawvel ah political activists chuamchuam tiang ah Mahatma Gandhi philosophy kichiapi in a gen hi. Mahatma Gandhi in thianthona leh lungnuam tak ah khawsak ding ala ngaikhawkdan genlang kawm in, Central Government in Mahatma Gandhi lungtup mualsua theina ding “Swachh Bharat” mission pandawk ah India gamsung ningtin ah thianthona mizosia'n a chiapina ding ua panlakna um hi'n a gen hi.

Hun matna uap, Manipur Chief Minister in a thugenna a chuun, government official leh school thuneitu te'n cleanliness drive bawl ah thianthona ding ah panlakna a nei uh chu kipakpi mama kawm in, kum khat sung, Mahatma Gandhi 150th birth anniversary lawpna ding ah Prime Minister Narendra Modi mapuina nuai government in panlakna a nei zing in a gen hi. Mahatma Gandhi 150th birth anniversary ahileh 2nd October 2019 ah mat hiding a hi.

Mahatma Gandhi in masang ah a la thugen leh ziltilna a la nei te tuhun tawh kituak tamtak um a hidan gen in, ama ziltilna hiatpi kawm ah United Nations in 15th June, 2007a khah 2nd October chu International Day of Non-Violence ah a puan hi'n a gen hi. India gamsung ah Manipur chu Open Defecation Free State te lak ah a 23rd tinna hi'n a gen a, tunaicha kihawng thak Google Toilet Locator mang ah mobile phone a pat public toilet umna hiatthei ding a hidan a gen hi. Swacch Bharat Mission chu political party te phatchuampi ding mai hi ah khenkhat in gen sek maleu gamsung mipi te phatchuampi ding hizaw ti'n le a gen hi.

Manipur University buaina tawh kisai a genna a chun, senior journalist te panlakna zal ah Government leh MUTA in kihona neipanta ti'n a gen a, ngaina gual ah Manipur University a um kit theina ding ah kihona sunzawm zing ding uh ti'n a gen hi. State mipi te chu buaina sukven theina ding ah government kithuapi ding ah chialna bawl in, tu ah government ‘Dictator’ gual ah vaihawm ti ah ngawnna um te chu government in ‘Dictator’ gual ah vaihawm hizawlo ah dan leh thupiak (law and order) dinmun control bawlna ding ah nasep thilbawl a nei hizaw ti'n a hilchian hi.

Police Constable, Male 2013-16 recruitment candidates te'n bandh bawl ding ah thupuan a neinau tawh kisai a genna a chun, High Court ah case pending hizing nalai a hidan gen in, state government in court thuneina chung ah nasep thilbawl neitheilo ti'n a gen a, bandhs leh blockades a pat kikawi kang ding in a chial hi. Bandhs leh blockades ziak ah mitamtak in haksatna tuakzing sek a hidan uh hitamillo ding pawimaw in le a gen hi.

Zia ah hun matna a chun, Governor Dr. Najma Heptulla in Chief Minister N. Biren Singh khut ah Open Defection Free (ODF) States certificate piakdawna a nei a, mi 7 te kiang in best Swachhgrahi award piakdawna nei in, Mahatma Gandhi zana piakna hun amapui hi. Deputy Chief Minister Y. Joykumar Singh, Cabinet Ministers, MLAs, Chief Secretary, DGP, top civil leh police official te'n le hun matna a uap ua, hun matzaw in, Chief Minister, Deputy Chief Minister, Cabinet Ministers leh MLA te'n Manipur Secretariat Complex, Imphal ah National Cleanliness Day matna a uap zawm ui.

Philanthropic organisation chuamchuam in YPATotal Shutdown support thu puang
CCpur, Oct. 02 *(Nisin Thuhiltu)* : Young Paite Association (YPA), General Headquarters, General Secretary, Lianmuanthang Valte tha' ding gua a umna tawh kisai in, lung-awilo suklatna' YPA GHQ in October 3, 2018 dak 10:00 AM apat 4:00 PM sung Total Shutdown bawl ding in a puang hi. Zia hun sung a chu, Permission dang himhim bawl hilo ding ti'n le a taklang hi. Chun, Young Paite Association General Headquarters General Secretary thana ding ah tuni tiang ah kigawlkha, Mr. Lalnuntluanga s/o (L) Lalhmingthanga, Salem Veng leh Mr Romeo, Ex-Town Commander, ZRA te chung ah Lawyer leh midang kuama in panlakna neilo ding ah dawtna leh hiatsakna bawl in, panla teitei a um leh YPA in ziagual mite chung a chu action khauhtak la ding, kuama'n NAM thil ah latheilo ding ti' a hi. A langkhatlam ah YPA GHQ General Secretary, Lianmuanthang Valte tha' ding panlakna chu philanthropic organisation chuamchuam - Young Vaiphei Association (YVA) General Headquarter, Kuki Khanglai Lompi (KKL) General Headquarter, Zou Youth Organisation (ZYO) General Headquarter, Simte Youth Organisation (SYO) General Headquarter,Young Mizo Association (YMA), Manipur, Kuki Students' Organisation, Churachandpur District, Khangthah Zuun Pawl, GHQ etc in demna nasatak in a bawl ua, gim leh chawl khawk sa lo ah a sun a zan a gengthei liangvai te sawmdawl leh panpi ding ah pang, puitu te chung ah tigual thil kilawm lo tak bawl guatna ngaithiamlo a hidan uh a taklang ui. Chun, YPA GHQ in October 3, 2018 dak 10:00 AM apat 4:00 PM sung Total Shutdown bawl ding ah a puan chu support bawl chiat ding a hidan uh a taklang ui.

ZRO in Lianmuanthang Valte tha' ding guatna chung ah kigawllo a hidan taklang
CCpur, Oct. 2 *(Nisin Thuhiltu)* : Zomi Re-unification Organisation (ZRO) in a chiata date 22nd September 2018 ni ah Mr. Lalnuntluanga S/O (L) Lalhmingthanga of Salem Veng, Lamka leh Mr. Vumthianlal Tombing @ Romeo s/o T. Ginzakap, New Lamka ten Lianmuanthang Valte, General Secretary, YPA GHQ leh Education (s), Govt. of Manipur nuai ah teacher ah sem tha' ding gua ti tawh kisai a hilchianna a bawlna a chun, zia gual guanggalna chu Zomi Re-unification Organisation (ZRO) in hiatpilo leh ngawna um te zuau thu ngawn hi'n a taklang hi. Chun, ziagual tualthana nasep thilbawl nei ding ah guanggalna chu nasatak ah demna bawl in, ZRO in ngaw ah um Mr. Lalnuntluanga tawh kisaikhakna neukhat le neilo ahi dan gen in, Mr. Vumthianlal@ Romeo le discipline hawilo ziak ah ZRO in a chiata 7th August 2017 ah suspend a bawl banah organisation min ah nasep thil bawl neitheilo ding ah gakna um a hidan taklang hi. ZRO cabinet thupukna tualthana nasep chiapi ding a kigua ti ah kigen le chetna bangma umlo, numei naupang tiang fuisiat nawpna gual hin a taklang a, ziagual kipawng ngawna chu hiatthiam haksa a hidan a taklang bawk hi. ZRO in hotu masate'n tup leh dawi kichian tak nei ah pawlpi a phudaw uh a hi dungzui ah zia tup leh dawi te chu supiting ding ah panlakna chiapi zing nalai a hidan taklang in, tulai tak ah Manipur ah Zo suan te'n political status khat neitheina ding theitawpsua kalsuanna zing in a taklang a, Cabinet meeting Agenda tamzaw te le political status neitheina ding tawh kisai ngen hin a gen hi. Mr. Lianmuanthang Valte ahiloleh mimal kuama chungchang thu cabinet in Agenda nei khalo, tualthana ding ah organisation sum/fund seki khat le kimang khalo, cabinet meeting minutes bangkim kituptak ah kikawi, a ennuam te ding ah le a pawimaw leh etthei ding ti'n a taklang hi. Chuleh, tualthana nei ding kisa mat ah um te dan tawh kituak ah gawtna piak ding dawi a hidan taklang in, thil umdan organisation in kituptak ah entha zing in a taklang a, diklo tak ah kingawna um te ziak ah a chiatha zing political dialogue chawbuai theina ding ah panlakna nei a um leh organisation in ngaithiamlo ding ti'n le hilchianna lekha kimu'n a taklang hi.

NERCORMP Wrap Up meeting nei

CCpur, Oct. 2 *(Nisin Thuhiltu)* : North Eastern Council (NEC) nuai ah um NERCORMP,CCpur Project nasepna external agency hire ki bawl Monitoring and Supervision Mission Team in Churachandpur, Chandel, Changlang, Tirap leh Longding district visit zo in. A mau findings, observation leh suggestion a nei teu NEC Secretariat Conference hall ah NERCORMP Chairman Ram Muivah, Secretary NEC Chair na nuai in wrap up meeting 1st October, 2018 ni in a nei ui. Zia meeting chu NERCORMP Churachandpur district thasik in D. Khuala Vaiphei, District Project Director in a uap hi. Mission team in NERCORMP nasep chu mipi tamtak in a lawkpi ngei nau ti muchian a hidan uh report a piaknau a chun a taklang ua, lungtung umsa a hhidan uh a gen ui. Chun, Suggestion khenkhat a nei teu le genlatna a nei ua, zia te chu genkhawmna a nei ui. Meeting ahileh North Eastern Council (NEC) Secretary in Chair banah top official NEC Planning Adviser, Financial Adviser leh Adviser Horti leh NERCORMP Managing Director leh official ten le a uap ua, Mission Team field visit bawl te ahiuleh - Dr Vincent T Darlong , Team Leader cum Livelihood Specialist leh former IFAD Country Coordinator India leh tu ah Vice Chancellor , Martin Luther Christian University, Shillong te a hiu. A langkhatlam ah NERCORMP Phase IV le hung um pai ding ah Govt of India in panlakna nei zing in zia meeting na a chun a kigen hi.

CM in Satellite Television Channel hawng

Imphal, Oct. 02 *(Nisin Thuhiltu)* : Chief Minister N. Biren Singh in tuni'n Uripok Khoisnam Leikai, Imphal ah Lamjingba Times of Manipur Satellite Television Channel leh Newspaper hawnna a nei hi. Chief Minister in a thugenna a chun, chamna leh muanna a um theina ding ah media in panmun pawimaw tak nei a hidan gen in, Satellite Television Channel a um ding chu state government leh state mipi te thil dawi mama khat hi'n a gen hi. Lamjingba Group in Satellite Television leh daily newspaper a hawn uh chu kipakpi mama kawm in, tu ah khawvel in Satellite Television Channel apat Manipur ah bangthil tung a hi em tite hiazing theita ding uh ti'n a gen a, a selam ah thuthak thezakna a tawm theina ding ah state mipi leh mimal ti'n in a phalam lunggel neitam ding pawimaw in a gen hi. Newspaper ah kisua thuthak lathak um te chu a phalam ah matchak dan thiam ding pawimaw in le a gen a, state sung ah idea leh talent nei hawi taktak tamtak a umna chung ah Manipur Start-Up scheme nuai ah applicants 3000 val um in a gen hi. Deputy Chief Minister Y. Joykumar Singh, Minister for CAF and PD Karam Shyam, Deputy Speaker K. Robindro, MLA Kakching A/C Y. Surchandra Singh te'n le zia hun matna chu a uap ui.

Govt in minority te dinmun dawmkang ding ngaikhawk:CM

Imphal, Oct. 2 *(Nisin Thuhiltu)* : All Manipur Muslims (Meitei Pangal) Welfare Association in tuni'n Hotel Imphal, North AOC Imphal ah Association Silver Jubilee a lawm hi. Zia hun chu Manipur Chief Minister N. Biren Singh in Chief Guest hina tawh a uap a, ama'n a thugenna a chun, government in nam niam leh a changkanglo te ngaikhawppen ah nei ding leh a dawpkangna ding ah panlakna nei ding hin a gen hi. Politics kiti kikhenzakna ding hizawlo ah community chuamchuam um te kal ah kihiatthiamna ding leh state sung ah chamna leh muanna a um theina ding ah panlak ding hizaw a hidan gen in, state sung ah khantona kituptak a umlo a hileh chamna um theilo ding hin a gen hi. State sung ah anti-social activity chuamchuam um sek te sukvenna ding ah a ziak kichian tak hawldaw ding pawimaw tin le a gen a, tu ah state government in kuama sakhua, caste, community etc ah khenchuam neilo ti'n a gen hi. Prime Minister of India Narendra Modi in tunai ah healthcare scheme “Pradhan Mantri Jan Arogya Yojana- Ayushman Bharat” kiti hawng a hidan gen in, India gamsung ah migenthei crore 50 tuam in phatchuampi ding, scheme phatchuampi thei ding te, a phatchuampi thei dingg te SECC 2011 data dungzui teldaw hiding, family khat in Rs 5 lakh cover per year ah mu ding uh ti'n a gen hi. Chun, Lilong ah Women’s Market sakna ding ah Rs. 2 crore bithiat ah um in a gen a, Minority areas ah Model school le sak hiding, Lilong ah Sadbhavana Mandap le umsak hiding in a gen hi. Zia hun matna a chun, Chief Minister AMPWA website leh souvenir hawnna le a nei hi. Deputy Speaker of Manipur Legislative Assembly K. Robindro Singh, MLA Wabagai A/C Md. Fazur Rahim, MLA Jiribam A/C Asab Uddin, Additional Chief Secretary Dr. Suhel Aktar, Chairperson of Manipur State Minorities Commission Dr. Syed Burhanuddin, President of All Manipur Muslims (Meitei Pangal) Welfare Association A.R Khan te'n le hun matna a uap ui.

DWSC mapuina' District in Swachh Bharat Diwas mang

CCpur, Oct. 2 *(Nisin Thuhiltu)* : District Water & Sanitation Committee, Churachandpur mapuina' tuni, October 2, 2018 zingkal lam dak 11:30 in DTC Hall, Tuibong ah Swachh Bharat Diwas mat in a um a, V. Hangkhanlian, Minister, Agriculture, Veterinary & Animal Husbandry, Government of Manipur in Chief Guest hina tawh hun matna a uap hi. Hunmatna kipat masang in Quiz competition a um a, Vimala Raina Government High School-I, Gandhi Memorial High School, Rengkai Government High School, Vungzagen Higher Secondary School, Phungkhothang High School leh Vimala Raina Government High School – II te kidemna in a pang ui.Hun matna Khumi Gangte, District Coordinator, SSA-Residential School in a mapui a, Khaikhopau Ngaihte, Assistant Commissioner, Churachandpur in vaidawnna nei in, TK Simte, MCS, CEO, ADC, Churachandpur, Kabib K., IPS, Senior SP Churachandpur leh Shyam Lal Poonia, IAS, DC Churachandpur apat thugenna a um a, Chief Guest Hangkhanlian in Beti Bachao Beti Padhao Anthem hawndawna leh thugenna a nei hi. Krishna Kumar, IAS, Assistant Commissioner in huntawp a kipahthu gen in hun a mangzo ui. A langkhatlam ah Quiz Competition in, Vimala Raina Government High School-I in 1st, Gandhi Memorial High School in 2nd leh Rengkai Government High School in 3rd hina a chang ua, Essay Writing Competition ah Thenhoi Kipgen in 1st hina chang in, Rs. 2,000 leh Certificate a dawng a, S. Thangchinmang in 2nd hina chang in, Rs. 1,500 leh Certificate, K. Benjamin leh Lhingpihoi in 3rd hina chang in Rs. 1,000 leh Certificate a sâng ui.

Nushing Officer sepna muthak
Nk Manhoivak (Vavak Suantak) d/o Gintinthang leh Nk Khumlalzou (Zouboi Thanglet) d/o S Benjoy te'n tunaicha a khan, AIIMS Nursing Officer exam ah lawtinna a chang ui. Vavak ahileh AIIMS (New Delhi ) BSc Nurshing zo, Zouboi ahileh AIIMS (Bhopal) ah BSc Nurshing zo a hi. Nk Jouboi Thanglet in AIIMS Delhi Nushing Officer a zikdaw masang in AIIMS (Bhubaneswar leh Bhopal) in le a la zikdawk hi. Tunung sawtlo ah a sepna zikdaw thak uh zawmta ding hin a kigen hi. A langkhatlam ah Chingngaihlian (Lialian Vaiphei) d/o KK Vaiphei, Compound Veng in le tunaicha a khah GNRC, Guwahati in B Sc nursing a zo a, zia mun a chu semzawm ngal in a kigen hi.

Regional SARAS Fair 2018 um ding
Imphal, Oct. 2 *(Nisin Thuhiltu)* : Sell products chuamchuam promote bawlna ding ah Rural Self Help Groups, Manipur State Rural Livelihoods Mission (MSRLM) in 30th October - 8th November 2018 sung ah Iboyaima Sumanglila Shanglen, Palace compound, Imphal ah Regional SARAS Fair bawl ding a hi. Zia chu rural area ah inchen haksa, khutthiam thilbawl ah talent hawi taktak neite dawpkangna ding leh masawn theina ding tupna organised kibawl ding hi'n MSRLM in thusua a bawlna a chun a taklang hi.

Khuado Pawi 2018 mang

CCpur, Oct. 2 *(Nisin Thuhiltu)* : Tedim-Chin Cultural Club Sub-Committee, Lamka mapuina kum sin ah a matsek uh, Khuado Pawi 2018 matna tuni October 2, 2018 zingkal lam dak 11:0 0in Tedim-Chin Innpi, TCCC Hall, Lanva in a um hi. Zia hun chu, V. Hangkhanlian, Minister, Agriculture, Veterinary & Animal Husbandry, Government of Manipur in Chief Guest hina tawh uap in, N Thuamkhansuan, MCS SDO/BDO Mualnuam leh H. Pauzacin, President, TCU HQ te’n Special Guest leh Khuado Pa hina tawh a uap ui. Hun matna, Dr Dal Lian Haokip in a mapui a, James Lalpu leh JM Khualno leh a lawite’n mipi lasakkhawmna a mapui ua, Pastor S. Gozamung in hun patna nei in, N Khamkhanlam, chairman, TCCC Sub-committee in vaidawnna thu a gen hi. TCYA Tangnuam Unit, TCYA Pangzawl Unit, TCYA Lanva Unit, leh TCYA Lamka Unit te’n namlâm a thaw ua, hun tawp ah Khamsum Hatzaw, Secretary, TCCC Sub committee in kipakthu gen in, Rev. T. Muankhup, ED, BCMM in pauchapna nei in hun a khak ui. Bawng khat that in,mipi tamtak chiakhawm te’n pawi ann nekkhawmna a nei ui.

Tetea Livestock Development Centre hawng

CCpur, Oct. 2 *(Nisin Thuhiltu)* : Tuni October 2,2018 zingkal lam dak 11:30 in Kawnpui ah Bawngetkawlna leh a vâkna mun, Tetea Livestock Development Centre hawnna leh latna a nei ui. Zia hun a chun, a centre neitu, Darsangluaia@Tetea dawisaktu leh ngainatu tamtak chiakhawm in, Laltanpuii, MCS Joint Secretary, Agriculture and Veterinary, Government of Manipur in Chief Guest hina leh, H. Chaoba Singh, Director, Veterinary and Animal Husbandry Service, Manipur in Special Guest hinatawh a uap ui. Chief Guest in hawndawna a neizaw in, a chiakawm mipite tawh bawng kul etna ban ah machine chuamchuam mang ah bawng ann leh bawng chi bawlnate etkualna a nei ui. Hun matna ahileh Paul Lalchhanlhima in a mapui a, Rev Laldawnliana in Pathian kiang ah latna nei in, Guest-te leh gennawp neite apat thugenna a um hi.

ZSF in cabinet member ding guatna neifel
CCpur, Oct. 2 *(Nisin Thuhiltu)* : Zomi Students’ Federation (ZSF) GHQ ah mapuitu ding telzaw ahi dungzui in, tuni’n 2018-2021 sung a cabinet member ding guatna leh mawpuakna piak in a um ui.Mawpuakna neite ahiu leh, President - K Vallallian Vaiphei, Vice President administration - T Lallawm, Vice President external - James Lalboi, General Secretary - Justin leh Finance -Ginsuanlal ahiu a, Department Secretary-te ahileh Education Department ah Secretary Khamsum leh Assistant Secretary - Lhingneihnieng, Organization ah Secretary - H Hangkinlun leh Assistant Secretary - G Hauminlian, Social and Culture ah Secretary - Thangneihkham leh Assistant Secretary -Ngaisonniang, Games & Sport Secretary - Ginkhanlun, Information & Publicity Secretary - SN John leh Assistant Secretary - G Lianzamang ban ah Advisor - Khamneihtang Vaiphei leh Ex-Officio member - ZSF federating unit ah President ahiu.

HAS Day Chibai Bukna thusua bawl
CCpur, Oct. 2 *(Nisin Thuhiltu)* : Hmar Students’ Association (HSA) General Headquarter in HAS Day Chibai Bukna thusua a bawl hi. Thusua in a taklatna in, haksatna tamtak kal ahzillai naupangte leh nam a ding ah tuiluang gual ah chawllo ah kum 79-na Hmar Students’ Association min a kalsuan, Pathian chung ah kipakthu gen in, zing October 3, 2018 ah khawvel pumpi mun chuamchuam ah HSA Day mang dingte zosia HSA GHQ in dawisakna chibai a buk a, HSA Day matna ding hin nam a ding ah mualsuang tamtak kiphubena a hung hi ah, zillai a sang ah simte a ding ah khawvak kilawm tuntu hiding ah panla ding ah tilkho in, chuleh, HSA pandawktu, HL Daka, Thanglienkham, HS Saithang, John Vanlalphut, M. Seikang, H. Thanglor, Kaithuom, L. Lana, SN Ngurte, HT Sandam leh Lama-te kiang ah za’na sangtak piak ban ah,nam khantona ding ah mikhat ziang le pawimaw ahi ti’n, gin um tak ah maban kalsuan ding ah tilkho kawm in Joshua L. Amo, Information & Publicity Secretary, HSA GHQ in suai a kai hi.

GBC Annual Sports Week 2018 khakna nei
CCpur, Oct. 2 *(Nisin Thuhiltu)* : Grace Bible College (GBC), New Lamka in Marching Toward the Goal ti thupi mang ah September 26-28 sung ah Annual Sports Week 2018 a mat uh tuni’n a khakna leh kipakman hawmdawna hun a nei ui. Zia hun chu Colonel Mukesh Sharma, CO Sixth sikh Light Infantry in Chief Guest hinaleh Jaswant Singh, Subedar Major in Special Guest hinatawha uap ui.Hun matna in Guest-te apat thugenna ban ah, Nepali, Rongmei, Karbi, Paite te’n nam lâm a thaw ua, Chief Guest in kipakmante kipakdawna nei hi. Chief Guestin a genna ah,Grace Bible College in India gamsung leh khawvel mun chuamchuam ah Pathian nasem ding mi 1356 val midang a ding ah napha sem ding ah a bawldaw kipakpi mama leh Pathian dawidan ahi’dan gen in, GBC in Pathian dawilam naa tamtak a septo zel ding a dawisak thu a gen hi

STC/BSF, Ccpur in Khuga Dam sukthiang

CCpur, Oct. 2 *(Nisin Thuhiltu)* : India Pa' ti minvua ah um, Mahatna Gandhi pianni October 2, India government in “gamsung thiantho ni” ti ah puang in, thianthona tawh kisai ah gamsung pumpi in social work nei in a umsek hi. Tukum in, India government in “Swachhta Hi Seva” ti thupi chiapi in, Gandhi Jayanti mat in a um a, CCpur district inle zia nibîk matna chu nei in private leh government institute banah vengsung sukthianna a nei ui. Zia dungzui a chun, tuzingkal dak 6:00 apatin khawsung, office leh inn kim-le-kiang ban ah community hall mun chuamchuam sukthianna a nei ui. Gandhi Jayanti ahileh India in zalenna a muna ding malatu lak ah pang, Mohandas Karamchand Gandhi kipiakzawna hiatzingna ding aha pianni October 2, India gamsung pumpi ah mat ah um ahia, United Nations General Assembly in June 15, 2007 ni ah October 2 hi International Day of Non-Violence ah mat ding inle a puang hi. Tuni’n Mualkawi ah um, Subsidiary Training Centre (STC) BSF leh Ccpur district administration mapuina in Khuga Dam sukthianna a nei ua, BSF apatsecurity personnel 600 val ban ah district administration apat official staff tamtak a pang ui. Khominthang, New Lamkaah um, Lamka TD block ah khua/veng 15 mapuina in social work a nei ua, TD Block sung a office-te ban ah mun chuamchuam sukthianna a nei ui. VK Tawna High inle school compound ban ah college road sukthianna a nei ua, student te’n thianthonatawh kisai a panla ding in swatchha pledge gen in, kitiamna a nei ui. Zia hun a chun, class VI-X student 300 val kuan ui. Vengnuam South inle veng sung sukthianna a nei ua, mipi 500 val chiakhawm in, lampi kuakna munte le a hukdim ui. District hospital ah doctor ban ah nurse te’n hospital sung leh pua sukthianna, Dr VC Pau tonsing, Medical Superintendent, District Hospital thupiak dungzui in amau department chiat in a nei ui. Headquarter Venga um, First IRB te’n le DC Quarter, IB Road dung sukthianna anei ui.

Consultation on Church Unity hun mang
CCpur, Oct. 2 *(Nisin Thuhiltu)* : Manipur Synod, Zou Synod leh Mizoram Synod: Manipur Area in tuni, October 2, 2018 zingkal lam dak 11:00 in Manipur Synod Hall, IB Road ah Consultation on Church Unity hun a mang hi. Hunpi masa, Rev. Onkhankhup, Moderator, Zou Synod in a mapui a, Rev. Lalarmawia, Executive Secretary, Manipur Synod in Keynote Address gen in, Rev. C. Zorammawia, Administrative Secretary leh Partnership Consultant in “Church Unity in Manipur” ti thupi mang in seminar a bawl hi. Rev. Lallarmawia in Manipur sung ah kochuam chuamchua Synod a kipua, pau-le-ham kihetuacheng bang tileh kinaizaw diak ah sepkhawmthei hiding a diam ti ngaituana ah Consultation masapen hi nei ah um hi’n a gen hi. Nitak lam hun Rev. Lalthantluanga, Moderator, Manipur Synod mapuina in hun a mang ua, Kamkhotinthang Neihsial, Coordinator, Manipur Area in thupuan hun la in, Rev. Stephen Chinzathang, Senior Executive Secretary, Zou Synod in kipakthu gen in hun a mangzo ui.

Manipur Women in champion hina chang

Cuttack, Oct. 2 *(Nisin Thuhiltu)* : Barabati Stadium, Cuttack ah zani a khan, 24th Senior Women’s National Football Championships final match a um a, Manipur numei team in 2-1 ah Odisha zo in Champion hina a chang hi. Zia kihelna a chun, Manipur skipper Bala Devi in 45th minute in first goal a khum a, second half zaw in 50th minute ah Irom Prameshwori Devi in goal 1 a khumbe hi. Manipur Women in champion hina a lak tawh kitawn ah all-time Senior National championships table ah top in a um a, champion hina 19 vei changta tina a suak hi.