State Govt in April 1, 2019 a pat 7th Pay Commission chiapi ding ah lemsa

Imphal, June 8 *(Nisin Thuhiltu)* Manipur government leh 7th Pay Commission chiapi ding phutna ah kiphinna nei - employees & pensioners te’n tuni’n April 1, 2019 a pat 7th Pay Commission chiapi ding in lemsakna a nei ua, lemsakna chung in Memorandum of Understanding (MoU) suai a kai ui. Zia dungzui a chu Fitment Factors 2.57 hiding, January 1, 2016 a pat hiding a hi. Chief Minister mapuina nuai ah Manipur Secretariat Services Association (MSSA), Manipur Government Services Federation (MGSF) leh Manipur State Pensioners’ Union (MSPU) palai te leh state government in kihona a nei uh tawh kitawn ah zia gual kinawptuana chu piang a hi. Kinawptuana dungzui ah, April 1, 2019 -March 31, 2020 sung ah 7th Pay Commission leh allowances benefits te pre-revised rate (at actual amount paid as on today) tawh kituak ah GPF accounts ah deposit bawl hiding, April 1, 2020 a pat 7th Pay benefits leh revised allowances cash ah piakdaw pat hiding, government in work charged, muster roll leh casual employees tawh kisai ah a fello te a vaima theipen ah a sukfel ding ti a hi. Chun, MoU suai kai a hitak tawh kitawn ah MSSA, MGSF leh MSPU in kiphinna chawlsan ngal ding ti a hi. Hiatthei khat chu, Joint Administrative Council of AMTUC & AMGEO mapuina nuai ah January 1, 2016 a pat Manipur state government in 7th Pay Commission a chiapina ding phutna kiphinna a pat uh hita a hi.

DG, BSF in STC/CCpur pha ding

Lamka, June 8 *(Nisin Thuhiltu)* K K Sharma, IPS, (Rajasthan 1982), Director General, BSF leh additional charge Director General, NSG chu Manipur vetha ding in tuni’n Imphal a tung hi. Ama’n Manipur ah ni 3 sung hun mang ding a hi. Zia sung a chu, mun chuamchuam vethakna nei ding, 9th June 2018 ah BSF, Subsidiary Training Center, Churachandpur pha ding leh Chief Guest hina tawh recruit thak te passing out parade uap ding a hi. K K Sharma, IPS chu Imphal Airport ah N S Jamwal, IG, BSF M & C Frontier, Silchar in vaidawnna a nei hi.

Departments te’n amawpuakna’u a sukpitin chiat tak ua leh Model village concept lawting ding: MP Thangso Baite

Imphal, June 8 *(Nisin Thuhiltu)* Kangpokpi district, Saitu- Gamphazol sub-division huap sung ah um CC Hall, Motbung village ah tuni’n Village Development Plan (VDP) tawh kisai in Empowered Committee Meeting a um hi. Zia hun a chun, Lok Sabha MP, Thangso Baite in a thugenna a chun, departments chuamchuam in amawpuakna a sukpitin chiat ua leh Model village concept lawting thei ding a hidan a gen hi. Motbung village ahileh MP, Thangso Baite in Sansad Adarsh Gram Yojana (SAGY) nuai ah Model Village khat hiding ah adopt abawl a hi. Model Village lawtinna ding ah khuasungmi te’n le kipiazo tak ah panlakna a nei ding, education, khawsakdan, activity chuamchuam chiapina tawh kisai ah model village concept tawh kituak ah panlakna a um ding pawimaw in a gen hi. Chun, Model village siamdawna ding ah Deputy commissioner, ADC/ADM, SDOs, BDOs leh DLOs te chu pangkhawm ah panla chiat ding in chialna a bawl hi.
Zia ah meeting chu, MLA Saitu Assembly constituency, Namthang Haokip chairman Sadar hills autonomous district council Haokhalal Hangshing, deputy commissioner Kangpoki Dr. Rangitabali Waikhom, ADC/ADM Kangpokpi Hmangte Lerte Kom, SDO Saitu Gamphazol N. Johnson Meetei, Motbung village chief Kaikhosei Lhouvum, SDCs leh district level officers, Kangpokpi te a pang ui.

D. Lhangjol ah inn katna mi 7 liam
Lamka, June 8 *(Nisin Thuhiltu)* Churachandpur District, Sangaikot Dampi Lhangjol village / K. Lhangjol ah tuni 8th June 2018 zingkal dak 3:30 tuam in Ngamsei Khongsai, chief of D. Lhangjol inn mei in a kang a, ziana a chun naupang 4 panna mi 7 in liamna tuak ua hiat a hi. Liamna tuak te chu, Themneilam Khongsai (35), w/o (L) Lhunmang Khongsai, Seiminlen Khongsai (15), s/o (L) Lhunmang Khongsai , Seigouthang Khongsai (12), s/o (L) Lhunmang Khongsai, Seigouhao Khongsai (9), s/o (L) Lhunmang Khongsai, Lamchingnei Khongsai (5), d/ o (L) Lhunmang Khongsai, Lamneivah Khongsai (3), d/o (L) Lhunmang Khongsai, Lhunkhongam Khongsai (24), s/o Ngamsei Khongsai te a ahiu. Mei in inn a katna chung ah mei kipatna hiat a hipuai.

Tuitha lui ah khialut naupang 1 thi
Lamka, June 8 *(Nisin Thuhiltu)* Tuitha lui ah tuni, 8th June 2018 zingkal dak 9:30 vel in naupang khat Tuitha lui ah khialut in, hukdaw manlo in a mualliam hi. A kihiatdan in, Tuitha lui ah thina tuak chu numei naupang Hoinunnem (6) d/o Thenkhogin Singson of Zion veng Tuibong a hi. Tuitha lui tawh kinai ah cheng ahiu tawh kitawn ah tuitha lui ah tuithal ding a kisakna, zia tuaksiatna chu tung hi’n a kigen a, Tuitha lui khialut ahidan hiat ahi tawh kitawn ah a kiang ah um te’n a hawlna nei ngal ah, a mudawdaw ua, Sielmat Christian Hospital tut maleu dam zo lo ah thi hi’n a kigen hi. Tuaksiatna tuak naupang chu tuni mah ah Tuibong Thanmual ah vuiliam in a um hi. Hiatthei khat chu tukum sung ah tuitha lui ah naupang 3 panna piting khat in thina a tuakta’u a hi.

Beti Bachao Beti Padhao Slogan leh Anthem ah kidemna um di
Lamka, June 8 *(Nisin Thuhiltu)* Shyam Lal Poonia IAS/DC/CCpur in thusua a bawlna a chun, numei naupangte dawpkangna ding ah phualpi solkal in scheme a patdaw Beti Bachao Beti Padhao (Save Girl Child, Educate Girl Child) kiti CCpur district sung ah le hawn hipaita ding in a gen hi. Zia chu tawh kitawn ah Beti Bachao Beti Padhao Slogan leh Anthem ah kidemna um ding hi’n a taklang a, zia kidemna a chu a neupen a pat a lianpen tiang ah pang thei ding uh hi’n a gen hi. Best Slogan phuak thiampen te chu Rs.3000 piak hiding a hiu a, Best Anthem la te Rs.3000 ma piak hiding a hi. Category 2 ah Consolation prize 4 tiang, Rs 500 chiat piak hiding a hiu. Slogan leh Anthem ahileh English ahiloleh Local pau khat zawkzawk ah hithei ding, kidemna pang nuam te’n Beti Bachao Beti Padhao genna Slogan ahiloleh Anthem banah Min, umna mun leh Contact detail kimtak June 30, 2018 tiang ah DC Office ah piaklut thei ding a hi.

Singngat MLA in Award piakdawna nei

Lamka, June 8 *(Nisin Thuhiltu)* Singngat MLA Ginsuanhau Zou in tuni'n a chenna inn Lailam Veng ah Singngat A/C sung ah student lawtinna nei chungchuang diak te kipakpina leh Apa (late) Thangzalang Memorial Award 2017 hawpdawna a nei hi. Zia hun chu DC/CCpur Shyam Lal Poonia, IAS; SP/CCpur Rakesh Balwal, IPS leh T Goudou EX minister banah Singngat SDO James Sehlal Hangshing, Lianminthang Samte MCS SDO/Suangdoh leh Sangaikot SDO Zosanglur Joute banah award dawng student insungmite banah MLA worker-te te’n a uap ua, Award hawpdawna leh thilpiak piakna Ginsuanhau Zou, Singngat MLA & MANIREDA Chairman in nei in, Rev. Zamlianpau in award sangte Pathian kiang in malzawl dawt piakna a nei hi. Award sangte ahiuleh – CBSE Class XII ah Area topper - Ngamkhohao Haokip s/o Jangkholun Haokip of MB Saichang tu ah JNV Tuinom a kai, 86.6 percent a hia, Second - Houminlal Baite s/o Semjang Baite of Lunggil, Sangaokot, 82.4 percent of JNV tuinom a hi. Manipur Board CoHSEM class XII ah area topper - Donbosco Hr Sec School, Lamka a pat Hoineivah Baite d/o (L) Jangkholun Baite of Moljol, Sangaikot (76.6 percent) leh Second - Lisa Nauching d/o Thongkhanlam of Muallum, Rayburn College, (70.8 percent) a hi. Class X CBSE ah topper - Letkhohao Haokip s/o Doujathang Haokip of MB Saichang, tu ah JNV Tuinom ah kai (89.16 percent) leh Second - JNV Tuinom ah kai Boinu Hoineineng d/o James Chongthu of Mongbung (85.4 percent) a hi. Class X BSEM ah topper in Donbosco Hr Sec School, Lamka ah kai T Khupkhanlun s/o T Liankhanmang of Behiang village a pang a, second in Elohim H/S a kai Jangkholun s/o Seithang Haokip of G Khonom (81.16 percent) a pang hi. Award mute lak ah Area topper Rs 10,000 leh second te Rs 5000 chiat piak a hiu.

CDVDFWA in panpina pedawk

Lamka, June 8 *(Nisin Thuhiltu)* CCpur District VDF Welfare Association (CDVDFWA) in general assembly a nei hun ua member thi a um leh a insungmite kithuapina ah Rs 1 lakh piak ding ah lemsakna a nei uh a chiapi zing uh tawh kitawn in tuni’n thina a la tuak VDF No. 020286 K. Siamlianpau s/o K. Kapzathang of New Lamka, Vengnuam insungmi te kithuapina’n Rs 1 lakh a pedawk ui. Zia hun a chun, CDVDFWA ah Chairman S. Laltingen Vaiphei in executive member te mapui in, panpina sum piakdawna a nei ui. K. Siamlianpau ahileh Behiang Police Station ah posting a hia, damlona ziak ah March 5, 2018 ah mualliam a hi.

NABARD saina SHG te’n training bawl
Lamka, June 8 *(Nisin Thuhiltu)* National Bank For Agriculture And Rural Development (NABARD) saina’ Singngat Community Hall ah tuni’n Singngat area ah Self Help Group (SHG) chuamchuam ah lawiupa te ding in training a um hi. Zia hun a chun, Akisijolneng SHG, Haijang; Ebenezer SHG, Muvanlai banah Singngat khua a kipat SHG chuamchuam Pipi SHG, Khupching SHG; Tangpizol SHG, Lengtong SHG, Maukot; Moltinchan SHG, Lancha akipat SHG leader 32 a pang ui. Training coordinator in Thangchinkhup Guite, DDM/ NABARD a pang a, Resource persons in Moi Valte, Branch Manager, CBI Singngat, Hau Phiamphu, MSW & MD Nedar Foundation, P. Lamzamuan, Secretary, RDS leh Th. Hausuanpau, MA Environment te a pang ui.

Aganwadi Worker-te ding ah Refreshers training course

Lamka, June 8 *(Nisin Thuhiltu)* Integrated Child Development Service (ICDS) Project, Henglep saina’ tuni sunma dak 11 apat Conference hall, PTC GHQ Hiangtam Lamka ah Aganwadi worker-te a ding in Refreshers training course kiti a um hi. Training hun ah Integrated Child Development Service ICDS Project, Henglep nuai ah sector pathum, Henglep Sector, Kolhen Sector leh Mouphai tampak Sector apat Aganwadi worker-te tel ua, hiai hun ah resource person V Sumati Devi leh L sunitabala Devi ten Aganwadi Worker-te a ding ah ICDS Family Detail register book htung thak tawh kisai ah ziltilna nei in, register book thak ah family detail ziklut dingdan taklatna a nei ui. Refreshers training course a chun, ICDS Project, Henglep nuai ah sector pathum Henglep Sector, Kolhen Sector leh Mouphai tampak Sector apat Aganwadi worker 83 a pang ui.

RBI in Town hall meeting nei ding
Lamka, June 8 *(Nisin Thuhiltu)* Reserve Bank of India (RBI) in June 15th 2018 leh Synod hall, IB Road ahTown hall meeting nei ding a hi. Zia hun a chu bank account nei, bank lam tawh kisai ah thupawimaw chuamchuam gen khawmna um ding, meeting ah pang te TA/DA piak hiding a hi. Lunglutna nei te’n June 14 tiang ah contact number 8974-225-922 ah register bawl thei ding a hiu.

YPA Ambulance ding ah gari tuakdawk

Lamka, June 8 *(Nisin Thuhiltu)* Vunglallian Tonsing’ chenna inn, Pearsonmun ah Young Paite Assn (YPA) Ambulance ding piakdawna, 7th June 2018 nitak in a um hi. Zia hun a chun, Lianmuanthang Valte, General Secy., YPA-GHQ in hun matna mapui in, Khaisianmung Tonsing leh a insungmi te’n YPA Ambulance ding piakdawna nei in, thugenna a nei ua, Pastor Kammuanlian, Local Pastor, EBCC Moria, Pearsonmun in Pathian min in YPA Ambulance latna a nei hi. YPA Ambulance ding donate bawltu Khaisianmung Tonsing suapipa, Vunglallian Tonsing in a genna a chun, YPA Ambulance ding ah amau innkuan in Mahindra Xylo a piak ua mitamtak in a hiat uh himaleh amau innkuan tuakdaw hizawlo ah a suapipa Khaisianmung Tonsing in a tuakdaw a hidan gen in, a gari le ama min ah um in a gen hi. YPA in pawimaw hun ah panpi ngai te leh damlo beidawng te panpina kituptak a nei ding dawina ziak ah thipha bawl a sutzawm zing ding dawina ziak ah Ambulance ding ah gari tuakdawk uh hi’n le a gen hi.

Felicitation programme mang

Lamka, June 8 *(Nisin Thuhiltu)* Molnom ah um Gandhi Memorial Govt High School in tuni sunma dak 11 apat in a school ua tukum ah Class X zodawk thak te ding in, Felicitation programme a mang hi. Zia hun matna chu Special Guest hina tawh H Doungel, Co-ordinator NYK CCpur in a uap a, Jamkhothang leh Baby Chiinneithem in matna mapui in, Nanggoulian mapuina’ Class X passed te introduction bawlna leh thilpiak piakna a um a, H Kaithanlian, Headmaster in congratulation speech nei in, GM Govt H/S apat class X passed-te a ding ah pauchap piakna Pastor Thenkhojang Haokip in a nei hi. Special Guest H Doungel in tilkhona thu gen in, Christina Shakum, Mangkhogin leh Esther Ngahboikim apat lasakna le a um hi. Tukum 2017-18 in GM Govt H/S apat Class X pass mi 59 a um ua, zia lak a chun, First division a pass student 17, Second Division ah 42, midang 20 in compartment mu’n, pass percentage 54% a tung hi.