Musroom Cultivation Training bawl

Lamka, May 28 *(Nisin Thuhiltu)* : District Rural Development Agency (DRDA), CCpur nuai ah um Project Implementing Agency vaisaina tuni’n District Training Centre, Tuibong ah May 30, 2018 tiang ah um ding, PMKSy (IWMP) Project nuai ah Musroom Cultivation Training programme a um a, Shyam Lal Poonia, IAS, DC/CCpur in training hawndawna a nei hi. Mushroom Cultivation traning ahileh IWMP Project nuai ah umkha Self Help Group, Watershed Committee, Watershed Development Team, User Group, Farmers Group-te a ding ah kibawl a hi. Traininga in, mun chuamchuam akipat mi hunkhawp a chiakhawm ua, resource persons in KVK/CCpur te a pang ui. Tuni ah Mushroom Cultivation tawh kisai in kiziltilna a um a, May 30, 2018 ah Organic Farming tawh kisai ah kiziltilna um ding, May 31, 2018 ah Secretary, Watershed Committeee leh Watershed Development Team te'n Geotagging tawh kisai ah kiziltilna um ding a hi.

Solar battery gudawk tu mat ah um
Lamka, May 28 *(Nisin Thuhiltu)* : T. Kammuanlal Simte, CEO/CCpur in May 26, 2018 ni ah police ah report abawl in a taklatna a chun, May 26, 2018 zingkal vaima tak dak 4:00 vel ah Nute' Bazar ah Solar Battery gu, Lunminlal (29) S/o Jamkhomang of Zalenphai nasemte'n mandawk a hidana taklang a, Police khut ah piakdaw a hi nung ah police te’n thudawtna a nei hun ua, Bus parking kim le kiang ah Solar battery 5 le midang tawh kithua ah gumangta hi ah kipuang in a gen hi. Zia thu tawh kisai a chun, Police in FIR NO. 46(5) 2018 CCp-PS under section 379 IPC bulkhum in khualna a nei a, CJM mai a dinsak ahi nung in court in May 29, 2018 tiang police custody um ding in lemsakna a nei hi.

DC/ Pherzawl temporary office ding entha

Lamka, May 28 *(Nisin Thuhiltu)* : Mannuamching, IAS, Deputy Commissioner, Pherzawl in temporary office ah mat ding, etthakna tuni, May 28, 2018 in Shyam Lal Poonia, IAS, DC Churachandpur tawh a nei hi. Temporary office ding ahileh Tuibong ah District Agriculture Department in Paddy Laboratory ding ah a siam, zawthian hita himaleh public toilet room ding ban ah office room mat thei ding, room 4 um te chu lua hiding in a kigen hi. Mannuamching, IAS ahileh achiata May 16, 2018 ni ah Dr. J. Suresh Babu, Chief Secretary (DP) in Manipur Governor min a order a sua dungzui ah Joint Director, MOBC & SC apat Deputy Commissioner, Pherzawl District ding ah mawpuakna piak ah um a hi. Tunung sawtlo ah Deputy Commissioner, Pherzawl in temporary office luapan ding hi’n a kigen hi.

MLA Ginsuanhau in Medical Camp hawng

Lamka, May 28 *(Nisin Thuhiltu)* : Singngat New Marketing Shed, HQ Veng ah 2nd Assam Rifle leh Singngat Philantophic Organisation chuamchuam-te saina’ tuni’n Ayush Free Medical Camp a um hi. Zia Medical Camp chu Ginsuanhau, bialtu MLA leh Chairman, MANIREDA khuallian hina tawh uap in a hawng a, 27 Sector Assam Rifles nuai ah um Singngat Batallion doctor te leh Ayush Department apat Doctor leh staff kigawm 14 in damlo te etna a nei ui. Medical camp chu Dr M Shyamjai Singh, Addl Director AYUSH, Manipur in le uap in thugenna a nei a, Medical Camp umsung in, Ayurveda, Homeopathy leh thil chuamchuam ah ki-etkawl dingdan tawh kisai ah kiziltilna le a um hi. Zia medical camp chu, student 200 leh khawsung mipi kigawm 1000 vel in a uap ui. AYUSH ahileh ahileh ki-etkawl theina chi chuamchuam 5 apat laksawn a hia, zia te chu - A-Ayurveda, Y-Yoga & Naturopathy, U-Unani, S-Sidha, H-Homeopathy a hi. Manipur ah kum 2015 in Directorate of AYUSH phudaw in a um a, tunung sawtlo ah Singngat khua, lupna 10 umtheina ding, AYUSH Hospital/Dispensary kawi hiding in a kigen hi.

Vocational Training centre luana thu ah show cause notice bawl ding
Lamka, May 28 *(Nisin Thuhiltu)* : Autonomous District Council (ADC) CCpur in a thil neite hunkhawp document kichianlo a umna chung in document etthakna a nei a, zia chu tawh kitawn in tuni’n Pearsonmun khawsak ah um Thongkhochin gam ah kum 2014 ah Vocational Training centre ding a sakna mun uh etthakna a nei hi. Zia Vocational Training centre etthakna chu - Khaipao Haokip Chairman ADCC, T Paukhanlian EM/ADCC, Thangboi Haokip MDC, KC Chonsei MDC banah T Kammuanlal Simte CEO/ADCC te’n a nei ua, zia hun a chun, Vocational Training Centre ding ah kisa chu kum 2015 ah ADCC in Khamkhanchin tawh Rural Upliftment Development Society, CCpur in kum 15 sung amat ding ah kinawptuana suai a kai himaleh Khamkhanchin in lualo ah Tunnu School of Nursing in luazaw a hidan a mudawk ui. ADCC in Vocational Training centre ding ah a sakna mun ahileh Thongkhochin gam a hia, himaleh kum 2014 ah 13th Finance Commission Award, General Performance Grant- 2012-13 & 2013-14 nuai ah April 28, 2014 ni ah sum Rs 25 Lakhs sanctioned ah um mang ah kisa a hi. Zia hun a chu, gam neitu Thongkhochin tawh ADC in May 5, 2014 ni ah Lease Agreement ah kum 15 sung ADC in amat thei ding ah kinawptuana suai a kai ti a hi.

Vocational Training centre sakzaw a hi ah, March 16, 2015 ni ah ADC in Vocational Training Centre ding ah kisa luatu ding ah Rural Upliftment Development Society,CCpur ah President Khamkhanchin tawh kinawptuana suai kai thak ah Khamkhanchin in a society min mang ah public interest ah building kisa chu mang ah kum 14 sung nasem thei ding, himaleh a luaman a piak ding ah lemsakna a nei uh a hi. A gam neitu Thongkhochin in ADC tawh kinawptuana nei himaleh zia kinawotuana palkek ah a guk a ADCC hiatpina panglo ah Tunnu School of Nursing tawh kum 2016 ah kinawptuana siam ah thasin ah Rs 5000 zel a luama’n piak ding Tunnu School of Nursing luasak ti le a hi. Zia tawh kisai a chun, ADC in gam neitu Thongkhochin in kinawptuana a zuilona chung ah show cause notice bawl ding leh, Vocational Training Centre ding ah luatu le show cause notice suakhum ding hi’n a kigen hi.

District Level Workshop on Child Rights kiti nei

Lamka, May 28 *(Nisin Thuhiltu)* : Manipur Commission for Protection of Child Rights (MCPCR), Imphal saina tuni zingkallam dak 11:00 akipat in District Training Centre, Tuibong ah Juvenile Justice Act, 2015 & POCSO Act, 2012 tawh kisai in 'One Day District Level Workshop on Child Rights' kiti a um hi. Zia hun a chun, Ch. Nabachandra Singh, Member, MCPCR in vaidawnna thu gen in, Lunkhomang Khongsai, Addl. SP (Law & Order), CCpur; Shyam Lal Poonia, IAS, DC/CCpur; Mannuamching, MCS, DC/Pherzawl te'n thu a gen banua, Sumatibala Ningthoujam, Chairperson, MCPCR in keynote address bawl in workshop nei ah a umna ziak taklatna a nei hi. Technical Session ah Dr. Ch. Narendra Singh, Sr. Advocate/Lecturer, LMS Law College/Legal Consultant, MCPCR in 'JJ Act, 2015' pansan in sinsak a, Thiyam Rajkishore Singh, Advocate/ Chairperson, CWC, Imphal West in ' POCSO Act, 2012 (Prevailing Customary Law & Social Issue' ti thupi ah nei in ziltilna hun a mang a, Dr. Sapam Dilip Singh, Lecturer, LMS Law College in ' Emerging Child Trafficking Scenerio- Special focus in Churachandpur district' ti thupi ah nei in ziltilna a nei hi. Lunkhomang Khongsain in ' Gaps and Challenges faced by Police Department in the implementation of Child Rights Acts & Laws' ti thupi mang in ziltilna a nei hi. Technical session zawh in JJ Act 2015 & POCSO Act, 2012 tawh kisai sepdaw ah a um theina ding tawh kisai in dicussion hun a nei ua, zia hun chu Social Welfare, Medical, Home Department, Integrated Child Protection Scheme, Juvenile Justice Board, Child Welfare Committee, District Child Protection Unit, Education department, NGO chuamchuam, tribe, church village authority, students organisation chuamchuam akipat lawiupa te’n a uap ui.

Nauneite panpina sum hawm
Lamka, May 28 *(Nisin Thuhiltu)* : District Hospital, Maternity Ward kiang ah JSSK/JSY Cell ah tuni zingkallam dak 10:30 akipat in January 2018 tiang ah nauneite panpina sum la nailote a ding in panpina sum a kihawm a, mi 50 val in JSSK/JSY Cell ah sum a la dawk ui. Nauneite' panpina sum ahileh National Health Mission (NHM) nuai ah hung hisek a hia, nauvawp JSSK/JSY nuai ah ki-register banah zui ding ah kipiate zuikim, nauneite kiang ah Centre govt. in panpina a piak sek hi a hi. National Health Mission (NHM) nuai ah June 1, 2011 ah zia programme chu patdaw ah um a hia, Janani Shishu Suraksha Karyakaram (JSSK)/Jansankhya Sthirata Kosh (JSK) nuai ah Govt. Hospital leh accredited hospital-te ah nauneite kiang ah panpina piak hisek a hi. JSSK/JSY Cell ahileh hun chiasa Maternity Ward mai ah um a hia, himaleh a lemchangzaw ding ah OPD First floor, CMHT Counter kiang ah chawn a hi.

Biak-inn kum 100 tinna lawm ding
Lamka, May 28 *(Nisin Thuhiltu)* : Mualnuam SDO HQ, Mualnuam khua ah Pathian thu (Gospel) a luttil a pat kum bangzat a hem sung Biakinn neilo in mimal inn mang in kikhawpna a nei sek ua, kum 1918 ah Biakinn sakna pan in, Biakinn a nei nung uh tukum (2018) in kum 100 a ting hi. Tuni tiang ah Mualnuam khua ah Biakinn 3 - EBC, PCI (R) leh COC a um a, Mualnuam khua a Biak-inn dindaw nung kum 100 a tin lawpna leh Pathian kiang ah kipakthu genna, June 30 apat July 1, 2018 sung ah Mualnuam EBCC inntekna um ding a hi. June 30, 2018 ah Rev. S. Vung Minthang, General Secretary, EBC in Church Centenary suangphu hawnna leh latna nei ding, Rev. S. Vung Minthang, General Secretary, EBC leh Rev. G. Kamzamuan, Divisional Supdt. EBC Singngat Division in Pathian thu gen ding, EBC Central Choir-te’n lapawlsa ding a hiu.

Nghathal Dam apat tui lampi a tui chiatheilo

Lamka, May 28 *(Nisin Thuhiltu)* : Nghathal Irrigation & Dam Beneficiary kiti Tuilo neite’n tuni, May 28, 2018 sunma dak 11:00 apat Thingkangphai YMA Hall ah Meeting nei in, Nghathal Dam apat tui lampi a tui a chiatheilo ziak ah tuilo bawlna lam thil ah haksatna umte a genkhawm ui. Nghathal Irrigation & Dam Beneficiary ah Committee Member ding telna le nei in, Chairman ding ah JK Gin, Vice Chairman ding ah Khaikholian@LK Haokip, Secretary ding ah B. Zodingliana, Assistant Secretary ding ah Lalkhuma leh Treasurer ding ah Vungkhum Guite te a telting ui.
Upa C Liandailova in Dam tawh kisai a genna a chun, lobawl mite khualna government in Dam a bawl himaleh tuilampi ah tui luanglut theilo in a gen a, zia chu government in a etzui ding a nawp thu a gen hi. Nghathal Dam apat tuilam chiasuk ahileh Nghathal Road suk ah Nghathal Zau, Kawnpui Zau zosia, Ngurte Lei tiang ah Tuilo pari 350 val a ding ah tui pia hi’n a kigen hi.

MSPSCWA, President ding ah Kangpokpi private school principal guat ah um
Kangpokpi, May 28 *(Nisin Thuhiltu)* : Private Schools and Child Welfare Association, National President Shamael Ahmad in nominate a bawl dungzui in Kangpokpi District ah private school, Elite Higher Secondary School ah Principal Seikhojam Kipgen chu President, Manipur State Private Schools and Child Welfare Association ding ah guat in a um hi. President, Manipur State Private Schools and Child Welfare Association in private schools te enzui ding leh naupang te interest ah panlakna nei ding a hi. Seikhojam Kipgen, M.Sc. B.Ed. ahileh Principal banah University of Science & Technology, Meghalaya ah Research Scholar le a hia, zialo a chu, General Secretary, Hill District Private Schools Association, Manipur le a hi.

JCILPS in non-locals te identification proof check bawl

Imphal, May 28 *(Nisin Thuhiltu)* : Joint Committee on Inner Line Permit System (JCILPS) in Thangmeiband Assembly Constituency huapsung ah non-locals 56 document kituptak neilo mudawk a hidan tuni’n a taklang hi. Convenor, JCILPS, student’s wing, Manjit Sarangthem in a genna a chun, non-locals mi te chu Aadhar, residential certificates ahiloleh voter identity cards neilo a hidan uh JCILPS leh Thangmeiband United Youth Club (TUYC) in joint ah drive a bawl hun ua amudaw’u a hidan taklang in, Thangmeiband Khomdram Selungba Leikai leh Thangmeiband Hijam Dewan Lekai ah inn-lua ah mi 186 umte lak ah mi 56 te’n identification proof neilo uh hi’n a gen hi. Thangmeiband local mi tawh kicheng non-local mi 2 te’n a min tawpnau sang uh hi’n le a gen a, zia mi 2 te chu Wahengbam Asish Das leh Thingbaijam James a hidan uh le a taklang hi.

General secretary TUYC, M. Thomas in a genna a chun, inn neitu te’n inn lua ding te identification proof kituptak ah a check masat ding uh pawimaw a hidan gen in, illegal immigrants te a pat kiven ding pawimaw in le a gen hi. A langkhatlam ah Chief minister N. Biren Singh thupiak dungzui in state police department in state sung mun chuamchuam ah check post hawnbe in illegal immigrants state sung lut ding te check bawl in document kituptak neilo te a nungsawl ui.

Secretariat employees te’n cease work strike pan

Imphal, May 28 *(Nisin Thuhiltu)* : Manipur ah 7 Pay Commission chiapi ding phutna chiatha zing in Joint Administrative Council of All Manipur Trade Unions’ Council (AMTUC) leh All Manipur Government Employees’ Organisation (AMGEO) in March 22 a pat in cease work strike a chiapi zing ua, zia chu Manipur Secretariat Services’ Association in le support bawl in tuni’n kiphinna a pan ui. Moirangthem Iboyaima, working president, Manipur Secretariat Services’ Association in a genna a chun, state government tawh tamvei tak kihona neita himaleu chief minister in central pay scale chu fitment committee in report a piak tak leh chiapi hiding ah tutiam a bawl, sukpitin hilo in a gen a, fitment committee in report a piaklut hita himaleh chief minister in special financial board saimdaw ding, zia board chun 7 Pay Commission chiapi leh chiapi theilo ding tawh kisai etzuina nei ding ah a gen kit pawmlo ah kiphinna pan a hidan uh a gen hi.

State government in fund a nei leh neilo thuchuam hitaleh central pay scale chiapi hun ding kichian tak ah a suklat ding demand a hidan uh gen in, demand sukpitin piak ahiloleh kiphinna chuamchuam nei ding uh hi’n a gen hi. Manipur Government Services’ Federation (MGSF) in Manipur Secretariat Services’ Association tawh 7th Central Pay scale chiapi ding phutna ‘Complete Cease Work Strike’ pat ding ah Pathian thupukna a siam hi’n le a gen a, Employees of Essential Service te le kiphinna pan ding ah kisingsa zo ta hi’n a gen hi.

Health Minister in Intensified Diarrhoea Control Fortnight, 2018 hawng

Imphal, May 28 *(Nisin Thuhiltu)* : Health & Family Welfare Minister L. Jayantakumar Singh in tuni’n Jawahar Lal Nehru Institute of Medical Sciences (JNIMS), Porompat, Imphal East ah Intensified Diarrhoea Control Fortnight, 2018 hawnna a nei hi. Minister Jayantakumar in a thugenna a chun, panlakkhawmna a pat diarrhea control bawl thei ding hi’n a gen a, ziana ding a chu awareness campaign nasatak ah chiapi ding pawimaw in a gen hi. Zia ah hun matna chu Director, National Health Mission, N. Bandana Devi, IAS, Th. Kirankumar Singh, IAS, Director Edn.(S), Dr. K. Rajo Singh, Director, Health Services, Dr. Th. Bhimo Singh, Director, JNIMS leh Dr. H Ranjit Singh, Addl. Director, Health Services Manipur te’n le a uap ua, Health, PHED, Education, National Health Mission official tamtak te banah, doctors leh nurses te’n le a uap ui.

Pawl X, XII zo maban zilna sunzawm ding zillai te leh nu-leh-pa’n hiat ding ah pawimaw

Editorial (Nisin Thuhiltu-29 May 2018 issue)

Central Board of Secondary Education (CBSE), Board of Secondary Education Manipur (BSEM), Council of Higher Secondary Education, Manipur (CoHSEM) nuai ah pawl X leh XII te exam results a suak tawh kitawn in, maban zilzawmna ding, student te leh nu-leh-pa tamtak in ibuaipi zing ua, akhen in College hawi taktak ah maban zilzawm ding I lunggul a, akhen in state dang, gam dangdang ah zilna sutzawna ding in panlakna I nei hi.

Zia gual panlakna inei zingna chung ua hiat ding ah dawi um mama chu, pawl X zo, pawl XI sim ding, pawl XII zo, B.A, B.Sc, B.Com, B.S.W etc ah zilna sunzawm ding te’n I lungtup dan zil ah subject chiapi a pawimaw hi. Etsakna ding in, Doctor lunglut te’n doctor lam tawh kisai subject lak a ngai a, civil Service lam lunglut te’n civil Service lam tawh kituak ah subject lak a ngai hi.
Bawl keilo ding khat chu, lunglutna lam hikhello ah ilawinu a hi em, ilawipa a hi em in, Arts stream a chiapi ziak, Science stream a chapi ziak ah class room khat ah chutkhawm ding utna tawh subject mawk lak/chiapi ziang chu tunung ah kisikna liantak tuntu hiding a hi. Tunung ah ihi-nawp (aim in life), IAS, IPS, MCS, MPS, Military officer, Doctor, Architect, Engineer etc tawh kituak zawk ah subject chiapi ding a hi. Tunung maban ding khualna ziak ah I lawinu, I lawipa tawh class room ah chutkhawmlo ngam ding a pawimaw a, lungtup mualsuana ding lam zawk ngaikhawkpen ah kawi ding a hi.

A langkhatlam ah tulai ah student tamtak te lungtup (goal) kichian tak neilo, lekha hiat, lekhathiam ding a pawimaw a hih, ti ziak mai ah zilna chiapi tamtak a um a, nu-leh-pa te’n chate maban lekha zilzawmna ding ah sum leh pai ibuaipi zing kawm ah chate lunglutna leh thiamtheina lam hiatpi ah a subject lak ding uh etpi deu a pawimaw hi. Eima hiatna’n subject umdan leh lunglutna lam ihiatthiamlo a um tak in le ahiathiam ding dawl vadawt chu thilsia hikeilo, tunung ah thawveng tak ah mi lawting hitheina tuntu hizaw ding a hi. Zia ziak a chun, student te hi’n, nu-leh-pa hitaleh maban zilna ding tawh kisai ah a hiatthiamsa te dawt tam in kisikna tutlo ding a hi.

College/School dawitelna thu ah student te’n hiatding ah pawimaw mama khat chu, khawvel ah college hawipenpen ah ikai inle I lekha simna I ngaikhawklo ah I luntup mualsuana ding ah kukaltak leh gunchu tak ah panlakna a umlo a hichun, lawtinna um diaklo ding a hiziak in, I zilna leh I lungtup mualsuana ding zawk ngaikhawk a pawimaw a, nei in a tit khel ah sum tamtak senna ding, College/University hawi leh hawilo thu buaipi takluat lo ding a hi. I zilna leh I lungtup mualsuana ding zawk ngaikhawklo ah College/University hawi leh hawilo buaipi, gam dang, mun dangdang ah zilna sutzawm ding buapi mai ihi khak ahi chun, nu-leh-pa te chung gikna ding tuntu leh thiamna, hiatna hawl kihizawlo ah a kilawm lawm ding ah film/movies ah mi umchan kithaw te gual kihi maimai ding, a tawp leh lawsapna’n I nung hungzuizaw ding a hi.

I zilna leh I lungtup mualsua theina ding College/University ahi phawt chun, lung-awi tak ah maban zilna sutzaw a hawi hi. A ziak chu, Master's, Bachelor's, Doctorate & Degree I zaw tak leh sepna hawlna kawng hi’n, banglam banglam hitaleh kuama’n College/University hawi leh hawilo ah kai leh kailo a buaipi pua, Master's, Bachelor's, Doctorate & Degree neitu te hiatna, thiamna, performance zawk buapi a hisek hi.

Vak hiatthei ding in, khawvel ah lawtinna sang tak hung nei, mi lawting mama ah kihia a tamzaw te chanchin et in student a hi hun ua, College/University hawi taktak ah zilna nei te sang in, College/University hawitalua lo ah lungtup mualsua theina ding ah kukal tak leh gunchu tak ah panla te mi lawting hi nuamzaw’u ah muthei in a um hi. *Nisin Thuhiltu*