Khuga Dam tui ah Kamminsang khialut ah thi

Lamka, May 27 (Nisin Thuhiltu) : Government in gamsung mipi'n power, water supply leh irrigation lam thil ah a phatchuampi ding tupna’ Mata khaw kiang ah Tuitha Lui luang tingtan ah “Khuga Dam” ti min putsak ah um chu mipi'n phatchuampi sang in thang (trap) tawh tekhin thei phial in a um a, kum sin ah mi 2/3 in a thipi zing hi.

Zia chu tawh kitawn in tuni 27 May 2018 sun dak 12:40 vel in Khuga Dam en ah chia mitamtak te lak ah Kamminsang Haokip (28) (late) Jamkholen of Teiseng Village, Ccpur chu “Khuga Dam” tui kitinna mun ah khialut in thina a tuak hi.

Tui ah a khiaklut tawh kitawn in tuithiam bang zat a hem te leh mitawm ngai tamtak te’n a luang hawlna a nei nung un, nitaklam dak 3:00 vel a luang a mudawk ui. Kamminsang ahileh Moreh/New Samtal akipat Khuga Dam mukha nailo a lawite mi 3 tawh ama panna Teiseng khawmi 2 tawh mi 6 Khuga Dam en ding ah chia, Tui luandawna (Spillway) akipat metre 600 vel gamla ah a lawite mi 6 tawh longneu (wooden boat) 2 mang ah kitawl ahiu a, longneu (wooden boat) khat a mi 3 zel chuang, Kamminsang chu tui zaptheilo himaleh a hiatlo kal ua tuilak ah kichawm tha, buaisia leh thina tuak hi’n a lawite’n a gen ui.

Kamminsang tuilak ah khialut ti a hiat uh tawh kitawn in a kiangnai ah um Saipum YVA Unit, Sehken khua hausa, ZYA Sehken Unit, Mata khua hausa, YVA Mata Unit leh YPA Mata unit te'n thil tunna mun del in, tuilak ah Kamminsang hawlna a nei ua, zia nung a chu Philantropic Organisation chuamchuam Zomi Youth Association- GHQ; ZYA Lamka Block, Young Paite Association-GHQ, Kuki Khanglai Lompi-GHQ, Simte Youth Organisation-GHQ, Chin Youth Organisation-GHQ, Zou Youth Organisation-GHQ leh Kuki Students' Organisation-CCPur te’n del in, dakkal 2 sung lam a hawl nung un Kamminsang chu tuinuai ah a thisa mudaw in a um hi. Kamminsang luang hawlna ding a chun, M. Gouzamang Guite, MDC (New Lamka West) in life jacket 5 a tuakdawk a, NJ Haoneo Baite, Gen. Secretary, KSO-CCpur; Lianzalal, President, ZYA-GHQ panna mi banghem zat te’n tuilak ah a hawlna a nei nung un, Haoneo in tuinuai ah um hi ah a mudaw tawh kitawn in YVA Saipum Unit akipat Gensanglawm s/o Paukhokam of Saipum leh L. Lalchawilian Vaiphei s/o Letsiak of Saipum te'n 1vei thu a tuinuai lukhawm in Kamminsang luang a la dawk ui.

Kamminsang luang mudaw ah a um nung in Gouzamang Guite panna pawl chuamchuam in aluang puandum in a tuam ua, Khuga dam akipat a luang chu a chenna Teiseng Village zawtpi in a um hi.

Thina tuak Kamminsang ahileh Shaktiman Driver hi’n a kigen a, zani (26 May 2018) ah a lawite Moreh akipat mi 3 tawh Teiseng khua tung, a lawite mi 3 banah Teiseng khaw mi 2 tawh Khuga Dam en ding ah chia a hiu. Kamminsang in azi Nemneichan tawh kum 5 upa chanu leh kum 2 a upa chapa 1 nusia hi’n a kigen hi.

Hotel management zilthei
Lamka, May 27 (Nisin Thuhiltu) : Career Counselling Cell (Khuga Battalion) in Golden Threshold Programme: PH-III nuai ah student hotel management lam ah lunglutna neite a ding in Taj Group of Hotel leh Tata Institute ah Bachelor of Vocational Course (B Voc) dan ah Hotel Management zilna ding tawh kisai ah registration bawl piak thei ding a hi. Hotel Management course zilthiena ding a chu, second division tiang ah Class XII pass banah 17 akipat kum 21 kikal numei leh pawsal hithei ding a hi.

May 28, 2018 akipat in Khuga battalion ah registation bawlthei ding, June 2, 2018 ah candidate te screening bawl hiding, June 3rd week lakvel ah interview um ding, July 7, 2018 ah course kipan ding a hi.

Bachelor of Vocational Course (B Voc) a ding in numei leh pawsal kigawm vacancy 15 a um a, teldaw ah um te’n stipend Rs. 6,000 mu ding leh training hunsung ah nek-le-chak bangkim a thawn hiding a hi. Training ahileh kum 3 sung Taj Group of Hotel, Guwahati ah chiapi hiding, thuachian kimzaw hiatbe nuam te’n 8168339801/8119019706/7085692808 ah kanchian thei hiding a hi.

Exam Centre chuamchuam ah Scholarship exam bawl

Lamka, May 27 (Nisin Thuhiltu) : India gamsung ah Civil Service lunglutna neite ziltiltu minthang mama ALS, IAS, Coaching Centre chuamchuam ah MAIN-cum-PRELIMS (McP) BATCHES (Morning Batch 7:30 AM-10:45 AM || Evening Batch 6:30- 8:45 PM) leh Weekend Batch (8:00 AM-8:45 PM, Saturday & Sunday) te ding ah 18th June 2018, 2nd July 2018 & 9th July 2018 ah class kipan ding a hi.

Zia ding tawh kisai a chun, tuni, 27 May 2018 in Manipur ah ALS in SSPP-GHQ leh Thadou Student Association tawh kithua in Manipur state sung mun chuamchuam in Scholarship Exam a sai ua, Churachandpur exam centre ah CCpur College mang in, nitaklam dak 1:00 in exam a um hi. Imphal ah Modern College ah Scholarship Exam a um a, Kakching a ding ah Kakching khunou ah exam bawl in, Kangpokpi district ah Elite Hr sec School ah Scholarship exam bawl in a um hi. Chun, Ukhrul a ding ah St Stephen's College ah exam a um hi. Tuni, Ccpur Govt College ah Scholarship exam hun a chun, Civil Service lunglut mi 342 te’n exam a bawl ui. Scholarship Exam/Test ah mark musang penpen mi 100 teldaw hiding a hiu a, top 2 tiang tung te 100% course fee free hiding, Rank 3 to 5 (75% discount), Rank 6-15 (50%), Rank 16-30 (40%), Rank 31-50 (30%), Rank 51-70 (20%), Rank 71-100 (10% discount) hiding a hi.

ALS ahileh all India ah Civil Service Coaching Institute te lak ah kum 3 a ki zawm ah Coaching Instute hawipen hi ah rank No. 1 lua zawm zo a hi. Online ah class kila a hiziak in Delhi leh mun chuamchuam ah ALS Coaching Centre zosia tawh Class kilakhawm, Class kilakdan bangkim kibang a hi. Course ahileh 1 year course hiding, GS Prelims, CSAT, Essay, Current Affairs, Test Series, GS Main Paper I-IV, 900 Hrs of Class Room Training, Weekly Test, Online Portal for Questioners with Video etc hiding a hi. ALS in Book, Wizard Magazine, Atlas Calendar, Notebook, Answer Writing Pad, NCERT Book, Pendrive, Bag, ID-Card provide bawl ding a hi.

B.Ed program zilthei
Lamka, May 27 (Nisin Thuhiltu) : Directorate of Education (S) nuai ah sem Graduate Teacher (Science & Arts) kua hitaleh kum 2 sung (session 2018-20) B.Ed program zilnuam te’n application piaklut thei a hi. DM College of Teacher Education, Manipur ah B.Ed program zil thei hi’n a kigen a, Application ah document – No objection certificate, Regular appointment order, EIN, Graduate certificate, Date of birth certificate etc. tawh May 28, 2018 tiang ah Directorate of Education (S) ah submit ngai ding in Th. Kirankumar, Director of Education (S) in hiatsakna a bawl hi.

Free Medical Camp bawl ding
Lamka, May 27 (Nisin Thuhiltu) : 2nd Assam Rifle leh Singngat Philantophic Organisation chuamchuam-te saina’ zing May 28-29, 2018 ah Singngat New Marketing Shed, HQ Veng ah Free Medical Camp um ding a hi. Zia medical camp a chu Imphal akipat Civil Doctor Specialist-te’n damlo te en ding a hiu a, mit lam leh bil lam Speciàlist Doctor-te le camp ah pang ding uh hi’n a kigen hi.

Electoral rolls tawh kisai ah training bawl ding
Lamka, May 27 (Nisin Thuhiltu) : Election Commission of India leh Chief Electoral Officer/Manipur dawidan tawh kituak ah Tuibong ah um, District Training Centre (DTC Hall) ah May 30 & 31, 2018 zingkallam dak 11:00 apat, CCpur & Pherzawl District ah Assembly Constituency 6 apat Booth Level Officer (BLO) Supervisor-te leh BLO te’n ‘Cascaded training related to the preparation of electoral rolls’ kiti training neiding a hiu. May 30, 2018 zingkallam dak 11:00 ah DTC, Ground Floor ah 56-Thanlon (ST0 & 60-Singngat (ST)-te training ding a hiu a, Lamminlal Simte, SDO/AERO, Thanlon leh Jameson Sehlal Hangshing, SDO/AERO, Singngat te’n ziltilna nei ding a hiu. DTC First Floor ah 58-CCpur(ST)-te training ding ahiu a, Thangboi Gangte, SDO/AERO, CCpur leh Jangminlen Lupho, SDC/AERO, CCpur in ziltilna nei ding, May 31, 2018 zingkallam dak 11:00 ah DTC Hall, Ground Floor ah 55-Tipaimukh (ST) & 57-Henglep (ST)-te training ding, Derick Khobung, SDO/AERO, Vangai leh T.Joseph Lhungdim, SDO/AERO, Henglep in ziltilna nei ding a hiu. DTC Hall, Fisrt Floor ah 59-Saikot (ST) te’n training nei ding, James Doujapao Haokip, SDO/AERO Tuibong leh Lalsuong Gangte, SDC/AERO Tuibong in ziltilna a nei ding a hiu. Training a chu akisai khakpi, BLO Supervisor-te, BLO-te, ziltiltu ding (resource person)-te pang kim chiat ding leh training hun ah BLO-te’ mat ding register SSR 2019 leh election material hawpdaw hiding in, Shyam Lal Poonia, IAS, DC/DEO, CCpur in thusua a bawl hi.

Zillai District te’n election nei ding; Zillai Kangpokpi District hawng ding
Lamka, May 27 (Nisin Thuhiltu) : Zillai (Vaiphei Students’ Association), General Headquarter in thusua a bawlna a chun, Zillai General Assembly 2017 thupukna dungzui ah May 31st Zillai Day ni leh Zillai District zosia ah puitu te’n Oath-Taking a neiman ding ua Zillai District zosia’n zia masang ngei a chu Election nei chiat ding un hiatsakna a bawl hi. (Zillai General Assembly 2017 dungzui ah even year chu District election, every Odd year chu ZGHQ election hi ding ti a hi)

Chun, Zillai District te’n election a neina ding tawh kisai a chun, Zillai GHQ in District tin ah Election Commissioner ding a guat piak a, Election Commissioner ding te chu Churachandpur District ah Dr. Soilalsiam, Mr. David Duhlian leh Mr. Khupzakhai Suante hiding; Tengnoupal District ah Mr. Seijang Baite leh Mr. Sholun Baite hiding; Chandel District ah Mr. Mamang Baite hiding; Imphal District ah Dr Lamzolian Suantak leh Mr. Jonathan Vaiphei te hiding a hiu.

Candidate chungchang, election chiathak dingdan leh vote nei thei ding tawh kisai ahileh Zillai constitution dungzui hi ding, belap ngai khenkhat belap hiding in le Zillai GHQ in thusua a bawlna a chun, a taklang hi.

Chuleh, May 31st chu Zillai Day a hitawh kitawn ah Zillai GHQ in Zillai Kangpokpi District hawnna nei ding, Zillai Kangpokpi District hawnna hun chu Mr. Khatkhotong Baite, President, VPC GHQ, Mr. Dama Vaipheí EM/ADC, Sadar Hills/Kangpokpi leh Mr. Łamkhogen Vaiphei, Ex President, Zillai GHQ te’n Chief Guest, Guest of Honour, Functiona President hina tawh uap ding uh hi’n Zillai GHQ thusua in a taklang hi.

A langkhatlam ah Churachandpur District ah Election Commission in 24th May 2018 ni ah Election Notification a suadawna a chun, Zillai Churachandpur District in 31st May 2018 sun dak 12:00 leh Zillai Churachandpur District Office, Bethel Veng ah election nei ding leh President leh Vice President ding tel hiding in a taklang hi.

Student Curfew puang
Lamka, May 27 (Nisin Thuhiltu) : Young Vaiphei Assocaition (YVA), Compoung Veng Unit in hiatsakna thusua a bawlna a chun, student te Half Yearly exam um ding tawh kitawn ah Compoung Veng Unit huapsung ah Student Curfew a puang a, zia dungzui a chu nitak lam dak 6:00 nunglam ah School naupang himhim veng sung mi hihen la pawlam mi hita leh kuama vakdaw phal hilo in a taklang hi. Chuleh Zu le sa kham hu sa leh a dang dang le phal hilo ahidan taklang kawm in, hiatsakna thu sua za lo a um ah Duty te’n amat khak ua, a chung ua action a lak ua leh kuama’n thasiatna latheilo ding, a maw a kipuak ding uh hi’n a taklang hi. Chun, naupang zillai te khual na ziak ah ziagual panlakna chu chiapi ding ah lemsakna nei a hina chung ah Nu leh Pa, mipi te’n panlakna a lawtin theina ding ah kithuapi chiat ding in chialna a bawl hi.

CCpur Dist. ah polythene/plastic bag khap hita ding

Lamka, May 27 (Nisin Thuhiltu) : Churachandpur District sung a polythene/plastic bag tawh kisai a chiata February 6, 2018 ni ah Deputy Commissioner, Churachandpur mapuina genkhawm ahi nung ah, district sung a polythene/plastic bag matloding/khâm ding ah lemsakna a um tawh kitawn in Churachandpur District sung ah May 28, 2018 a pat polythene/plastic bag khap (ban) hita ding a hi.

Hiatthei khat chu, District Administration in survey a bawlna, Churachandpur District sung ah nisin leh plastic bag 1.86 lakh matbei hisek ti a hia, Central Government, State Government leh Local Government in plastic bag khâm ding pha a sak dungzui ua, a chiata March 19, 2018 ni ah Shyam Lal Poonia, IAS, DC Churachandpur leh M/K Plastic in Churachandpur District ah biodegradable plastic/polythene a supply ding ah kilemna suai ala kai uh le a hi.

India in World Environment Day 2018 a zintun ding tawh kitawn ah World Environment Day, June 5 ah polythene bag consumption free district ti ah puandaw a hitheina ding ah May 28, 2018 apat district sung a polythene/plastic bag khâm ding ah lemsak a hi. Chuleh polythene/plastic bag tawh kisai enzui ding ah Enforcement Committee siamdaw in a um a, chairman ding ah Sub-Divisional Magistrate, Member Secretary ding ah Sub-Divisional Police Officer leh member ding ah Range Officer (Forest), Assistant Engineer (PHED) leh CEO/ADCC in a se, DI-te guat a hiu.

Sauliim Restaurant sung lut gua gucha 1 kiman

Lamka, May 27 (Nisin Thuhiltu) : New Lamka Hebron Veng ah um, Sauliim Restaurant sung lutgua gucha khat tuni, May 27, 2018 sunnung ah matdaw in a um hi. Mat ah um ahileh Vanlalzaua (20) s/o Laltanpuia of Zezaw hi’n a kigen a, khamthei heroin No. 4 ching zawngsak hi’n le a kigen hi. A kigen dan in, Sauliim Restaurant sung lut ding gua, thikpum (bar) khat mang ah Tala khaina ding ah kisiam kalsia, a sung lut maleh a lutna chu Toilet hikha’n, guk ding chuam helo ah a pawtdaw kitna mat ah um a hi. Vanlalzaua a kipuan dungzui in, plastic bottle hawl ah zuaksek leh a sum mute chu khamthei chawkna mang sek hi’n a gen a, a lawite banghem zat tawh innlum beello ah khawlai dung ah zan giak sek hi’n le a gen hi. Thudawtna chuamchuam neizaw ah a um nung in a thilchiin haisan ding ah thuhilna leh kitiamna neisak ah thasuak kit a hi.

District Morgue ah mithi 1 kikawi
Lamka, May 27 (Nisin Thuhiltu) : Lamka police in report amu dungzui ah zani 26 May 2018 nitaklam ah Zenhang Bazaar a Public Toilet ah khawhelo ah pawsal khat um, va pawdawk ah hospital a tut uh chu damzo lo in a thi, District Morgue ah kawi in a um hi. Mithi ahileh a insung mite’n tuni’n police ah claim vabawl maleu Unnatural Death case ah thina tawh kisai ziklut ah um ziak in postmortem bawl ngai a hina chung ah 28 May 2018 ah postmortem bawlzaw a hitak leh a insungmite khut ah piakdaw hiding in a kigen hi. Mithi ahileh Maibam Roshan (32) s/o Maibam Hembabu of Ward No. 10, Sabal Leikai, Nambol, Bishnupur District a hia, police in U/D Case No. 4/CcpPs/2018 U/S 174 CrPc in case a ziklut hi.

Nghathal Line Diesel Auto Assn in By-Law bu hawng

Lamka, May 27(Nisin Thuhiltu) : Nghathal Line Diesel Auto Owners’ Association in tuni, May 27, 2018 sunnung dak 2:30 in Nghathal YMA Hall ah General Body Meeting leh Rules & Regulations Amendment kibawl hawnna leh a latna hun amang hi. Zia hun chu Paokholal Haokip, Chief of Tonglal Veng, Ramhlunmawia, Chief of Nghathal leh Sheiboi Haokip, President, ACDDAOA te’n Special Invitee hina tawh a uap ua, Sheiboi Haokip, President, ACDDAOA in thugenna nei in, By-Law hawnna a nei a, By-Law thak chu Shingpu’n a latna a nei hi. Zia By-Law bu chu member zosia te kiang ah piakdaw in a um a, Special Invitee-te a pat thugenna a um hi. Sheiboi Haokip, President, ACDDAOA in a thugenna a chun, Churachandpur khawpi sung ah Diesel Auto line chuamchuam ah service te lak ah Nghathal line ah taite’n, discipline neitak kivaipuakna nei a hidan uh gen in, line dang kuama tawh kihiatthiamlona neilo ah, Rules & Regulation nei line ahi dungzui ua line dang te’n le ettawn tak sa a hidan uh a gen hi.

YPA Imphal Block in election nei
Imphal, May 27 (Nisin Thuhiltu) : Young Paite Association (YPA) Imphal Block vaipaw ding telna (election) tuni’n a um a, Chin Ngaih Pau, Chairman, CEC, YPA GHQ; V.Chinkhenmung, Finance Secretary, YPA GHQ; T.Thangkhangou, Member CEC YPA GHQ leh V.Khankhup Guite, Member, CEC YPA GHQ te mapuina nuai in kum 2018-2021 sung YPA Imphal Block vaipaw thak ding in - L Thangkhanlal, Kamlianthang Guite, T Ginkhanlian, S Thiauchinpau, N Tuankhanzam, S Nengkhozam, T Dongzathang, T Ginkhanchin, B Kamzalam, G Thangsuankhup, G Mangsuanthang, T Thongkawl, G Thangchinlian, Tluanga leh G Thangzalian te a telting ua, teltin ah um te’n office bearer ding telna a neisawn hun un, President - L Thangkhanlal; Vice President - Kamlianthang Guite; T Ginkhanlian, Secretary - S Thiauchinpau; Asst. Secy. - G Mangsuanthang, Finance - N. Tuankhanzam; Treasurer - G Thangzalian leh member ding in - S Nengkhozam, T Dongzathang, T Ginkhanchin, B Kamzalam, G Thangsuankhup, T Thongkawl, G Thangchinlian leh Tluanga te a telting ui. Election Commissioner te’n kitiamsakna nei in, Upa T Tuankhogin pauchap piakna a nei hi.

MELC in Missionary ding laklutna nei

Imphal, May 27 (Nisin Thuhiltu) : Manipur Evangelical Lutheran Church (MELC) HQ Church, Zomi Colony ah tuni May 27, 2018 sunma dak 11:00 in Missionary Commissioning Service a um hi. Rev. Thangliankham, Director of Missions, MELC in hun matna amapui a, Upa Chinzahau, Chairman, Mission Deptt. in Missionary lakdan tawh kisai taklatna nei in, Rt. Rev. Dr. S.K. Manlun, Bishop MELC in Missionary ding ah Manglianlam laklutna leh pauchappiakna nei in, mipite mai ah a pianna nu kiang ah a chapa chanchinpha puangzak tu ding in laphalna em? ti dawtna siam in, LYF GHQ mapuina pakkhi awsakna hun um in, Missionary ding ah laklut ah um Manglianlam in thugenna a nei hi. Programme matzaw in, Upa Nengkhenthang, Moderator, MELC in pauchapna tawh hunkhakna a bawl hi. Manglianlam ahileh Tripura ah MELC nuai ah missionary kuan ding hi’n a kigen hi.