Manipur Board nuai ah HSLC (Class X) exam results puan hita;
Pass percentage sanpen ah record; District wise ah Thoubal & Kakching ah pass % sangpen

Imphal, May 25 *(Nisin Thuhiltu)* : Education Minister Thokchom Radheshyam in tuni’n Board of Secondary Education Manipur (BOSEM), Office, Babupara, Imphal ah High School Leaving Certificate Examination, 2018 results puandawna a nei a, zia dungzui a chun, a chita kum 10 sang ah tukum ah result hawizaw leh pass percentage 73.18% a tung hi. Kum 2013 ah pass percentage 72.27% leh kum 2017 ah 66.70% chu a chiata kum 10 sung a ding ah pass percentage a sanpenna kum ah tepte ah a la um himaleh tuchung ah pass percentage 73.18% tung chu a sanna pen hi ah tepte a hi.

Education Minister in student leh nu leh pa te banah teachers te kipakpi mama kawm in, candidate 37351 um te lak ah candidates 37064 in HSCL Examination 2018 bawl uh hi’n a puang a, zia lak a chu student 27126 te exam ah pass in a puang hi. Zia ah exam bawl students 37064 te lak ah student 18637 te chu pawsal a hiu a, students 18427 te ahiuleh numei a hiu. School wise ah government schools apat exam bawl candidate 8419 um te lak in student 4293 te’n lawtinna a chang ua, Aided schools apat student 1719 umlak in student 1066 te a lawting ui. Private schools a pat student 26926 exam bawl te lak in student 21767 te exam in a lawting ui. District wise ah Thoubal & Kakching in pass percentage a sangpen a, candidate exam bawl 6556 umlak in 5428 te exam in a lawting ua pass percentage 82.79 % a tung hi. Imphal East & Jiribam ah pass percentage niampen in, exam bawl student 5582 um lak in student 3746 te exam in a lawting ua, pass percentage 67.11% a tung hi. Compartmental Examination ahileh July, 2018, 2nd week ah um ding a hi. Education Minister Thokchom Radheshyam in a thugenna a chun, government panlakna mipi’n a support na chung ah law & order dinmun in hawilam amanaw banah bandh leh blockade kiti a tawm takna chung ah education lam in masawnna umthei, exam result hawitak piang thei hi’n a gen a, student exam ah lawting zo lo te chu, khatvei exam fail ziak ah mawk thatdalo ding leh maban ah kukalzaw sem ah panlakna nei chiat ding in chialna a bawl hi. Chun, lawsap kiti mihing hinkhua a um zing a hina chung ah puakdan thiam ding leh bawlkhialna chung ah lesson thak zildaw ah panlak thak ding pawimaw in a gen hi. Chuleh, nu leh pa, suapi te leh teachers te chu student a lawsam te tilkhona nei ding leh a lungtup uh a mualsua theina ding ua panlakpi chiat ding in chialna a bawl hi. HSLC Examination, 2018 result declaration programme chu Chairman of BOSEM Akham Joykumar Singh leh a aki saikhakpi official te’n le a uap ui.

‘Go to Village’ mission tawh kisai ah ‘review meeting’ nei

Imphal, May 25 *(Nisin Thuhiltu)* : Chief Minister N. Biren Singh mapuina, Darbar Hall, Chief Minister’s Secretariat ah tuni’n state government in “Go to Village” mission chiapi ah a umna tawh kisai in review meeting a nei a, website hawnna le a nei hi. Chief Minister in meeting hun ah a thugenna a chun, aphalam ah kisanna a um theina ding ah govt official te nasepdan style sang ding ah chialna bawl in, ‘Go to Village’ mission chiapi ah a umna chung ah govt official te’n lemchanlona tamtak tuak ding himaleu kipezo tak ah panlakna a neina chung un pakchat thu a gen hi.‘Go to Village’ mission chiapi a hi ziak ah Minister leh MLA te’b grassroots level ah mipi te kimupi thei a hidan uh taklang in, tuni tiang ah mun 227 ah camp bawl ah um, zia a pat chu complaint 2.9 lakhs lut, zia lak a chu complaint 1.73 lakhs te sukfel ah umta leh 1.26 lakhs compliant um te etzuina chiatha zing in a gen hi. Tunung hapta 3 sung ah ‘Go to Village’ camp ah mipi te haksatna um te chu kituptak ah bawzui hiding leh a hapta 4 tinna i.e. 26th June, 2018 ah haksatna tuak tam diakna mu te a vel ah etthakna nei hiding, zia hapta 3 sung a chu Zilla Parishad members, Pradhan ADC members leh SDCs etc te’n mipi te haksatna a kanzui ding uh hi’n a gen hi.

Maban ah ‘Go to Village’ mission chiapi ah a umna ding tawh kisai ah ni 2/ 3 zaw leh Chief Secretary in Nodal Officers leh Administrative Secretary te ‘review meeting’ neipi ding, State Cabinet in government employees ‘Go to Village’ mission ah panla te chu allowance piak ding ah lemsakna a nei in a gen hi. ‘Review meeting’ hun sung a chun, Chief Minister in Minister, MLA, Department chuamchuam ah official te ngaidan leh dawidan, feedback genkhawmpi in, ‘Go to Village’ mission website www.gotovillage.in leh dashboard hawnna a nei hi. Website leh dashboard chu Department of Information Technology, Government of Manipur in X-treme Wave tawh kithua ah a siamdaw a hi.

Chun, Chief Minister in ‘Go to Village’ mission tawh kisai in booklet hawnna a nei a, zia booklet a chun, ‘Go to Village’ camps ah service muthei um te kizik lang in, English leh Manipuri banha dialects 7 - Tangkhul, Hmar, Zou, Poumai, Thadou, Paite leh Kabui ah pau ah kizik a um hi. Department in paudang ah le zia booklet chu published bawlbe nalai ding hi’n a kigen hi.

‘Review meeting’ a chun, Minister for PWD, RD & PR Th. Biswajit Singh, Minister for Health and Family Welfare L. Jayantakumar Singh, Minister for Agriculture V. Hangkhanlian, Minister for Social Welfare Smt. Nemcha Kipgen, Minister for PHED, Losii Dikho, Minister for CAF&PD Karam Shyam, MLAs, Chief Secretary, DGP, Administrative Secretaries, DCs, HOD leh Department chuamchuam ah official te a pang ui.

Yaiphabi Mayengbam in Manipur Class X exam ah top hina lua

Imphal, May 25 *(Nisin Thuhiltu)* : Roll No. 40965, Yaiphabi Mayengbam d/o Mayengbam Monokanta leh Ngangbam Ibetombi of Sagolband Tera Lukram Leirak, Imphal chu overall topper ah pang in marks 500 lak in marks 573 a mu, ama ahileh of Little Flower School, Imphal apat a hi. Chun, Roll No. 37070, Surjakanta Irengbam s/o Irengbam Metrik Singh & Irengbam Thaba Devi of Mayang Imphal leh Roll No. 40894, Patel Lairenjam d/o Lairenjam Sharatchandra Singh & Nandeibam Shanti Devi of Utlou Awang Leikai te chu marks 572 tawh top 2 in a pang gel ua, Surjakanta Irengbam ahileh Ch.Thambou High School, Mayang Imphal a pat, Patel Lairenjam ahileh Little Flower School, Imphal a pat a hi. Roll No. 32045, Brahmacharimayum Balkrishna Sharma s/o Brahmacharimayum Ramananda Sharma & Brahmacharimayum (O) Dasuda Devi of Kakching Moirangthem Leikai leh Roll No. 40766, Angela Athokpam d/o Athokpam Somdutta Singh & Thingbaijam Suchitra of Top Khongnang Makhong D.C. te chu marks 470 tawh top 3 in a pang gel ua, Brahmacharimayum Balkrishna Sharma ahileh Padma Ratna English School, Kakching a pat, Angela Athokpam ahileh Little Flower School, Imphal a pat a hi.

Meghalaya Class XII exam ah Top 9

Lamka, May 25 *(Nisin Thuhiltu)* : Miss Stacy N. Neihsial d/o (L) Kaipi S. Neihsial, Commandant, BSF & Neiboi Neihsial of Gangpimual, tu Shillong ah um in, tuchung Meghalaya Board of School Education ( MBOSE) nuai ah Class XII results 2018 suak in Cl-Xll (Arts) ah Top-10 (Candidates in Order of Merit) lak ah 9th Position in a pang hi. Miss Stacy N. Neihsial ahileh St. Margaret's Hr. Sec. School, Shillong ah kai a hia, ama'n total marks 500 lak in marks 412 a mu zo a, a subject ahileh Geography, Political Science, History leh Education a hi.

Paite Cultural Society in election nei

Lamka, May 25 *(Nisin Thuhiltu)* : Paite Cultural Society (PCS) in tuzingkal dak 10:30 apat in PTC GHQ Conference Hall, Hiangtam Lamka ah Board of Director General Body Conference-cum-Election for May 2018 - May 2021 hun a mang ui. Election hun chu, Paite Cultural Society in dawtna a bawl dungzui in, Paite Tribe Council in a mapui a, Election Commission in Nengkhansuan Guite, Secretary, Customs & Culture; T. Awnkhanlun, Secretary (Internal Affairs) leh V. Gouthianmuan, Secretary (Organization) te a pang ui. Election ah PCS membership fee pia mi 27 te’n vote khiakna a nei ui. Chun kum 2018 apat 2021 sung PCS vaipaw ding mi 15 a teldawk ua, amau chu - TP. Sianzaneng, Lailam Veng, T. Singneng, Mission Road, Hiangtam Lamka, S. Tualchinkham, Tedim Road, Hiangtam Lamka, M. Vumhau, Dorcas Veng, New Lamka, P. Nengkhanlian, Lennuam Veng, Bungmual, Pumshong Hangshing, Sahei Road, New Lamka, V. Jamzagin, Dorcas Veng, New Lamka, P. Tuanzakham, Zion Veng, New Lamka, V. Chinkhenpau, Zenhang Lamka, Daizasiam, New Lamka (G), N. Khupzadou, College Veng, New Lamka, L. Nengkhopau, V. Munhoih, New Lamka, K. Paumuanthang, Vengnuam South, New Lamka, T. Khupzagou, Dinthar Veng, Nghathal leh T. Vungzathuam, Dorcas Veng te a hiu. teldaw ah um mi 15 te’n May 29, 2018 zingkal dak 7:00 leh Election Commission-te mapuina kitiamna nei ding leh vaipawlui te tawh kikhutsanna nei ding a hiu.

Singngat Battalion mapuina’ khawsung leh bazaar suthiang

Lamka, May 25 *(Nisin Thuhiltu)* : 27 Sector, Assam Rifle nuai ah um, Singngat Battalion in tuni’n Simte Youth Organization (SYO), Singngat Unit leh Singngat Youth Club (SYC) tawh kithua in khawsung leh bazar sukthianna a nei ua, zing ah sunzawm ding a hiu. Zia nasepna hi, Swachh Bharat Abhiyan nuai a bawl ahia, khawsung thiantho ding ban ah mipite’n thianthona a ngai pawimaw ding uh tupna ah kibawl hi’n a kigen hi. Tuni nasem zosia Singngat Battalion in thingpi leh nekthei a nekpi ui. Singngat Battalion leh Singngat khawsung a Philanthropic Organization chuamchuam kigawm in a hung tung ding 28 leh 29, 2018 ah Singngat New Marketing Shed ah Khungang Chatse Mission nuai ah Ayush Medical Camp um ding a hi.

Bazaar nupi te chutna lemlo ziak ah buaina piang

Lamka, May 25 *(Nisin Thuhiltu)* : District sung a me leh van chichuamchuam kizuakna munpi, New Bazar ah tuni’n bazar nupite chutna mun thu ah buaina a piang hi. Bazar nupi khenkhat bazar sung a chanzawlo ziak un, Nute Bazar mai ah Parking area mun ding kibawlna mun ah a zawk ziak ua, a kiang nai ah dawr bawl dangte tawh kihiatthiamlona um ziak ah buaina piang hi’n a kigen hi. Nupi khenkhat licence nei, hilele chutna mun lungtun zawlo ziak ah verandah chu pawl a um ua, khenkhat licence nei maleh chutna mun ding umlo ziak ah bazar sung tuanglai ah chu pawl, chuleh khenkhat licence nei maleh a sung changzolo ti a um ui. Zia tawh kisai hin, mawpawtute’n a etzui pai ua, licence piak hun ah a chutna mun ding utawh kichiantak ah piak hileh ti tamtak holimna ahi. A langkhatlam in, Thangzam Road nai lampang ah zun-leh-ek bûk ding sawng khat bawl pat in a um a, zunbûk 6 leh ekbûk 5 chiat a chung leh nuai ah um ding hi’n a kigen hi.

Director General NCC in Imphal pha

Lamka, May 25 *(Nisin Thuhiltu)* : Manipur State khangthu a ding ah a masapen ding in tuni’n Director General of National Cadet Corps, Lieutenant General P.P. Malhotra, AVSM in Imphal a hung ve hi. Zia hun a chun, Imphal Group NCC vena nei in, Cadet leh ANO cheng tawle hun a mangkhawm ui. Chun, Manipur Chief Minister, N Biren Singh le kimupi in, State Government in NCC tawh pan a lakna chung ah kipakthu gen in, maban ale NCC hawitak ah a chiatozel theina ding ah panlato zel di’n chialna a bawl hi. Zia ban a chun, Imphal ah Thangta dance, kabui dance, football lsuborto cup ban ah thil pawimaw dangdang buaipi ah Manipur hung pha hi’n a kigen hi.

Lingsiphai lampi blacktopping bawlpat hita

Lamka, May 25 *(Nisin Thuhiltu)* : National Highway Infrastructure Development Corporation Limited (NHIDCL), M/S Satya Builders in Churachandpur-Singngat kikal lampi Sub-Contractor nuai ah a bawl uh chiato zel in, tuni’n Lingsiphai apat Lamka lam manaw in Blacktopping bawl pat in a um hi. Zia nasepna hi a chiata November 26, 2017 ah bialtu MLA, Ginsuanhau, Chairman, MANIREDA; Khaipao Haokip, Chairman, ADC Churachandpur leh Shyam Lal Poonia, IAS, DC Churachandpur te’n flag-off a bawl uh ahia, Lampi ahileh Singngat khawsung zero point (Behiang-Tedim Road Junction) apat Lamka chan bawl tung hiding hi’n a kigen hi. Lampi sâu dan kilometer 34.5 ahia, lampi lang leh lang ah hawktui luanna(nullah) kibawl ahi. Tha 24 sung ah bawlzaw ding ah hun piak ah um uh hi’n a kigen hi. Zia lampi bawlna hi M/S Satya Builders apat Special contractor, Tinkholal in a lak sawn ahia, Paver machine mang ah kibawl ahiziak in lampi hawi mama ding hi’n le a kigen hi.

13th Education Fair 2018 kipan

Lamka, May 25 *(Nisin Thuhiltu)* : North East Educational Consultancy (NEEC) saina’ YMA Hall Hmuia Veng ah tuni a pat in in May 26, 2018 tiang ah “13th Education Fair 2018” kiti um ding a hi. 13th Education Fair 2018 ahileh “Explore North East” ti thupi nei ah chiapi a hia, India gamsung ah College leh University chuamchuam 13 in stall khat chiat hawng in, amau lak a chu Imphal khawpi apat University banah Bangalore, Delhi, Chandigarh, Dehradun, Punjab leh Himachal Pradesh a pat Shiva Group of Institution, ICFAI University, Tripura; Quantum University, Quest Group of Education, Punjab; GNA University, Punjab; IITA Imphal; Sree Vidyanikethan; Dev BhoomiSS Career Solution; Krupaniddi leh Bannari Amman Institute of Technology te a pang ua, stall a chu Engineering, Animation, Journalism, Phamacist, BA (Acting) leh course tamtak zilna ding ah admission le a mun ah bawl thei ngal, admission bawlte a ding ah North East a pat student te a ding bik ah offer le um in a kigen hi. Tuni’n student 100 val in line chuamchuam ah maban thiamzilna ding tawh kisai stall ah University palaite kimupina a nei ui. 13th Education Fair 2018 ahileh May 16 & 17, 2018 ah Imphal, Lamyanba Shanglen ah nei in a la um a, Ukhrul Town Hall ah May 21 & 22, 2018 sung ah nei ah a um kit nung ah, Churachandpur ah tuni leh zing tiang ah um ding, May 30 & 31, 2018 sung ah Senapati Mini Stadium ah um kit ding a hi.

YVA GHQ team kuandawk
Lamka, May 25 *(Nisin Thuhiltu)* : Vungminthang, President, YVA-GHQ mapuina tuzingkal in YVA-GHQ lawiupa te mun 3 ah hun mang ding in a kipandawk ui. Amau chu Vungminthang, President, YVA-GHQ banah H.Sangpi, Vice President; Thanglalsiam, General Secretary, Kapsonlal, Secretary Finance, K. Chung Vaiphei, Secretary Social,Culture & Custom; Lamkhokhai, Secretary information & Publicity leh S.Thangboi, Member te a hiu a, a kipatdaw ding kuan in, Upa Khupliankap,Cabinet Member in pauchap piakna nei in, Red Cross Road, Hilltown in a kipan dawk ui. YVA -GHQ lawiupa te’n YVA Chongkhozo Block Election uap ding, zia zaw tak chuleh YVA Chiangpi Unit Election neipi ding, sunnung ah Kawlhen Block thak hawnna leh lawiupa ding telna nei ding a hiu. Kawlhen Block thak ding ahileh Chongkhozo Block a pat khua banghem zat khenthak suk hiding in a kigen hi.

Graduation-cum-Commissioning Ceremony mang

Lamka, May 25 *(Nisin Thuhiltu)* : ECA Church, D. Phailian ah tuzingkal dak 10:30 apat in Evangelical College of Theology (ECT), Nehru Marg, Rengkai ah “A vessel unto honor, sanctified and meet for the masters’ use” ti thupi mang in Graduation cum Commissioning Ceremony hun a mang ui. Zia hun a chun, graduate dawk ding student-te Inkuante, kochuam puitute leh ECT teaching staff ban ah dawisaktu tamtak in a uap ui. Rev Dr Lalrosiem Songate, Principal in bible student-te degree piakdawna a nei a, Rev Dr. SK Manlun, Bishop, MELC in Pathian kiang ah pauchappiakna a nei hi. Tuni ah graduate dawk bible student-te ahiu leh, Master of Divinity (M Div) ah student 15, Bachelor of Theology (B.Th) ah 11 leh Diploma in Theology (D.Th) ah khat ahi.

Ngillou Tunnu Hot Mixer Plant hawng

Lamka, May 25 *(Nisin Thuhiltu)* : Churachandpur ah a masapen ding in tuzingkal dak 9:30 in Immanuel Khopi ah Ngillou Tunnu Hot Mixer Plant kiti hawndawna a nei ui. Ginsuanhau, MLA leh Chairman, MANIREDA in Plant hawndawna nei in thugenna le a nei a, Rev. Zamlianpau, Pastor, Lamka District, ZPCS in Pathian kiang ah latna a nei hi. Special Contractor, Khamthang in a gen dan in, gam khanto dan tawh kituak ah nasepna cheng khawl thahatna ah sep ding tupna ziak ah Rs. 1.25 crore bei ah Hot Mixer Plant a chawkdaw ahi’dan a gen a, a Plant chu feet 50 a tinna ding feet 2 bep ah vât ah lian a hia, truck naran a puak theilo ahiziak ah Ashok Leyland secondhand, Rs. lakh 15 bei ah a chawkdaw hi’n le a gen hi. Government apat Specification dungzui ah hawndaw ah um, Ngillou Tunnu Hot Mixer Plant mangcha ah Chura-Sugnu Road ban ah Churachandpur-Singngat Road bawl hiding ahi’dan leh zia bawlna ding tupna ah Khamthang in vanmatchak a chawkdaw ahi’dan MANIREDA Chairman, Ginsuanhau in a gen hi. Road Equipment Private Limited, Ahmadabad apat chawkdaw ahia, dakkal khat sung ah bitumen leh suang kihel tonne 30- 40 suangsozo hi’n a kigen a, chawllo ah nikhat sung mat hileh diesel litre 800 - 1,000 kikal beizo ding hi’n le a kigen hi.

Cage Culture Fish Farming tawh kisai ah Workshop bawl

Lamka, May 25 *(Nisin Thuhiltu)* : Churachandpur Cage Culture Fish Farming & Research Centre in North Eastern Regional Institute of Water & Land Management, Tezpur panpina tawh tuzingkal dak 10:30 apat Zoutuinuam khua ah “Workshop on Increasing Water Productivity in Khuga Multipurpose Dam” ti thupi in hun a mang ui. Zia hun chu, Khatchin Langel, Director, GWE & E-II, Ministry of Water Resource, River Development and Ganga Rejuvenation, New Delhi in Chief Guest leh Shyam Lal Poonia, IAS, DC Churachandpur in Special Guest hina tawh a uap ui. Dr Pankaj, Director, NERIWALM in vaidawnna thu gen in, guest-te apat thugenna a um hi. Dr. Ch. Victoria Devi, Research Associate, Social Science, NERIWALM in kipakthu gen in, technical session pat in a um hi. Technical session hun ah D.W. Ingo, Retired Professor, Horticulture, Central Multipurpose Agricultural, Manipur University, ICAR, Imphal; Dr B.K. Bhattacharya, Head, ICAR Central Inland Fishery Research Institute (CIFRI), NER Centre, Guwahati; N.J. Sharma, Former Adviser, IFC & WSM North East Council, Shillong leh Dr Ch Victoria Devi, Research Associate, Social Science NERIWALM-te resource person ah pang in ziltîlna a piau’ hi. D.W Ingo in thaichi chîn dan a genna ah, bu bep tulo ah, malcha leh thaichi chuamchuam le tu ding ban ah sanga nek in taksa leh lungthim ngaituana hatsak ahi ti’n ziltîlna a pia’i. Dr. B.K. Bhattacharya in tuipi nga leh tuithiang ah kivak sanga tuidiak hi’n a gen a, chuleh zingkal leh nitak ah ann piakngai ngai ahi ati’i. Natna hik ziak a sanga percent 10-15 kikal thithei ban ah ngano vak dingte’n potash ah dia in natna hik apat vengthei ahi’dan le a gen hi. Zia hun a chun, Chief Guest kiang ah memorandum khat a piak uh, Zoutuinuam khua, Water Resource Self Reliance Model Village ding ah bawl ding tawh kisai ah Chief Guest in a pawimaw dungzui ah enzui ding hi’n a tiam hi.