Major Gen. Ashok Kumar in ECHS etthakna nei

Lamka, May 24 *(Nisin Thuhiltu)* : Major Gen. Ashok Kumar, Managing Director, ECHS in tuzingkal dak 11:30 vel in Headquarter Veng ah Ex-Servicemen Contributory Health Scheme (ECHS) Polyclinic ve’na a nei a, committee member ban ah staff-te tawh hun a mangkhawm ui. Zia hun a chun, Brg. Ajau Kumar, Commandant, 27-Sector Assam Rifles leh officer bangzat hem in a zui ui. Major General in ECHS Polyclinic mun ding, gam a piak ding ban ah building sak piak leh Ambulance piak ding in a tiam hi. Headquarter Veng ah um ECHS Polyclinic ahileh, Army pension leh a Insungmite a ding ah kum 2013 ah kiphutdawk ahia, Ex-Servicemen Medical Card neite a thawn ah ki-etsak thei leh damdawi le a thawn ah lakthei ahi. Chun, mundang ah ki-etkawlna sum cheng le reimburse bawlsak thei ahi. Tutiang hin primary leh dependent kigawm ah member 3000 val um hi’n a kigen hi. Zia mun hi Lt Col. KN Singh, Officer Incharge etkawlna nuai ah Medicine Doctor 1, Dental Doctor 1, Nurse 1, Lab. Tech. 2, Sweeper 1, a kigawm ah staff 9 um hi’n a kigen hi.

Global Fund for Sustainable Development, Germany tawh kisai hilchian

Lamka, May 24 *(Nisin Thuhiltu)* : Global Fund for Sustainable Development, Germany funding bawlna ah Global Fund India nuai ah Mother NGO, Agape Museum in Partner NGO ding ah Registration tawh kisai in tuni nitaklam dak 1:00 in Agape Museum,Tuibong ah Press Conference a bawl hi. Zia hun a chun, Agape Museum ah Director Rev. Dr. Lhunkhohao Haokip in Global Fund India leh Global Fund for Sustainable Development, Germany tawh kisai hilchianna a nei a, amau kithuapina nuai ah nasep ding lunggul, Manipur hill district apat NGO te’n registration a bawlthei laitak uh ahidan gen in, registration bawlna ding ah a pawimaw bangkim genna a nei hi. Rev. Dr. Haokip in a gendan in, khovel pumpi ah top millionaire gam pathum; USA, Japan leh Germany a um a, zia lak a chun Germany apat bep inle millionaire million khat vâl um in, amau in khawvel ah khawsak haksate lak ah damtheina leh thiamzilna tawh kisai ah mat ding ah Global Fund for Sustainable Development, Germany ah a tuakkhawm uh, India ah Counterpart Agency, Xavier Social Service Samiti in Global Fund India nuai ah a hung sepdaw ding ti ahia, zia ding a chun, Mother NGO, Manipur ah pani a um a, hill area a ding ah Agape Museum hi’n a gen hi. Agape Museum in tulaitak ah partner NGO 53 a nei a, Global Fund India in partner NGO 200 tiang neithei ding a ti ziak in, NGO lunglutna neite a ding ah June 15, 2018 chan ah registration bawlthei ding hi’n a gen hi. Registered NGO zosia Global Fund for Sustainable Development, Germany nuai ah nasepna ding ah kum 20 sung fund hung ding ti ahia, lunglutna nei NGO te’n May tha sung ah Agape Museum, opposite Tuibong Petrol Pump ah kithuhiat thei ding hi’n a gen a, huntiam bei nung ah registration hawn hilo ding hi’n le a gen hi.

CMHT, Health Coordinator lakna ding ah interview

Lamka, May 24 *(Nisin Thuhiltu)* : ‘Chief Minister-gi Hakshelgi Tengbang (CMHT) scheme ah Health Coordinator, CCpur ah sem ding tuni’n Medical Superintendent office chamber, District Hospital ah walk-in-inteview nei in a um a, a result puandaw ngal ahi. Dr Vumchinpau Tonsing, Medical Superintendent/District Hospital mapuina ah interview bawltu mi 3 ahiu a, candidate mi 14 ahiu. Ziana’ chun, BSc Nursing zilzo, Kim Joycee d/o T. Lamchin of Hebron Veng, New Lamka teldaw in a um a, Imphal ah Medi Assist gual ah final approval leh training ding ah sawl ngal hiding ahia, a ting theng leh Health Coordinator ding ah lak hiding hi’n a kigen hi.

SDO/BDO Henglep thâkdawna nei
Lamka, May 24 *(Nisin Thuhiltu)* : Chunglenmang Kipgen, MCS, SDO/BDO Henglep thâkdawna hun tuni’n a staff te’n a matpi ui. Ama hi AC to DC Kangpokpi a ding ah Manipur Governor in May 18, 2018 ni ah order a sua dungzui ah a thakna hun a mat uh ahia, zia hun a chun thilpiak piakna a nei ban un, a nuai ah sep nuamsa leh it-um ahi’dan a gen ui. Chunglenmang in Henglep SDO a sepsung 2016 apat in Sub-Divisional Headquarter, Henglep khua leh a bialsung tamvei tak a phak ban ah, assembly election lawting tak ah sai in, chuleh PMAYG Scheme nuai ah In 283 bawldaw in a um a, Off Grid Solar Installation kibawl khua 31 ah electric tunsak in a um hi. Chun, tulaitak ah Manipur a Cabinet Minister, Th. Biswajit Singh le politics a lutma ah Chunglenmang a ding ah Progress Assistant hi’n a kigen hi.

SDO/Saikot in panpina pia

Saikot, May 24 *(Nisin Thuhiltu)* : Lalthazam, MCS/SDO, Saikot in tuni’n Lalropuia Faiheng, Secretary, Village Authority, Timothy Z. Zote, President, Hmar Youth Association, Saikot Branch, HYA, Saikot Branch puitu te uapna tawh Saikot khua ah achiata May 9, 2018 ni ah hui hat in chenna inn a suksiat piak Mr T. Ginzapau Saikot, Vengthar kithuapina ding in ama mimal hitheina tiang in Rs. 8000/- piakdawna a nei hi.

Paite Numei Pawl in nasatak ah demna bawl

Lamka, May 24 *(Nisin Thuhiltu)* : Paite Numei Pawl (PNP) Headquarters in, achiata May 15, 2018 ni ah G. Mawnglian khua ah numei naupang kum 2 leh tha 6 a upa kilawmlo tak khawi ah um chu, demna nasatak in a bawl a, numei chapang chung ah T. Nengdouthang (56) s/o (L) Thangzathong of Khominthang, New Lamka gamtatna chu tizat um a sakthu a taklang hi. Chun, ziagual thil chu tunung ah a um kitlo ding a nawp thu le a taklang hi. Hiatthei khat chu, numei chapang kilawmlo tak ah khawitu ah ngaw ah um T. Nengdouthang (56) s/o (L) Thangzathong of Khominthang, New Lamka chu May 22, 2018 nitaklam dak 4:30 in police te’n ama’n ua, court ah dinsak ah a um nung in court in 25th May 2018 tiang ah police custody um ding in lemsakna a nei hi.

Hmar Martyrs’ Trophy 2018 lawpna nei
Lamka, May 24 *(Nisin Thuhiltu)* : 15th Manipur State Level Hmar Martyrs’ Trophy 2018 Champions Team – Friendship Athletic Sporting Team (FAST) in tuni sunnung dak 1:00 in VTI Auditorium, Rengkai ah Trophy leh Rs.1 lakh a lak uh lawpna leh Pathian kiang ah kipahthu genna a nei hi. Zia hun chu Mrs Nenem w/o M. Gouzamang Guite, MDC; Thangṭhatling @ Thangi Sinate, Co-ordinator, Swachh Bharat Mission, Pherzawl District; H. Samson, Social Worker & President, HYA Rengkai Branch leh JC Chongkholien, Chief of Rengkai te’n Chief Guest, Guest of Honour, Functional President leh Chief Host hina tawh a uap ua, Rev. Lalsiemthar in Pathiang kiang ah kipakthu genna leh player te pauchappiakna a nei hi. Zia Cup lawpna a chun, bawng 1, vok 1 that in ann nekkhawmna le a nei ua, nitak dak 7:00 in Concert tawh thua in laa sak thiam chuamchuam 15 te’n laa sakna a nei ui.

BJP in Enrolment Verification Programme mang

Lamka, May 24 *(Nisin Thuhiltu)* : Bharatiya Janata Party (BJP) mapui NDA Government kum 4 a tinna lawpna kawm in Churachandpur District ah BJP Office, SBI/Ccpur Opposite, Vengnuam, Hiangtam Lamka ah tuni’n “Enrolment Verification Programme a um hi. Zia hun matna chu Praphulo Singh, District Incharge, Ccpur District BJP sung ah Mandal, Mahilas, Youth leh Kissan Morcha ah lawiupa te’n a uap ua, S Rina Devi, Vice President CCpur Dist BJP hun matna mapui in, Lienkanglo, President BJP CCpur in thugenna nei in, Thanga Tonsing, Secy Organisation BJP Ccpur in Vote of thanks gen in hun amang zo ui. Praphulo Singh, District Incharge in a thugenna a chun, May 26 apat June 11, 2018 kikal ah kum 4 tin a lawpna chiapi hiding, zia hun sung a chu mipi te phatchuampi thei ding nasep thilbawl chuamchuam um ding, May 26, 2018 ah Prime Minister Narendra Modi in Odisha state sung munkhat ah mipi mai ah thugenna nei ding, zia ding a chu NDA solkal in kum 4 sung ah a sepdaw project chuamchuam te taklatna um ding hi’n a gen hi.

Chun, BJP national President Amit Shah in May 26 sun dak 12:00 leh Delhi, BJP Party Headquarter ah thuthak lakhawm mite kimupi ah BJP panlakna leh a sepdaw te taklatna nei ding, May 27, 2018 ah District zosia BJP president te'n intellectual 25 kaikhawm ah special contact drive, Vishesh Sampark Abhiyan kiti nei ding uh hi’n a gen hi. May 28-30, 2018 ah Intellectual kaikhawm ah um te tawh holimna nei ding, June 1-2, 2018 ah central leh state in scheme thak a chiapi te Vidhan Sabha level ah puanzak hiding , PM in Video conferencing ah beneficiaries-te kihopi ding hi’n a gen hi. June 4 leh 8 sung ah District Headquarter zosia Press conference um ding, phualpi solkal nasepdaw te power presentation ah suadaw ah um ding, June 6-7, 2018 ah Booth sapark Abhiyan matna um ding, June 9, 2018 ah gamsung thianthona ding ah Swachchta Abhiyan mat hiding, June 10 ah Yuva Morcha te'n Motor Bike rallies nei ding uh hi’n a gen hi.

Student te’n tour nei

Lamka, May 24 *(Nisin Thuhiltu)* : Khuga dam aom khuga battalion sponsored-na nuai ah tuni’n MELC Mission School Muallum Faith Academy MFA student ten Imphal ah education tour a nei ui. Tour ah chia ding student-te chu Muallum khua ah Khuga Battalion te’n thakdawna a nei ua, zia a pat chu Bus khat mang in Imphal in education tour a nei ui. Tour a nei hun un, student te’n Imphal khawpi sung ah mun chuamchuam etthakna a nei ui.

Khuga Dam ah nga-no tamtak thi
Lamka, May 24 *(Nisin Thuhiltu)* : Khuga Dam ah tulai ah nga-man pawl khat in guu (poison) mang ah nga amat ziak un, dam ah nga-no a thisa tamtak muthei in a um hi. Nga-man pawl chuamchuam in nga-kuai, leen leh vanmat chi chuamchuam mang in Khuga dam in nga a man ua himaleh pawl khat in nga matna ding ah guu poison a mat ziak ua, nga-no tamtak in thuak zo lo ah thi hi’n a kigen hi. Zia tawh kisai a chun, CT Lian Guite Chairman, CCpur cage Culture Fish farming and research centre in kuama’n nga matna ding ah in guu (poison) manglo ding in chialna a bawl hi.

On the other hand a team of NAB also arrested a women drug peddler along with 1 gram of heroin powder from Mantripukhri area. Official source said that the NAB including women police conducted search operation at Mantripukhri area yesterday after getting specific information about presence of drug peddlers. Reimichon Tangkhul (37 years) wife of Shangam Tangkhul of Hang Village in Ukhrul district the drug peddler was nabbed during the operation. She is presently staying at Laipham Khunou Mayai Leikai. Separate cases have been registered at NAB Police Station.

NCD programme managers te ding ah training kipan

Imphal, May 24 *(Nisin Thuhiltu)* : Directorate of Health Services, Manipur leh State Health Society, Manipur saina’ Institute of Cooperative Management (ICM), Lamphelpat ah tuni’n ni 3 sung um ding, NCD programme managers te ding ah National Programme for Prevention and Control of Cancer, Diabetes, Cardiovascular Diseases and Stroke(NPCDCS) tawh kisai ah training um ding chu a kipan hi. Zia hun chu State Mission Director, NHM Manipur, IAS N Bandana Devi in Chief Guest hina tawh a uap a, ama’n a thugenna a chun, Manipur state chu CD-free state hisak ding pawimaw in a gen hi. Zia ah training hawnna hun chu Dr.K Rajo, Director Health Services, Govt.of Manipur leh Dr.Chinmoyee Das,DADG,Dte ,GHS, MoHFW,Govt. of India banah Dr. L Ashananda Singh, Regional Director, MoHFW te’n Functional President, Guests of Honour hina tawh a uap ui. N Bandana Devi in NPCDCS programmes tawh kisai a genna a chun, kum 2015 ah Manipur Districts 9 - Imphal West, Imphal East, Thoubal, Churachandpur, Bishnupur, Chandel, Senapati, Ukhrul & Tamenglong ah NPCDCS programmes chiapi ah um hitaleh December 2017 ah district kisiamdawk thak 7 ah le chiapi ah um hita hi’n a gen a, obesity, chep leh muam, zu leh thiangtho lo tak ah hinkhua matna apat non-communicable disesases - hypertension, diabetes mellitus & cancer ti te piang thei, district NCD clinic te’n counselling, physiotherapy, free medicine & laboratory test bawlna ding ah special clinic nei chiat a hidan a gen hi. March 2017 tiang ah mi 134364 te NCD nuai ah screen bawl ah um, zia lak a chu mi 17958 te diabetes ziak ah natna nei, mi 1101 te hypertension leh heart diseases nei ah mudaw ah um a hidan taklang kawm in, mi 398 cancer natna nei um leh mi 151 stroke zia ah haksatna nei um in a gen hi. Training a chun, Dr. Das; Prof. AK Brogen, HOD Community Medicine,RIMS; Dr.Pradeep Joshi, National Professional Officer, WHO and Dr. Y Premchand, State Nodal Officer, NPDCDCS te resource person in a pang ua, Manipur District 16 ah a pat DNO NCD, Eperidermologies, APMs of NCD te training in a pang ui.

PMAY beneciary te’n second installment piak ding ah phutna bawl

Imphal, May 24 *(Nisin Thuhiltu)* : Pradhan Mantri Awaz Yojana, Housing for All (Urban) scheme nuai ah Oinam municipal council area apat beneficiary te’n tuni’n state government chu avaima theilam ah second installment peding in nawna a bawl ua, gua zuk hun a hitak tawh kitawn ah a insak uh a chung kikhu nailo ah um zing a hina chung ah haksatna tuak uh hi’n a taklang ui. Mi 380 short list ah um te lak ah mi 65 te chu beneficiary ding ah teldaw ah um a hiu a, February 2017 ah first instalment Rs. 60, 000 piak himaleh tuni tiang ah second installment munailo a hiu. Hiatthei khat chu Pradhan Mantri Awaz Yojana, Housing for All (Urban) scheme nuai ah April 2017 – March 2019 ah second installment chiapi pat hita a hi.

Beneficiary te lak ah khat W. Kunjo Singh in Manipur Press club ah thuthak lakhawm mite kiang ah a genna a chun, a inn sak uh foundation zo chiatta himaleu second installment ah Rs. 60, 000 a mu ding uh amulo banua third installment Rs. 30,000 le genkhak ah um nailo in a gen a, kipaktak ah first installment a mu hun ua inn sak kipan himaleu second installment piak ahilo ziak ua a innsak uh sazo theilo ah um zing uh hi’n a gen hi. Chief minister Nonthombam Biren Singh kiang ah April 15, 2018 ni ah Miyamgee Numit (people’s day) ah thil umdan a tut nung ua MAHUD department chu apawimaw dungzui ah panlakna nei ding ah thupiak bawl maleh panlakna bangma umlo in a gen hi.

Kani kg 7 tawh mi 2 mat ah um
Imphal, May 24 *(Nisin Thuhiltu)* : Narcotic Affairs of Border (NAB) team in Senapati district head Quarter , Trinity Hostel kiang in mi 2 a pat in Kani kg 7 a man dawk ui. Narcotic Affairs of Border (NAB) official thusuak in a taklatna a chun, Senapati ah khamthei ah sumkawlvei um hi ah hiatsakna amu’u tawh kitawn ah zia mun chu a del ua leh mi 2 a pat Kani kg 7 leh mi 2 te man a hidan uh a gen a, khamthei tawh matkhawm ah um mi 2 te chu Subash Gurung (36) s/o Nar Bahadur of Sidam Village, Mao Karong leh Parsuram Gurung (54) s/o Ram Prasad Gurung of Oklung Khunou, Senapati District a hiu. Subash Gurung (36) a pat kani kg 3 amatdaw banua Parsuram Gurung a pat kg 4 mandawk un Narcotic Affairs of Border (NAB) thusuak in a gen a, Kani matdaw ah um te chu local market ah Rs. 5,60,000/- manzo hiding in a gen hi.

MPS officers Grade- II ah sem 58 te Grade -I ah kaisang
Imphal, May 24 *(Nisin Thuhiltu)* : L. Bikram Joint Secretary (DP) Govt of Manipur in Manipur Police Service (MPS) Grade -II ah sem, Grade –I ah kaisang, MPS officer 58 te promotion order a suadawna a chun, thingtangmi 11 a kaisang ui. Grade -II apat Grade –I ah kaisang thingtangmi MPS officer 11 te chu - G Jenkhansuan, Paojalam Kipgen, L. Gouchingen Ngaite @ L G Ngaite, H Lianchinthang, Paukhanmung Gwite, Emanuel L Fimate, Sangboi Gangte, Lunzamung Tungnung, Tholu Rocky, Namsadai Peter leh Lhingjakim Haokip te a hiu.

Manipur Police Commando Special Unit siamdaw ah um
Imphal, May 24 *(Nisin Thuhiltu)* : Manipur Police Department nuai ah Special Commando Unit siamdaw ah um a hidan taklat in a um a, Manipur Chief Minister Nongthombam Biren Singh in Special Commando Unit siamdaw ah um na tawh kisai a genna a chun, state sung ah law & order dinmun leh thingnuaimi te gamtatna kituptak ah etzui pawimaw a hina chung ah Special Commando Unit siamdaw ah um hi’n a gen hi. Special Commando Unit siamdaw ah a um tawh kitawn ah teldaw ah um commando 256 te’n 7th battalion Manipur Rifles complex ah barracks 3 a awng ah um te lua ding, special unit in officers 20 leh valley districts - Imphal West, Imphal East, Thoubal leh Bishnupur a pat state police personnel 245 teldaw ah um ding ti a hi. Chun, Inspector James Thangal, Imphal West district chu Special Commando Unit ah Officer-in-Charge hiding, Imphal West additional superintendent of police (Operations) N Madhunimai Singh command bawlna nuai ah um ding leh Inspector General of Police (Zone 1) in bangkim ah kaihuai ding leh Deputy Inspector-General of Police (Range 1) in Unit function dan tawh kisai enzui ding ti a hi.

Congress President Rahul Gandhi in thautui man ah PM Modi cho

New Delhi , May 24 *(Nisin Thuhiltu)* : Congress President Rahul Gandhi in Twitter ah Prime Minister Narendra Modi chu chona bawl in thautui man kiamsak ahilo ahileh Congress in gamsung pumpi huap ah kiphinna nei ding leh anawp a da ah thautui man sukniam sak ding hi’n a gen hi. Union Minister of Youth Affairs & Sports Rajyavardhan Singh Rathore in May 22, 2018 ni ah 'Hum Fit Toh India Fit' campaign hawnna neikawm ah Fitness Challenge bawlna push-ups a bawl video upload kawm ah Kohli, actors Hrithik Roshan leh Amitabh Bachchan banah badminton champion Saina Nehwal te amau exercise lakna upload bawl ding ah chona a bawl dungzui ah Indian Cricket captain Virat Kohli in a exercise bawlna video upload bawl ah Prime Minister Modi chona a bawl, Prime Minister Modi in chona amu chu pawm ah ama’n le a exercise bawlna video upload bawl ding hi ah comment a bawl lethukna neikawm ah Congress President Rahul Gandhi in thautui man ah Prime Minister a cho a hi.

Hiatthei khat chu, tulai ah thautui man a khan nasat mama na chung ah mitamtak in a lung awilo thu a taklang zing ua, tu naicha thautui man chu thautui man a sanpenna hi ah record a hi. Tu leh tu’n New Delhi ah petrol man Rs. 77.47 a tung a, Mumbai ah Rs 85.29 per litre a tung hi. Zia gualma a chun, Delhi leh Mumbai ah diesel Rs 68.53 leh Rs 72.96 per litre a tung hi. Thautui man a khan nasat mama na chung in, opposition party chuamchuam - Congress, All Assam Students' Union (AASU), Trinamool Congress (TMC), Nationalist Congress Party (NCP), and Biju Janata Dal (BJD) te’n gamsung mun chuamchuam in kiphinna a neizing ta bawk ui. Analysts te ginchat dan ah OPEC (Organisation of the Petroleum Exporting Countries) ah production a tawm ziak leh international market ah crude oil price a san ziak ah India ah thautui man kal hiding in ginchat thu a gen ui.

Meghalaya police in galvan tamtak mudawk

Tura, May 24 *(Nisin Thuhiltu)* : Meghalaya police te’n East Garo Hills district ah Simsang River kiangnai in meithal leh meichang tamtak a mudawk ua, zia meithal leh meichang te chu GNLA chief Sohan D Shira in a nutsia hiding in a kigen hi. Meithal mudaw ah um te lak a chun - 303 light machine gun, 2 AK rifles, 1 H & K rifle, 4 SBML barrels, 5 UBGL shells, 2 rockets (RPG), 9mm magazine, 9mm carbine, 5 AK rifle magazines, remote control, signal booster, 30 AK rifle bullets, 8 pistols, 2 kg gelatin (Gelignite) sticks, 66 electronic detonators leh 7 cleaning rod te a pang hi. East Garo Hills SP, R T G Momin in a genna a chun, local mite kithuapina tawh Simsang River zul ah um Dorengkigre leh Bawegre kiangnai gamlak ah search operations a bawl hun ua galvan kiselgu tamtak chu amudaw uh hi’n a gen a, khenkhat hambuk lak ah kikawi, khenkhat leinuai ah kivui in a gen hi. Chun, meithal mudaw ah um te lak ah AK rifle khat chu thingnuaimi te’n security force te meithal a lakpiak uh hiding ah muanmaw hi’n a gen hi.

MP village ah tui ziak ah haksatna sukvenna ding ah kum 70 mi khat in kum 3 sung tuikul cho

Chhatarpur , May 24 *(Nisin Thuhiltu)* : Madhya Pradesh, Chhatarpur, Hadua village ah kum 70 mi Sitaram Rajput in a chiata kum 3 sung a khah ama mimal thahatna, Hadua village ah tui ziak ah haksatna um te sukven theina ding ah tuikul cho hi’n a kigen a, zia khua a chu mi 300 tuam cheng uh hi’n thudawnna’n a gen hi. Sitaram Rajput in ANI palai te kiang ah a genna a chun, Hadua villager te’n tui lakna ding kituptak neilo ah buaina a tuak zing sekna chung ua a chiata kum 3 sung ah tuikul ding a chaw hi’n a gen a, tui umna tiang cho dawk ta hi’n a gen hi. Himaleh gua a zuk ziak ah a tuikul chaw chu mattheilo ah suak, zia nung a chu kipan thak kit ah a thak ah a chaw kit hi’n a gen hi. Chuleh, mipi te a ding ah ziagual panlakna a neina chung a chu government panna, kuama a panpi leh kithuapi ding mulo, ama mimal sum, tha leh zung seng ah tui ziak ah haksatna um zing sukvenna ding ah panla hi’n a gen a, mihing te bep hilo ah gancha te tiang in tui ziak ah haksatna tuak hi’n a gen hi.

Hadua villager te haksatna sukvenna ding ah Sitaram Rajput panlakna thu chu thezak ah a um tawh kitawn in Union Minister Virendra Khatik in Sitaram Rajput panlakna leh kipiakzawna thupi mama a hidan taklang kawm in, District Collector kimupi ah ni 2 sung ah Sitaram Rajput panlakna etzuipi ding leh a kitup thei ding pen ah tui ziak ah mipi haksatna sukvenpi ding ah hiatsakna bawl in a gen hi. Chuleh,
Sitaram Rajput chu anasepna chung ah chawihawina piak ding ah Centre Govt kiang tut ding hi’n a gen hi.

Corruption dodal hiding: Assam CM

Guwahati, May 24 *(Nisin Thuhiltu)* : Assam Chief Minister Sarbanand Sonowal in Guwahati ah thuthak lakhawm mite kiang ah ama government kum 2 tinna tawh kisai a genna a chun, ama mapui government Assam state sung ah corruption dodal ding ngaikhawk mama a hidan gen in, corruption sukbeina ding ah Chief Minister's Office apat panchayat level tiang ah office zosia corruption dodalna chiapi pawimaw in a gen hi. National Register of Citizens updation process chiapi ah um chu mizosia’n kipakpi a hidan gen in, Indo-Bangladesh border ah illegal migrant te dodalna nei ding ama government thil dawi hi’n a gen hi.

Citizens updation process chu December 2018 tiang ah zaw thian hiding a hidan taklang kawm in, Assam state sung ah ama government nuai ah skill development centres 250 hawn thak ah um a hidan a taklang hi. Chulehh, centre ah Prime Minister Narendra Modi mapui government in Assam chu, projects thak chichuam tawh phungvuk zing a hidan gen in, zia project te lak a chu Brahmaputra ah lei (bridge) 6 siambe ding le pang in a gen hi.