CM in pension te ding ah payment portal thak hawng

Imphal, May 22 *(Nisin Thuhiltu)* : Chief Minister’s Secretariat ah Chief Minister N. Biren Singh in tuni’n state sung ah pensioner te ding in Public Financial Management System (PFMS) portal a hawng a, National Social Assistance Programme NSAP-PPS nuai ah Public Financial Management System (PFMS) portal mang ah pensioner te’n sum a lakdaw theina ding un, payment portal a hawng hi. Chief Minister in a thugenna a chun, system thak kihawng chun pensioner a biktak ah teksia lam deu te dawn-zangkhai chuam mama ding hi’n a gen a, zia platform a pat chu payment lam thil ah transparency um ding hi’n a gen hi. Public Financial Management System (PFMS) portal chu mang ah beneficiary te account ah a pension sum uh direct transfer bawl hiding in le a gen a, Prime Minister Narendra Modi in ‘maximum transparency’ um theina ding ah vision a nei te lak ah khat hi’n a gen hi.

Socio Economic and Caste Census 2011 (SECC) data dungzui ah Manipur state sung ah beneficiary hithei ding mi lakh 2 um himaleh tu leh tu pensioners 6,000 te’n Financial Management System (PFMS) portal chu phatchuampi thei ding ah Ministry in bithiak piak in a gen a, Ministry official te chu pensioner zosia huapsuak sak ding ah chialna bawl khata hi’n a gen hi. Banks zosia chu PFMS portal phatchuampi thei ding te a ding ah avaima theipen ah RuPay cards issue bawl piak ding in le a hiatsak a, pensioners bank umlona um te’n banking Correspondence te kiang ah RuPay cards mu ding uh hi’n a gen hi.

Portal hawnna hun uap, Minister for Social Welfare Nemcha Kipgen in a thugenna a chun, zia gual panlakna chu delivery system bailamzaw sem ah a um theina ding a hidan gen in, middleman panglo ah amu leh chang dingdawl te’n payment system thak chu phatchuampi ding uh hi’n a gen hi.

Public Financial Management System (PFMS) portal hawnna hun chu Special Secretary & Financial Advisor, Ministry of Rural Development, Government of India, Jaideep Govind, Chief Secretary of Manipur, Dr. J. Suresh Babu, Chief Economic Advisor, Ministry of Rural Development, Government of India, Sudhakar Shukla, Director of Social Welfare, Government of Manipur Jacintha Lazarus te’n le a uap ui.

ILP Bill thak in indigenous mite vengbit ding: CM

Imphal, May 22 *(Nisin Thuhiltu)* : Chief Minister N. Biren Singh in Inner Line Permit (ILP) Bill tawh kisai ah dawtna khenkhat a hilchianna a chun, State Government in next Assembly session ah indigenous mite venbitna ding ah Bill luidawna hiding leh illegal immigrants te dodalna ding ah panlakna nei zing hiding a hidan gen in, Manipur ah BJP mapui government in vaihawmna a chan zaw a pat state sung ah illegal immigrants te dodalna chiapi zing hi’n a gen hi. Illegal immigrants te etzui zing theina ding ah panlakna chuamchuam neita a hidan gen in, fake Aadhar cardsleh illegal immigrants banghem zat matdaw ah umta hi’n a gen a, illegal immigrants te Imphal khawpi sung ah a khawsak thei uh chu lamdangsa hi’n a gen hi. illegal immigrants te Imphal khawpi sung ah a umtheina ziak chu state sung mi khenkhat illegal immigrants te kithuapi a um ziak uh hi’n a gen a, illegal immigrants te state sung lutna ding ah panpi hiding lunggel neitalo ding in mipi te chialna a bawl hi. Chun, illegal immigrants 80-100 tuam hiatdaw ah um ta leh mi 36 te jail ah kikawita hi’n a gen hi. Citizenship (Amendment) Bill, 2016 tawh kisai ah dawtna a dawnhuna a chun, Manipur in zia Citizenship Bill tawh kisai a chu gen leh sak ding neilo hi’n a gen hi.

Hiangtam Lamka ah Go to Village camp bawl

Lamka, May 22 *(Nisin Thuhiltu)* : Autonomous District Council (ADC)/CCpur Constituency 9 ah tuni’n ‘Go to Village Mission’ chiapi in a um hi. Lamka TD Block ah 15- Hiangtam Lamka (ADCC) huapsung ah um, YPA GHQ Hall ah Go to Village camp bawl in a um hi. Zia hun a chun, Hiangtam Lamka (Elite Veng, Awnchinkap Veng), Mandop Leikai, Manniang Khua, Mission Veng, Zellang Veng leh Zomi Colony ah mipi hunkhawp te a pang ua, Nodal officer in Thangboi Gangte, MCS, SDO/CCpur a pang a, V Hangkhanlian, Minister, T Kammuanlal Simte CEO/ADCC; KS Tombing DFO/CCpur; Dr Kim Simte CMO/CCpur leh Thangkhosuanmung Guite Hiangtam Lamka hausa te Chief Guest leh Special Guest in a pang ui. Camp hun sung in, Education Department in Rengkai Govt Hr sec School ah Class XII sim ding pawsal khat kiang ah School Uniform ding piakna a nei a, Gas Distributor lam apat Sialngenthang & Sons in PMUY Extended nuai ah gas connection thak muding ah teldaw ah um mi 5 te kiang ah Gas connection thak piakdawna a um hi. ADCC in ahileh Mandop Leikai JB school-te mat ding in, Register Book, Duster, Chalk, Answer Book, Table 2 leh Chair piakdawna a nei a, Hiangtam Lamka (Elite Veng, Awnchinkap Veng), Mandop Leikai, Manniang Khua, Mission Veng, Zellang Veng leh Zomi Colony khawte mat ding in Hymark Sprayer 16, Hiangtam Lamka ah nasem pawlpite kiang ah niin khawlna ding Garbage bag 25 leh Dustbin 2 le a pedawk hi. Social Welfare department in pianken ah gualphalo mi 2 te kiang in Miseid kit leh Wheel Chair piakna a nei a, Go to Village Mission a Department chuamchuam in mipite phatchuampi thei ding scheme chuamchuam umte suklatna leh haksatna neite haksatna kanzui piak in, Revenue Department stall ah Certificates 60 piakdaw in a um hi.

Electoral rolls tawh kisai ah training bawl ding
Lamka, May 22 *(Nisin Thuhiltu)* : Election Commission of India leh Chief Electoral Officer/Manipur dawidan tawh kituak ah Tuibong ah um, District Training Centre (DTC Hall) ah May 30 & 31, 2018 zingkallam dak 11:00 apat, CCpur & Pherzawl District ah Assembly Constituency 6 apat Booth Level Officer (BLO) Supervisor-te leh BLO te’n ‘Cascaded training related to the preparation of electoral rolls’ kiti training neiding a hiu. May 30, 2018 zingkallam dak 11:00 ah DTC, Ground Floor ah 56-Thanlon (ST0 & 60-Singngat (ST)-te training ding a hiu a, Lamminlal Simte, SDO/AERO, Thanlon leh Jameson Sehlal Hangshing, SDO/AERO, Singngat te’n ziltilna nei ding a hiu. DTC First Floor ah 58-CCpur(ST)-te training ding ahiu a, Thangboi Gangte, SDO/AERO, CCpur leh Jangminlen Lupho, SDC/AERO, CCpur in ziltilna nei ding, May 31, 2018 zingkallam dak 11:00 ah DTC Hall, Ground Floor ah 55-Tipaimukh (ST) & 57-Henglep (ST)-te training ding, Derick Khobung, SDO/AERO, Vangai leh T.Joseph Lhungdim, SDO/AERO, Henglep in ziltilna nei ding a hiu. DTC Hall, Fisrt Floor ah 59-Saikot (ST) te’n training nei ding, James Doujapao Haokip, SDO/AERO Tuibong leh Lalsuong Gangte, SDC/AERO Tuibong in ziltilna a nei ding a hiu. Training a chu akisai khakpi, BLO Supervisor-te, BLO-te, ziltiltu ding (resource person)-te pang kim chiat ding leh training hun ah BLO-te’ mat ding register SSR 2019 leh election material hawpdaw hiding in, Shyam Lal Poonia, IAS, DC/DEO, CCpur in thusua a bawl hi.

Real Time Monitoring hawndawna nei

Lamka, May 22 *(Nisin Thuhiltu)* : Manipur State AIDS Control Society (MSACS) leh DAPCU, CCpur saina’ tuni zingkallam dak 10:00 in Dorcas Hall, Mini-Auditorium ah Real Time Monitoring (RTM) kiti hawndawna a um hi. Zia hun a chun, Shyam Lal Poonia, IAS, DC/CCpur in RTM Apps hawndawna a nei a, Abhiram Mongjam, JD MACS in keynote address bawl in, Dr. Timothy Holtz, CDC-DGHT India in thu genna a nei a, Dr. Bitra George, Country Director, FHI360 in Manipur leh CCpur district ah Project Sunrise in nasepdaw chuamchuam a neite taklatna a nei hi. Dr. Rich Needle, USA in Realt Time Monitoring benefits leh objective um te taklatna a nei a, A. Radhabinod, (IAS), PD, MACS in le hun matna uap in thugenna a nei hi. Technical Session ah Sabyasachi & Tanushree, Dure Technology te'n RTM App tawh kisai demonstration bawlna a nei ua, Project Director, Shalom in 'RTM for strengthening TI programme' ti thupi ah mang in thugenna a nei hi. Chun, Dr. Romeo, DACO in' Improtance and relevance of RTM in CCpur' ti thupi ah nei in thugenna a nei hi. Real Time Monitoring ahileh Shalom,LRRC leh PPO project panna, NGO chuamchuam te kithuhiattuana hawizaw sem a umna ding ah kihawng a hia, May 23, 2018, 10:00 AM ah Rengkai Road ah um JJ Plaza/Life Cafe ah Real Time Monioring (RTM) tawh kisai ah training um ding a hi.

Saipum ah 'Go to Village' Camp bawl

Saipum, May 22 *(Nisin Thuhiltu)* : Saikot Sub-Division, CCpur vaisaina’ tuni zingkallam dak 10:00 kipat in 22-Haopi Range huapsung ah um Saikpum Village ah 'Go to Village' Camp a um hi. Zia hun chu Chief Guest hina tawh P. Kamkholal, EM, ADC/CCpur in a uap a, Guest of Honour in JC Ramthanga, IAS, Principal Secretary (Coop/Horti & Soil Conservation) leh Member Secretary, EBADA & BRDVB & Commissioner of Departmental Enquiries, Govt. of Manipur a pang hi. Chun, Functional President in Shyam Lal Poonia, IAS, DC/CCpur a pang hi. Zia camp a chun, Nodal officer, Lalthazam, MCS, SDO/Saikot in vaidawnna thu gen in, khuallian te'n thu genna a nei ua, Bungmual Indane in Ujjwala Scheme nuai in beneficiary 6 te kiang in LPG connection piakdawna a nei hi. Hun matsung in, ADC/CCpur in khua-hausa 6 te kiang in damdawi kapna (snapsack sprayer) 1 chiat piakna a nei a, Bohlui JBS leh Sehken JBS kiang ah Table leh Chair, Dustbin 1 gel banah register book panna van mat chuamchuam piakna a nei hi. Saipum Youth Club kiang ah football 1 piak in a um a, Handloom & Textils department in mi hunkhawp te kiang in cotton seed piakna a nei hi. Medical department in mi 3 te CMHT card piakna a nei a, Khamthang s/o Thangkhogin of Saipum Village kiang ah disability certificate a pedawk hi. Programme zaw in line department chuamchuam te'n mipite' haksatna leh scheme chuamchuam umte tawh kisai genkhawmna a neipi ui.

HPC-D, Army Chief leh Chairman, UPF mualliam; ZRO in suunthu puang

Lamka, May 22 *(Nisin Thuhiltu)* : Hmar People’s Convention - Democratic (HPC-D) ah Army Chief leh Chairman, United People’s Front (UPF), Lalropui Famhoite (50) s/o Rimoi, Saikawt chu damlona ziak in zanni nitak dak 11:00 vel in Mother Care Hospital, Imphal ah ICU in a mualliam hi. Lalropui ahileh a lungchang natna’n aphakphut ziak ah Imphal ah etkawl ding ah puak ah um himaleh damzo lo ah thi a hi. Lalropui@Puia ahihleh September 23, 1965 ni ah apa (L) Ex-Havildar L. Rimawi, 2nd Assam Regiment a service ahi hunlai ah Rangiya, Assam ah piang a hia, thiamna lam ah PUC zo, 1988 kum ah CBS, Calcutta ah Bible simlai chu, Bible College pitingzaw lunggul ziak ah Trivandrum Bible College ah kichawn, holiday mang ah Lamka (Saikawt) hungpha, Mizoram Solkal in Churachandpur ah operation a hung bawl ua a pat ami-le-sa te’n haksatna a tuak uh amit mama a mu a kipat a Bible zilna haisan ah kum 1990 ah HPC lut a hi.

HPC a zawpnung kum 1994 ah Mizoram tawh peace accord chung ah suai a kai nung ua, 1996 ah HPC (D) hung piang ah, Army Chief mawpuakna tuk, athi tiang ah zia mawpuakna chu tuk a hi. HPC (D) a Army Chief a tuk hunsung 2011-2013 sung ah UPF ah Vice Chairman mawpuakna la tu, kum 2012 ah Silchar Airport ah mat ah um himaleh kum 2013 thasuak ah um, 2014-2016 sung ah UPF ah Finance Secretary panmun tukkit ah kum 2015 ah mat ah umkit, kum 2016 kumtawp ah thasuak ah um kit a hi.

April 13, 2018 in HPC (D) Mizoram Region a pat Puia leh a naupang te’n Mizoram Government tawh Peace Accord suai kai in, government khut ah galvan hunkhawp le a kawi dawk ui. Puia ahileh kum 2017 apat HPC (D) ah Army Chief hizing kawm ah UPF Chairman panmun lua a hia, a zi Lalengmawi (35) leh a chate pani - Jennifer Zosangmawi (16) leh Uniky Lalhrietzing (6) te nusia a hi.

Damlona ziak ah HPC-D) ah Army Chief leh Chairman, United People’s Front (UPF) mualliamna chung a chun, Central Executive Committee, Zomi Re-Unification Organisation (ZRO) in lunggiltak ah suunthu puang in, Manipur thingtang gam ah political solution a um theina ding ah govenment tawh UPF leh KNO in kihona a chiapi zing laitak ah UPF Chairman in a beisan chu khawksa mama a hidan a taklang hi. Chun, Famta Puia chu Zosuan te kipumkhatna ding kipumpiak leh kukaltak ah panla tu hi’n ZRO thusua in a taklang a, Nam leh gam a ding ah a sep hunsung ah Zo Commutnity chuamchuam te ding ah political solution a um ding dawi ah thi tiang ah panla tu hi ah le taklang kawm in, lusuun innkuan te thuakpi leh suunpi takzet a hidan a puang hi. HPC-D, Army Chief leh Chairman, UPF, Lalropui Famhoite luang ahileh Saikawt ah vuiliam in a um hi.

DC/Pherzawl mapuina“Go To Village” camp bawl

Lamka, May 22 *(Nisin Thuhiltu)* : Mannuamching, IAS a chiata May 19 ni’ ah DC/Pherzawl ding ah mawpuakna a lak tawh kitawn in nasep a pan ngal a, tuni’n ama lamkaina nuai ah Pherzawl district, Thanlon Sub Division sung ah um Leijangphai Community hall ah “Go To Village Mission” camp bawl in a um hi. Zia hun chu, Pherzawl district SP, H. Balram Singh, MPS banah district sung ah Govt. official te’n a uap ui. Mannuamching IAS leh H. Balram Singh, MPS in area sung ah beneficiary te van mat chi chuamchuam - Gas set 10, Sprayer 10, Vermi bag 10 leh tarpaulin, wheelchair ti te piakdawna a nei ui.

EM/ SHADC ding ah nominate

Kangpokpi, May 22 *(Nisin Thuhiltu)* : Haokholal Hangshing, Chairman, Sadar Hills Autonomous District Council (SHADC), Kangpokpi in thusua a bawlna a chun, Manipur (Hill Areas) District Council Act 1971 nuai ah Section 27 (A), Clause 2 ah thuneina kipia mang ah S. Dama Vaiphei, MDC (Kangchup A/C ) chu Executive Member ding ah nominate bawl a hidan a taklang hi.

“Workshop on increasing Water Productivity” umna ding tawh kisai genkhawm

Lamka, May 22 *(Nisin Thuhiltu)* : CCpur Cage Culture Fish Farming & Research Centre in tuzingkal dak 7 in Elvee Enterprise, College Road New Lamka ah meeting nei in, CCpur Cage Culture Fish Farming & Research Centre apat member chiakhawm te’n, CT Lian, Chairman, CCpur Cage Culture Fish Farming & Research Centre mapuina maban panlak dingdan leh May 25, 2018 ah Zoutuinuam, CCpur ah “Workshop on Increasing Water Productivity in Multipurpose Dam” umna ding tawh kisai a genkhawm ui. “Workshop on Increasing Water Productivity in Multipurpose Dam” chu, Khatchin Langel,Director, GWE & E II, Ministry Of Water Resource, River Development & Ganga Rejuvenation, New Delhi in Chief Guest hina tawh uap ding, Shyam Lal Poonia, IAS DC Ccpur in Special Guest hina tawh uap ding a hi. Workshop hun ah D W Ingo, Retired Professor, Horticulture, Central Multipurpose Agricultural Manipur University, ICAR Imphal, Dr BK Bhattacharya, Head ICAR Central Inland Fishery Research Institute CIFRI, NER Centre Guwahati, NJ Sharma, Former Adviser, IFC & WSM North East Council Shillong leh Dr Ch Victoria Devi, Research Associate Social Science NERIWALM te’n Resource Person hina tawh ziltilna nei ding a hiu.

BT Drug distributor store hawng

Lamka, May 22 *(Nisin Thuhiltu)* : District sung ah damdawi zawkna lam tawh kisai ah pharmacy chuamchuam ah pesawntu khat hiding in zan nitak dak 7:30 in New Lamka Gouchinkhup Veng, Tedim Road saklam pang ah Oasis Lamka Sports Café nuai, Ground Floor ah Biakhoih Tombing BT Drug Distributor store hawnna leh latna a um hi. Zia hun a chun, store neitu Lian Chinkhup Tombing in BT Drug distributor store tawh kisai genlatna a nei a, Rev Dr. Khen P Tombing, Chief Coordinator PCI R in store hawnna leh Pathian kiang ah a latna a nei hi.

FC Zomi Colony leh LSC in gualzo
Lamka, May 22 *(Nisin Thuhiltu)* : CDSA leh Ropiang Foundation saina’ Lamka Football Ground, Hiangtam Lamka ah Raja Goukhothang Guite Football Memoriam 2018 chiatha zing in, match a um a, match masa FC Zomi Colony leh Ahsijolneng FC te kihel in, FC Zomi Colony in 2-1 in gualzawna a chang hi. Second match ah Lamka Sports Club leh FC Zotal kihel in, LSC in 1-0 in gualzawna a chan hi. Zing 23 May 2018 ah match 2 um kit ding, sun dak 12:00 ah Muvanlai Athletics leh Avoi FC kihel ding, second match ah nitaklam dak 2:00 ah Konsam FC leh Bungmual Youth Club te kihel ding a hiu.

CM in Bungte Chiru leh Nungei ah ‘Go to Village’ camps uap

Imphal, May 22 *(Nisin Thuhiltu)* : Chief Minister N. Biren Singh in Bungte Chiru village, Kangpokpi District leh Nungei village, Thoubal District ah tuni’n Go to Village camps a uap hi. Bungte Chiru ah N. Biren in a thugenna a chun, Lairik Tamhansi scheme nuai ah educational expenses a ding ah Special Development Fund Rs. 10 crore bithiak ah um a hidan gen in, tunaicha survey ah akimudaw dungzui ah inchen haksat ziak ah school kai chawlsan student 40,000 tuam ah um hiat a hi tawh kitawn ah lekha sim nuam, inchen haksat ziak ah lekha sim chawlsan te’n lekha a sim zawm theina ding ua government in panlakna nei zing hi’n a gen a, tuni tiang ah Go to Village mission in khua 169 cover zota hi’n a gen hi. Chun, May 25 leh Go to Village mission chiapina tawh kisai ah review meeting um ding hi’n a gen a, pending cases leh complaints um te sukfelna ding ah June tha sung ah Go to Village camp chiapi hilo ding in a gen hi.

Bungte Chiru ah Go to Village camps chu, Works, Power, RD&PR, Textiles, Commerce and Industries and Information and Public Relations Minister Th. Biswajit in le uap in, Central Government’s Ujjwala Yojana, Ujjala Yojana, Pradhan Mantri Jan Dhan Yojana, Saubhagya Scheme, Gram Swaraj Abhiyan, Beti Bachao Beti Padhao mission and Sabka Sath Sabka Vikas mission etc leh State Government’s Chief Minister-gi Hakshelgi Tengbang etc tawh kisai genna a nei a, Saitu AC MLA Ngamthang Haokip, Additional Chief Secretary (Works) Suhel Akhtar leh Kangpokpi ADC Chairman H. Hangshing te’n le uap in, Government Departments stall 24 hawn ah um te etthakna le a nei ui.

Chief Minister N. Biren Singh in Nungei village,Thoubal District ah a thugenna a chun, Go to Village camps a pat complaints 2,80,000 lutta leh complaints 1,80,000 sukfel hita hi’n a gen a, Go to Village
mission chu haksatna chuamchuam mipi’n a tuakteu kanzuina ding chiapi ah um hi’n a gen hi.

New Keithelmanbi ah school khat mei in kang

New Keithelmanbi, May 22 *(Nisin Thuhiltu)* : Kangpokpi District ah tuni, 22 May 2018 in Bethel Christian English School mei in kang a, 6 Assam Rifles of 9 Sector Assam Rifles te’n school kang chu kintak ah del in meikuang phelmitna nasep bawl in, school naupang te a hukdawk ui. Assam Rifles in a huntak ah school kang phelmitna ding ah panlakna a neina chung a chun, khawsung mite’n kipakthu a gen ui.

Kerala: Nipah virus ziak ah mi 11 in thina tuak ta
Kozhikode, May 22 *(Nisin Thuhiltu)* : Kerala ah Nipah virus natgual lêng ziak ah thina tuak 11 ahi zing lai ah thisan leh a dang dang test na apat natgual veikha hiatdaw kibelap zing in, Government Medical College Hospital, Kozhikode ah mi 16 dang etthâkbe in aum u’i. Thina tuak lak ah 3 chu Malappuram district apat kipan uh leh natgual ziak ah hospital ah um te tawh kinaina nei uh hi’n a kigen hi. State Health Minister K.K. Shylaja in laboratory test ding ah sample 18 thawt ah um lak ah positive 12 mudaw ah um in, amau lak ah natgual vei hi ah hiatchian mi 2 te etkawl hipan ta uh ti’n a gen hi. Natgual ziak ah Kozhikode Medical College Hospital ah etkawl aum, Rajan of Koorachundu leh Baby Memorial Hospital ah etkawl aum Ashokan of Chekkiad te’n tuni thina a tuak u’i.

Thautui man khangbe zing
New Delhi, May 22 *(Nisin Thuhiltu)* : Gamsung ah thautui man in kiamlam manaw malak ah a nisin tawbang phial ah khang zing in, tuni’n Delhi ah petrol man litre khat ah Rs. 76.87 leh diesel Rs. 68.08 tung to in a sang pen pawl ah tepte ahitai. Thautui ahileh global oil price a khang ziak ah nastak ah kalto ahia, petrol man litre khat chung ah 30 paise khang in, diesel man litre ah 26 paise a khang hi. Petrol chung ah excise duty chu litre khat chung ah Rs. 19.48 ahia, zia chu Delhi ah retail price lak ah 25.3% a tung zo hi. Chun, petrol chung ah State VAT te tawh excise duty chu a kigawm ah retail selling price kimkhat lam a tung to hi. Diesel chung ah a hileh neukhat niam deu in excise duty leh State VAT chu retail price lak ah 14.7% bep ahi zo hi.

TN: Police firing ziak ah mi 9 in thina tuak
Chennai, May 22 *(Nisin Thuhiltu)* : Tamil nadu simlam, Thoothukudi ah um Sterlite copper smelter plant khak ding phût ah kiphinna nei te leh police te a kinawktua hun ua a la um police firing ah mi 9 in thina tuak in, kiphinna nei mipi leh police hunkhawp in liamna a tuak u’i. Kiphin pawl te’n suangse a pat ziak ua police in lathi charge bawl maleh phachuamlo diaklo in tear gas shells hunkhawp a kap ua, a hinla dinmun in siat lam a manaw ziak ah mipite sukthipna ding ti in police te’n meichang a tha mai u’i. Zia buaina kawmkal a chun, photo journalist liamna tuak hunkhawp le aum ua, The Hindu news photographer N. Rajesh chu kiphin lak ah pang khenkhat te’n ala sawisa in a camera a lak piak nung ua a memory card suksiat piak ding ah vauna bawl maleu a chingkam khenkhat te ziak ah memory card chu a nung mu kit thei hi. Kiphinna a nei hun ua kiphin pawl te’n Collectorate lam manaw ah lamzuina a nei hun ua zia buaina thilsuak chu tung ahia, police personnel 2,500 lam duty maleu mipi chu a suthip zo puau hi. Thiltung ziak ah Thoothukudi South leh SIPCOT police stations huapsung sia ah CrPC Section 144 puan in aum hi. A langkhat lam ah buaina thiltung ziak ah Thoothukudi Medical College Hospital ah liamna tuak hunkhawp puaklut in aum hi. Chief Minister in thiltung chu da um a sak thu puang in thina tuakte innsung mite kiang ah zangna dawpna Rs. 10 lakh chiat piak ding banah liamna serious tuak khate Rs. 5 lakh leh liamna thupi beklo te Rs. 1 lakh ah kithuapi ding hi’n a gen hi.

Dakkal 24 sung ah flight ticket cancel man umlo di
New Delhi, May 22 *(Nisin Thuhiltu)* : Flight ticket booking bawl nung dakkal 24 sung ah a thawn ah cancel thei hita ding ahia, a hinla zia hi lênna kipatdawna ding ni 4 masang ahi ngai ding hi’n draft passenger charter ah taklat in aum hi. Ministry of Civil Aviation in draft chu public consultation a ding in ni 30 kawi ding leh zia zaw tha 2 sung ngei ah final version siamfel ding ahi. Draft dungzui ah min diklo te sukdikna chu dakkal 24 sung ngei ah hiatsak ahi ah character 3 sang ah tamzawlo ahileh airlines te’n sukdikna ding ah sum bangma lakbelo ding ti’n le draft a chun taklat in aum hi.

Zalenna mu nung ah commercial flight khat in Arunachal baw
Itanagar, May 22 *(Nisin Thuhiltu)* : Indian civil aviation khangthu ah tepte a hitakna ding in, Lokpriya Gopinath Bordoloi Airport, Guwahati apat kipan dawk commercial aircraft khat in zani’n Arunachal Pradesh ah Pasighat Airport a baw a, zia hi India in zalenna a mu nung ah commercial aircraft khat Arunachal ah a chuk masakna pen ahi. Northeastern state 8 te lak ah Arunachal hi commercial flight nei nunungpen ahia, state in independence masang ah air-transport facility nei maleh a tangpi’ armed force te bep in a mat uh ahi. Alliance Airlines te 42-seater ATR Aircraft chu Seppatni sunnung dak 2:15 tuam in Pasighat Airport ah a chuthâ, Guwahati apat dakkal 1 leh a kim a sulut hi. Zia hun a chun Arunachal Chief Minister Pema Khandu leh Deputy Chief Minister Chowna Mein, Assembly Speaker TN Thongdok leh cabinet minister leh legislator chuam chuam te pang in a kigawm ah passenger 25 a chuang ua, a mau sia chu zia route a ding ah passenger masapen in a pang u’i.

Northeast Projects 43 a ding ah railways in Rs 9,000 Cr sêng: Rajen Gohain
New Delhi, May 22 *(Nisin Thuhiltu)* : Railways in northeast India ah rail connectivity a ding ah project 43 chiapi in zia chu Rs. 9,000 crore lam subei ding hi’n Minister of State for Railways Rajen Gohain in tuni’n Agartala ah a gen hi. Project lak ah 25 chu rail line thak siamna leh zia apat chu track 5,100 km um be ding hi’n Agartala leh Bengaluru kal kawmtua ding Humsafar Express flag-off hun ah a gen hi. Northeastern state te capital tin rail ah zawpmatna ding nasepna chu chiatha zing in, Northeast Frontier Railway (NFR) in Bangladesh ah Chittagong port tiang tungsak theina ding ah southern Tripura’s bordering city Sanbrrom tiang rail line tungsak ta hi’n Minister in a gen a, Agartala apat Akhaura (Bangladesh) tiang tung ding line thak siamna le NFR in panta ahidan a puang hi.

Hun matna’ Tripura Chief Minister Biplab Kumar Deb in, December 2019 ah Feni Lui chung ah lei siamna zawthiang ahi takleh Tripura chu northeastern region leh Bangladesh zawpmattu hiding ahidan a gen a, Minister Gohain kiang ah Express trains zosia chu Tripura apat khawpi dang dang taitua sak ding ah dawn in, zia chu nisin ah a um theilo tak ahi ahi lehle hapta khat ah 2vei bek a tai theina ding lampi ngaitua piak ding in a dawn hi.

Pakistan in ceasefire a bawsiatna’ mi 7 liam
Srinagar, May 22 *(Nisin Thuhiltu)* : Jammu & Kashmir ah Pakistani force te’n ceasefire bawtsia kit in bomb mang ah Jammu, Samba leh Kathua district te ah international border zul te a kapna ua minautang 7 in liamna a tuak u’i. Pakistani Rangers te’n zani nitak lam apat RS Pura, Arnia leh Hiranagar sector te a kap hun ua minautang 7 in liamna tuak hi’n BSF thupuangtu khat in agen a, Indian troops te’n le a kituakpi lethukna a piak hun ua Paksitan in le siatna tuak hi’n a gen hi.
Rangers te shelling ziak a chun border outpost 40 val leh chenna khua 50 val sukha in, minautang te bitna ding ngaikhawk ziak ah thuneitute’n gamgi zul ah cheng te a ding in relief camp a guanggal piak a, zia mun a chu sukkhak ah um khua ah cheng te umsak ahiu. Ceasefire bawsiat ziak in kivenna ding ah school te le khak in aum hi.

Gâlmun ah thi, jawan te Rs 1 cr. sang ah tawm zawlo kithuapina piak hiding: Rajnath
New Delhi, May 22 *(Nisin Thuhiltu)* : Union Home Minister Rajnath Singh in Border Security Force (BSF) te chu gamgi vengbit ding himaleu a mawpuakna un gamgi neilo hi’n a gen hi. New Delhi ah tuni’ kimang, BSF investiture ceremony ah a thugenna achun, meichang tha masa zaw ah panglo ding himaleh BSF te meichang thakhum masat ahileh bang ziak ah a lethuk uh ahi kuama’n dawnglo ding hi’n a gen a, BSF te defence line masapen ahina ua gamgi venbitna ding ah pan a lak dan te uh phakchat um a sak thu a puang hi. Bangladesh leh Pakistan tawh ki gamgitna mun tamzaw te khakbit hita ahidan a gen a, gâlmun ah thina tuak paramilitary jawante innsung mite zosia kiang ah zangna dawpna Rs. 1 crore sang ah tawmzaw lo piak hiding ti’n le a gen hi.

Southern Kandahar province ah bomb puak ziak ah mi 16 thi
Kabul, May 22 *(Nisin Thuhiltu)* : Afghanistan’s southern Kandahar province ah gari khat sung ah um bomb a puak zak ziak in mi 16 in thina tuak in a dang 38 a liam u’i. Security force te’n van khat sung aum bomb phel ding aguat hun ua zia tuaksiat hi ting ahia, a kiang tuam ah mi umsaklo maleu bomb a hat mama ziak in thina leh liamna tuak tam mama hi’n thuneitute’n a gen u’i. Provisional governor spokesman Daud Ahmadi in thina leh liamna tuak zat tuakzat puanlatna a nei hun ah security forces personnel 4 in thina tuak in, a liam te lak ah naupang 5 leh security force member 10 pang hi’n a gen hi. Thiltung tawh kisai ah kuate khutnung ahi a kipuang aum nai puai. Bomb chu hat mama ahina ah a kiang tuam ah dawr leh chenna inn hunkhawp le a hu in sepsia pha a hina ah thina tuak zat le kibelap ding ah khenkhat te’n ginchat thu a puang u’i.

Guanggal lawkna gual ah US-North Korea summit nei hilo maithei
Washington, May 22 *(Nisin Thuhiltu)* : North leh South Korea kal ah ki lungnawpmawna a kipat kit tak tawh kitawn ah North Korean-United States summit chu a hun tak nei hi ding ginchat aum pua’i. President Donald Trump tawh US-North Korean summit chung chang genkhawm ding ti’n Seppatni a khan US ah South Korean President Moon Jae-in a khualzin a, June 12 ah um ding hi ah genlawk ah um summit chu a hun chawn gamla thei ding hi’n Trump in a gen hi. Moon in a genna’ Korea 2te gawpkhawmna ding ah United States in ma sawn mama in summit chu umsak tei ding ah US kiang in dawtna a siam hi. South Korea leh US in military drill a la neina chung ua May 18 a khan North Korea in summit chu su-hai ding hi ah vauna a bawl hi. North Korean Central News Agency in 'Max Thunder' kiti military drills chu US leh South Korea air force te’n nei uh ahina ah zia chun Korea gam 2 te kizawpna susia mama ding hi’n a taklang hi.