Kerala ah Nipah Virus ziak ah mi 6 thi; Scientists joint team te’n khualna nei

Kozhikode, May 21 *(Nisin Thuhiltu)* : Northern Kerala's Kozhikode area ah Nipah virus ziak in mi 6 te’n thina a tuak ua, mi 8 te etkawl ah um a hidan taklat in a um hi. Nipah virus kiti natna mihing a ding ah natna lau um tamtak te lak ah chi khat, gancha a biktak ah bak (bat), vawkcha leh gancha dangdang banah thei (fruit) nekbang kipaimang, Nipah virus pua ganhing te’n a nekbang uh thei (fruit) nekkhakna leh Nipah virus natna nei te direct contact bawlna a pat kilasawn thei a hi. Nipah Virus ziak ah damlo tuak te chu khawsik, luchangna ti te leh thuak (brain) lam buai nuam sek ti a hia, zia te chu etkawl vak ahiloleh dakkal 24-48 sung ah khua helo ah um thei a hi. Kerala ah Nipah virus case mudaw a hi tawh kitawn a chun, Scientists te’n Kerala ah natna dodal thei a hina ding in panlakna nasatak a nei ngal ua, National Centre for Disease Control, New Delhi; National Institute of Virology, Pune leh Integrated Disease Surveillance Programme, Kerala a pat scientists team te’n Kozhikode ah thil umdan khualna a nei zing ui. Official thusuak in a taklatna a chun, mi 6 in thina a tuak banua mi 8 te Medical College Hospital, Kozhikode ah etkawl ah um a hidan taklang in, mi dang khat Kochi ah Nipah virus case ah etkawl ah um in a gen hi. Zia natna chu mihing a ding ah natna lau umtak himaleh lauthawnna ding umlo, a huntak ah ki-etkawl ahinak leh sukdam thei ti a hi. Manipal Virus Research Centre a pat Dr Arun Kumar in Kozhikode’s Changaroth panchayat ah Nipah virus ziak ah mi 2 te’n thina a tuakna mun uh etthakna a neina tawh kisai a genna a chun, Nipah virus ziak ah damlona tuak mudaw thak neilo a hidan gen in, ni 2 sung zia locality a chu hun mang hi’n a gen a, lauthawnna ding umlo leh health worker te’n natna kaisawn khak ding le kichat umlo in a gen hi. Sample a chawmkhawm teu chu international standards tawh kituak ah laboratory testing bawl hiding, a result leh Nipah virus tawh kisai ah mudaw a neiteu chu Union Health Ministry kiang tut ding uh hi’n a gen hi.

National Institute of Virology ah director Dr D T Mourya in a genna a chun, Kiginni nitak ah sample a chawmkhawm teu test bawl ding ah laboratory tut hita a hidan gen in, a huntak ah zia natna nei te chu etkawl ahi ua le damthiang kit thei uh hi’n a gen hi.

Nipah virus kiti ahileh Malaysia gam ah Nipah kiti khua khat ah September 1998 ah la kimudawk masapen a hia, zia chu tawh kitawn ah Nipah khaw min putsak ah Nipah Virus kiti a hi. A kimudaw limlai, September 1998 -April 1999 sung in Nipah Virus case 265 a la um a, zia lak a chu mi 105 te’n thina a la tuak ui. India gamsung ah kum 2007 in West Bengal’s Nadia ah zia natna chu mudaw in a la um kit a, mi 5 te’n thina tuak in, mi 30 in zia natna case chu nei ua tepte in a um hi. Bangladesh leh South East Asian gam chuamchuam ah le zia natna case chu um ah gen a hi.

One Day Training and Awareness Program on Disaster Management

Lamka, May 21 *(Nisin Thuhiltu)* : Department of Relief and Disaster Management and Civil Defence leh District Administration, Churachandpur saina’n tuzingkal dak 10:30 in District Training Centre (DTC), Tuibong ah One Day Training and Awareness Program on Disaster Management a um hi. Zia hun a chun, district sung ah SDO, BDO, government department chuamchuam- PWD, PHED, IFCD, Agriculture, CMO, Fire Service Sub-Station leh Philanthropic Organization apat mi bangzat hem a pang ua, Shyam Lal Poonia, IAS, DC, CCpur in Chief Guest hina tawh uap in, Kammuanlal Simte, CEO, ADC, CCpur in Functional President ban ah Mannuamching, IAS, DC, Pherzawl District leh Mohd Ayub Khan, Deputy Controller of Civil Defence te’n Guest of Honour hina tawh a uap ui. Shyam Lal Poonia, IAS in a gendan in, tuaksiat tuak hun ah mani a ding ah a phatchuam ding ban ah mite panpi leh hukdawtheina ding ah tuni awareness program hi pawimaw mama ahi’dan a gen ban ah, Department of Relief and Disaster Management and Civil Defence in tuaksiat tuak hun ah mat ding vanmatchak chuamchuam district a ding in pethei leh ti pha a sak thu a gen hi. Chuleh, tuni May 21 hi World Anti-Terrorism day ahi tawh kitawn in, thingnuaimi dodalna leh sukbeina ding ah kua’nle panla chiat ding in a chiakhawmte kiang ah kithiamna a neisak ngal hi. Hun nina ahileh training leh awareness hun in a mat ahia, zia hun a chun, Department of Relief and Disaster Management and Civil Defence apat resource persons- Mohd. Ayub Kham, Deputy Controller, Civil Defence, Manipur; O. Ratan Meitei, Instructor, Relief and Disaster Management; A. Achouba Singh, Sub Team Commander (IDRF) leh Mohd Shahiruddin, Master Trainer, Relief And Disaster Management te’n tuaksiat tuak hun ah mani hinna humbit ding dan chuleh, midangte panpi leh hukdaw ding dan tawh kisai in vanmatchak chuamchuam mang in ziltîlna a nei ui.

Zogam Bridge kiti siamdawk

Lamka, May 21 *(Nisin Thuhiltu)* : Thanlon Sub-Division sung ah um, Leijangphai apat Phaiba tâng zawtna lampi in a hawkhak, Tuiku Lui ah Lei kibawl, Zogam Bridge kiti matthei ding ah bawlzaw in a um tai. A hawndawna chu kibawl nailo hi’n a kigen hi. Lei bawlzaw a hitheina ding ah Leijangphai, Tuikumuallum, Tuipiphai, Phaiba leh Phainuam te’n a tuakkhawm uh, leingawi, thingpêk leh thingzawl ban ah MLA leh MDC te’n amau sakhau apat a sawkdaw uh sum mangcha ah kibawl hi’n a kigen a, chuleh nam sepai, Phaiba Camp a um te’n le nasep thilbawl ah nasatak ah kithuapi uh hi’n a kigen hi. Zaw ahi tiang ah zia lei bawlzawna ding in nitha 247 a lut hi. Lei ahileh thing, thikkhau leh thikzang mang ah kibawl ahia, chuk lai ale gari luttheita ding ban ah, lampi le blacktop hilo maleh matthei ding ah bawlzaw hiphawt hi’n le thu hiat ahi. Mipi a ding ah a phatchuam mama ding ban ah, a bîk ah Leijangphai a School kai naupangte a ding ah tui pal ngaitalo ding hi’n le a kigen hi.

FMPB Missionary candidate-te pauchappiak

Lamka, May 21 *(Nisin Thuhiltu)* : Friends Missionary Prayer Band (FMPB), CCpur in tuni nitak dak 1:30 in DS Office, Lamka South Division, New Lamka ah FMPB Missionary candidate-te pauchappiakna a nei ui. Zia hun a chun, FMPB, CCpur ah mapuitute a pang ua, Rev V. Nenglian, DS, Lamka South Division, EBC in missionary candidate-te a ding ah tîlkhona thu gen in pauchappiakna a nei hi. Missionary candidate mi 8-te a hiu leh - Mampui of Laktak Project, Lalduhsaka of Kanaan, New Lamka, Lhingneihoi of Sabual North East Tangnuam, Manbiakkim of G. Mualkoi, N. Lunminthang of Leisanbung, K. Vunggoulian of Lailam Veng, K. Luaiminthang of Nehru Marg leh Lalkim of Gangpimual ahiu a, Guwahati ah interview ding ah zing leh Lamka nusia ding ahiu a, interview ah lawtingte ahiu leh FMPB in India gamsung mun chuamchuam ah missionary nasem ding ah training pe ding ahiu.

KIC leh PTC in kithuakhawmna hun nei

Lamka, May 21 *(Nisin Thuhiltu)* : Kuki Inpi Churachandpur (KIC) mapuina’n tuni May 21, 2018 nitaklam in Paite Tribe Council (PTC), General Headquarter Conference Hall, Hiangtam Lamka ah PTC, GHQ mapuitu thakte tawh kithuakhawmna a nei ui. Zia hun a chun, KIC nuai ah KKL, KSO, Joint Committee on Anti Drugs, Churachandpur leh PTC, GHQ apat teltin thak ah um mapuitute a pang ua, khawtang a siatna chuamchuam tawh kisai ban ah pau kihetua non-Naga group-te kituak zawdiak ah umkhawm ding dan genkhawmna a nei ui. Khawtang siatna lampang ah a diak tak in, khanglai lak ah khamthei tawh kisai ah kithutuak tak ah dodal khawm ding dan leh chi leh nam ah kikhenchuamna a umlona ding ah kipawlkhawmna hâbawl diak ding ahi’dan leh mipi lak ah kampau matdan pilvan ngai ahi’dante genkhawmna a nei ui.

Kani tawh mi khat mat ah um
Lamka, May 21 *(Nisin Thuhiltu)* : Churachandpur Battalion, Assam Rifle leh District Police pangkhawm in a chiata May 19, 2018 in Vajing khua ah mi khat apat khamthei Kani (Opium) tamtak matdaw in a um hi. Combine team in thugûk a mu dungzui ah Joint Operation a bawlna ua, Seiminthang Tuboi (36) s/o Jamlet of Vajing a chenna In in a man ua, ama apat Kani Kg 2.34 ban ah Kani chii tu ding Kg 22.240 mandawk uh hi’n a kigen hi. Khamthei matdaw zosia tawh police khut ah piakdaw in a um hi.

May 27 a pat CCpur Dist. ah polythene/plastic bag khap hiding
Lamka, May 21 *(Nisin Thuhiltu)* : District sung a polythene/plastic bag matna tawh kisai ah a chiata February 6, 2018 ni ah Deputy Commissioner, Churachandpur mapuina ah genkhawm ahi nung ah suizuina nei ding ah vaihawm ahi dungzui ah suizui ah um in, district sung a polythene/plastic bag matloding/khâm hiding hi’n a kigen hi. A kigen dan in, Lamka leh a kimvel ah nicheng ah plastic bag 1.86 lakh matbei ah um hi ah mudaw ahia, mihing hinna a ding ah lauthawn theina tiang tunthei ding ah mu ahi ziak in, khâm hiding hi’n a kigen hi. Central Government, State Government leh Local Government in plastic bag khâm ding pha a sak dungzui ua, a chiata March 19, 2018 ni ah Shyam Lal Poonia, IAS, DC Churachandpur leh M/K Plastic in biodegradable plastic/polythene district sung ah hung supply ding ua kilemna suai kai uh hi’n a kigen hi. India in World Environment Day 2018 a zintun ding tawh kitawn ah World Environment Day, June 5 ah polythene bag consumption free district ti ah puandaw a hitheina ding ah May 27, 2018 apat district sung a polythene/plastic bag khâm ah um zuipat hiding hi’n le a kigen hi. Zia hi sub-division tin ah mat hiding ban ah, a ensui ding in Enforcement Committee patdaw in a um a, a chairman in Sub-Divisional Magistrate, Member Secretary ding in Sub-Divisional Police Officer leh member in Range Officer (Forest), Assistant Engineer (PHED) leh CEO/ADCC in a guat, DI-te hiding ahiu.

Gate kipai in mi 1 delkha
Lamka, May 21 *(Nisin Thuhiltu)* : Hilltown ah tuni sunnung dak 2:30 vel in inn gate kipai in a kiang ah um pawsal khat delkha’n, aveilam keng nasatak in a liam hi. Gate in a delkhak ahileh Ngamlal (36) s/o Seilet of Joljam Village a hi. Pawsal khat gate sunglam a kipat gari neu a taidawk in gate a hetkhak leh gate (thikpek) le kipai hi’n a kigen hi. Zia ah gate kiseppai chun, a kiang ah um Ngamlal chu a delkhak a hia, a liamna a serious ziak in doctor te’n hospital in admit a bawl ui.

ZYA G. Tonjang Unit hawng ding
Lamka, May 21 *(Nisin Thuhiltu)* : Zomi Youth Association (ZYA) GHQ in May 25,2018 sunnung dak 1:00 leh Thangkhosei Guite, Chief of G. Tonjang inn ah ZYA G. Tonjang Unit hawnna nei ding a hi. Zia hun chuleh V. Chinsiam in hun matna mapui ding, Thangkhosei Guite, Chief of G. Tonjang in vaidawnna thu gen ah, Lianzalal, President, ZYA/GHQ in ZYA Unit hawnna leh Officer Bearer-te kitiamsakna nei ding a hi. Pastor G. Sanglian, Bialtu Pastor, EBCC G. Tonjang in Officer bearer-te pauchap piakna nei ding a hi.

Imphal ah Rhohingya muslim mi 9 matdaw ah um

Imphal, May 21 *(Nisin Thuhiltu)* : Manipur state sung ah illegal migrants (Rohingyas) te dodalna nasatak chiapi ah a um zing tawh kitawn in Manipur Police in Hatta Golapati area, Imphal East ah numei 4 panna’n illegal migrants 9 a mandawk hi. Mi 9 lak ah mi 4 te chu Mohammad Younus, 27 s/o Abdul Hakim of Laungdung Fakiduang village, Nakura N.M.5 Maundaw, Myanmar; Mohmad Anwar, 28, s/o Kulla Miya of Manrunah village, Buthidang, Myanmar; Md.Ismaile, 28, s/o Md. Savar Ahamad of Buthidaung Block-II, Myanmar leh Sultana, 27 w/oMd, Ayub of Thoubal Moijing te a hiu a, amau hung kipatna diktak ahileh Bagladesh tu leh tu Golapati ah khawsa a hiu. A dang te ahiuleh naupang, kum 18 ah upa numei 2, kum 18 ah upa pawsal naupang 1, kum 15 upa pawsal chapang khat leh kum 8 ah upa pawsal chapang khat a hi. Mat ah um te a pat a chun, mobile handsets 4 leh UN UNHCR (United Nation High Commissioner for Refugees) ID cards 2 leh fake Aadhar cards 4 mudaw in a um hi.

Imphal West Police office ah DIG K. Jayantakumar in thil umdan tawh kisai a taklatna a chun, Mohammad Younus leh Mohammad Anwar te a kipuandan ua, kum 2015 ah Mynmar nusia, Bangladesh refugee camp ah um, zia nung a chu Bangladesh a pat India ah a guk ah lut, Kolkata a tun ua, Delhi zuan ah Muslim Indian agent mi khat puihuaina nuai ah UNHCR ID card ngaitua ah, Bethindi Bitatanagar, Jammu and Kashmir zuan ah zia mun a chu khawsa, May 16 a pat innlua ah Golapati ah khawsa kit hiu ah kipuang un a gen a, Md. Jamaruddm,(7) s/o late Md. Turak Ali of Hata Golapau Maning Leikai ahileh khawsakna ding ngaitua zing hi’n a gen hi. Naupang 5 te ahiuleh Buthidaung area, Myanmar mi, Rohingya Muslim te buaina ziak ah Bangladesh refugee camp a tung nung ua India ah Muslim agent te panpina India gamsung lut uh ti a hi.

Citizenship (Amendment) Bill 2016 ah dawilo ah kiphinna nei
Imphal, May 21 *(Nisin Thuhiltu)* : All Manipur Students’ Union (AMSU) leh North East Students’ Organisation organised bawlna tuni’n Keishampat, Imphal ah Citizenship (Amendment) Bill, 2016 dawilo ziak in sit-in rally a um hi. AMSU Vice-president Peter Laishram in a genna a chun, chief minister kiang ah memorandum piakna nei ah Manipur Accord in illegal immigrants te nawdaw theina ding ah thutiam bawl a hidungzui ah Citizenship (Amendment) Bill, 2016 pass a hilona ding ah panlakna nei ding ah chialna bawl un a gen hi.

Citizenship (Amendment) Bill, 2016 ahileh Citizenship Act of 1955 siamthakna ding Bill,19th July 2016 ah Lok Sabha ah luidaw ah um a hi. Citizenship (Amendment) Bill 2016 dungzui ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis te India mi leh sa hina nei (citizen) ah pawm thei ding ti a hi. Citizenship Act, 1955 dungzui ah gamdang mi phalna bei ah India gam ah pemlut te chu “illegal migrants” ti a hiu a, Indian Citizenship mutheilo ding ti a hi bawk hi. Zia ah “illegal immigrant” kiti chu valid travel documents (passport & visa) neilo ah India gamsung lut te, ahiloleh valid travel documents nei himaleh a hun tiam kipia sung khel ah India gam ah um te genna a hi. Foreigners Act, 1946 leh Passport (Entry into India) Act, 1920 dungzui a chun, illegal migrants te chu jail ah khumthei ahiloleh gamsung a pat nawdaw ding ti a um a, zia ah Act pani te apat chu illegal immigrant te India gamsung lut leh pawt, India gamsung ah a khawsakna chung ua thuneikhum thei ding ah central government thuneina piak a hi.
Central government in kum 2015 leh 2016 ah notifications a suadawna a chun, December 31, 2014 masang ah India gamsung lut, gam dang mite lak ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis community te chu India ah khawsa thei ding ah lemsakna a nei hia, zia gual mite chu valid documents neilo ziak ahiloleh India mi ahilo ziak ua jail ah khumlo ding, gamsung apat le nawdawlo ding ah lemsakna a nei a hi. Zialo a chun, India mi leh sa hina nei (citizen) ah pawm ding, Foreigners Act, 1946 leh Passport (Entry into India) Act, 1920 dungzui ah illegal immigrant te’n Indian citizenship apply a bawl theina ding ua a tawmpen ah kum 11 sung bek India ah um a hiding uh ti chu kum 6 tiang ah sukniam ding ti Citizenship (Amendment) Bill, 2016 mang ah proposed bawl a hi. Himaleh Citizenship (Amendment) Bill, 2016 in illegal Muslim migrants te genkhak in a nei pua, Afghanistan, Pakistan leh Bangladesh a pat minority community dang Jews, Bahais etc te le genkhak in a nei puai. Assam ah Citizenship (Amendment) Bill, 2016 nasatak ah dodal ah a umna ziak ahileh Assam Accord of 1985 tawh a kikal ziak a hia, Assam Accord of 1985 dungzui ah Bangladesh a pat March 25, 1971 nung ah Assam sung lut te “illegal migrants” ah pawm ding leh Assam state sung a pat nadaw thei ding ti a hi.

State in Anti- Terrorism Day nit

Imphal, May 21 *(Nisin Thuhiltu)* : 1st Manipur Rifles Banquet Hall, Imphal ah tuni’n India Prime Minister lui Rajiv Gandhi death anniversary leh Anti-Terrorism Day nit in a um hi. Zia hun chu, Agriculture, Veterinary and Animal Husbandry Minister V. Hangkhanlian leh Education, Labour & Employment Minister Th. Radheshyam te’n Chief Guest leh Functional President hina tawh a uap ua, Chief Guest, V. Hangkhanlian in a thugenna a chun, India gamsung pumpi May 21st chu Prime Minister lui Rajiv Gandhi kithana hiatzingna ding ah Anti Terrorism Day ah kimang sek hi’n a gen a, Prime Minister lui Rajiv Gandhi ahileh 21 May 1991 ni ah numei suicide bomber 2 te’n Sriperumbudur,Tamil Nadu State ah a tha uh a hi. Huham tak kithana leh nasep thilbawl nei kiti chu freedom of life kala hidan gen in, terrorism ziak ah mitamtak in hinna a chan zing uh chu demna nasatak bawl kawm ah India in Anti-Terrorism Day a mat sek hi’n a gen hi.

Th. Radheshyam, Education, Labour & Employment Minister in a thugenna a chun, terrorism kiti chu humanity leh modern civilization a ding ah melma a hidan gen in, mihing hinna susia hi’n a gen a, terrorism ziak ah state in le buaina chuamchuam tuakzing sek a hidan a gen hi. Prime Minister lui Rajiv Gandhi chu vision hawitak nei leh Punjab Accord, 1985 leh Mizoram Accord, 1996 te chung ah suai a la kaitu a hidan gen in, kihona leh non violence ah buaina chuamchuam um te sukven thei a hidan muang ngam ah a la chiapitu khat hi’n a gen hi. Terrorism kiti chu kipumkhatna tawh dodal chiat hileh Manipur, India leh Khawvel ah sukbei thei hiding in a gen hi. Zia hun mat sung a chun, Anti-terrorism/ Anti-Violence pledge bawlna hun, Minister V. Hangkhanlian in a mapui a, Government Officials leh staffs tamtak te’n hun matna a uap ui.

Citizenship (Amendment) Bill, 2016 kiti bang?
Citizenship (Amendment) Bill, 2016 ahileh Citizenship Act of 1955 siamthakna ding Bill,19th July 2016 ah Lok Sabha ah luidaw ah um a hi. Citizenship (Amendment) Bill 2016 dungzui ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis te India mi leh sa hina nei (citizen) ah pawm thei ding ti a hi. Citizenship Act, 1955 dungzui ah gamdang mi phalna bei ah India gam ah pemlut te chu “illegal migrants” ti a hiu a, Indian Citizenship mutheilo ding ti a hi bawk hi. Zia ah “illegal immigrant” kiti chu valid travel documents (passport & visa) neilo ah India gamsung lut te, ahiloleh valid travel documents nei himaleh a hun tiam kipia sung khel ah India gam ah um te genna a hi. Foreigners Act, 1946 leh Passport (Entry into India) Act, 1920 dungzui a chun, illegal migrants te chu jail ah khumthei ahiloleh gamsung a pat nawdaw ding ti a um a, zia ah Act pani te apat chu illegal immigrant te India gamsung lut leh pawt, India gamsung ah a khawsakna chung ua thuneikhum thei ding ah central government thuneina piak a hi.

Central government in kum 2015 leh 2016 ah notifications a suadawna a chun, December 31, 2014 masang ah India gamsung lut, gam dang mite lak ah Afghanistan, Pakistan leh Bangladesh a pat Hindus, Christians, Buddhists, Sikhs, Jains leh Parsis community te chu India ah khawsa thei ding ah lemsakna a nei hia, zia gual mite chu valid documents neilo ziak ahiloleh India mi ahilo ziak ua jail ah khumlo ding, gamsung apat le nawdawlo ding ah lemsakna a nei a hi. Zialo a chun, India mi leh sa hina nei (citizen) ah pawm ding, Foreigners Act, 1946 leh Passport (Entry into India) Act, 1920 dungzui ah illegal immigrant te’n Indian citizenship apply a bawl theina ding ua a tawmpen ah kum 11 sung bek India ah um a hiding uh ti chu kum 6 tiang ah sukniam ding ti Citizenship (Amendment) Bill, 2016 mang ah proposed bawl a hi. Himaleh Citizenship (Amendment) Bill, 2016 in illegal Muslim migrants te genkhak in a nei pua, Afghanistan, Pakistan leh Bangladesh a pat minority community dang Jews, Bahais etc te le genkhak in a nei puai.

Assam ah Citizenship (Amendment) Bill, 2016 nasatak ah dodal ah a umna ziak ahileh Assam Accord of 1985 tawh a kikal ziak a hia, Assam Accord of 1985 dungzui ah Bangladesh a pat March 25, 1971 nung ah Assam sung lut te “illegal migrants” ah pawm ding leh Assam state sung a pat nadaw thei ding ti a hi. *(Nisin Thuhiltu)*

Tripura ah tuilet ziak ah inn kuan 3000 val te’n a inn mun uh nusia; mi 6 thi

Agartala, May 21 *(Nisin Thuhiltu)* : Tripura ah tuilet nasat ziak in inn kuan 3000 val te a chenna mun ua umtheilo in a um ua, mi 6 te’n thina a tuak ui. North Tripura in tui a let nasa diak a, Assam–Agartala National Highway ah le tuilet in traffic a chawk buai a, mun khenkhat ah school te le khak in a um hi. Tripura Chief Minister leh Ministers dang te khualzin kal ah govt affair tawh kisai mawpua, State’s Education Minister Ratan Lal Nath in tuiletna mun te etthakna nei in, govt official te chu tui ziak ah mundang ah pawtdawk theilo ah um te puidawk ding leh kithuapina nasep kituptak ah chiapi ding in hiatsakna a bawl a, innkuan 3000 val te chu makeshift camps 36 ah umsak a hiu. District official te gendan in, NDRF, fire service, civil defense leh volunteers te’n tuilet ziak ah haksatna tuak te kithuapina nasep chiapi zing uh hi’n a gen a, inkuan khat a pat mi 3 panna mi 6 te’n buanthuak kitawl ziak ah thina tuak uh hi’n a gen hi. A langkhatlam ah Chief Minister Biplab Kumar Deb in victim family te chu financial assistance piak hiding in a puang hi.

Hepina bei hial ah Dalit thiksia hawlmi 1 jeplup ah um

Rajkot, May 21 *(Nisin Thuhiltu)* : Gujarat, Rajkot district, Shapar village ah kum 40 ah upa Mukesh Vaniya of Parnala village, Surendranagar district chu khau ah hen in pawsal 5 in a jeplum ui. Police in thil umdan a taklatna a chun, jeplup ah um Mukesh Vaniya leh a zi banah numei dang khat chu thiksia/vanlui chawmkhawm mi a hiu a, Shapar ah um Radadiya Factory kiangnai tuam ah thiksia a chawm nau ah Radadiya Factory ah semtu te tawh kinial buaikha, factory neitu panna Mukesh Vaniya chu khau ah kan hepina bei hial ah a jep uh a hi. Zialo a chun, a zi leh numei dang khat te le sawisak a hiu a, liamna tuak ua gen a hi. Zia gual ah kisawisakna chu CCTV camera ah record a hi dungzui ah social media ah a video muthei ding ah thezak in a um hi. Zia gual ah Dalit nam niam te sawisak ah a umnau tawh kisai chu Dalit MLA 'Mr. Mukesh Vaniya in nasatak in a tangko a, Twitter ah a video upload bawl in thiltung chu nasatak in demna a bawl hi. Jeplup ah um Mukesh Vaniya zi’n police ah compliant a bawl tawh kitawn in, Police te’n Mukesh Vaniya jeplum tu te chu a man ua, Scheduled Castes & Scheduled Tribes (Prevention of Atrocities) Act leh Indian Penal Code - murder, assaulting a woman and wrongful confinement nuai ah case ziklut ah um hi’n a taklang hi. Mat ah um mi 5 te chu- Radadiya Factory neitu Jaysukh Radadiya leh a lawite Chirag Patel, Divyesh Patel, Jaysukh Radadiya leh Tejas Zala te a hiu, kisawisakna ziak diktak hiat hilo maleh kimusitna ziak ah thil tung hipen ding ah ginchat a hi.

Gujarat Minister of State for Home Pradipsinh Jadeja in thiltung tawh kisai a press conference a genna a chun, kilawmlo tak ah gamtatna chung a chu government in action khautak ah lading a hidan taklang in, thina tuak insung mite compensation Rs 8.25 lakh piak hiding leh victim family te dinpi zing ding a hidan a puang hi. Chun, sections 302 (murder), 323 (punishment for voluntarily causing hurt), 342 (wrongful confinement), 354 (assaulting a woman to outrage her modesty) of the IPC and the SC/ST Prevention of Atrocities (POA) Act nuai ah FIR ziklut ah um in Minister Jadeja in a gen hi.