CM Biren in ‘Act East Policy’ tawh kisai ah Interactive Session uap;
Support centre khat ah Moreh siamdaw ding leh Moreh town developed bawl ding tangko

Imphal, May 4 *(Nisin Thuhiltu)* : New Delhi ah tuni’n Union Minister of External Affairs Sushma Swaraj leh Union Minister of State for External Affairs V.K. Singh te mapuina nuai in, Act East Policy tawh kisai in Northeastern States ah Chief Minister te’n Interactive Session a nei ui. Zia hun chu Manipur a pat Chief Minister N. Biren Singh leh Minister for RD&PR, PWD and IPR, Government of Manipur Th. Biswajit Singh te’n a uap ua, NorthEastern States a pat Chief Ministers - Mizoram Chief Minister Lal Thanhawla, Arunachal Pradesh CM Pema Khandu, Nagaland CM Neiphiu Rio, Sikkim CM Pawan Kumar Chamling, Assam CM Sarbanda Sonowal, Meghalaya CM Conrad Sangma leh Tripura CM Biplab Kumar Deb te’n le a uap ui. Chief Minister N. Biren Singh in meeting ah a thugenna a chun, Manipur ah um Moreh town chu Act East Policy implement bawlna support centre khat hithei ding leh commodity exchanges, logistics servicing, warehousing facilities banah transportations support hub khat hithei ding in a gen a, Moreh town chu multi-speciality hospitals, diagnostic centres, educational institutions etc tawh developed bawl ding a nawpthu a gen hi. Trade lam masawn theina ding ah banking facility chuamchuam kawi ding, transaction bailam tak ah a um theina ding ah payment modalities - quick food safety checks, single window clearances ti te umsak ding pawimaw a hidan gen in, Moreh town chu buffer area dan ah kawi ding, India thuneitu te’n ID card dungzui ah Myanmar mite ding ah hun chawmkhat sung a ding pass issued a bawl uh mang ah India gamsung mun chuamchuam a phak thei ding uh dawi hi’n a gen hi. Moreh ah Integrated Check Posts chu a vaima theilam ah a function ding, border trade Land Customs Stations (LCS) ahiloleh Integrated Check Post (ICP) ah lubawk khat bep a um ding, zia ding a chu Ministry of Commerce ahiloleh Government Department khat a pat guat ding a nawp thu gen in, 110 km Imphal-Moreh highway (NH39) chu full double lane/four lane highway standards ah upgrade bawl ding, gam 2 te kikawmtuana kitup zawkna ding ah connectivity lam ngaikhawk thak ding pawimaw in a gen hi. Chuk hun (rainy season) ah nimchip ziak ah Imphal-Dimapur lampi ah lemchanlona a um mun mama na chung ah Imphal-Silchar, NH-53 le siamhawi ding pawimaw in a gen hi. ASEAN-India Free Trade Agreement suai kai ding, India-Myanmar-Thailand trilateral highway te hawn ding dawi hi’n le a gen a, Act East Policy kituptak ah implement bawl a hitheina ding ah Manipur leh Mizoram panna high level inter-Ministerial body khat siamdaw ding, zia committee chun connectivity project chuamchuam umte a etzui zing ding hileh hawi ding ah ginchatna nei in a gen hi. Chun, India leh Myanmar land connectivity, border trading point - Moreh (Manipur), Tamu (Sagaing Division, Myanmar) , Zokhawthar (Mizoram) leh Rhi (Chin State, Myanmar) banah Kaladan Multi Model Transit Transport Project(KMTTP) te ah trade leh economic activity kituptak ah a um ding pawimaw a sakthu a gen hi. *(Nisin Thuhiltu)*

‘Aajeevika & Kausal Vikas Mela’ um ding
Lamka, May 4 *(Nisin Thuhiltu)* : Gram Swaraj Abhiyan (Sabka Sath, Sabka Gaon, Sabka Vikas) April 14, 2018 akipat kimang zawna ding in District Administration, CCpur saina’ May 5, 2018 zingkallam dak 10:00 leh District Training Centre, Tuibong ah ‘Aajeevika & Kausal Vikas Mela’ um ding a hi.

Zia hun chu V. Hangkhanlian, Minister (Agri, Vety & AH), SL Meena, Joint Secretary (MDoNER), Govt. of India leh Shyam Lal Poonia, IAS, DC/CCpur te’n khuallian hina tawh uap ding, District Level Officer te’n Special invitees hina tawh uap ding a hiu. Priscilla Lallensing in hun matna mapui ding, Lalramsang Infimate, Addl. DC/CCur in vaidawnna thu gen ding leh S. Thienlaljoy Gangte, MCS, Ac to DC/CCpur in April 14, 2018 akipat May 5, 2018 kikal ah Gram Swaraj Abhiyan nuai ah sepdaw chuamchuam um te report piakna nei ding a hi.
Chun, IOC representative/LPG distributor te’n PMUY tawh kisai report piakna nei ding, DGM/MSPDCL, CCpur in Saubhagya & UJALA tawh kisai ah report piakna nei ding, LDM/CCpur in PMJDY, PMJJBY, PMSBY tawh kisai ah report peding leh DIO/CCpur in Mission Indra-Dhanush tawh kisai ah report piakna nei ding a hi. Khuallian te a pat thugenna um ding leh Rakesh Balwal, IPS, SP/CCpur in kipakthu genna nei ah hun mangzo ding a hiu.

Hun mat sung ah DSWO/CCpur in CMST, NSAP leh IGNOAPS enrolment bawl piak ding a hia, MSPDCL/CCpur in Saubhagya nuai ah electric connection thak leh UJALA nuai ah subsidized ah LED bulbs zuak ding, DLO zosia’n amau department chiat ah mawpuakna piak ah um te presentation bawl ding a hiu. Zialo a chun, NERCORMP, DIC nuai ah PNGO, SHG leh PMEGP beneficiary te’n stall bawl ah a khutsuak-teu suklatna nei ding a hiu a, district sung ah bank um cheng in account leh aadhaar/mobile seeding bawl ding, LDM/CCpur in PMJDY, PMJJBY, PMSBY enrolment bawl ding, District sung ah LPG distributor te’n extended PMUY nuai ah LPG connection thak baw piak ding, CMO/DHS, CCpur leh ASHA te’n CMHT enrolment, medical camp, Mission Indra-Dhansuh leh Ayushman Bharat a ding ah additional data collection bawl ding, SDO zosia’n Certificate issue leh aadhaar enrolment camp bawl ding a hiu. *(Nisin Thuhiltu)*

Bomb supuak khak ziak ah thi
Lamka, May 4 *(Nisin Thuhiltu)* : India leh Burma gamgi ah um, Molnoi khua hausa, Thangzamang Haokip chapa Seiminlen (15) in tuni, May 4, 2018 ah a inkim ua bomb kikawi a sukpuak khak ziak ah thina tuak hi’n a kigen hi. A kihiatdan in Seiminlen (15) s/o Thangzamang Haokip in a inn kiang uh suthiang ah hampa a vat thianna, bomb kikawi supuak kha, a mun ah thi ngal ti a hi. Zia bomb puak hun a chu Seiminlen tawh kithua Seigoulen Haokip in le liamna tuak hi’n a kigen hi. Bomb puak chu kua te kawi a hi hiat hilo, thiltung hun ah Thangzamang le hiding pawimaw nei ah Mantripukhri ah a chiadaw kal hi’n a kigen hi. *(Nisin Thuhiltu)*

Matdaw ah um khamthei haltum
Lamka, May 4 *(Nisin Thuhiltu)* : Vaal Veng Village Authority, Vaal Veng PTC Unit leh Vaal Veng YPA unit in vengsung sukthianthona ding ah khamthei dodalna a nei zing tawh kitawn in, tuni’n thuthak lakhawm mite muna ngei in, khamthei a matdaw teu halna a nei ui. Vaal Veng Village Authority, PTC leh YPA in hun sawtpi a pat khamthei dodalna a la chiapi hita ti a hia, April 25, 2018 ah Vaal Veng ah cheng ma Sutdeihpiang (32) s/o Thangsuanlang in WY chang a zawk banah mi tawh kipiaktuana Vaal Veng amatna chung ua, Joint Committee in khamthei zuak Sutdeihpiang leh a zi chungthu lelna hun sawttak a nei nung ua, tu zingkal dak 7:00 ah Village Authority office ah khamthei zuak kittalo ding ah kitiamna neisak kawm ah kitiamna suai a kai sak banua a khamthei zawk uh matdaw ah um te chu a haltum uh a hi. *(Nisin Thuhiltu)*

SSPP GHQ in kipakpi thu puang
Lamka, May 4 *(Nisin Thuhiltu)* : Siamsinpawlpi GHQ ah Education Department Secretary H Siamkhanmuan in tuni ah kipakpina thusua a bawlna a chun, Council of Higher Secondary Education Manipur (COHSEM) nuai ah Class XII exam ah lawtinna nei candidate zosia SSPP in kipakpi a hidan taklang in, maban ah a lawtin zawm zel ding uh le dawisak in a puang hi. Chun, a lawsam te le lungkia mailo ah panthak ah panla chiat ding in tilkhona a bawl hi. *(Nisin Thuhiltu)*

Sintex Plastic Water Tank 2 piakdawna nei
Lamka, May 4 *(Nisin Thuhiltu)* : A chiata April 20, 2018 sunnung dak 1:00 ahV Hangkhanlian, Minister (Agri/Vety & Animal Husbandry) in District Hospital Ccpur etthakna a nei hun ah District Hospital ah tui taksapna um zing sukven theina ding ah tuikhawlna ding Sintex Plastic Water Tank peding hi ah a puan dungzui in, tuni’n District Family Welfare office in a mat ding 1000 litres kawi theina, Polycon company in a siam Sintex Plastic Water Tank 2 piakdawna a zi Dr. Kimboi in a nei hi. Geldaw thei khat chu, Minister V Hangkhanlian in Sintex Plastic Water Tank banah District Family Welfare office building major renovation bawl ding, OPD ticket counter, Waiting hall ah damlo OPD Ticket lanuam te’n Ticket ngak kawm ah a et thei ding uh TV Screen liante kawi hiding ti ah thutiam a bawl a hia, zia te chu tung sawtlo ah sukpitin hiding ti a hi. *(Nisin Thuhiltu)*

ZRO saina Leaders' Interactive program um ding
Lamka, May 4 *(Nisin Thuhiltu)* : Zomi Re-Unification Organisation (ZRO) saina’ May 5, 2018 sunma dak 11:00 a pat YPA Ghq Hall, Hiangtam Lamka ah Leaders' Interactive programme kiti um ding a hi. Zia Interactive programme a chu Civil Society Organisation lawiupa te pang ding a hiu a, Political Talk tawh kisai genlatna leh maban ah kalsuan dingdan genkhawmna um dung a hi. Zia interactive programme chu CSO leader , kochuam puitu te, intellectual chuamchuam-te, Frontal organisation lawiupa leh lunglutna nei kua hita leh pang chiat ding in Khen Cin, Secretary GAD ZRO Hqtrs in chialna a bawl hi. *(Nisin Thuhiltu)*

Panpina kaikhawmna ding ah School Fair sai
Lamka, May 4 *(Nisin Thuhiltu)* : Laizon Veng, Tuibong aum Salt Brook School (SBS) huangsung ah tuni zingkal lam dak 9:30 apat sunnung dak 2:00 kikal in Salt Brook School Fair 2018 aum a, zia hi ahileh Sangga Muon Inn leh Trinity Centre panpina ding ahi. Fair hun ah school teaching staff leh student te’n Sangah Muon Inn leh Trinity Centre panpina ding in amau khutsuak, khutthiam-thilbawl chuam chuam te chawk thei ding ah a kawidaw ban ua stall chuam chuam ah naupangte munop leh kipaksak thei ding chuam chuam - photo booth shooting, lucky charm pot, ring throw, stationary, snacks & sweet, readymade store, restaurant banah naupangte lunglut thei ding kihelna chi chuam chuam aum hi. School Fair nei hun sung ah sum a mute uh chu Sangga Muon Inn leh Trinity Centre te a kim gel ah khenpiak ah panpina a piak gel ding uh ahi. *(Nisin Thuhiltu)*

PCS in May 15 leh BoD telna nei di
Lamka, April 4 *(Nisin Thuhiltu)* : Paite Culture Society (PCS) in PTC GHQ Conference Hall, Hiantam Lamka ah PCS Board of Directors Meeting a nei ua, meeting hun ah 2018-2021 sung PCS/Board of directors ding telna chu a hung tung ding May 25, 2018 leh PTC GHQ Conference Hall, Hiangtam Lamka ah nei ding ti ah a chiakhawm member te’n thupuk in, PCS Auditor ding ah P Nengkhanlian leh V Chinkhenpau a guat ua, Paite Literature Society (PLS), Young Paite Association (YPA) leh Siamsinpawlpi (SSPP) tawh PTC GHQ kizawpna gual ah Paite Culture Society (PCS) tawh le kizawpna kibat sak ding in a thupuk u’i. *(Nisin Thuhiltu)*

KSO/CCpur in kipakpina thusua bawl
Lamka, April 4 *(Nisin Thuhiltu)* : Kuki Students’ Organization, Churachandpur District in district apat Council of Higher Secondary Education, Manipur (CoHSEM) saina nuai ah Higher Secondary Examination (HSE) 2018 examna’ lawting te kipakpi thu a puang hi. KSO/CCPur in thusua a bawlna ah CCPur district apat HSE 2018 exam pia candidate 2,308 lak ah 1,922 te’n lawtinna chang leh pass percentage 83.28 tung zo in Noney district banah district hihawipen ah tepte aum ahidan a taklang hi. Chun, district sung ah pass percentage lam ah top 3 institute – Vision Academy, Rengkai; Legacy Faith Academy, Bethel leh Toung Pillars College, Tuibuong te chung in kipakpi thu a puang hi. Zia lo chun, Churachandpur Centre apat MIL topper te le kipakpi mama ahidan KSO/CCpur in a puang hi. Hiatthei khat chu, HSE exam hun ah KSO Churachandpur in Student Curfew a puang banah exam hun ah chîndan hawilo bawl aum ding venna’n a entha ding ah flying squad a la siamdawk hi. *(Nisin Thuhiltu)*

One Day Legal Awareness programme um ding
Lamka, May 4 *(Nisin Thuhiltu)* : District Legal Services Authority, CCPur saina’ tuni, May 5, 2018 zingkallam dak 11:00 a pat Simveng ah um Simte Inn ah One Day Legal Awareness programme on re-implementation of welfare schmes including widow pension schemes kiti um ding a hi. Zia hun chu Suman Poonia w/o Shyam Lal Poonia, DC/CCpur, Deepa Balwal w/o Rakesh Balwal, SP/CCpur leh Sonali Shetty w/o Col. Mithun Shetty, Commandant, 25-AR te’n khuallian hina tawh uap ding a hiu a, Michael Paugoulian hun matna mapui ding, Savitri, Adocate, High Court of Manipur in vaidawn thugenna nei ding, Linthoingambi Thingbaijam, Lecturer, LMS Law College, Imphal leh L. Margareth, Advocate, Legal Ad Counsel, CJM Court, CCpur te’n Resource persons hina tawh topic chuamchuam mang ah thugenna nei ding a hiu. *(Nisin Thuhiltu)*

Education Minister in Lilong ah Residential School hawng

Imphal, May 4 *(Nisin Thuhiltu)* : Education Minister Thokchom Radheshyam in tuni’n Adhyaksha, Thoubal Zilla Parishad Hasina Begum, Up-adhyaksha T. Nungshi, District Commissioner, Thoubal District, Haobam Rosita te uapna tawh Lilong, Mairelkhul, Thoubal District ah Sarva Shiksha Abhiyan (SSA) nuai ah kisa Residential School a hawng hi. Zia school chu class 6 a pat class 8 tiang ziltheina a hi. Education Minister in a thugenna a chun, school building kihawng thak in inchen haksate kithuapi ding leh dawn zangkhai ding a hidan gen in, state sung ah Kasturba Gandhi Balika Vidyalaya (KGBV) 11 leh Residential Schools 9 te chu Government of India in approve a bawl hi’n a gen hi. Chun, school chu next academic session a pat high school ah upgrade bawl hiding in a puang a, class 9-10 student te umtheina ding hostel thak khat le sakbe hiding in a puang hi. Hun matna a uapzaw in, Minister in ITI Takyel chu surprise visit a bawl a, infrastructural development tawh kisai etthakna a nei hi. *(Nisin Thuhiltu)*

Karam Shyam in Ukhrul ah Yarra Festival uap

Ukhrul, April 4 *(Nisin Thuhiltu)* : Minister ,CAF & PD, Revenue, Karam Shyam in tuni’n khuallian hina tawh Khangkhui Phungdhar ground, Ukhrul district ah Yarra Festival a uap hi. Ama’n a thugenna a chun, cultural festivals kimatna a pat state sung ah community chuamchuam te kankhawm leh festival in khat leh khat kal siamhawi in a gen a, state kipumkhat theina ding ah panlak chiat ding a nawp thu a gen hi. Chun, Prime Minister Narendra Modi government in scheme chuamchuam chi 150 a chiapi dan te genlang in, “Go to Village Mission” patdaw ah a umna leh state in khat leh khat kal siamhawina ding ah panlakna a neidan te a gen hi. Khangkhui Caves chu tourist munpi khat ah siamdaw hiding leh Khangkhui Phungdhar lampi siamhawi hiding in a gen hi. Minister Karam Shyam in zia hun matna chu a uap zaw in, FCI godown, Ukhrul district le etthakna a nei hi. *(Nisin Thuhiltu)*

Imphal, May 4 *(Nisin Thuhiltu)* : Manipur Governor Prof. Jagdish Mukhi leh a zi Prem Mukhi in tuni’n Govindajee Temple leh Kangla Fort etthakna a nei ua, Govindajee Temple ah pathian biakna a nei bawk ui.

Rs. 2 crore man ding ‘R 7’ khamthei mandawk

Imphal, May 4 *(Nisin Thuhiltu)* : Customs division, Imphal nuai ah anti-smuggling unit in tuni’n ‘R 7’ (drug) tablets tawh mi khat a mandawk hi. Mat ah um chu Sujit Das, 39, s/o late Niranjan Das of Saiton Nganu Khun, Bishnupur district a hi. R.K Darendrajit Singh, assistant commissioner, Customs division, Imphal in a genna a chun, khamthei zawkna kipei mi dang te matdawna ding leh khamthei puak lumletna tawh kisai khualna neibe ding ah mat ah Sujit Das chu hentang hizing nalai in a gen a, khamthei kiman dawk chu Rs 2 crore tuam man hiding in a gen hi. Mat ah um Sujit ahileh Rs 1 per tablet ah commission mu ding ah khamthei pua hi’n a gen hi. *(Nisin Thuhiltu)*

Footpath ah van zuak te kiang ah police te’n tips la sek
Imphal, May 4 *(Nisin Thuhiltu)* : Khwairamband Keithel, Over Bridge ah numei police personnel, National Awardee Head Mistress Khwairakpam Sunita kilawmlo tak ah sawisatu leh lampi pam ah van zuak te kiang ah tips chawmkhawm khat tuni’n a thilbawlna camera ah capture khak in a um hi. Imphal Times reporters te’n thil umdan tawh kisai khualna a neinau a chun, footpath ah numei van zuak te’n footpath ah van a zawk theina ding ua police te kiang ah Rs. 10 - 50 pesek un, numei van zuak te’n a gen ua, tips a piaklo tak ua leh van zawk sak ngailo uh hi’n a gen ui. Non-local kuva zuak te’n ahileh police te nisin ah Rs. 50 pesek un a kigen hi. Zia gual ah police te gamtatna chu reporter te’n a kanzui zing lai ua, numei police te’n tips a dawl khawm laitak uh tuak kha camera ah capture bawl kha a hidan uh Imphal Times in a taklang hi. *(Nisin Thuhiltu)*

Manipur Board 12th topper Selina Keisham in ‘corruption-free’ education a um ding dawi

Imphal, May 4 *(Nisin Thuhiltu)* : Manipur Board 12th topper Selina Keisham in thuthak lakhawm mite tawh a holim hun ua a genna a chun, “ corruption-free education” ngaikhawk a hidan gen in, nekgukna leh gawlgukna um te ziak ah student zilna lam ah masawn thei ding banghem zat te panlakna buai in a gen hi.

Ama ahileh Civil Service lunglut, IAS officer khat hiding lungtup ah nei a hidan gen in, state a ding leh education system siamhawina ding ah panlak ding nuam hi’n a gen hi. State education department ah sepna muthei ah a um leh education system a pat nekgukna leh gawlgukna um te sukbeina ding ah panla ding hi’n a gen a, Centre boards -CBSE, ICSE te syllabus tawh kituak ah state board syllabus le update bawl ding dawi hi’n a gen hi. India boards syllabus chawi te’n competitive examinations lam ah maban neizaw’u ah mu a hidan gen in, competitive examinations a ding tawh kituak ah Centre boards -CBSE, ICSE etc syllabus siam a hi ziak hi’n a gen a, state board students te ahileh board syllabus update ahilo ziak ah competitive examinations lam ah maban neizawlo ua mu hi’n a gen hi.

Chun, coaching centre khat le zawm khalo, ama mimal ah kitodel ah lekha sim pawimaw sa hi’n a gen a, topper ah a panthei chu a teacher te zal hi’n a gen hi

Chuleh, state sung ah kiphinna, bandh/blockade ti te a um mun mama na chung ah schools te kikhak, teacher te’n a hiding gual tak ah syllabus zo thei seklo uh hi’n a gen a, student te’n kituptak ah lekha a sim theina ding ua state sung ah kiphinna chi chuamchuam a um lo ding a nawpthu le a gen hi.
Kum 17 mi, Selina Keisham ahileh marks 482 tawh overall topper ah pang a hia, Comet School a pat a hi. A pa Keisham Sudhir Singh ahileh Liberal College, Imphal ah Professor a hia, a nu ahileh housewife a hi. Imphal West ah khawsa a hiu. *(Nisin Thuhiltu)*

First smokeless village in Manipur
Imphal, May 4 *(Nisin Thuhiltu)* : Imphal East District, Kshetrigao Kendra huapsung ah um Keikhu village ah cheng te’n insuan ah LPG gas connection a nei chiat tak uh tawh kitawn in “First smokeless village in Manipur” ti ah taklat in a um hi. “First smokeless village” ti umzia chu ann-huanna thing (wood) ahiloleh thil dang kimang lo, meikhu lutlut ah nek leh chak siamna umtalo tina a hi. Government sheme “Gram Swaraj Abhiyan Sabka Saath Sabka Gao Sabka Vikas” nuai ah gas connection mu a hiu a, zia scheme chu chiapi a hi masang ah inn 125 um lak ah inn 50 bep in gas connection nei himaleh scheme chiapi a hi nung ah inn 125 te’n gas connection neivekta ti a hi. *(Nisin Thuhiltu)*

World’s Most Polluted Cities 20 te lak ah India ah khawpi 14 pang

New Delhi, May 4 *(Nisin Thuhiltu)* : World Health Organization (WHO) in PM2.5 levels, 2016 data tawh kituak ah tunaicha World’s 20 Most Polluted Cities list a suadawna a chun, India ah khawpi 14 te Most Polluted Cities in a pang hi. Chun, mi 10 umna mi 9 te’n hui (air) thianglo hip lut un WHO data’n a taklang a, khawvel ah mi 3.8 million te’n household air pollution ziak ah thina tuak, region ah mi 1.5 million or 40 per cent in thina tuak leh ambient air pollution ziak ah khawvel ah mi 4.2 million te’n thina tuak in a taklang hi. World’s 20 Most Polluted Cities list ah pang, India ah khawpi 14 te chu – Delhi, Varanasi, Kanpur, Faridabad, Gaya, Patna, Agra, Muzaffarpur, Srinagar, Gurgaon, Jaipur, Patiala leh Jodhpur a hi. Chun, Kuwait ah Ali Subah Al-Salem khawpi, China leh Mongolia ah khawpi khenkhat chu 20 most-polluted cities in a pang hi. World Health Organisation in member-country te chu Southeast Asia Region ah household leh ambient (outdoor) air pollution tawh kisai dodalna panla ding in chialna bawl a, kum khat sung ah mi 7 million ah sim te’n air pollution tawh kisai ah thina tuak in a taklang hi. *(Nisin Thuhiltu)*

Mizoram ah tukum HSLC result in record thak siam

Aizawl, May 4 *(Nisin Thuhiltu)*: Kerala leh Lakshadweep banah India ah third highest literate state ti ah kihia Mizoram board in 3rd May 2018 in High School Leaving Certificate (HSLC) examination, 2018 results a puang a, kum 1978 a pat Mizoram Board School Education (MBSE) nuai ah pass percentage a sanpen na kum ah tepte in a um hi. Pass percentage ahileh 76.65 a tung a, exam bawl candidate 17,695 um te lak ah candidate 13,563 te’n lawtinna chang tina a suak hi. Board chairman F. Lianhmingthanga in a genna a chun, Mizoram Board School Education (MBSE) khangthu tukum HSLC exam result ah pass percentage sangpen a hidan gen in, compartmental examination zaw a hitak leh overall percentage 77 tung ding ah gingcha hi’n a gen hi. Chun, kum 2012 ah pass percentage 72.27 a la tung chu second highest pass percentage ah record hi’n a gen a, himaleh distinction ah pass percentage kum masa sang ah 50% ah niam chuam in a gen hi. A langkhatlam ah tuchung Mizoram Board School Education (MBSE) nuai ah HSLC exam result a chun, numei te sang in pawsal te performance hawizaw’n a kilang a, numei pass percentage 76.40 tung pawsal overall pass percentage 76.92 a tung hi. Lalremsiama Darchhun of St Paul’s Higher Secondary School leh Royal Philem of Mount Carmel School te’n marks 477/500 mu in overall topper in a pang ua, subject 5 in le letter marks a mu gel bawk ui. *(Nisin Thuhiltu)*

Nagaland HC building kisakna CBI in khual ding

Guwahati, May 4 *(Nisin Thuhiltu)* : Guwhati high court in Nagaland capital Kohima ah um high court complex ah high court building ding kisa zo theilo ah hun sawttak a umna chungchang khual hiding a hidan taklang kawm in, Central Bureau of Investigation (CBI) in preliminary inquiry a bawl ding in order a sua hi. Kohima high court building ahileh Rs 52 crore bei ah sak ding ah project siam a hia, kum 2007 ah foundation suangphu hawn ah um, kum 2013 ah function thei ding ah guanggal himaleh tuni tiang ah sakzaw theilo ah um a hi. Construction work ahileh Manipur, Meghalaya lehTripura high court's tawh a hun kibang ah pat ah um, nasepna 35% tiang bep muthei ah um hinalai maleh Rs 52 crore lakdawzaw hita ti a hi. Khenkhat in a gen vang ua leh Nagaland high court ding kisa chu khawvel ah high court building kisa zo hakpen ah world record hithei hialta ding in a gen ui. *(Nisin Thuhiltu)*

Nagaland ah puimang ah Driver, Handyman thasuak hita
Kohima, May 4 *(Nisin Thuhiltu)* : Nagaland, Tuensang district ah um Helipong village ah a chiata April 22, 2018 ni ah puimang ah um oil tanker driver leh handyman chu Eastern Nagaland Public Organisation (ENPO) te’n panlakna a nei tawh kitawn ah thasuak in a um ui. Mi 2 te puidawna ding a chu ENPO president Koiwang Konyak, ENPO vice president Kekongchim te mapuina ENPO team in panlakna nei ah a puimang tute kihona a neipi nung ua bittak ah thasuak thei ah um uh hi’n a kigen hi. Hiatthei khatt chu oil tanker driver leh handyman kidnapped bawl ah a umna chung un, Nagaland ah petroleum transporters leh retailers te’n kiphinna nei in, dakkal 48 sung ah mat ah um te thasuakna ding ah panla ding in Nagaland state government chu huntiam a bawl khum uh a hi. Puimang ah um mi 2 te chu driver Tularam Buragohain leh helper Adman Surin te a hiu. *(Nisin Thuhiltu)*