Ex-Servicemen leh Veer Naris-te tawh hun mangkhawm

Lamka, April 9 *(Nisin Thuhiltu)* : 27 Sector, Assam Rifle (Churachandpur Battalion) nuai ah um, 6th Sikh Light Infantry (Khuga Battalion) in tuni, April 9, 2018 zingkal dak 11:00 in Badminton Hall, 27 Sector Assam Rifle Headquarter, Tuibong ah Project Anubhaj kiti Ex-Servicemen leh Veer Naris-te tawh hun a mangkhawm ui. Hun matna Colonel Mukesh Sharma, CO Khuga Battalion in a mapui a, KN Singh, OIC, ECHS Polyclinic, Churachandpur in Suvigya Cell nuai ah Ex-Servicemen leh Veer Naris te’n hamphatna chuamchuam a neite’u ban ah Army Recruitment Rally ding tawh kisai a Pre-Recruitment Training tawh kisai genkhawmna nei in, Brigadier Ajay Kumar, Commandant, 27 Sector Assam Rifle in Khuga Dam ah patdaw ah um, “Ex-Servicemen Grievances Cell” (Suvigya Cell) nuai ah Churachandpur Battalion panlakna a Ex-Servicemen leh Gal ah thi, sepai zite (Veer Naris) te’n hamphatna a mu u tawh kisai genna a nei hi. Aban a genna ah, Ex-Servicemen leh Veer Naris te’n a pension sum uh diklo hi ah hete’n, mun chuamchuam a Rally a nei hun ua Suvigya Cell nuai ah treasury office leh a bank account ua bawldik piak ah um uh hi’n a gen a, District sung a Suvigya Cell patdaw ahi a pat Ex-Servicemen leh Veer Naris kigawm ah mi 344, Government Treasury leh a Bank Account ua sum Rs.3,17,868 bawldik ding lak a tuni chan ah mi 228-te a bawldik a um in, a sum ah Rs. 2,04,01,499 a pension account ua lutsak ah um hita hi’n a gen hi. Ex-servicemen 288 lak ah 105-te, a sum a Rs.65,28,398 tungpha hi’n le a gen hi. Zia hun achun, Ex-Servicemen lam apat Naik K. Mawia Gangte in Churachandpur Battalion panlakna chung ah kipakthu gen in, Brigadier Ajay Kumar, Colonel Mukesh Sharma, Subedar Major Jaswant Singh leh Navdeep-te kiang ah kipakpina thilpiak pia in hun a mangzo ui.

MHJU, CCpur in DIO/CCpur kimupi

Lamka, April 9 *(Nisin Thuhiltu)* Manipur Hills Journalists Union (MHJU) Churachandpur Branch, Executive member te’n tuni, 9th April 2018 zingkal lam dak 11:00 in Th. Mangminthang Gangte, District Information Officer (DIO), Churachandpur chu a office mun in a kimupi ui. Zia hun a chun, kimelhiattuana siam in, maban panlakkhawm ding dan genkhawmna a nei ua, MHJU Churachandpur Branch President Vicky Suantak in District ah sung ah journalist te kivaipuakdan, District based media house umte leh activity chuamchuam a neiteu genlatna a nei hi. DIO/CCpur in maban ah journalist te tawh panlakkhawm ding leh activity chuamchuam neikhawm zing ding a nawpthu a gen hi. Th. Mangminthang Gangte ahileh January 8, 2018 ah DIO/CCpur office lua pan a hia, MPSC saina’ Aug. 2017 ah Assistant Publicity Officer (APO) recruitment ah lawtinna a nei tawh kitawn ah Dec. 2017 ah appointment piak ah um, Jan. 5, 2018 ah DIO/CCpur ding ah posting order suak a hi. Chuleh, DIPR ah a sep masang ah Hueiyen Lanpao leh People’s Chronicle, Sangai Express ah kum tamtak a la sem, Manipur University nuai ah kum 2010 ah‘Master in Journalism and Mass Communication’ zo, Gangte sung ah MJMC masapen le a hi. MHJU CCpur Branch, Executive member Th. Mangminthang Gangte DIO/CCpur kimupi te ahiuleh President Vicky Suantak banah Vice President Langzachin, Secretary - T Kamkhenpau, Joint Secretary Roding Sellate leh Secretary Infp. & Pub. Ding Khuptong te a hiu.

Miss Liankhoman in Alumni Award dawng
Lamka, April 9 *(Nisin Thuhiltu)* South Asia Institute of Advanced Christian Studies (SAIACS), Bengaluru ah SAIACS Alumnus of the Year Award, 2018 piakdaw ahi dungzui in, tukum a ding in Miss Liankhoman, Dorcas Co-Ordinator, EBC khut ah Award piakdaw in a um hi. ASIACS Alumni Award ahileh a chiata April 7, 2018 ni ah piakdaw ahia, SAIACS Alumni Award ahileh SAIACS apat graduate dawkte lak ah a penpen hina changte chawihawina a hi. SAIACS in Alumni Award kum khat ah khatvei a piaksek ahi. SAIACS apat tuni chan in Africa, USA, India, Philippines, Korea, Thailand, Burma, Nepal leh gam chuamchuam apat graduate umta in, Graduate dawkte’n ministry, kochuam leh organization chuamchuam ah sem in, khawvel mun chuamchuam in a kithezak ui. Miss Liankhoman in SAIACS ah kum 1999 in “MA in Pastoral Theology and Counseling” a zo a, Manipur apat zia gual Award dawng masapen ahi.

Ropiang Foundation in Free Eye Screening Camp pan
Lamka, April 9 *(Nisin Thuhiltu)* Ropiang Foundation Trust, CCpur in district sung a government school 10 ah Free Eye Screening Camp a nei ding uh tuni’n a kipan hi. Tuni’n government school 2- Vimala Raina Government High School leh Phungkhothang Government High School ah a nei ua, zia hun achun, medical team 2 in Class 5 apat Class 10 student-te mit enchain in test a bawl ui. Ropiang Foundation Trust, CCpur in khaw muna tawh kisai ah buaina nei, mit hatlote mit tawh kituak ding mitval power bawl ding ahiu a, zia ding chun, camp nei hun ah mitval frame student te’n a kitel theina ding ua frame chuamchuam a kawi ui. Mitval a bawlpiak te’u a thawn ah studentte kiang ah hawmdawk ding ahiu. Ropiang Foundation Trust, CCpur in khawsakna haksa, private school ah kai zolo ban ah mit hatlo ziak ah dawigual ah lekha simtheilo studentte khualna ah free school eye screening camp a bawl uh ahi. Maban ah CCpur Government High School, Thangkhai Government High School, Gandhi Memorial Government High School, Lanva Government High School, SSA Residential School, New Lamka Upper Primary School, Vungzagen Government Higher Secondary ban ah Central School ah free school eye screening camp nei ding ahiu.

Paite chawndan tawh kisai ah documentary video

Lamka, April 9 *(Nisin Thuhiltu)* YPA Pearsonmun Unit in Paite chawndan tawh kisai documentary video a bawl uh chiazawm zel in, Doordarshan (National) panlakna tawh YPA Pearsonmun Unit in Paite Nam chawndan (Pupa) documentary video bawlna April 7 leh 8, 2018 in a nei ua, zia hun a chun, Gamvak/samat dan, Lou neidan, nek leh chak buaipi dan, Pupa lam, puan-ga, busuk leh a dangdang a thaw ban un, Pupa kicheina vante, tumging leh Galvan chi chuamchuam suklatna a nei ui. Paite documentary kibawl hi bangkim sukfel ahi phat leh, India pumpi ah suadaw ahi ding ban ah, Paite chawndan tawh kisai henuam leh zillaite a ding ah khuampi pawimaw tak a hung hi ding kinepna liantak ahi. Zia gual ah Nam a ding ah thil manpha a piang theina ding ah dawisaktu leh puitu Dr. H Kamkhenthang, Imphal chung ah YPA Pearsonmun Unit kipakthu a gen hi.

Measles & Rubella vaccination bawl
Lamka, April 9 *(Nisin Thuhiltu)* CCpur district ah District Family Welfare Officer(DFWO), CCpur panlakna nuai ah khawpi sung mun chuamchuam a private leh government school ah a chiata April 3 apat Measles & Rubella vaccination bawl ah um, tuni’n Day III vaccination a bawl zawm ui. Tuni’n khawpi sung ah teldaw ah um private leh government school 17 ah measles and rubella vaccination bawl in a um a, zia munte chu- student 295 umna Excel Foundation School, Student 716 umna Vimala Raina Government High School, T Lhangjol Government JB School-30, Beersheeba Playskool-30, Way Mark Academy-20, SSPP Residential schoo-583, Easton Hall-454, VK Tawna high-985, St Peter School-527, Pathfinder School-242, SSA Residential School-95, Preparatory apat Class III student 775 omna Dawn School, Blue Star Academy-870, St Joshep School-360, AG High School-252, Children’s Training High School-682 ban ah Southern Flower School-207 ahi. A kigawm in tuni’n School 17 ah student 7023 kiang ah measles leh rubella dalna damdawi kap ding ti ahia, tuni school kailote mob-up day phat leh kap hiding ahiu. CCpur district sung ah tuni chan in nausen tha 9 apat kum 15 kikal mi 2,800 val kiang ah measles leh rubella dalna damdoi kap ah umta hi’n a kigen hi. Zing April 10 ah school 5 ah bawl hikit ding ahia, April 11 ah school 9, April 12 ah school 6 leh April 13 ah school 9 ah bawl hiding ahi. Measles and rubella vaccination Day 1(april 3) ni ah school 34 ah student 4825 umna lak ah student 350 absent ua, Day 2( April 2) a School 25 ah student 6124 lak ah student 61 absent, April 6 ni ah school khat ah student 1940 lak ah student 82 absent uh hi’n a kigen hi.

NETDA in dailênbuk (toilet) sakna nasep a tamzaw zawthiang

Lamka, April 9 *(Nisin Thuhiltu)* North East Tribal Development Agency (NETDA) in District sung mun chuamchuam ah Swatch Bharat Mission nuai a dailênbuk (toilet) sakna nasep a tamzaw zawthian ahitai. NETDA in Individual Household Latrine (IHHL) Scheme nuai ah PHED Churachandpur Division malakna ah district sung ah dailênbuk 112 bawlna ding in tukum bul apat nasep a pan ua, zia dungzui chun, Lamjang khua ah dailênbuk 11, Phaibem ah 40, Mission Compound ah 9 leh Salem Veng a 52 bawlna ding lak ah 20 bawlzaw hita in, zawthian nailo Salem Veng ah 32 a um a, a kigawm ah 80 sakzaw a hitai. Dailênbuk ahileh, a letdan feet 2 leh inch 9, a sau dan feet 3 leh kim ahia, Septic Tanky 2- feet 3 leh kim a lian, feet thum ah thuk ahi. A bâng leh kawtkhak ding ah Diana Sheet ban ah a chung ding ah lanva kimang ahia, Caste & Economic Census 2011 dungzui ah dailênbuk dawngthei dingte teldaw ah um hi’n a kigen hi. Dailênbuk sakna mun khenkhat ah tanky umlo in, lui leh guamkuak ah pipe zawldaw himaleh, Swatch Bharat Mission nuai ah nasepna pat ahi nung ah tanky kibawl pan ahia, hamphatna dawngtute gam leichang neidan tawh kituak ah bawlkhawm ah umpawl le um hi’n a kigen hi. Tukum sung a nasepna zawthian ding ti himaleh, 32 bep vat nalai ahia, hun chawmcha sung ah zawthian hiding ti’n nasemtute’n a gen ui.

Naupang khat tuthalui ah khelut ah thi
Lamka, April 9 *(Nisin Thuhiltu)* Tuithalui ah tuni’n Master Patrick Thengoulun Haokip 5 years s/o Tongkhochon Haokip of B Aijalon chu a khelut a, tuilak ah lakdaw ah a um nung ah kintak ah District Hospital tut himaleh damzo lo in a mualliam hi.

AMMOCOC in bandh (mass protest) bawl ding
Lamka, April 9 *(Nisin Thuhiltu)* State government in agricultural lands leh forest gam te venbitna ding ti a tangko zing chu All Manipur Muslim Organisation Coordinating Committee (AMMOCOC) in minority Muslims te nawdawna ding ah panlakna a hidan taklang in, lung-awilo suklatna April 10 zingkal lam dak 6:00 a kipat April 11 nitak dak 6:00 tiang’ dakkal 36 sung Manipur sung mun chuamchuam ah bandh/total shutdown (Mass Protest) chiapi ding hi’n a puang hi. Zia chu All Manipur Muslim Development Committee, Kwakta unit- 4 in support a puang a, All Lilong Farmer’s Association, Turel Ahanbi Mayai Leikai SocialWelfare and Development Association, Mairen Khul Youth Development Association (MYDA) leh Islamic Development Youth Club, Halayelabuk te’n le support a puang ui.

Martyr-te lim (statue) kisiamsak Lamka pawtung

Lamka, April 9 *(Nisin Thuhiltu)* Joint Action Committee Against Anti-Tribal Bills (JAC-AATB) in Martyr-te lim (Statue) a bawlsak uh tuni April 9, 2018 nitaklam dak 4:30 vel a Lamka puaktung ahi dungzui in, Tribal Martyrs Park, Mata Dam ah kawi in a um tai. Statue ahileh Gurgaon ah Universal India te kisiamsak a hia, statue ahileh Salphate’ mel hilo ah, a lim uh etsakna ding ah kisiam Bronze a hi. Company in kum 1,000 dai ding guarantee a piak hi’n a kigen hi. Lakh 40 val bei ah kisiam sak, March 22, 2018 ni ah Gurgaon apat Truck ah Lamka puaktung a hi. Lamka a hung tun in, Dorcas Hall mai, Tedim Road ah JAC-AATB nuai a kikhaikhawm Tribe chuamchuam a mapuitute kingakkhawm in, zia pat chun Mata Dam a Tribal Martyrs Park ding kibawlna mun puaktung ah um ahi. Tribal Martyrs Park bawlna chiazawm zel in, Salpha-te kivuina mun ah a than uh tepte’na ding in feet 44 a sau, feet 31 a lian, step 4 um a bawl hiding ahia, zia chun Salphate’ lim a kibawl statue tundawna ding (Pedestal), Feet 10 a sang, feet 28 a sau leh feet 8 a lian chung ah feet 7 a sang statue tundaw hiding ahi. Tribal Martyrs Park ahileh “Tribal Unity Day” ah tepte, August 31 ni ah hawndaw man ding ah panlak ah um hi’n a kigen hi.

District Congress in Sit-in-Protest bawl

Lamka, April 9 *(Nisin Thuhiltu)* Churachandpur District Congress Committee mapuina in tuni, April 9, 2018 zingkal dak 11:00 apat “Save Democracy – Stop Killing of Innocent Protesters” ti thupi mang in Tuibong Community Hall ah One Day Fast for Communal Harmony kiti, Sit-in-Protest a um hi. Zia hun achun, Churachandpur District Congress Committee leh Block chuamchuam leh Mahila Group a mapuitute ban ah Ex-Congress Minister leh worker hunkhawp chiakhawm in, Protest bawlna ziak leh India gamsung a BJP vaihawmna lungkimlo uh ahida’n Media mai ah genna a nei ui. Mangcha Thangjom in a gendan in, India gamsung pumpi a BJP in vaihawmna a lak apat mimal, sakhua leh nam in zalenna mansua ahida’n gen in, zia chu Congress in dawilo etsakna ding ah gamsung pumpi ah kiphina nei ah vai a sawm, Churachandpur District Congress Committee inle zathuapna ah, zia gual Sit-in-Protest nei ah um hi’n a gen hi. Mimal, sakhua leh nam in zalenna na neikit masangsia kiphinna sutzawp hiding ahi ti’n a gen hi. Dr. Chinkholal Thangsing in a gendan in, India gamsung ah kituak tak a chengkhawm leh muanna leh bitna a um theina ding ah Constitution ah zik ah umsa, humbit a hitheina ding ah Congress in gamsung pumpi ah tuni nuakna nei ahida’n a gen a, Phualpi solkal a Modi mapui vaihawmna hung kipat apat nam leh sakhua neudeu- Dalit, Tribal, Christian, Muslim ban ah Minorities leh pawl neute’n simmawna tuak in a zalenna uh henchip ah um ahida’n le gen in, “Sabka Saath, Sabka Vikas” ti ah a tangkopi uh BJP vaihawmna in zuilo ahi ti’n a gen hi. Bangtik ale um ngailo, BJP vaihawmna in kikhenna hung tut in, mitin pangkhawm ah dokhawm pawimaw ahida’n le gen in, District Congress Committee panlakna kua’n le zathuap ding in ngêkna a bawl hi. Congress Ex-Minister T. Manga Vaiphei in a gendan in, BJP vaihawmna doilo leh kuale bittak leh kituak tak ah chengkhawm ding dawina ah ann ngawl ah protest bawl ah um hi’n a gen hi. April 2, 2018 ni a Dalit te’n Bharat Bandh a bawl hun ua mi 9 val in thina a tuak ua kipat kidaidanna um ahida’n langchian in a gen a, Indian National Congress in kuale khat ahi ti a chiapi leh kepbit ahina ding ah congress in panla ding ahi ti’n a gen hi. BJP in nekgukna dodallo ahi ban ah, Constitution a Schedule 10-na a Anti-Defection Law bawtsetute chung ah BJP solkal in panlalo hi’n ngawna le a bawl hi.

‘Go to the Village’ mission ah Panchayati Raj member te’n panlakna nasatak nei ding:CM

Imphal, April 9 *(Nisin Thuhiltu)* Sangai Hall, Hotel Imphal ah tuni’n Chief Minister N. Biren Singh in National Commission for Women (NWC) nuai ah National Institute of Rural Development and Panchayati Raj (NIRD & PR), Hyderabad leh State Institute of Rural Development (SIRD), Manipur te saina’ Panchayati Raj Institution ah numei teltin ah um palai te ding in Capacity Building Programme hawnna a nei a, ama’n a thugenna a chun, State Government ‘Go to the Village’ mission ah Panchayati Raj member te’n panlakna nasatak a nei ding uh pawimaw in a gen hi. Government rural development flagship programme chuamchuam umte chung ah Capacity Building in panmun pawimaw tak nei a hidan gen in, palai ding ah numei teltin ah um te panpitu a hi ding a nawp thu a gen hi. Chief Minister in a genzawm zelna a chun, October 2017 ah Panchayat election um, numei teltin thak ah um te training programme tu ah kisiam chu a huntak ah kisiam a hi’n a gen a, election hun ah numei Pradhans 67, Ward Members 787 leh Zilla Parishad Members 26 teltin thak a hidan uh a taklang hi.

Capacity Building training - awareness etc in society ah numei te dinmun siamhawi chuam ding leh state sung ah numei te dinmun a phalam ah kisanna tuttu hiding in a gen bawk hi. State Institute of Rural Development (SIRD), Manipur in teltin ah um palai te ding ah training chiapi zing, 2017-18 financial year sung ah SIRD in training programmes 522 chiapi in le a gen hi.

Hun matna uap, RD & PR Minister Th. Biswajit in a thugenna a chun, state sung ah numei te’n lam chuamchuam ah panlakna thupi tak nei zing a hidan uh gen in, State Panchayati Raj institutions ah numei tamtak teltin thak ah a um uh chu kipak um hi’n a gen hi.

Teltin thak ah um te ziltil pawimaw a hina chung ua National Commission for Women Act, 1990 tawh kituak ah capacity building programme bawl ah um, training programme in mipi palai numei te lamdik leh a hiding gual ah nasepna a neisak ding a kinep thu a gen hi.

Chairperson of National Commission for Women, Rekha Sharma in a thugenna a chun, numei te’n lam chuamchuam ah panlakna a nei ding pawimaw a hidan sulang in, Rajasthan leh Jharkhand ah capacity building programmes chiapi a hinung ah Manipur ah chiapi ah um hin a gen hi. Zia hun matna chu NIRD & PR Deputy Director General Radhika Rastogi leh Additional Chief Secretary (RD & PR) M.H. Khan te’n le a uap ui.

Chief Minister Fast Track Court hawng

Imphal, April 9 *(Nisin Thuhiltu)* Chief Minister N. Biren Singh in tuni’n Cheirap Court complex, Imphal West District ah Special Court ND & PS (Fast Track Court) hawnna a nei hi. Zia court chu khamnathei thil- narcotic drugs leh psychotropic substances tawh kisai enzui bik ding ah kihawng a hi.
Chief Minister in a thugenna a chun, mipi dawidan tawh kituak ah Special Court for ND & PS hawn thei ah a um chu lungdam mama a hidan gen in, June 27, 2017 ah Numei chung ah huham tak ah gamtatna case tawh kisai buapi ding bik ah Fast Track Court hawn ah a la um in a gen hi. State Judiciary leh legal fraternity te kithuapina zal ah Fast Track Court kiti kihawng thei a hidan sulang kawm in, State Government’ in ‘War Against Drugs’ campaign a chiapi tawh kitawn ah state sung ah Kani lei tamtak suksiat hita hi’n a gen a, Kani lei bawl thasik ah Agar plantation chu Kani leibawl te nekhawlna sangtu/thengdawktu pansak ding ah panlakna nasatak chiatha zing in a gen hi. Imphal ah North East Development Summit (NEDS) a um hun a khah State sung ah Agar factory umsakna ding ah MoU suai kai ah um in le a gen a, North East state chuamchuam te lak ah Assam in Agar plantation panta, Jiribam ah 3 lakh Agar saplings arrange kibawl in a gen hi.

School kai chawlsan a tam tawh kitawn ah state sung ah khamthei leh thil chuamchuam ah siatna tung in le a gen a, State Government is planning in student school kai chawlsan 40,000 te special scheme nuai ah re-admit bawl ding ah lemsakna nei in a taklang hi.

Connectivity tawh kisai a genna a chun, AirAsia, Jet Airways leh Air India Imphal leh Delhi kikal ah direct flights service panta a hidan gen in, regional connectivity scheme UDAN nuai ah helicopter service umna ding ah le panlakna nasatak chiatha zing hi’n a gen hi.
Zia hunmatna chu Acting Chief Justice of High Court of Manipur, Justice N. Kotiswar Singh, Law and Legislative Affairs Minister L. Jayantakumar Singh, Advocate General N. Kumarjit Singh leh High Court of Manipur Judge Justice Kh. Nobin, State law Minister L. Jayantakumar te’n le a uap ua, Justice N. Kotiswar in legal lam thil ah State Government in kithuapina a piak zingna chung in kipakthu a gen hi.

Chief Secretary thak panlakna attendance hawi mama ta
Imphal, April 9 *(Nisin Thuhiltu)* Manipur Government nuai ah General Administrative Department (GAD) in State’s Civil Secretariat ah government employees te attendance hawina ding ah Aadhaar Enabled Biometric Attendance System (AEBAS) pawdawk ah panlakna thak a nei lawsam gual ah kilang maleh Chief Secretary thak Dr. J. Suresh Babu in office a lua tawh kitawn ah government employees te attendance dinmun etthakna nei ah attendance tawh salary payment link a bawl thak ziak in State Civil Secretariat ah government employees te attendance hawi chuam mama ah taklat in a um hi. Government thusua’n a taklat dungzui in, 9th April, 2018 ah semtu 959 um lak ah semtu 935 te kituptak ah office kai leh nasem a hina chung ua Attendance percent, 97% tungzo in a taklang a, zia chu attendance lam thil ah khantona chi khat hi’n a kigen hi.

CBI khut ah case piakdawna copy state govt kiang tung
Imphal, April 9 *(Nisin Thuhiltu)* Uttar Pradesh ah Manipur mi Pravish Chanam thina case tawh kisai khualchianna nasep a chiathak zing tawh kitawn in Uttar Pradesh Government in Pravish Chanam thina case chu Central Bureau of Investigation (CBI) khut in a pedawk hi. Uttar Pradesh Government in Pravish Chanam thina case CBI khut ah a piakdawna scan copies chu tuni’n Manipur Government kiang ah a tung hi. Hiatthei khat chu, April 6th 2018 ah Manipur Chief Secretary Dr. J. Suresh Babu in a hina kibatpi UP Chief Secretary Rajive Kumar kiang ah a vel ah hiatsakna lekha a piak nung ah zia gual panlakna thak chu um ah gen in a um a, Chief Minister N. Biren Singh in le April 3rd 2018 ah Pravish Chanam insungmite tawh Chief Minister’s secretariat ah a holim hun un, UP Chief Minister chu phone call bawl in a vaima theilam ah zia thina case chu CBI khut ah piakdaw ding leh sukven ding a nawp thu a la gen hi.