Chief Minister in Bureaucrats te interaction Programme matpi

Imphal, April 8 *(Nisin Thuhiltu)* : City Convention Centre, Imphal East ah tuni’n Chief Minister N. Biren Singh in a khatveina ding in “Interaction Programme with Bureaucrats” kiti a nei hi.
Zia hun a chun, Chief Minister in state mipi te phatchuampi thei ding ah sepkhawm ding, ngaidan leh dawidan genkhawm zing pawimaw a hidan gen in, State and Central services, officer te tawh interaction programme kisiam chu Manipur khangthu a khatna hinalai in a gen hi. Interaction programme thiltup ahileh state khantona ding leh masawn theina ding ah panlakkhawm chiat ding, khat leh khat kipanpi tua ding dawina ziak hi’n a gen a, tunung sawtlo ah state government in a chiapi ding ‘Go to the Village’ mission tawh kisai taklatna a nei hi.

‘Go to the Village’ mission chu political mileage neina ding ah chiapi kigua hizawlo ah state sung ah panpi ngai leh sawmdawl ngaite panlakpi theina ding ah chiapi kigua a hidan taklang kawm in, Chief Minister in mission thiltup thupipen chu state sung ah migenthei te panpi ding, tanggam ah um te dinmun siamhawi ding leh state economy dawpkang ding, a phalam ah state sung ah kisanna umsak ding ti dawina hi’n a gen hi. Chief Minister in ‘Go to the Village’ mission chiapina ding tawh kisai a chu government in officer te suggestions leh ngaidan pawimaw a hidan gen in, officer ideas/suggestions pehawi penpen chu award piak hiding in a puang a, bureaucratic system siamthak pawimaw in a gen hi.

Chun, department chuamchuam ah officer te chu mission lawtinna ding ah panlakna neichiat ding ah chialna bawl kawm in, State Level Committee siamdaw ah umta leh Sub- Committee leh District Level Committee le tunung sawtlo ah siamdaw hiding in a gen a, Deputy Commissioner te leh Head of Department te chu schemes leh project chuamchuam phatchuamnpi thei ding list kituptak nei ding in a hiatsak hi. ‘Go to the Village’ mission chu khua va vethak ding leh khua-mi te kimupi ding mai hizawlo ah a haksatnau leh a pawimaw teu hiatpi theina ding, a haksatnau sukven theina ding hizaw hi’n a gen hi.

Chief Minister in a genzawm zelna a chun, politics kiti hindan kitupzaw leh mipi te haksatna sukven theina ding ah chiapi ahina chung ah tu ah Manipur government in Prime Minister Narendra Modi’s vision ‘Saab ka Sath Saab ka Vikas’ kiti khantona ding ah mizosia’n panlakna a nei chiat ding ti chu hawisa zing kawm ah chiapi zing hi’n a gen hi. Society a ding ah bang tuakdaw kanei em ti ei leh ei a vel a vel ah kidawng zing kawm ah panlak ding pawimaw in le a gen a, transparency kituptak a um tak leh state sung ah kivaihawmna hawitak piang thei ding hi’n a gen hi.

“Interaction Programme with Bureaucrats” hun chu Minister, MLA, Chief Secretary, DGP, Senior Bureaucrats leh officer chuamchuam tamtak te’n a uap ua, ngaidan leh dawidan pawdawk in ‘Go to the Village’ mission chiapina ding tawh kisai a genkhawm ui.

HPC (D) cadre 103 te Sesawng village tungta

Aizawl, April 8 *(Nisin Thuhiltu)* : Mizoram government in kum 24 sung lam Hmar Peoples' Convention Democratic, HPC (D) demand bawl, Autonomous District Council sukpitin piakna ding ah 2nd April 2018 ni peace settlement chung ah suai a kaipi tawh kitawn in 12th April 2018 leh HPC (D) cadre 103 in Sesawng village, Aizawl district, Mizoram Home Guards headquarters kiangnai ah um Central Training Institute (CTI) ah galvan piakdawna nei ding a hiu. Zia chu tawh kitawn in HPC(D) cadre te’n 7th April 2018 ni a khah motorboat 7 mang in Kani Phai Peace Camp a pat in Sesawng village, Aizawl district a zuan ua, zia mun a chu ki camp phawt in, 12th April ah galvan piakdawna nei ding un a kigen hi.

Hiatthei khat chu, Mizoram government leh Hmar Peoples' Convention Democratic, HPC (D) kinawptuana dungzui ah Act of State Legislature tawh kituak ah Hmar mipi te ding ah kivaihawmna chuam, Sinlung Hills Council kiti umsak hiding, Sinlung Hills Council area ah a bik tak ah sakhua leh social thilte, Hmar Community in a chiapi, dan –leh-mual, chawndan te chung ah state government in Council thuneitu te a thuhiat zing ding, Mizoram state sung ah chamna leh muanna a um theina ding ah HPCD in huntiam sung ah a galvan uh a piakdaw ding, Mizoram Govt. in HPCD cadre te ding ah rehabilitation/exgration scheme a chiapi ding, Ministryof Home Affairs, Govt of India in rehabilitation package a piak ding, government khut ah galvan leh cadre te a ki surrendered na chung ua state government in reward a piak ding, HPCD in galvan tawh kisai thil himhim ah kuama support a bawllo ding leh supply a bawl theilo ding ti a hi. Chun, Sinlung Hills Council a ding ah Mizoram state government in a chuam ah fund a umsak ding, Sinlung Hills Council in member 14 nei ding, member 14 te lak ah 12 te direct elected member a hiding uh, member 2 ahileh Sinlung Hills Council tawh kithuhiat ah government in nominate a bawl ding a hi.

Gua-zu’n lampi lai ah ni’n tamtak tawklut

Lamka, April 8 *(Nisin Thuhiltu)* : Lamka khawpi leh a kiang tuam ah tuni nitaklam dak 3:00 vel in hun chawmcha sung gua tamtak a zu’, Tedim Road dung ah Salem Veng leh Nehru Marg-IB Road junction ah nullah sung a nîn kipai tamtak tanghawktui in lamlian lai ah tawkdawk in, nîn thanghuai tamtak lampilai ah kisepkhawm in lamlian a sumelse mama hi. Chuleh gari leh keng ah chiate a ding in lemchanlona a tut a, Lampi lai a tanghawktui in a taw’daw nînte namsia’n, khawpi sung thiantholona a sulang nasa mama hi. Khawpi sung thianthona ding in mitin in nullah leh guam te thiantho sak in a pawimaw dungzui ah umna kim-le-kiang sukthian chiat hizing leh zia gual guazuk hun ah lemchalona pianglo ding in ginchat a um hi.

“Sanggam It” kiti video album hawng
Lamka, April 8 *(Nisin Thuhiltu)* : MELC HQ Church, Zomi Colony ah tuni nitaklam dak 2:00 in ‘Sanggam It’ gospel video album hawndawna a um a, zia hun achun, Suanchinpau, MDC (Lungthul), Ginzasuan, DSo/Cpur; Suanlyan Tungnung, Social Worker; T. Zamlunmang Zou, Block Mission Manager, MSRLM, Deptt., of RD & PR, Govt. of Manipur leh Khamlianlal, Social Worker leh mi chuamchuam in a uap ui. Hunmatna ah Mangchinkhup in mapui in, Upa Thongzalam, Local Chairman in hun hawnna a nei a, Rev. Thangliankham, Director of Mission, MELC in video album hawnna leh Pathian kiang ah latna a nei hi. Lasak thiam chuamchuam te’n laa sa in, Kamkhanpau in Vote of Thanks genna a nei a, Upa Ginzakhai in pauchapna nei in hun a mangzo ui. Video album ahileh Kamkhanpau leh a sungkuante’n produce a bawl uh ahi. Pathian pakna laa hunkhawp a um hi.

Jeep tuaksia; mi 3 liam, mi 1 hospital ah admit
Lamka, April 8 *(Nisin Thuhiltu)* : Singngat Sub-Division huapsung ah um Buangmun khaw kiang ah tusûn dak 12:00 vel in Jeep khat in tuaksiat tuak in, a sung ah chung mi 4 lak ah 3 in liamna a tuak ua, zia lak achun, khat a serious deu ziak in District Hopital ah admit in a um hi. Admit a um ahileh, Ginsuanding (28) s/o V. Pumsuanthang of Zenhang Lamka ahia, a changlam malpi bul lak na’sa hi’n a kigen hi. Biakson in a hek ahia, Buangmun khua a bawlding pawimaw a nei ziak ua tuzingkal ah vachia in, Buangmun khua phakto ding kuan ah a gari uh lampi kuakna mun ah thakhat ah thi’n, a brake a mat leh fail in, ki-back in khobang bawkha’n, khobang a baw zaw ah gari kilep in, lampi dung ah 3vei a kilep nung ah a vâilam ah kichawl hi’n Biakson in a gen hi. Gari a buai phat ah a sung a chuang mi 3-te chawmtha in, Ginsuanding le a chawpthakna ah gari in hetkha hiding ah ginchak ahi. Driver in gari steering tuden loleh sautak kilep ding in a gen ui. Gari ahileh a brake a sia maleh a dang khutia a siatna umlo hi’n a kigen hi.

TPLA Defence secretary mat ah um
Imphal, April 8 *(Nisin Thuhiltu)* : Jwalamukhi Battalion in Keithalmanbi village ah a chiata 6th April 2018 ni a khah Thadou People's Liberation Army (TPLA) Defence secretary man a hidan PIB Defence Wing in thusua a bawlna a chun a taklang hi. Mat ah um TPLA Defence secretary ahileh Lalminlen Lhouvum @ Lendou, Defence Secretary TPLA, s/o Khamkholal Lhouvum, KMC village (Tujang Veng) a hi. Ama kipuandan ah kum 2015 ah TPLA zawm leh illegal extortion leh thil chuamchuam ah organization a ding ah active tak ah panla zing ti a hi. Mat ah a umna chung a chun, Police Station Sekmai ah FIR ziklut in a um a, Police Station Sekmai ah piaklut a hi bawk hi.

Manipur Volleyball team ah pang ding

Lamka, April 8 *(Nisin Thuhiltu)* : Mizoram khawpi Aizawl ah 24th- 28th April 2018 sung ah um ding 26th Mini National Volleyball Championship 2018 ah pang ding Manipur numei team player ding mi 12 teldaw in a um hi. Zia lak a chun, Nk Vahneo Baite (Sugnu) leh Nk Melody Kimboisi Vaiphei (Heiroklian) te State team player ding ah teldaw in a um hi. 26th Mini National Volleyball Championship 2018 ahileh Volleyball Federation of India (VFI) saina nuai ah um ding a hi.

ZYO), Moreh block in election nei
Lamka, April 8 *(Nisin Thuhiltu)* : Zou Youth Organization (ZYO), Moreh block in tuni’n 2018-20 sung a mapuitu ding telna (election) a nei hi. Election hun ah teltin thak ah um te ahiuleh- President ding in Pausuanlam@ Paupu, V/President ding in Pauneithang, Secretary ding in Ginlianlal @Joseph, Joint. Secy ding in Thanglunlal, Finance ding in Lalpi Zou, Treasure ding in Manglam, Information Secretary ding in Kaizou leh Arts & Culture tu ding in Paukhanlam te a telting ui.

IRB personnel khat a thisa kimudawk

Imphal, April 8 *(Nisin Thuhiltu)* : 3rd Indian Reserved Battalion ah sem Jamandar khat chu ama meithal chawi in ama leh ama a kikaplum hi. Ama chu Classic Grande Hotel, Chingmeirong, Imphal East ah Imphal pha Meghalaya Chief Minister Conrad K Sangma venbitna pia security escort personnel te lak ah khat a hi. Ama leh ama kikaplum hiding ah muanmaw jamandar chu Elangbam Ibotombi @ Shantikumar s/o (L) E. Kumar of Langmeidong , Kakching district a hia, room sung ah lupna chung ah a thisa a seppi te’n a mudawk uh, a kiang ah a meithal um in police thusuak in a gen hi. Police te’n thil umdan khualna a nei ua, himaleh suicide case hiding ah muanmaw a hi.

MR te 9mm Pistol 56 leh Magazine 58 manna tawh kisai ah mi 7 mat hita
Imphal, April 8 *(Nisin Thuhiltu)* : Manipur ah 2nd MR Battalion Arms Kote ah mang 9mm Pistol 56 leh Magazine 58 a manna tawh kisai ah mi 5 te mat ah a um nung un, zani a kha’n Kwakaithel ah mi 2 matbe in a um a, Imphal East, Chief Judicial Magistrate ah dinsak a um nung un, ni 4 sung police khut um ding in lemsakna a nei hi. Tuma mi 5 mat ah um te ahiuleh - N.P. Domodaran (59) s/o late Podiyam (Kerala), Halvidar, MR; Narayan Chhetry (44) s/o late Man Bahadur Chhetry (Nepal), Rifleman, MR; Mathurabashimayum Hiranjoy Sharma (34) s/o M. Haridas, Tera Sapam Leirak, Manipur; Paonam Shantikumar (50) s/o late P. Shamu, Kwakeithel Mayai Koibi, KCP(MC) cadre, Manipur; Ngamboi Haokip (50) s/o late Dongam Haokip, Lamboi Khunou Waroiching, KRA cadre, Manipur-te a hiu a, zia ah MR sepai mat ah um pani te chu 2nd Battalion ah Arms Kote (meithal kawina) chabi kawltu leh mawpawtu hi’n a kigen hi. Amau sia baan a chun, police-te’n April 4, 2018 in Kwakeithel, Imphal ah cheng mi 2 - H. Brojendro, 39, s/o H. Tombi leh L. Damudor, 27, s/o L. Jatra te le aman ua, tuni tiang ah zia case tawh kisai a chu Police officer 4 suspend a hi banah mi 7 mat hita a hi.

109 Bn, CRPF in raising day mang

Imphal, April 8 *(Nisin Thuhiltu)* : 109 Bn, CRPF, Monsangei in tuni’n 28th Raising Day a mang hi. 109 Bn, CRPF Unit ahileh 8th April 1991 ah Avadi, Tamil Nadu ah kiphutdawk a hia, zia nung a chu Punjab, J&K, Left Wing Extremist affected states - North-east India, terrorism dodalna leh VVIP te venbitna petu panla zing a hi’n a kigen hi. Zia hun matna chu, Vikram Sahgal, IGP, Manipur & Nagaland Sector, CRPF in Chief Guest hina tawh a uap a, unit jawans te’n cultural show zat chuamchuam sulang a sulang ui. Vinod Kumar, Commandant, 109 Bn, CRPF in a thugenna a chun, Unit in gamsung mipi te ding ah panlakna leh humanitarian activity chuamchuam chiapi zing ding a hidan uh a gen hi.

Meghalaya ah Manipur mi te haksatna sukven piak ding ah CM Biren in CM Conrad chial

Imphal, April 8 *(Nisin Thuhiltu)* : Manipur Chief Minister N Biren Singh in a hina kibatpi Meghalaya Chief Minister Conrad K Sangma chu Meghalaya ah um te Manipur mi te haksatnat etzuipi ding in chialna a bawl hi. Chief Minister N Biren Singh in Meghalaya ah um Manipur mi tamtak te’n Aadhaar cards, land records a mulo banua government schemes mulo a hidan uh gen in, Meghalaya Chief Minister Conrad Sangma chu etzuipi ding ah chialna a bawl a, Shillong ah Manipur Bhawan siamhawi thakna ding ah panlakpi ding in le a chial hi.

Moreh ah Rohingya 3 mat ah um

Imphal, April 8 *(Nisin Thuhiltu)* : Muslim Basti, Moreh Ward No.5 area ah zani, 7th April 2018 nitak dak 8.30 p.m. tuam in combined team - CDO/Moreh, CID (SB) Moreh leh Moreh PS team te’n in Dr. S. Ibomcha Singh, MPS, SP/Tengnoupal District supervise bawlna nuai in Myanmar mi Rohingyas pathum a mandawk ua, zia mi pathum te chu numei ah zuak ah sumkawl vei mi hiu ah taklat a hi. Mat ah um te chu, inn-lua ah um Ahmed Hussain (50 yrs) of Moreh Ward No. 2 (near Tamil Sangam Office); Mohd. Saifullah (34) S/o Kashim Abdul of Arakan District, Maungdaw PS, Baguna Nulafara, Myanmar tu leh tu Moreh Ward No. 5 ah um; Md. Salam (25) S/o Mujafar Ali of Arakan District, Teri PS, Butidong, Myanmar tu leh tu Moreh Ward No. 5. Ah um te a hiu a, amau sia chun Md. Ismail S/o Makakmayum Waheed Ali of Bengoon Maning Leikai, Mayang Imphal Bengoon, Imphal West tawh kithua ah Myanmar ah Rohingya numei banghem zat te India panna gam chuamchuam ah zuakdaw sek ua gen in a um a, numei khat zawkdaw ding ah kikawi hiding ah muanmaw Ms. Toiba Hatu @ Nargis (20) D/o Abu Subiyan of Maungdaw Baguna Madilia Bhara, Myanmar kiti te matdaw khawm a hi. Chun, Mohd. Saifullah a pat UNHCR (United Nations High Commissioner for Refugees) in issue a bawl Aadhaar card khat le mudaw in a um a, Moreh Police Station ah case ziklut in a um hi.

Meithal hunkhawk mudawk

Nambol, April 8 *(Nisin Thuhiltu)* : HQ IGAR (South) nuai ah 5 JAK RIF of 9 Sector Assam Rifles leh Bishnupur Police Commando te’n tuni, 8th April 2018 zingkal ah joint operation a nei hun un, Pat area, Ishok Makha Leikai, Bishnupur District in galvan kiselgu hunkhawp a mudawk ui. Mudaw ah um galvan kiselgu te chu M 16 Rifles pani, AK-56 Rifles pali leh A4 Rifle khat leh UBGL a hi.