Ni 10 nung ah kidnap ah um mi 2 te thasuak hita

Lamka, April 4 *(Nisin Thuhiltu)* : Melhiatlo pawl khat in a chiata March 25, 2018 zan dak 12:00 tuam ah Henglep Sub-Division sung, Nabil Khuman gamsung ah nasem ah um mi 2, a puimang (kidnapped) uh chu ni 10 tinni tuni, April 4, 2018 zingkal in thasuak in a um ui. Puimang ah um mi 2 te ahiuleh Lalmalsawmlian @ Sawmlian s/o Tinzagin of Lingsiphai leh Khupginlal s/o Pauneilun of Tuili Leibul te a hiu a, Henglep Sub-Division, Nabil gam ah Special Contractor, Mangbeldam nuai ah nasem, Trongloabi (Teddim Road) apat Old Nabil kikal lampi siam ah um a hiu.

Sawmlian ahileh Water Tanker leh Pokland (Excavator Machine) driver a hia, Khupginlal ahileh Bull Dozer hektu hi’n a kigen hi. Thasuak a hiu tawh kitawn in Zomi Council, Kuki Innpi Churachandpur, Civil Organization chuamchuam in kidnapped a umte vaidawnna a nei ua, District Police in le delzui in thil umdan a kanchian ui.

Kidnapped ah um mi 2 te’n a gendan un, March 25, 2018 zan dak 12:00 tuam ah galvan chawi mi 10 vel a giakna mun uh valut ah Mohori a kan nung ua mohori umlo a hidan uh a gen uh tawh kitawn ah mahajon in a sumdawt uh a piaklo ziak ah amau chu puidaw hiding a hidan uh hiatsak kawm ah a puidaw uh hi’n Sawmlian in a gen hi. Zia hun a chu amau mi pathum bep mun khat ah giak, a handyman pa ahileh a giakna mun ua a nutsia uh ti a hi. Puidaw a hiu a pat a Mobile phone uh lakpiak ah um, Chain ah khit kawm ah a puivel uh, lamlian um maleh gamlak ngawn ah a vak velpi uh ti a hi.

Sawmlian in a genna a chun, amau puidawk tute tawh ni10 sung hun a matkhawm sung ua, lo-buk ti te um himaleh gamlak, kense lak ngen ah giak uh hi’n a gen a, Ester Sunday ni ah huipi hattak in a umna kiang ua thingkung khat a mutpuk chu pataupi chiat uh a hidan gen in, a zan giakna mun ua thokang leh sahik tam mama in a gen hi. Ni 10 hun a matkhawm sung ua a kihotua lo banua, Chain ah hen hizing, hun tamzaw a mai uh kanpiak hisek, ann a piak hun ua, a nek ding tak uh leh a maituamna’u lakdaw piak ah um sek, amau maituamna a lakdaw tak uh leh a puimang tu te’n a mai uh tuamsek uh, ann a piak theilo hun uh le um sek, ziatak chuleh thiing (ginger) po nekpi mai sek un a gen hi.

Tuni, 4th April 2018, zingkal dak 2:00 vel ah amau puimang tute lak ah mi khat a vaitun tawh kitawn ah kihona saulo nei ah amau chu thasuak hiding ua hiatsak ah um un Sawmlian in a gen a, himaleh ah Mobile Phone uh leh Dozer, Tanker leh Pokland Chabi a lakpiak teu chu Mahajon pa phone ah a hiatsak hun hun ua, amau teni ma’n a va lak ding ua hiatsak un a gen hi.

Thasuak ah a um uh tawh kitawn ah a chiana ding heziang lo himaleu gamlak ah lampi lianlo khat a zuizui ua leh Kholmun khawsak ah suakdawk, zia apat chu New Bazaar tiang, New Bazar a pat Lingsiphai tiang Diesel Auto chuang to, puimang ah a um hun ua a sakhau ah Rs. 100 um chu auto chuanna mangto pek uh, ni 10 sung hentang ah um himaleu a puimang tu te’n a sakhau uh sawkpiak khalo uh ti a hi.

Hengtang ah a um hun sung ua, a hentang tu te kiko chuam ah kihona a nei tak uh leh lungthim nuamlo mama sek in Sawmlian in a gen a, thasuak ah a um hun ua, nunglam ngalo ding, zangtak ah chiatheng ding ah thupiak a hiu chu tukkhuk za mama in Khupginlal in a gen hi.

A langkhatlam ah mi 2 te kidnapped kibawlna tawh kisai a chun, District Police in Arms Act nuai in case a ziklut a, kidnapper te lak ah mi 5- Nehminlen@Joseph (26) s/o Letthung of Phoipi Village, K Mongjang; Lamkholal@Prem (36) s/o Hemlet of New Boljang; Chonminlal Manlun (37) s/o (L) Ngulmang Manlun of Songjang Village, Saikul banah Nemneilam Haokip (40) w/o Paolun Haokip, Chief of Mongkom Village leh Hatneikim Haokip (35) w/o Nehjang of Hengjang Villagemankhia te man in, court in a dinsak ua, CJM in ni 10 sung Police custody um ding in lemsakna a nei hi. Hiatthei khat chu, mi 2 te puimang ah a umna chung un, Zillai GHQ in March 30, 2018 in pawl chuamchuam te tawh kithua in District sung pumpi’n dakkal 18 sung total shutdown a la bawl hi.

SP/CCpur in kidnap ah um te hukdawna ding ah security te panlakna taklang

Lamka, April 4 *(Nisin Thuhiltu)* : Melhiatlo pawl khat in a chiata March 25, 2018 zan dak 12:00 tuam ah Henglep Sub-Division sung, Nabil Khuman gamsung ah nasem ah um mi 2 - Lalmalsawmlian @ Sawmlian s/o Tinzagin of Lingsiphai leh Khupginlal s/o Pauneilun of Tuili Leibul te thasuak ah a um tak uh tawh kitawn ah Rakesh Balwal, IPS SP Churachandpur in kidnap ah um te hukdawna ding ah District Police panlakna tawh kisai tuni, 4th March 2018 sunnung ah Press Briefing ah a taklatna a chun, kidnapped a umte chanchian hiat a hi pat District Police panlakna nei ah kanzui ngal hi’n a gen a, kidnap bawlna tawh kisai ah March 27, 2018 ni ah Moirang apat Jangkho-on (57) s/o Paokam Haokip of L. Lhangnom matdaw ah um, ama thudawtna a pat; Nehminlen @ Joseph (26) s/o Letthung of Phoipi Village, K Mongjang; Lamkholal@Prem (36) s/o Hemlet of D Vaison te District Police leh 25 Assam Rifle kithua ah mandawk kit un a gen hi. Zia nung a chu District Police leh 42 AR in panlakna sunzawm zel ah, Nemneilam Haokip (40) w/o Paolun Haokip, Mongkom Village leh Hatneikim Haokip (35) w/o Nehjang of Hengjang Village te mandawk kit uh hi’n a gen a, mat ah um te thudawtna a pat kinap bawlna puitu lianpen (mastermind) Letminlen Doungel s/o Thangboi of Puleijang, Saikul, Kangpokpi District a hidan hiatdaw ah um, 42 Assam Rifle, 25 Assam Rifle, Bishnupur Commando Police, Imphal West leh Imphal West Police Commando te kithuapina tawh Letminlen Doungel s/o Thangboi of Puleijang, Saikul, Kangpokpi District matdaw a hi banah operation bawl a hinung ah kidnap ah um te hukdaw thei ah um hi’n a gen hi.

Zillai GHQ in kidnap ah um te thadawna chung ah kipakthu gen

Lamka, April 4 *(Nisin Thuhiltu)* : Kidnap tawh kisai in Zillai General Headquarter in tuni, April 4, 2018 nitaklam dak 6:00 in VPC Complex, Bethel Veng ah Press Meet bawl in, puimang ah umte damtak ah tha’daw uh hita ahida’n mipite hiat ding in puandawna a nei ui. Zia hun achun, Symond Vaiphei, Secretary, Information & Publicity, Zillai General Headquarter in March 25, 2018 nitak apat galvanchawi pawl in a puimang uh, Lalsawmlian@Sawmlian s/o Tinzagin of Lingsiphai leh Khupginlal s/o Pauneilun of Tuili Leibul damtak a tha’daw ahitheina ding ah panla, district sung a Student Organization, Philanthropic Organization, CSO leh Mothers’ Association chuamchuam, Civil Police leh District Incharge Minister chung ah kipakthu gen in, ziagual thil hi I gam ah a hung tunkitlona ding in, mitin in panlakhawm ding in Zillai General Headquarter min in chialna a bawl hi.

Additional CS ding Letkhogin Haokip, IAS

Imphal, April 4 *(Nisin Thuhiltu)* : Ph. Bhavananda Sharma, under Secretary to the Govt. of Manipur in governor min ah thusua a bawlna a chun, Screening Committee Meeting, 3rd April, 2018 recommendation dungzui ah Letkhogin Haokip, IAS (MN:1988) chu Additional Chief Secretary ding ah guat ah um hi’n a taklang hi.

FCI Godown ah NFSA anchang hawpdaw pat hita

Lamka, April 4 *(Nisin Thuhiltu)* : FCI Godown, Headquarter veng ah CCpur District leh Pherzawl District a ding National Food Security Act (NFSA), January 2018 quota ding anchang tuni ah hawmdaw pat in a um hi. NFSA anchang, January 2018 quota ding tuni April 4 apat April 6 sung in Saikot Assembly Constituency nuai a Rationing Agent te’n la ding ahiu a, April 7 ah Thanlon Assembly constituency, April 9 ah Parbung leh Sangaikot te’n la ding ahiu. Chun, April 10 in singngat assembly, april 11 leh april 12 in Henglep Assembly Constituency nuai a rationing agent te’n a lak ding ban ua April 13 leh April 14 in Ccpur Assembly Constituency nuai a rationing agent te’n la ding ahiu. CCpur District leh Pherzawl District a ding quota hung dan ahileh, Saikot Assembly Constituency a ding in quintal sang 3,746, Parbung a ding in quintal 6, 11, CCpur Assembly Constituency a ding in quintal 2,536, Singngat Assembly Constituency a ding in quintal 2,290, Henglep Assembly Constituency a ding in quintal 1,914 ban ah Thanlon leh Mualnuam a ding in Quintal 9, 11 hung tung in, tuni apat FCS Godown, Headquarter veng ah hawmdaw pat in a um hi.

Vokbual M khua a ding Solar Home Lighting flag-off
Lamka, April 4 *(Nisin Thuhiltu)* : 60 Singngat Assembly Constituency MLA, Ginsuanhau, Chairman, MANIREDA in tuni, April 4, 2018 zingkal dak 8:00 in a chenna In, Lailam Veng ah Vokbual M khua a ding Solar Home Lighting flag-off a bawl hi. Solar Home Lighting ahileh Cygni Energy Private Limited in a bawl ahia, Singngat Sub-Division huamsung ah um ahi. Vokbual M khua a In 28 um lak ah Solar Home Lighting unit 24 kawi ahia, tunung sawtlo ah Mongjang khua a ding unit 9 leh Theigotang a ding unit 24 kawi ahi phat leh Vokbual M a ding unit 4 tawh kawibe hiding hi’n MANIREDA Chairman in a gen hi. Solar Home Lighting system ahileh Centre government leh Manipur government in electric tunglona khua cheng ah kawi ding ti ahi dungzui in, Manipur pumpi ah khua 124 lak ah Churachandpur District ah khua 34 um ti ahia, zia lak achun, Singngat leh Thanlon Sub-Division sung ah khua 2 gêl ah piak hi nailo hi’n a kigen hi. Piakdaw ah um Solar Home Lighting unit-te ahileh Jamthianlal leh Kaichungnung te’n fitting bawl ding ahiu a, hun sawtlo lut ding ahi.

Sangai Veteran Football ah pang ding Team thakdawna nei
Lamka, April 4 *(Nisin Thuhiltu)* : Veteran Sports Association of Churachandpur (VSAC) apat Team khat, Second Edition Sangai Veteran Football ah kihel ding tuni, April 4, 2018 zingkal dak 11:00 in Community Hall, Hiangtam Lamka ah thâkdaw in a um ui. Thâkdaw a hi masang un hun sawtlo mat ahia, Liana Thomte, President, VSAC in mapui in, Kammuanlal Simte, CEO, ADCC leh Manager, VSAC in Thom’s Agency in Veteran Sports Association of Churachandpur a ding ah a sponsor, Jersey hawndawna nei in, Pastor S. Thangchinlun, Local Pastor, EBCC Hiangtam Lamka in Jersey latna leh kihel ah chia dingte pauchappiakna a nei a, VSAC Manager, Kammuanlal in flag-off a bawl hi. VSAC Team-te ahiu leh President Liana Thomte mapuina in four-wheeler 5 mang ah kuandawk ahiu a, tuni nitak dak 3:30 in FC Imphal tawh kihel in, April 7, 2018 ah league match khat neikit ding a hiu. Veteran Sports Association of Churachandpur ahileh hun chiata ah Tournament chuamchuam ah kihel sek in, bangchan hem nung ah Liana Thomte, President hina nuai ah dindaw thak hi’n, Second Edition Sangai Veteran Football Tournament kichai nung leh cabinet expansion bawlthak ding uh hi’n a kigen hi.

Nghathal field ah Thabalchongba

Lamka, April 4 *(Nisin Thuhiltu)* : Zani April 3 nitak dak 8 apat in Nghathal field ah Meitei traditional folk dance Thabalchongba nei in a um hi. Thabalchong ahileh Ngahthal meira paibi leh Ngahthal Meitei Society saina nuai ah nei ahia, zia hun achun, Meitei nungak-tangval tamtak chiakhawm in, thabalchong in a lâm khawm ui.Thabalchung neitheina ding ah Ngahthal meira paibi leh Nghathal Meitei Society in a kiang tuam ah veng - Canan YPA, Ngahthal YMA ban ah DC, CCpur apat phalna a mu dungzui ua Thabalchong a nei uh ahia, zia hun achun, Saiton apat music band party-te a hung kuan ui.

Mizo Upa Pawl in Annual Meeting nei
Lamka, April 4 *(Nisin Thuhiltu)* : Mizo Upa Pawl, Manipur Headquarter in a 12-veina, Annual Meeting kiti tuni, April 4, 2018 nitak dak 1:00 in Thingkangphai YMA Hall in a nei ui. Zia hun chu, Khaipao Haokip, Chairman, ADC Churachandpur in Chief Guest hina tawh uap in, Upa H. Vankunga, Advisor in hun matna a mapui a, Lalthangpuia, President in 2017-2018 sung a member thina tuak mi 2-te sûnna hun mapui in, R. Lalmawia, General Secretary apat Report piakna a um hi. Chief Guest Khaipao in a genna in, Nemcha Kipgen, Social Welfare Minister leh Shyam Lal Poonia, IAS, DC Churachandpur tawh pangkhawm a, Government Service a pension hilo, Upa Pawlte a ding a Social Welfare Department nuai ah hamphatna umtheite ngaituapi ding ahida’n gen in, Civil Pensioner kiti um maleh, Manipur Headquarter nuai ah Mizo Upa Pawl in mani kitodel ah zia chan hi kal a suan pakchat um a sak thu a gen hi. April 4, 2006 ni ah kiphutdawk, Mizo Upa Pawl, Manipur Headquarter nuai ah pau chuamchuam mang member te’n 2018-2020 sung vaipaw ding in President Lalthangpuia, Vice President in R. Pachunga, General Secretary ding in R. Lalminmawi, Assistant Secretary di’n Thangchingpuia leh Treasurer ding ah Sumzatang teldaw in a um ui. Phu’daw ahi pat tuni chan ah kum 12 sung a member 103 in thina tuak in, tuni sûn ah um mi 2-te ahiu leh Tawnliana, Thingkangphai leh Vialngaihching, Lanva ahiu a, tulaitak in member 267 a um ui.

KNF(MC) in hilchianna bawl
Lamka, April 4 *(Nisin Thuhiltu)* : Kuki National Front- Military Council (KNF-MC) in mi 2 puimangna ah kigawl Cadre 2 tawh kisai in thupuan a bawl ui. Zia dungzui chun, KNF (MC) Cadre 2, Lamkholal@Prem s/o Hemlet of New Boljang leh Nehminlen@Joseph s/o Letthang of Phuoipi, a chiata March 25, 2018 ni ah nasem ah um mi 2; Lalsawmlian leh Khupginlal puimangna tawh kisai ah amau dawitelna ah kigawl ahida’n uh taklang in, zia tawh kisai hin pawlpi’n hiatpilo ahida’n taklat in a um hi.

Puimangna tawh kisai ah Kuki National Front-Military Council in kigawlkhakna neilo ahida’n gen in, puimang ah pangtu mi 2-te pawlpi Dan kal ahi dungzui un April 4, 2018 apat Pawlpi hina pat haisak ahida’n le a taklang hi. Zia chungchang hi KNF (MC) in kansui ah, mi 2-te chung ah khautak ah thutankhum hiding hi’n le taklang in, puimangtute’n a hina uh leh pawl min kipuangdawk ding leh maban ah zia gual thil ah kuama kigawllo ding ah dawtna a bawl ban un, Kuki National Front-Military Council in government panpi leh kithuapi ding ah kimansa zing uh a hida’n taklat in a um hi.

New Lamka College Road siam hizing

Lamka, April 4 *(Nisin Thuhiltu)* : Khawpi sung a lampi kikawm tuana mun chuamchuam bawlna chiazawm zel in, New Lamka khawsung a kikawm tuana pawimaw mama College Road bawlna chiazawm zel in, tuni black topping bawl in a um hi. Khawpi sung a lampi ahileh, V Hangkhanlian, Minister, Agriculture, Veterinary and Animal Husbandry panlakna nuai a khawpi sung ah National Highway 2, Tedim Road leh Tipaimukh Road ban ah veng chuamchuam lampi bawlna chiazawm zel in, Dorcas Road bawlzaw ahi nung in, tuni’n Tedim Road-College Road Junction a pat Power House, Khominthang kikal kilometer khat-le-kim lampi bawlna a chiata February tha ah lamlian ah suanghum leh leisan sungpat ahia, tuni April 04,2018 in Tedim Road apat LV Lane chan AIkatara/Bitumen ah zûtmâm in a um tai. Zia lampi ahileh Manipur State fund nuai 3 Other District Road ODR ah H. Thangzamuan Special Contractor hina nuai kisiam a hi.

LPG Safety Clinic cum PMUY Awareness program nei

Lamka, April 4 *(Nisin Thuhiltu)* : M/S Songtal Indane Gramin Vitrak in tuni sunma dak 11 apat in Simte Inn Simveng ah LPG Safety Clinic cum PMUY Awareness program nei ui. Zia hun chu Thangkhosuanmung Guite, MDC Chief of Hiangtam Lamka, M Gouzamang, MDC, Zamchinthang, MDC leh Langkhanpau Guite, MDC te’n khuallian hina tawh a uap ui. PMUY beneficiary leh Songtal Indane Gramin Vitrak in a huam khak sung ah khua hausa pathum te le zia hun chu a uap ua, Michael L Chinzasuan, Assistant Manager, M/S Songtal Indane mapuina tawh Chingngaihvung Guite, Proprietor, M/S Songtal Indane in thugenna nei in, LPG Safety Clinic cum PMUY Awareness program kineina ziak a taklang hi. Chun, khuallian hina tawh hun matna uaptu te’n thugenna hun a nei ui.
M/S Songtal Indane ahileh February, 2016 ah umpan a hia, tuni tiang ah Customer 300 umta, PMUY beneficiary mi 1500 in min a khumlutna lak ah beneficiary mi 1200 val kiang ah Free LPG Connection hawpdaw hita ti a hi. M/S Songtal Indane Gramin Vitrak in tuni ah LPG Safety Clinic cum PMUY Awareness program a nei chu a 4 veina hita in a kigen a, Awareness program sung in LPG Connection card, gas stove, lighter, regulator, gas pipe leh cylinder khat chiat beneficiary 120 kiang ah piakdaw in a um hi.

Punjab, Jalandhar ah 3rd edition, Northeast Fiesta kimang ding

Jalandhar (Punjab), Apr. 04 *(Nisin Thuhiltu)* : Punjab ah Northeast Student's Organization in Viva Collage Mall tawh kithua7th - 8th April 2018 sung ah Jalandhar city, Punjab ah third edition Northeast Fiesta 2018 mang ding a hi. Zia hun a chu northeast ah cultural hausakna leh Punjabi culture suklat hiding a hi. Hun mat sung ah cultural folk dances, folk songs leh nam chuamchuam chawndan te suklat ah um ding a hi.

HPC-D cadre te’n April 12 leh galvan piakdawna nei ding
Aizawl, April 4 *(Nisin Thuhiltu)* : Militants of Manipur-based HPC(D) in Mizoram Government tawh kinawptuana suai a kai tawh kitawn ah April 12, 2018 ah a galvan/meithal neite Mizoram government khut ah a piaklut ding hi’n Mizoram senior state home department official khat in a gen hi. Additional Secretary for Home Lalbiakzama in a genna a chun, Hmar People’s Convenction (Democratic) cadre 103 in Sesawng village, Aizawl district, ah Mizoram Home Guards headquarters kiangnai Central Training Institute (CTI) ah programme mat hiding zia hun a chu galvan piakdawna um ding hi’n a gen a, HPC(D) cadre te’n galvan piakdawna a neizaw tak uh leh Mizoram Government in cadre te relief leh rehabilitation/ex-gratia ngaitua piak ding hi’n a gen hi. Hiatthei khat chu, HPCD in Sinlung Hills Council (SHC) demand a la bawl zing sukpitinna ding in Seppatni a khan Mizoram Government leh HPC (D) in kinawptuana suai a kai a hi.

Forged Cheque Drawal Authority case ah FIR kibawl: Min. Biswajit

Imphal, April 4 *(Nisin Thuhiltu)* : Public Works Department in forged Cheque Drawal Authority tawh kisai ah FIR ziklut a hidan, Works Minister Thongam Biswajit Singh in New Secretariat office ah ama conference hall in thuthak lakhawm mite kiang in a gen hi. Government spokesperson le hi, Minister Biswajit in forged Cheque Drawal Authority tawh kisai ah Chief Minister in a panmun a nutsia ding phutna neisang ah Chief Minister mapuina nuai ah tu ah state government panlakna um te chu pakchat zawk ding hi’n a gen hi.
Chief Minister Nongthombam Biren Singh leader hina nuai ah department leh government in gawlgukna leh nekgukna kiti a umlo ding a dawi ziak ah forged Cheque Drawal Authority tawh kisai ah muanmaw matdaw thei ah um, thil umdan khual hizing in a gen hi. Chuleh, forged CDA letters mang ah government funds bank a pat withdraw bawlgua a umna chung a PWD leh Finance department in a chuam gel ah FIR bawl in a gen a, opposition party Congress in nekgukna (corruption) a dodal zo lo ziak ah Chief Minister Nongthombam Biren Singh in a panmun a nutsia pawimaw ah a gen chu mipi te a diklo lam kawkmuna hizaw ding in le a gen hi.
Zia press conference chu Principal Secretary MH Khan, Chief Engineer Kh.Temba leh department officials chuamchuam te’n le a uap ui.

Mipi’n educational institution te venbit pawimaw: Education Minister

Imphal, April 4 *(Nisin Thuhiltu)* : Education Minister Thockchom Radheshyam in tuni’n Presidency College, Motbung etthakna a nei a, college ah semtu te college dinmun tawh kisai in a holimpi hi. Education Minister in a thugenna a chun, educational institutions infrastructure te mipi te’n venbit ding leh kituptak ah etkawl ding pawimaw a hidan gen in, colleges leh schools properties te chu public property, gamsung mizosia a neitu vek, a bik tak ah student fraternity te ding ah thiamna muna mun hi’n a gen hi. Educational institutions in society ah panmun pawimaw tak nei a hina chung ah thiamna leh hiatthiamna kiti buaina zosia suvengtu a hina chung ah thiamna leh hiatthiamna pianna mun educational institutions te chu society ah buaina chuamchuam um te suvengtu hizing in a gen hi. College ah semtu te tawh holimna a neizaw in Minister Th. Radhehsyam in RUSA scheme nuai ah kisiam thak college library, girl’s common room leh computer laboratory dinmun etthakna a nei a, faculty leh a kisaipi contractor te chu quality neitak ah construction work chiapi ding leh a pawimaw dungzui ah Engineering Wing of Education thuhiat ah panla ding in thuhilna a bawl hi.
A langkhatlam incollege teacher te’n student te ding ah theitawpsua panlakna a neina chung un, a lungdam thu a taklang hi. Minister Th. Radheshyam ahileh Motbung, Kangpokpi District ah Board of Secondary Education, Manipur nuai ah Educational Training School (ETS) hithei ding ah recognition muthak lawpna uap a hia, ETS Founder Sk Lunkam, village authorities, teachers, student, locals leh civil organization te’n hun matna a uap ui.

Manipur Congress in moral ground ah CM ki resign ding phutna nei
Imphal, April 4 *(Nisin Thuhiltu)* : MPCC- Manipur Pradesh Congress Committee in Manipur CM, N. Biren Singh chu state sung ah corruption dodalna kituptak nei lo ah ngawna siam in moral grounds ah Chief Minister panmun a nutsia ding pawimaw in a gen hi. MPCC spokesperson Hareshwar Goswami in BJP government anti-corruption campaign chu nuizat umsa a hidan gen in, works department nuai ah forged cheque drawal authority (CDA) mang ah diklo tak ah a crore a sim sum lakdaw ah um, financial year 2017-18 khak ding kuan ah ziagual nasep thil bawl chu piang in a gen hi.

MPCC spokesperson Hareshwar Goswami in a genzawm zelna a chun, BJP’s anti-corruption campaign in umzia neilo, gawlgukna leh nekgukna um te mitthum gual ah kimulo sak sek ah ngawna siam in, diklo tak ah sum lakdaw thei ah a umna ziak chu government kituplo ziak hipen in a gen hi.

Loktak cleaning scam tawh kisai ah Vigilance deptt. in CM lui Ibobi thudawtna nei
Imphal, April 4 *(Nisin Thuhiltu)* : State vigilance department in Rs 244-crore Loktak Lake cleaning scam tawh kisai khualna pan in, chief minister lui Okram Ibobi Singh thudawtna a nei hi. Hiatthei khat chu, a chiata ni 10 masang a khan Vigilance and Anti-Corruption Department in Okram Ibobi leh Loktak Development Authority (LDA) project directors lui - Ch Gojendro Singh leh Th Ibobi Singh te chung in FIR a filed a, Loktak sukthianna ding fund diklo tak ah nemang ah ngawna siamkhum a hiiu.
Loktak Lake cleaning scam tawh kisai khualna nei Vigilance and Anti-Corruption team in Seppatni a khah chief minister lui Okram Ibobi Singh leh Loktak Development Authority (LDA) project directors lui - Ch Gojendro Singh leh Th Ibobi Singh te chu thudawtna a nei hin a kigen a, tha 14 sung (August, 2008 - October, 2009) ah Loktak sukthianna ding ah Manipur Development Society (MDS)a pat Rs 180 crore kila dawk a tunna hiatlo ah um chu khual hipi pen in a kigen hi. Manipur ah chief minister lui Okram Ibobi Singh mapui Congress rule hun ah loktak sukthianna ding project a kisiamna chung ah K Pro Infra Works Private Limited, Delhi-based firm chu nasem ding ah mawpuakna piak ah a la um le a hi.