NARPS nuai ah traning chuamchuam zothiang

Lamka, April 3 *(Nisin Thuhiltu)* : Natural Agro-Tech Research & Processing Service (NARPS)/LBI in March 5, 2018 a kipat Indo-Global Social Service Society (IGSSS) leh Quest Alliance sponsored bawlna nuai in DIC Complex, CCpur in ni 16 sung 'Mushroom & Spice Processing' training a nei uh chu a zo thiang ua, zialo a chun, Carpentry leh Mushroom Trainee-te’n le tuni'n training zo thiang in, LBI/DIC ah felicitation programme a mang bawk ui. Felicitation programme chu Symond Lalpiak, Co-ordinator (Admin), LBI/NARPS in amapui a, L. Jangkhongam, Incharge Carpentry Unit in pauchapna tawh hun hawnna nei in, Joma Neihsial, Programme Manager, LBI/NARPS in vaidawn thugenna a nei a, A. Sadananda, CEO/LBI & General Manager, DIC in training-te kiang ah certificate piakdawna leh tilkhona a nei hi.

Hun mat sung in, IGSSS, RAS leh LBI/NARPS a pat member te'n le thugenna a nei ui. Mushroom & Spice Processing training a chun mun chuamchuam a pat mi 20 a pang ua, training sung in PS Kaplian, NARPS, Mushroom Instructor in ni 16 sung pache siamdan ziltil in, Ushanam, Field Officer, Spice Board of India leh Hussain Choudhury, Spices Instructor, NARPS/LBI te'n ni 10 sung spice processing tawh kisai in ziltilna a nei ui. NARPS in Rural Aid Service (RAS) huhna in Jan. 22 a pat March 22, 2018 tiang a khan tha 2 sung Carpentry Training a pia, IGSSS kithuapina tawh Feb. 2018 a ki pat March 6, 2018 tiang tha 1 sung in mi 20 te carpentry training le a la bawl hi.

Mi 2 kidnap bawlna’ kigawl ding ah muanmaw mi 5 police in man
Lamka, April 3 *(Nisin Thuhiltu)* : A chiata March 25, 2018 ni ah Henglep Sub-Division huapsung ah um Nabil Khuman gam sung ah Special Contractor M. Dama Vaiphei nasemtu, Pokland leh Water Tanker driver 2 - Nausawmlian (17) s/o Tinzagin of Lingsiphai leh Khuplal (20) s/o Pauneilal of Tuilileibul te puimang ah a umna chung ua, FIR no. 1(3)2018 Henglep-PS u/s 400/364-A/34 IPC & 25(1-C) Arms Act pansa Police te’n mi puimang tute hawlna a nei zing tawh kitawn in, zani 2nd April 2018 in mipuina kigawl ding ah muanmaw mi 5 mat in a um ui. Mat ah um mi 5 te chu Nehminlen @ Joseph (26) s/o Letthong of Phoipi Village tu leh tu K Mongjang, CCpur ah um; Lamkholal @ Prem (36) s/o Hemlet of D Vaison tu leh tu New Boljang CCpur a um; Chonminlal Manlun (37) s/o (L) Ngulmang Manlun of Songjang Village, Saikul banah Nemneilam Haokip (40) w/o Paolun Haokip, Chief of Mongkom Village, Ccpur leh Hatneikim Haokip (35) w/o Nehjang of Hengjang Village, Ccpur te a hiu a, Court ah dinsak a hinung un, CJM in ni 10 sung Police custody um ding in lemsakna a nei hi. Hiatthei khat chu, mi 2 puimangna chung in, pawl chuamchuam te support bawlna’n a chiata 31st March 2018 ni a khan Churachandpur District pumpi huap in dakkal 18 sung total shutdown a bawl hi. Mi 2 te ahiuleh Rs 20 lakhs demand piak hun ah thasuak ding ah ki hentang a hi.

ZSF in Zillai GHQ chung ah FIR kibawl hethiamlo hi ah taklang
Lamka, April 3 *(Nisin Thuhiltu)* : Zomi Students' Federation (ZSF), GHQ, Information & Publicity in tuni thusua a bawlna a chun, district police in a federation unit lak ah pang Zillai General Headquarters chung ah suo-moto case la, FIR a bawlkhum chu hethiamlo in a taklang hi. Thusua in a taklat dungzui in, March 31, 2018 ah Zillai GHQ in total shutdown a bawl, district administration in le hethiam ah, shutdown kibawlna ziak district sung ah diklo tak ah gamtatna dawilo suklatna a hina chung ah organization chuamchuam tamtak in le support puang a hidan uh taklang kawm in, Zillai GHQ chung ah suo-moto case bulkhum ah um chu diksalo in a gen hi. Zia chu tawh kitawn ah police in a kintheilam ah suo-moto case a lakdaw ding in phutna a bawl hi. Thil umdan a hileh March 25, 2018 ni ah Henglep Sub-Division, Nabil Khuman gam a special contractor M. Dama Vaiphei nasem truck driver Lalmalsawmlian s/o Tinzagin of Lingsiphai leh pokland driver Khupginlal s/o Pauneilun of Tuili Leibul te sum ah tatdaw ding ah a puimang uh tuni tiang ah tatdaw theilo ah um zing a hiu. Zia tawh kisai a chun, Zillai GHQ in March 28, 2018 in demna thusua leh mi 2 te hukdawna ding ah government chu dakkal 24 sung huntiam a piak a hia, himaleh huntiang sung ah panlakna um ah hiatsakna a mulo tawh kitawn ah March 31 zankim a pat dakkal 18 sung CCpur district pumpi ah total shutdown bawl a hia, Zillai GHQ in total shutdown a bawlna chung a chu Churachandpur khangthu amasapen ding ah Churachandpur Police in April 1, 2018 ni ah suo moto case la, Zillai GHQ chung ah dan tawh kituaklo ah kipunkhawm, mipi so san sak, criminal intimidation leh mipi chiana khaktan ti pansa case a zikltut, FIR No. 28(03)2018 CCP-PS u/s 143/147/149/506/283/34 IPC ah case tepte ah um a hi.

Zia mi 2 kipuimangna chung a hi’n Young Paite Assn., GHQ; Siamsinpawlpi GHQ; Khangtah Zuun Pawl, GHQ; Zou Sangnaupang Pawlpi, GHQ; Mate Student Organisation, GHQ; Thangkhal Sinlai Pawlpi, GHQ; Zomi Students’ Federation, GHQ; Thangting Area Chief Association Part- I; Joint Phillanthrophic Organisation; Hmar Students’ Assn., GHQ; Kuki Students’ Organisation, CCpur leh Thadou Kuki Student Union, GHQ in demna thusua bawl in puimang ah um te damtak ah thasuak ding in phutna a la bawl ui.

Malaria vei mudaw thak neilo
Lamka, April 3 *(Nisin Thuhiltu)* : Malaria Department, Ccpur in March 2018 tha sung ah Malarai vei hiding ah muanmaw damlo mi 880 te thisan test a bawlna, Positive mudaw thak neilo a hidan Malaria Department, Ccpur in SMO, Regional Health & Family Welfare, Imphal leh Director, Health Services, Government of Manipur ah report a piakna a chun a taklang hi. Report dungzui ah March 1-15 sung in malaria vei hiding ah muanmaw mi 304 thisan test bawl in a um a, March 16- 31, 2018 sung ah mi 576 te thisan test bawl maleu positive umlo ti a hi. January thasung in ahileh damlo mi 494 thisan test bawlna mi 1 positive a um a, February 2018 ah mi 722 thisan test a bawl hun un mi 1 positive in a mudawk hi.

Uicha damdawi kap

Lamka, April 3 *(Nisin Thuhiltu)* : Ui-nawl in mi a pelona ding in tuni’n Hiangtam Lamka Community Hall, Hiangtam Lamka ah, Lamka Dog Lovers leh Veterinary department kithua in Ui tamtak damdawi kap in a um hi. Damdawi kapna chu sunma dak 11:00 in a kipan a, nitaklam dak 3 tiang ah Uicha a kigawm ah 200 val kap a hi. Ui damdawi kikap zo sa te chu certificate piak in a um a, tulak cheng ah Uicha damdawi kikap 900 valta ti a hi. Ui a ngawllona ding ah damdawi kikap chu ‘Raksharab’ kiti a hia, Ui damdawi kikap chu tha 3 ah upa ahileh dose 1vei kap ding, tha 6 setthei, tha 6 zaw takleh kum 1 zel ah kap thei kit ding a hi. Zia damdawi kikap chu side effect umlo, a sa nekna le mihing a ding ah lauthawn ding bangma umlo ti a hi.

Anchang kihawm paita ding; Identity Card chawi chiat ngai ding
Lamka, April 3 *(Nisin Thuhiltu)* : National Food Security Act. (NFSA) nuai ah thasin leh anchang hawpdaw hisek chu bandh & strike a umlo nak leh April 4-14, 2018 sung ah hawpdaw hiding a hi tawh kitawn ah, agent-te lak a Release Order (OR) lading te’n Identity Card chawi chiat ding in, M.Ginzasuan, Dist. Supply Officer (DSO), CCpur & Pherzawl Dist. in hiatsakna a bawl hi. NSF anchang tu tha April 2018 a ding chu Saikot AC/Sub-Division a Rationing Agent te’n April 3,2018 ah RO la ding a hiu a, April 4-6, 2018 sung ah HQ Veng ah FCS Godown ah anchang ladawk ding a hiu. Thanlon AC/Sub-Divisionah Rationing Agent te’n April 6, 2018 ah RO ladawk ding, April 7,2018 in anchang ladawk ding a hiu. Parbung & Sangaikot AC/Sub-Division ah Rationing Agent te’n April 7, 2018 in RO la ding, April 9, 2018 ah anchang ladawk ding a hiu. Singngat AC/Sub-Division ah Rationing Agent te’n April 9, 2018 ah RO ladawk ding, April 10, 2018 ah anchang ladawk ding a hiu. Henglep AC/Sub-Division ah Rationing Agent te’n April 10, 2018 ah RO ladawk ding, April 11 & 12, 2018 in anchang ladawk ding, CCpur AC/Sub-Division a Rationing Agent te’n April 12, 2018 ah RO ladawk ding, April 13 &14, 2018 ah HQ Veng ah um FCS Godown ah a pat achang pawdawk thei ding a hidan ub M.Ginzasuan, Dist. Supply Officer CCpur & Pherzawl District in hiatsakna a bawl hi.

JNV Academic Session 2018-19 a ding ah entrance test um ding
Lamka, April 3 *(Nisin Thuhiltu)* : Jawahar Navodaya Vidyalaya (JNV)/Tuinom ah Academic Session 2018-19 ah Class-VI simding lakna ding in April 21, 2018 ah Block 6 ah entrance test um ding a hi. Zia hun a chu exam ah pang ding CCpur disrict a pat in candidate 2151 a um hi. CCpur block a pat candidate 577 te’n Phungkhothang Govt. High School, Hiangtam Lamka ah entrance test bawl ding a hiu a, Henglep block-te’n centre 2 - Vumhao Govt High School, Tuilaphai ah candidate 115 leh Kangvai Hr Sec.School ah candidate 149 te’n entrance test bawl ding a hiu. Singngat block a pat candidate 106 te’n Singngat Govt High School ah entrance test bawl ding a hiu a, Thanlon block a pat candidate 171 te’n Bukpi Govt High School ah entrance test bawl ding a hiu. Tipaimukh block a pat candidate 178 te’n Pherzawl Govt High School ah entrance test bawl ding a hiu a, Samulamlan block a pat candidate 279 te’n INA Memorial High School ah entrance test bawl ding a hiu.

Phunchongjang ah Free Medical Camp-cum-Academic Campaign
Lamka, April 3 *(Nisin Thuhiltu)* : Zillai (Vaiphei Students’ Association), General Headquarters leh Manipur Students' Federation (MSF) in April 3-4, 2018 sung ah Thanlon A/C huapsung ah um Phunchongjang khua ah Free Medical Camp-cum- Academic Campaign nei ding chu tuni’n a kipan a, Doctor 4 te’n Nurse 3 leh Pharmacist 3 te kithuapina tawh damlo te a en ui.
Free Medical Camp-cum- Academic Campaign bawl ding doctor leh Zillai leader te chu Lamka nusia ah zani 2nd April 2018 ah Phunchongjang zuan a hiu a, Rev. Harry Muanlal, Executive Director, EOC in pauchapna tawh Pathian khut ah kawlsakna nei in, Khatkhotong Baite, President, VPC GHQ in flag-off bawlna a la nei hi. Medical camp bawl ding ah chi ate chu Milen, President, MSF leh Hauminthang Vaiphei, President, Zillai GHQ te’n amapui ua, Ambulance panna Gari 6 mang in Phunchongjang khua a la zuan ui.

EMP founder Rev. Thongjathang Baite mualliam

B. Phaicham, April 3 *(Nisin Thuhiltu)* : Eastern Manipur Presbyterian (EMP) founder leh Manipur ah Pathian thu tangko te lak ah mi masa lawi ah kihia, Rev. Thongjathang Baite of B. Phaicham chu damlona ziak in 2nd April 2018 nitak lam dak 4:30 tuam in a mualliam a, tuni, 3rd April 2018 ah Rev. Yampao Vaiphei, Moderator EMP mapuina’n Rev. Yangkhongam Baite Executive Secretary EMP in B Phaicham thanmual in a vuiliam hi.
Rev Thongjathang Baite ahileh 1930 ah piang, 10th Jan. 1955 ah a zi Ngaipi tawh kochuam dan ah a la kicheng a hiu a, 1965-1973 ah Manipur ah Presbyterian kochuam ah voluntary Evangelist ah a sep nung ah 16th October 1974 ah L. Chingphei khua’n Evangelical Manipur Baptist Association (EMBA) tu ah Eastern Manipur Presbyterian (EMP) kiti chu a la phutdawk hi. EMBA ah Evangelist hina tawh sem in, 26th October 1975 in Sokom Annual Session ah Pastor ordained a chang a, 27th January 1984 in Movom General Assembyl ah Superintendent Pastor in a kaisang a, 1991 in Pastor hina a pat in a pension hi.

One Day Legal Awareness Campaign
Lamka, April 3 *(Nisin Thuhiltu)* : District Legal Services Authority (DLSA) kithuapina’n tuni’n Hope Cheritable Trust in Sim Veng, Simte Inn in One Day Legal Awareness Campaign a bawl a, zia hun a chum un chuamchuam a pat mitamtak a chiakhawm ui. Kim Mary in hun matna amapui a, Chingkhokim in pauchapna tawh Legal Awareness Campaign hawng in, M. Vumlianmang, Advocate; Chinglun, Advocate leh Liankhoman, Doracas Co-ordinator, EBCC te'n hiat ding ah pawimaw thil chuamchuam gen latna nei in, Mary Tombing, Chairperson, HCT in kipakthu genna tawh hun khakna a nei hi.

Mizoram government leh HPC (D) in kinawptuana suai kai
Aizawl, April 3 *(Nisin Thuhiltu)* : Mizoram government in kum 24 sung lam Hmar Peoples' Convention Democratic, HPC (D) demand bawl, Autonomous District Council sukpitin piak in, 2nd April 2018 in peace settlement chung in suai a kaipi hi. Zia kinawptuana suai chu Mizoram State Guest House, Aizawl ah kai in a um a, H. Zosangbera Chairman, Hmar Peoples' Convention Democratic leh Arvind Ray, Chief Secretary Government of Mizoram te’n a lang a lang in palai hina tawh suai a kai ui.

Memorandum of Settlement dungzui ah Act of State Legislature tawh kituak ah Hmar mipi te ding ah kivaihawmna chuam, Sinlung Hills Council kiti umsak ding, Sinlung Hills Council area ah a bik tak ah sakhua leh social thilte, Hmar Community in a chiapi dan leh mual, chawndan te chung ah ah state government in Council thuneitu te a thuhiat zing ding, Mizoram state sung ah chamna leh muanna a um theina ding ah HPCD in huntiam sung ah a galvan uh a piakdaw ding uh leh HPCD cadre zosia'n hindan ngaina hinkhua a mat tak ding uh, Mizoram Government in cadre te ding ah rehabilitation/ exgration scheme a chiapi ding leh Ministryof Home Affairs, Govt of India in rehabilitation package a piak ding, government khut ah galvan leh cadre te a ki surrendered na chung ua state government in reward a piak ding, HPCD in galvan tawh kisai thil himhim ah kuama support a bawllo ding leh supply a bawl theilo ding ti a hi.

Sinlung Hills Council a ding ah state government in a chuam ah fund a umsak ding, Sinlung Hills Council nuai a chu member 14 um ding, member 14 te lak ah 12 chu direct elected member a hiding, member 2 chu Sinlung Hills Council tawh kithuhiat ah government in nominate a bawl ding a hi.

Sinlung Hills Council nuai a chu Cheif M\Executuive member khat a um ding, Chairman khat, Deputy Chairman khat leh Executve member 4 a um ding, member 5 leh nominated member 2 a um ding ti a hi. Council s constitution leh composition chu Act of Legislature tawh kituak ah um ding in a lang a lang in kinawptuana a nei ua, Government in Official Gazette, ah Sakawrdal leh mun chuamchuam Council Area huapsung ah um te chu Council nuai ah um ding ah a puandaw ding, Sinlung Hills Council Secretariat ahileh council headquarters ah a um ding, Chief Executive Member te thuhiat ah Government of Mizoram in Secretary khat posting a piak ding a hi.

Sinlung Hills Council thuneina ahileh Council in pawimaw ah a hiat te zil ah policy leh plan a siam ding, proposed plan a neite approval ding ah State Government kiang ah a piaklut ding a chuam ah incentive fund a chuam ah a um sak ding, State Plan, CSS leh Central Assistance um te Council in a etkawl ding, developmental projects leh schemes te a etzui ding, budget a chuam ah a neithei ding ti te ah hi.

Hiatthei khat chu HPCD in demand nei ah meithal pan ah government chung helna a pat tawh kitawn ah HPC leh Mizoram government in 1994 ah peace treaty chung ah suai a la kai, tu ah sukpitin hipan a hi.

CBI khut ah Pravish Chanam case piakdaw hita: CM

Imphal, April 3 *(Nisin Thuhiltu)* : Uttar Pradesh ah a kithat hiding ah muanmaw famta Pravish Chanam thina chung ah a insungmite leh JAC in CBI khut ah case piaklut ding ah phutna anei zing uh tawh kitawn in Chief Minister N. Biren Singh panlakna ziak in Uttar Pradesh government in CBI khut in a pedawk hi. Pravish Chanam thina case CBI khut ah piakdaw ah a um thu chu famta Pravish Chanam ingsung mite, JAC executives, Meira Paibee leaders leh Human Rights Alert Executive Director Babloo Loitongbam in tuni Chief Minister N. Biren Singh a kimupi hun ua Chief Minister in a hiatsak a hi. Pravish insung mite leh JAC in Chief Minister chu mimal tak ah Uttar Pradesh Chief Minister, Yogi Adityanath kihopi ding leh CBI khut ah Pravish Chanam case pedawk ding ah chialna bawl ding ah a phut dungzui ua, Chief Minister N. Biren Singh in Uttar Pradesh Chief Minister, Yogi Adityanath a kihopina date 27.09.2017 ah CBI khut ah case piaklut hita ti a hi.

A langkhatlam ah Chief Minister N. Biren Singh in state pawlam ah um student te bitna ding ah panlakna nei zing ding a hidan gen in, NE mite state dang ah a bit theina ding ua Union Home Ministry thuhiat ding hi’n a gen hi.
Hiatthei khat chu Chief Minister N. Biren Singh in UP Chief Minister chu December 15, 2017 a khah Pravish Chanam case tawh kisai Uttar Pradesh Chief Minister, Yogi Adityanath chu a vaima theilam ah sukven a hitheina ding ah panla ding in chialna a la bawl hi.

Works Minister in Shirui Festival matna ding mun entha

Imphal, April 3 *(Nisin Thuhiltu)* : Manipur Works Minister Thongam Biswajit Singh in tuni’n khuallian hina tawh Somdal Village, Ukhrul District in Luita Phanit Celebration a uap hi. State Government spokesperson le hi, Minister Thongam Biswajit Singh in a genna a chun, Govt in chamna leh muanna ngaikhawk mama a hidan gen in, zia a pat khangthak te ding ah lamchang a ki belap theina ding ah panlakna nei zing in a gen hi. ‘Go to the Hills’ chiapi ah um chu hills leh valley mi te kal ah kihiatthiamna a um theina ding ti a hidan taklang in, lampi a bik tak ah Tolloi Junction - Somdal Road, Shiroi Ring Road leh Ngaimu Junction - Tuinem Road te chu a vaima theipen ah quality neitak ah siam hawi hidng in a gen hi.
Hun matna kichai in, Minister in Shiroi Hills, Ukhrul ah Shirui Festival matna ding mun etthakna a nei hi. April 24-26 Shiroi Festival 2018 ah Shirui Festival kituptak ah mat a hitheina ding ah kisingsakna entha hi’n a gen hi.