VPC Community Hall sakna ding ah sum donate bawl

Lamka, Nov. 15 *(Nisin Thuhiltu)* : Vaiphei Peoples Council (VPC) Community Hall Construction Committee Chairman Mr Henlianthang Thanglet leh VPC GHQ ah President Mr Khatkhotong Baite mapuina’n tuni’n Imphal Area ah VPC Community Hall sakna ding tawh kisai fund drive bawlna a nei ua, zia hun a chun, Dr Lamkhogen Vaiphei in Community Hall sakna ding in Rs 1,00,000 (Lakh khat), Ex- Minister T Manga Vaiphei in, Rs 1,10,000 (Lakh khat leh Sing-khat) leh Mr Tinliankham AE. PHED in Rs 50,000 (Sing-nga) donate a bawl ui. Tunai a khan, Kaikhokam & family in Rs 50,000 (Sing-nga) donate a la bawl ua, Justice T Vaiphei, Chief Justice, Tripura High Court in tiles leh electric fitting bawlna sum bei ding zat pawdawk ding ah thutiam bawl in, Lt. Col. Dr Seiminlian Vaiphei in ceilling fan a pawimaw ding zat tuak ding in thutiam a la bawl hi. Zia ah min kizik khalo tuthak ah VPC Community Hall sakna ding ah mi-kiphal banh hem zat in, sum donate bawl un le a kigen hi.

Flagship Scheme tawh kisai ah Special Outreach Programme nei

Lamka, Nov. 15 *(Nisin Thuhiltu)* : Directorate of Field Publicity, Ministry of Information & Broadcasting, Regional leh Manipur Regional Office saina’ tuni, November 15, 2017 zingkal dak 8:00 in Tinnu Doungel Memorial CFC Hall, Saihenjang ah Ministry of Agriculture and Farmers Welfare nuai ah Flagship Scheme chuamchuam tawh kisai in Special Outreach Programme a um hi. Zia hun chu Khaipao Haokip, Chairman, Autonomous District Council, Churachandpur in Chief Guest hina tawh a uap a, James Doujapao Haokip, MCS, Sub-Divisional Officer, Tuibong leh Henkholun Doungel, Chief of Saihenjang te’n Guest of Honor hina tawh uap in, Lalginlen Lhouvum, FPA, DFP Churachandpur in hun matna amapui hi. Mangjangam Touthang, IIS, Regional Director, Directorate of Field Publicity, Nagaland & Manipur Region in hun matna tawh kisai taklatna nei in, Chief Guest, Guest of Honor ten thugenna a kizawm in a nei ua, Technical hun ah Manngaihkim, Technical Officer, Krishi Vigyan Kendra, Churachandpur in Pradhan Mantri Fasal Bima Yojana tawh kisai in ziltilna a nei a, M. Ginzalian, Agriculture Officer, District Agriculture Office, Churachandpur in Pradhan Mantri Krishi Sinchai Yojana Soil Health Card tawh kisai in ziltilna a nei hi.

Lalginlen Lhouvum in a chiakhawm mipi te numei pawsal ah khen in ziltilna chuam chuam a nei a, Quiz neipi in Hemin Kipgen, Kaprang in Quiz ah winner hina chang in, Nemneilam, Saihenjang in Numei ah winner hina a chang hi. K. Sonikumar Singh, IIS, Field Publicity Officer in hun tawp ah kipakthu genna nei in hun a khak ui. Chief Guest Khaipao in a thugenna a chun, nasem taktak te ding ah Government Scheme chuamchuam muthei ah umta ahidan taklang in, District Council tawh SDO kithua ah PMRY chiapi ahidan a gen hi.

Zillai Guwahati Branch in panmun hawp gualna nei

Lamka, Nov. 15 *(Nisin Thuhiltu)* : Zillai Guwahati Branch term 2017-2019 sung ah Executive Committee member ding ah guat thak ah um ten a chiata 28 October 2017 ni ah Vaiphei Inkuan Guwahati in Don Bosco Cathedral, Pan Bazaar, Guwahati ah “Gualnawp 2017” amat hun ua kitiamna (oath taking) a nei uh tawh kitawn in panmun hawpgualna November 11, 2017 ni a khan a nei ui. Zia dungzui a chu, President ding ah Tv. Lallun; Vice President: Tv Boithang ; Secretary: Nk. Ruthy ; Asst. Secretary: Tv Siambawi; Finance Secretary & treasurer: Nk Nemmercy; Member : Pa Lemthang & Tv Bela te a hiu. Amau hin lem a sak dungzui ua executive committee a keklian ding uh ti a hi.

Assam Rifles te leh rebel group PLA te kikaptuana jawan 1 thi, 1 liam; PLA cadre 1 thi, 3 liam; AK 47 leh IED bomb pathum mudaw ah um

Imphal, Nov. 15 *(Nisin Thuhiltu)* : Chandel district, Sajik Tampak ah Police Outpost a kipat kilometer 3 vel ah gamla um, Chamol Village ah tuni, 15th November 2017 zingkal dak 5:00 tuam in 4 Assam Rifles te leh rebel group Revolutionary Peoples’ Front, PLA te kal in kikaptuana nasatak a piang a, ziana a chun 4 Assam Rifles jawan 1 in thina a tuak a,1 in liamna a tuak hi. Chun, rebel group PLA cadre 1 in thina a tuak a, 3 in liamna a tuak ui. Zia kikaptuana mun a chun, Assam Rifles te’n AK 47 khat leh ambush bawlna mat ding ah kikawi IED pathum le a mudawk ui.

Police thusuak in a taklat dan in, thingnuaimi pawl khat in Indian Security forces te ambush bawl ding ah kisingsakna nei a hidan uh information a mu uh tawh kitawn ah galvan bukim tak ah kithuam 4 Assam Rifles team khat chu thingnuaimi te attack bawl ding ah a chia nau ah Chamol Village, Top area a tun ua rebel group PLA pawl in attack a la bawl uh hin a gen a, attack ah a um uh tawh kitawn ah Assam Rifle troop te’n le kapthuk ah kikaptuana hun chawm khat a um nung ah 4 Assam Rifles rifleman Jai Prakash Oran leh Havildar Golmei Pun te’n liamna tuak, PLA cadre 1 kaplup ah a um, cadre 3 te kapliam a hinung ua, PLA cadre te Mynamar gamsung ah zamlut uh ti a hi. Liamna tuak jawan 2 te chu helicopter mang ah Leimakhong Army Hospital tut himaleu Rifleman Jai Prakash Oran chu a liamna thuakzo lo ah hospital ah thi hin a kigen hi. Kikaptuana a pian tawh kitawn ah Assam Rifles troops reinforcement team in search operation bawl ah kikaptuana area chu umkual un a kigen a, himaleh zia thu zik a hi tiang ah matdaw a nei leh neilo uh bangma taklat in a um nai puai.

A langkhat lam ah rebel group Revolutionary Peoples’ Front, PLA in zia attack chu amau thil bawl hin a puang ngal ui. Hiatthei khat chu, Chandel district head quarter ah November 13, 2017 zingkal in le IED bomb mang in rebel group Revolutionary Peoples’ Front, PLA te’n 18 Assam Rifle personnel te attack a la bawl ua, jawan 2 ten thina tuak in, jawan 6 ten liamna a la tuak ui. Rebel group in tuni ah attack a bawl uh chu ni 3 sung ah Indian security force te 2 vei attack a bawlnau a hi.

Tamenglong District HQ ah State Cabinet meeting nei

Imphal, Nov. 15 *(Nisin Thuhiltu)* : Manipur State Government thak in ‘Go to the Hills’ ti thupi nei ah tanggam ngaikhawkdan suklatna a nei zing tawh kitawn in tuni’n Chief Minister N. Biren leh State Cabinet member te’n Tamenglong District, Multipurpose Hall, DC Office Complex ah Cabinet Meeting a nei ui. Cabinet meeting chu Chief Minister N. Biren in amapui a, Advocate General of Manipur terms leh conditions umsa te et-thakna nei in monthly retainer fee payable to Advocate General of Manipur Rs. 30,000 hisek chu Rs. 1,00,000 hita ding in lemsakna a nei hi.

Contract Veterinary Officers (VOs) ah a la sem, a semzawm nuam nalai Veterinary Officers 37 te appointment piak thak ding in lemsakna a nei bawk hi. Contract Veterinary Officers te service ahileh March 16, 1999 ah State Cabinet lemsakna dungzui ah Contract basis ah sep sak a hiu a, a pawimaw dungzui ah February 28, 2003 tiang ah a contract uh suksau piak ah a la um a hi.

State Cabinet in Electricity Department nuai ah Manipur State Power Company Ltd leh Manipur State Power Distribution Company Ltd ah promotion ding tawh kisai ah recruitment rules, one-time relaxation umsak ding le approve bawl in, Tamenglong district ah developmental works leh projects chuamchuam dinmun te le et-thakna a nei hi. Zia hun a chun, Tamenglong Deputy Commissioner (DC) Armstrong Pame in Power Point presentation bawl in developmental works leh project dinmun te Cabinet Minister te leh Administrative Secretary te masang in taklatna a nei hi.

Accident ziak ah security personnel 3 thi, 3 te tunna hiatlo ah um
Tamenglong, Nov. 15 *(Nisin Thuhiltu)* : Tamenglong Public Ground ah Chief Minister N. Biren reception function uap MLA Adim Panmei security escort Gypsy khat in nitaklam ah Imphal a zawt hun un, Khongsang leh Keikao kikaal, Kawl ah taitha’n accident a tuak a, ziana a chun, Gypsy ah chuang 5 MR Personnel 6 te lak ah 3 in thina a tuak ua, 3 te tunna hiatlo ah um in a kigen hi. Zia ah thina tuak te chu Hav. No. 15007008 Somorjit Singh, Rfn. No. 05976166 Dominic leh Rfn. No. 05126981 Kh.Bungo Singh te a hiu a, a tunnau hiatlo ah um te chu K Mongsang maring CDL 05066467 G-COY 5MR, Rfln. Paopugulung, Noney leh Gaithalong (civil) te hi ua hiat a hi. Zia ah mi 3 te chu security leh local mite’n hawlna nei zing un a kigen a, himaleh zia thu zik a hitiang ah mudaw a hinailo bak ua, banggual dinmun ah um a hiu hiat a hinai puai.

C-in-C KNLF/KNO ding guat thakna nei
Lamka, Nov. 15 *(Nisin Thuhiltu)* : Mr. Boithang Haokip @ HL Kuki,Organisation Secretary cum JMG, KNLF/KNO in tuni thusua a bawlna a chun, amau organization sung ah kivaipuakna lemchangzaw a um theina ding ah Former under Secy. Trade & Commerce KNA/KNO, Mr. Henminthang @ Thangpi Haokip chu P.S. Haokip, President KNO hiatpina leh guanggalna dungzui ah C-in-C KNLF/KNO ding ah guat um hin a taklang hi.

Kanaan Veng YPA Unit khamthei zuak ah kipei khat man
Lamka, Nov. 15 *(Nisin Thuhiltu)* : Kanaan Veng YPA Unit in vengsung ah khamthei dodalna a chiapi zing tawh kitawn in, tuni’n khamthei zuak ah kipei khat a man hi. Mat ah um chu Suanlian (41) s/o Late Thanmoi of Torbung Bangla hi’n a kigen a, khamthei zawksawn ding a piakna Pumkhanmuan s/o Liankhanuam inn ah Kanaan Veng YPA Unit in a matdaw a hi. Thudawtna a nei hun ua, mat ah um Suanlian in a genna a chun, Pumkhanmuan s/o Liankhanuam inn chu Siam s/o Late Thangluai of Tingkangphai in a zawk sawn ding ah khamthei kipiaktuana a mat sek uh a hidan a gen hi. Kanaan Veng YPA unit in Suanlian a pat khamthei amatdaw teu chu - number 4 khaini bawm dim khat, midang sum ding a puak Rs 8,000 leh khamthei zawkna a pat a sum mu Rs 3,010 leh a gari Yamaha RX 100 a hi. Suanlian chu a khamthei puak te haltum sak in, vengsung ah ziagual chiin hawilo chu bawl kittalo ding ah thuhilna a nei nung un, a thadawk ui. YPA Unit in maban ah le zia gual khamthei dodalna chu chiapi zawm zing ding hin a taklang a, kuama vengsung ah khamthei zuak ah kipeilo ding in le hiatsakna a bawl hi.

Assam Rifles in panpina pia
Lamka, Nov. 15 *(Nisin Thuhiltu)* : Assam Rifles, Churachandpur in tuni, November 15, 2017 nitak lam dak 3:30 in Zomi Mothers’ Association (ZMA) General Headquarter, nauchaga te etkawlna Only Grace vethakna nei in, kithuapina’n Joyce, Chairperson, Managing Committee, Only Grace khut in Anchang bag 3, Chini Kg 15, Bawngnawi liter 15 leh Chi Kg 5 piakdawna a nei hi. Assam Rifle team te chu Major Pankaj, Town Commander in amapui hi. Only Grace ahileh tu leh tu nauchaga 13, pawsal 3 leh numei 10 umna a hi.

Gilead’s Balm Care Centre in kum 15 tinna lawm
Lamka, Nov. 15 *(Nisin Thuhiltu)* : Pearsonmun ah Gilead’s Balm Care Centre in tuni’n kum 15 tinna a lawm a, zia hun chu Khaipao Haokip, Chairman, ADC CCpur in Chief Guest hina tawh uap in, Khaikhomang, MDC, Thangkhosuanmung Guite, MDC, Chief of Hiangtam Lamka leh Gilead’s Balm Care Centre dawisaktu te’n le a uap ui. Hun mat sung in Gilead’s Balm Care Centre ah, Peter Group Choir, Bob Sang leh Gilead’s Balm Care Centre Trio ten laa sakna a nei ua, khuallian te a pat thugenna a um hi. Chun, nitak in musical nite a um a, zia hun chu Khaikhomang, MDC, Thangkhosuanmung Guite, MDC, Hiangtam Hausa leh CT Lian Guite, MDC ten special host hina tawh a uap ui. Musical Nite hun a chun, music band- Iron Band, The house band leh Crusaders te a pat in laa sakna a um a, Guest Artist chuamchuam in le laa sakna a nei ui. Gilead’s Balm Care Centre (khemthei addict te etkawlna) ahileh Tawnna Road Elim Veng New Lamka ah kum 2002 ah phudaw ah a la um a hi. Tu leh tu Director M Pauthangkham leh a team-te etkawlna nuai ah khamthei addict 100 val etkawl a hiu.

Tamenglong leh Noney district ah Rs. 325 crore lut ah developmental work leh project chi chuamchuam chiapi hiding ah CM N. Biren in puang

Tamenglong, Nov. 15 *(Nisin Thuhiltu)* : Tamenglong Public Ground ah tuni’n Chief Minister N. Biren leh a team te reception function matpi in a um ua, Chief Minister in mipi te lak ah a thugenna a chun, tu fiscal year sung ah Tamenglong leh Noney district ah Rs. 325 crore lut ah developmental work leh project chi chuamchuam chiapi hiding in a puang hi. Tu ah state government state sung ah khantona, chamna leh muanna a um ding dawi ah panlakna nei zing a hidan taklang kawm in Rs 10 crore lut ah Transit Accommodation of doctors & Teacher sak hiding, January 2018 leh Rani Gaidinliu Women’s Market sakzaw hiding, zia market chu Manipur Police Housing Corporation nuai ah estimated cost Rs. 10 crore bei ah kisa ding hin a gen hi. PMAY-R nuai ah Tamenglong district ah chenna inn total 1,068 sak hiding, road connectivity hawitak a um theina ding ah total 411.35 kilometres ah sau lampi, PMGSY nuai ah Rs. 1,078.99 lakhs lut ah siam hiding, NH-37 ah lampi leh lei (bridge) te NHIDCL in siam hawi zing, Kaiphundai - Tousem road (56 km) keklianna ding leh blacktopping bawlna ding tawh kisai North Eastern Council (NEC) ah piaklut ah um hin a taklang hi.

Tamei leh Tamenglong ah bank leh DTO office hawn hiding ah taklang kawm in, Government in Tousem, Nungba leh Khoupum areas ah le bank branches leh ATM umsak ding ah guanggalna nei in a gen hi.

Kumkit 2018 a pat NERCORMP (North Eastern Region Community Resource Management Project) in Tamenglong district ah project pan ding,
census villages zosia December, 2017 tiang ah UJALA scheme nuai ah electric meivak tunsak hiding, March, 2018 leh 7000 LEDs bulbs & tubes hawp hiding in le a gen hi.

Chun, Government employee te transfer & posting tawh kisai ah buaina um te sukven theina ding ah District Cadre system umsak ding ah government in panlakna nei a hidan taklang kawm in, Tamenglong tiang ah MST bus service tunsak hiding in a gen hi.

Zia ah hun matzaw a chun, Chief Minister in 50-bedded District Hospital sakna ding in foundation stone suangphu hawnna a nei a, Water Supply Scheme (estimated cost Rs. 40 crore), 5000 MT FCI Godown, Transit Accommodation for Doctors & Teachers leh Rani Gaidinliu Women’s Market sakna ding in foundation stone suangphu hawnna le a nei hi. Chief Minister leh Council of Minister te chu lamkal ah mipi te’n a thupi theipen in vaidawnna a nei ua, Ccultural items chuam chuam suklatna tawh hun a matpi ui. Chief Minister chu Cabinet Ministers, Parliamentary Secretaries, MLAs, Chief Secretary, DGP, top civil leh police officer ten le a zui ui.

Chandel district ah combing leh frisking hat mama
Chandel, Nov. 15 *(Nisin Thuhiltu)* : Chandel district ah Security Forces te attack ah a um uh tawh kitawn in Assam Rifles leh state police in Chandel district head quarter ah nasatak in combing operation a bawl zing ua, Imphal leh Moreh kawmtua gari te le chipchil tak ah checking bawl in a um ui. Ziana chung a chu driver khenkhat in lemchanlona tamtak tuak un a gen ua, a tun ding hun ua a tunna ding mun uh tung thei ngailo un a gen ui.

Governor in 2-Day National Conference hawng

Imphal, Nov. 15 *(Nisin Thuhiltu)* : Manipur Governor Dr. Najma Heptulla in tuni’n Manipur Institute of Management Studies, Manipur University leh Centre for Global Management and Responsible Leadership, XLRI, Jamshedpur saina’ Centenary Hall of Manipur University ah 15th leh 16th November, 2017 ah um ding, 2-Day National Conference on ‘Promoting Business Opportunities in North Eastern India and India’s Act East Policy’ hawnna a nei a, ama’n a thugenna a chun, India Prime Minister in NE region a khantolona tawh kisai ngaikhawk mama a hina chung ah “look east policy” a chiapina work east policy le a pansak a hidan taklang in, government in NE Region hemillo hin a gen h. State governor mawpuakna piak ah a um hun ah hill region ah medical facility panna basic infrastructure dinmun siam hawi ding ngaikhawkpen ah nei maleh mun haksat ziak ah doctors leh medical staffs te’n kituptak ah basic medical facility tunsak theilo uh hin a gen hi. Tanggam ah medical facility a kitup theina ding ah Prime Minister kiang ah ‘flying doctors’ umsak ding ah dawtna a siam chu Prime Minister in lemsakpi ah NE council in flying doctor umsakna ding ah fund bithiat piakta a hidan hun matna dang ah a gensa gual in a taklang kit hi. Chun, Manipur chu gam hawi mama, biodiversity bep ah hawi hizawlo ah tunung ah khangthak te masawn theina ding ah gam hawi tak hin a gen a, zia ziak a chu khangthak te ngaikhawk diak hin a gen hi. Zia inaugural ceremony chu Prof. Adya Prasad Pandey, Vice Chancellor, Manipur University; Prof. N. Lokendra Singh, Dean, School of Social Sciences, Manipur University; Prof. P. Venugopal, Chairperson, CGMRL, XLRI, Jamshedpur; Mr. Nakib Ahmed, Advisor, NE Initiative, Indian Chamber of Commerce, Kolkata; Prof. Ch. Ibohal Meitei, Director, MIMS, Manipur University, delegates, state entrepreneurs leh student ten a uap ui.

Rs 5.55 lakhs man ding WY mandawk

Imphal, Nov. 15 *(Nisin Thuhiltu)* : IGAR (South) nuai ah 12 Assam Rifles of 26 Sector Assam Rifles in PVCP, Khudengthabi, Tengnoupal District ah Moreh a pat Imphal zuan Eeco van gari khat check a bawl hun un, Rs 5.55 lakhs (approximate) man ding, WY tablets chang 1110 a man dawk a, matdaw ah um WY neitu leh WY damdawi te chu Moreh Police Station in a pelut ui.

Lei siatna khiatha numei school chapang mudawlo ah um

Imphal, Nov. 15 *(Nisin Thuhiltu)* : Thoubal district ah Heibong Makhong Loukok kawmtuana lei (thingpek-lei) vang ah tuni’n numei school chapang khat a khia tha, a luang hawlna nei himaleh zia thu zik a hi tiang ah mudaw a hinai puai. Zia lei ah khiatha chu kum 4 leh tha 10 mi, Reshma d/o Md Abdul Noor of Bangoon Mamang Loukok hi ah hiat a hia, Al-Eden English High School, Heibong ah class nursery II simlai a hi. Reshma ahileh school kai ding ah school zuan ah a chiana zia thingpek lei vang (a siatna vang) a chu khiatha kha hin a kigen hi.