Cable-gui ah naupang khat awk-lum khapal
Lamka, Nov. 2 *(Nisin Thuhiltu)* : Bawipu Thanglunlal (11) s/o Kham Isak & Chinneikim@ Kimboi of Headquarter Veng chu tuni 2nd November 2017, nitaklam dak 6:00 in a insung ua, cable-gui (cable wire) ah awk-lumsa mudaw in a um hi. Ama ahileh Dawn School ah Class V simlai a hi. Anu gendan ah tuni school kaipel, inn a tun ah zing ah test nei ding ah mathematic calculation bawl, ama (Anu) kiang ah calculation a bawl ding question ei pian ti ah a dawt, a nu’n le question a piak leh bailam satalua hi ah a genkawm ah, zing ah a school kaina a nekthei man ding Rs 10 eipianlah, school pel inn kahung tun tak leh bu tawh ka-me ding a ti bakah 5th November a Birthday a Nu tawh mangkhawm ding ah thanuam tak ah kiholimna a nei zing lai ua, a nau (nausen) kapkap chu aNu’n inn mailam ah a va thepbi kal ah cable-gui ah a la awk-lum ti a hi. Social Networking site chuamchuam- Whatsapp, Facebook etc ah a kikhailum dan-ah Bawipu Thanglunlal (11) thina tawh kisai suklat ah um maleh a mun tak ah thil umdan kanzui leh et in tup-mawng leh ama thupukna ah awk-lum hilo ding in ginchat a um a, cable-gui kikhai tha chu kihelna dan ah kikhaina a neina a pat awk-lum khapal hiding in ginchat a um hi. Anu leh a School kaina thuneitu gendan ah Bawipu Thanglunlal (11) hi, naupang tei mama ah hiat a hi.
Khuga Dam kiangnai ah bukcha’ cheng innkuan 1 panpina pia
Lamka, Nov. 2 *(Nisin Thuhiltu)* : Khuga Dam, Buallian khua kiangnai ah ZYA gam huap sung in bukcha khat in innkuan khat a khuasau a, zia chu CT Lian, MDC New Lamka West in a va mudaw nung in, a dinmun uh kanchian in, November 1, 2017 sunnung dak 2:00 vel in panpina a piai. Zia ah innkuan khuasa chu Mr Thangboi leh Lialian leh a chatau pali (4) a hiu a, nisin nekkawm hawl haksatak ah khuasa hi ua hiat a hi. CT Lian in Naupangte’ pa, Thangboi kiang ah panpina a piakdaw hun a chun, mihing kiti banggual ah siatawpkhawk talen le cha leh nau te etkawlna ding leh cha leh nau te khua-tuana tawh hinkhua matdan kisiam thak ding pawimaw in a gen a, ngaikhawk ziak ah mi kiphal chuam chuam in sum a tuak khawm uh kithuapina ding ah a piak chu nek-le-chak ah mat mai ding hizawlo ah tampi tak ah a veipun ding ah thawlawm gual ah a piak dan ah a pawm ding in chialna a bawl hi. Chun, Rev. G. Pau Muanthang, Principal, RBI, PCI (R) in pauchap piakna a nei hi. C T Lian leh a team te’n panpina van a piak lak ua chun, sum banah naupang te sill eh chen ding, Annchang, Dal, Uum-le-bel, puansil- nik leh puan, Blanket, Portable Solar lamp banah a chenna buk uh siamhawina ding ah Plier leh thikkhau ti te le a pang hi. Chun, Naupangte’ lak a upa pen, kum 6 mi ahileh amuk kek (cleft lips) a hia, December tha vel leh operation bawl ngai ding, ziana ding a chu sum sen leh so um ding te CT Lian in a lampi a ngaitua piak ding hin a kigen hi. Naupang te Nu, Mrs Lialian in a genna a chun, ni khat leh a cha te ann khat-vei a nekpi hun um sek maleh ann ngawl ah kawi khalo hin a gen hi.
Comedian Hunt 2017 um ding
Lamka, Nov. 2 *(Nisin Thuhiltu)* : Lamka Core saina a hung tung ding, November 24, 2017 nitak dak 5:00 leh ni 10 sung um ding Comedian Hunt 2017 Chapter-1 (Audition Round), YPA GHQ Hall, Hiangtam Lamka ah kipan ding a hi. Zia kidemna a chu 1st Prize Rs. 20,000, Trophy leh Citation; 2nd Prize Rs. 10,000, Trophy leh Citation banah top 5 tiang in Consolation Prize sâng ding a hiu. Kidemna ah pangnuam te’n Mualveng Dawr, Hiangtam Lamka, Haulun Dawr, Zenhang Lamka, Joute Enterprise, Rengkai, SG Signature Graphic, Hebron Veng, New Lamka, Kulung Medico, Chimtung Veng, Dorcas Road, Nemnu Hotel, Mata Auto Parking, M/S Obed Enterprise, Chiengkawnpang leh ST Medical Store, Opposite District Hospital ah Form muthei ding, November 21, 2017 tiang ah Form lakna mun ma ah piaklut thei ding a hi.
October tha sung ah Malaria vei 1 mudawk
Lamka, Nov. 2 *(Nisin Thuhiltu)* : Malaria Department, Churachandpur in thalui ah October ah Malaria vei ding ah muanmaw thisan sample 1,702 test a bawlnau ah malaria positive khat 1 mudaw a nei a, Malaria PF khat a mudawk hi. Zia chu October 1 a pat October 15 first Fortnight sung ah thisan sample 381 test a bawlnau ah Malaria PF khat a mudaw uh a hia, October 16 a pat October 31, 2017 sung ah thisan sample 1,321 test a bawlnau ah Malaria Positive leh PF mudaw neilo, a kigawm ah October thasung ah Malaria vei ding ah muanmaw thisan sample 1,702 a test nau ah a chung ah kigen te chu mudaw nei a hidan uh SMO, Regional Health & Family Welfare, Imphal leh Director, Health Services, Government of Manipur ah report a piakna a chun a taklang hi.
Fake Certificate siamtu khat mat ah um
Lamka, Nov. 2 *(Nisin Thuhiltu)* : Churachandpur District Police in November 1, 2017 a khan Birth leh Death Certificate lem (fake) bawl ah sumkawl vei mi khat a man dawk hi. Police thusuak in a gendan ah Compliant amu dungzui ua SBI CCpur Branch mai, Tedim Road ah Vivid Computers kitina Dukan sung checking a bawlnau ah Birth Certificate siamna ding, blank color paper leh siamsa Birth certificate lem banghem zat mudaw nei un a taklang a, Computer leh certificate lem siamna ding ah kimang van chuam chuam leh dukan neitu Ginzionthang (28) s/o Late Zamzachin of Bethel Veng, New lamka chu man in Police Station a tut ui. Chuleh, zia thil diklo bawlna tawh kisai a chun, District police in FIR number 95(11)2017 CCpur U/S 419/420/468/ 471 IPC nuai in case a ziklut a, thudawtna nei ding in a kawl zing ui.
CM in Chandel a phakna ding ah kisingsakna nasatak ah nei
Imphal, Nov. 2 *(Nisin Thuhiltu)* : Manipur Chief Minister N. Biren Singh in November 4, 2017 (Saturday) leh Chandel District a phakna ding tawh kisai in Chandel District mipi leh District Administrationin kisingsakna nasatak a nei zing hi. Deputy Commissioner, Chandel Krishna Kumar in a genna a chun, Chandel District mipi te’n Chief Minister thanuam tak ah ngak zing a hidan uh a gen a, Chandel District Administration in kisingsakna bangkim sufel vekta hin a gen hi. Thamlakhuren Village, Ziontlang Village, Liwa Maring Village etc ah Chief Minister vaidawnna ding ah Giant Gate siam ah um a hidan taklang in Chief Minister in Chandel District a phak hun ah Komlathabi ah Liwachangning Girls’ Hostel hawng ding, SDO office leh Town Hall, Panchai kiangnai ah Women Market sakna ding ah foundation suangphuna nei ding, Monsang Pantha ah Chandel Christian, ADC Office Complex kiang ah 50 bedded District Hospital at hawng ding leh United College, Lambung, Maha Union Girls Hostel ah , Science Lab hawnna nei ding hin a taklang hi. Chuleh, Maha Union Ground ah mipi te lak ah Chief Minister in thugenna nei ding hin a gen hi.
MEETAC tawh kisai ah meeting
Imphal, Nov. 2 *(Nisin Thuhiltu)* : Textiles, Commerce & Industry Minister Thongam Biswajit Singh mapuina’ phudaw thak ah um, Mission For Economic Empowerment of Traditional Artisans/Craftsmen (MEETAC) in a khatveina ding in tuni’n ama office chamber, New Secretariat Building in meeting a nei ui. Zia hun a chun, maban panlak dingdan leh facility, faculty member pawimaw ding te nguntak in genkhawmna a nei ua, mission thiltup leh financial involvement etc chuncghang le a genkhawm ui. Zia mission nuai a hi, textiles (handicrafts/handloom), pottery, cane and bamboo crafts, Jewellery (gold and non-gold),reed craft, stone & wood craving , dolls & toys , block printing, terracotta, hand Embroidery (zarietc) leh tribal arts/crafts etc te cover hiding a hia, kum 3 chiapi hiding a hi. Meeting chu principal secretary of Textiles, Commerce &Industry P.Vaiphei, Director of Handloom & Textiles Lamlee Kamei, Commerce and Industry, Finance & planning department official ten a uap ui.
RIMS ah nekgukna uangpen ah Post Graduate student te’n PM kiang tut
Imphal, Nov. 2 *(Nisin Thuhiltu)* : Regional Institute of Medical Scienc (RIMS), Imphal ah post graduate student te’n Prime Minister kiang ah lekha thawt in RIMS dinmun ngaikhawk ding ah chialna bawlkawm in RIMS chu hospital nekguk (corruption) hatpenna hospital hin a gen ui. A min sulanglo, Post Graduate Student khat in tha 4 sung vel RIMS ah zilna a chiapi nung ua zia gual thil umdan chu Prime Minister kiang a tut uh hin a gen a, medical practitioner dang te tawh damlo khenkhat chu investigation kituptak bawl masalo ah treatment a bawl sek uh a hidan uh le sulang in, institute in investigation bawlna ding ah facility a neilo ziak leh damlo te’n hospital pawlam mun dang ah test bawlna ding ah sum a neizaw seklo ziak ua insvestigation mumal tak umlo ah treatment kibawl sek in a gen ui. Prime Minister of India kiang ah lekha thawt in thilumdan a taklatna a chuh, MRI machine installed kibawl, CT scan, ICU umlo, a min mai ah SICU kiti ki umsak, ventilators, monitor umlo, Neonatal ICU ti te a min mai ah kikawi a hidan te sulang in RIMS hospital ah USG machine khat bep matthei ah um in a gen a, naunei a um hun ah a pawimaw dungzui ah mat thei ding, labour room ah USG machine uml, zialo a chu Iron lehfolic acid te panna damdawi tamzaw damlo te’n a kichawk ding uh, casualty ah defibrillators umlo, toilet kituptak umlo a hidan te suklat in a um hi. Thuneitu te’n mimal ah private hospital a ki run chiatna chung ua RIMS siamhawi ding dawn umlo, fund sanction ah um te amau private hospital siamhawina ding ah kimang sek ah le PM kiang tut in a um hi.
BOSEM in form submission hun suksaube
Imphal, Nov. 2 *(Nisin Thuhiltu)* : High School Leaving Certificate Examination, 2018 ah external leh supplementary candidate te ding ah registration form submission hun last date Novemebr 10, 2017 tiang ah fine Rs. 100/- per candidate tawh suksaube ah um hin Controller of Examination, BOSEM in thusua a bawlna a chun a taklang hi.
IAS/MPS transfer & posting
Imphal, Nov. 2 *(Nisin Thuhiltu)* : Special Secretary Tribal Affairs and Hills, Lunminthang Haokip chu additional charge of Director Manipur Social Audit Agency piakbelap in a um a, Joint Secretary R & DM/ Home Josheph Pauline chu additional charge of SMD/National Health Mission piak in a um hi. Chun, SDO/BDO of Chingai leh LM Pawan Yadav chu SDO/ BDO Ukhrul, M Rajkumar SDO Churachandpur chu SDO/BDO Senapati & Phaibung ding ah tranfered bawl in a um hi.
Assam Rifles in suunna leh zana piakna nei
Imphal, Nov. 2 *(Nisin Thuhiltu)* : IGAR (South) nuai ah 26 Assam Rifles of 9 Sector Assam Rifles in tuni’n Chandel ah 6 April 2013 ah insurgency operation bawlna thina a la tuak Late) Rifleman Narengbam Suresh Kumar Singh of 24Assam Rifles ding ah a pianni (birthday) a hi tawh kitawn in a suunna leh zana piakna Wangjing Secondary School, Thoubal District in a nei hi. Zia hun a chun,26 Assam Rifles official te leh (Late) Rifleman Narengbam Suresh Kumar Singh ingsung mite banah Wangjing Secondary School ah teaching staff leh students te’n zanna leh pakcha piakna a nei ui.
*Nisin Thuhiltu, November 3, 2017 Editorial*
*MISS KUT HI ZAWTA*
November 1, 2017 ah mun chuam chuam in Chavang Kut/Kut mat in a um a himaleh Pu leh Pa/ Pi leh Pute khang ah Kut kimatdan tawh tuhun ah a kimatdan kikhia leh kigamla mama ta in a kilang hi. Mitamtak in a limpi uh chu Miss Kut/ Chavang Lanu Contest a hi deu pen a, Ni dang ah Pi leh Pute’n kilungtuak tak ah nunnuam a bawldan uh thasik ah Miss Kut/ Chavang Lanu Contest chu nunnuam bawlna’n mat in a umta mai hi. Zia ziak a chun, Chavang Kut ti ah kihia sek chu Miss Kut/ Chavang Lanu Kut hizaw ta le a kilawm hi.
State Level ah 1st Manipur Rifles Ground, Imphal ah mat in a um hi. Zia hun chu Manipur Governor Dr. Najma Heptulla in khuallian hina tawh a uap a, Kut kiti chu sakhua thudawl ah kawi thei hilo a hidan gen in, sakhua chuam chuam neite kihi himaleh India khua leh tui hina kibang nei chiat ihi dan uh gen in, kipum khat ding leh kituak tak ah um khawm ding pawimaw in a gen hi. Chief Minister N. Biren Singh in a genna a chun, Kut festival in state sung ah kipumkhatna ding leh sakhua leh chawndan te a pat tha-khat hina sulang in a gen a, KUt kiti chu festival pawimaw mama in a gen hi. Hun dang ah Kut kiti chu Kuki-Chin-Mizo ethnic group te’n a thaichi-chiin uh a lakkhawm zaw tak uh leh hun lemchang ah a mat sek uh a hidan taklang in Manipur ah 19th Century tawp kuan lam ah Christianity a hung hatthak nung ah Kut kiti chu niam kiak deu deu himaleh tuhun ah mipi te’n Kut kiti chu kumsin November 1 leh Sub-Division, District leh State levels ah mang zing kitta leh suhing thak a hidan uh a gen hi.
Zia hun matna a chun, cultural troop chuamchuam -Thadou, Hmar, Kom, Vaiphei, etc in traditional Dances suklatna a nei ua, V. Hangkhalian, Minister (Agriculture, Veterinary & Animal Husbandry) as functional President and Deputy Chief Minister Yumnam Joykumar Singh;Th. Shyamkumar, Minister (MAHUD, Forest & Environment Minister); Karam Shyam, Minister (CAF & PD), Losii Dikho, Minister (PHED), Thangso Baite, MP Lok Sabha; GS Haopu, Chairman State Level Kut Committee; RR Rashmi, Chief Secretary leh LM Khaute, DGP, Manipur te’n le hun matna a uap ui.
Zialo a chun, District Level ah Kuki Innpi CCpur vaisaina’ Indoor Stadium Hall, Peace Ground Tuibong ah “Know Thy Roots” ti thupi nei in KUt matna a um a, Nam lam chuam chuam suklat in a um bawk hi.
Chuleh, mun tamtak ah Kut kimatna a chun, Miss Kut/ Chavang Lanu Contest kiti a um a, thil dang sang ah Miss Kut/ Chavang Lanu Contest chu mitamtak limpi a hi. Zia hi, Pu leh Pa te hun matdan sukhin zingna ding ah kimang sek a hi diam ahiloleh a khang a khang ah, khawvel khantodan zil ah utdan dan ah Kut matdan san lumlet mai ding a diam ti chu ngaitua kham a ting hi.