Manipur’s kipumkhatna sia-thei himhim lo ding: Chief Minister
Imphal, Oct. 31 *(Nisin Thuhiltu)* : Manipur Chief Minister N. Biren in Secretariat South Block, Imphal ah tuni’ Prime Minister lui famta Indira Gandhi, death anniversary “Rashtriya Sankalp Diwas (National Re-dedication Day” matna a thugenna a chun, State’s integrity siatsak hilo hial ding in a gen a, Manipur’s territorial integrity issue ah Prime Minister Narendra Modi thutiam bawl chu gingcha tak ah um hin a gen hi. Tuhun ah khat leh khat thiammaw kichanlo ding leh blame-game chiapilo ding a nawp thu taklang kawm in Manipur chu ethnic community tamtak te chenna gam a hina chung ah khat leh khat kihiatthiamtua chiat ding leh state a ding ah panlakna um te kihiatpi tua chiat ding pawimaw in a gen hi. Tunung sawtlo ah developmental works chi chuamchuam chiapi hiding a hidan taklang in, zia ding a chu government in bureaucrat leh official te kithuapina pawimaw in a gen hi. State in working season chawmcha nei in le a gen a, official te chu a huntak ah nasepna zaw a hitheina ding ah panla chiat ding in a chial hi. Gamsung leh state ngaikhawkpen ah kawi ding ah mipi te chial in, gamsung khantona ding, kipumkhatna ding, chamna leh muanna a um theina ding ah panlakna nei chiat ding pawimaw in a gen hi.

Hun matna uap, Deputy Chief Minister Y. Joykumar in a thugenna a chun, Indira Gandhi chu leader hat mama, hangsan tak ah thupukna khautak lathei mi, gamsung kipumkhat theina ding ah kipumpiakna tawh panla tu hin a gen hi. Indira Gandhi in Golden Temple, Punjab ah thingnuaimi a la pansa te deldaw ding a nawplona ziak chu India a pat khenzak a hikhak ding a nawplo ziak hiding ah suangtuana nei a hidan taklang in, Prime Minister lui Indira Gandhi in gamsung kipumkhatna ding ah panlakna a nei dan te chu entawn ah state leh India integrity venbit theina ding ah panla chiat ding in mipi te a chial hi. Zia hun matna chu Minister, MLA, Chief Secretary R.R. Rashmi, DGP L.M. Khaute leh top civil leh police officer te’n a uap ui.

VPC GHQ in Block te Jt. Meeting neipi

Lamka, Oct. 31 *(Nisin Thuhiltu)* : Vaiphei People’s Council (VPC) General Headquarter in tuni, October 31, 2017 in VPC Block Chairman leh Secretary te Joint Meeting a neipi hi. Zia hun a chun, Upa Khuallianmang in pauchapna tawh hun hawn pauchapna a nei a, Khatkhotong Baite, President, VPC GHQ in Chairman hina tawh hun matna amapui hi. A chiakhawm member te’n self introduction bawlna nei in, Khatkhotong Baite in Meeting Agenda ding puandawna leh VPC GHQ mapuina’ panlakna umte genlatna a nei hi. Khatkhotong in a genna a chun, mipi kikhawp khawmna ding neilo ah a um chu VPC GHQ in ngai pawimaw in Community Centre Construction Committee bawldaw ah um in amau panlakna leh mi kiphalte’n a tuakkhawm teu mang ah Community Centre ding sakna sautak zaw hita a hi dan a gen hi. Joint Meeting hun ah VPC annual membership fee dawl ding chung chang, VPC GHQ leh Block te kituak zawsem ah kalsuan khawm ding dan banah thu pawimaw chuam chuam genkhawm in zingkal ann a nekhawm u’i. Vaiphei People’s Council General Headquarter nuai ah Block 18 um in tuni Joint Meeting hun a chun Lamka Block, Gangpimual Block, Lingsiphai Block, Singngat Block, Tonglon Block, Tuiliduang Block, Chongkhozo Block, Kangvai Block, Imphal Block, Leilon Block leh Sangaikot Block a puitute a pang u’i.

Diesel Auto 1 khetsiat ah um

Lamka, Oct. 31 *(Nisin Thuhiltu)* : Kangvai Area Diesel Auto Owner Association (KADAOA) phudaw ah a umna chung ah Kangvai Area ah tulak cheng Diesel Auto Association chuamchuam um te kal ah kihiatthiamlona a um ziak in tuni, 31 October 2017 in student te thak tua ah tai (school pick up drop off ) Diesel Auto –MN 02B 5092 chu pawl khat in Koite thanmual kiang in a khensiau a, amai-glass mattheilo a suak hi. Auto neitu ahileh Mangliansang of Mualngat hi ah hiat a hi. Zia thiltung tawh kisai chu Churachandpur Police Station tut in a um a, Police te’n Auto Association leader te kokhawm in thil umdan a genpi ui. Himaleh zia thu zik a hi tiang ah kihona a zaw nailo ziak un banggual kiholemna nei a hiu hiat a hi puai. Hiatthei khat chu school naupang uniform ah Auto sung ah a chuan zinglai ua, a chuan-nau auto khetsiat ah um a hi ziak in student Auto ah chuang te’n a lauthawn thu’u a gen ui.

High Commissioner of India to Zambia ding ah N.J.Gangte guat a um

Lamka, Oct. 31 *(Nisin Thuhiltu)* : N.J.Gangte (IFS: 1994), tu leh tu Ministry of External Affairs ah Joint Secretary mawpuakna tuzing lai chu next High Commissioner of India to Republic of Zambia ding ah guat in a um a, ama’n tunung sawtlo ah a mawpuakna thak chu la ding a hi.

One Day Awareness Campaign on Handloom and Handicraft Delivery Scheme bawl

Lamka, Oct. 31 *(Nisin Thuhiltu)* : District Handloom & Textile Churachandpur saina nuai ah tuni, 31st Oct. 2017 in YMA Hall Kawnpui ah “One Day Awareness Campaign on Handloom and Handicraft Delivery Scheme and Micro Units Development and Refinance Agency (MUDRA) Loan Scheme” a um hi. Zia hun chu D Khaipao Haokip Chairman, Autonomous District Council, Churachandpur(ADCC) Churachandpur, Jenny Vaiphei leh Th Ibemcha Devi ten Chief Guest, Guest of Honour leh Functional President hina tawh a uap ui. hun mat sung in Puankhawng te a ding ah Pat(Yarn) a inn tiang ua vakawipiak theina ding scheme um te leh MUDRA Scheme nuai ah loan muthei um te taklat leh genchianna a um hi.

ATWU in pauchap khawmna sunzawm di
Lamka, Oct. 31 *(Nisin Thuhiltu)* : All Tribal Women Union (ATWU), GHQ Churachandpur in gam leh nam a ding ah pauchap khawmna a nei uh nei zawm to zel in, a hung tung ding November 2 sunma dak 10 leh ATWU pauchap khawmna mun, Jehova Jire Home, Beulahlane, Central Lamka ah hun matna nei kit ding a hiu a, zia hun a chu Remi, Director, Here I Am Ministry Guwahati HIM in Pathian thu genna nei ding a hi.

Poultry leh Beauty Parlor Management training chiatha zing

Lamka, Oct. 31 *(Nisin Thuhiltu)* : RSETI-SBI, temporary Office, Bijang ah tulai tak in âk vâk dan, Poultry leh Beauty Parlor Management training a chiatha zing hi. Zani, October 30 ah kipan Puoltry training a chun mi 30 a pang ua, Mangboi Vaiphei, Guest Faculty, RSETI-SBI in ni 5 sung Rural Entrepreneurship Development Program (REDP) tawh kisai ziltil ding leh ni 25 sung Practical ah âk vâk dan ziltil hi ding a hiu. Beauty Parlor Management a hileh a chiata October 6 ah kipan leh tha khat sung dai ding a hia, October 6 - 10 sung ah Mangboi Vaiphei, Faculty, SBI-RSETI in REDP) tawh kisai ziltil a piak zaw ah October 11 a pat in Lhainunnem, Beautician in practical ah a ziltil a, training a chun numei 23 a pang u’i.

PL-HIV leh HRG te a ding Aadhaar enrollment
Lamka, Oct. 31 *(Nisin Thuhiltu)* : Community Service Centre (CSC), Shalom, IB Road ah tuni, October 31, 2017 in People Living with HIV (PL-HIV) leh High Risk Group (HRG) te a ding ah Aadhaar enrollment a um hi. Aadhaar Card a ding ah enrollment a hileh Shyam Lal Poonia IAS, DC leh Chairman, DAPCC, Churachadpur te panlak dungzui ah PL-HIV leh HRG-te a ding bîk ah kibawl a hia, zia hun a chun PL-HIV leh HRG a kigawm ah mi 10 in enrollment a kibawl ua, thâini, November 2, 2017 leh zia mun ma a chun sutzawp hi ding a hi.

‘Run for Unity’ nei

Lamka, Oct. 31 *(Nisin Thuhiltu)* : Shyam Lal Poonia, IAS, DC/ CCpur mapuina leh Assam Rifles, BSF-STC, District Police, CRPF kituapina tawh tuni’n District Level Rashtriya Ekta Diwas/ National Unity Day matna um in, “Run for Unity’ kiti marathon sai in aum hi. Marathon tai ding te DC Quarter, IB Road a pat Shyam Lal Poonia in thâkdawna nei in Peace Ground Tuibong tiang a tâi u’i. Run a chun district sung ah government department chuam chuam a pat staff te banah Assam Rifles, BSF - STC, District Police, SDO, CRPF, Civil Society Organization chuam chuam, NYK volunteer leh district mipi hunkhawp te a pang ua, a kigawm ah mi 700 vâl zo ding hi’n a kigen hi. Marathon ah gimsia/ buaisia umding vengna in Dr Kim Simte, CMO/ CCpur mapuina’n district ambulance khat mang ah medical team khat a duty ban ua KKL ambulance in le a zui hi. Rashtriya Ekta Diwas/ National Unity Day a hileh lênggam tam tak te India nuai ah gawpkawmna ding ah pan nasatak ah a la latu, Late Sardar Vallabhai Patel piang chiampha hiatzingna ding ah mat ah um a hi.

Form piaklut na ding hun belap
Lamka, Oct. 31 *(Nisin Thuhiltu)* : Churachandpur District Sports Association (CDSA) in Zou Gal Centenary Football Tournament 2017 neina ding tawh kisai ah football club/ team te hiat ding ah thusua a bawl na a chun, Zou Gal Centenary Football Tournament 2017 ah pang nuam CDSA affiliated club/ team te khualna ah entry form piaklut hun November 3 tiang a ding ah hun belap a hi dan taklang kawm in Zou Gal Centenary Football Tournament 2017 tawh kisai ah November 4 zingkal dak 8 leh CDSA Office, Hiangtam Lamka ah managers’ meeting um ding hi’n hiatsak a bawl hi.

Dr. HT Sangliana Rolling Trophy khak hita

Lamka, Oct. 31 *(Nisin Thuhiltu)* : Hmar Youth Association (HYA) in a 12-veina General Conference, Dr. HT Sangliana Rolling Trophy a nei uh tawh kisai ah tuni’n Sielmat Playground ah Football leh Volleyball Final Match um in Closing Program chu Shyam Lal Poonia, IAS, DC Churachandpur in Chief Guest hina tawh uap ding ti himaleh Imphal a meeting pawimaw a nei ziak ah kipakman piakdawna hun a uap zaw, P. Binod Ranjan Singh, Additional SP (Operation), Churachandpur leh Michael Ginzasuan, DSO Churachandpur te’n Guests of Honor banah Lalramsang Infimate, MCS, Additional DC, Churachandpur in Functional President leh HK Joute in Chief Host hina tawh a uap hi. Hun matna ah HYA Cultural Troupe a pat Cultural Dance suklatna a um banah khuallian te a pat thugenna a um hi. HYA Rengkai Branch leh HYA Saikawt Branch te Dr. HT Sangliana Rolling Trophy Volleyball Final kihel in HYA Rengkai Branch in gualzawna a chang hi. Football Final ah a hileh HYA Saikawt Branch in penalty ah HYA Saidan Branch zo in Rs. 10,000 leh Trophy a sang ua, HYA Saidan Branch in Rs. 5,000 a sang hi. Volleyball ah a hileh Champion HYA Rengkai Branch in Rs. 5,000 leh trophy banah 2na la HYA Saikawt Branch in Rs. 2,000 a sang hi.

Governor, Chief Minister in ‘Run For Unity’ Flag Off

Imphal, Oct. 31 *(Nisin Thuhiltu)* : Manipur Governor Dr. Najma Heptulla leh Chief Minister N. Biren Singh in tuni’n Khuman Lampak Main Stadium ah ‘Run for Unity’ flagged off bawlna a nei ui. Sardar Vallabhbhai Patel, 142nd birth anniversary “Rashtriya Ekta Diwas (National Unity Day)” matna kawm ah ‘Run for Unity’ chu chiapi ah um a hi. Dr. Najma Heptulla in India gamsung ah sakhua leh chawndan chuamchuam nei community chuamchuam te kituaktak ah chenkhawm ah a um theina ziak chu Sardar Vallabhbhai Patel panlakna ziak hin a gen a, Iron Man of India Sardar Patel panlakna a pat India kipumkhatna hawi mama in a gen hi. Chuleh, Sardar Patel chu lawyer kipia zo tak mawpuakna ngaikhawkpen ah kawi mi hi ah tepte ah um hin a gen hi. A zit hi thu hiatsak ah a um hun ah le a mawpuakna sem zing ah um a hidan gen in frontline freedom fighter khat hin a gen hi. Zia hun matna a chun, Chief Minister N. Biren leh Youth Affairs and Sports Minister Letpao Haokip chu president leh guest of honour in a pang ui. Chief Minister N. Biren Sing in a thugenna a chun, Sardar Patel chu saupi tak a ding ngaituana neikawm ah panlakna nei India leader pawimaw mama hin a gen a, kipumkhatna panglo ah India dingdet theilo ding a hidan a la mulawk leh kipumkhatna ding ah theitawpsua ah panla hin a gen hi. Ama panlakna chu ettawn ting khawp mai in a gen a, state sung ah kipumkhatna a um ding pawimaw a sak thu a gen hi.

Governor in AIS Officers & Wives’ Association member te kimupi
Imphal, Oct. 31 *(Nisin Thuhiltu)* : Manipur Governor Dr. Najma Heptulla in tuni’n ama vena nei All India Service Officers & Wives’ Association member te Raj Bhavan ah holimna a neipi a, zia hun a chun, culture, attires, music, dance, food, habits, passions, travelling & charity tawh kisai genkhawmna’n hun a mang ui. Member Manipur Governor Dr. Najma Heptulla kimupi te lak a chun, Chief Secretary, Government of Manipur, R.R Rashmi; ADG(IPS), Pramod Asthana; PA to Chief Minister, Ashok Kumar; SP, Imphal East, (IPS), Kabib; Principal Secretary,Tribal Development, L Lakher; Commissioner,Fishery, Athui Panmei; Additional P.C.C.F.(IFS), L Baite; M.D. ,Manipur Police Housing, P Mallana Goud; IFS ,Dr. Lokho Puni;DC,Imphal West, Geoffrey Ningthoujam; Commissioner of Taxes,(IAS), Hrisheekesh Modak;Additional Chief Secretary, Dr. Suhel Akhtar and DGP, Government of Manipur leh L.M.Khaute zi te a pang ui. Governor Dr. Najma Heptulla in State sung ah social leh community development a um theina ding ah panlakna’ Raj Bhavan in theitawpsua kithuapina peding hin a gen hi.

News suaklo ding
Hill Town, Oct. 31 *(Nisin Thuhiltu)* : Manipur Hills Journalist Union (MHJU) nuai ah um Media House te Chavang Kut/Kut ziak ah 1st November 2017 ah suty ding a hina chung ua, Nisin Thuhiltu office le 1st November 2017 ah kikhak ding a hi. Zia ziak a chun, 2nd November issue news umlo ding a hi.

Film Forum in actor 2 ban
Imphal, Oct 31 *(Nisin Thuhiltu)* : Film Forum Manipur in forum rules & regulation a zui diklo ziak un actors 2 te ban a puankhum hi. Forum in director leh producer zosia chu ban ah um actor 2 te contract suai kaipilo ding leh suai kaisa a um leh le cancel bawl ding in hiatsakna leh chialna a bawl hi. Ban ah um actor 2 te chu - Khundongbam Ajit, s/o Kh. Thambiyu of Keishamthong Irom Pukhri Mapal leh Priyobratta Mairembamod Moirang Leirambam Leikai a hi. Actor 2 te ban ah a umna thu chu Film Forum Manipur Chairman S. Mangoljao in a puan a hia, Forum Secretary General Ng. Ghanashyam leh Information & Communication Secretary Rakesh Naorem in mipi te kithuapi ding in dawtna a siam ui.