State culture leh tradition hausakna suklat leh promote pawimaw: Chief Minister

Imphal, Sept. 11 *(Nisin Thuhiltu)* : INA Memorial Hall, Moirang ah tuni’n ‘Swami Chinmayananda Memorial Lecture’ kiti a um a, zia hun chu Manipur Chief Minister N. Biren Singh in khuallian hina tawh a uap hi. Chief Minister in a thugenna a chun, tuhun ah state culture leh tradition hausakna suklat leh promote ding pawimaw in a gen a, mipi te chu thuneina bep dawi ah panlalo ding ah chialna bawl in foreign gam te zabawl thei ding ah state mipi’n panlakna a nei ding pawimaw in a gen hi. Ngaidan phalo nutsia hileh ngaidan pha leh kisanna (change) um thei ding a hidan gen in, state mipi te chu mimal phat chuamna ding mai hizawlo ah state khantona ding ah le panla chiat ding in chialna a bawl hi. Kiho-khawmna, lectures leh conferences ti te nei mun ding leh tuhun ah khangthak te chu a phalam kawkmu ding pawimaw in a gen hi. Chief Minister in tuni a pat INA Museum ah lim kilak phal hita ding in a puang hi. Chun, Swami Vivekananda, Swami Chinmayananda”, Thinker leh Director India Foundation Ram Madhav te panlakdante taklatna nei kawm in, tunung kum 5 zaw leh India chu poverty free leh corruption free gam hung hiding leh kum 2022 tiang ah poverty kiti umtalo ding, Government in terrorism leh corruption kiti nasatak ah dodal zing ding hin le a gen hi. Chun, chamna leh muanna banah gamsung khanto theina ding ah mipi te’n panlakna a nei ding pawimaw in a gen hi. Zia hun matna chu Minister for Forest & Environment Th. Shyamkumar, Regional Head, Chinmaya Mission (Chennai) His Holliness Swami Mitrananda, Advisor (HR and Economic Affairs) to CM MLA P. Sharatchandra Singh, Chairman MPSC Lt. General (Retd.) Himalaya Konsam, Commandant, Military Inteligence Training School & Depot, Pune Lt. General L.N. Singh, Professor Amar Yumnam of MU, Vice-Chairman Manipur Infrastructure Development Agency (MIDA) M. Asnikumar Singh te’n le a uap ui.

Gari taiphallo hizawlo ah Park phallo hizaw
Lamka, Sept. 11 *(Nisin Thuhiltu)* : Lamka Public Ground ah Manipur Chief Minister RECEPTION PROGRAMME ding ziak ah traffic heilam dang ah um a hidan District Transport Officer (DTO), Churachandpur Grace Laihlizo in thusua a bawl hun ah Kangvai a pat Chiengkonpang tiang ah gari taitua a umlo ding ti chu sukkhial khak a hidan Shyam Lal Poonia, IAS, DC/CCPur in hilchianna a bawl hi. Zia dungzui a chu Tiddim Raod leh Tipaimukh Raod/IB Road ah 12 September 2017, zingkal lam dak 9:00 a pat nitaklam dak 3:00 sung ah gari park phallo ding ti hizaw a hia, gari ahileh ngaina gual ah taitho ding a hi.

DLCC -cum- DLOs meeting nei
Lamka, Sept. 11 *(Nisin Thuhiltu)* : Shyam lal Poonia, IAS, DC/ Churachandpur mapuina’n BRGF Resource Centre, DC Office, Tuibong ah tuni’n District Level Coordination Committee (DLCC) cum District Level Officers’ (DLO) Meeting nei in a um a, zia hun chu SP, District sung ah SDO/ BDO, banah Government Department chuam chuam a pat Officer leh Bank Branch Manager te a pang ua, zing, September 12 leh Manipur Chief Minister N Biren Singh vaidawnna ding tawh kisai ah kisak lawkna chuam chuam um te leh maban ah sepding te a genkhawm ban un, India Prime Minister for Excellence in Public Administration, 2018 leh Swachh Mission seppitinna tawh kisai banah thu pawimaw chuam chuam genkhawmna a nei u’i. Meeting a hileh zani masa, September 9, 2017 ni’ Kangvai ah nei ding ti himaleh CM in CCpur District a phâkna ding tawh kisai ah DC in Imphal ah meeting a nei ziak ah a hun chawn in a la hi. Meeting hun a chun, District sung ah Digital Payment tawh kisai ah Bank Branch umte a pat gâsua tak ah sepdaw ding dan leh 2018 ah Prime Minister’s Award for Administration 2018 ah District Administration pang ding tawh kisai a genkhawm ua, zia hun a chun DC in District Level Officer zosia kiang ah District sung khantona ding ah a mawpuakna chiat uh sem piting chiat ding in a hiatsak hi. CM vaidawnna ding tawh kisai ah Shyam Lal Poonia, DC/ CCpur in tuni thusua a bawlna a chun, zing, September 12, 2017 leh CM in Churachandpur pha ding a hina ah traffic a kitiak lo na ding leh bitna ding gelna ah zingkal lam dak 9:00 a pat sunnung dak 3:00 kikal chu Tuibong Bazaar a pat Public Ground tiang ah Teddim Road zul ah kuama’n gari park lo ding ti’n hiatsakna a bawl hi.

GST tawh kisai ah Awareness Campaign -cum- Training nei
Lamka, Sept. 11 *(Nisin Thuhiltu)* : Taxation Department, Churachandpur saina’n District Training Centre (DTC) Hall, Tuibong ah Goods and Service Tax (GST) tawh kisai ‘Awareness Campaign -cum- Training on Filing of GST Return in GSTR-3B/GSTR-1/ GSTR-2/GSTR-3/GSTR-4’ kiti tuni’n nei in a um hi. Zia hun a chun Nawaid Iqbal, PWC Consultant, Guwahati leh Chinlianhat Vaiphei, Superintendent of Taxes, Churachandpur te’n GST tawh kisai ah ziltilna piau a, District sung ah van chuam chuam zuaktu, Dealer tamtak te’n Workshop chu a uap u’i. Goods and Service Tax (GST) mat pat a hi nung ah Taxation Department, Churachandpur ah Superintendent of Taxes etsuina nuai in DC Office Building ah DC in GST Facilitation Centre hawnna a la nei a, zia tak mun a chun GST tawh kisai Registration leh Tax Filing bawlthei zing ding a hi.

IMI tawh kisai Workshop chiatha zing
Lamka, Sept. 11 *(Nisin Thuhiltu)* : Churachandpur District sung ah Block 3 a pat PHC leh CHC ah Staff Nurse/ ANM te’n CMO Conference Hall ah tuni’n Intensified Mission Indradhanush (IMI) matna ding tawh kisai Workshop a nei ua, zia hun a chun Dr. VC Pau Tonsing, District Immunization Officer, Churachandpur, Dr Vanlalkungi Saikot PHC M/O In-charge, Panthoi, CA, DFWO, Nalini Devi, DPHNO te’n ziltilna a piau hi. Workshop a hileh lawting tak ah District sung ah IMI seppitin ding dawina ziak a hia, tuni workshop hun a chun Block 3 - Samulamlan PHC Block, Saikot PHC Block leh Sagang PHC Block a pat Staff nurse/ANM mi 50 val a pang u’i. Zing leh CM vaidawnna programme um ding a hi ziak ah Workshop um lo ding a hia, September 13 leh Tipaimukh Block te’n nei ding a hiu a, September 14 leh IMI tawh kisai Vaccine leh Cold Chain Handler te’n nei ding a hiu.

Congress in Peace Ground ah Political Conference nei di
Lamka, Sept. 11 *(Nisin Thuhiltu)* : District Congress Committee, Churachandpur in tuni’n a office ua press leh media te kimupi in a hung tung ding September 14, 2017 leh Peace Ground, Tuibong ah Political Conference neina ding tawh kisai genlatna a nei u’i. Seiboi, Secretary, District Congress Committee in, District a ding ah a khat-veina ding Political Conference chu O Ibobi Singh, Ex-Chief Minister, Gaikhanngam, Ex-Deputy CM leh District sung ah Congress MLA leh Party sung ah Top Official te’n uap ding uh hi’n a gen a, zia hun chu district sung block chuam chuam ah Congress Party puitu leh worker te banah a ngainatu te uap chiat ding in chialna a bawl hi.

Anti-Drug MotorCycle Rally nei

Lamka, Sept. 11 *(Nisin Thuhiltu)* : Lamka, Sept. 11: Mualkoi ah um STC/BSF CCpur leh Kendriya Vidyalaya, Churachandpur kithua in tuni’n khawpi sung ah Anti-Drug Motorcycle Rally a nei u’i. SR Ojha, IPS, IGP, STC/BSF in rally ah pang ding BSF Personnel leh Student te kiang ah khamthei dodalna ah pan la zing ding in a tilkho a, ama pang in Rank officer te’n Anti-Drug MotorCycle Rally thâkdawna a nei u’i. Kendriya Vidyalaya School Campus a pat rally chu kipandawk in STC/BSF gate a pat Pearsonmun ah taito in, zia a pat chu Tipaimukh Road man in Bungmual, Hill Town, Hiangtam Lamka haw in, Police Station Traffic point a pat Tedim Road zui to in Central Lamka, New Lamka ah a tai ua, Lanva a pat Gangpimual zuan in, STC BSF ah a zo ui. Rally hun ah Bike leh Scooty a kigawm ah 30 a mang ua, gari khat ah BSF Personnel leh Student khat chiat chuang in a chiana mun zosiau ah pau-ngaina mang in District mipi te kiang ah khamthei hawilo dan leh a lau um dan banah khamthei a pat kikawi kang ding in a dawn ua, gari nung ah chuang student te’n mipi lak in khamthei hawilo dan kizikna lekha a hawm vel u’i.

Mezuak pawl te’n DC kimupi

Lamka, Sept. 11 *(Nisin Thuhiltu)* : District Council in New Bazaar Sa Lane thang ah mezuak pawl te chu September 15, 2017 tiang ah a me zuakna mun teu su-awng ding ah thupiak a nei tawh kitawn in mezuak pawl te’n tuni’n Deputy Commissioner, Churachandpur kiang in lekha pia in me a zuak theina ding uh lampi dang ngaitua piak ding in a dawn u’i. Zia hun a chun, Shyam Lal Poonia, IAS, DC/ CCpur in ADC tawh kihetua ah lampi dang ngaitua piak ding hi ah tiam kawm in District Council a pat license nei nailo mezuak te’n le a kinthei lam ah a ngaitua ding uh ti’n a vaithâk hi. Mezuak pawl te’n DC a kimupi hun ua chun, ADCC a pat mezuakna dawkan nusia ding ah thupiak um chu lamdang sa uh a hi dan a puang dawk ua, DC lui, Jacintha Lazarus in ama hun lai ah phalna a la piaksa a hi dan a gen u’i.

GNM student te’n Teachers’ Day mang
Lamka, Sept. 11 *(Nisin Thuhiltu)* : GNM Training School, Hill Town ah GNM First Year leh Second Year Student te saina’n Multi Purpose Hall, GNM Training School ah Teachers’ Day matna a um a, zia hun chu GMN Training School ah Principal V Goihzachiin pang in tutor leh staff te banah school ngainatu midang hunkhawp in a uap ua, Principal V Goihzachiin leh Tutor te a pat thugenna a um hi. Teachers’ Day matna a chun student te’n kipawl limna in Solo, Duet leh Trio ti te ah lasakna a nei ban un special item chuam chuam le sulang u’i.

Mega Trade Fair khak hita

Lamka, Sept. 11 *(Nisin Thuhiltu)* : Kevi Society, Kohima leh Team CT Lian in YMA Hall, Hmuia Veng a Mega Trade Fair leh Talent Show-cum-Dance Competition 2017 kithua a sai uh chu tuni’n a zo thiang ui. Mega Trade Fair ahileh Vasti Headmistress, Songtal Government High School in August 23, 2017 ni ah Chief Guest hina tawh a la hawn a hia, Trade Fair ah innsung leh ann huanna, insung vanmat chi chuam chuam zawk in a um a, Talent Show-cum-Dance Competition ahileh September 1, 2017 tiang ah Audition Round, September 2, 2017 apat Kidemna Round chuamchuam chiato in, nitak sin leh kidemna a um a, zia hun chu mi pawimaw chuam chuam te’n khuallian hina tawh uap in Talent Show-cum-Dance Competition a neito ui. Closing hun chu Khaipao Haokip, Chairman, ADC Churachandpur in Chief Guest hina tawh a uap a, ticket la zosia ding ah Lucky Draw hawnna nei in, winner Vanlallian of Chimtung Veng kiang in prize piakdawna a nei hi. Talent Show-cum-Dance Competition ah result puanna nei in, Top 10 - Chingthiankim, Baby Lalchhandami, Zirsanglian, Ngaipi, Minlun, Ruthi, Lianmung leh Third Position ah Kevin, Second Position ah LEO leh Champion The Obvious te chu donar chuam chuamin prize piakdawna a nei ui.

Khuga Battalion in "Mission Ujala" launch
Lamka, Sept. 11 *(Nisin Thuhiltu)* : Khuga Battalion in Under Self Observed and Initiated Little (SOIL) nuai ah tuni’n "Mission Ujala" kiti launch a bawl a, zia chu tawh kitawn in Indo-Myanmer border tuam ah um development scheme kituptak ah mulo te’n electricity or light a mutheina ding in panlakna a pan ui. Khuga Battalion thusuak in a taklatna a chun, 'Mission Ujala' kiti chu Battalions Company ahiloleh stations ah kikawi generator te mang ah electric meivak tunlona khua chuam chuam te electricity ahiloleh light piak ding ti thiltup ah nei hin a gen hi. Zia dungzui a chu Zoukhonou, Hiangtam Khonou leh C.Lanchah village te electric meivak piak ah um hin a gen hi. Ziagual panlakna chung a chu khuami (villager) te’n zanthim ah hun a mat zing uh chu sukven piak ah umta leh sepai te panlakna chung ah khuami te kipak mama uh ti a hi.

September 13 leh Kuki Black Day mat hiding
Kangpokpi, Sept. 11 *(Nisin Thuhiltu)* : September 13 leh Kuki Black Day mat hiding a hi. Kangpokpi District ah Kuki Students’ Organization Sadar Hills saina nuai ah KBC Centre Church, Kangpokpi DHQ ah mat hiding a hia, ‘Remembering the past while forging ahead’ ti thunei mat hiding leh 12:30 pm ah hun matna kipan ding a hidan KSO Sadar Hills, President Thangminlen Kipgen in a gen hi. Chuleh, suun dak 12:00 a pat nitak lam dak 2:00 kikal ah National Highway ah gari taisak hilo ding, zia hun sung a chu bang gari hileh thakawl chuam umlo ding in le a gen hi. Kuki Black Day chum un chuam chuam ah le mat hiding a hi.

Art & Culture leh games & sports in chawndan siamhawi: Education Minister

Imphal, Sept. 11 *(Nisin Thuhiltu)* : Social Development Organisation (SODO), Konthoujam saina ah tuni’n Ibudhou Korouhanba Laibung, Moidangpok ah Education, Games & Sports, Art leh Culture lam ah lawtinna chungchuang diak nei te ding in Annual Prize Distribution & Felicitation Function 2016-17 a um hi. Zia hun chu education Minister Thokchom Radheshyam Singh in khuallian hina tawh a uap hi. Ama’n a thugenna a chun, Art & Culture, Games & Sports leh Education chu mipha umsak tu a hidan gen kawm in tuhun ah umchan khanchan in taksapna nei a hidan a gen hi. Art & Culture leh games & sports in Manipur ah chawndan siamhawina ding ah panmun pawimaw tak nei a hidan a gen hi. Zia hun matna chu MLA Konthoujam A. C. Dr. Sapam Ranjan Singh in le a uap a, Dr. Kh. Shamungou, Chairman, State Environment Impact Assessment Authority, Manipur in a zik “Mitna Uba Lai” kiti lekhabu hawnna le a um hi. Zia lekhabu chu hill regions ah naupang te khawsak dan tawh kisai ki zikna a hi.

Heirok Branch Canal siamna ding ah lemsakna nei
Imphal, Sept. 11 *(Nisin Thuhiltu)* : Irrigation and Flood Control Minister Letpao Haokip chairman hina nuai ah tuni’n Conference Hall, Old Secretariat ah Thoubal Multipurpose Project - Heirok Branch Canal tawh kisai genkhawmna a um hi. Zia meeting chu Revenue Minister Karam Shyam, Education Minister leh MLA of Heirok A/C Th. Radheshyam, Revenue Commissioner Th. Chitaranjan Singh, Secretary of IFCD Gopen Meitei, Thoubal DC L. Nabakishore Singh, Chief Engineer of IFCD G. Robindro Sharma, Director of Manipur Remote Sensing Application Centre (MARSAC) Dr. N. Randhir Singh, Director of Settlement Salam Somorjit Singh leh IFCD high ranking official te’n a uap uap ui. Official chiakhawm te’n hun bang hem chan sung genkhawmna a nei nung un Heirok Branch Canal siamna nasep pat ding in lemsakna a nei ui.

GST tawh kisai ah interaction nei

Imphal, Sept. 11 *(Nisin Thuhiltu)* : State Institute of Journalism, DIPR Complex, Moirangkhom ah tuni’n Directorate of Information & Public Relations official te’n Editors' Guild Manipur member te leh Imphal based Media Houses chuam chuam ah palai te tawh Goods & Services Tax (GST) tawh kisai in interaction a nei ua, Superintendent, Department of Taxes, Government of Manipur, Y. Indrakumar in GST umdan tawh kisai genna nei in, Media - print leh electronic zosia chu GST nuai ah a ki registerd ding uh pawimaw in a gen hi. Chuleh, Input Tax Credit (ITC) benefit um te genna a nei a, GST returns file bawlna ding tawh kisai in le ziltilna a nei hi.

Ki sawisaklupna chung ah kiphinna nei

Imphal, Sept. 11 *(Nisin Thuhiltu)* : Yairipok Police Station huap sung ah um Chandrakhong Mamang Leikai mi, kum 23 ah upa Shadokpam Romesh s/o Tomba, a chiata 9th September 2017 zan ah Malom Tulihal Makha Leikai ah gucha ngaw ah um leh sawisak a hi nung ah damzo lo ah tuzingkal ah a thina chung in JAC phudaw in a um a, JAC mapui na’n tuni’n mipi’n protest rally a nei ui. Zia hun a chun, Chief Minister local MLA, education minister Thokchom Radheshyam kiang in memorandum piakna a nei ui. JAC thusuak in a taklat dan ah sawisaklup ah um Shadokpam Romesh chu Malom Tulihal Makha Leikai ah Maipak kiti gari workshop ah sem, Shija Hospital ah gari repairing bawl a chia, innlam a zawtna pawl khat in a sawisak uh hin a gen a, RIMS hospital tut a hinung ah Raj Medicity ah referred bawl ah um chu tuzingkal ah muallian a hi.

MDS Scam: Bang agency hitaleh khualna nei uh hen: Ibobi Singh
Imphal, Sept. 11 *(Nisin Thuhiltu)* : Manipur Chief Minister lui O Ibobi Singh in Rs 186 crore, Manipur Development Society (MDS) scam chung chang ah bang agency leh cooperate hitaleh investigation a nei ding uh lemsa a hidan a gen a, MDS case ah kigawlkhalo a hidan taklang kawm in MDS cheque chung ah suai a kaina umkhalo hin a gen hi. Kum 2002 a pat March 2017 tiang ah Manipur Chief Minister panmun a la lua, O Ibobi Singh chung a chu Biren Singh BJP-led government in evidence kichian tak neilo maleh FIR a bawl a hia, khualna nei hizing le a hi. Chuleh, interim order dungzui ah anticipatory bail ah Manipur High Court in September 6 a khah O Ibobi Singh chu bail a pawm piak a hi. Chun, September 20 leh a chung thu lel hikit ding in court in date fixed a bawl hi.

District 4 ah 321 Adult Education Centres hawn ah um
Imphal, Sept. 11 *(Nisin Thuhiltu)* : Saakshar Bharat (Literate India) Programme nuai ah January 2010 a pat Manipur District 4 - Chandel, Senapati, Tamenglong leh Thoubal ah 321 Adult Education Centres (AECs) hawn in a um hi. 321 AEC um lak ah 20 AEC te chu CONCOR ( Container Corporation of India Limited) financial assistance bawlna tawh MODEL AEC level ah upgrade bawl a hi. Saakshar Bharat (Literate India) Programme ahileh centrally Sponsored Scheme, Department of School Education and Literacy (DSEL), Ministry of Human Resource Development Government of India nuai ah um, India Prime Minister in 8th September, 2009 a khah a la hawn a hia, Adult Education Centres (AEC) te a pat implement kibawl a hi. Gram Panchayat level ah hawn hivek a hia, Adult Education Centre ahileh lekha helo te’n Basic Education a nei theina ding ua hawn a hi.

Manipur a pat AFCAT 02/2017 candidate te’n supplementary AFCAT exam bawl thei ding
Imphal, Sept. 11 *(Nisin Thuhiltu)* : Candidates from Manipur, who were allotted exam centres in North East India ah exam centre chuam chuam changkha, rail leh road traffic buai ziak ah 27 August 17 ah AFCAT 02/2017 exam petheilo Manipur a pat candidate te’n 17 September 17 (Sunday) leh Guwahati Centre ah supplementary AFCAT exam bawl thei ding a hiu a, ziana ding a chu candidates te’n email address- This email address is being protected from spambots. You need JavaScript enabled to view it. ah min leh details - AFCAT Number, AFCAT Centre leh EKT Branch ti te 14 Sep 2017 tiang ah a piaklut uh pawimaw ding a hi. Chun, exam centre leh time of reporting ti te chu a chuam ah email/sms ah candidate te hiatsak hiding a hiu. Chun, 27 August 17 ah AFCAT 02/2017 exam a la bawl ta leh zia supplementary AFCAT exam a chu pang theilo ding a hiu a, thuchian kimzaw website, www.careerairforce.nic.in ah etchian thei ding a hi.