Hill Leaders’ Day leh Meeyamgi Numit a pat buaina chuam chuam sukven ah um: CM

Imphal, Sept. 10 *(Nisin Thuhiltu)* : Hill Leaders’ Day a hi tawh kitawn in tuni’n Manipur Chief Minister N. Biren Singh in Chief Minister Secretariat ah zingkal dak 9:00 a pat nitaklam dak 1:30 kikal in complaint 173 ngaithakna leh mi 400 te ama mimal tak in a kimupi hi. Nitak lam ah Manipur Chief Minister in thuthak lakhawm mite kiang ah Hill Leaders’ Day leh Meeyamgi Numit chungchang a taklatna a chun, Hill Leaders’ Day leh Meeyamgi Numit chu lawting mama a hidan genkawm in, tha-sin ah date10 chu Hill Leaders’ Day - village chief leh hill district ah civil society organization leader te kimupina ding ah guat bik himaleh Hill Leaders’ Day hun ah hill district a pat micham tamtak te’n le ama kimupi a hidan uh a gen a, micham tamtak te’n a genthei haksatnau tut a hidan uh a gen a, Hill Leaders’ Day leh Meeyamgi Numit a pat buaina tamtak sukven ah um thei hin a gen hi. Tha-sin ah date15 chu ahileh Meeyamgi Numit ti ah mat hisek in a gen hi. Hill Leaders’ Day hun ah Meitei numei khat in tunaicha Shirui village ah nimchip ziak a liamna tuak pawsal naupang khat a ama kiang ah a pui tawh kitawn ah Ukhrul DC chu kithuapina theichan ah kithuapina peding ah hiatsakna bawl in a gen a, ziagualma a chu JNIMS thuneitu te le Senapati District ah pawngsualna a pat suakcha numei chapang nu chu a thawn ah treatment bawl ding ah hiatsakna bawl in a gen hi. Mitam zaw te demand chu district kisiamdawk thak te chung ah infrastructure, school buildings repairing, market-sheds sak ding, cultural complex sak ding, lampi siam hawi ding ti te hin a gen a, Tamei ah government school toilet a mu hun ah tizat um sa a hi tawh kitawn ah Principal Secretary (School Education) chu a vaima theipen ah numei leh pawsal te a ding a chuam gel ah toilet pani gel sa ding ah hiatsakna bawl in a gen hi.Kasom Khullen ah waiting- shed kituptak a umlo ziak ah student leh teksia lam in haksatna tuak zing ua complaint a mu tawh kitawn ah a kisaipi DC chu a vaima theipen ah waiting-shed sa ding ah hiatsak hin le a gen a, lampi siam hawina nasep kituptak ah a chia thak theilona ziak chu gua (rain) zuk ziak hin a gen hi. Gua zuk hun himaleh Imphal-Mao section NH-2 ah lampi siatna mun te siamphatna nasep chiapi hi zing a hidan taklang kawm in Hill Leaders’ Day leh Meeyamgi Numit hun ah entrepreneur khenkhat kithuapina dawntu te le kithuapina dan ah loan piak ah um a hidan uh a gen hi. Hill District ah healthcare facility tawh kisai a genna a chun, Tamenglong District ah 50-bedded hospital hawn thei ding ah umta hin a gen a, healthcare sector siamhawi thakna ding leh manpower taksapna sukvenna ding ah Manipur Public Service Commission (MPSC) nuai ah doctor 300, tunung sawtlo ah lak (recruit) hiding in a gen hi. State Government in medical staff te ding ah khutmat leh accommodation/quarter facility kituplo te le a kitup theina ding ah panlakna nei zing in a gen hi. Air ambulance facility tawh kisai a genna a chun, Governor Najma Heptulla in ngaikhawk mama hin a gen a, Central Government in Air ambulance facility a vaima theipen ah umsak a hitheina ding ah panla ding a hidan a gen a, ziana ding a chu Centre in Rs 24 crore bithiat ah nei hin a gen hi.

Myanmar ah SPO in 1st Thazing-Lap /Kut mang ding
Moreh, Sept. 10 *(Nisin Thuhiltu)* : Suantak People Organisation (SPO),Sagaing Division (Myanmar) saina’ a hung tung ding 29th September 2017 leh Namihan Tamu Town ward No. 5 ah 1ST THAZING-LAP /KUT mat hiding a hi. Zia hun chu J. N Baite EM ADC, Chandel in Chief Guest hina tawh uap ding a hia, Dr S L Vaiphei in Guest of Honour hina tawh uap ding leh Ngamkhothang Baite Former President SPO Sagaing Division in Functional President hina tawh hun matna ding a hi. Chuleh, Rev. S Prim Vaiphei, President, AMCO in Special Guest hina tawh uap ding a hi. Hun mat sung in Tungcho Cultural troupe, Phaijang Cultural troupe te’n Nam laam suklatna nei ding a hiu.

CDDU in lung-awilo thu taklang
Lamka, Sept. 10 *(Nisin Thuhiltu)* : Churachandpur District Disabled Union (CDDU)in tuni thusua a bawlna a chun, Disabled Community te ding ah District sung ah Accessibilty Standards kituptak umlo a hidan taklang kawm in Deputy Commissioner, Churachandpur kiang ah 2 vei memorandum piakna nei ah Person with Disabilities (PwDs) Community te haksatna sukven piak ding ah phutna nei maleu tuni tiang ah panlakna um lo in a taklang a, zia chung a chu a lung awilo thu'u a taklang hi. Chuleh,Disability Certificate piakna ding ah District Medical Board (Disabilities) phudaw ah um himaleh function lo in a taklang a, Government leh General Public chu Disabled Community te haksatna hiatpi leh ngaikhawk a, a haksatnau sukven theina ding ah panla ding in chialna a bawl hi.

CM Reception ding ah kisaklawkna chiatha zing
Lamka, Sept. 10 *(Nisin Thuhiltu)* : Lamka Public Ground ah 12th September 2017 leh Manipur Chief Minister N. Biren Singh, Reception Programme neina ding tawh kisai in kisaklawkna a chiatha zing a, Hall sakna leh Stage Cheina leh Chief Minister zawt-khak ding lampi siatna mun te siamphatna nasep a chiatha zing hi. Hall leh Stage siamna chu Arun Enterprise, Imphal khut ah piak in a um a, a enzui ding ah YPA mawpuakna piak a hiu. HYA chu Usher/Volunteer enzui ding ah mawpuakna piak a hiu a, zia chu tawh kitawn in President, Laldawnlien in tuni sunnung in YPA GHQ Hall, Hiangtam Lamka ah Usher/Volunteer ding te Briefing bawlna a nei hi. Manipur Chief Minister Vaidawnna nei hun ah Khawpi sung ah Tribe chuam chuam a pat Numei 5 leh Pasal 5 chiat teldaw ah um te’n Usher mawpuakna la ding a hiu. Programme guanggal dungzui ah Chief Minister “Reception Programme” chu Rev. LB Angam, Executive Director, ECA in pauchapna tawh hawng ding a hia, V. Hangkhanlian, Minister, Agriculture, Veterinary & Animal Husbandry in vaidawn thugenna nei ding, Khaipao Haokip, Chairman, ADC Churachandpur in Memorandum leh thilpiak piakna nei ding, Joseph Lalrothang, President, Hmar Inpui, Vanlalrinliana, President, Mozo People Convention, B. Dongzalian Simte, Chairman, Zomi Council leh Daniel Gangte, President, Kuki Inpi Churachandpur te a pat thil piak piakna um ding leh Manipur Chief Minister N. Biren Singh a pat thugenna um ding a hi. Hiangtam Lamka Hausa, Thangkhosuanmung Guite, MDC in huntawp ah kipakthu genna nei ding a hia, Rev. V. Nenglian, Divisional Superintendent, Lamka South Division, EBC in “Reception Programme” khakna nei ding a hi. A kihiatdan ah Manipur Chief Minister N. Biren Singh in Reception hun ah thugenna a nei tak leh Churachandpur District a ding package puanna nei ding hin a kigen a, himaleh banggual package a puang diam ti chu hiatchian a hi puai.

World Suicide Prevention Day 2017 mang

Lamka, Sept. 10 *(Nisin Thuhiltu)* : September 10, World Suicide Prevention Day 2017 a hi tawh kitawn in tuni, September 10, 2017 sunnung dak 1:30 in Legal Aid Clinic, Churachandpur Government College ah Community Organization Rehabilitation Empowerment (CORE) saina ah Symposium on Suicide kiti hun matna a um hi. Mercy Tingzou Gangte, Psychologist hun matna amapui a, Khual Tungnung, Volunteer Mobilizer, CORE in vaidawn thugenna nei in, George Samte, Mental Health Professional in hun chiasa CORE panlakna um te report piakna a nei a, Suanlyan Tungnung, Mental Health Professional in World Suicide Prevention Day ti thupi mang in thugenna a nei a, Ricky Vanlallawm, Principal, Churachandpur Government College a pat thugenna um in, Vivian Zou, Coordinator, DSSS leh P. Thangsuanhau Phiamphu, District Project Officer, IMCP te’n le thugenna a nei ui. Philanthropic leh Student Organization chuam chuam ah leader leh student te’n zia hun matna chu a uap ui.

Bus 10 mang ah CM Reception programme uap ding te puakkhawm hiding

Lamka, Sept. 10 *(Nisin Thuhiltu)* : CM Reception Organizing Committee, Convener, Khaipao Haokip, Chairman, ADC Churachandpur mapuina ah tuni, September 10, 2017 sunnung dak 3:00 in ama office chamber, ADC Office, Tuibuang ah Press Briefing a um hi. Zia hun a chun, Information & Publication Department in a khua khua ah mipi te thakkhawmna ding ah Bus 10 mat hiding leh pick-up point zosia zingkallam dak 9:00 a Bus kidaw ding a hidan a taklang ua, Kangvaia pat Public Ground kikal ah Bus 3 mat hiding, Kangvai, Koite leh Bethel ah Bus khatchiat kidaw ding leh Saikawt a pat Public Ground kikal a Bus 2, Valpakot, Tuitengphai leh Muolbem banah Saikawt leh Muolvaiphei chuan ah Bus tai ding a hidan a gen ui. Mata Mualtam a pat Public Ground kikal ah Bus 3, Mata Mualtam, Buallian ah bus khat Mata banah Lingsiphai, Bisanmual leh Tualnuam a bus khat banah Thingkangphai leh Kawnpui a pat bus khat in mipi chawmkhawm ding ti a hi. Tumlam ah Pearsonmun leh Public Ground kikal ah Bus 2 mat hiding, bus khat in Pearsonmun, Gangpimual leh Lanva chuan ding, bus khat in Bungmual leh Phailian a pat mipi chawmkhawm ding ti a hi. Bus khat a tawm pen ah trip 2 kivel ah taisak ding ah guanggalna um ah taklat a hi. Convener Khaipao in Transportation tawh kisai ah Khua leh Veng chuam chuam a pat mipi chiakhawm te a kilena ding uh buailo ding in gen a, puidaw ah a umna mun chiat ua nung thak kit hiding un a gen hi.

EBC Dorka Khawmpi Lian khak hita
Lamka, Sept. 10 *(Nisin Thuhiltu)* : EBC Dorka Khawmpi Lian, a 41-veina EBC Gospel Centenary Hall, New Lamka ah um chu tuni’n a zo thiang ui. Khawmpi ahileh a chiata September 7, 2017 nitak ah Rev Paukhanmang Guite, Director of Ministries in a la hawn a hi. Khawmpi sung in Rev S Vung Minthang, General Secretary, EBC chu speaker in a pang a, Rev Kumam Suresh Singh in Bible Study amapui hi. Chun, Dr. Niangsangching, Lily Tombing, Muani Tombing, Vungkhawmching, Lalhlimpui leh Manzavung Thomte te’n thupi chuam chuam mang in Seminar hun amapui ui. Chuleh, Khawmpi hunsung in kidemna chi chuam chuam a nei ua, Nepal, Karbi Anglong, Manipur banah Local leh Khawpi Kochuam chuam chuam a pat in khawmpi mang ding mi a chiakhawm ui.

Society masawnna ding ah mizosian panlak ding: Education Minister

Imphal, Sept. 10 *(Nisin Thuhiltu)* : Education Minister Thokchom Radheshyam Singh in tuni’n Managing Committee of Rajkumari Sanatombi Devi Vidyalaya, Haotal (Pangei) saina’ ah Asha Jina Complex, Imphal ah Governor’s Award, 2017; Rajkumari Sanatombi Devi Award, 2017 leh Prize Distribution Ceremony chu khuallian hina tawh a uap hi. Ama’n a thugenna a chun, education kiti chu sepna muna ding mai hizawlo ah society ah buaina chuam chuam um te sukvenna ding le a hidan a gen a, mi zosia’n society masawn theina ding leh society ah panlak theina tiang ah panlakna nei ding ah lunggel a nei ding pawimaw in a gen hi. Lekha thiam khenkhat in society khantona ding ah panlak ding gelphalo a hidan uh taklang kawm in lekha thiam te chu society ah buaina chuam chuam um te suveng tu leh a hiatthiamlo te hiatthiam sak tu ah a pan ding uh leh mitamtak kipakna source ah a pan ding uh pawimaw in a gen hi. Zia hun matna a chun, GovernorAward, 2017 for best Student of R. K. Sanatombi Devi Vidyalaya chu Kulsum Alisha Khan of R. K. Sanatombi Devi Vidyalaya piak in a um a, Topper HSLC Exam, 2017 ahileh Priyanka Moirangthem kiang ah piak in a um hi. Award for best teacher chu Dr.Chungkham Indira Devi, Lecturer in Chemistry, Johnstone Higher Secondary School kiang ah piak in a um hi. Sports person 5 - Chungkham Parbati ( Armwrestling) ; Khusboorani Laishram (Fencing); Irom Matouleibi Devi (Cycling); Sulina Ningombam (Mountaineering & Trekking) leh Oinam Khumanleima Chanu (Taekwondo) te le award piak in a um ua, Mrs Ninglumla, ASI, Shirui Village, Ukhrul District chu excellence as Traffic Police award piak in a um hi. Awards & prize distribution ceremony chu scholars, teachers leh student tamtak in a uap ua, MLA, Konthoujam Assembly Constituency, Dr. Sapam Rajan Singh in le a uap hi.

CM Relief Fund ding ah donate bawl
Imphal, Sept. 10 *(Nisin Thuhiltu)* : Manipur tui-let ziak ah haksatna tuak te kithuapina mat ding in mimal leh pawl chuam chuam in Chief Minister’s Relief Fund (CMRF) ding in donation a bawl zing ua, zia chu tawh kitawn in tuni’n Ayush doctors (National Health Mission), Manipur in Rs. 1,01,001 donate a bawl a, All Mizoram Manipuri Association (AMMA), Aizawl in Rs. 10,000 donate a bawl hi.

Meritorious kiti chu text books bep ah a hilo ding: Deputy CM

Imphal, Sept. 10 *(Nisin Thuhiltu)* : Uripok Khwairak Seleungba Leirak Community Hall, Imphal ah tuni’n Second Meritorious Award Distribution Ceremony of United Club and Library (UCAL) a um a, zia hun chu Manipur Deputy Chief Minister Yumnam Joykumar Singh in khuallian hina tawh a uap hi. Ama’n a thugenna a chun, high school leh higher secondary examination chu student te’n career siam patna a nei ding uh pawimaw in a gen a, tuhun ah competition sang mama ta leh examination ah mark mutam le kibelap zing a hidan a gen hi. Meritorious kiti chu text books bep hilo ah thil chuam chuam ah hiatna leh thiamna tawh a kithua ding pawimaw a hidan a gen hi. Zia hun matna a chun, Deputy Chief Minister in Uripok area ah BOSEM, COHSEM leh CBSE nuai ah Class X & XII examinations 2016 & 2017 ah lawtinna nei student 49 te kiang in meritorious award piakdawna a nei a, G. Robindro Sharma, Chief Engineer IFCD, K. Gopal Singh, Retd. Joint Director (Veterinay & Animal Husbandary and A. Mukundo Singh, President, UCAL te’n le hun matna a uap ui.