DC/CCPUR MAPUINA DLO TE’N PANLAKNA CHUAM CHUAM UM TE GENKHAWMNA NEI

Lamka, June 16 (Nisin Thuhiltu): Churachandpur District, Deputy Commissioner, Shyam Lal Poonia, IAS, chairman hina nuai ah tuni’n BRGF Hall, DC,Office in District level officer (DLO) te’n meeting a nei ua, zia hun a chun, department chuam chuam ah panlakna um te leh haksatna um te banah infrastructure, a diak ah Malaria eradication programme panna Health Sector dinmun te genkhawmna a nei ui. Department chuam chuam - National Informatic Centre, District Industry Centre, Family Welfare,Social Welfare, Sericulture, Horticulture, Fishery, IFCD, Veterinary leh Autonomous District Council te panlakna leh a sepdaw teu banah a haksatnau le meeting in genkhawmna a nei hi. Deputy Commissioner Mr Shyam Lal Poonia, IAS in District level officer (DLO) te chu District khantona ding ah panla khawm chiat ding leh mawpuakna kituptak ah sem chiat ding in chialna a bawl hi.Tuni ah DLO meeting chu SDO te panna mi 36 in a uap ui.

JOURNALIST MUANTHANG MUALLIAM

Lamka, June 16 (Nisin Thuhiltu): Manipur Hill Journalist Union (MHJU), Information Secretary lui leh Imphal pansan Electronic Media, ISTV ah Churachandpur Correspondent, Ginmuanthang Guite @ G. Muanthang (41) s/o (late) Thangkhansong Guite of Mission Veng, Hiangtam Lamka chu tuni zingkal dak 5:30 tuam in a la mualliam hi. Ama a hileh Shija Hospital, Imphal ah etkawl himaleh damdawk zo ding ah gingchat a hilo ziak in zani zan ah puakdaw a um in zankhang dak 12:30 tuam ah a inn uh tut in a um a, zingkal dak 5:30 tuam in a hat a la tan ta’i. Vuiliamna a hileh Church of Christ (COC) inntekna nuai ah Lamka thanmual ah nei in a um a, Journalist khat a hi tawh kitawn in News Forum chuam chuam te’n tuni’n a galna a nei ua, ISTV a pat a le staff 17 te’n le a galna siam in Press/Media ah sem a hi na ah government a pat a um thei ding hamphatna te ngaitua piak ding hi’n a tiam u’i. MHJU in le G.Muanthang sun a hi dan puang kawm in zia suklatna ding a chun MHJU Media House nuai ah printed media te’n zing, June 17 issue ah editorial blank ah kawi ding ti’n le a phungdawk hi. Muanthang in a hileh a zi, Zamkhanvung, chapa 3 leh chanu 1 a nusia hi.

FELICITATION-CUM-CAREER GUIDANCE
Lamka, June 16 (Nisin Thuhiltu): Kuki Students’ Organisation (KSO) Henglep Block saina’ June 17, 2017 ah Tuilaphai khua Felicitation-cum-Career Guidance programme um ding a hi. Zia hun chu Chief Guest in T.T Haokip, MLA (Henglep A/C) & Chairman, Hill Area Committee in chief guest hina tawh uap ding a hia, Seilenmang Khongsai, EM, ADC/CCpur leh Paolal Haokip, MDC (Henglep) te’n Guest of Honour leh Functional President hina tawh uap ding a hiu. Career Guidance hun ah Dr. Nehkhomang Haokip, Asst. Professor Rayburn College leh Dr. Thongkholal Haokip. Asst. Professor JNU in student te ziltina nei ding a hiu.

EXAM AH LAWTING TE KIPAKPINA NEI DI
Lamka, June 16 (Nisin Thuhiltu): A hung tung ding June 24, 2017 leh Rayburn College Auditorium, New Lamka ah Songtal Siamsin Award Committee saina nuai ah tukum ah Pawl X leh XII exam a lawting te kipakpina leh a lawsam te siatbatna um ding a hia, zia hun a chun Pastor N. Vumsong, Local Pastor, EBCC Khominthang in tilkhona thu gen in malzawl dawt piakna nei ding a hi. Chun, G. Thiankholian, Chief of Songtal, V. Langkhanpau, Ex-Chairman ADC, Churachandpur, T. Kamchinthang, President, ZYA Songtal Unit banah Award Sponsor te a pat thugen um ding a hi.

JULY 3 A PAT TRAINING KIPAN KIT DI
Lamka, June 16 (Nisin Thuhiltu): State Bank of India-Rural Self Employment Training Institute (SBI-RSETI), Bijang ah khangthak kum 18 leh kum 45 kikal mite’ a ding in a thawn a course chuam chuam a ding training um ding a hi. A hung tung ding Ju;y 3 leh ni 13 dai ding ‘Entrepreneurship Development Program (EDP) for Micro Entrepreneurs’ kiti um ding a hia, July 17 leh ni 30 sung a ding Women’s Tailor um kit in July 31 a pat Photography & Videography kipan ding a hi. Course te a ding a hin mi 25 chiat lak hiding a hia, lunglutna neite’n training kipatni ding kipia chan in SBI-RSETI Office, Bijang ah ngaiven thei ding a hiu a, BPL innkuan a pat kipan te dawisakna piak masak hiding a hiu.

VBS KHAKNA NEI DI
Lamka, June 16 (Nisin Thuhiltu): A chiata June 12 ah kipan, EOC Central Church, Hill Town ah Vacation Bible School chu zing, June 17, 2017 leh khak hi ta ding a hia, zia hun a chun kipakman thilpiak chuam chuam piakdawna um ding a hia, VBS report le um in Rev. Lamkhogin Khaute, Chairman, EOC Mins. Board in VBS khakna nei ding a hi. VBS a hin speaker James Lalpu leh hotute’n naupang 300 val te chu Pathian thu leh lâ ah puihuai in a ziltil ua, Evan. TL Mang Vaiphei, Child Promoter, EOC in naupang te counselling a nei pi hi.

UNDER-13 (GRASSROOT LEVEL) FOOTBALL TOURNAMENT
Lamka, June 16 (Nisin Thuhiltu): Mualkoi Youth Club (MYC) in a hung tung ding July 10, 2017 a pat Mualkoi Playground ah a khat-veina Under-13 (Grassroot Level) Football Tournament sai ding a hi. Under-13 Seven Boys Soccer Tournament a chun Winner in kipakman Rs. 5,000 leh 2na in Rs. 3,000 sâng ding a hiu a, Best Player, Top Scorer, Best Keeper leh People’s Choice ti te le um ding a hi. Tournament ah Entry Fee Rs. 700 leh Security Deposit Rs. 200 hiding a hia, lunglutna nei team/club te’n zing, June 17, 2017 a pat Nu Hat’ Dawr, Mualkoi; Student Book Store, Rayburn; Adam & Eve, Tedim Road; EL/S Variety Store, Bungmual leh Creative Photo Shop, Hebron Veng, New Lamka ah Rs. 60 pia in Entry Form la thei ding a hiu.

CDSA IN ELECTION NEI
Lamka, June 16 (Nisin Thuhiltu): Churachandpur District Sports Association (CDSA) vaipawte hun a bei tawh kitawn in tuni’n CDSA Temporary Office, Peace Ground ah vaipaw thak ding telna a um a, zia hun chu Kae Haopu, Hrila Hmar, EM, ADCC leh Khaikhomang, MDC te’n a malat u’i. Election a chun CDSA nuai ah Affiliated Club 80 um te lak ah Vote 69 khiak in a um a, President ding ah G. Thiauthianmung, Vice President ding ah Kamzathang Haokip, TK Lala, James Thangluai leh Ginsuanlal Zou ban ah Treasurer ding ah G. Lalkholun Kipgen te teltin in a um u’i. CDSA President ding ah teltin thak a um G. Thiauthianmung a hileh Headquarter Veng a pat a hia, tuleh tu ah Super Division club, Headquarters Sports Club ah President panmun lua a hi.

MINISTER TH. BISWAJIT IN YIWU INT’L TRADE CENTRE ENTHA

Baoshan, June, 16 (Nisin Thuhiltu): China ah South & South East Asia Commodity Expo and Investment Fair, 2017 uap, Manipur Commerce, Trade and Industry Minister Th. Biswajit Singh mapui state team in tuni’n Yiwu International Trade Centre, Baoshan City,Yunan Province vena a nei ua, zia hun a chun, Chen Jihanhua, General Manager, Yiwu International Trade City of Baoshan leh Mr. Jihanhua te kimupi in maban ah panlak khawm ding dan genkhawmna a nei ui. Chun, Th. Biswajit Singh in chialna a bawl pawm in General Manager Mr Chen Jihanhua leh a team te’n November, 2017 leh Manipur Sangai Festival uap ding uh ti a hi.

TWILANG AREA AH GANCHA NAT LENG; 20 VAL THITA
Kangpokpi, June16 (Nisin Thuhiltu): Kangpokpi District, Twilang areas ah tulak cheng, gancha natna chi khat - Food and Mouth Disease (FMD) kiti leng hatma ma in zia natna ziak a chun gancha 20 val in thina a tuak ui. Food and Mouth Disease chu lawi (buffalo) leh bawng (cow) te ding ah lau um diak hi ah hiat a hi. Lo bawl mite ding ah Lo kai hun lai tak ah gancha natna hik a len chu mi tam tak te ding ah buai um mama a suak hi. ADC Sadar Hills Executive Member (Vety), B.P. Vikas Basnet in a genna a chun, Twilang area ah FMD a len chu ADC Sadar Hills in ngaikhawk mama leh panlakna nei ngal a hidan uh a gen a, Veterinary Department thuhiat ah thil umdan a mun tak ah etthakna a nei nung ua gancha natna leng chu control bawlna ding ah Veterinary Department in panlakna nei ngal uh hin a gen hi. Himaleh fund kidailo ziak ah Veterinary Officer, Dr. John Meigai mapui expert team in Wakotphai, Chalwa, Gelbung, Phoikon, Selsi, Govajang, Kotlen leh Teikhang area tiang bep cover thei uh hin a gen hi.

RPF IN AMAU ATTACK HI AH PUANG
Imphal, June 16 (Nisin Thuhiltu): Ukhrul district ah 15th June 2017 ni ah Improvised Explosive Devise (IED) mang ah Kasom Khullen leh Bungdung villages kikal ah keng ah patrolling chia 17 battalion Assam Rifles troop te attack bawl chu Revolutionary People’s Front (RPF) in amau a hidan uh tuni’n a taklang ua, armed wing -People Liberation Army (PLA) cadre te’n attack a bawl uh a hidan le a taklang ui. June 3 ni ah Imphal-Moreh section NH-102 (Khudengthabi) ah 12 Assam Rifles attack bawl le amau ma a hidan uh taklang kawm in Kasung ah um Assam Rifles te command Maj. Ajit in villager te a sukgenthei banah a chia lumlet/vaklumletnau a sukbuai ziak ah a ziltilna attack a bawl uh hin le a gen hi.

KHAMASOM KHULLEN MIPI TE LEH NSCN-IM TE KAL SOSANG ZING
Imphal, June 16 (Nisin Thuhiltu): Ukhrul, Khamasom Khullen khua ah cheng Romeo Shally kiti pawsal khat NSCN-IM cadre te'n June 14, 2017 ni ah numei pawngsual (rape) hi ah ngawna bawl ah a sawisak lup ziak ua, khawmipi te thangtawm ah NSCN(IM) camp a butlu guatnau ah NSCN(IM) cadre te’n kiphinna nei mipi te sukthipna na ding ah meithal a kapnau ah mi khat a kaplup kit nung ua Khamasom Khullen mipi te leh NSCN-IM te kal, a sosan mama na chung in tuni’n NSCN(IM) Kilo Kilonser, Mr. Hukavi Yepthomi mapuina emergency meeting nei in Tangkhul Naga Long palai te panna Central investigation team a siamdawk ua, thil umdan khualna nei hiding in NSCN(IM) thusuak in a taklang hi. Zia thiltung hi a kigendan ah Romeo Shally leh a nungaknu a um khawm nau ah NSCN(IM) cadre te’n vamu, Romeo Shally chu ngawna diklo siamkhum ah numei pawngsual ti ah a sawisak uh hin a kigen a, zia nungaknu chu NSCN(IM) cadre khat tawh affairs nei ti le a hi. Himaleh a numeinu’n thudik a genlo ziak ah kisawisakna piang hi’n le a kigen hi.

PHERZAWL MIPI’N CM VE DING THIL ZING
Pherzawl, June 16 (Nisin Thuhiltu): Manipur ah Chief Minister O Ibobi Singh mapui Congress Government in District 7 a siamdaw thak te lak ah pakhat Pherzawl district mipi te’n Meeyamgi Numit (People’s Day) hun ah June 15 ni a khan DC leh ADC Pherzawl kiang in district basic infrastructures pawimaw chuam chuam te leh bank branch, electricity umlo ziak ah haksatna, lampi, telecommunication system hawilo dan te leh national food security scheme nuai ah anchang mulo a hidan uh a tut a ua, Manipur Chief minister N Biren in a vaima thei lam ah district headquarter vena a nei ding dawi a hidan uh le a taklang ui.

GOVT IN HEALTH INSURANCE SCHEME CHIAPINA DING AH PANLA: CHIEF MINISTER

Imphal, June 16 (Nisin Thuhiltu): City Convention Centre, Imphal ah tuni’n Confederation of Indian Industry te saina’n North East Healthcare Conference “Building Ecosystem for Quality Healthcare Delivery” kiti a um a, Manipur Chief Minister Nongthombam Biren Singh in Chief Guest hina tawh hun matna uap in thugenna a nei hi. Chief Minister in a thugenna a chun, Government in health insurance scheme puakdawna ding ah guanggalna nei a hidan taklang in medical treatment bawlzo lo te financial assistance bawl hiding in a gen hi. Tunung sawtlo ah Air mobile healthcare facility le umsak hiding in a gen a, State government in Union External Affairs Ministry ah zia facility te chu a um theina ding ah proposal pelutta hin a gen hi. Gamsung mi te banah Myanmar mite tiang huap ah regional air connectivity kituptak umsak ding ah panlakna um a hidan le a gen a, gamsung ah investor te chu panla khawm ding leh ngaidan exchange bawl ding in le chialna a bawl hi. Prime Minister Narendra Modi mapui Central government in Manipur ah100-bedded Cancer Hospital leh 60-bedded Mental Hospital umsak ding ah lemsakna nei in le a gen a, State-run hospital 26 - RIMS, JNIMS banah district 7 ah hospital um te leh community health centres 17, primary health centres 85 leh urban primary health centres 9 ah test le a thawn ah bawl thei hipaita ding in a gen hi. Tu ah state government chu state sung ah healthcare services hawitak umsak ding dawi leh a thawn ah ki etkawl theina ding ngaitua panla zing hin le a gen bawk hi. Hun matna uap Health and Family Welfare Minister L. Jayantakumar Singh in a genna a chun, public healthcare sector nasatak ah kisangdanglam a hidan a gen a, private healthcare sector leh doctor kining tinlo dan te leh paramedics banah well-trained health workers pawimaw dan a gen hi. Additional Chief Secretary (Home) Dr. J. Suresh Babu, Commissioner (Health) Sumant Singh, Former Director, AIIMS, Dr. R.C. Deka, Chairman, Eastern region Healthcare Sub Committee, Shri Sanjay Prasad, Co-Chairman, Managing Director, Kauvery Hospital, Rupak Barua, medical professional te’n le hun matna a uap ui. Zia hun matna a hi “whitepaper on Healthcare in Northeast India – Challenges and Opportunities at the North East Healthcare Conference – Building Eco-system for Quality Healthcare Delivery” le hawn in a um hi.

MIPI PALAI TE’N MIPI TE KINEPNA, THIL DAWI A SUKPITIN UH PAWIMAW: GOVERNOR DR. NAJMA HEPTULLA

Imphal, June 16 (Nisin Thuhiltu): Manipur Assembly Hall ah Lok Sabha Speaker Sumitra Mahajan in hawnna a nei, ni 2 sung um ding 16th North East Region Commonwealth Parliamentary Association Conference (NERCPAC 2017) chu tuni’n khak in a um hi. Manipur Governor Dr. Najma Heptulla in Conference ah a thugenna a chun, Manipur Legislative Assembly speaker in NERCPAC 2017 a zintun kipakpi kawm in mipi palai (political representatives) te chu social reformer leh social philosopher a hidan uh taklang kawm in mipi te kinepna, thil dawi a sukpitin ding uh leh mipi te haksatna a sukven piak ding uh a lotheilo thil hin a gen hi. Mipi te haksatna a hawi thei ding pen ah mipi palai te’n a tangko ding uh pawi a hidan gen in House ah Presiding Officer te’n mawpuakna pawimawtak nei a hi dungzui ua mipi te ngaikhawkna tawh pan a lak ding uh pawimaw in le a gen hi. North East region chu issue chuam chuam ziak ah hunsawtpi mainland lam tawh kizawp matna hawilo tak ah a la um himaleh tuhun ah connectivity issues leh thil chuam chuam te siamphat ding leh North-East region ah khantona a um theina ding ah nasatak ah panlak ding pawimaw hin a gen hi. A langkhatlam in tuni’n Conference ah second agenda item - ‘Railways, Airways, Surface Road leh Inland Waterways connectivity siamhawina ding leh North East Region ah economic development a um theina ding tawh kisai genkhawm in a um a, Tripura Legislative Assembly Deputy Speaker Pabitra Kar in North East region chu communication system hawilo a hidan gen in, North East region ah district zosia 4-lane National Highway connectivity, broad-gauge railway line te a masapen ah siam hawi ding pawimaw leh State capitals a pat district headquarter zosia kikawmtuana siam hawi ding pawimaw in a gen hi. Mizoram Legislative Assembly Speaker Hipheia in a genna a chun Central Government in North East region ah khantona a um theina ding ah special plan a nei ding dawi a hidan a gen a, Arunachal Pradesh Legislative Assembly Speaker Tenzing Norbu Thongdok in sum (money) bep khantona nasepna a buai um hilo ah agency chuam chuam a pat clearance tawh kisai le thil buai um mama hin a gen a, land acquisition leh tendering process etc a bailam theilam ah siam ding dawi hin a gen hi. Manipur Legislative Assembly member P. Sarathchandra Singh mainland India tawh kikawmtuana banah South East Asia gam te tawh kikawmtuana hawitak a um theina ding ah panlak ding pawimaw a sakthu a gen hi. Nagaland Legislative Assembly speaker Dr. Imtiwapang Aier in a genna a chun North East ah economic development a um theina ding ah special status pawimaw in a gen a, Assam Legislative Assembly speaker Hitendra Nath Goswami in, connectivity, fund kining ting a um pawimaw in a gen hi. Chun, Arunachal Pradesh Legislative Assembly speaker Tenzing Norbu Thongdok in a puakdaw ‘Parliamentary Procedure for the New Millennium’ chungchang le genkhawm in a gen hi. 16th North East Region Commonwealth Parliamentary Association Conference (NERCPAC 2017) ah thupukna (resolution) khenkhat hiat thei ah um te chu; North Eastern States te South Asian gam te tawh kal ah frontier guard a hi dungzui ua 'Gateway' leh "Image of the Country" ah pawm ding, transport, communication leh connectivity - Road ways, Railways, Airways banah Water ways siamhawi thak ding, unemployment ziak ah buaina um te sukvenna ding ah panlak ding, Energy, tourism, trade leh commerce lam siam hawi thak ding leh Telecommunication leh High Speed Band networks, Special Category State Status, Backward Region Grant Fund (BRGF), North East Industrial and Investment Promotion Policy (NEIIPP) etc te etthak ding, 'Act East Policy' lawtinna ding ah Ministry, Department or Forum chuam siamdaw ding in lemsakna a um hi. Zia lemsakna (resolution) chung a chun, T.N. Thondok, Speaker, Arunachal Pradesh; H.N. Goswami, Speaker Assam; Y. Khemchand Singh, Speaker, Manipur; A.T. Mondal, Speaker, Meghalaya; Hiphei Speaker, Mizoram; Dr. Imtiwapang Aier , Speaker, Nagaland; Pabitra Kar, Deputy Speaker, Tripura leh Bek Bahadur Rai, Chairperson, PAC, Sikkim te’n suai a kai ui.