Imphal ah NERCPA 16th Annual Conference kipan
NE a khanto masang sia, India gam khangto kiti theilo di: Sumitra Mahajan

Imphal, June 15 (NISIN THUHILTU) : Manipur Legislative Assembly ah tuni’n Lok Sabha Speaker leh NERCPA Patron member Sumitra Mahajan in 16th Annual Conference of North East Region Commonwealth Parliamentary Association (NERCPA-2017) hawnna a nei hi. Sumitra Mahajan in a thugenna a chun, NE, Seven Sister te lak ah Manipur chu art & tradition lam ah hausa mama a hidan gen in, North East region ah khantona leh masawnna a um theina ding ah chamna leh muanna pawimaw mama in a gen hi.
North East a khanto masang sia, India chu gam khangto kiti theilo ding a hidan le gen in, North East Region Commonwealth Parliamentary Association (NERCPA) chu North East Region ah legislator te kikhaikhawmna platform pawimaw tak hin a gen a, North East tawh kisai ah buaina chuam chuam um te genkhawm leh sak khawm theina hin a gen hi. North East India tawh East leh South East Asian gam te kal ah kikawmtuana hawitak um leh Asia ah North East India chu gateway pawimaw tak hiding in a gen a, government in East leh South East Asian gam te, a diak ah Myanmar tawh trade, commerce leh tourism lam ah kikawmtuana hawitak a um theina ding ah lampi guanggalna nei zing a hidan a taklang hi. Zia gual kikawmtuana chu um leh North East India in nasatak ah phatchuampi ding hin le a gen a, Look East Policy chu Act East Policy ah then (convert) a hidan sulang in, gamsung pumpi ngaikhawk pen pen te lak ah North East India ah all round development a pan ding pawimaw hin a gen hi. North East India ah International border te chu trade leh commerce lam ah a pha chuam thei ding pen ah mat ding pawimaw in le a gen a, Legislature chu kithenna (change) agent haktak hin a gen hi. Legislator te’n government leh public kal ah gap umte kankhawm thei leh lemna leh muanna tunthei a hidan uh le gen in, kum 2015, July tha a khah long term, strategic policy leh high quality research inputs banah Parliament Innpi 2 ah kiho matna hawitak a um theina ding leh capacity building lamthil ah masawnna a um theina ding ah Speakers’ Research Initiative (SRI) kiti phudaw ah a la um hin a gen hi. Chuleh, North East ah khantona a um theina ding ah Legislator te’n a pawimaw dungzui ah kithuapina peding uh a hidan puang kawm in, tha (wing) i zetzang masang sia, kileng (fly) theilo a hidan hiatchian pawimaw in le a gen hi. Deputy Chief Minister of Manipur Y. Joykumar Singh in a thugenna a chun, Look East Policy in South East Asian gam te tawh economic leh political ties hawitak a nei ding tup ah nei a hidan a gen a, zia policy chiapina ding a chu transportation, air leh railway lam ah arrange bawlna thil bailam hilo a hidan gen in, khantona leh masawnna tak tak a um theina ding ah chamna leh muanna a um ding bak ah hiatna, technological leh market connectivity a hawi masat ding pawimaw in a gen hi. Manipur Legislative Assembly Speaker Y. Khemchand in a chiakhawm delegate te vaidawnna thu a gen hun ah Act East Policy tawh kisai a genna a chun, Act East Policy kiti chu thil bailam hilo a hina chung ah collective tak ah panlak khawm pawimaw in a gen hi. 16th Annual Conference of NERCPA-2017 a hileh 18th June 2017 tiang ah um ding a hia, a chiakhawm delegate ten “North East and Look East Policy” leh “Special Plan for Development of Railways, Airways, Surface Road and Inland Waterways Connectivity for Speedy Economic Development of North East” ti tawh kisai genkhawmna nei ding a hiu. Conference ahileh Mizoram, Meghalaya, Tripura, Sikkim, Arunachal Pradesh, Meghalaya, Nagaland leh Assam a pat Assembly Speakers, Deputy Speakers, MLA ten a uap ua, tuni’n “North East and Look East Policy” tawh kisai genkhawmna a nei ui. Chun, Atul Kaushik, Additional Secretary, Lok Sabha Secretariat in Speakers’ Research Initiative (SRI) chungchang genlatna a nei nung in, North East Region ah le SRI chiapi ding in lemsakna a nei ui.

Minister Th. Biswajit Singh mapui state team in Mayor of Baoshan kimupi

Baoshan, China, June 15 (NISIN THUHILTU) : Dianchi International Convention and International Sistership pavilion, Kunming, Yunan Province, People's Republic of China ah South & South East Asia Commodity Expo and Investment Fair, 2017 uap Manipur Commerce & Industries Minister Th. Biswajit Singh mapui state team in tuni’n Yang Jun, Mayor of Baoshan mapui Baoshan Municipal Authority te tawh kihona a nei ua, industry, agriculture leh tourism sector ah panlak khawm dingdan genkhawmna a nei ui. tourism sector masawnna ding ah cultural exchanges nei ding leh Manipur state leh Yunan Province kal ah kikawmtuana a um ding banah thil chuam chuam ah panlak khawm dingdan le genkhawmna a nei ua, Minister Biswajit in Mayor of Baoshan leh a team te chu November, 2017 leh um ding Sangai Festival uap ding in chialna a bawl hi. Manipur team te lak a chun, Dr. S. Ranjan Singh, Parliamentary Secretary for Tourism, L. Lakher Singh, Principal Secretary Commerce and Industry, Luikham, Director Commerce and Industry, L. Inunganbi Devi, Corporator Imphal Municipal Corporation ward no 18, L. Bashanta Sharma, Media Coordinator to Chief Minister Manipur, Chandrakishore, Rajen leh North East Federation on International Trade, Manipur Chapter a pat RK.Sherjit Singh te a pang ui.

Chief Minister in Redmine App hawng; complaint 420 ngaitha

Imphal, June 15 (NISIN THUHILTU) : Chief Minister N. Biren Singh in Chief Minister’s Secretariat, Imphal ah tuni’n Meeyamgi Numit (People’s Day) leh Hill People’s Day hun ah haksatna tut te tawh kithuhiattua kit zing a hitheina ding in Redmine App hawnna a nei a, zia Redmine App chu mang ah mobile phone SMS ah complaints, registered bawlte status/progress um te hiatsak hiding leh thuhiat hiding ti a hi. Chief Minister in a thugenna a chun, tha masa Meeyamgi Numit a khah complaints 115 mu a hidan a genlang a, zia case 115 te lak a chu case 15 sukfel ah umta leh case 25 te chu official ah genkhawm ding ah kikawi leh case 65 te dinmun etzuina chiatha zing hin a gen hi. Redmine App hawn a hitak tawh kitawn ah complaints bawltu te thil umdan kantha kit ding ah Chief Minister’s Secretariat ah a chia uh ngaitalo ding a hidan genkawm in a mobile number ua thil umdan hiatsak hiding uh a hidan a gen hi. Chuleh, mipi te haksatna tam mama in a gen a, complaint bawl ah um zosia te sukvenna ding ah government in panla ding hin a gen hi. A langkhatlam ah tuni second Meeyamgi Numit hun ah zingkal dak 5:00 a pat in nitaklam dak 5:30 sung in mi 3000 lam te’n group leh mimal in a kimupi ua, medical emergency team leh ambulance te le buaina tuak kha a um ua leh a enkawl ziang thei ding ah kawi in a um hi. Chief Minister in MAASI Tourist Complex, Keirao issue, Prime Minister Employment Generation Programme (PMEGP) tawh kisai, electrification issue, NFSA nuai ah PDA items hawpdaw ah a umlona tawh kisai, biometric attendance etc te panna ama mimal tak ah complaint 420 te ngaithakna nei in, holimpina a nei a, differently-abled person te dinmun, meithai, terrorism ziak ah haksatna tuak, teksia te issue ngaikhawk mama hin a gen a, infrastructural developments programmes - drinking water facility, blacktopping, power supply etc te kituptak ah etzui hiding a hidan a gen hi. Deputy Commissioner te mawpuakna le taklatna nei in, administration kituptak ah a um sak zing ding, welfare schemes leh developmental projects implement kibawl te kituptak ah a etzui ding uh leh nasepna dinmun a etzui zing ding uh hin a gen hi. DC te’n a kallak leh nasepna mun te a etthak ding leh a nuai ah semtu te report mai ah a kingaklo ding uh hin a gen a, mipi te haksatna a ngaikhawk ding uh leh a sukven thei tiang uh a sukven zing ding uh pawimaw a hidan le a gen hi. Chief Minister banag Education, Labour and Employment Minister Th. Radheshyam in le Meeyamgi Numit’ a hi tawh kitawn in Canchipur ah a chenna, mi 300 tuam kimupi in a haksatna a ngaithak puak a, thutiam bawllo maleh a theitawpsua haksatna um te sukvenna ding ah panla ding hin a gen hi.

IED attack ah AR jawan khat thi; 4 liam

Imphal, June 15 (NISIN THUHILTU) : Manipur Ukhrul district ah tuni’n Improvised Explosive Devise (IED) mang in thingnuaimi pawl khat in Kasom Khullen leh Bungdung villages kikal ah keng ah patrolling chia 17 battalion Assam Rifles troop te attack a bawl ua ziana a chun personnel 1 in thina a tuak a, personnel 4 te’n liamna a tuak ui. Thina tuak chu Havildar/General Duty Luhit Gongoi of Avipura Vill, Sibsagar District, Assam hi ah hiat a hia, liamna tuak te chu - Nicky Chetri, Y Zunkum, Thanglensom, Amit Kumar te a hiu. Liamna tuak et chu helicopter mang ah Army hospital Leimakhong tut in a um ui. Attack ah a um zaw ua, Central Reserve Police Force (CRPF) leh Manipur Police Commandos ten attack kibawlna mun del zui ngal ah search operation bawl maleu mudaw leh matdaw neilo un a kigen a, kua te group in attack a bawl uh a hi em ti le hiatchian a hi puai.

KNF (P) unauthorised cadres 26 matdaw ah um
Imphal, June 15 (NISIN THUHILTU) : Senapati Brigade of Red Shield Division nuai ah Jwalamukhi Battalion Troops te’n civil police te tawh kithua ah tuni 15th June 2017 ah Kuki National Front, KNF (P) designated camp - Ebenezer Camp, Natheljang inspection bawlna a nei hun ua, Security Forces te’n unauthorised cadres 26 leh galvan - 1700 rounds meichang, Pistols 3, Hunting Rifles 5, Air Gun 1, Motorola Set 1, Pistol Magazines 4 leh meichang magazines 6 a mandawk ui. Suspension of Operation (SoO) nuai ah um KNF (P) te gamtatna chu SoO rule tawh nasatak ah kikal in le PIB Defence thusuak in a taklang a, khutmat chi chuam matdaw a hi tawh kitawn ah extortion leh activity dawi umlo chuam chuam chiapi sek a hidan uh kilang in le a gen hi. Chuleh, mat ah um unauthorised cadre te leh item chuam chuam te chu Imphal West Police Station ah piaklut ah um leh KNF (P) chung ah FIR ziklut ah um in le a taklang hi.

Sabka Saath Sabka Vikaas Sammelan kimang
Lamka, June 15 (NISIN THUHILTU) : YPA Hall, Hiangtam Lamka ah tuni’n “Sabka Saath Sabka Vikaas Sammelan” kiti mat in a um a, zia hun chu State president BJP Manipur leh Member of Parliament (Rajya Sabha), Ksh Babananda Singh MP in Chief Guest leh Agriculture, Vety & Animal Husbandry Minister, V Hangkhanlian in Functional President hina tawh a uap ua, Manipur state incharge, Prahlad Singh Patel, MP; HAC Chairman leh Henglep MLA, TT Haokip, MTDC Chairman leh Thanlon MLA, Vungzagin Valte ban ah MANIREDA Chairman leh Singngat MLA, Ginsuanhau Zou te Guest of Honour in a pang u’i. Chief guest malatna’n mikhual te’n meisel detna nei in hun pat a hi. Zia hun a chun, Centre ah NDA in kum 3 sung government a puak sung ah NHPC Loktak in a sepdaw te suklatna a um hi. Chief Guest in thugenna a nei hun a chun, Narendra Modi mapui NDA sawlkar in black money, nekgukna leh terrorist funding dodalna ding ah Rs. 500 leh Rs. 1,000 note a suk bei chu mipi’n hiathiam ah zathuap hi’n a gen a, hun sawt tak a pat buaipi a um, Ex-servicemen te a ding ah One Rank One Pension (OROP) le Centre in phalna pia hi’n a gen a, India khua leh tui te dawpkang na ding ah GST leh BEMAMI property act siam thak hi’n le a gen hi. NDA solkar in khawcha te dawpkang na ding chu a ngai khawk pen lak ah pensak in mi genthei te dawpkang na ding ah Jandhan account hawng sak a um in tuni chan in mi genthei 28 crore tuam in account nei ta hi’n le a gen hi. Chun, social security scheme chuam chuam nuai ah mi crore 13 te kikhumlut ta uh a hi ban ah MUDRA loan le 7.5 crore te kiang ah piak a um ta in amau lak ah namniam, SC leh ST te dawisakna bîk piak a um hi’n le a gen hi. LPG tawh kisai a genna’ chun, Below Poverty Line (BPL) innkuan crore 2 tuam te kiang ah a thawn ah LPG connection piak a um ta hi’n le a gen hi. Electric tunlo na khua 18,456 um lak ah 13,500 tuam ah electric tunsak a hi tak ban ah lamlian umlo na mun te ah lamlian thak 1,20,000 km tuam bawl zaw hi ta a hi dan a phuang hi. Housing loan tawh kisai a genna a chun, 2022 chan ah housing loan la te chu 3 leh 4 % kikal tuam ah piak hi ding in le a gen a, kilaw kawm milip tamtak te nitha le 42% ah kalsak hi ta a hi dan le a phuangdawk hi. Chun, NDA in centre ah kum 3 vai a hawm sung ah sepna nei numei te a ding ah maternity leave chu hapta 26 hisak a um ta leh non-gazetted post lakna ding ah interview le lakdaw a um ta hi’n a gen hi.

CCpur district ah linling um
Lamka, June 15 (NISIN THUHILTU) : Churachandpur district ah tuni zingkal in linling hatlo cha a um hi. National Centre for Seismology a pat thutut kimu dungzui in, tuni zing kal dak 6:45 tuam ah CCPur in linling hatlo, 3.0 magnitude maitua hi’n a gen a, a kipatna a hileh 10 km a thûk hi’n a puang hi. Linling in a suksiat a hiloleh liamna tuak hiat a hi puai. CCPur ah linling um masang deu in, Himachal Pradesh’s Chamba region lak ah le linling hatlo cha um hi’n le a gen hi.

Mipi Ni matna um
Lamka, June 15 (NISIN THUHILTU) : Manipur government in thasin tarik 15 chu “People’s Day” (Mipi Ni) ah mat ding tia a phuandaw tawh kitawn in district chuam chuam ah mat in a um hi. Zia tawh kitawn a chun, CCpur district ah DC Shyamlal Poonia, IAS leh SP Rakesh Balwal IPS mapuina’n DC Office leh Police Station ah mat a hi. CCpur DC mapuina’n District Training centre (DTC) Tuibong ah mat a hia, zia hun a chun district mipi buaina chuam chuam nei te ama mimal tak ah kimuhpih in a haksatna teu a gen khawmpi hi. CCpur district police nuai a Narcotic cell in le Police station ah tuni’n Mipi Ni mang in zia hun a chun tobacco product suk bei ding dan tawh kisai ah maban panlak ding dan genkhawmna a um a, CCpur OC AK Singh, Traffic OC P Neihsial, Food safety officer Deva Sharma ban ah khopi sung a dawr bawl te a pang u’i.

Van kimandawk te halsiat a um
Lamka, June 15 (NISIN THUHILTU) : District Police in khawpi sung mun chuamchuam ah tobacco product a matkhawmteu tuni’n khawpi pualam mun khat ah Food Safety & Standard Wing, Churachandpur mapuina’n halsiat in a um hi. Matdaw a um tobacco product te chu police in Food Safety & Standard Wing, Churachandpur khut ah a piakdaw a hia, District Magistrate in suksiat ding ah thu a piak tawh kitawn in District Police, Churachandpur, Food Safety & Standard Wing, Churachandpur leh khawpi sung a thuthak lakhawm te panna’n mun thawveng deu khat ah halsiat in a um hi. Halsiat a um van te chu a kigawm ah Rs. 5 tuam man zo ding hi’n a kigen hi.

Salpha innkuan te’n kipakthu genna nei
Lamka, June 15 (NISIN THUHILTU) : Manipur government in August 31, 2015 ah Anti-Tribal Bill 3 a pass ziak ah thina tuak Salpha 8 te kum 2 lam vuilo ah a um nung in Joint Action Committee Against Anti Tribal Bill (JACAATB) malatna Manipur government tawh kiholemna um in thiluang te vui thei a hi tak tawh kitawn in salpha te innsung mite’n zia chung chang ah panla JACAATB ban ah pawl chuam chuam te chung in kipakthu genna hun tuni’n a sai u’i. Hun matna a hileh Simte Inn, Simveng ah nei in a um a, zia hun a chun JACAATB, Zou Youth organization (ZYO), Simte Youth Organization (SYO), Mizo People Convention (MPC), Young Paite Association (YPA), All tribal movement of Lamka (ATML), Manipur Tribal Forum Delhi (MTFD) leh Joint Philanthropic Organization (JPO) a pat puitu te’n thugenna a nei ban un salpha te innsung mite’n le kipakthu genna a nei u’i.

82nd YMA Day mang
Lamka, June 15 (NISIN THUHILTU) : Young Mizo Association (YMA) kiphudaw nung a kum 82 tinna chu tuni’n Mizo umna mu chuam chuam ah mat in a um a, YMA Chiengkonpang branch saina in Chiengkonpang community hall ah le mat in a um hi. Zia hun a chun Awareness campaign leh blood donation camp nei a um in YMA Chiengkonpang branch member tamtak te’n a uap u’i. Dr. Kimngaihching Simte, CMO/CCpur in Awareness campaign leh blood donation camp hawnna a nei a, Awareness hun a chun District Hospital Blood Bank a staff te’n midang a ding ah thisan a thawn ah piak a manphat dan tawh kisai genna a nei u’i. Awareness campaign zaw a chun Blood donation camp kipan ngal in pawsal 25 leh numei 3 te’n thisan pia in a kigawm ah thisan unit 28 piakdaw in a um hi.

Mimang hawlna chia tha zing
Lamka, June 15 (NISIN THUHILTU) : A chiata June 7, 2017 ni a pat a umna kihialo, Chingzasiam w/o Kapkhankhual of Vengnuam, New Lamka chu tuni’n YPA New Lamka Block malatna’n mipi’n a hawlna a nei u’i. Chingzasiam a hileh mulo a hi a pat a hawlna nei himaleh tuni tiang ah mu a hi nailo ziak ah YPA New Lamka Block malatna’ mipi a hawl a hia, tuni a le mu a hi nailo ziak in a hawlna chu zingleh sutzawp kit hi ding a hi.

LYF in a sai VBS zawthian hita
Lamka, June 15 (NISIN THUHILTU) : Lutheran Youth Fellowship (LYF) HQ in Zomi Colony ah vacation Bible School a sai chu tuni’n zawthian in a um hi. VBS a hileh June 12 zingkal lam dak 9:30 ah Upa Khamchinlam in a la hawn a hia, Upa Thongalam in tuni’n a khakna a nei hi. VBS chu tuni a tawpni a hi tawh kitawn in teacher te’n student te Khuga Dam le a va etpi u’i. LYF in a sai, VBS a hileh MELC Kochuam te a ding bîk a hia, zia hun a hin Pathian thu leh lâ ah naupang te puihuai in a um ua, maban ah Lutheran Children Fellowship (LCY) um ding tawh kisai ah kisakkhawlna le hi’n a kigen hi. VBS hun sung a hin naupang 152 pang te chu teacher 13 te’n a enkawl ua, Upa Elder Jamkhanpau in seminar hun a la’i

Citywide Concert 2017 a ding ah kisak lawkna chiatha zing
Lamka, June 15 (NISIN THUHILTU) : Zogam Artists’ Association (ZAA) Headquarter in a sai, “Citywide Concert 2017” um ding tawh kisai ah tuni’n Lengtonghoih Studio, Hiangtam Lamka ah kisakkhawlna te mipi hiat ah puandawna a um a, zia hun a chun mawpuakna chuam chuam piak a um te’n amau mawpuakna chiat ua a nasep teu tawh kisai report piakna a nei u’i. Organizing Committee ah Secretary, S. Pauginmuan in Concert hun ah perform ding band chuam chuam te genlatna nei kawm in Local Band tamzaw te’n ni 2 chiata a pat Jam Room a kisin panta uh a hi na ah hundang ah concert umsate tawh kibanglo ding hi’n a gen hi. T. Thangthuam, Advisor, Citywide Concert in a genna a chun, a hung tung ding June 24, 2017 sunnung dak 3:00 a pat Lamka ah a la um khanailo Concert thupitak Public Ground ah nei hi ding in a gen a, zia hun a chun band chuam chuam, Joint Artists’ Association leh mimal chuam chuam te tawh “Together We Can” ti thupi mang ah concert thupitak nei hi ding in a gen hi.

Zankhawvak ah pauchapna um di

Lamka, June 15 (NISIN THUHILTU) : All Tribal Women Union (ATWU) Prayer Department mapuina nuai ah zing, June 16, 2017 zan dak 8:00 a pat Beulahlane ah gam le nam a ding ban ah tribal movement tawh kisai in zankhawvak ah pauchapna um ding a hia, zia hun chu a ngaina leh lunglut kuamasap pang thei ding hi’n a kigen hi.

Lok Sabha Speaker in Cultural Programme uap

Imphal, June 15 (NISIN THUHILTU) : Darbar Hall, Raj Bhavan, Imphal ah zanitak a khan cultural programme mat in a um a, Jawaharlal Nehru Manipur Dance Academy, Imphal a pat artist te’n perform a bawl ui. Cultural programme chu Manipur vena nei Lok Sabha Speaker Sumitra Mahajan; Governor Dr.Najma Heptulla; Manipur Legislative Assembly Speaker & President, CPA Manipur Branch, Yumnam Khemchand Singh leh high ranking official hunkhawp in a uap ua, lam chi chuam chuam - Lai Haraoba, Khamba Thoibi, Kabui Dance, Mao Dance, Pung Cholom leh Basanta Ras te suklat in a um hi. Governor Dr.Najma Heptulla in a thugenna a chun, Imphal ah 16th Annual Conference of North East Region Commonwealth Parliamentary Association a um chu kipak mama hin a gen a, Conference hawnna nei ding Lok Sabha Speaker Sumitra Mahajan tawh hun sawtpi a la a la kihia a hitakdan uh taklang kawm in ama Bhopal, Madhya Pradesh a pat mi a hi bak ah Lok Sabha Speaker Sumitra Mahajan le Madhya Pradesh mi a hidan a gen hi.

Minister Nemcha Kipgen in Meeyamgi Numit ah mi 100 tuam kimupi

Imphal, June 15 (NISIN THUHILTU) : Social Welfare and Cooperation Minister Nemcha Kipgen in tuni’n ama Office Chamber, New Secretariat, Imphal ah Meeyamgi Numit (People’s Day) a hi tawh kitawn in haksatna nei mi chuam chuam te a kimupi a, mi 100 tuam in a haksatnau tut in khenkhat ten old age pension kituptak ah mulona ziak, differently-abled mite a ding ah schemes leh sepna piak ding, Anganwadi centres sakna ding tawh kisai panna issue chuam chuam mitamtak ten a tut ui. Minister Nemcha Kipgen in a pawimaw dungzui ah kithuapi ding leh panlakpi ding in thutiam a bawl a, mipi te dawidan dungzui ah panla ding hin a gen hi.

NSCN-IM cadre te leh mipi kal sosang
Imphal, June 15 (NISIN THUHILTU) : Ukhrul, Khamasom Khayang khua ah cheng pasal khat NSCN-IM te'n numei pawngsual (rape) hi ah ngawna bawl ah a sawisak lup ziak un, khawmipi te thangtawm in Ukhrul ah Wu Tangkhul Region(WTR) Office bulu a guat ziak un NSCN-IM te’n mipi kiphinna nei ta sukthipna ding ah meithal a tha ziak un, mi 1 in thina a tuak hi. Zia phat a chu mipi thangtawmna sosang diak ah district administration in buaina sukbei na ding ah panlakna nei un a kigen a, himaleh zia thu zik a hi tiang ah kiphinna banggual dinmun tiang ah sosang a hi em ti hiatchian in a um puai. IM-te'n mi rape hi a ngawh ah a thapa uh leh kiphinna neite' lak ah a kapluppa uh, a pa-niu ah, Khamasom Khayang khawmi gel hi un a kigen a, kiphinna kaplup ah um chu Chingreipam Lungleng (25yrs) s/o Isaac Lungleng hin a kigen hi. Khamasom khua ahileh inn 1000 tuam chenna hi ah hiat a hi.