Thi-luang hawl ah um mu hinailo
Lamka, June 4 (Nisin Thuhiltu): A chiata June 1 ah Lanva lui in a taw, Kimngaihsiam luang hawlna a chia tha zing a, All Lanva Youth Club (ALYC), Chin Youth Association (CYA), Hmar Youth Association (HYA), Kuki Khanglai Lawmpi (KKL), Simte Youth Organisation (SYO), Young Paite Association (YPA), Young Mizo Association (YMA) leh Young Vaiphei Association (YVA) a pat nungak - tangval hunkhawp te’n mun chuam chuam in a hawlna a sunzawm u’i. Mun khenkhat chu mihing tha in a zawlo ziak in JCB mang ah khuat sak himaleh thiluang khutdaw a hi puai. Naupang hawlna tawh kisai ah nitak lam ah thuzuau kithe vel ziak in khenkhat in Kangvai leh Saidan del in va hawl maleu bangma a mu diak puau. Thiluang hawlna a hileh zing leh sutzawp hi ding a hi.
State Government thak in mipi kithuapina mamaw: CM N. Biren Singh
Imphal, June 4 (Nisin Thuhiltu): Manipur state government tha 3 bep hipan a hina chung ah mipi leh khawtang a ding ah napha septheina ding ah mipi zathuapna mamaw hi’n Chief Minister N. Biren Singh in a gen hi. Keishampat Thokchom Leikai ah tuni’n Member of Parliament, Rajya Sabha ding ah teltin thak a um, Ksh. Bhabananda Singh reception ceremony chu Chief Guest hina tawh uap, CM Biren in a chiata kum 60 sung ah election a la um to maleh kithenna bang ma umlo, tu ah government in state mipi te hinna leh diginity humbitna ding ah pan nasatak ah la’n kithenna tut gua hi’n a gen a, state sung ah security force te’n thagum a sua val nateu a bei na ding ah government in panla ding hi’n le a gen hi. Numei chung ah tatsualna te demna bawl kawm in Manipur High Court phalna nuai ah fast track court bawldaw hi pai ta ding hi’n le a gen hi. Rajya Sabha MP thak, Ksh. Bhabananda in diktatna leh kipumkhatna chu lawtingna ding kalbi a hina ah khawtang siamphatna ding ah ginum tak leh kukal tak ah sem ding hi’n a gen hi. Manipur People’s Club, Khwai Thokchom Leikai, Imphal in a siam reception ceremony chu PWD, Power, RD & PR, Commerce & Industries leh IPRMinister, Th. Biswajit Singh, fEducation leh Labour & Employment Minister, Th. Radheshyam Singh, Parliamentary Secretary (RD & PR), Heikham Dingo Singh, Ex-MLA Dr. Kh. Loken Singh lehEx-President, BJP, Manipur, Sh. Shantikumar Sharma te’n le a uap ui.
Minister V. Hangkhanlian in ah Philanthropic Org. leader te meeting neipi
Lamka, June 4 (Nisin Thuhiltu): District Incharge Minister, V. Hangkhanlian malatna nuai ah tuni’n YPA GHQ Hall, Hiangtam Lamka ah Churachandpur District ah Philanthropic Organization chuam chuam puitu te tawh thu pawimaw chuam chuam genkhawmna a um hi. V. Hangkhanlian, Minister (Agri, Vety & Animal Husbandry) in meeting umna ziak genlatna a nei na a chun, District sung puaphatna ding ah ama ngaituana bep hilo in Phachuam ngai puitu chuam chuam tawh pangkhawm ah ngaidan lakkhawm lunggul hi’n a gen a, Philanthropic Organization chuam chuam tawh pankhawmna ziak a sepdaw ding tampi um hi’n le a gen hi. District sung ah pawimaw masa lamlian hawi, tuinek kiningting leh damtheina tawh kisai ah BPL innkuante’ a ding ah a thawn a muthei damdawi leh a dang dang te chu a hi ding gual tak ah piak ahi theina ding ah panla a hi dan phuangdawk kawm in phachuam ngai pawl chuam chuam te nungthuapna pawimaw hi’n le a gen hi. Manipur Chief Minister Biren Singh in development lam ngaikhawk a hina ah CCPur District in le Reception bawl leh district dang ah Development tawh kisai Special Package a tiam te gual ei district in le bang phatchuampi thei a um diam ti genkhawmna ding ah kihokhawmna chu sai a um hi’n le a gen hi. Pawlpi chuam chuam a pat lawi upa te’n ngaidan genkhawm in Chief Minister vaidawnna nei ding lunglut leh kiman uh a hi dan a gen u’i. Meeting zaw ah Minister in thuthak lakhawm te akimupi hun a chun, Disaster Management nuai ah State government in tuilian leh huipi thuakkha te a ding ah zângnadawpna, Rs. 4 lakh piak ding ti ah a puansa gual ah Pherzawl District in a huap sung a um Lalruotmawi tui ah a khiak zaw ni 6 ni ah a luang mudaw ah a um tak tawh kitawn in zângnadawpna chu piak hi ding leh Lanva lui a khetha unau 2 te le Rs. 4 lakh chiat piak hi ding in a gen hi. Chun, a luang mu hinailo Kimngaihsiam chu a kinthilam ah mudaw a hi ding dawisak thu genlang kawm in pawl chuam chuam in thiluang hawlna ah pan a lak dan teu pakcha mama a hi dan le a gen hi.
Ni 5 nung ah Tuivai lui in a taw Lalruotmawi luang mudaw hita
Parvachawm, June 4 (Nisin Thuhiltu): Tuivai river in May 29 nitak lam ah a tawmang Mrs Lalruotmawi of Manipur’s Parvachawm village chu ni 5 sung a luang hawl ah a um nung in tuni’n mudaw in a um hi. Manipur leh Mizoram gamgi ah um Tuivai river in a tawmang Mr Lalruotmawi luang hawlna a chu Mizoram’s Khawlien village a pat volunteer te’n nasatak ah hawlna a nei nung ua Khawlien leh Khawdungsei village kikal ah a mudaw uh hin a kigen a, tui in a tawmangna mun a pat a luang kimudawna chu km 3 ah kigamla a hi. Mrs Lalruotmawi luang chu tuni nitaklam dak 4:00 tuam ah Parvachawm village tut hiding in a khua miteu khat in a gen a, zia zaw tak chu leh tribal tradition tawh kituak ah vuiliam hiding ti a hi.
ZYA a pat YPA pawt
Lamka, June 4(Nisin Thuhiltu): A chiata June 1, 2017 ah Young Paite Association (YPA), General Headquarters in Cabinet leh Adviser te tawh meeting nei khawm in Zomi Youth Association (ZYA) a pat pawt ta ding ti’n thupukna a siam u’i. Thutut kimu dungzui in, August 31, 2015 ah Manipur Assembly in Anti - Tribal Bill 3 a pass ziak ah khangthak tamtak in liamna a tuak ban ua Salpha te vuilo ah ni 631 lam kiphinna nei hun sung ah ZYA in constituent unit te khatvei le joint meeting neipi khalo in bangma’ a simlo leh thuselo hi ah ngai a hi ziak ah ZYA a pat pawt ding ti’n a chia khawm te’n thupuk uuh hi’n a gen hi. Meeting a chun member 63 chaikhawm hi’n le a kigen hi.
Police in zu hunkhawp susia
Lamka, June 4 (Nisin Thuhiltu): District Police in khawpi sung mun chuam chuam ah zu a matdawteu tuni’n Inspector RK Anil Kumar Singh, Officer In-Charge, Churachandpur Police Station malatna nuai ah Police leh VDF personnel kithua in Sielmat Lei tung ah a chunna susia in lui sung ah a bawtha’u. District Police in tuni zu a buak thak cheng uh a kihawm ah Liter 600 tuam pha hi’n Inspector, RK Anil Kumar in gen a, maban a le a pawimaw dan zil ah drive nei zawm hi ding in le a gen hi.
Manipur ah organic farming lawting sak hitiu: Chief Minister Biren Singh
Imphal, June 4 (Nisin Thuhiltu): Chief Minister Shri N. Biren Singh in mipi te kiang ah Manipur ah organic farming lawtingsak ding in chialna a bawl a, chemical fertilizer te siatna genlang in fertilizer leh chemical mat in mihing te damtheina lam sukha ding a hi ban ah natna chuam chuam le hung tung sak ding hi’n a gen hi. Central Agricultural University (CAU), Lamphelpat ah Administrative Block ding hawnna tuni a nei hun a chun, CM Biren in Manipur ah thaichi leh thei ga a hawi ziak ah “Sanaleipak Manipur” a la kiti sek hi’n a gen a, a gam lei le hawi mama in lomasuak le hawi mama hi’n a gen hi. State sung ah agricultural sector lam government in ngawikhawk mama a hi dan genlang kawm in lei nuai ah tui a tam ban ah gua le hawi tak ah a zuk zik ah lobawlmite’n double cropping chiapi thei le ti’n a dawidan a gen hi. Hill area te ah rainwater harvesting facility kawi ding in zia chu dawn ding leh lotui ah matthei ding hi’n le a gen hi. State sung ah nekguk a hat tawh kisai ah lungnawplo thu phuang kawm in nekguk ziak ah khawtang siatlo leh nekguk suk beina idng ah pangkhawm pawimaw hi’n le a gen hi. Block hawnna chu Chairman, Pollution Control Board leh Khadi & Village Industries, L. Radhakishore Singh, Parliamentary Secretary ( MAHUD), N. Indrajit Singh, Vice-Chancellor, CAU, Prof. M. Premjit Singh, Director of Research, CAU, Prof. C.A. Srinivasamurthy, ban ah CAU official leh student te’n a uap ui.
Dzukou Valley humbit pawimaw: Minister
Imphal, Jun 4 (Nisin Thuhiltu): Manipur Forests & environment Minister, Th Shyamkumar in etlawm um tak Dzukou Valley nature a pat state a ding ah thilthawn piak hi’n tuni’n a gen hi. "Mission Clean Dzukou" nuai ah Dzukou Valley a chia ding team khat a thakdawna a chun, Minister in Dzukou valley leh Dzukou Lily humbitna pawimaw hi’n a gen a, valley chule thiangtho tak ah kawi ding hi’n a gen hi. Mission chu a hileh World Environment Day 2017 tawh kisai a hia, tukum ah theme ding a hileh "Connecting People with Nature" ti a hi. Minister Shyamkumar in khawvel chu pankhawm ah humbit thei hi’n a gen a, Pathian in chenna ding ah lei hawi tak hu pe maleh tu hin mihing te bawl khial ziak in nature tawh kimelma gual a um ta hi’n le a gen hi. Mission a chun a kigawm ah tângkal mi 64 a pang ua, Dzukou Valley va entha ding a hiu.
Moreh ah dakkal 24 sung bandh; RPF ki puang
Imphal, June 4 (Nisin Thuhiltu): Moreh section National Highway 102, Khudengthabi kiangnai M Mongjang ah June 3, nitaklam dak 2:15 ah Improvised Explosive Device (IED) bomb mang ah E-Coy, 11 Assam Rifles, ROP duty te attack ah a umna chung un Moreh ah NGO zosia kithutuak in tuzan kim a pat dakkal 24 sung Moreh huap sung in bandh bawl ding a hiu. Zia bandh chu security personnel te attack kibawl dawilo suklatna leh mipi nautang te lauthawng tak ah a um zing uh dawilo suklatna kibawl hin a kigen hi. A langkhatlam in M Mongjang ah IED attack kibawl chu Revolutionary People’s Front (RPF) in amau thil bawl a hidan a puang ua, People’s Liberation Army military wing special warfare team in attack a bawl a hidan le a taklang hi.
Anti-corruption cell in ATR suadawk
Imphal, June 4 (Nisin Thuhiltu): Manipur anti-corruption cell in tuni’n Action Taken Report (ATR) a suadawk a, zia dungzui a chu cases 31 te dinmun khualna nei ah um a hidan taklat in a um a, line of duty ah dan zui diklo ziak ah staffs pathum suspended ah um hin a gen hi. Horticulture assistant officer, assistant agriculture officers leh contract employee khat chung ah complaint diklo tak ah kibawl ti tawh kisai ah anti-corruption cell in administrative department te thuhiat ah a um bak ua, state cabinet in approve a bawl nung ah MPSC hiatpina tawh action lak ah um hin a taklang hi. Kangpokpi ah government high school function lo ti tawh kisai suizuina, a kisaipi CEO in school vethakna a nei hun ah teachers pathum te a ziak bei ah absent um un a gen a, Rs 200- Rs 500 piak a hiloleh resident certificates leh income certificates piak hilo ding ua SDO Moirang in gen a nei hih ti ah hekna tawh kisai banah Moreh Higher Secondary School ah lecturer Jangkholal Mate in bio-tech laboratory sakna ding sum a su chavai hi ti ah hekna te pang in case chuam chuam 31 suizuina tawh kisai le taklat in a um hi.
Kalikhola khawmi te puidaw ah um
Imphal, June 4 (Nisin Thuhiltu): Kangpokpi a pat10 kilometer ah gamla um Kalikhola khawmi (villager) te chu nimchim (landslide) nasatak umthei ding ah muanmaw ziak in puidaw in a um ui. A kigendan ah Kalikhola kiangnai ah tang chung chu khikek nasa mama in a kigen hi.
Fast-track court siamdaw pai hiding: CM N Biren
Imphal, Jun 4 (Nisin Thuhiltu): Numei chung ah tatsualna a pung mama tawh kitawn in, Manipur Chief Minister N Biren Singh in tuni’n numei chung ah sualna dodalna ding ah fast-track court bawldaw hi pai ta ding hi’n a gen hi. Jubilee Hall, RIMS Imphal ah ‘Development Priority of Manipur’ tawh kisai ah 2 day seminar hawnna a nei hun ah a thugenna a chun, state sung ah numei chung ah tatsualna pung mama ta in numei kithana case khenkhat le hiat ding tunai ah um hi’n CM in a gen a, zia kithana te ah ginmaw te chu police in man ta hi’n le a gen hi. Steering Committee in a sai zia seminar chu a hileh State sung ah development dodal thei ding buaina te genkhawmna ding hi’n le a gen a, zia a pat chu buaina te a veng thei na ding lampi mudaw hithei ding hi’n a gen hi. Seminar hun ah ngaidan leh lunggel chuam chuam kipaw dawk ding te chu government in ngaitha in state ah state sung ah khantona ding ah sep ding pawimaw te hiatna mang ding hi’n le a gen hi. Development haiwtak nei thei na ding ah Ministry of DONER in tunung sawtlo ah “Hill Area Development Programme” chu Manipur, Assam leh Tripura ah pandawk pai ta ding hi’n le a phuangdaw hi. Chun, khamthei chung chang a genna a chun, state sung ah khamthei dodalna nasatak ah chiapi ding leh khamthei ah kivei te chung ah action khautak lâk hi ding in le agen hi.
PMUY hawnna nei di
Imphal, June 4 (Nisin Thuhiltu): Pradhan Mantri Ujjwala Yojana (PMUY) chu zing, June 5 leh City Convention Centre, Imphal ah hawn hi ding a hia, zia hun a chun Chief Minister N Biren Singh in Chief Guest hina uap ding, Dr. Jitendra Singh, Minister of State (DoNER), MoS PMO, Personnel, Public Grievances, Pensions, Atomic Energy& Space; Dy. Chief Minister Y. Joy Kumar Singh; Minister, CAF&PD Karam Shyam; Inner Manipur MP, Thokchom Minya; Outer Manipur MP Thangso Baite; Rajya Sabha MP, M.C. Mary Kom leh Rajya Sabha MP, Ksh. Bhabananda Singh te’n le uap ding a hiu.
Ex-pradhan khat in a suapipa sawisalum
Imphal, June 4 (Nisin Thuhiltu): Thoubal district, Irong village ah IRB personnel Feroz khat chu a pianpi a suapi pa tawh kilung nawplo ziak in a suapi pa former pradhan Mr Latif in a sawisa lum hi. A kigendan ah Feroz leh a U (brother) Latif chu insungthu tumasang a pat a la kina buai zing sek un a kigen a, tu masang ah a U’n meithal ah le a la kap, a liamna dam dawk tak tak nailo hin a kigen hi.
‘Chiehlai I Hiu”album hawng di
Lamka, June 4 (Nisin Thuhiltu) : New Lambulance ESC Male Voice te’n Gospel Album ‘Chiehlai I Hiu’ kiti a siam daw thak uh chu June 10, 2017 leh ESC New Lambulane Biak-inn ah hawn hiding a hi. Zia hun chu S Thienlaljoy Gangte, MCS, AC to DC, CCpur in Chief Guest hina tawh uap ding a hia, Lalawi, AGM, IDBI, Imphal leh J Soitinthang, Sr. Manager, ICICI te’n Guest of Honour, Functional President hina tawh uap ding a hiu.