JULY 1, 2017 A PAT GOVT HOSPITAL AH TEST BAWLNA A THAWN (FREE) HITA DING; PUBLIC AH DUMZIAL CHEP KHAP HIPAITA DI: CM N BIREN SINGH
Imphal, May 31 (Nisin Thuhiltu): Jawaharlal Nehru Institute of Medical Sciences (JNIMS), Imphal Auditorium ah Chief Minister N. Biren Singh in tuni, 31 May 2017 ah "World No Tobacco Day" matna a thugenna a chun, RIMS, JNIMS, District Hospitals, CHCs leh PHCs te panna Government medical facility chuam chuam umna te ah July 1, 2017 a pat damtheina dinmun test bawlna a thawn (free) hita ding in a puang a, zia ding a chu blood tests, X-ray, CT scan, nauvawp numei leh naupang etc te panna test chi chuam chuam 57 teldaw ah um hin a gen hi. Zia teldaw ah um test chia chuam chuam 57 te chung a chu kuama’n single Paisa le a piaklo ding uh hin a gen a, Ministry of Health and Family Welfare, Government of India nuai ah National Health Systems Resource Centre (NHSRC) tawh partner ah thiangtho tak ah free diagnostic facility umsak ding leh testing labs kawibe hiding in a gen hi. State Government in Government health establishment te a pat a thawn ah damdawi piakbelap ding ah ngaituana nei hin le a gen a, zia tawh kisai a chu tunaicha a khah Jan Aushadhi stores hawn ah um hin a gen hi. Jan Aushadhi store ah damdawi te chu branded medicine te sang ah mantawmzaw a hidan le a gen a, free drug supply sukpun hiding a hidan genkawm in, Department in additional free medicine supply tha 2 / 3 zaw pat a hitheina ding ah panlakna nei zing hin a gen hi.Tobacco tawh kisai a genna a chun, State Government in a vaima theipen ah Cigarettes and Other Tobacco Products Act (COTPA), 2003 tawh kituak ah publice ah dumzial chep khap (ban) ding ah guanggalna nei hin a gen a, State Government in cigarette tilo tobacco items chuam chuam te hunsawtpi a pat ban ah a puan hita hin a gen hi. Khautak ah zia dan kisiam te chu chiapi hiding in a gen a, State Government in intoxicants leh tobacco item te chung ah drive a chiapi sunzawm zing ding hin a gen hi. Funtional President hina tawh hun matna uap - Health and Family Welfare Minister L. Jayantakumar in a thugenna a chun, khangthak te tobacco item chuam chuam te a pat a kikawi kaang ding uh pawimaw in a gen a, habit ah tobacco a mat zing ua leh tunung ah kikawi kang haksa ding hin a gen hi. Guests of Honour hina tawh hun matna uap, Union Minister of State for Health Anupriya Patel in a thugenna a chun, khawvel ah tobacco leh dumzial chep ziak ah thina tuak tampen in a gen a, a diak ah income niam leh a lailak (middle group) tamna gam –India ah tobacco leh dumzial chep ziak ah thina tuak tam mama in a gen hi. Chun, tobacco control bawlna ding ah Health, Home leh Education Departments inpan a lak khawm zing ding pawimaw in a gen hi. Parliamentary Secretary (Health and Family Welfare) S. Subhaschandra in a thugenna a chun, dumzial chep leh tobacco product mat (use) chawlsan ding in hun matna uap mipi te chialna a bawl a, zia chu hileh natna lau um tak tak – cancer ti te maitua lo ah um thei hiding leh hinna hukdaw hithei ding ti'n a gen hi. World No Tobacco Day chu Directorate of Health Services, Manipur, State Health Society, National Health Mission, Manipur and District Health Societies of Imphal East & Imphal West te saina’ kimang a hi.
TOBACCO PRODUCT TE’N GASUA HAWI TUT NGAILO: DC/CCPUR
Lamka, May 31 (Nisin Thuhiltu): District Tobacco Cell, Churachandpur vaisaina nuai ah tuni’n CMO Mini Conference Hall, District Hospital, Churachandpur ah "Tobacco a Treat to Development" ti thupi mang in “World No Tobacco Day 2017” matna a um a, zia hun chu Churachandpur DC thak, Shyam Lal Poonia, IAS in Chief Guest hina tawh uap in, Dr. Kimngaihching Simte, CMO/District Mission Director, Churachandpur in Functional President ban ah Rakesh Balwal, IPS, SP/Churachandpur te’n Special Guest hina tawh a uap ui. Chief Guest, Shyam Lal Poonia, IAS, DC/CCpur in tobacco product chêp leh muam hi ziak ah gasua hawitak piangdawk kiti umkhalo a hiban ah natna lau um tak tak piangsak in thina a tut bep hilo ah mimal taksa ti taklo innsung leh khawtang ah siatna tun thei a hi na ah kuamasap in tobacco product te a hawilo dan a tam theilam ah puangdaw pawimaw hi’n a gen a, tobacco product sukbeina ding ah District Administration in panlak thei chan la ding ah kiman sa hi’n le a gen hi. Functional President Dr, Kim Simte in kumsin ah Tobacco product hi zawngsak ziak ah mihing million a sim te’n thina a tuak zing uh chu ngai khawk mama in World Health Organization (WHO) in tobacco product sukbei na ding in kumsin leh May 31 chu ‘World No Tobacco Day’ ni ah puang in zia chu khawvel mun tin ah mat hi sek hi’n a gen hi. Tobacco product te’n natna lau um tak tak hung tun in a mang tu te hinna sukiam hi’n le a gen a, zia chu suk bei na ding ah kuamasap in panla ah tobacco product himhim dodal khawm ding ti’n a chiakhawm te kiag in chialna le a bawl hi. Special Guest Rakesh Balwal, IPS in CCur district ah zalen tak a tobacco product chêp leh muam a tam bep hilo in hospital a le muthei ah a um chu khawksa mama a hi dan phuang dawk kawm in zia te chu haisan hunta hi’n a gen a, student te damtheina susia thei ding tobacco product te chu school a hiloleh college kiang nai ah kuama’n zua talo ding in le hiatsakna a bawl hi. Hun dang ah school/college kiang ah zu zuak kham a la hi gual in tobacco zuak te chung a le action lak ding a hi ah SP/CCpur in genlang kawm in tobacco sukbei na ding ah kithuapina a pawimaw leh District police nuai a um Narcotic Cell te kiman zing hi’n le a gen hi. Hun matna a chun, World No Tobacco Day tawh kisai ah Poster Painting Competition na kipakman piakdaw le a um a, Lalkhualkima in 1na la in certificate tawh sum Rs. 1,000 a sang a, Doumuanthang Taithul in 2na la in, certificate leh sum Rs. 700 ban ah Ginliansiam leh Richard Parvolic te’n 3na la in, certificate leh sum Rs. 500 a sang gel ui. Zia vaiguan mat masang a hin, Shyam Lal Poonia, IAS, DC/CCPur in District Hospital OPD Building ah Tobacco Cessation Centre hawnna nei a, Guest te leh Hospital staff te’n Centre etthâkna le nei in Rev Enzasian, Senior, EGF, CCpur in Pathian kiang ah a lan hi. Hawndaw a um Tobacco Cessation Centre a hileh dum chep leh muam zawngsak ah haisan nuam te a ding ah kibawl a hia, centre a chun councelling ban ah dum haisan nuam te a ding ah damdawi piak hisek ding a hia, zia hi hapta ah ni 3 - Sepkitni, Ninganni leh Kiginni zingkal dak 10 a pat sunnung dak 2 kikal in kihawng ding a hi. Tobacco Cessation Centre a hileh Manipur state sung a district 2 - Imphal West leh CCpur district bep ah um pan a hi.
PENSION SUM HAWPNA KIPAN DI
Lamka, May 31 (Nisin Thuhiltu): Churachandpur district huapsung a um Manipur Old Age Pension Scheme nuai a Purple Card Holder te kiang ah a hung tung ding June 1 a pat District Social Welfare Office, Chiengkhonpang, Tipaimukh Road ah pension sum hawpdaw na kipan ding a hi. Pension sum a hileh March 2016 a pat February 2017 chan a hi ding a hia, tha 1 a Rs 200 leh a kigawm Rs 2, 400 hiding a hi. Manipur Old Age Pension Scheme nuai a Purple Card Holder te’n pension sum lakdawna ding in old age card, aadhaar card Xerox copy, bank pass book leh pension sum a lak zat uh kizikna lekha chawi in amau taksa ngei a kilak uh pawimaw ding a hi. Mimal tak ah va la theilo ding te’n le District Social Welfare Officer kiang ah kidawtna lekha a piaklut uh ngai ding a hi. Chun, June 1-2 leh CCpur AC te’n la ding a hiu a, June 3 leh Tipaimukh AC, June 5 ah Saikot AC, June 6 ah Henglep AC, June 7 ah Thanlon leh June 8 ah Singngat AC te hi ding a hiu a, akihawm hun sung ding a hileh 10:30 AM- 3:00 PM kikal hi ding a hi.
YVA KANGVAI BLOCK IN HIATSAKNA BAWL
Kangvai, May 31: Young Vaiphei Association (YVA), Kangvai Block President - K Chung Vaiphei leh Secretary - G.K. Suantak suai kaina press release in a taklatna a chun, Young Vaiphei Association (YVA) Kangvai Block huap sung ah Y.V.A. Unit umte tawh Joint Meeting a nei hun ua thupukna a siam uh tawh kituak ah Kangvai leh District Hospital, CCpur kawmtua ah tai Jeep/Taxi Service Welfare Association in Kangvai Bazar leh Leisang kikâl ah Line Bus tâitua te’n Passenger a lâk malam sek uh a zakda uh chu, nisin nekkawm hawlmi te leh naupang lekha simlâi te khualna’ zada ta lo ding in chialna leh hiatsakna a bawl ua, 1st June 2017 a pat nidang ah a taidan gual ua Parking tin ah Gari ngak te pawmalam thei ta ding ah Bus Service te hiatsakna bawl a hidan uh a taklang ui.
SEPNA AH KÂISÂNG
Lamka, May 31 (Nisin Thuhiltu): Carolyn Nunlim w/o Thankholal Baite of Moti Bagh, New Delhi chu Assistant Section Officer, AFHQ, Ministry of Defence ding ah kâisang hi’n a muan um tak a pat in thutut a ki dawng hi.
PH.D MUTHAK
Leisang, May 31: Manneihoi w/o Mr Pauzamuan Vaiphei of Leisang, Churachandpur in tunaicha a khan Manipur University (MU), Faculty School of Humanities, Subject English in Doctor of Philosophy (Ph.D) a muthak hi. A thesis a hileh “Colonialism and Nationalism: A study of Kanthapura, Things Fall Apart and A Grain of Wheat” a hia, Prof. M. Mani Meitei supervisor hina nuai ah Doctor of Philosophy (Ph.D) mu a hi.
FOOTBALL COACHING UM DI
Lamka, May 31 (Nisin Thuhiltu): A hung tung ding June 15, 2017 a pat Nghathal Playground ah football lunglut kum 10 - 16 kikal mite a ding ah football coaching um ding a hia, admission chu Rs. 1700 hi ding leh zia chun tha 1 fee, uniform set, stoking leh ID card le pang ngal ding a hia, monthly fee a hileh Rs 500 hi ding a hi. Zia coaching chu Coach - M Ratan, AIFF/AMFA, Assistant Coach - Giya Aboi, AMFA ban ah helper - G Hausonpau leh James te hilna nuai ah um ding a hia, hapta 1 ah ni 3 - Seppatni, Nilaini leh Kiginni zingkal dal 6 a pat dak 7 kikal hi ding in course ti um chuam lo in thasin leh chiatha zing ding a hi. Football coaching a lunglut te’n Mawi Dukan, Bungmual; Sanglian Dawr, Sahei Road, New Lamka leh James, Nghathal te kiang ah form muthei ding uh leh June 12, 2016 chan ah pialut thei ding a hiu.
NAUNEI PANPINA SUM HAWM
Lamka, May 31 (Nisin Thuhiltu): Janani Suraksha Yojana/Janani Shishu Suraksha Karyakaram (JSY/JSSK) Cell, District Hospital ah tuni’n naunei panpina sum hawmna sutzawp a hi. Panpina sum a hileh tukum May 2017 tha sung ah nauneite kiang ah piak a hia, a sângthei dingte’n nau neina tawh kisai lekha pawimawte chawi in JSY/JSSK Cell a pat panpina sum a la u’i. JSY/JSSK a pat naunei panpina sum a hileh a kidai dan dungzui ah piakzawm hiding hi’n a kigen hi.
GÂLNA LEH ZÂNGN DAWPNA PIA DI
Lamka, May 31 (Nisin Thuhiltu): Churachandpur District Education Employees’ Union (CDEEU) in a hung tung ding June 4, 2017 zingkal dak 7:00 leh ZEO Office, CCpur High School ah thina tuak a member piteu innkuan te kiang ah gâlna leh zângna dawpna, Death cum Gratuity (DCG) piakna nei ding a hiu a, zia hun chuleh Finance officers ten nominee te kiang ah galna sum (DCG) piakdawna nei in H Pauzachin, President, CDEEU leh T. Goukhomang ZEO churachandpur te’n thugenna thugenna hun mang ding a hiu.
DMO IN KIMELHIATTUANE NEIPI
Lamka, May 31 (Nisin Thuhiltu): Dr. V Jamthianlal in District Malaria Officer (DMO), CCpur panmun a lua tawh kitawn in tuni’n a office Chamber ah Malaria Department nuai a sem te tawh kimel hiattuane leh DMO a hi nung ah amasapen ding in meeting a nei pi hi. Meeting a chun CCpur District Malaria Department nuai a sem staff te hunkhawp a pang ua, nasep daw sa te leh maban panlak ding dan tawh kisai a gen khawm ui.
HOSPITAL AH ATM MATTHEI HIPAI TA DI
Lamka, May 31 (Nisin Thuhiltu): Churachandpur District Hospital Emergency/casualty building kiang ah ATM Booth ah machine kawi zaw a hi tawh kitawn in tuni’n ATM Machine leh Internet kizawp tuana ding Satellite Receiver tua in a um hi. ATM Booth chu online a hi hun hun ah United Bank of India (UBI) official te’n ATM machine activate bawl in zia chu matthei hita ding hi’n a kigen hi. ATM Machine a hileh District hospital kawi a hitheina ding ah Hospital administration leh United Bank of India, CCpur Branch kithua ah hun sawttak a pat a la buaipi pat uh a hitai.
GSO BLOCK PUITU TE’N KITIAMNA NEI
Lamka, May 31 (Nisin Thuhiltu): Gangte Student’s Organization (GSO) General headquarter mapuina in tuni’n Hill Town Community Hall ah GSO Churachandpur Block leh Thangting Block puitu ding te kitiamsakna leh pauchap piakna a um hi. Zia hun a chun, Songminlun Gangte, General Secretary, Gangte Youth Organization (GYO) GHQ in election result puandawna a nei zaw ah teltin thak a um te Neka Gangte, Ex President, Gangte Student Organisation (GSO) GHQ in kitiamna nei sak in Khuolien Gangte, Ex General Secretary in mawpuakna piakdawna a nei a, Upa Paozalun Gangte in pauchapna a nei piak hi. Kitiamna nei zaw in pawl chuam chuam a pat puitu chiakhawm te’n tilkhona leh hanthawna thu a gen pi u’i. Zia hun matna chu Gangte nam sung a pawl chuam chuam - Gangte Tribe Union (GTU) GHQ, Gangte Tribe Council (GTC) GHQ, Gangte Youth Organization (GYO) GHQ, Gangte Literature Society (GLS) GHQ leh Gangte Chief Association (GCA) GHQ ah puitute ban ah student tamtak in a uap ui. Vaipaw thak ding ah kitiamna nei te a hiuleh:- GSO CCpur block ah President - Kamlalson, Vice President (Admin) - Goulalmuon, Vice President (External) - Kaminlien, Gen. Secy. - Ngamgousiem, Jt. Secy-Goukhuollien, Fin. Secy. -Kimnunthiem, Treasurer - Bonny ban ah department chuam chuam ah mawpua ding in mi dang 8 guat a hiu a, GSO Thangting block ah President-S Mangliensiem, Vice President (Admin) - Paulalzui, Vice President (External) - Boipu, Gen. Secy. - Th Soilalzom, Joint secretary-Thanglienkhum, Fin. Secy. -Thiethiem ban ah department chuam chuam ah mawpua ding in mi dang 8 guat a hiu.
DLRC MEETING UM DI
Lamka, May 31 (Nisin Thuhiltu): A hung tung ding June 3, 2017 sunma dak 11:00 leh BRGF Hall, DC Office, Tuibong ah Ccpur District Consultative Committee (DCC) District Level Review Committee (DLRC) cum Special District Coordination Comittee Meeting for the Quarter Ended March 2017 um ding a hia, zia hun chuleh Shyam Lal Poonia, IAS, DC/Churachandpur malatna nuai ah March 2017 chan ah nasep daw te genkhawmna um ding a hi.
MLA KIPAKPINA NEI
Lamka, May 31 (Nisin Thuhiltu): Sangaikot Sub-Division Chiefs’ Association (SSDCA) in tuni’n Sangaikot SDO Multi-Purpose Hall ah MLA Ginsuanhau @ GS Haupu Zou, Chairman, MANIREDA kipakpina hun a nei pi a, zia hun chu Sangaikot Sub-Division sung a hausa chuam chuam in uap in Paokhomang Haokip, Chairman, SSDCA in Assaciation min ah Memorandum piakna a nei hi. Paokhomang Haokip in a thugenna a chun, Sangaikot Sub-Division in a pawimaw mama, thiamzilna tawh kisai ah ZEO nuai a Deputy Inspector of School khat kawi ding, Full Fledge PHC khat leh Ambulance khat ban ah Sangaikot leh T. Khuangkhai kikal lampi siaml hawi ding ah dawtna Memorandum pia hi’n a gen hi. Sangaikot Sub-Division Women Union (SSDCA) in le Sub-Division sung Solar Street Light vaksakna ding tawh kisai in Memorandum piakna a nei ua, KNO Camp Salem a Chief Commissioner, Khaipao Haokip, Chairman, ADC Churachandpur leh GS Haupu te’n thugenna a nei ui. GS Haupu in hun matna uap Sangaikot Sub-Division sung ah khawhausa 57 te kiang ah Hausa Puansan khat chiat a silsak a, hun mat sung in Hemkhochon, Amos Haupu Baite, Sohthang @ Thangboi Haokip, Nenei, Kamboi Baite leh Paojang Haokip te a pat lâ ngaithakna le a um hi.
IFCD MINISTER LEH OFFICIAL IMPHAL AREA AH TUILET THEINA DING DINMUN ENZUI
Imphal, May 31 (Nisin Thuhiltu): Manipur capital Imphal kim leh kiangnai tuam ah tui a letna chung in Irrigation and Flood Control Department Minister Letpao Haokip in Department official te tawh tuni’n tui letna dinmun te etthakna a nei a, department engineers/official te’n Minister thupiak dungzui in tui let ziak ah haksatna tuak thei ding te kivenna ding ah van mat - bamboo chattai, cement bags hawm, gua (bamboos) etc ti te local mite lak in a hawm ui. Department official te’n local clubs member chuam chuam te tawh kithua in emergency ah tui let control bawlna ding in le panlakna a nei ui. IFCD Minister Letpao Haokip chu Parliamentary Secretary (IFCD) Rameshwor Meitei leh Additional Chief Engineer Ksh. Pritam Singh te’n le a zui ua, Heingang AC nuai ah Khabam Lamdaibam leh Achanbigei Thongkhong mun te etthakna nei in, Mongjam, Keirang, Khurai -Salanthong area, Heikrumakhong, Lairikyengbam areas banah tui let theina ding ah muanmaw na mun chuam chuam te etthakna a nei ui. A langkhatlam in, Department officials/engineer te’n Singjamei Thokchom Leikai, Yaiskul Range Lampak, Sairom Leirak Yengkokpam Mapa (Thongju A/C) etc ah tui dinmun etthakna a nei ua, IFCD official thusuak in flood control material te mipi te ding ah kituptak ah kawi ah um hin a taklang hi. Chuleh IFCD Chief Engineer office, Khoyathong ah Flood tawh kisai ah control room hawn in a um a, tui letna tawh kisai ah phone number 0385-2451550 ah thuhiat zing thei ding a hi. Zia kawmkal a chun, tuni nitak lam dak 5:00 in Imphal River ,Minuthong area ah tui level chu Highest Flood Level (HFL) a tung a, Lilong area ah 781.70 M ah record a hi.
ROAD RAGE CASE AH MANIPUR BAR KITHIAMCHANNA LAWYER BAINS IN PAWMLO
Imphal, May 31 (Nisin Thuhiltu): Manipur Road rage case ah victim nu leh pa te thasik ah Supreme Court ah petition file bawltu advocate Utsav Bains in Manipur lawyer te’n Manipur High Court ah victim Irom Roger pianna nu Irom Chitra Devi a dinpi nuamlo ua Supreme Court a tut chu All Manipur Bar Association in pawmlo a hidan a taklang a, victim Irom Roger insungmite hinna lauthawn um a sak ziak ua court ah dinpi lo hizaw a hidan uh Advocate L Roshmani in press conference in a gen hi. Chuleh, Advocate Kamini Jaiswal in advocate Utsav Bains kithuapina’, Supreme Court ah Manipur lawyer te’n victim Irom Roger insungmi te Manipur High Court ah dinpi ngamlo ua a gen chu Manipur Bar suk minsiatna hin a gen hi. A langkhatlam ah advocate Utsav Bains in victim Irom Roger pianna nu Irom Chitra Devi leh a insung mite Manipur lawyer te’n Manipur High Court ah a dinpi nawplonau tawh kisai ah evidence nei a hidan taklang kawm in, All Manipur Bar Association in press conference a bawl sang ah lawyer te’n kum 5 sung ah victim pianna Nu a ding ah justice a um theina ding ah panlakna a neipi zawk ding uh pawimaw zaw hin a gen a, lawyer te’n victim pianna Nu a dinpi nawplo nau tawh kisai ah evidence leh lawyer te umdan suklat (show) theina ding ah evidence Supreme Court tut a hidan a gen hi. Case khat state of affairs ah a um chu khawk a sakthu le gen in, lawyer te’n noble profession a join uh tawh kitawn ah mipi te chung ah mawpuakna (duty) kitup tak ah chiapi uh pawimaw in a gen hi. Mipi te’n a pawimaw hun ua dinpi ngam ding a hidan a le a gen a, lawyer ten dinpi nawp leh nawplo a neithei uh hilo in a gen hi. Chuleh, ama chu lawyer khat a hina dawl ah a sep dingdawl (duty) sem a hidan le a gen a, a hinna lakpiak hiding khawp ah terrorist te a pat vauna mu himaleh High Court of Manipur, Imphal ah pettion file a hidan advocate Utsav Bains in a gen hi. Hiathei khat chu Manipur Road rage case ah tualthattu chief minister Biren Singh chapa Ajay Meetai chu March 20, 2011 ni ah SUV gari a taina, lampi awng-awt nuamlo ti ah Irom Roger a kaplup ziak ah kum 5 sung jail tang ding ah sessions court in tukum January 2017 a khah Section 304 (culpable homicide not amounting to murder) of IPC nuai ah thutanna a la siam khum a hi. Kum 2011 ah thiltung hitamaleh tuni tiang ah a case sukfello ah um a hia, victim Irom Roger pianna nu Irom Chitra Devi in vau lau ah a um bak ua, state lawyer te’n court ah dinpi nuamlo a hidan uh genkawm ah a case chu Supreme Court a tut a hi.
29 AR IN HYBRID POWER PLANT INSTALLED
Imphal, May 31 (Nisin Thuhiltu): HQ IGAR (South) nuai ah um, 29 Assam Rifles of 28 Sector Assam Rifles in Border Area Development Programme (BADP) 2016-17 nuai in Molanghat Village, District Chandel ah 6 KVA Wind & Solar Hybrid Power Plant installed a bawl ui. Molanghat chu Indo-Myanmar border ah um a hia, government in developmental project kituptak ah a chiapi theilona mun hi ah hiat a hi. Zia gual ah 29 Assam Riflesin mipi te khualna panlakna a nei chu Molanghat te’n kipak um a sakthu’u a puang ui.