STATE CABINET IN BANDH LEH BLOCKADE KHAPNA DING DAN THAK SIAM LEMSA;
BANDH LEH BLOCKADE BAWLTU TE’N THIL KISUSIA LEH MIPI HAKSATNA CHUNG AH MAW A KIPUAK DING
Imphal, May 30 (Nisin Thuhiltu): Manipur ah organization chuam chuam in bandhs leh blockades a bawl mun mama ziak ua state mipi te’n haksatna a tuak teu State Cabinet in Chaief Minister N Biren Singh mapuina’ genkhawmna a nei hi. High Courts of Kerala, West Bengal leh Meghalaya in thutanna (judgments) a siam dungzui ah Manipur ah le dan thak siam ding, bandh leh blockade kiti him him dankal (illegal) ah kawi ding leh bandhs leh blockade bawltu organiser te leh sponsor tute’n bandhs leh blockade um hun ah thil suksiat leh mipi te ding lemchanlona um te chung ah maw a ki puak ding ua dan siam ding in lemsakna a nei hi. Chuleh, zia dan (law) kisiam dawk thak dungzui a chu bandhs leh blockade um hun ah thil suksiat ah um te bangkim bandhs leh blockade bawltu organiser te leh sponsor tute’n a ditkit vek ding uh leh bandhs leh blockade bawlna panla tute Government sepna piaklo ding leh Government schemes nuai ah benefits um te le piaklo ding bak ah a chung ua criminal proceeding chiapi ding in lemsakna a nei hi. Constitution of India, Article 19 & 21 nuai ah bandh leh blockade chu mipi te chung ah Fundamental Rights piak ah um attack kibawlna gual in State Cabinet in a ngai hi. Hiatthei khat chu Supreme Court of India in bandh kiti chu unconstitutional leh illegal a hi ti ah a puan tak bak ah bandh leh blockade ti te ziak ah thil suksiat ah um te bangkim chu bandhs leh blockade bawltu organiser te leh sponsor tute’n a ditkit vek ding uh ti ah a puansa le hita a hia, sponsor bawltu ahiloleh orginiser te’n amau khut ah dan (law) license um gual ah nasep thil bawl a nei ua leh State Government in public interest ah alotheilo ah action a lak ding ti le State Cabinet meeting in hiatpina a siam hi. State Cabinet in State Government nuai ah Departments zosia' Internal Finance Division (IFD) siamdaw ding in le lemsakna a nei a, financial management systems kituptak a um theina ding ah Departments zosia' a umsa Accounts, Budgets, Audit, Planning sections chu Internal Finance Division (IFD ah siamthak hiding in lemsakna a nei hi. Manipur Sports Development Authority siamdaw ding leh khangthak te’n games & Sports lam ah masawnna a nei theina ding ua panlak ding, Centre ahiloleh State Government in Public Private Partnership mode ah Sub-Division, District leh State level tiang ah sports infrastructure siamhawi ding, tukum Panchayat election chu Zilla Parishads kisiam dawk thak pani - Kakching leh Jiribam tawh neikhawm ding in lemsakna a siam hi. Popular footballer leh Head Constable (Manipur Police) Ms. O. Bembem Devi chu ASI rank piak ding, martial arts fighter leh Super Fight League ah champion Kario Issac Maheo s/o L. Ashikho Mao of Karong village, Senapati district chu Manipur Police Department nuai ah Meritorious Sports Quota ah SI piak ding, Dec. 5, 1997 ah thingnuaimi te khut ah thina a la tuak te pianna nu - Smt. S (O) Leimahan m/o (L) S. Iboyaima (Ex-Rifleman), Smt. L. (O) Nayani Devi m/o (L) L. Binoy (Ex-Rifleman) and Smt A. (O) Sangaijaobi Devi m/o (L) A. Anand (Ex-Rifleman) te chu special pension piak ding in lemsakna a nei hi.
HUIPI’N KANGKAP LEH SAIHA NUAI
Lamka, May 30 (Nisin Thuhiltu): National Weather Forecasting Centre in Bangladesh a pat India ah state chuam chuam, a diak ah Odisha, West Bengal leh Northeast te Cyclone “Mora” in nuaikha thei ding tia a la genlawk tawh kitawn in tuni’n mun khenkhat huipi’n nuai kha hi’n a kigen hi. Chandel District a um Dingpi Area lak chu zingkal lam in a nuai in, inn leh lo hunkhawp a susiai. Mizoram a um, Saiha ah huipi hattak nung in Saiha Hospital fencing leh building a mut sia, sunnung in Singngat Sub-Division huapsung a um, Kangkap khua le nuaikha in inn leh lo suksiat nei hi’n a kigen a, zia thu zik a hi tiang a hin thuthak hiat a hi nai puai. Kangkap khua ah Cyclone Mora in chenna inn a suksiat piak hiatthei khenkhat chu; 1. Songkhopau s/o Nekzakham, 2.Thongkhangin s/o (L)Aizam, 3. Paukhankhup s/o Kamvai, 4. Kaizasiam s/o Kaikap, 5.Nekthianlam s/o Zamkholet, 6. Phungkhopau s/o (L)Lalkhopau, 7. Nengzagin s/o (L) Haugou te a hiu. A langkhatlam ah Government of India in National Disaster Management Authority, New Delhi nuai in West Bengal, Tripura, Manipur , Mizoram, Assam, Meghalaya, Arunachal Pradesh, Nagaland and Andaman & Nicobar Islands ah Chief Secretary te cyclone Mora tawh kisai ah hiatsakna a bawl dungzui in, CS hiatsakna dungzui in Shyam Lal Poonia, IAS,DC/ CCpur kiveng chiat din hiatsakna thusua a bawl hi.
INSPECTOR 6 IN PDS ANNCHANG LEH THIL CHUAM CHUAM KIHAWM TE ENSUI DI
Lamka, May 30 (Nisin Thuhiltu): Churachandpur District Civil Supply Department nuai ah PDS annchang leh thil chuam chuam government scheme nuai ah kihawm te ensui ding Inspector 6 te Churachandpur District ah hung tung thak ua, amau chu: Nongmaithem Nicky- Civil Supply Inspector, Ng. Washington -Civil Supply Inspector, Deepankar Sharma- Civil Supply Inspector, T. Vhitaranjan Singh- Civil Supply Inspector, Lalhrietrenga -Civil Supply Inspector leh B Joshi Kumar Sharma- Quantity Inspector te a hiu. A kigendan in, tunung sawtlo ah sub-division chuam chuam ah kikhenzak ding uh leh panpina a hiloleh subsidize rate ah van hawp ah um te kituptak ah ensui ding uh ti a hi.
ECT IN GRADUATION DAY MANG
Lamka, May 30 (Nisin Thuhiltu): Nehru Marg a um Evangelical College of Theology (ECT), Nehru Marg in tuni’n ECT Chapel, Congregational Centre ah “As The Father Has Sent Me, I Am Sending You” ti thupi tawh Graduation-cum-Commissioning Ceremony a mang hi. Zia hun a chun, Dr V Lalnghakthang, General Secretary, RPC, NEI in Pathian thu genna a nei a, Rev Dr T Jamkhothang Haokip, Academic Dean, in Graduate te thilpiak piakna nei in Rev. Dr Lalrosiem Songate, Principal ECT in graduate student te degree piakdawna a nei a, Rev. Dr Kaitinkap, General Director, ECCI in pauchapna a nei piak hi. ETC a pat tuni graduation chang te chu - Master of Divinity (M.Div.) ah mi 15 leh Bachelor of Theology (B.Th.) ah mi 5 a hiu. M.Div. mu te chu - Seikholen Guite (KBC), Lhingneiting (MMBC), T Kamsanglian (PCI), K Luaiminthang (EBC), Sonminlen Haokip (ECA), Letminthang Haokip (KBC), Lalkhosei Haokip (ECA), Jamkhohao Touthang (CBCA), Th. Devanlal Aimol (KABC), Letkhotinlen Haokip (ECA), Shokholal Thomsong (KCC), T Lalthuom (ESC), Tinkhonei (ECA), Jonathan F Tusing (ICI) leh Khupminthang Doungel (KBC) a hiu a, B.Th. zo te a hiu leh Henry Vanrosum (Khamphat Baptist Church), Juney Chinneihlun (ESC), Sachindra Debbarma (ESC), Lalrohnun (RPC) leh Elizabeth Nianneilam, (NTBC) a hiu. Hun matna a chun, award chuam chuam le piak daw a hia, Class Topper Award chu B.Th 1st Year ah Nenglalem, 2nd Year ah Elvis Zothangsang Zote leh 3rd Year ah Kamdoisak te’n a dawng ua, M.Div ah a hileh 1st Year ah Letminlal leh 2nd year ah Ginjalal Khongsai te’n a dawng ui. Donor award te: Rev LS Sanga Award (M.Div Topper) - Seikholen Guite; Rev Khupjapao Singson Award (B.Th 3rd Year Topper) - Henry Vanrosum; Tongchin Touthang Memorial Award (College Topper) - Seikholen Guite, Re KT Amos Award - Vanrosum, (L) Rev Lhunkholet Memorial Award - Letminthang Haokip, M Div; Rev Thangjaleng Singson Award - Seikholen Guite, M.Div; Practical Ministry Award - Henry Vumrosum, B.Th; Elder Zanuom Award - Sachin Debbarma, B Th leh Thangkai-Lungpau Award - Thiankhonei te’n a dawng ui.
NURSE TE’N ONE HOUR WALK NEI
Lamka, May 30 (Nisin Thuhiltu): National Tobacco Control Program (NTCP) nuai ah District Tobacco Cell, Churachandpur saina in tuni zingkallam dak 10:30 a pat “World No Tobacco Day 2017” matna ding tawh kisai ah Nurses One Hour Walk a um hi. One Hour Walk a pang ding te Police Station ah kingakkhawm in Dr. Kimngaihching, Chief Medical Officer, Churachandpur in Flag-Off in Women Police te malatna’n Nurse te’n lampi zuina a nei ua, Tedim Road haw in Dorcas Hall, New Lamka chan “Anti-Tobacco Campaign” chuam chuam kizikna Placard chawi in lampi a zui ui. District Level “World No Tobacco Day 2017” matna ding tawh kisai in a chiata May 26, 2017 a khan le Rayburn College ah “Tobacco - A Threat to Development” ti thupi pansan in Poster zik kidemna a la um a, zia na chun Student 22 pang in kipakman a hileh zing, “World No Tobacco Day 2017” mat hun ah piakdaw hiding a hi. World No Tobacco Day 2017 matna chu MS Conference Hall, District Hospital, Churachandpur ah zingkal lam dak 10:00 leh kipan ding a hia, Churachandpur DC thak, Shyam Lal Poonia, IAS in Chief Guest hina tawh uap in, Dr. Kimngaihching Simte, CMO, Churachandpur in Functional President ban ah Dr. J. Son Gokham Samte, Medical Superintendent, District Hospital leh Rakesh Balwal, IPS, SP/Churachandpur te’n Guest of Honor leh Special Invitee hina tawh uap ding a hiu a, Chief Guest in District Tobacco Control Cell, District Hospital hawnna le nei ding a hi ban ah Advocate Songzamang Tawmbing, LLM in COTPA 2003 tawh kisai genna le nei ding a hi.
DMO THAK IN OFFICE LUA
Lamka, May 30 (Nisin Thuhiltu): District Malaria Officer (DMO) tu ding, Dr V Jamthianlal in tuni’n joining report pia in office a lua ngal hi. Manipur government in district thak 7 a la bawl tawh kitawn in Churachandpur district a sem officer khenkhat Pherzawl District ah chawn a hi uh tawh kitawn in CCpur district a DMO, Dr Liankhojam Guite le Pherzawl district ah CMO ding ah chawn a hi nung in CMO, Dr, Kim Simte in hun chawmkhat DMO tawh a la tûk khawm a hi. Dr Jamthianlal a hileh PHC Singngat ah Medical Officer (MO) a la hi.
THANKSGIVING NIGHT NEI
Lamka, May 30 (Nisin Thuhiltu): Central Baptist Youth Fellowship saina nuai ah “Thanksgiving Night-cum-Worship Service” chu tuni nitak dak 6:30 a pat EBCC Hebron ah nei in a um a, zia hun a chun Lamka South Division, Lamka North Division leh Imphal Division a pat khanglai tamtak a pang ui. Hun matna a chun a chiakhawm te’n Pathian kiang ah kipakthu genna leh kithuapina dawtna’n pauchapkhawmna a nei ua, Rev. V. Thangkhangin, Director of Missions, EBC a pat Pathian thu genna le a um ban ah veng chuam chuam a pat special number ngaithâkna le a um hi.
NAUNEI TE PANPINA SUM HAWM DI
Lamka, May 30 (Nisin Thuhiltu): Janani Suraksha Yojana / Janani Shishu Suraksha Karyakaram (JSY/JSSK) Cell, District Hospital ah zing, May 30 leh naunei te panpina sum hawm hi ding a hia, zia hun a chun May, 2017 sung a naunei ah panpina la nailo te’n lekha pawimaw te chawi in va la thei ding a hiu.
DAMDAWI ZAWKNA KIKHAK
Lamka, May 30 (Nisin Thuhiltu): Churachandpur Chemist & Druggist Association (CCDA) in All India Organization Of Chemists And Druggist (AIOCD) kiphinna a zathuap tawh kitawn in tuni’n Churachandpur district sung ah damdawi zuakna inn te khak in a um hi. India government in online ah damdawi zuakna, e-pharmacy pat ding tawh kisai ah dân thak a siam dawilo ziak ah AIOCD in kiphinna a nei a hi. Dân thak dungzui a chun, damdawi zuak zosia e-portal ah ki register ngai ding, e-portal a chun damdawi zuak dan, doctor lekha leh damdawi man te chu upload zing ngai ding leh government iin a hiatpilo damdawi te zuakdaw thei hilo ding a hi. Zia chu implement na ding ah India in IT infrastructure kining ting neilo a hi ban ah damdawi taksapna liantak tung thei ding hi’n AIOCD in a gen a, hinna humbitna ding damdawi tamtak te chu vâng mama ding hi’n a gen hi. CCDA in zia dân thak chu mat a hileh, Churachandpur district in le nasatak ah thuak pha ding a hi na ah AIOCD kiphinna chu zathuap a hi dan puang hi’n a gen hi.
JPO IN KIPAWLKHAWMNA NEI
Lamka, May 30 (Nisin Thuhiltu): Churchandpur District sung ah philanthropic pawl chuam chuam kigawpna, Joint Philanthropic Organization (JPO), Churachandpur in tuni nitaklam dak 4:30 in KKL Complex, IB Road ah kipawl khawmna leh ann kuang sawkkhawm a nei hi. Zia hun a chun JPO member hunkhawp chiakhawm in JPO panlakna tawh kisai leh thu chuam chuam genkhawmna a um a, maban chia ding dan leh mawpuakna lakto zel ding dan tawh kisai le a genkhawm ui.
SKILL & DOCUMENTATION TAWH KISAI AH TRAINING NEI
Lamka, May 30 (Nisin Thuhiltu): Centre for Community Initiative (CCI) te saina tuni zingkal lam dak 10:30 in MARC, Pearsonmun ah One Day Training on Communication Skill & Documentation a um hi. Zia hun matna taklatna leh vaidawna thucha genna Ms. Niangngaihmang, Deputy Director (HR & Admin), CCI in a nei a, zia training ah chia khawm Staff, volunteer leh Intern te chu Resource Person Ms. Kimremmawi Tonsing, Public Relations & Corporate Communications in zilsak na a nei hi. Chun, training a nei sung ua, a chiakhawm te a pat in a ngaidan uh banah thuchuam chuam tawh kisai ah discussion leh Interaction te a nei khawm ui.
CITYWIDE CONCERT UM DI
Lamka, May 30 (Nisin Thuhiltu): Zogam Artistes Association (ZAA) in a hung tung ding June 24, 2017 leh Lamka Public Ground, Hiangtam Lamka ah “Together We Can” ti thupi mang in Citywide Concert 2017 sai ding a hia, zia hun a hin Musical Band chuam chuam - Traffic Jam (Delhi), The Sixstrings (Lamka), JAF leh Local Band ban ah mimal lasa thiam chuam chuam te’n lasakna nei ding a hiu. Zia ding tawh kisai ah Artistes leh Bands invited list ah pangkhalo, band dang leh artist lunglutna nei te’n zikthaw ah Secretary Citywide Concert 2017 organising committee kiang ah June 10, 2017 tiang ah piak thei ding a hi. Zia gual ah kidawtna siam chu a tam ua leh a vek ua, hun piak ah um theilo ding a hina chung ua a pawimaw leh selective tak ah screening le bawl hiding hin organising committee in hiatsakna thusua a bawl a, ki dawtna siam te’n registration bawl hun ah Band or Artiste te min leh experience a taklat uh a pawimaw ding bak ah registration fee Rs. 500/- a piak uh ngai ding hin hin le organising committee thusua in a taklang hi. Chuleh, Mr. Pauginmuan, contact no. +919612652345 or ZAA office, Lengtonghoih studio ah thuchian kimzaw kan thei ding hin a kigen hi.
MANIPUR AH SILK PRODUCT PROMOTE BAWLNA DING AH CENTRE GOVT IN KITHUAPINA PEDING:AJAY TAMTA
Imphal, May 30 (Nisin Thuhiltu): Manipur vena nei Union Minsiter of State for Textiles, Government of India, Ajay Tamta in Commerce & Industries Minister Th Biswajit leh Parliamentary Secretary of Sericulture Awangbow Newmai te panna tuni’n Sericulture leh Textiles Department official te Classic Grande, Imphal in meeting a neipi a, zia hun a chun Sericulture Department ah official te’n department chiadan leh issue chuam chuam genlatna a nei ua, Ajay Tamta in state sung ah sericultural leh handloom & handicraft product a hawisemna ding ah kithuapina pezing ding hi’n thutiam a bawl hi. Meeting zaw in, Union Minsiter of State for Textiles, Government of India, Ajay Tamta in Mantripukhri, Imphal ah Regional Oak Tasar Research Station (RTSR) etthakna a nei a, thuthak lakhawmtu te kiang ah a genna a chun, Central Government in state sung ah silk production promote bawlna ding ah a pawimaw dungzui ah kithuapina peding hin a gen hi. North eastern state te lak ah Manipur chu silk production lianpen a hidan taklang kawm in, silk product a kibelap zing theina ding ah state sung ah silk um te dinmun, Station ah um Scientist te’n kituptak ah a khualzui zing ding uh pawimaw a hidan gen in, Silk production in sepna neilo te sepna pethei a hidan a gen hi. Union Minsiter Ajay Tamta in lungbawm (cocoons) kikawina Regional Oak Tasar Research Station (ROTRS) ah Oak Tasar Grainage le vena a nei a, zia hun a chun semtu te a kiholimpi hi. Ajay Tamta chu Commerce & Industries Minister Th Biswajit leh Sericulture Department ah official te’n a zui ui.
JANUARY 2017 AH EMPLOYMENT REGISTRATION NIAMKIAK
Imphal, May 30 (Nisin Thuhiltu): Manipur ah employment dinmun tha masa sang ah January 2017 ah kiam a hidan Additional Director of Employment, Manipur in press release in a taklang a, January 2017 sung ah total 4, 080 applicant te employment exchange ah registered kibawl a hidan uh taklang kawm in, a tha masa (December 2016) ah registered kibawl thak 13,048 tung zo in a gen hi. Senapati district ah January thasung ah employment exchange ah registered kibawl thak tawmpen leh mi 3 bep in registered bawl un le a taklang hi.
48-HOUR GENERAL STRIKE IN HUNDAN NGAINA CHAWK BUAI
Imphal, May 30 (Nisin Thuhiltu): Waithou Golai Tanjeng Chingthak ah a thisa H Priyokumar mudaw ah a umna chung ah ki form JAC in zanitak a pat 48-hour general strike a chiapi ziak un hindan ngaina nasatak in a chawk buai a, zia bandh chu May 31 zan kim tiang ah chiapi in a um hi. General strike hun in JAC supporter te’n Imphal East area ah national highway a khak ua, himaleh police te’n hun chawmlo sung in a delzak ui. National highway leh Imphal East areas ah gari tai ding khak ah a um tawh kitawn in Schools leh colleges khenkhat a kikhak a, himaleh khawpi sung in ngaina gual ah bank transaction banah bazaar a ki hawng hi. Mun khat khat ah kiphinna nei pawl te leh police te kal in kinawktuana a piang hi. JAC in a taklat dungzui ah H Priyokumar chu MG Avenue ah May 17 a tunna hiatlo ah um hin a gen a, himaleh May 26 ni ah thingkung khat ah a kikhailumsa mudaw ah um in a taklang hi. Chuleh, H Priyokumar thina chu ama mimal utthu kikhailum hilo, mithi a hi ti tawh tualthattu te government in amat daw ding phutna kiphinna nei a hidan uh a gen hi.
