NISIN THUHILTU - 30 April 2017 | via Zogam.com

*Textile Minister Biswajit in Manipur ah unemployment issue ngaikhawk ding ah Ministry of MSME chial*
Imphal, April 29 (Nisin Thuhiltu): Kalraj Mishra, Union Minister of Micro, Small and Medium Enterprises (MSME), Government of India, Chairman hina nuai in New Delhi ah Minister & Principal Secretaries (MSME/Khadi/Coir) of all States & Union Territories te'n meeting a nei ua, zia hun chu Manipur a pat Minister of Textiles, Commerce and Industries Thongam Biswajit Singh in le uap in Manipur ah unemployment buaina sukvenna ding ah Ministry of MSME in panlakna nasatak a nei ding leh project tamsem a chiapi ding a tangko a, Ministry of MSME tawh credit-linked Prime Minister's Employment Generation Programme (PMEGP) le rural leh urban areas ag nasatak ah chiapi ding phutna a nei bak in, Manipur ah unemployment issue ngaikhawk ding in Ministry of MSME a chial hi. Union Minister for MSME Kalraj Mishra in a thugenna a chun, Micro, Small and Medium Enterprise Sector ah overall development a um theina ding ah Centre leh State in alotheilo ah panlakna a neikhawm zing ding pawimaw in a gen a, Government in mitamtak te self-employed a hiding uh leh sepna hawl a kiam ding dawi hin a gen hi. Chuleh, States zosia chu Micro, Small and Medium Enterprises (MSMEs) tawh kisai ah Department chuam ahiloleh Directorate chuam siamdawk ding in hiatsakna a bawl a, State te chu MSME Policy hawizaw sem a um theina ding ah policy siam ding in le chialna a bawl hi. Zia meeting chu Haribhai Parthibhai Chaudhary, Minister of State for MSME, Government of India leh Ministry senior officer te'n le a uap ua, Prof. Jagdish Mukhi, Lt. Governor, Andaman & Nicobar Islands; Gujarat a pat Minister Rohit Bhai Patel; Haryana a pat Minister Vipul Goyal; Manipur a pat Th. Biswajit Singh; Mizoram a pat H. Rohluna; Odisha a pat Jogendra Behera; Uttar Pradesh a pat Satyadev Pachauri leh Uttarakhand a pat Madan Kaushik te'n state palai hina tawh a uap ui.

*Behiang ambush ah mi 2 thi*
Lamka, April 29 (Nisin Thuhiltu): Indo-Myanmar border area a um Behiang tawh kinai Suangphu leh Khenman khua kikal ah tuzingkal dak 7:45 tuam in BRTF water tanker khat thingnuaimi pawl khat in ambush a bawl ua ziana a chun Border Road Task Force (BRTF) water tanker hektu (driver) leh a kithuapi (helper) ten thina a tuak ui. Thina tuak te chu Ginlam Khaute (50) s/o Kamzagin of Singngat (driver) leh Lallianmang (40) s/o (Retd) Pastor Chinkhothang Taitom of Behiang te a hiu, a luang uh a hileh post-mortem bawl ding in Churachandpur District Hospital puak tun in a um hi. Local mi te gendan in zingkal ah gamgi-lui ah tui khai ding a chianau ah lampi bomb kikam a sukpuak banua meithal ah le kap ah um uh hin a gen ua, kua te khutnung a hi hiatchian hilo maleh Myanmar gamsung pansa Manipur phaizang thingnuaimi pawl khat gamtatna hiding in muanmaw thu local mite'n a gen ui. Chuleh, ambush kibawlna mun chu Myanmar gamsung hin a kigen a, Myanmar leh India mi te zingkal nitak ah a ki kawmtuana mun khat uh hi ah le hiat a hi. Chuleh, gamgi thiltung a hina chung ah Behiang ah um Assam Rifles te ambush kibawlna mun ah lut ziang theilo un a kigen a, mithi luang 2 te le dakkal bangzat a hem sung laklo ah um in a kigen hi. Hiatthei khat chu zani 28 April 2017 a khan le Behiang lampi lai ah bomb kikam a puak a, a thi leh liam hiat ding umlo maleh bomb in lampi hun tiang susia'n a kigen hi. A langkhat lam in zia thiltung tawh kisai chu Zomi Student Federation (ZSF) GHQ in nasatak in demna a bawl a, Central Security Force te panla thak ding ah phutna bawl kawm in civilian thina tuak insung mite State Government in ex-gratia a piak ding in phutna a nei hi. ZSF banah Zomi Council (ZC), United Zou Organisation (UZO), ZYO, ZSP, ZHRF leh Behiang Youth Club te'n le demna nasatak bawl in tunung ah ziagual thil a tunkitlona ding ah a kisaipi thuneitu te'n panlakna a nei ding phutna a nei ui.

*CEO/ADCC in bank thak hawng*
Lamka, April 29 (Nisin Thuhiltu): Thangzam Road, Laitui Pharmacy thang ah tuni'n Industrial Development Bank Of India (IDBI) Bank branch hawnna a um hi. Zia hun matna chu Soiminlian Lengen, MCS, CEO/ADCC in Chief Guest hina tawh uap in bank thak hawnna le a nei hi. Irungbam Sanjibihari Singh, Branch Manager, IDBI CCpur in thugenna a nei hun a chun, branch thak chu hawn pai ding ti himaleh National Highway 2 te ah economic blockade a um ziak ah khawdâng a hi dan a puang a, bank thak chu district mipi a ding ah economic lam ah khantona tut tu leh haksatna su kiam tu a hi thei na ding ah mipi zosia a ding ah hawndaw a um hi'n a gen hi. Hun matna ah Chief Guest, Soiminlian Lengen, MCS, CEO/ADCC in hun chiasa a pat district sung ah bank branch chuam chuam hawndaw a um leh bank piting, IDBI branch thak hawndaw ah a um kit chu kipak mama a hi dan a puangdawk a, bank tamzaw chu Teddim Road pang ah um himaleu mun dang ah IDCI bank a um chu mipi te dawn zangkhai chuam chuam mama ding hi ah gen kawm in bank kihawng thak chu mipi phatchuampi ding leh district a ding ah napha semtu a hi theina ding ah dawisak thu le a puang hi. Branch thak hawnna hun chu IDBI Bank a pat pan mun pawimaw tak tak lua te ban ah Hill town hausa Donzakai Gangte, L Pumlianpau, President PTC GHQ leh mi hunkhawp in uap ui.

*1 Day Career Guidance Seminar*
Lamka , April 29 (Nisin Thuhiltu): National Institute of Electronics & Information Technology (NIELIT), Imphal leh The North-East India Skill Development Foundation (NEISDF) kithua in tuni sunma dak 11:00 in Synod Hall, IB Road ah One Day Career Guidance Seminar a um a, zia hun chu TP Singh, Executive Director, NIELIT, Imphal leh Soiminlian Lengen, CEO, ADC Churachandpur te'n Special Guest hina tawh uap in thugenna a nei ui. Oinam Anuradha in "How to make Career Decision" ti thupi pansan in thugenna a nei a, Gongthorei Kamei, Career Counsellor, MCC NIELIT, Imphal in "Career Options in Government with Special Focus on Competitive Exams", Lianzalal Vaiphei, President, NEISDF in "Career Options in Business Management and Entrepreneurship", , Oinam Anuradha, YP, MCC, NIELIT, Imphal in "Career Options under Arts and Commerce Stream" ban ah Haobam Rajendra Singh, enter Manager, MCC NIELIT, Imphal in "Career Options under Science Stream" ti te tawh kisai in seminar a neipi ui. Zia hun a hin pawl X leh XII zo thak mi 100 val a pang ui.

*PhD muthak*
Lamka, April 29 (Nisin Thuhiltu): North Eastern Hill University (NEHU), Shillong - XXIVth, Convocation hun ah 28 April 2017 ni a khan eilam thingtang mi student banghem zat te le PhD degrees piak ah um te lak in a pang ua, PhD degrees muthak hiatthei ah um te chu - Dr. T. Paongam Haokip (Zoology), Dr. Thomas Haokam Vaiphei (Political Science), Dr. Timothy Singson (Sociology), Dr. Seilenkap Haokip (RDAP), Dr James Vungjangam Haokip (Anthropology), Dr Lily Lianmuankim Guite (Zoology), Dr Kimthianbiak Neihsial (Education) te a hiu.

*Disability Certificate hawm*
Lamka, April 29 (Nisin Thuhiltu): Pakasana Singh, DI of School, Samulamlan in ZEO Campus ah tuni'n mi 38 kiang ah Disability Certificate hawpdawna a nei hi. Certificate piak ah umte a hiuleh Mental Retardation (MR) ah naupang 36 leh Hearing Impairment (HR) ah naupang 2 a hiu.

*Job Card bu a neitu te kiang ah piakdawna nei*
Lamka, April 28 (Nisin Thuhiltu): Tuibuang Community Hall, Tuibuang ah tuni, April 28, 2017 zingkal dak 7:30 in Tuibuang Block nuai ah Tuibuang B sung ah Job Card holder te kiang ah Job Card bu piakdawna a um hi. Zia hun a chun, Tuibuang B nuai ah Job Card nei tamtak a chiakhawm ua, Government lam a pan James Doujapao Haokip, MCS, SDO Tuibuang leh Thangkhohem Haokip, SO, SDO Office, Tuibuang te'n Job Card chiadan tawh kisai leh Job Card neitu' mawpuakna leh Village Authority thuneina ti te pang in Job Card chiadan te taklatna a nei ui. Zia hun a chun, MGNREGS guidelines dungzui a Job Card holder te'n Job Card Bu (books) a kawi ding uh a hidan tawh kisai leh government in dan thak chuam chuam a bawldaw tawh kitawn ah Job Card neitu leh mawpuakna nei Khaw huasa leh Village Authority te'n government thupiakte a sukpitin uh pawimaw a hidan te James Doujapao Haokip, MCS, SDO Tuibuang in taklatna a nei a, Job Card mang ah nasepna umsa te chu tukal Seppatni a pat nei hiding ti himaleh Hausa/Village Authority khenkhat in Job Card bu a mau khut ah a kawl ziak ua, R. Sudhan, IAS, DC/CCpur in April 26 tiang ah job card neitu kiang ah Job Card bu pechiat ding ah hiatsakna thusua a bawl a hidan genkawm in hun kipia a bei tawh kitawn ah April 27, 2017 ah DC CCpur panna khua 2 ah Job Card leh Ration Card tawh kisai etchianna um in a gen hi. DC CCpur in inn chuam chuam chuan ah Job card bu a neitu ding dawl te kiang ah Job Card la kawl uh em ti ah dawtna a siam hun ah mitamtak in Job Card bu amau kiang ah umlo a hidan uh gen a hidan le a taklang a, DC CCpur thupiak dungzui ma ah Tuibuang B suang ah Job Card bu zosia SDO Tuibuang kiang ah pelut ding ah hiatsakna a um tawh kitawn ah hausa/Village Authority te'n SDO Tuibuang khut ah Job Card bu zosia a piaklut uh hin a gen hi. Thangkhohem in a genna ah Job Card tawh kisai chu government in ngaikhawk mama in a gen a, a neitu diktak kiang ah Job Card sum a luttheina ding ah Job Card neitu'n Bank Account Number leh Aadhar Card Xerox copy, hausa/Village Authority kiang ah a piakkhawm ngai a hidan gen in, Aadhar nei nailo ten mani hina suklatna theina copy khat leh Account Number piaklut ding pawimaw in a gen hi.

*Mobile phone thu' sawisak ah um*
Lamka, April 29 (Nisin Thuhiltu): Muan um tak a pat a kihiatdan in April 26, 2017 nitak ah Master Richard Kom, JNV boarding ah um chu, a senior te'n mobile thu tawh kisai ah vua a hidan uh gen in a um a, liamna a tuak tawh kitawn ah District Hospital tut ah um leh first aid piak ah um hin a kigen hi. Richard ahileh JNV ah Class VIII simlai a hia, a kawng nuailam leh a khut liam vawkliam ah um ti a hi. A kihiatdan ah mobile phone thu kinial buaina ziak ah senior te'n a vuak uh hin a kigen a, zingkal PT a panlo nung ah, a teacher te'n a room a va etnau ah a mai pawmsa leh soisawk ah a um chu muthei ah kilang in a kigen hi. Principal L. Lamamachao Singh leh Nurse te'n bangchan a hem tak thudawtna a nei nung ua sawisak ah um a hidan chu a gendaw ngam bep leh principal thupiak dungzui ah hospital ah treatment ding ah puak ah um hin le a kigen hi. JNV rule dungzui ah mobile phone School huangsung ah mat phal hilo, zia zuilo te chu expel thei a hiu. A langkhatlam ah zia kinakna tawh kisai chu Parent Teacher Committee (PTC) ten meeting nei ah genkhawm ding a hiu a, kihona a lawsap leh School Managing Board ah chairman kiang tut hi ding ti a hi. Media leh Child Right Activist te'n zia gual thiltung tawh kisai chu a hiat uh tawh kitawn ah school mun ah thil umdan a kan zui uh tawh kitawn ah, principal in khuttha tute gawtna khautak piak hiding in a gen a, Robert Kom' nu-le-pa te'n le principal malatna innkuan dan ah kihona nei ding lemsakna nei ua hiat a hi.

*ZKB Prez kisâng*
Kangvai, April 29 (Nisin Thuhiltu): Zillai Kangvai Block President Khupthianmuan in mimal thil ah buaina a neina chung ah President panmun tuzawm thei talo ding a hina chung ah haina lekha a piak tawh kitawn in tuni'n Zillai Kangvai Block President thak ding ah Vice President panmun a la lua Mr Haominthang Baite guat in a um a, Vice President ding ah Mr Lamboi Vaiphei guat in a um hi.

*Statue hawnna nei*
Lamka, April 29 (Nisin Thuhiltu): Khoval a Singtangmite adiak a zosuan te adia pa chih a min loh a om Phamta Raja Goukhothang Guite hiat zingna ding Statue tungdaw a hi tawh kitawn in tuni'n G Tonjang khua ah a hawnna leh latna nei in a um hi. Statue bawltu, Thangkhosei Guite, Chief of G Tonjang in Raja Goukhothang Guite statue piandaw dan chawmkim tak ah genna nei in Guite Innpipa, Pauminthang Guite in Statue hawnna a nei hi. Puitu chuam chuam a pat pakcha piakna leh puan silsakna hun mat zaw in Upa. Thangchinlian Guite, Senior Adviser, Guite Innpi in Raja Goukhothang Guite chanchin chamkim tak ah genna hun a mang hi. Hun matna a hin, Raja sunna hun le mat a um in zia hun a chun dâkpi sâi in pi-pu hun lai ah a githei thil chuam chuam le gitsak a hi. Statue a hileh Kolkata ah ki bawlsak a hia, a gik dan hi 700 kg a hi ban ah a siamna leh tundinna' hin a kigawm ah lakh 3 val bei hi'n a kigen hi.

*PTC in kipakpina nei*
Lamka, April 29 (Nisin Thuhiltu): Paite Tribe Council (PTC) General Headquarter in tuni'n PTC GHQ Conference Hall, Hiangtam Lamka ah Paite Nam sung ah MLA teltin thakte kipakpina leh CWC ex-officio member ding ah laklutna hun a matpi ui. Hun matna chu V Hangkhanlian, Minister (Agriculture, Vetirinary & Animal Husbandary) in meeting pawimaw tak khat a nei ziak ah uap theilo maleh Vungzagin Valte, Chairman, MTDC in a uap hi. Zia hun matna' chun, LT Juan Tonsing, Chairman, CWC in teltin thak a um MLA te CWC ex-officio member ah laklutna leh thilpiak piakna hun a nei a, Meeting Chairman malatna ah Agenda chuam chuam leh Project khenkhat genkhawmna le a um hi.

*Vety & A.H Minister in World Veterinary Day- 2017'matna uap*
Imphal, April 29 (Nisin Thuhiltu): Khawvel gam chuam chuam ah tuni 29 April ah ' World Veterinary Day- 2017' mat ah a um tawh kitawn in Manipur ah le Manipur State Veterinary Council saina Antimicrobial Registance- From Awareness to Action'' ti thupi nei in, Auditorium of Lamyanba Shanglen, Palace Gate, Imphal ah mat in a um hi. Zia World Veterinary Day- 2017' matna hun chu - Minister (MAHUD/ Town Planning/ Forests & Environment/ Horticulture & Soil Conservation) Th. Shyamkumar, Minister, (Agri/Vety.& A.H) V.Hangkhanlian, Principal Secy.(Vety & A.H) L. Lakher,IAS leh Director, (Vety.& A.H) Dr. H. Chaoba Singh te'n Chief Guest, President leh Guests of Honour hina tawh a uap ua, Chief Guest, Minister- Th. Shyamkumar in a thugenna a chun, gancha etkawlna lam ah kiziltilna kituptak a um ding pawimaw in a gen a, veterinary doctors leh experts te a pat gancha etkawl ding dan dawt zing pawimaw in a gen hi. Veterinary Department in plans leh policy chuam chuam a nei te a mualsua theina ding ah panlakpi pawimaw leh gan-vul banah economy a hawi chuam theina ding ah mipi'n pan a lak ding pawimaw in a gen hi. Veterinary & Animal Husbandary Minister, V. Hangkhanlian in a thugenna a chun, a pau theilo gancha te kituptak ah etkawlna chu mihing te chung ah thilpha bawl gual ah kipiakzawna thupitak hin a gen a, veterinary doctors leh expert te prescription leh advice bawlna panglo ah anti-biotic injection matlo ding dawi a hidan taklang kawm in, Veterinary Department chu developmental plan leh policy kituptak siam ding leh genkhawm ding ah high level committee khut ah pelut ding in hiatsakna a bawl a, gancha damlo etkawlna chung ah amau damtheina lam le ngaikhawk ding in chialna a bawl hi. Zia hun matna a chun, Additional Director (Public Health) Dr. Kh. Sasheekumar Mangang, Principal Scientist, ICAR-NEH Region, Meghalaya Dr. I. Shakuntala Devi te'n resource persons hina tawh gancha etkawl dan tawh kisai genna a nei ua, district chuam chuam a pat Veterinary Officer tamtak te'n hun matna a uap ui.

*Govt sum chu nang uh sum a hi; IFCD&YAS Minister*
Imphal, April 29 (Nisin Thuhiltu): Kuki Chiefs' Association (KCA), Chandel in M. Munpi village, Chandel district ah tuni'n ," IFCD & YAS Minister Letpao Haokip hun a mat piu a, Letpao Haokip in mipi te lak ah a thugenna a chun, government panlakna zosia chu mipi te panlakna a hidan gen in, government sum chu mipi te sum a hina chung ah haksatna um te government kiang tut ding haksa salo ding in mipi te chialna a bawl hi. Mipi te'n government chu amau mama a hidan uh a hiatdaw ua panlakna a nei masang siau khantona kiti umlo ding in a gen a, lungthim neucha tawh khawsakna sukbei a, lungthim piting tak ah khawsak hun hita in a gen hi. Letpao Haokip in 41-Chandel AC sung ah khantona hawitak a um theina ding leh mi tamtak te ettawn taak thei ding ah mipi te panla ding in le mipi te chialna a bawl hi. Zia hun matna a chun, village chiefs' associations chuam chuam leh Kuki Women Human Rights, Chandel te'n memorandum leh thilpiak piakna Minister kiang in a nei ua, Langching, Sugnu Zou veng, Sugnu Tribal te'n lamkal in vaidawnna a nei ui. Hun matna chu Deputy Commissioner of Chandel district Krishna Kumar leh District Level Officer te banah PHED leh IFCD Engineer te banah Chief Engineer (IFCD) Ksh. Pritam Singh te'n le a uap ui.