NISIN THUHILTU - 28 April 2017 | via Zogam.com

SC in Manipur fake encounter thu ah a thupukna a pe chak Centre a ding ah kipak umlo
New Delhi, April 27 (Nisin Thuhiltu): Supreme Court in Manipur ah kum 20 sung a fake encounter case 1,528 case um te khualchilna nei hi ding ti ah 2016 ah thutanna a la bawl chu zukkit ding ah Centre in dawtna bawl maleh Court sang pen chun a nawl piak hi. Centre government in khualchilna chun Indian Army te thingnuaimi do na subuai thei ding a hina ah khualchilna chu um sak lo ti ah dawtna petition a thelut chu Chief Justice of India J S Khehar mapui judge 5 panna bench in a nawl piak hi. Justice dang Dipak Misra, J Chelameswar, Madan B Lokur leh Uday U Lalit te le panna zia bench chu petition chung chang chu ngun tak ah ngaitua a hi zaw ah nawl a um hi'n a gen hi. Chun, zia curative petition chung chang chu chamber hilo ah open court ah ngaithakna um sak ding ah government in dawtna a siam chule bench chun a nawl hi. Attorney General Mukul Rohatgi in zia thu chu CJI kiang ah hiatsakna a la bawl kha in government in a thelut curative petion chu open court ah ngaithakna um leh ti'n a le gen hi. Thiltung um zaw sin leh local police in khualchilna nei zing leh Army in thingnuaimi leh insurgency operation a nei te subuai pha ding hi'n le AG chun a gen hi. 2016 a khan Manipur ah security force leh state police in fake encounter bawl hi ah gawna case 1,528 te chu suizui hi ding ti ah Justice Madan B Lokur mapui bench in thutanna a la bawl a hia, ngawna a hilo leh muanmaw ziak mai ah armed force te'n mi a tha thei uh chu mipi vaihawmna sukha hi ah gen kawm in security force te'n thagum a ha mat takluat ua leh judicial in etchian pawimaw ding hi'n le a la gen hi. CJI mapui bench chun mawna neilo minautang tha a hi khak leh armed forces personnel te chu humbit hilo ding ah gen kawm in Manipur police a hiloleh Security force te'n hunam leh thagum sua ah val tak ah a gentat ding uh phalpiak thei hilo ding hi'n le a puang hi. AFSPA, 1958 nuai ah Manipur a security force kikawi dan chung chang a le bench chun dawtna siam kawm in a kisai khakpi zosia kiang ah cham tak ah sukvenna na ding ah pan la chiat ding in le a dawn hi. Centre in Manipur ah gâl tung gual dinmun ah um a hi ban ah inquiry chun security force te lungkiatsak ding leha le lam ah thingnuaimite a ding ah pha zaw ding ti'n petition a chun a ki gen hi. Chun, 1990-2015 sung ah Army operation ah thingnuaimi 10% bep in thina tuak a hi dan genlang kawm in zia chun human rights leh mihing hinna za tak ah kibawl a hi dan sulang hi'n le government in a gen hi.

Teacher te'n thasang ah mi dang kawi phal hilo: CEO/ADCC
Lamka, April 27 (Nisin Thuhiltu): Autonumous District Council (ADC) nuai a School um te thiamzil dan siamthakna ding leh hatsak semna ding in Right of Children to Free and Conpulsory Education nuai ah Department of Tribal Affairs & Hills, Government of Manipur in thusuah a bawl tawh kituak ah school zosia Headmaster/Headmistress-te hiat ding in Soimonlian Lengen, Chief Executive Officer, ADC Churachandpur in thusua a bawl hi. Zia dungzui a chu ADC nuai ah School a sem, ziltiltu (teacher) te'n thasang ah midang kawi kiti phal hitalo ding, matdaw a um leh Dan tawh kituak ah action lak hiding in a taklang a, Teaching leh Non-Teaching Staff kua hitaleh mani sepna mun chiat ah um ding; Headmaster/Headmistress te'n a piaklut uh Monthly Attendance Report Certificate, khaw hausa/Chairman, Village Authority banah a kisaipi Deputy/Assistant Inspector in hiatpina suai a kai dungzui ua thalaw piak hiding, Headmaster/Headmistress in a nuai a semtute' Min, Limlak, Hina, Home Address leh Phone Number ti te School Office mai ah a takdaw ding leh Teacher khat na dang sem ding ah mat theilo ding, nadang a sep theina ding ua Government a pat phalna a lak masak ding; District Board of Education ah Ex-Officio Chairman, Deputy Cummissioner leh Chief Executive Officer, ADC te chu zia dan kibawl te enzui ding ah thuneina piak ah um a hidan uh le a taklang hi.

VPC Tuliduang Block Office building hawnna nei
L. Phunchongzang, April 27 (Nisin Thuhiltu): L. Phunchongzang khua ah Vaiphei Peoples Council (VPC), Tuliduang Block, Office Building kisa zo thak hawnna tuni'27 April 2017 in a um a, zia hun chu Langkhanpau Guite, MDC in khuallian hina tawh uap in office hawnna a nei hi. Office hawnna hun chu Khatkhotong Baite, President Vaiphei Peoples Council (VPC), General Headquater leh Lalminthang, Social Worker,Henlianthang Thanglet chief of L Phungchongzang, Hauminthang Vaiphei, President Zillai GHQ te'n le a uap ua,VPC Tuliduang Block President leh a cabinet member te'n le kimtak in a uap ui. Chun, Pastor S Lama Vaiphei, Munpi Bial in "Biometric vs Christianity" ti thupi mang in thugenna hun a nei hi. Chuleh, Office Building thak hawn a hi tawh kitawn in office lawpna'n a chiapi mipi te ding ah luaithena le a um hi.

Zillai in dem tawh thua ah thasuak ding ah phutna bawl
Lamka, April 27 (Nisin Thuhiltu): Imphal West Cummando leh 6 Assam Rifle kithuah in tuni, April 27, 2017 sunnung dak 12:40 vel in Kamu Tamnong, Senapati District ah thingnuaimi hiding ah muanmaw mi 2 mat in a um ua, a mau a pat in AK 47 Rifle 2, Magazine 6 leh a chang Round 215, M3 Rifle khat leh 9mm Pistol khat le a man dawk ui. Mat ah um te chu Thoilen Vaiphei (32) leh Lelen Vaiphei (34) a hiu. A langkhatlam ah Zillai (Vaiphei Students' Association) in thusua a bawlna a chun, Imphal West commando leh 6th Assam Rifle, Andro post, Imphal East te'n joint ah operation a nei hun ua mat ah um Mr. Lamthianlal s/o Thanggen of Heiroklian village chu thingnuaimi pangkhalo a hidan taklang kawm in bit tak ah thasuak ding phutna a bawl a, khawhelo khawmi te'n gal van a kawi ziak ua diklotak ah mat ahiloleh gawtna a tuak ding uh gello ah khawsung ah galvan kawi thingnuaimi te chung in lung –awilo thu a puang hi. Heiroklian Village Authority leh Kochuam (Church) leader te gendan ah Mr. Lamthianlal chu kochuam upa a hibak ah galvan chawi pawl tawh kizawp matna neikhalo a hidan le taklat in a um a, combined force te'n khual chilna kituptak bei ah Kochuam Upa khat a mat ziang uh chu khawk a sakthu le a taklang hi. Chuleh, Zillai in Mr. Lamthianlal chu micham a hidan hiachian tawk mama a hidan Khailalpiak Vaiphei, Secretary, Information and publicity, Zillai GHQ in thusua a bawlna taklang kawm in a vaima theipen ah thasuak a hiding phutna a bawl hi.

One Day Legal Awareness Program
Lamka, April 27 (Nisin Thuhiltu): Churachandpur United Clubs' Organization (CUCO) saina tuni, April 27, 2017 sunma dak 10:30 a pat Bethany Multipurpose Hall ah "One Day Legal Awareness Program" nei in a um hi. Zia hun a chun, M. Biteshwor @ John Singh, Headmaster in Chief Guest hina tawh uap ding ti himaleh tuaksiatna ziak ah uap theilo in SK Mangang, President, CUCO in Functional President hina tawh a uap hi. SL Seiminlal Haokip in hun matna mapui a, Seilal Lhungdim in vaidawn thu gen in hun matna tawh kisai taklatna a nei a, Functional President a pat thugenna a um hi. Functional President SK Mangang in zia hun ah innkuan khawsak haksat ziak ah school kai zo lo a um leh Right to Education nuai ah government a pat panpina tawh lekha simthei a hi ti'n a gen a, khawtang hawina leh khantona ding ah thiamzilna pawimaw pen a hidan gen in, thiamzilna ah le Quality Education pawimaw in a gen hi. Aban a genna ah, Churachandpur ah school khatbep a h le pau chuam chuam mang tampi um a hi ti'n a gen a, District khat ah chengkhawm zosia'n khawtang hawina ding ah pankhawmdan thiam pawimaw a hidan te taklang in, District ah khantona a umtheina ding ah thiamzilna dawpsan ding dawi hin a gen hi. Technical hun ah W. Lata Devi, Advocate in Crime against Wumen tawh kisai ziltilna a pia, M. Urmila Devi, Advocate in National Food Security Act (NFSA) tawh kisai ziltilna pia hi. Y. Anandini, President, LUDO in huntawp a kipakthu genna nei in hun amang zo ui. Tuni ah Legal Awareness Program ahileh State Legal Service Authoirty, Manipur Sponsored-na ah District Legal Service Authority, Churachandpur leh Churachandpur United Clubs' Organization kithuahkhawm ah organised a bawl uh a hia, Bethany Christian College a kai Student hunkhawp a pang ui.

Chairman ADC/CCpur room siamthakna nasep chiatha zing
Lamka, April 27 (Nisin Thuhiltu): Khaipao Haokip, MDC 13 Kholmun leh V. Khaikhanmung, MDC 18 Zenhang Lamka te'n Autonumous District Council (ADC), Churachandpur ah Chairman leh Vice Chairman dinmun a tuk uh tawh kitawn in a Office ding uh siamthakna (Renovation) nasep a chiatha zing hi. April 24, 2017 ni ah ADC Churachandpur nuai ah teltin ah um MDC te'n Banquet Hall, Hotel Classic, Imphal ah Chairman ding telna a nei hun ua, chuutu umlo ah Khaipao Haokip chu Chairman ding ah teltin ah um a hia, Office a lua masang ah Office kawt, Visitors' Waiting Hall baang zosia Rong a nu thak banah a Office sung zosia Rong nuna nasep tulai in a chiatha zing hi. Rong nuna zaw a hitak leh tu ah Green Carpet kimang le Red Carpet ah san ding ah Carpet chawksa umta hin a kigen hi. Chairman' Room siamphatna nasep a hitak leh Vice Chairman' Room ding le siamthak ah um ding hin a kigen a, office siamthakna nasep zawthian a hi tak leh office lua pan ding un le a kigen hi.

SBI-RSETI nuai ah mi 27 in EDP training zo
Lamka, April 27 (Nisin Thuhiltu): State Bank of India-Rural Self Employed Training Institute (SBI-RSETI), Bijang ah khangthak kum 18 a pat kum 45 kikal mite 2016-2017 sung ah PMEGP loan la zo te ding in Short Term Course, Entrepreneurship Development Program (EDP) training nei ah um chu tuni, April 27, 2017 in a zo thiang ui. EDP training ahileh April 17, 2017 ni kipan a hia, training hun ah PMEGP loan la mi 27 pang in, S. Mangboi Vaiphei, Faculty, SBI-RSETI in Entrepreneurship tawh kisai in ziltilna a nei hi. PMEFP loan la zo training hun ah pang te a hiu leh Vijaya Bank a pat loan la mi 10, SBI Pearsonmun a pat mi 3, State Bnak of India, Tuibuang a pat mi 14 a hiu a, mi 27 lak ah DIC a pat loan la mi 16, KVIB a pat mi 10 leh KVIC a pat mi 1 a hiu. State Bank of India-Rural Self nuai ah tuni training zo thak te a hiu leh SBI-RSETI, Bijang nuai ah PMEGP batch 13-na a hiu a, RSETI, Bijang ah short term training course chuam chuam 71 zaw hita ti a hi. SBI-RSETI Bijang in ahileh tu Financial Year 2017-2018 sung ah Training course chuamchuam 19 sai ding a hiu a, zia te lak a chu tuni course a zaw uh chu a 2nd na a hi. PMEGP loan la zo sa te ding ah Short Term Course training zaw thian a hi tawh kitawn in tuni'n SBI CCpur Branch ah Suanlal Guite in Cashless Transaction-Digital Payment tawh kisai in ziltilna a nei a, Training zo thak mi 27 te kiang in certificate piakdawna le a um hi.

Missionary Zathangvunga suang daw
Lamka, April 27 (Nisin Thuhiltu): Mizoram State ah Pathian nasem masa te lak ah Missionary pani -na ah tepte ah um famta Zathangvunga hiatzingna suang kidaw chu tuni, April 27, 2017 sunma dak 10:30 in Kawmpui Thanmual ah hawn in a um hi. Zia hun chu Mizoram khawpi Aizawl leh Champhai District a pat Missionary Zathangvunga ngainatu hunkhawp in a uap ui. Zathangvunga hi Pathian a la hia masa, missionary nasep a la chiapi masa te lak ah khat Zathangvunga chu May 10, 1943 ah piang, 1965 kum ah Pathian' thu tangko ah Mizoram State sung banah, Manipur tiang ah Pathian thu tangko ah Missionary nasem a hia, Lamka ah Presbyterian, Salvation Army, Vaiphei biakinn chuam chuam, Mual Veng ah Paite Cultural Club Hall banah Dongzakai Hill Town leh mun dangdang ah Pathian thu a gen nung ah March 3, 2017 ni a la mualliam a hi.

Kpi ah IGNOAPS phase II hawpdawna nei di
Kangpokpi, April 27 (Nisin Thuhiltu): District Social Welfare Office, Kangpokpi ah IGNOAPS hawpdawna phase II chu May 2-4 sung um ding a hi. Kangpokpi District Social Welfare Officer, N. Usharani Devi in a gen dan in, a vat nalai IGNOAPS beneficiary te kiang ah Old Age Pension hawpdawna, Phase II chu DSWO, Kangpokpi ah May 2-4 sung um ding a hia, Bal Bhavan, Imphal ah May 8-12 sung um kit ding a hi ti'n a puang hi. Chawlkal khat sung ah District Social Welfare Office, Kangpokpi DHQ ah nasepna ding ni 2- Seppatni leh Nilaini chu old age pensioner te'n pension a lak thei na ding ni uh hi ding a hi ti'n le a gen a, Aadhaar seeding, field visit leh a dang dang te chu ni 2 te tilo ah ni dang ah bawl hi ding hi'n le a puang hi. Kangpokpi District ah old age pensioner 4,000 val a um a, Phase I a khan 2,000 tuam kiang ah hawpdaw a la hi tai.

Road accident te tawh kisai ah Inquiry Report pelut
Imphal, April 27 (Nisin Thuhiltu): Tha masa National Highway No-2 ( Imphal- Dimapur) leh National Highway -37 (imphal Jiribam) ah tuaksiat a la um te tawh kisai ah Inquiry report chu government khut ah piaklut in a um hi. Zia tuaksiat te a hin a kigawm ah mi 258 in thina a la tuak ui. Director (Transport) H. Roshita in a piaklut report dungzui in, Assam ah ki issue vehicle permit a chun validity a um lo ban ah mi 2 te- Ranjit Kumar (27) s/o Badhu Ram leh Deepak Rasaily (29) s/o (L) Khadka Bahadur Rasaily driving license chule a lêm hi'n a taklang hi. Chief Minister N. Biren Singh in Director General of Police (DGP), LM Khaute kiang ah tuaksiat tawh kisai ah khualchianna bawl be ding in thu pia in Committee khat bawldawk ding and ni 15 sung ngei ah report kim tak pelut ding in le a hiatsak hi. Chun, CM in DGP kiang ah Transport Department tawh kithua ah driving licence, vehicle registration/permit leh validity chu enchian thak ding in le a hiatsak a, Committee in report a piaklut zaw leh a issue tu authority a hiloleh mimal chung ah a kituakpi action lak hi ding hi'n a gen hi.

IFCD Minister in Mapithel Dam sukkhak khawmi te kimupi
Imphal, April 27 (Nisin Thuhiltu): Irrigation and Flood Control Department (IFCD) Minister Letpao Haokip chair na nuai ah IFC official te leh Mapithel Dam in a sukkak khawmi hunkhawp te'n tuni Manipur Secretariat Conference Hall ah meeting a nei hun ua chun Mapithel Dam in a sukkhak khawmi te haksatna suk venna ding ah high-power committee khat phudaw ding in a thupuk ua, zia committee chu IFCD Minister Letpao Haokip in mapui ding leh committee a chun PHED, CAF&PD, Works leh Agriculture Minister te ban ah Mapithel Dam-affected body te a pat palai 3 chiat pang ding in le a thupuk ui. Meeting hun a chun, Dam in a sukkhak khua hausa te'n a haksatna uh a puaklut teu a ngaithak zaw a chun, IFCD minister in a thu chu higher authority kiang tut ngei ding ah tiam kawm in state government in theitawp sua pan lak pi ding a hina a, mipi te'n le kithuapi ding in chialna le a bawl hi. Meeting a chun Dam in a sukkak khua 17 tuam ah hausa te chu M. Ngaranmi, Co-Chairman, Mapithel Dam Affected Coordination Committee (MDACC) in a malat a hi. Zia hun chu Parliamentary Secretary (PHED) ban ah Phungyar AC MLA, Leishiyo Keishing, Secretary (IFCD) Gopen Meitei, Chief Engineer (IFCD) Ksh. Pritam Singh IFC Department ah official hunkhawp te'n le a uap ui.

Gang-rape ziak ah a sâng a sim te'n kiphinna nei
Imphal, April 27 (Nisin Thuhiltu): Civil society organization leh student body chuam chuam ah leader te panna' April 14 ni ah hawng-pawngsual (gang-rape) ah kigawl kha te chu a kituakpi gawtna piak ding phûtna'n Imphal ah tuni'n mipi a sâng ah sim te'n lam zawtna a nei ui. Zia hun a hin thingtang leh phaicham mi bep hilo in CSO, student bodt leh local club chuam chuam a pang ua, rally a hileh Core Committee Against Phaknung Gangrape of Two Minor Girls in a sai a hi. DM College campus a pat lamzawtna chu pat in a um a, zia a pat chu Dingku Road, Lamlong, Minuthong leh Khoyathong a ban ban ah taw in kipatna mun ma ah suk tawp a um in zia chu public meeting a nei ui. April 14 ah thiltung dawi umlo tak chu dodalna ding in Manipur sung ah nam, sakhua ban ah pau leh ham chuam chuam a pat numei te kikhawm in zia thiltung chu nasatak ah demna kichan ti'n Kuki Women Union, Manipur ah Advisor Rose Mangshi Haokip in thusua mite kiang in a gen a, Manipur chu Sanaleipak ti ah kihia a hina ah zia gual sualna chu tung ding ah kilawm lo hi ah taklang kawm in kum zabi 21 na ah sualna pung deu deu hi'n le a gen hi. Zia gual sualna chu nasatak ah demna ding leh maban ah a um taklo na ding ti'n thingtang leh phaigam ah mi te'n kithugual tak ah lamzawtna nei ding ah thupukna siam hi'n le a gen a, zia gual sual chu a dodal na ding ah pangkawm zing ngai hi'n le a puang hi. Core Committee Against Phaknung Gangrape of Two Minor Girls ah Convener, N Jibanmala in hawn-pawngsualna chu nasatak ah dem kawm in a kintheilam ah mawchang te chu gawtna piak ding ti'n a phût a, ICPS, Child Welfare Committee, Social Welfare Department leh National Commission for Women te kiang in le pan la ding ah chialna bawl kawm in state government kiang ah numei 2 te justice pe ding in le a dawn hi.

Nasemhawilo AE leh SO ki suspend
Imphal, April 27 (Nisin Thuhiltu): Yaiskul Chingakham Leirak Drainage & Sewerage work site ah mi khat in nasatak ah a liamna tawh kisai ah N. Biren Singh mapui government in kituplo leh mawpuakna ngaikhawk lo ziak ah PHE official 2 tuni'n suspend a bawl hi. Addl. Chief Secretary (PHE) Shambhu Singh in thusua a bawlna' chun, Assistant Engineer Laishram Irish Singh leh Section Officer Keisham Patel Singh chu suspend a um hi'n a gen a, suspend a hi sung ua chun amau chu subsistence allowance piak ding a hi ban ah Imphal ah pansan den ding uh hi'n le a gen hi.