*Tata Winger Khat Tuahsia; Mi Khat Si, Midang Giat Liam
*DDO-te'n Electronic Clearing Service Training Sunzom
*Gelmoul Centenary Lopna Om Ding
*Independence Day Ding toh Kisai in Security Meeting Om

Tanchin Kimzaw:
***Lamka police Station apan km 8 vel a gamla a om Torbung khenzek lamsak ah Lamka apan Imphal zuan a tai passenger pua Tata Winger khat tuni sunma dak 11:30 vel in accident a, mi khat si in, mi dang 8 liam uhi. Mit a mute gendan in Tata Winger ahihleh hattak in tai a, Torbung lam zuan a pasal zukham khat a pelhna lam ah tuahsia hidan in gen uhi. Tuahsiatna mun apan gamlalou a om 116 Bn BSF-te'n kintak in tuahsiatna mun delh pah ua, panpihna pia uhi. Liamna tuak mi 9-te kintak in Lamka damdawi inn tutpah in om ua, mi 9 lak ah pasal khat si a, tua banah Chochong (45) w/o Ginkhokam of Leisang Village damdawi inn ah admit in om a, midangte ahihleh doctor-te'n dressing a bawlzoh un innlam a ki-enkol ding in paisak uhi. Misi ahihleh ahihna theihchian ahihlouh ziak in morgue ah koih in om hi. Thutut kingah dan in gari neitu ahihleh Mangsei Mate of Tuibuang hi a, Haopu of Tuibuang in a hek hidan in kigen a, tuni sunma dak 11:00 in Sumo Counter IB Road ah kipan khia a, passenger 16 pua hidan in gen uhi.

***Finance department Government of Manipur saina in government department tuamtuam a DDO- te'ng in tumalam a Electronic Clearing Service (ECS) training a neih uh sutzopna in tuni in leng District Training Centre Tuibuang ah training nei nawn uhi. Training hun sung Z. Joute, Assistant Director Treasury & Account leh A. Basanta Senior Account Assistant te resource person a pang in sinsakna pia uhi.

***Zomi Youth Association (ZYA) GHQ Central Executive Committee leh ZYA Lamka Block makaite'n hong tung ding August 14, 2013 zingkal dak 7:00 in Zomi Council Office Nehru Marg ah meeting nei ding uhi. Meeting hun ah 3rd World Zo Conference Organising Committee-te'n ZYA GHQ leh ZYA Lamka Block-te kiang a mohpuakna a piak uh toh kisai genkhawmna nei ding uhi.

***District Administrator Jacintha Lazarus IAS makaih a Independence Day eve zatna ding toh kisai in, Public Leader-te leh District Level Officer-te'ng in hong tung ding August 14, 2013 nitak in Community Hall Hiangtam Lamka ah badminton kimawlna nei ding uhi. Hiai ding toh kisai in, kimawl ding public leaders leh District level officers-te'ng huai ni nitak lam dak 5:30 a Community Hall tungkim ngai ding hi.

***Gelmuol khua a kisat nung kum 100 chinna, centenary lopna om ding hi. Hiai hun ah Gelmuol kholui map honkhiakna Ngamhao Touthang MDC in nei ding a, Centenary suangphuh honkhiakna Jamkhothang Lhungdim, Innsungpa in nei ding a, balloon khahkhiakna Seiminlun, Chief of Teisieng in nei ding a, vapal khahkhiakna Thenkholet, chief of Suongpi in nei ding a, tua banah kholui map leh centenary suangphuh latna Rev. L.B Angam General Director ECCI in nei ding hi. Banah, Gelmuol Khanggui leh Thusim kichi laibu honkhiakna J. Lhungdim, Chief of M. Suonggel in nei ding hi. Hiai hun zatna ah Ngamhao Touthang MDC, Goulal President TPP, T. Sumlianthang MDC, Tongminthang Lhungdim MDC, Holkholun Lhungdim Ex-President KIM leh Holkhojang Lhungdim-te'n uap in thugenna hun zang ding uhi.

***India in British-te thunuai apan zalenna angah nung kum 66 chinna leh Independence Day lopna hong tung ding August 15, 2013 zinglam dak 9:00 in Lamka Public Ground ah om ding hi. Hiai hun ah Jacintha Lazarus IAS DC/CCpur in khuallian hihna toh uap in India flag kaihpalhna leh Rashtriya Salute lakna nei ding hi. August 15, 2013 zinglam dak 9:38 in chief guest in India flag kaih palhna leh Rashtriya salute la ding a, tua zoh in march past in zui ding hi. Parade contingent-te ahihleh JK Suan Guite Assistant Commandant 1st IRB in makaih ding a, parade commander in pang ding hi. March past zoh in chief guest in thugenna nei ding a, tua zoh in CCpur Government College leh Lamka Government College-te apan cultural programme zatna om ding a, sunma dak 10:20 in JNV School-te apan special item lahna om ding a, tua banah traffic police-te leh District Transport Office-te kigawm in special item nei nawn ding ua, tua zoh in chief guest in stall kibawlte etkhiakna nei ding hi. Independence Day kisakkholhna a pai lellel tawh kiton in Jacintha Lazarus DC/CCpur makaih in tuni sunnung dak 3:30 in a office chamber ah security toh kisai meeting neih in om hi.

***Japanese Enciphilitis Vaccination pailel tawh kisai in DIO's main Immunization office ah mi a sah theihluat ziak in, nna pen a zangkhai zaw ding leh mipi tamzaw in kikapna a neih theihna ding uh etna in District Immunization Officer in JE vaccination tawh kisai mipi theih ding in theihsakna bawl hi. JE vaccination bawlsak thei ding mite ahihleh kum 1 apan kum 15 kikal mite hiding ua, zinglam dak 10 apan dak 2 kikal in vaccination va bawl theih ding hi. Saikot leh a kim-le-kiang a khuate a ding in Saikot PHC ah Kiginni teng (2nd Saturday chihlouh) in kikapsak theih ding a; NKT Area a omte a ding in UFWC Thingkhangphai ah Sepnawni leh Kiginni teng in kikapsak theih bok ding a; New Lamka leh a sehvel a te a ding in PHSC New Lamka ah Sepnawni leh Kiginni teng in kikapsak theih ding a; Town Area a omte'n Sepnawnni leh Kiginni teng in Nazareth Nursing Home, Hill Town ah kikapsak theih ding a; Peasonmun leh a kim-le-kiang a khuate a ding in Sepnawnni leh Kiginni teng in PHSC, Pearsonmun ah kikapsak theih ding a; Tuibuang leh a sehvel aom khuate a ding in District Council Health Center, Tuibuang ah Sepnawnni leh Kiginni teng in va kikapsak theih ding hi. 2012 a JE Vaccination ana neikhinte bel kikapsak thak kul tuanlou ding hi.

***Mualkoi a om STC/BSF in August 16 apan 31 tan MOR firing range ah zingsang dak 5:00 apan in nitak tan thaukapna nei nawn ding uh ahihman in hiai firing range kimlak ah kuamah vak thanglou ding leh huangvulh ganta bangmah khahzanlou ding in STC/BSF in theihsakna bawl hi.

Gamdang Tanchin:
***Myanmar a Rakhine state ah Ronghiya Muslim mi nih Buddhist-te'n a thah nung un buaina sousang mahmah in zui a, Ronghiya Muslim za khat vual vel tawh police-te kinawktuahna ah mi sagih in liamna tuak uhi. Myanmar a Rakhine state ah Muslim leh Buddhist-te kal ah buaina kum khat val ana omta a, Muslim Ronghiya 200 val a sih banu'ah mi sang tamtak inn-le-lou bei in omta uhi.

***Venezuela a thautui khitisiangna munpi lianpente lak a khat mei in kang a, meiphelhte'n nasataka pan alak nung un meikuang phelmit in omzou khong hi. Peurto La Cruz thautui khitisiangna munpi kawlphia leh kekkia in a dennung a meikuang kipan hi'n kigen a, a kim-le-kiang a tengte mun bitzaw ah tuahkhiak in om ua, thiltung ah si-le-liam om lam bel bangmah kigenlou hi. Venezuela in khovel ah oil reserve haupen hi'n kigen hi.

***India in kidouna lennate'n a pansan theih ding kidouna longpi INS Vikrant honkhiakna nei pahta ding hi. INS Vikrant bel India khutsuak ngeingei ahi a, Kerela ah om lel a, Indian Navy-te'n a zat taktak ma un etkhiakna bangzah hiam a palsuak masak kul ding a, 2018 ma bel zat taktak theih nailouh ding hi'n kigen hi. INS Vikrant bawlna ding in kum guk lut a, sumtang in dollar billion nih beizou hi. Hichibang warship tuh India hilou gam dang li - US, Britain, Russia leh France in nei pan uh hi'n kigen hi. India solkal in a tuipi sepaih, Navy-te puahna ding in sum tamtak ana zangta a, nikum in Navy-te puahphatna ding in India in dollar billion sagih phial ana sengta hi. Kiginni in leng India in nuclear thahatna zang a tai ding tuinuai longpi INS Arihant ana hongkhiata a, huai pen leng India in a ki-design leh amah-mah in a kibawl ahi.

***US malakna leh panlakna a Israel-Palestine kal a buaina hihvengna ding in Israel leh Palestine in kum thum paisa a ana khawlsan uh peace process sunzom nawn ding ua, Jerusalem ah peace talk nei nawn ding uhi. Tua tawh kiton in Pathianni in, Israel in Palestine mi 26 a matte leh suangkul a a khumte khahkhiak ding in puang a, huchikawm in Jerusalem suahlam leh Israel in a thuneihkhum West Bank ah tenna inn 1,200 bawl behlap ding in phalna leh lemsakpihna piazui nawn ngal a, Palestinian tamtak suthangpai mahmah a, tuaziak in Israel leh Palestine kal a muanna, lemna leh bitna a omna ding a peace talk neih a om ding pen ah a gah muhding a omlouh mel theihlouh in om hi. Hun paisa ah Israel in settlement a bawlte ziak in Israel leh Palestine kal a peace talk omte ana puksiata hi. US, EU leh Britain in Israel in settlement thak a bawlsawmte zukkik ding in nawhna nei mahle uh, Pathianni in Israeli Housing Minister Uri Ariel in statement khat suahkhia a, leitung a independent gam kuamah in a gamsung a tenna mun bawlna ding leh bawllouhna ding a gamdangte'n gen-le-sak a neihte uh a zuikei ding uh chi hi. Israel in leng settlement a bawlzom zel ding a, Negev ah, Galillee ah leng a poimawhleh settlement bawlzom zel hiding in gen hi. Palestinian Chief Negotiator Saeb Erakat in Israel in Jerusalem suahlam leh West Bank sung a settlement 1,200 bawl behlap ding a a puan pen pom theih vual hilou ahihdan leh gintak haksa a sak thu gen a, Nilaini apan Israel-Palestine kal a peace talk kipan nawn ding ah a kihel ding uh leh kihlellouh ding uh dakkal 24 a puankhiak hiding in gen hi.

***Colombia a miners kiphinna neite lak ah mi sagih truck khat in phulum hi. tailut Colombia malsuah lam ah miners-te'n working condition hoihzaw phutna in kiphinna nei ua, kiphinna neite lak ah truck khat a tailai in suang in den in om a, truck hektu in a gari pen control zoulou in mipi lak phuphei hi'n kigen hi.

***Afghanistan tuilian in siatna leh manthatna tamsem tut behlap zel a, ni nih a kizom a vuahpi leh gialpi kithuah a zuk nung in mi 22 in sihna tuak nawn ua, misite lak ah mi sagihte naupang hi un kigen hi. Inn-le-lou tamtak a kisiat banah, neih-le-lam tamtak mangthangta hi'n kigen hi. Afghanistan suahlam ah nipikallui in tuilian ziak in mihing 75 in ana sih-lawhta uhi.

***Egypt buaina in venlam nawt thei tuanlou a, Egyptian police-te'n vaihawmna leh thuneihna apan a paihkhiak a ana omta Mohammed Morsi gumtute'n kiphinna khawlsan a, kongzing nusia ding in vauna leh theihsakna bawl mahle uh, Morsi gumtu kiphinna neite'n Egyptian interim solkal thuneitute apan a warning om pen ngeingaih tuanlou in Cairo khopi a a pansan uh mun nihte ah lampi khaktanna bawl uhi. Egyptian thuneitute'n thagum a kiphinna neite hawldalh a tup uh leleng a kiphinna neite kikulhna, camp ah baihlamtak a a lut theihlouhna ding un lampi khaktanna mun tamtak ah koih uhi. Egyptian thuneitute'n thagum a kiphinna neite a nawhkhiak u'leh buaina nasatak in zui thei ding hi'n kilang lel a, minautang tamtak in sih behlap ding chihna ahi. Egyptian President hihna apan a Mohammed Morsi paihkhiak a a om nung a kiphinna tuamtuam khollou a a paizom zel sung in Egypt gamsung mun tuamtuam a kisualna leh kikaptuahna ah mi 250 val in ana sita uhi.

***Aminthang Right To Information Act nuai ah political party-te a omlouhna ding ua amendment bawlna ding in tuni'n Parliament ah amendment bill luikhiak in om a, hiaipen political party-te'n hoihsa mahle uh RTI activist tamtak in RTI amendment bawl a, RTI in political party-te huamsaklouh ding chih pen deihlou in kiphinna nei uhi.

***Gorkhaland bawlkhiak ding phutna a GJM in indefinite bandh puangpen lakkhiakna ding a West Bengal Chief Minister Mamata Banerjee in huntawp a piak tuni a bei ding ahih toh kiton in Darjeeling ah Gorkhaland phutna in kiphinna khauhsem a, mi tamtak in solkal tung ah lungkimlouh laksatna in protest nei zomlai uhi.

*CDSA leh DSA, Tamenglong in Football Friendly Nei Ding
*Training of Certified First Medical Responders under Disaster Management Programmee 2013 Pailel
*MGNREGS Tungtawn a Singnou Suanna Mun Ding Hahsiang Kipan
*Peace Ground ah Peace Mela Honkhiak In Om
*EBC/Lamka North Division Mission Joint Prayer Fellowship-cum-Annual Planning Conference-2013 Om Ding
*HNA Cadre 2 Police Custody ah August 19 Tan Om Ding Uh

Tanchin Kimzaw:
***CCpur District Sport Association (CDSA) leh District Sport Association, Tamenglong-te'n zingchiang zinglam dak 11:00 in Tamenglong Play Ground ah Unity Through Sport chih thupi a nei in football friendly match nei ding in, tuni zinglam dak 9:00 in Tamenglong zuan in CDSA-te zinkhia uhi. CDSA team-te ahihleh tuni zingkal dak 9:00 in T. Sumlianthang MDC, President Veteran Sport Association CCpur in khakkhiakna nei hi. CSDA team-te ahihleh tuzan Tamenglong ah giak ding ua, zingchiang sunma dak 11:00 in Tamenglong Public Ground ah District Sport Association, Tamenglong-te tawh friendly match kimawl ding uhi.

***Indian Red Cross Society, Manipur saina in zan apan zingchiang tan daih ding Synod Hall IB Road ah Training of Certified First Medical Responders under Disaster Management Programmee 2013 neih in om hi. Hiai hun ah Dr. Y. Megachandra Vice Chairman Indian Red Cross Society, Manipur, resource person a pang in sinsakna pia a, tua ah Philantrophic Organsation apan numei leh pasal 25 tel uhi. Zingchiang in leng nei lai ding ua, nitaklam dak 3:00 training a telte kiang ah certificate piakkhiakna nei ding uhi.

***MGNREGS tungtawn a job card nasepna 2012-13 a dia last phase banah ni 100 chinna ding leh ni 16 tha nasepna kipanta hi. Hiai ni 16 nitha nasepna ding toh kisai Lamka Block in Lanva nak a Lamka khopi tuilakna, intake point kim-le-kiang ah singnou suanna mun ding hahsiangna nei panta uhi. Tuibuang block-te'n Koite lui kim-le-kiang ah singnou suanna nei ding ua, kho tuatuamte'n leng mahni lemchangna mun pen ah singnou ahihkeileh haichi suan ding uhi. Tuni in Lamka Block sung a veng tuamtuam bangzah hiam kigawmkhawm in nasepna neih in om a, zingchiang in leng in veng tuamtuam bangzah hiam kigawm in nasepna nei nawn ding uhi.

***Kuki Student Organisation (KSO) CCpur Block leh Babu Enterprise Assam pangkhawm in tuni apan kha khat sung daih ding Tuibuang Peace Ground ah Peace Mela honkhiakna L. Mangkhogin Haokip IPS SP/CCpur in tuni nitaklam dak 4:00 in nei hi. Peace Mela ah Marie Goldround, Super Dragon Train, Super Star dancer leh ettheih chi tuamtuam banah van leh nektheih zuak hiding hi. Peace Mela ahihleh zingchiang zingkal dak 9:00 apan nitak dak 8:00 kikal sung kihong ding a, main gate a lut man lakhilou ding hi. Hiai toh kisai a Paokai Haokip President KSO CCpur Block in a genna ah peace mela ahih dungzui in kuama'n hiai mela subuailou ding in mipite kiang ah ngetna bawl hi.

***Evangelical Baptist Convention Lamka North Division Mission Department in zingchiang August 10, 2013 in EBCC Zenhang Lamka ah "Thou ni in, lam ni" chih thupi a nei in Division Mission Joint Prayer Fellowship-cum-Annual Planning Conference-2013 nei ding uhi. Hiai hun ah Rev L. Khamkholun Director of Mission EBC thugentu in pang ding a, Evan H. Thangkhansiam in Mission Field Report piakna nei ding hi. Zingchiang zinglam dak 10:30 in Fellowship leh Khawmpi honkhiakna Rev. Paukhanmang Guite Divisional Superintendent Lamka North Division in nei ding a, tua zoh in Evan H. Thangkhansiam in Mission Field Report piakna nei ding hi. Sunnung dak 1:00 in Annual Planning session om ding a, tua zoh nitaklam dak 2:00 apan dak 4:00 kikal sung in Mission Workship neih ding uhi. Hiai Division Mission Joint Prayer Fellowship-cum- Annual Planning Conference–2013 ahihleh zingchiang nitak mah in Upa V. Ginchinpau Chairman District Working Committee (DWC) Lamka North Division khakna nei ding hi.

***Saikot PHC nuai a om kha khua bangzah hiam a naupang kum khat apan kum 10 kikalte a ding in Saikot PHC mun ah Japanese Enciphilitis (JE) damdawi athawn a kapna om ding hi. Japanese Enciphilitis damdawi kapna zingchiang zinglam dak 10:00 apan in Dr. Liangoumuan Samte tenna inn, Vengnuam New Lamka ah leng om ding a, hiai hun ah naupang kum 10 nuailamte kapsak theih ding hi.

***CCpur District Civil Police-te leh District Hospital staff-te'n zingchiang zingkal dak 7:00 in District Hospital huangsung ah joint social work nei ding uhi. Hiai hun ah District Hospital huangsung hahsiangna nei ding uhi.

***HQ Veng a om 46 Assam Rifles pawl in New Bazar a Rajdhani Travel kiang asum ngenlai HNA cadre 2 Lalrinchana (25) s/o Thanglian of Molnom leh Lalmalsawm Hmar (21) s/o Lalthathung of Khomoi apaisa August 6, 2013 nitak in man ua, Imphal Police-te khut ah mi 2-te pekhia uhi. Mat a om mi 2-te apan in 9mm pistol 1, atang 1, leh magazine 1, Nokia mobile handset leh i-Ball handset 1 leh sum 30,000 muhkhiak in om hi. CCpur Police in Imphal police-te khut apan case lasawn in court ah ding sak uhi. Court in mi 2-te police custody ah August 19, 2013 tan om ding in thupiak bawl hi. Hiai case toh kisai in Lamka Police in FIR bulhkhum uhi.

***Hornbill ah technician leh lineman a kum tamtak ana pangta Mr Ringa of Salem Veng in, Hornbill Cable network a a sepna a khawlsan nung in, Hornbill Subscribers tamtak in amah ana contact khaseklai ua, tuaziak in a kisaipih subscriber-te'n Mr Ringa pen ana contact nawnlou a, Hornbill Cable Network Office hon contact zawta ding in theihsakna poimawhtak hon kibawl hi. Hornbill Cable Network Office No. 9862 06 5804.

Gamdang Tanchin:
***Russia in anti-gay propaganda law khauhtak a bawlkhiak nung in huai deihlouhna in gay rights gumtu mi tamtak in New York pansan Russian Ambassador to UN' tenna inn kong ah kiphinna nei ua, Russian Ambassador ton UN in leng Russian anti-gay propaganda law tung a kiphinna leh lungkimlouhna langsakte tawh minute bangzah hiam kihouna nei uhi. Russia in gay deihlouhna dan khauhtak ana bawlta a, tua dan dungzui in, Russia in Sochi ah Winter Olympic Games mantampen a zintunna hun ah leitung mun tuamtuam apan a paikhawmte lak ah Russia a gay omte rights gupna hiam, ahihkeileh gay-te fuihna leh hanthawnna kampau leh gamtatna nei peuhmah mat leh a gam ua thawtkik hiding ua, Russia ah gay-te leh a rights uh tawh kisai public campaign himhim phal hilou a, naupangte zak leh theihna a gay tawh kisai houlimna bangmah neihlouh ding chihleh, gay tawh kisai information bangmah puankhiak louh ding chihte ziak in khovel gam tuamtuam apan in Russia mawhsakna tam mahmah a, khenkhat in Sochi a Winter Olympics na-ngawn boycott ding in vauna bawl uhi. Edinburgh, Scotland ah leng Russian anti gay propaganda law deihlouhna in kiphinna om ding a, mun tuamtuam ah leng kiphinna tamsem neihlai ding a guang in om hi.

***Leitung munte'ng a kithehdalh, natna lauhuai mahmahte lak a khat malaria ahi. Malaria natna bel thoukang tungtawn a kithehdalh ahi a, kumteng in mihing million za khat val in malaria natna vei gige uhi. Tunitan in malaria damdawi phatuam taktak ding muhkhiak leh bawlkhiak hinaikei mahleh US military researchers, telsuimite'n malaria damdawi hoihpen ding a kigen muhkhiata uhi. Malaria damdawi ding bawlkhiakna ding in US sepaihte, abik in US Navy-te naktak in kigolh ua, lunglut mahmah uhi. Aziakbel, leitung gam tamzaw ah US in a sepaihte koih ahihman in, leitung mun tuamtuam ah khualzin den ua, malaria natna ziak inhaksatna leh buaina tuak tam mahmah uhi. Washington DC pansan National Institute of Health makaihna in US Navy bangzah hiam tung ah tuz malaria dalna ding a damdawi a a muhkhiak thek pen uh etkhiakna nei ua, malaria natna dalna ding a za-a-za phatuam ahihdan mukhia uh hi'n kigen hi. Leitung ah malaria natna dalna ding damdawi bawlkhiakna leh zonkhiakna ding in sum billion tamtak ana kizangta a, solkal leh NGO leh funding agency liante'ng in malaria damdawi ding bawlkhiakna ding ah nna naktak in sem ua, malaria natna douna ah leng sum tamtak zat in omta hi. Leitung a mihing 3.3 billion vel malaria natna kai thei ding dinmun in om ua, kum teng in malaria case 200 million kibehlap zel hi. Himahleh, malaria damdawi thak market ah muh theihna ding in kum bangzah hiam lutlai ding hi.

***France ma-tum lam aom Carhalk Plouguer a om ak khawitu, poultry farmer-te'n aktui mantawm ziak a lungkimlou in tax's office kong ah kiphinna kihhuaitak nei ua, aktui tamtak lampi ah pai tam zezu uhi. Ak khawitu, poultry farmers tamluat ziak in market ah aktui tamtam mahmah a, huai overproduction ziak in aktui man sia mahmah a, tuaziak in poultry farmer-te'n aktui man kisai mahmah pen bawlhoihna ding in kha khat bang ana complaint-ta ua himahleh thuneitute'n a ngetna uh a ngeingaihlouh ziak un, aktui sang sawm val kongzing ah pai kek zezu uhi. France ah aktui man hihpungzek ahihtheihna ding in aktui productions lam 5 per cent a hihkiam ding in phutna nei ua, huai mateng Pathianni tan niteng a aktui sang sawm pai kek zel ding uh hi'n gen uhi.

***Vauna kichiantak om chihziak in Pakistan a khopi lianpen nihna Lahore a om US Consulate a semtu non-emergency staff-te'ng US State Department in samkhia nawn a, poimawh lawtel ahihkeileh Pakistan ah US citizen-te zinlou ding in vauhilhna leng bawl hi. Islamic helpawlte kuate apan a vauna kibawl hihiam chih ben bangmah puankhiak neilou a, Middle East leh Africa a US Consulates leh Embassy-te khakna thu tawh kizawitawn khalou vauna chituam hi'n kigen hi. Huchibangkal lak ah, Pakistan khopi khat Quetta ah galvan tawi pawlte'n Sunni Muslim biakbuk khat a bukapna u'ah mi kua kaplum ua, midang sawm vel in liamna tuak uh hi'n kigen hi.

***US in al-Qaeda helpawlte a delhzuina khawlsanlou in sunzom zel a, Yemen ah drone zang a al-Qaeda helpawlte a beihna nanungpen ah al-Qaeda member 14 in sihna tuak uh hi'n kigen hi. Yemen ah tulaitak in buaina leh patuahna, dipkuatna sousang mahmah a, al-Qaeda helpawl tawh kizopna nei Islamic galvan tawite gamtat tum uh ahihdan warning a om nung in Yemen ah security naktak a hihkhauh in om hi. July 28 apan a US in Yemen ah al-Qaeda helpawlte tung a drone strikes a neihna ah mi 30 vel in sihna tuakta uhi.

***Japanese khopi khat Nagasaki khopi tung ah nuclear galvan a puahzak nung anniversary 68-veina Fukushima khopi ah zatna om hi. Aug 9, 1945 a Nagasaki khopi tung a nuclear galvan nihna a puahzak hun tawh kituak geih in dai dide a suunna hun zang uhi. Hiroshima khopi tung ah leitung a nuclear galvan puakzak masapen a om nung ni thum nung in, Nagasaki tuh atomi bomb tawh beih in om a, mitphialkallou in mihing sang sawm sagih si ngal uhi. Bomb puahzakna ziak a si ngalloute leng a nung in radiation ziak in si veve ua, tamtak in sihna a tuah banu'ah, tunitan radiation ziak in Japan ah mihing piangsuallai hi. Atomic bomb puakzak masapen nihte apan a suaktate'n nuclear tawh kisai vanzat himhim deihlou ua, nuclear civilian programme leng deihlou uhi. Nuclear lauhuaina thuak ding himhim a Japan in hamsia thuak hilehkilawm in, Fukushima nuclear plant kisia apan in radiation tamtak tuipi sung ah lutta, leak-ta a, hiai tawh kisai in Japan in a khonung guu a thuaktouh ding hong nasa mahmah lai maithei hi'n kigen hi. Nuclear deihlouhna sentiment tuh Japan ah sanglai mahmah hi.

***Thailand Police-te'n mi li tawh heroine damdawi khamtheih ser/kgs 200 val mankhawm ua, heroine-te bel Hong Kong ah puaklut a tup uh hi'n kigen hi. Thai police-te'n report hoihtak a muh uh pansan in Bangkok khopi nawl deuh a om hotel khat apan heroine ser 200 val a matte uh zuakkhia man hile uh $13 million man zou ding in kigen a, international market ah huai sang a a-leh leh a-leh sawm nih a leng mantamzaw ding hi'n kigen hi.

***Indian Intelligence Bureau in Hafiz Sayeed in LeT helpawlte zang a India ah gamtat tum uh ahihdan intelligence report khenkhat a suahkhiak nung in Mumbai leh Delhi ah security naktak a hihkhauh in om hi. Hafiz Sayeed in Lahore a a Muslim Eid Thumna a neih khit a a thugenna ah India gam leitang, abik in national capital ah gamtat tum ahihdan a gen nung in intelligence bureau leh police lamte naktak in kigalging uhi. Tuhun laitak bel, Muslim-te'n kha khat sung ann ngawl a thumna zingkal apan nitak tan a neih uh, Ramadan kha bei nung a nopbawlna a neih hun uh ahi a, hichibang hun chiang in Islamic helpawlte gamtang ut mahmah ua, tuaziak in US leh UK in leng kigalgingna in Muslim gam khenkhat ah a consulates u'leh embassy-te uh khak uhi. Hafiz Sayeed bel Mumbai beihna a lemgeltu leh kul-le-poimawhte'ng coordiante-tu hi a ngawhpipen ahi a, US in a lutung ah $10 million bounty khu ahi a, himahleh amah bel Pakistan gam leitang tung ah zalentak in vakkual thei hi.