*Petrol Leh Diesel Hawmna Om Nawn; A Deih Tamlua
*'Kei a Di'n' Music Video Album Thak Honkhiak In Om
*Independence Day Parade Contingents Kumdang Sang in Tamzaw Ding
*Thanlon SDO Thak in Mawhpuakna Lata
*Division Mission Joint Prayer Fellowship-cum-Annual Planning Conference Om Ding
*Saikot PHC ah Japanese Encephilitis (JE) Damdawi Athawn a Kapna Om Ding

Tanchin Kimzaw:
***Manipur a National Highway nih Dimapur Road leh Jiribam Road a menchim thupitak om ziak in niteng van poimawh kha khat bang Manipur ah lut theilou a a omnung in zanhal in Manipur a ding in Petrol leh Diesel pua gari tamtak hong tung hi. Huai toh kiton in zan in Hmar Veng a om M/S Suakhnun & Sons Oil pump ah petrol hawm ahihnung tuni in leng hiai mun mah ah diesel hawmkhiak in om nawn hi. Tuni a diesel hawmna ah Diesel Auto-te litre 10 piak in om ua, Bolero, Scorpio, Winger leh Jeep-te litre 20 piak in om ua, Bus, Truck leh Shaktiman-te litre 40 chiat in pia uhi. Diesel ahihleh litre khat ah teng 51.36 in lei uhi.

***Kenedy Vaiphei in a bawl 'Kei a Di'n' chih Music Video Album tuni sunnung dak 1:00 in Synod Hall IB Road ah honkhiak om hi. Hiai hun ah Michael Ginzasuan District Supply Officer CCpur in khuallian hihna toh uap in Music Video Album thak honkhiakna nei hi. Tua banah T. Lala Vaiphei, Special Contractor leh H. Samson, Mahajon-te'n guest of honour leh functional president hihna tawh uap ua, HK Sonmuan, Mangpu, Seithang, Goulal, Kapboi, Kamlian Paojangam, Genlal, Kaineipau leh Lamkhosiem Chongloi District Transport Officer-te'n leng special guest hihna toh hiai hun zatna uap uhi. Tua banah lasasiam tuamtuam hunkhop in leng uap uhi. Hiai hun a chief guest in a thugenna ah music in miteng hon kipak sak a, nam tuamtuamte music in hon gawmkhawm thei ahi chi a, music ngainalou kuamah i omkei ua, music in lungsim hon sunem theih khop a thilhihtheihna nei ahi chi hi.

***Hong tung ding August 15, 2013 chiang a Lamka Public Ground ah India in British-te khut nuai apan zalenna a muhnung kum 66 chinna, Independence Day lopna om ding hi. Hiai ding toh kisai in kisakkhawlna paitou zel a, Independence Day March Past ah Parade Contingent 55 tel ding uhi. Parade Contingent-te lak ah Private leh Government School tuamtuam apan Contingent 47 kihel ding ua, tua lak ah Boys Contingent 24 leh Girls Contingent 23 kihel ding uhi. Huai lou in STC BSF, Ex-Servicemen, Civil Police, VDF, ASHA, Jobcard Holder-te banah IRB Band Party-te leng March Past ah tel ding ua, JK Suan Guite Assistant Commandant 1st IRB Parade Commander in pang ding hi.

***Manipur Goverment in IAS officer leh MCS officer bangzah hiam tumazek in suankual a, tua lak ah CCpur District sung a MCS officer-te leng suankhiak in omkha uhi. Suankhiak a omte lak ah Thanlon SDO Lalramsang Infimate MCS leng Bishnupur ah kisuan a, amah mun luah ding in S. Thianlaljoy Gangte MCS koih in om hi. Tuni in Lalramsang Infimate MCS in S. Thianlaljoy Gangte MCS kiang ah SDO Thanlon mohpuakna pekhia hi.

***Evangelical Baptist Convention Lamka North Division Mission Committee in hong tung ding August 10, 2013 in EBCC Zenhang Lamka ah "Thou ni in, lam ni" Nehemia 2:18 chih thupi pansan in Division Mission Joint Prayer Fellowship-cum-Annual Planning Conference- 2013 nei ding uhi. Hiai hun ah L. Khamkholun Director of Mission EBC thugentu in pang ding a, Evan H. Thangkhansiam in Mission Field Report piakna nei ding hi. August 10, 2013 in zinglam dak 10:30 in Rev. Paukhanmang Guite Divisional Superintendent Lamka North Division in Fellowship leh Khawmpi honkhiakna nei ding a, tua zoh Evan H. Thangkhansiam in Mission Field Report piakna nei ding a, sunnung dak 1:00 in Annual Planning session om ding a, nitaklam dak 2:00 apan dak 4:00 kikal sung in Mission Workshop nei ding uhi. Nitak a mipi Biakna hun zoh in Upa V. Ginchinpau Chairman District Working Committee (DWC) Lamka North Division in Fellowship leh Khawmpi khakna nei ding hi.

***Saikot PHC nuai a om khua bangzah hiamte a ding in hong tung ding August 10, 2013 in Saikot PHC ah Japanese Encephilitis (JE) damdawi athawn a kapna om ding hi. Hiai hun ah naupang piangtung a kipan kum 10 kikalte kapsak theih ding hi. Tua banah Japanese Enciphilitis damdawi kapna kalteng in Thawhlehni, Ningani leh Kiginni in District Immunization Office, Opposite District Hospital ah om gige hi. Hiai toh kisai nupi khenkhat in syringe kikopsak uh chihziak in naupang kapsak ding nupi tamtak kik uh ahihdan thuthang om toh kisai in, tuni'n Medical Dept in hilhchetna bawl a, naupang kikapte syringe kikopsak hizawlou in damdawitui pen kikopsak ahihdan uh gen ua, tua banah damdawi ahihleh buk (bottle) khat naupang 5 zel kikopsak uh ahihdan taklang uhi.

***Evangelical Baptist Convention (EBC) Baptist Dorcas Fellowship, Lamka North Division in hong tung ding August 23-25, 2013 kikal sung in EBCC Bethel, Lailam Veng ah, "Nang Vualzawlna hi in" Genesis 12:2 chih pansan in khawmpi 5-veina nei ding uhi. Hiai hun ah Rev Paukhanmang Guite Divisional Superintendent Lamka North Division, EBC thugentu in pang ding a, Pastor Dr. Thangminlun Mangte seminar pitu in pang ding hi. Hiai khawmpi ahihleh August 23, 2013 nitak dak 6:00 in Upa V. Ginchinpau Chairman DWC Lamka North Division in honkhiakna nei ding a, August 24, 2013 sunnung dak 12:00 apan in DS Lamka North Division makaih in kum nawn 2014 a Year Plan leh Budget ding gen khawmna nei ding ua, August 25, 2013 nitak in Upa HL Khai Vice Chairman DWC Lamka North Division in khakna nei ding hi.

Gamdang Tanchin:
***Kenya gam khopi Nairobi a om Jomo Kenyatta International Airport ah meikuang nasatak piangkhia a, tuaziak in huai airport khak in om hi. Airport ah meikuang kipatna ziak diktak theih hinailou a, Kenyan airport thuneitute'n departure lounge a om immigration section apan meikuang kipan in international arrivals area pehphei hi'n gen uhi. Aiport apan in meikuang leh meikhu nasa mahmah zamkhia a, kilometer bangzah hiam apan a leng muhtheih hial hi'n kigen a, si-le-liam bel bangmah report omlou hi. Kenya bawh ding international flights peuhmah Kenya innveng gamte ah bawhsak in om uhi.

***Yemen gamsung a mun poimawh khenkhat al-Qaeda leh a kizoppih helpawlte'n lak a tupna uh, plot tawh kisai Yemeni thuneitute'n puankhiakna nei uhi. UK leh US in Yemen apan in embassy staff khenkhat samkhiata ua, non-essential staff-te'ng sapkhiak hiding uhi. US leh UK in Yemen apan a diplomatic staff khenkhat leh a citizen-te uh a sapkikna u'tawh kisai in Yemeni thuneitute lungkim ngellou ua, Yemeni security forces-te helpawlte chouna maituah ding a muanhuai huntawk mahmah uh ahihdan gen uhi.

***Pakistan khopi Karachi a Lyari area ah, football kimawlna mi tamtak in a etlai un bomb hattak khat puakzak a, mi 11 in sihna tuak ua, 24 val liam uhi. Sihna leh liamna tuakte lak ah football kimawlna en a om pasal naupang bangzah hiam leng tel hi'n kigen hi. A kigendan in, bomb pen motorcycle ah kikamsa a kikoih ahi a, agal apan remote control zang a hihpuak a om ahi. Bomb supuaktute'n Lyari area apan a telching a om government minister khat a tuppipen uh hi'n kigen a, tuaziak a a car kiang ah bomb puakzak hi'n kigen a, kimawlna en a om naupangte leh minautangte a tuppipen uh hilou hi'n kigen hi.

***Argentina a Rosario khopi ah tenna inn, apartment building khat apan gas leak a omnung in puakzak a mi 12 in sihna a tuah banu'ah midang sawm guk val liam uh hi'n kigen hi. Gas a puahzakma in gas company employee, nasemtu khat in natural gas a leak-na, kehna pen bawlhoih tum in panla a, himahleh dakkal khat nung in gas pen a kehna, leak-na ziak in puakzak veve a, gas leak bawl dia kuan, gas company employee mat in om a, gas puakzak toh kisai suizuina nei lellel ua, huchikawm in hutkhiakna leh panpihna nasep pai zom zel hi. Gas puakzak ziak in siatna leh manthatna thupitak tung hi'n kigen hi.

***Egypt buaina tawh kisai a sisan suahna, sihna leh liamna banah buaina khirhzaw a piang behlap ding venna'ng leh Egypt a political deadlock ah kilemna leh kituahna a om theihna'ng lampi zong ding a US President Barack Obama in Egypt ah Sr Republican Senator nih - John McCain leh Lindsey Graham - a sawlte'n Egypt interim solkal makaite kimuhpihna nei ua, dan bangtak a Egyptian President dia telching a om Mohammed Morsi paihkhiakna leh a vaihawmna leh thuneihna laksakna pen John McCain in coup, sepaihte'n thagum a vaihawmna a laksakna uh ahi chi'n va gen khanglang a, huaiziak in Egypt interim solkal makaite leh abik in interim solkal bawlkhiatu Egyptian Army-te naktak in va suthangpai hi. John McCain in hentang a om Egyptian President lui Mohammed Morsi khahkhia ding in leng Egypt thuneitute kiang ah ngetna bawl hi. Vaihawmna apan Morsi paihkhiak a a omna pen dankalh leh coup ahihdan John McCain in a gen pen Muslim Brotherhood-te bil ah ging kilawm mahmah music ahi. Morsi gumtute'n tu'n a kizom nipikal nga sung kongzing nusia hetlou in kiphinna sunzomta ua, sepaihte zathuapna a solkal dingthak tung ah a lungkimlouhna uh taklang zom zellai uhi.

***Iranian President Hassan Rouhani in Iran's nuclear programme tawh kisai a United States tawh genkhawmna neih ding lunggulh ahihdan leh kihouna nei ding a kihong ahihdan gen a, himahleh US in Iran tung a economic sanction ah vauna bangmah a omlouh ding ahi chi hi. Hun leh ni athawn a beisak mailou a, abaihtheilam a US leh Tumlam gamte tawh kihouna ah Iran nuclear programme toh kisai genkhawmna nei ding in ka kiman a, chihtakna leng ka nei chi hi. Himahleh Israeli Prime Minister Benyamin Netanyahu in, Iran in President thak nei mahleh Israel suksiatna ding leh leitung a pan a phiatmangna ding a Iran in nuclear programme tum tinten ahi chi'n gen hi.

***India-Pakistan kigamgitna LOC a Poonch sector ah Indian Jawan nga kaplup a a omna u'tawh kisai in Army Chief Bikram Singh in statement ana peta a, zan in Indian Defence Minister AK Antony in leng statement pia nawn a, himahleh Army Chief' statement tawh Defence Minister in statement a piak uh a kibatlouh ziak in Opposition-te'n Parliament innpi nihte hihbuai nawn in, innpi nihte ah bangmah genkhawm theilou ua, nitaklam dak thum tan khawlsak in om nawn get hi. AK Antony in statement a piak pen Army Chief in a piak tawh kibanglou chi in opposition-te'n tuni'n kikoukhum ngal ua, Antony in Army Chief in briefing hon pia ding a, huainung in statement ka bawl thak ding chimahleh opposition lamte'n nuihsan in, government minister khat in issue khat ah nikhat a statement nih-vei a suahkhiak lam uh ka thei naikei uh chihkhum uhi. LOC a Indian Jawan nga kaplupna thu ah BJP in Prime Minister' dawnna phut ua, BJP Youth Wing in zan in Defence Minister AK Antony tenna kong ah kiphinna leh lungkimlouh lahna nei ua, tuni'n New Delhi a Pakistan's High Commission kong ah Congress Youth Worker-te'n leng kiphinna thupitak nei uhi.

***Jammu and Kashmir ah, Army Chief Gen Bikram Singh in LOC a kaplup a om sepaih nga-te kiang ah tuni'n zahna leh pahtawina nanungpen piakna nei hi. Hiai zawh in sepaih nga kaplup a a omna uh Poonch sector vehna, etkhiakna nei ding a, zingchiang in hiai thiltung tawh kisai in Indian government kiang ah briefing pia ding a, security tawh kisai in Cabinet Meeting poimawhtak om ding a, Army Chief leh Defence Minister in security tawh kisai banah, tua LOC a thiltung nanunng pen tawh kisai in thugenna saulou nei ding uhi. Huchikawmkal ah, LOC a Indian Jawan nga kaplupna ah Pakistan in a sepaihte kuamah telkhalou ahi chi'n pang zom tinten lai hi.

***West Bengal ah Gorkha Janmukti Morcha makaihna in Gorkhaland bawlkhiak ding phutna bengseng deuhdeuh a, sousang hiaihiai in, kiphinna ni nga chingta hi. GJM makaihna a Gorkhaland phutna tawh kisai a kiphinna leh situation etkhiakna nei ding a kuan West Bengal Home Secretary lampi Gorkhaland supporter-te'n khaktan ua, amah leng Darjeeling SP office apan in District Magistrate office tan khe a a paitung ngai hial hi. GJM activists 24 vel mat in om ua, GJM makaite'n Rahul Gandhi kimuhpihnan nei ding uh hi'n leng kigen hi.

***Congress makaih UPA solkal in tuni'n Lok Sabha ah lungkimlouhna leh sousangna kawmkal ah Food Security Bill luikhiakna Food and Agriculture Minister KV Thomas in nei a, Food Security pen Indian mizawngte a ding a right ahihdan gen hi. Opposition leader Sushma Swaraj in Food Security hia poimawh zaw Border Security, chi'n dotna bawl hi. Food Security tungtawn in India a mizawng million 810 in hamphatna ngah ding ua, anntang omlouhna ah cash compensation piak hiding uhi. Food Security Bill luikhiakna leng sousang mahmah a, opposition-te'n kikoukhum vengvung get ua, Lok Sabha Speaker leng nui top hi.