*CDSA in Club/Team Managers' Meeting Neihpih
*Independence Day Parade Rehearsal Om
*HDFC in CDSA Zat Di'n Water Filter Pia
*Gelmol Centenary Lopna Om
*District Administration Makaih in Singnou Suanna om Ding
TANCHIN KIMZAW
***CCpur District Sports Association (CDSA) saina in hong tung ding August 17, 2013 in Lamka Public Ground ah (L) Khaikhanlian Memorial District 1st Division League - 2013 kipan ding hi. Hiai ding toh kisai in tuni zinglam dak 8:00 in CDSA makaite'n team/club manager-te'ng CDSA office Hiangtam Lamka ah samkhawm in meeting poimawhtak nei uhi. Hiai hun ah tournament pai ding dan leh zuih ding rules tuamtuam omte genkhawmna nei uhi.
***Zinghal August 15, 2013 zinglam dak 9:00 apan in Lamka Public Ground ah Independence Day zatna om ding hi. Hiai ding toh kisai in kisakkhawlhna pailel a, zan leh tuzingkal in Lamka public ah parade a telding contingent-te'n rehearsal nei uhi. JK Suan Guite Assistant Commandant 1st IRB parade commander in pang ding a, contingents 50 val tel ding uhi.
***HDFC bank in CDSA makaite zat ding water filter khat tuni zing lam dak 10:00 in CDSA office Hiangtam Lamka ah piakkhiakna nei uhi. HDFC official lam in a genna uah, district administration leh district mipite deihsaskna in HDFC bank tunitan lamzangtak in pai thei a, tua banah tuni a CDSA-te kiang a, thilpiak piak a om pen a tawpna hilou ding ahihdan gen in, maban ah HDFC in panlak theihna omte ah pang nuam gige ahihdan uh gen hi. CDSA president Lalvullien in HDFC bank in CDSA-te poimoh thei a, hiai bang thilpiak a piakna tung uah kipah thu gen hi.
***Gelmol khua a kisat nung kum 100 chinna, centenary lopna tuni sunma dak 11:00 in Gelmol play ground ah neih in om hi. Tuni a centenary lopna hun ah Gelmol kholui map honkhiakna Ngamhao Touthang MDC in nei a, centenary suangphuh honkhiakna Jamkhothang Lhungdim, Innsungpa in nei a, centenary balloon khahkhiakna Seiminlun, Chief of Teisieng in nei a, vapal khahkhiakna Thenkholet, Chief of Suongpi in nei a, tua banah kholui map leh centenary suangphuh latna Rev. L.B Angam General Director ECCI in nei hi. Banah, Gelmuol Khanggui leh Thusim kichi laibu honkhiakna J. Lhungdim, Chief of M. Suonggel in nei hi. Hiai hun zatna ah Ngamhao Touthang MDC, Goulal President TPP, T. Sumlianthang MDC, Tongminthang Lhungdim MDC, Holkholun Lhungdim Ex-President KIM leh Holkhojang Lhungdim-te'n uap in thugenna hun zang uhi. Tuni a Gelmol khua centenary lopna ah sial 1, bawng 2, vok 5, kel 2 leh ngasa Kg 40 huan in om a, programme zat zawh in mipi pai khawmte'ng in centenary lopna in annkuang ummkhawmna nei uhi.
***District Administration CCpur saina in zingchiang August 14, 2013 in Lanva lui nak ah singnou chi tuamtuam suanna neih hiding hi. Zingchiang zingkal dak 8:00 in Lalpuithuaii Foundation School Bungmual ah singnou suan dingte khahkhiakna Langkhanpau Guite Chairman ADC/CCpur in nei ding a, Jacintha Lazarus IAS DC/CCpur in leng thugenna hun saulou nei ding hi. Tua banah zingchiang mah; nitaklam dak 5:00 in Lamka Public Ground ah Independence Day Eve Celebration zatna om nawn ding a, hiai hun ah Cultural Programme, Independence Day Theme: Clean & Green CCpur leh Fire Works neih hiding a, nitak dak 7:30 in DC Bungalow ah nitak-ann nekkhawmna om ding hi.
GAMDANG THU
***Pathianni nanung pen zingsang baihtak in Nigeria malsuah lam a om Borno state a Kanduga ah Islamic helpawlte'n Muslim biakbuk, mosque khat a beihna u'ah atawmpen in mi 44 kaplum uhi. Helpawlte gamtatna pen tua theihkhiak leh puankhiak a om pan hi'n kigen a, thuchian kimzaw theih hinailou a, kuamah in amau' sulnung ahi chi'n puanglou ua, himahleh Boko Haram helpawlte sulnung hiding a gintak ahi. Hiaibial bel Boko Haram helpawlte hatna ahi a, hun paisa ah leng Boko Haram-te'n Muslim-te biakbuk mosque ana bei uh hi'n kigen hi. Pathianni zingsang a Muslim gingtute'n zingsang thumna nei a a khukdin laitak ua galvan hoihtaktak tawi helpawlte'n bukap uh hi'n kigen a, mi sang nih vel in liamna tuak in damdawi inn ah etkol in om ua, khenkhatte dinmun lauhthawng huai mahmah hi'n kigen hi.
***Mali Presidential election ah Pathianni in run-off election neih a a om nung in Malian President thak ding in Ibrahim Boubacar Keita telching in omta hi. Mali' President thak in nikum a Mali ah military coup a om nung a economy kisia mahmah pen puahphat leh bawlhoihna ding in naktak a pan a lak masakpen kul ding in kigen a, banah, gamdang apan sum-le-pai a huhna leh panpihna a ngahna ding in Mali a democratic government a bawlhoih nawn kul masa ding hi. Ibrahim Boubacar Keita bel Mali Prime Minister lui ahi a, Mali a social problem bawlhoih ding tamtak ama ah om a, a nna ding tuh huphulh huai mahmah a, Malian mipite'n President thak leh solkal ding thak ding ah kinepna leh lam-etna lianpi nei uhi.
***Brazil khopi Sau Paulo a om youth prison centre apan in mi 54 taikhia uhi. Suangkul taangte lak ah buaina nasatak a piang nung in Prison Staff 29-te leng hun bangtan hiam hostage dan a hentang in om ua, Prison Director leng a liam ziak in damdawi inn ah etkol in om lel hi. Jail apan taikhia mi 54-te lak ah mi 17 matkik in om nawnta uhi.
***China ah numei khat, a tenna innsawng nga-na balcony apan a kitalkhia kha a, a innkim-innkiangte leh firefighter-te panlakna tawh damtak a hutkhiak in om hi. Numei nu bel amah apartment' balcony ah a ngaihzawngpa tawh dingkhia in a innvengte tawh a kihou lai un gintaklouhpi in kitalkhia kha a, a ngaihzawngpa'n man man in vangphathuaitak in leitual denglou in hun bangtan hiam kikhai a, hutkhiak in om thei hi. Huailou in, Chinese doctor khat in a inntung ah official a phalna neiloupi in mual/taang/mountain khat a bawltawm ziak in buaina tuak leuleu a, huai fake mountain pen ni 15 sung a lakhia ding in thupiak mu hi. Hiai doctor-pa'n a tenna apartment block tung a mual-le-tang a bawltawm pen a innkim-innkiang a tengte'n dongkholh sa mahmah ua, deihlou in complaint ana bawlta ua, hiai thu tawh kisai in social media ah kikupkhawmna hot mahmah hi.
***Tukum pai lel sung a leitung a typhoon hatpen hilai a kigen Typhoon Utor in Phillipines leitang a nuai tawh kiton in inn-le-lou leh haichi tamtak hihsia in mi khat in sihna tuak a, ngasa man-mi khenkhat a omna uh theihlouh in omlai a, mi tamtak mangthanglai uh hi'n kigen hi. Phillipines gam khopi Manila malsuah lama a tuipi piau dung nasa deuh a nuai hi'n kigen a, singkungte zungkalh in, innte nuaizan a, power supply line-te alang-alang ah kisia vengvung uhi. Kumteng in typhoons 20 vel in Phillipines nuai gige hi'n kigen a, typhoon utor bel a lianpen leh hatpen hilai hi. Typhoon Utor bel tukum pailel sung a leitung maikaih a typhoon hatpen hilai a, huihpi dakkal khat kilometer 175 a hat tawh kithuah hi. Tu'n Typhoon Utor pen South China Sea lam ah kihei in, Phillipines a sang a hatzaw in Nilaini in China gam deng nawn ding hi'n kigen hi.
***Ishrat Jahan Fake Encounter Case ah kigolh a ngawh a om Gujarat Joint Police Commissioner lui PP Pandey in Supreme Court ah humbitna a nget bang a piak ahihlouh ziak in, beidong kisa in court ah kipiakhiata hi. 2004 in college naupang Ishrat Jahan leh mi dang thum bawltawm kikaptuahna, fake encounter ah thah ahihnung uh kum kua in leng thubuai genveng hinailou a, ngawhpipen aom PP Pandey in hun paisa ah CBI-te thudotna ding kha bangzah hiam ana pumpelh in ana kiselta hi. PP Pandey bel 1982 Batch IPS Officer ahi a, Ishrat Jahan leh mi dang thum kaplup ahihlai un amah Ahmedabad ah Joint Police Commissioner ahi.
***RJD Chief Lalu Prasad Yadav in Fodder Scam thubuai ngaihkhiakna pen Jharkhand High Court apan court dang ah suan ding in Supreme Court ah ngetna bawl mahleh top court in a ngetna nawlkhinsak hi. Bihar Chief Minister ahihlai in gan-ann leina ding tawh kisai a fund tamtak Lalu in su thelthang leh nne-gu ahi chi'n ngawh in om a, huai thubuai ngaihkhiakna pen Jharkhand state capital Ranchi ah neih in om a, himahleh Lalu in Ranchi court a judge khat tulel a Bihar solkal a Senior Minister khat tawh kitanau nai ahihziak in adik-atang a vaihawmna mulou ding ahi chih paulam in Fodder thubuai pen court dang ah ngaihkhiakna neih ding in Supreme Court ah ngetna ana bawl hi. Lalu mohpaih a aomleh elections tuh theilou ding a disqualified hiding hi. Tua banah, Supreme Court in tuapan ni 20 sung a Fodder Scam thubuai ngaihkhiakna zou ding in lower court ah theihsakna bawl a, ni 20 nung a thutanna puankhia ding in theisak hi.
***Parliament Monsoon Session pailel ah solkal ding lel in Food Security Bill paisuak sak teitei tum in panla mahleh langpang pawl in naktak in nang ua, Parliament vaihawmna tamveitak ana nawngkaisakta a himahleh Congress makaih UPA solkal in paisuaksak teitei tum in naktak in panla hi. Tua tawh kiton in, House Speaker in Food Security Bill tawh kisai in All Party Meeting sam hi. Food Security Bill paisuak hileh rural poor-te'n rice kg. khat ah Rs 3 in lei thei ding ua, wheat kg. khat ah Rs 2 in kileithei ding a, coarse grain kg. khat ah Re 1 in lei theih ding hi. Banah, Food Security Bill in khopi a mizawng 50% huamkha ding a, rural ah mizawng 75% huam ding a, agawmkhawm in India pumpi ah mihing million 800 in Food Security hamphatpih ding uh hi'n kigen a, PDS tungtawn a hawmzak hiding a, Aadhar Scheme tawh zopkhawm hiding hi. BJP leh Left Party-te'n Food Security Bill pen deihlou pumlum hikei mahle uh provisions khenkhat bawlthak ding ngiat ua, Party neu nounou a dang khenkhat DSP leh DMK-te'n bill tawh kisai in reservation nei uhi.
***Indian inn nupite a ding a mangbathuai mahmah ding in phulunsan man nasatak in pung hi. August kha a kipat apan in wholesale ah phulunsan man nasatak in khang a, tu'n India khopi khenkhat ah onion ser khat in Rs 80 khawng man zou hi. Phulunsan hoarding, aguk a phulunsan kholkhawmna ziak in phulunsan man 25% in pungtou zou a, India a phulunsan wholesale market lianpen Nashik ah quintal khat in Rs 4,500 manzou hi. Khokheng leh tuilian ziak in Indian market a onion supply naktak in kiam a, Rajasthan leh Madhya Pradesh ah 40% in onion supply kiamsuk zou hi. September - October a onion thak a tunma teng phulunsan man kiamlou ding hi'n kigen hi.
***Darjeeling Hills ah Gorkhaland phutna a GJM in indefinite bandh a puan pen West Bengal solkal nawh hatna leh Independence Day ding ziak in ni 11 nung in GJM in ni 3 sung khahkol a, himahleh Darjeeling ah bel curfew paizom zellai a, mi tamzawte inn ah om in kholak pusuaklou uhi. GJM in Gorkhaland phutna a kiphinna a neih sung in mi 200 val mat in omta uhi.