"Zolei anbang it zatamte, Bang di'n simthu luang khawmlou;
Anbang itte dougal tang le'ng, I gam zuun diing ziinmang maw?"
(V. Paukhansiam)
Dr Paulginthang, a tancin theipen hikei mahle'ng, theih khak tamloute pansan in thu saulou ka hon gelh hi. TOUPA'N kuul sakna nei himaithei, banah, Zolei anbang it mi zatamte - adiaka southern Manipur LAMKA suak leh Lamka bial a khawsate adi'a damtheihna tawh kisai district hospital a "heutupa" cih theih khat hong hita tancin vatheih zek pen navakna om thei ahi cih ziak bang ahideuh. Toupa hoih hi.
Dr Paulginthang a'ihleh Bungmual khaw-mi, hiai khua a piang leh khanglian, phamsa Rev Nengthawn' tate laka khat ahi. Amah leh a pianpih sanggamte: -
1. (L) Dr Langkhogin (Medical Doctor)
2. Chiinthang
3. Rev (Retd) Phungzapau
4. Manzaching
5. Singnem
6. Dr Paulginthang (Medical Doctor)
7. Dr Thangmuan (Medical Doctor)
8. Vungzachin.
Dr Paulginthang, a omna khua Tuiphum Pawlpi (Evangelical Baptist Convention Chruch) a kizang mahmah khat ahi. Childrens Department a Superintendent dinmun hun sawtkuam a let ngei banah EBC pawlpi tung tawn a TOUPA khutngakna (thaunilhna) tang; Ministerial Committee, EBCC Bungmual a Secretary hihna lenlel zong ahi. Medical Officer (MO) hihna tawh mun tuamtuam, h.t. Thanlon, Sugnu, Tamenglong leh adg dg ah posting in Dr Paul paikha.
Doctor-pu in a ji, Nu Boinu tawh gil a gah goutan tapa 1 leh tanu 2 nei uh. Tg Ginbiaksang Naulak in IIT-Delhi apan B.Tech (Electronics) zoukhia (2007), hiai kum in campus recruitment tungtawn in IBM Bangalore ah lut in seemtou lel. Lia Chiinlunniang, B.A. (English), Daulat Ram College [DU] apan zoukhia (2010), tu'n inn lam ah a' nu-le-pa te tawh omlel. Miss Chingthianhoih, Class 12 sim in Bangalore khawpi ah a' u Ginbiaksang tawh omkhawm uhi.
Ministerial Committee (EBCC Bungmual) in nisim 05/06/2012 zingkal in Medical Superintendent (MS)-pu a' ofis ah kipahpihna hun vazang ua, tua ah Pastor M Ginzatun in kipahthu genna leh thumsakna/ thupha piakna nei. Upa Dr Paulginthang in solkar naa sepna diing in kum 2 (nih) cinglou deuh neilai. Tua hunsung, zathuap leh amah tawh panghuan a District Hospital puah tangtang ciat di'n thugelh simtute hanlung ciam ni maw. Takheh!
Dr Paulginthang and family
-------
News clipping:
Med Supdt thak in charge la
Lamka, June-4: Dr N.Paulginthang in tuni sunnung in Dr P.Nengzadou apan in Medical Supt/ Dist Hospital dingin charge la a, Dr P.Nengzadou in Dist Malaria Officer lending hi. Dr N.Paulginthang in a genna ah, Dist Hospital i chih a neitu mipi mah hi a, govt officer-te leng govt nasem ahihman un a mawhpuakna bang uh a sepsuah ding uh hi'n gen hi. Mimal kuamah bukim omlou ahihman in kigensiat-thawh lou a pangkhawm chiat dingin ngen a, mipi leh Dist Hospital a semtu teng pankhawm hun chiang in Dist Hospital hoih leh khangtou hiding chi'n gen hi. [Courtesy: http://www.zogam.com/news/zogam-thupuak/583-zogam-thupuak-05th-june-2012.html].
.