MLA(Thanlon A/C) in 80-RCC/BRO officer thak vaidawn
BRO te’n Guite road black-topping zawhkin sawm
Lamka, June-4:Thanlon pansan anei Border Roads Organisation(BRO) a 25th Bn/ 80 RCC te’n Guite Road a nasepna lamzangtak a paitou zel ahihdan gen ua, Tuivai leh Sinzawl kala menchim omte leng hahsiang uh a, geina bangin gari taithei nawnta ahihdan gen uhi. 80-RCC a Officer-in-charge(OC) lenlel Major Gowda in kum 4 vel 80-RCC a puaknung in tu in Jammu & Kashmir a 86/Engineering Regiment ah suan(transferred) in om a, amah mun luah ding Major Akash hongtungin tuni nitaklam dak 4:00 in Vungzagin Valte,MLA(Thanlon A/C) tenna inn New Lamka ah vaidawnna nei a, Major Gowda mangpha khakna kawmin singpi dawnpih in puandum silhsak tuak hi.
Maj Gowda in a gendanin ni 2 paisa in Imphal apan Battalion CO Colonel Mohanlal in Guite road enkhia in Tuivai tanpha chi hi. Tu in Sinzawl leh Tuivai kalah JCB 2 in nasem a, menchim omte’n khualzinmite a sukbuai louhna dingin panlak hi’n gen hi. Aman a gen behna ah CCpur-Singngat-Behiang leh Singngat-Sinzawl-Tuivai lampi Guite road pen govt in National Highway No. 102 dingin official a apuan ziakin BRO in nasep paidan a khenzek poimawh chi’n leng gen hi.
Singngat-Behiang lampi (Tedim road) leh Guite road banah Sinzawl leh Dialkhai kal-te Ministry of Defence nuaia General Staff (GS) funding a bawlding chih hi a, himahleh tuni tan DPR sanction a fel nailouh ziakin tu in Chief Engineer level tan a sanction tuamtuam om theite zangin tulela lampi pai(existing road) pen blacktopping a bawlsuak hiphot ding hi’n Major Gowda in gen hi. GS funding zanga bawl ahih chiangin ama a proposal om class IX enhance specification pen zuih hidinga, lampi tuang feet 1 in sah ding a, avai metre 12 in lian dia, double lane hiding chi hi. DPR sanction fel naikei mahleh mipite’ adia kikawmna hoih a poimawh kin ziakin lampi keklet (widening) pen khawlsan hiphot dinga, lampi tuang omlel pen blacktopping a zawhkin sawm ahi chi hi. Singngat-Behiang leh Sinzawl-Dialkhai kal widening process pailel khen lamdang omlou in sutzop hiding chi’n leng Maj Gowda in gen hi.
Vungzagin Valte,MLA in Maj Gowda nasepkhiakte thupi in phattham ching ahihdan gen a, bial mipite’ sik-le-tangin kipahthu gen hi. 80-RCC a OC thak Maj Akash leng vaidawn ahihdan genkawmin Maj Gowda mah banga mipite’ kinepna tangtungsak dingin leng chial a, Maj Akash in MLA pu leh mipite’ muan banga nasem ut ahihdan leng gen hi. Huai hunah ZEPADA Working Chairman PK Munga leh Secretary K Vungzamoi in leng BRO/BRTF te’ nasep phat-huai sak thu leh tusang a hatzawsem a na a sep uh sunzom zel dingin ngen uhi.
Huihpi hattak leh vuahpi kithuahin Lamka khawpi leh akimlak nuai
Inn tamtak kisia:singjol in a denkhak 1 liam
Lamka, June-4: Zan nitak dak 11:30 velin huihpi leh vuahpi kithuah hattakin Lamka khawpi leh a kimlak naktakin nuai a, mun tuamtuam ah tenna inn,biakinn,community hall, school building, electric khuam(post) telin thil tamtak hihsia hi. Nghathal a om Siamsinpawlpi Residential School a nursery section building teng huih in mutsia a, akhuam teng leng mutkhe dimdem in inn van teng akhang lam ah kithehdalh vek hi. Huihpi haktak in inn a hihsiat laia singjol in a denkhak mi khat leng district hospital tut in om man hi.
Kawnpui khua ah tenna inn hunkhop huihpi’n mutsia a, huaite lak ah inn 6 se dimdem a, electric post 2 leng mutpuk a, electric high tension gui(wire)te leitual ah kikhung hi. Huihpi hattakin Lamka Public Ground kianga singkung 2 mut tan in huai in electric gui mun 2/3
ah delhkha in kitan a,deptt te’n tuni zingsang in buaipih pah uh a,lamlian khaktan singkung kipuk hahsiang in electric-gui kitang leng bawl hoih uhi.
Kawnpui khua a inn kisiate ahihleh Lalringliana, Lalthutlunga, F.Rosanga, Vanlawma, Rothuama leh Tuithaphai Presbyterian biakinn chowkidar’ tenna quarter te hi a, tenna inndang 4 leng mutsia a, himahleh huai inn 4te belhtheih lai in om hi. Kawnpui khaw khang a ZMB Brick-field leng mutsia a, brick field a duty a om lel Sapo Singh (30) s/o (late) Lala Singh of Kawnpui inn-tung a singzawl in a lu dengsuk in liam a, Dist Hospital a dressing bawl zawh in a inn uah ki-enkol hi. Kawnpui khua a tenna inn huihpi mutsiat-te tuni’n YMA Kawnpui branch makaihin mipi’n social work nei uh a, van kisam bangbang YMA te’n sum pawkhia in bawltheih liaisiah mipi’n bawl uh hi’n kigen hi.
Sehken khua a ZCBC biakinn huangsung a om Sehken Govt. JB School tungteng leng huihpi in mutsia a, inntung lengkhia in biakinn kongkhak dengkha in biakinn lutna dal hi. Huai school building teklei a hoihtaka kibawl himahleh huihpi hattakin building bang(wall) teng mutsia a, belh theih nawnlouh khopin mutpuk dimdem hi. Gangpimual leh Tangnuam khua kawmtuahna a Waiting shed kibawl leng huihpi’n mutsia a, langva teng lengkhia hi. Waiting shed kianga local cable gui kizan teng leng langva lengkhiate’n hihsiaa, zan nitak mah in mun tuamtuam ah cable gui kitan leh bawlthak ngai tamtak om chihthu kiza hi.
Hibangkalah Thingkangphai khua ah leng huihpi in NTBC biakinn leh Community Hall telin tenna inn 33 val mutsia hi. Phungzathang Tonsing, Minister (Health & FW, GAD, CADA), Sumlianthang, MDC (Lanva) leh B.Zodingliana MDC te’n Nghathal, Kawnpui leh Thingkangphai khua a huihpi in tenna inn leh adangdang amutsiatte va enkhia uh a, Thingkangphai area a huihpi in a mutsiat-te ZYA Gen HQ makaite’n leng enkhia uhi. Thingkangphai Hausapi in Minister kiang leh bialtu MDC kiang ah report bawl hi’n kigen hi. Huaipi ziak in khua leh veng tuamtuam ah leng huihpi in tenna inn hunkhop mutsia hi’n kigen a, electric khuam kipuk, singkung kipuk leh singhiang a muttan leh dai(fencing) kipuksia leng a hunkhop muh ding om hi.
Minister in ‘New Bazar Super Market’ building hong
Lamka, June-4: New Bazar ah malta leh ak zuakna mun kiphelsia in BRGF 2010-2011 fund zanga Super Market building kibawl tuni zingsang dak 8:00 in a Phungzathang Tonsing, Minister(Health &FW, GAD, CADA) in hongkhia a, a enkoltu ding District Council-te khut ah pekhia ahihdan leng puang hi. Huai ah Functional President in Langkhanpau Guite, Chairmam ADC/CCpur pang a, Guest of Honour in Ms Jacintha Lazarus, IAS DC/CCpur pang hi.
Minister in DC/CCpur panlakna ziakin BRGF fund kithawh a New Bazar Super Market kibawl khia hi’n gen hi. Aman a genbehna ah amun(gam) neitu Dist Council-te hi uh a, New Bazar Super Market lutna ding lampi kawchiik tak leng abawl uh a deihthu gen hi. CCpur district ah tulelin TD Block 10 om a, huaite ban ah Lamka North, Lamka South leh Lanva TD block honthak dingin Cabinet in thupukna bawlkhin a, block thakte honkhiakna ding District Administration in buaipih lel ahihdan Minister a gen banah tukum sunga honkhiat leh function sak hiding in leng gen hi.
Chairman, ADC/CCpur in a genna ah Lamka adia gou hoihtak super market bawlkhiak ahihna tung ah vaisaite pahtakthu gen hi. New Bazar Super Market bawlzawh ahih dungzui in atuang(floor) leng plaster bawl beh deihthu gen a,huai neitu tuam omlou in a neitu mipi a ahihman in kuapeuhin siangthou theipen kem ding in deihthu gen a, bazaar luahtu dingte mun akihawm hun chiangin buaina a omlouh deihthu gen hi.
DC/CCpur in Lamka a hong om tunglai in New Bazar a phak lai in amun kawchik leh thanghuai salua ahihdan gen a, huaiziakin Super Market hoihtak bawlkhiat dinga ngaihtuah ahihdan gen hi. Huai dungzui in Minister pa tawh pangkhawm in BRGF 2010-2011 fund apan Rs 50 lakh tuak kithawhkhawm a Super Market bawlkhiat a om hi’n gen hi. Aman a genbehna ah bazar buk ding bawl zawh himahleh a lampi neu lua a, PWD ten akinthei lam a a bawl uh deihthu gen hi. BRGF tungtawn in scheme neu chikchik kibawl sek a, himahleh tuni a scheme lianpi honkhiak a om CCpur dist mipi leh officer-te kia hilou in Manipur Chief Secretary tanpha inleng hoihsa ahihdan gen hi.
Tuni a function omlai in bazar buk atu malta zuakte’n official-te kiang ah malta tun khat chiat pia uhi. Programme zatna hun ah SP/CCpur telin Dist Level Officer tamtak leh MDC member hunkhop leng tel uhi.
Red Shield Peace Seminar om
Lamka, June-4: 27-Sector Assam Rifle-te saina in tuni zinglam dak 10:30 apan in Synod Hall ah ‘Red Shield Peace Seminar’ om a, Maj General Binoy Poonen, VSM, GOC, 57-Mountain Division khuallian apang in seminar hong a, Chief Host in Brig V.S Ranade, Comander 27-Sector, Assam Rifles pang hi. Seminar hun ah Ms.Jacintha Lazarus,IAS, DC/CCpur; Rev. M.Siema Raomei, MBC Central Church/Imphal; N.Iboton Singh, Dean, Agriculture University/Imphal; Rajesh Hizam, Editor, Sangai Express leh Ricky te’n thupi tuamtuam zang in sinsak uhi. Tuni a Seminar ah Lamka khawpi a College tuamtuam apan student hunkhop tel uh a, Army-te’n mipite’ muhtheih ding in galvan chi tuamtuam leng koihkhia(displayed) uhi.
Med Supdt thak in charge la
Lamka, June-4: Dr N.Paulginthang in tuni sunnung in Dr P.Nengzadou apan in Medical Supt/ Dist Hospital dingin charge la a, Dr P.Nengzadou in Dist Malaria Officer lending hi. Dr N.Paulginthang in a genna ah Dist Hospital i chih a neitu mipi mah hi a, govt officer-te leng govt nasem ahihman un a mawhpuakna bang uh asepsuah ding uh hi’n gen hi. Mimal kuamah bukim omlou ahihman in kigen siat-thawh lou a pangkhawm chiat dingin ngen a, mipi leh Dist Hospital a semtuteng pankhawm hun chiang in Dist Hospital hoih leh khangtou hiding chi’n gen hi.
Bangladesh Journalist-te’n enkhe ding
Lamka, June-4:Tipaimukh Hydro project tawh kisai amun mahmah a enkhe ding in Bangladesh apan Journalist 11 te’n June 6/7, 2012 in Helicopter zang in enkhe ding uh a, huai hun ah Central govt pan official hunkhop leng tel ding uh hi’n kigen hi. Bangladesh Journalist team te’n Tipaimukh Dam Project etkhiat a sawm ziakun tuni’n SDO/Tipaimukh leh OC Parbung PS makaih in Police hunkhop in Parbung zuan uhi.
DC office ah meeting om ding
Lamka, June-4: DC/CCpur makaih in May 5, 2012 zinglam dak 11:00 in BRGF Resource Centre ah Lead Bank Scheme tawh kisai meeting om ding a, huai ah General Manager, RBI/ Gauhati, MLA-te, Bank branch tuamtuam a Manager-te, MDC-te, ED/DRDA, SDO/BDO teng, Lead Bank Manager, UBI Imphal tel ding uhi. Huai zawh sunnung in DC/CCpur makaih mah in BRGF Resource Centre ah Dist Level Co-ordination Committee(DLCC) meeting om ding a, huai ah Dist Level Officer teng telding uhi.
Paina ding theilou pitek 1 om
Lamka, June-4: Tuni nitaklam in M.Songgel Town Bus parking mun ah pitek kum 70-80 vel ding 1 in a paina ding theilou in om a, KKL leh S.Songgel Defence Force te’n buaipih uhi. Pitek in chiangkhun 1 khun a, pautheilou, akhut taklam zeng(paralysed) ban ah akhe langkhat leng hoihlou hi’n kigen a, aman lukhu kiphante avom khu a, tata khedap bun in towel 1 awk a, sepaih puan-ak rong silh hi’n kigen hi. Tunitak in M.Songgel nupi te’n an pia uh a, amin leng lai a gelh theilou hi’n kigen hi.
Songtal khua ah Orientation Program
Lamka, June-4: Thanlon sub-divn a Songtal Govt H/S ah June 5-6, 2012 sung 10-Tuivai MDC constituency sunga teacher-te’ ading in 2-days orientation training programme om ding hi. Huai hun ah Langkhanpau Guite, Chairman ADC/CCpur, Tualkhanlal, AI of Schools/Thanlon leh Vashti Kim in thupi tuamtuam zangin sinsak ding uhi.
IFS ngahthak kipahpihna i
Lamka, June-4: SSPP Gen HQ makaite’n tuni in Bungmual a SSPP complex ah tunai zeka IFS ngahthak Miss Baby Lhingneikim, IFS d/o Semzakam Touthang (Life Member SSPP) kipahpihna(felicitation) program nei uhi. Huai ah Rev K.Kamchinkhup, Director of Ministry(EBC) in Baby adin thumsak a, maban ah UPSC saina a IFS exam nuamte ading a theihtuak houlimna hun leng zang uhi.
PHC ading van tamtak tung
Lamka, June-4: Singngat PHC ading vanzat chituamtuam CMO/CCpur in indent a bawl damdoi leh matress telin vanzat hunkhop gari 1 dim Singngat PHC ah puaktung a omta hi’n CMO/CCpur apan kiza hi.
World Environment Day zat hiding
Imphal, June-4: Manipur govt nuai a Forest & Environment inntekna in May 5, 2012 sunnung dak 2.30 in Kangla Hall ah World Environment Day zat hiding hi. Huai ah Chief Guest in VK Thakral,IAS, Principal Secretary(Forest & Environment/GAD/Rural Dev & Panchayati Raj) pang ding a, Functional President in Dr RK Nimai,IAS, Secretary to the Governort of Manipur pang ding hi.
Semi-low Floor Bus 2 kia service
Imphal, June-4: Urban Development Ministry in Jawaharlal Nehru National Urban Renewal Mission nuaiah Transport system puahna dingin Manipur ading Semi-low Floor Bus 25 leina ding sum sanction a, huai dia tutan a sum released(kimuzah) zangin Bus 18 kileita hi’n kigen hi.Gari 18 kileikhinsate lakah 2 lel tuni tan in service uh a,huaite leng Paona Bazar leh Thangal bazar kikal kia kawmtuah in service chihthu om hi. Gari dangte private firm leh society a zang(hire basis) nuam om hiam chih zonna in tender tanpha suah himahleh dawnna bangmah omlou a, tuni tan in MSRTC complex ah koihdap a om hi’n kigen hi.
Meltheihlouhte’n bomb paihkhum
Imphal, June-4: houbal District sung Moijing Awang Leikai a Moijing Gram Panchayat Pradhan Mrs. Hamedha Begum(30) d/o (late) Komaluddin tenna inn ah tuni sun dak 12:50 velin meltheihlouhte’n hand-grenade khat paikhum uh a, himahleh puaklou chihthu om hi. Thil omdan kintak in police ah report uh a, police a bomb expert team in lakhia in mun tuam ah hihsia(defused) uh chihthu om hi.
SK Oil khateng in litre 20,32,225 pekhia
Imphal, June-4: Manipur in khateng in khonvaktui lakna dinga permit piaka om mi 4,06,445 te lak ah litre 20,32,225 pekhe gige hi’n kigen hi. Imphal east a permit kipekhe zah tangpi 62998 te adin litre 314990 piakkhiak hi a, Jiribam ah mi 6805 te adin litre 34025 piakkhiak in om hi. Bishnupur ah mi 37855 te adin litre 189290, Thoubal ah 65067 te adin litre 325335, Tamenglong ah 18384 te adin litre 91920, Ukhrul ah 24369 te adin litre 121845, Chandel ah 18667 te adin litre 93335, Senapati ah 23512 te a din litre 117560, Sadar Hills ah 30956 te adin litre 154750, Imphal West ah 79009 te adin litre 395045 leh CCpur ah kha tengin mi 38826 te adin litre 194130 piakhiak(issued) hi’n kigen hi.
Gari ah glass vom thuah phallou
Imphal, June-4: Imphal East district sungah Gari a glass vom(black film glass) thuah omlou ding in SP/Imphal East in theihsakna thusuah bawl hi.SP/Imphal East in thusuak dungzui in Gari a black film glass thuah a om leh Motor Vehicles Act,1988 nuaia section 109 leh Central Motor Vehicle Act,1988 a Rules 100(2) bawhsia chihna hi a, huaite tungah dan dungzui in action lak hiding chi’n taklang hi.Thusuak in a gendan in mi pimang(kidnapping) , mi vaulau kawma sum laksak(extortion) leh crime thilhih tamzawte’n Gari ah glass vom a thuah ziakun huaite gamtatna dalna dingin hibang thupuan kibawl hizaw chi’n SP/Imphal East in taklang hi.
Commando te’n Prepak 1 mankhia
Imphal, June-4 : Thoubal Commando te’n zan nitaklam dak 4;20 velin Hianglam Mayai Leikai lak operation a bawlna uah PREPAK(Cobra Task Force) a self-styled Lieutenant E. Subhadeba Singh (25) s/o E. Sunder Singh mankhia uh a, amah akipan in 9mm pistol khat leh a tang 2 mukhia uhi. Amah kipuanna akipan in kum 2007 a Moirang Khunou a Assam Rifles-te tawh kikaptuahna banah kum 2008 in Kairem Bikhok ah Thoubal Commando-te tawh kikaptuahna leh kum 2010 in Kharang village ah Assam Rifles-te tawh kikaptuahna ah telkha hi’n kigen hi. Huai hunlai in self-styled Sergeant Japan command-na nuai a om uh hi’n kigen hi.
A/R te’n zu tamtak mukhia uh
Imphal, June-4: Red Shield Division nuaia om 22-Assam Rifles te’n June 2, 2012 in Truck(No. MN-03T/0435) sunga kipua zu(Indian made foreign liquor) cases 26 mukhia uh a, Truck neitu Khanam Sharat Meetei (38 ) s/o Kh Tomba Meetei of Erungbung Kalika(Imphal East Dist) in a puak hi’n PIB(Defence Wing) thusuak in gen hi. Aman beia zu a puak ziakin Assam Rifles te’n mankhia uh a,amah leh azu puakte Jiribam a Excise deptt khut ah pekhia uh chih thusuak in taklang hi.
.