Ahmedabad 3vei paina & Aizawl 1vei zinna (Part-2)

: Upa N Chinsum; Upa Chinsum; COMMENTS; 17 October 2012; Hits: 5133

Ahmedabad 3vei paina & Aizawl 1vei zinna (Part-2)

“Aw Zoram nuam suihlung phang lo la,
Thang leh thar te’n pheilai vawr in;
Lalpa chakna ring in kan beizel dawn,
Hmelhma doral.” (Daduhi)

Nitak-an nezou, DELHI a kithuahpih khak, tua nekzonna hang a Aizawl a innkuanpihte tawh khawsa ta, U Hauno (T. Lalkhanhau) honsawl gari a tuang in a omna inn uh vamuhsak thei ing. Tua hun in, Lamka Sports Club (LSC) vaanglai a player suanhuai (tua SAI, Aizawl a Dy. Director a tu), Mr Lianminthang @Thangte leh a’ tapa bang zong ana om ua, thukhawtang gen in hun nuamtak ka zangkhawm uhi.

21/7: Zinglam, exam centre Government Mizo Higher Secondary School (GMHSS) vapha. Tua ni paper (Geology subject) pe di candidate omlouh ziakin tanau vehna in hun zang ing. Thu kipahhuai, Upate’n - Ciangkot leh mankhawng kituak a cih uh, Centre Supervisor Upa J.H. Biakmawia, kaisanna order [from Principal, GMHSS to Jt. Director (Edu)], Aizawl ka tun ma ni in na suak a, Aizawl ka pawtsan ma ni geih in join hi. Kiginni a k’ong kimuhtuah ciang un, “Akhai, nang exam duty in n’ong kuan a, a kipahhuai vele. Zingciang (Nipini) Agriculture and Animal Husbandry & Veterinary Science exam pe di candidate 1 ciah i nei ahi. 9:30 AM a exam kipan di hive’n, zinglam n’ong pha zauh di’a, biakinn kai nopna na neih leh na va kikhawm di’a, huai kikhawm n’ong tawp cia’n MIZO CHHAWHCHIAR Special ngat i ne di uh chu. Ka lawmte’n hon mangpha khaakna uh le hingal di ahi,” ci in angtanhuai takin hon houlimpih hi. Toupa min phat in om hen!

22/7: Nipini dam a khawvakpha mu, Dinthar-II a EBCC kikhop hun zinglam dak 10:30 hive’n.. Exam Centre vatawn zou, driverpa tawh EBCC kikhopna mun ka tun ciang un, vuah phin ninip, kikhawm di’a kuan midangte zong na tungsaan uhi. Delhi a kithuahpih khak bang, meltheih bang tamtak na om uh a, tua ni piching sande skul U Lalkhanhau @ Hauno in class la in, kikhawm milip zong hoih mawhlou hi. EBCC Aizawl a kai nupi, papi, nungak-tangval te’ mel ah khalam a dangtaakna, Toupa Kha mahmah lunggulhna om hi’n ka mu. Toupa’n amaute A’ van manna in vaak zom zel hen aw!

Kikhawm tawp, Mizo chhawhchiar limtak nezou, exam pia omsun candidate in Paper-II apiak zawh in Circuit House ah kikha sak ing. Toupa hakkol puakpih, Upa T. Liansangvung in (suun a kihouna bang in) hongpi-a a’ inn ua nitak-an limtak ne zou, nitak biakna kikhop (7PM) delh in kikhawh cencen ung. Local Pastor Rev. G. Sanglian, Lamka lam azin laitak himahleh, Local Chairman leh a seppihte thusiamna tawh, kikhawm tawp in Tualsung Upa Committee in Pastor’ Quarter ah hon tutpih uhi. “Lamtawn in Jesu ka zui zel diing” cih la sakkhawmna, sharing hun, leh fellowship zawhna a paching ngen paikhawm mi 17 vualte’n i nam-le-gam in poimawh leh taksaap a neihte TOUPA mahmah in hon piakna di’n thum(khawm)na k’on nei uh tuh, e-khai, Toupa’ ma-a gimnamtui banga a zaamtouh ngei ka lamen ahi. Toupa’n minthanna ngahta hen!

23/7: Seppatni, (Engineering Paper) exam pe di candidate omlou ahihman in, awl hiuhiau ing. Nipini suun biakinn kaitawp a hong kigen (introduce), a ofis pha di’a honzawn, Nu Jenny Dimlianching ofis ah va vaaklut ing. Nu Ching kaina ahihleh ka tunna Circuit House sak zek mahmah ahi a, Vijaya Bank a Manager ahi. [Nu Jenny Ching, mi pawlkhatte theihsiam di’n, Delhi a om Pa D Kamkhanmang pianpih sanggam, a’ unu ahi]. Tunna a paikiik, sun-an ne. Sunnung lam in Tg Ginlalmuan (ex-Delhiite), tulel a SSPP JHQ Aizawl president, hongvaak a thukhawtang kikum in dur mahmah ung. Ni tumkuan in Toupa kiang’h kipahthu genna nei, huai zawh, Muan in hon paisan hi.

Nitak (23/7, 7PM): Vanapa Hall a Chialpi kipan khat om hive’n, a hall sung zong muhnophuai... ci’n vatel ing. Nitak-an nek hun tawh hong kiphubuai thei di’a alat man in program beisiang ma in ka kihemkhia hi. An ne khin, sawt kihallou in Upa V. Hangkholun (Secretary, EBCC Aizawl) leh BYF a Vice-chairman (Mr Manga Tangpua) te hong tailut ua, ka tunna pindan ah houlimna nuam leh thum(khawm)na hun manphatak zangthei ung. Praise the Lord!

24/7 (Sepnawnni): Zingkhua hongvaak a, khiaklah Zolei/ Zo khawpi nutsiat ni diing, zing ni in hon suahpih ahitamai hi. Lungleng kisa a circuit house kongtual a ka kiheiveel lai in, Honda Activa a tuang papi khat hong tailut a, ka kiang ah hongkhawl hi. Pindan 4na a luttou in houlimna hun ka zang ua, field duty lai hong lambaang geigei ahihleh, vanlengphual zuan a kipatkhiak hun (12.00 noon) tan hon tutpih diing lemtanglou hi. Huci’n ki-aam tak kawm in thum(khawm)na hun ka zang ua, tua khit in U Muang (Upa T Khamthianmuang) in a gari-neu in hon taikhiaksan vauvau hi.

Sunnunglam (24/7, Sepnawnni): Lengpui Airport latest check-in 1315 hours ahi. Driver hisapdan a thilte paiveklou ahikha diing, airport ka tun un 1400 hours (departure time) a gingta! Trolley mat khat masak pen a vante guang zutzut, nawk a nawkphei leh counter a tupa’n “I va-trai ve, ka pu...” ci kawm in boarding pass hon issue a, hulaak dan ahong tuam zek hi. Vanleng a tuang diing te kingakkhawmna pindan ah, ex-Delhiite khat (lawmnu Chingthanmawi @ Mawmawi Kullai) ka mu. Mawmawi ahihleh MCS (Mizoram Civil Service) gelhcing, 2008 kum apan state solkar nuai Planning Board (State Planning & Programme Implementation Department) a Research Officer seemtou ahi. Advocate Thanglianmang Guite tawh nupa suakzou, a innkuan un Aizawl ah khawsa uh. Tutung DELHI zin a sawmna ziak uh akidot cia’n, Mawmawi in, “Ka pupa (a tutpih), Elder Lalchhuanawma Hrahsel, Dy. Director, State Planning Board tawh, DONER a U Khenpi {Dr Kam Khenthang Guite, Director (Finance) ma-a Mizoram state solkar project list presentation bawl di’a hongkuan dek hitel ve ung aw, U Sum...” ci in hondawnga, a’ pupa lak ah a’ U Sum mellahna neizui hi.

Vanleng (AI-713) sung ah: Tutna, amalam apan simtouh vual 4na (veilam pang) tukverh bul piak in ka om. Ka tut nung sawtlou in Mizoram Hon’ble C.M. Pu Hawla leh a ji honglut tei ua, tutna vual masa (taklam pang) ah a tu ngiah uhi. Vanleng a tuang mi dangdangte’ mit a la-thou mai uh. Netaji Subhash Chandra Bose airport, Kolkata ka tun un Pu Hawla te nupa, ‘VIP Lounge’ ah a kizuilut titit uh. Kou ahihleh, Kolkata-Delhi flight - 1700 hours lam a leng di - ngaak in mivantaang te tutkhawlna ah Mawmawi leh Upa Lalchhuanawma tawh thu tuamtuam gen in ka houlim uhi – Pu Hawla te nupa lamlam phawkpha talou in. Ebenezer!

AIZAWL khawpi, khatvei zinna hun a lungkhoih leh ciamteh khak khenkhatte:-

$$ U Hauno te inn pha, paikiik dek in U Hau in kawlphe-meivak hatte khat in a’ innkhanglam (taw-lam) pek uh salsuk kawm in, “En aw, Sum, huai-a-mun apan eive Aizawl te’n ka tuinek uh a hong ki-pump touh” ci in honhilh hi. Ke’n, “Aw haw, ahimaw? Huci banga Aizawlte’n tui (touluan) ngah thei ahihleh, LAMKA adi’n tuinek kiningcing ngahna diing ahaksa law kei di, U Hau. Nang zong Engineer na hi, Lamka khawpi a teengte’ tui muhna noptuamna diing hon-gel vengveng in...” ci se ing.

$$ Centre Supervisor Upa J.H. Biakmawia tawh kimuh masak ni, ka cibai leh, a phel (spring) khauh mahmah hi. “Ex-serviceman na hi hiam, Pu?” ka cih leh, “Ka hithei thou!” ci’n hondawng. K’ong houlim ciang un, Mizo singnuaimi kipatcil lai a na lut, Chitagong Hill Tracts a training la masa batch a pang kha dan ahi. A nu-le-pa leh sungkuanpihte’ thu ngaikhia a singnuaimi apan hong kitawp, tua nung a Short Service Commission (SSC) tungtawna Indian Army Officer khat hih na sawm tentan ahihdan bang hon-gen a, huan, SSC a atumlouh Lal remruat hi-ngei di’n pom kician hi – “Indian army officer na lut kha hitale’ng, singnuaimite sulnung theipa, a luhkhiakna a hon matawng sak ngei diing ua, tuhun a dam nawnlou maithei ka hi. Hehpihtu Pasian, vaihawm siam ka sa...” ci’n a biak leh limbelh TOUPA Pasian tung ah Pu Biakmawia lungkim mahmah.

$$ Kawlkulh khawsuak, Upa J.H. Biakmawia in siamsinna tawh kisai GMHSS Journal saite dotna a dawnna khat ah, “Class-VIII ka pass hnun hian regular in ka zir thei ta lova, private in tuma zirtirna dawng pha lovin M.A. thleng ka zirta a, ka pass ve thin,” ci. Class VIII apan B.Ed. regular a luttou/ jump cih theih hidan eive. Awards/ Honours a saanté lak-ah National Award for Teacher (1992), Bold Award, Broad Outlook Learner Teacher Award Organised by Air India (2004), Best Principal Performance Award HEDA, New Delhi (2012) te tel a, MIZO WHO’S WHO ah 1994, 2000 & 2005 kum te in dawk ban hi.

“Principal seat nuse dek geigei, lungleng taka ka omlai-a nang exam duty a nang n’ong kuan khak, Pasian honsawl na hi” ci’n kipak petmah a, Pu Biakmawia in Paite Laisiangthoubu tukzet a sah “MIZORAM SPORTS CHANCHIN (2^ndEdition, 2010)” by Zoliana Royte, Director, Sports & Youth Services, Govt. of Mizoram itna thilpiak in amah leh a seppih staff-te min in copy 1 honpia hi. Bekthamlou in, Mizo Hnam Dan (Mizo Customary Law, 2006 edition) bu nih leh a principal hihna Government “GMHSS Journal” issue nih zong honpe lai. Tua khempeuh i TOUPA vang ahi.

$$ Mizoram a i unaute a kamsiam (polite) ua, a nunneem lai ua, a hahdam. Van zuakte tawh thil kidawp, kidolh-tuah vel le anuam. Laisiangthou thu, Manipur lam a a’ unaute uh sanga zuizaw or awizaw eive ua, cih phet in a om. Aizawl traffic point/ red-light zone a ki-etsaal, midang ngawh bawl leh kuul manglou a ‘tittit’ kimekkhum zoizoi cih te a-omlouh mahmah tawldam in khiaklahhuai le ka sa. Noise& air pollution level saang hetlou diing dan eive, cih in a om. Sisan khang (BP) nei mite adiing diak in houh damtheihhuai tungtuan abang.

$$ A nopna lam kia a bei, pumdim bel ahisam kei. A lamdang khat ahihleh, tep-le-muam (laizial, tuibuk, kuva, khaini & akaihzatamte) kikhaamna omlou bang khopa zalentak a zuak leh suakta tak ciat a ahih nainai pen uh ahi. Pipu tawndan kembit a kingai hiam, “Kam a lut in mi ahihnin kei, ek thakna a pawt ahihziak in” cih meilet a nei tuh ahimaitheina ua, mihing damtheihna supoi/ poisak thei ‘side-effect nei’ theiciang tep-le-muam, leh nek-le-dawn kha tuh hon olbawl thei deuh le uh aw, cih vungvung in a om. Damtheihna tuh hauhsakna ahisi a. Selah. God bless Zoram!

$$ Ka U Zenman (w/o T Khupzalang) kianga, “Unaute ahici neem ua, akizahtak tuah dialdial uh, aziak-azar/ kipatna zaw om diing hiveh aw maw,” ka cih leh ama’n, “Sum, na ci a, skul kai theipante a sinsakte uh mahmah le a thu hoihthei lua eingal ve” honci hi. Ka U-te’n gil a gah goutan ta 8 (giat) aneihte uh laka khat kiang a, class I (one) a phaktouh ma ua skul a azil (byheart) uh khat gelhkhe di’a a kinget leh hon gelhkhe samsam hi, thugelh khupna di’n zang ni. Simtute, TOUPA thupha maw!

“Aw ka nu aw ka pa, Naupang te-tak ka ni. I kut ah i kut ah ngei hian ka nakin hun chu a innghat e, eng ang ni nge ka la nih ve ang aw. I mi enkawldan in a zir ang chu, aw ka nu aw ka pa, i tawngkam hman fimkhur teh, nang lo chu entawn tur reng ka neihloh hi. Mite chung a i rilru put dante pawh mite chunga ka rilru putdan ani dawn si...”

@SNLK/02.10.2012