“Aw Zoram nuam suihlung phang lo la,
Thang leh thar te’n pheilai vawr in;
Lalpa chakna ring in kan beizel dawn,
Hmelhma doral.” (Daduhi)
October 02, 2012 ahong tun in India Nam Pa hihna title na tang ‘Mohandas Karamchand Gandhi (Oct 2, 1969 - Jan 30, 1948) tungtang nasapi’n tanchinbu tuamtuam leh TV channel/ internet sites te ah muhtheih in hong om hi. Times of India (Student Edition), 1st Oct 2012 issue “Little Known facts about Gandhi” cih nuai ah point 5 kigelh a, point masa hiai ahi: Mahatma Gandhi always used to keep a clock with him. He was very particular about timings. His time management was so good that many called him a manager. His every movement was based on these skills. A disciplined and organized person, he used to time each and every move of his precision. Check..
Pu M. K. Gandhi pianna Gujarat state a om, Porbandar khua ahi. Satyagraha leh kiphinna dangte a’ patkhiakna tak ahihleh Ahmedabad (Gujarat khawpi) ana hi a, tua Ahmedabad khua ah 1961 kum in Indian Institute of Management (IIM-A) phuhkhiak na hita hi. Tulel in India gambup a IIM Centre 13 (sawm-le-thum) omte lak ah, IIM-A pen ahoihkhatna hidanin kiciamteh. Hiai IIM-A apan MBA zoukhia theikhak khat Pu V Dongzathang, IRS’ tapa Mr Khaisuan hi - 1997 kum in. Toupa Pasian leh sepna-a heutute deihsakna tang in Ahmedabad ah 3vei official duty in pai khata ing. Pai masakna pen UPSC inntekna a kisai workshop (consultation workshop) poimawhtak hi a, aban a 2vei paina/ zinna dangte ahihleh UPSC vaisai all India competitive examination tawh kisai, Ahmedabad centre nuai-a arrangement & conduct of examination ‘inspection bawl in’ ahi. Waka!
UPSC in service tuamtuam a post omte len diing seemtu, adiak in civil services a diing laakna tawh kisai “recruitment process”, akallak teng in ettkiikna nei toutou hi. UPSC/ Commission in Expert Committee, akal laklak a dinkhia in, tua Committee in tuhun leh mailam hun bangtanhiam et in, hiai bang huai bang te puahphat tuak/ khek tuak e... acihte pansan a examination scheme tuamtuamte khek leh puahphat a hong om tou zel dan ahi. Kothari Committee recommendation pom & sepkhiak dungzui a Civil Services Examination (CSE), 1979 apan ‘Preliminary Examination’ introduce a hong om (CSP application khia mi tam theilua, a khitsiangna masa di’a honpat uh), anung 1993 kum in, Satish Chandra Committee recommendation pansan in khatvei puahphat thak in om. Tua hun ah, Civil Services (Main) Examination a Essay paper behlap ahih banah Interview/ Personality Test mark zong (250 apan 300 in) khansak ahi. A tunga i gente, phualpi solkar (h.t. DOP&T) lemsakpihna omkhit a sepkhiak or zuih hipan zel hi.
CSE scheme puahphatna nanung neih hun apan simtouh kum 15 bang pailiamta, hiai hun sungin thil kikhek tampi om... Tua man in, Prof. S. K. Khanna [ex-Vice Chairman, UGC] makaih a CSE paidan review bawl leh hoihsak bang recommend bawl di’n Expert Committee, UPSC in September 11, 2009 in phuan leuleu hi. Prof. S. K. Khanna Committee recommendation paisuak, UPSC leh phualpi solkar in lemsakpihna apiak nunga 2011 CSE apan kizuita tuh, CS (Prelim) Examination a optional subject omte hihbei keuhkeuh leh, CS(P) Examination pen “Paper-I leh Paper-II” suahsak ahi, i ci thei.
Prof. S. K. Khanna Committee in Report, UPSC a a submit ni June 26, 2010 tan in meeting 22vei nei ua, mi poimawh (eminent & experienced persons) tuamtuam tawh houlimna 6vei leh consultation workshop 4vei - New Delhi, 25/2/2010; Ahmedabad 4/3/2010; Bengaluru, 13/3/2010; leh Guwahati, 20/3/2010 - nei ziizii uhi. Delhi paw-lam a workshop 3vei neih a om lak ah IIM-Ahmedabad leh IIT-Guwahati te ah matai/ tuanvai pawl a pangkha thei in Toupa’n honbawl. Ahmedabad a taam sung in heutute’n Gandhi Ashram bang honphakpih sawnsawn ua hampha kisa in Toupa min ka phat hi. [Ahmedabad pai patna thu hong sauna e le! Article gelhtu, vanleng a’ tuan patna ahihziak leh IIM-A a suaktataka VIP treatment atan theihna di’a UPSC paidan genlat zek kulsakna a-om a ahi di. Maw?].
Ahmedabad painawnna, nihveina ahihleh Civil Services (Main) Examination, 2011 inspection duty in ahi - Nov 21-22 (ni nih sung). Ahmedabad Centre apan CS(P) Exam, 2011 gelhching mi 248 lak ah CS(M) compulsory subject te exam pia mi 228 pha ua, 21/11 - Agriculture and Animal Husbandry & Veterinary Science subject exam pia candidate 1 (khat), 22/11 – Botany paper pia mi 2 (nih) bek-bek; Centre Supervisor & Invigilator te banah Inspection bawl a vapaipa naa atawm, tawldam tak ahi.
Civil Services (Prelim) Exam, 2012 May 20 a kinei ah UPSC a seppih Ms. Manoj Kumar, Joint Secretary leh Mr. Manoj Srivastava, Under Secretary toh Inspection duty di’n Ahmedabad ah sawl in ka om uhi. State Guest House (Annexe), Nr Dafnala, Shahibaug, Ahmedabad ah honnga ua, Examination venue/ sub-centre 56 lak ah, k’ong kihawm ciang un, venue 19 ka tangkha hi. Tua mun 19te ah, CSP Paper-I exam pia (registered candidates 17,008 lak ah), zinglam in mi 7345 leh, nitaklam in 7188 apha uhi.
Hiai (Ahmedabad 3vei pai) hun in eilam mi innkuan 1, Upa (Dr.) S. Lianzathang Ngaihte’ tate hiai khawpi ah om uhi cih Hyderabad lam a lawi upate tungtawn in thei ing. Pa S Lianmuansang Ngaihte (ex-Delhite) tawh k’ong kihou khak ciang un, ama’n zong tha ngah (kipak) in, huci’n, a car in hongpii ngaingai a a’ inn uah nitak khat hun nuamtak zangkhawm ung. Mr. Muansang ahihleh B.E. a zawhkhiak nung a Indian Oil Corporation Ltd. (IOCL) a lut, Marketting Officer seem, ji (Nu Sanneem) leh tapa (Np. Thangvanglian) tawh Ahmedabad a khawsa lel ahi. A khua pen galmuang in khangtou mahmah hi. Hiai tungtang, December 2008 apan Ahmedabad a na khawsa, Mr. Muansang in hici’n gen:
(i) Khawpi tuamtuam, h. t. Delhi, Hyderabad, Kolkata, etc. ah ka na om khata a, Ahmedabad banga mun galmuang, thawveng leh mei leh tui kiningcing ka tuak kha naikei.
(ii) Ahmedabad zaw nam khat cihtheih - milip, Gujarati in 80-90% luah zou dia gintak - teengkhawm le ahi ua ahi.
(iii) Mei mit, tui kaailou...cihte om ngei vetlou, state-wise khantouhna & masawn dan a en di hita le’ng, Gujarat pen a khangtou nasapen state hikha mawhlou diing hi.
(iv) Industrialist atam ua, gamsung khanna di’n aphatuam uh. Mi’n sum nei sim ciat uncin, mi neihsa & lawhsuahsa peuh buaipihlou uh. Eilam bel, sum neilou, mi neihsa buaipih, demand tam. Tua ziak leh, i gam galmuan louh ziak a sum neisunte’n le aneihte uh phoukhe ngamlou, gamsung khanna di’a zat diing bangtaka zang khalou uh hidan in ka mu.
(v) Ahmedabad khawpi galmuang petmah ahi cih a kilatna khat tuh, numei khawng (amau kia-a) zan dak 11, dak 12 tan bang a-le Honda Activa khaw tai veuveu mai uh [Hiai laigelhpa’ lungsim khoih khat ahihleh Ahmedabad a Police sap lianpen, Commissioner of Police’ ofis lutna gate bul a police duty a muhlouh ahi!]. Tua bang muanna leh bitna cikcia’n, LAMKA ah....?
*********
Aizawl paina. Indian Forest Service Examination, 2012 July 14-23 sung neih a om, a zawhna lam (21-23/7/2012) inspection bawl di’a AIZAWL Centre piak a k’ong om cia’n kipahsim thremthram in a om hi. July 20 Indian Airlines (AI-401 & 711) a tuang, via Kolkata, Lengpui Airport bawh; Deptt of Pers & Admn Reforms, Govt. of Mizoram te honsawl driver Mr Eddie Sailo in hon na dawn, nuam himai!
VIP Room No. 04, Circuit House, Khatla Veng, Aizawl ah hon kingasak uhi. Aizawl tung, khawmuizul in Upa Khamkhokam Guite, ofis kaitawp hongbaang thetthet a, kipah nak omlua! Houlimna hun nuamtak banah, i nam i gam adi’a thum(khawm)na hun ka zat theih un tha hon-guan mahmah. Sing gamlei a zin hilou, ka gam ka lei (Zogam/ Zoram) mahmah a UPSC palai, IFS Examination inspection bawl di’a sawl a om... cih ka kingaihsut cia’n kipahna alian a, a hahdam banah etna lam peuh maitaina ngen in hon vaidawn abang hi.