Kigen sia maw, Thudik  ahimah gen - II~ Thangkhanlal Ngaihte

I houlimna pailel uah I lunglut chiat uh chih feedback te apan a theihtheih a, akipah huai. Abiik in Pu Lallawmpuia Ngaihte in detail deuh in hon kupbeh a, angaihdan tamtak ka pompih a, hilele ka pompih theih chiahlouh le a om. Sycophancy toh kisai gen hoih kasa a, huaichiah I lohchinna tehna uh time-period tomlua, instant gratification kia buaipih, akuitung di thil ngaihsak manlou chihle ka pompih. Ka pompih zoh chiahlouh chile, genbeh tuak kasak te point nih anuai ah kon kupbeh di. Huaizou in, feedback dangte apan ka ngaihdan tamlou le kon genbeh lai di.

Amasa in, example a ilaak Lamka a petrol pump a thautui kidaih loudeuh gige, a black a kizuak zeizoi, banah pump ate le adulterated chih thutak ana hitaleh, bangloh di chihtoh kisai. Kei point masa bel hiai dinmun hi normal, ahidi mah hilou ahi, chih ahi. Pu Lawmpuia in a problem a complicate dan hon sui a, complicate lua ahi, mikhat tung a siattut mawk theihlouh ahi, chihtan gen hi. Ok, ahihleh va mohsak tuamluat di omkei, adulterated ahihtaak lele ahichih mai ngai eive, chidi idi uam leh?

No. petrol, gas chihkhawng business naran ahikei a, pai didan standard leh rule hoihtak nei a kisai ahi. Gamsung asiatluat ziak in refinery apan pump tan hongtun na di step teng a akisai khakpih teng in suniin tou ahi kha ding. Hilele, adulterated fuel pump a kizuak chihbel justify theihlouh hi. A check tudi a om a, a check di uh ahi. Dan zuilou a, gari engine siatna di hial adulterated fuel kizuak ahihleh dan dungzui a action a om di mah ahi. Pump khaksak ngai ahihleh akhak photmai kei di ua. A pump neite mohna hilou ahihleh adikna uh agen tei di ua, thil omdan tak hong dawk dia, huai apan in bawldik didan hong omsam ding hi. Thil diklou om ahih a, bawldik tuaksa ihih le chu, we have to start somewhere, right?

Anihna ah, poitics leh thil dangdang a na septheih na di’n laisiam kia hunlou chih ka pom mahmah a, I politician tele a laisiam louh, contractor apan a honglut ahih ziak ua simmoh huai le ichi hetkei . I gen bel a record uh ihon etchia, legislator ahih dungzui ua a nasep di masa uh Dan bawlna lam neglect a om gige pen a background uleh huaiziak mah a athu lam a lunglut louhziak uh adiam, chi ihi. Development works le poimoh lawtel, asai luat di uh, hilele, hiaite dan pansan a hong ki bawlkhia hi tangpi hi.

Lawmpuia in hiai toh kisai a system in atheih dan a laisiam hilou (college drop-out) sang pipi tungte ahon ban gen a, hilele huaite ei context, tua igen politics toh kisai hilhchet na di’n good example ahi uhia, banga a relevance uh chih kana chiang chiahkei. A example lakte business enterpreneur, America lamte ngen ahi uh. Education system, grading system, economic structure leh business environment ah America leh India kibang lou law mahmah hi. Americans celebrate college drop-outs while Indians celebrate college toppers (IIM/IIT apan tekhawng), kichi diksim hi. Hiai kha I gen bang in business lamtoh kisai te ahi. Politician tetoh kisai la? Atom in gen le, exception chu thilteng a a om dia, hilele tulai khovel vai sai di’n zaw laisiam mah adeih huai. India ah hi’n America hitaleh, adiktak in zaw, gamsung a thunei tatak te atamzaw tham laisiam, dansiam te ngen mah ahi uh.

Hiaite banah feedback dang apan in comment nop khenkhat kanei hi. Khatna ah, a mipi mahmah in zir lou, bat ditna di, laptop man di khawng MLA/MDC tekiang vangen maimah theilai, chih I gensek uh. Ngaihdan khat a, na sepkhiak sang a asum mahmah hawm hawm uh ahih chiang a, khenkhat te’n ngettheih mah ana sa leng kihi khading hi. Asau a sut di hile bel a mipi mahmah in I zirhlouh ziak ua tua I moh saksak temah heutu dinmun hongtung uh hilua hi.

Tumlam gam, democracy te toh India akibat hetlouh nakhat ahihleh independence muh toh kiton – gam jawng a jawng, mipi atam zawtham te’n laisim/gelh theilou – hun apan in universal adult franchise ana ki introduce ngal hi. Democracy ana sui a laisiam te’n huai didan in ngaihtuah ngeilou uhi. Gam changkang, nek-le-dawn kia a buai nawnlou mite lak a zatdia a hisap uh ahi, democracy. Bangtan hiam laisiamna neite leh property neite kia, banah pasal te kia in vote ana nei uhi. Tumlam gamte’n a mi tangpi khosa thei, hausa vek a omchiang un full democracy zangpan tangpi uhi. Britain (UK) ah 1948, India independent zoh in, plural voting kila khepan a, universal adult franchise kizang pan hi. (Plural voting ichihchia vote valua kikim lou, alaisiam deuh te vote laisiam loute vote sang a manpha zaw chihna ahi).

India ah bel ahuchi pi a mipi te vote theihna piakvek ahih chiang un buaina tampi ommah hi. Mipi te empower na malak in heutute’n ut-ut, deihdan dan in kai thei zaw uhi. Huaiziak in mihing in I pianpih tanauna, beh-le-phung, sahkhua, chihte in ina kizol ua, a public good adia na sepna lam genkhak hilou sek hi. Hilele, India te le tuchiang ah nidang sang a hausa zawta; lai le siam zaw tham ta. Ahong huchih chia eilak tanpha a, politics I etdan hong tuam, civic citizenship concept honki theisiam, heutute’ honna khem haidan te ki theisuah, change ki demand, himai ahi. Democratic poitics pai didan tak manpha dek panta chihna ahi. Tulel a I buaina uh bel amipi lak a (at least some of the people) khanlohna ompen politician lamte’n manpha deklou uh, amau khanglou deklou uh, angei ngei dan mah a politics sai sawm uh, a ngeingei mah hihsak sawm uh, mipi’n huai hun kisa nawnlou hi’n kamu. Huaiziak in mimal thil, laptop man di khawng ava ngen a omnawn chiang in heutute’n hiaidan in ana dawng le uh kachi: ‘ka nasep, non telching naziak uh, mipi nautang adia hoih (public good) sepkhiak ahi a, mimal adia hichi mawk a piakdi koimah a fund om lou ahi, public fund te kei a hi thahah lou, keile ka loh hiaizah a khosa kahi. Public toh kisai poimoh nasak omleh bel sepkhiak didan I ngaihtuah khawm di. Huan, mizawng te khualna a mimal kitun dingna di fund bangle a omdia, huaite ngettheih ahi. Hilele, ahong kipiak naziak adia zatdi ahi huaite.’ Public fund te ahi di bang in public welfare, aziak didan mah in zang phot le uh election ahle aching lou tuan kei di uh.

Nihna ah, laigelh hoih isak louhte suahsak louh di, newspaper asuahna te lak nawnlouh di, chihdan deuh ngaihdan le paihkhiak di ahi. I heutute’ ngaihdan te itheih di ahi, ahi bangbang. Pu Kamsuanlun in hon genkhia a, a ngaihdan leh paidan ithei ta a, kipah huai lawtel. Adangte apan le zaknop huai lua. Newspaper te’n le public affair toh kisai ahihnak leh opinion tuamtuam asuah di uh. I newspaper te subscriber fee a ki toudelh ahi tham ua, hilele, hiaidan a blackmail sawm dan a I om om di uh hinawn lou ahi. Huanah, tulai bang social media kha mipi sou doptheihna hoihpen asuakta a, huaia kigen te pansan a news story bawlbawl theih lawtel ahi, chih bangle theihtuak ahi, editor te’n. Kei bang inle hon deihsak tu khenkhat apan pilvan ngai ahihdan, kei ki diksak geugau mawk lengle tulai situation a kuahiam lam gum dan a hon en di om thou ahi, chih kaza tham hi. Ahihleh, bangloh tuan di? Eimah le ki et di, opinion tuamtuam le balance di, huchia ngaihtuahna siangthou tak toh I gelhte ana kawilak om lebel loh didan omlou; awl in hon theisiam thouna unteh, chih ka ngaihdan ahi.

Hiai toh kiton mah in, bang a na lohtak sawm, laulou maw? Chihle kiza. Tutan a ka thilgelh te ziak in vauna katuak naikei. Kuan hon vau mawk di’n le ka gingta kei, vested interest nei kahihlouh ziak in. Hilele, facebook a thu post ziak khawng a inlam kivau, kizong, chih khawng ana om tatak mah dan zaw abang. Hiai bang a gang/mafia dan pian a nasem heutu a om uleh amau interest mahmah a atawp san uh hoih ding hi. Public figure a hi ua, a lau hetlou khat sukha le uh, a vauna, na phone number, a detail teng public forum mah ah hon phou khetou tou mawkleh amau mipi mai a dingding te adia hong hoih hetlou zaw di ahi.

Thumna ah, I heutute hoihna le gensam di, kigen siatsiat ziaka ki suk thadah vektheih chih ka pom mahmah. Aphat tuak te phatluat di, ahoihlou te ahoih louhdan gen metmet d, chih ahi. Keimah inle 2012 Zomi Namni Seminar JNU a akineih lai in lectern apan in I representative phathuai kasakte leh kasak naziak kana gensaam hi. Gen di theite’n genluat di, hoih hia hoihlou chihle buukkak a, analysis le kisin di. Mi’n honphat chia nuamsa lou ki omlou tatak hi. Hilele, elected leaders/bureaucrats te kha voluntary organization YPA chihte a heutute toh tehkak theih hetlouh ahi uh. Public fund zang a nasem ahihziak un a nasep teng uh etzui di mah, critique det di mah ahi. Namdang te kathei kei a, hilele ei mite’n hiaibang thu te gena, houlim, kiseel khiukheu thei a, heutute bang inle ana ngai poimoh, chihpen democracy deepening na, progress khat ahi. Huchi theilou a, kituah louhchia kithah pahpah chiingte enhuai zenzen lou. Zanzek in RBI a I officer te uh khat toh ka kihou ua, tax a khakhat a Rs. 20,000.00 valval khawng pia a, huaiziak mah a public funds zatdan le awlmoh lou theilou ahih dan hon gen a, dik kasa.

Lina ah, mundang a nasem a khosa tekha a mun a thil omdan theipha lou, agaal apan observer maimai, thulak huailou chihdan a thuvai pawl I om nawn a, sapte’n too-clever-by-half achihte lawi thuveek hi’n kakoih hi. Kei mimal ah inlam a omtheih ka lunggulh a, huaiziak a kum hiaitan nung a exam omliai teng pedia hong kikuan tou gige ahi. Sum a bel lei lou di, utlou himhim; Pathian hehpihna ziak a merit a sepdi le kimu saam thou. Huan, Lamka politics natheih nadia Lamka a nateen det ngai lou hi. Agal etdeuh a thil kimu chiangzaw ahi. Lamka khua namuh hoih nop leh Mission Compound taang apan ensuk lechin Lamka kholai Tedim Road a pan sang in chiangzaw ding hi. Non resident Zomi (chihial ni) te manphatna appreciate theilou tebel abuaihuai hipah phot hi. Alian zaw ah enle, India (gamdang tele hithou) non-resident Indian te manphat dan a phawk suah ua (India’ policy khenkhat, nuclear, Pakistan, US, toh kisai critique bawl naak penpen te NRI te khawng ahi uh), tu in defence, US relation, Middle east relation, etc. toh kisai policy te ah NRI te, citizenship gam dang a nei People of Indian Origin (PIO) te bangle, thulaak in thunei mahmah ta uhi. Huaidan mah in, Israel te foreign policy ah America mi Juda te bang thulut petmah, thunei pen le hiphial uhi. Israel heutute kuamah in ‘nou gal dou ngamlou a taimangte hon ki thulak kei’ achihlam uh kiza lou hi. A neuzaw, ethnic politics ah enlele, Naga te hiaitan ma asawn na uh sepaih thahat ziak hia, diplomacy siam ziak? Meitei te bangle akhuak tatak uh Imphal a om khollou maithei ahi.

Houlimna paitou zel ah, sim tute’n le kuahiam khat in ‘Dorca pawl a meeting chiang ua agen nanung nung genteng hoihsa vekzel uh ahi’ chihdan hilou a, en dedet leh eituah thilte mahle kumthei dia kisak di ahi. Etsakna di’n, police Sub Inspector (SI) written a ching, sum piak ngai, piak di neilou a chinglou chihte bang in kigolh guk / neekguk a process hon gen le uchin navak huai di. Kua khawng hongkuan a, demand bang channel zang a hong ki bawl ahia? Nurse lakna di a interview ma a select a om diteng theihsa a om chih bang a omleh alung kimlou lamte’n adik louhdan I genkhiak zial zial di I mohpuak ahi. Kaam/sanction adi’n bribe demand natuak ngei hia? Gen khia in, akhonung chia hong phatuam di ahi. Hiaiteng khawng gennop ziak a minkheem nazat nop leh zang aw, a purpose adik nak leh poi zenzen lou ahi. Hilele, migen zaksawn a source theihlouh, chih nemnum te bel atakna chetna omkeileh mipi lungsim a cynism tungsak theizaw ahihziak in hoihlou hi.

Atawpna in, hiai a I gen khawm tekhawng ziak in bel kikhenna, kibawl hoihna om mawk samlou ding hi. Heutu I gen gen te’n le ana sim di un gingta kholkhang; a mipi mah hi I audience, awareness mah itup pen hilai. Huaiziak mah hilou hia Open Letter khawng newspaper a isuak sek uh?

Banghiam sepsuah taktak na ding in institution apoimoh a, eilak ah huaidan campaign theiding, muanhuai institution omlam kithei lou hi. Etsakna di’n, Pu CT Lian in public issue a initiative alakte hoih kasa a, ka support mahmah hi. Hilele, akuitung tatak nadi’n mimal hilou a, paidan gina tak nei institution pansan a thil hon sai uh ngaidi’n ka gingta tinten hi. I na gentaak AAP te bang party chiah hi nailou, social movement dan ahihlai ziak un, hiailam take-up dia forum/institution hoihtak ahi uh. MLA/MP achih pah ma un hiai public interest issue te honsai in initiative honla masa le uh hun saupi adi’n a maban uh le ahoihzaw dia aw, chih ka ngaihdan ahi. Eigam toh Delhi atehkaak theihlouh dan, insurgency factor, etc. te kathei a, ahaksat didan le ka thei a, hilele huaiteng gen a gentawp zel di hun bel hi nawnlou bang hi, tulai a social awakening omdan et in. Ka chihsa bangin, we have to start somewhere, right??