Kum giat val khawng Delhi a akizom a khawsa aki hita a, huai hunsung hun tamtak pianna gam, Zogam, leh khankhiakna singtang a khuate khawng mah ngaihsut na in kizang hi. I gamlat dedeuh chiang leh vapha thei nawn hetlou a aki omchiang in, I ngaihtha suak dedeuh chih omthei mawk hi. Zogam ngai ichih chiang in akiheh nepna di’n (adiktak achu hon hehnep malak a hon ngaisak semsem) Zogam ngaihna late mah kingai ngai mai hi. Zogam ngaihla ihon chihnawn chiang alah V. Paukhansiam’ phuah leh sakte mah, eigam mahmah toh kisai ahihziak hia, ki ngaina diak zel hi.

Kei mimal ah genleng, alate ka ngaihnat kia hilou in, hun bangtan hiam apan ami, Usiampu, mahmah bangle ngaihna, houpih nopna kanei lian mahmah hi. Nikum lamdeuh a hong damlouh luat thute ana kizak chiang bang in ommun ah ana ki khase thei phialphial hi. Nikum deuh a ZRO sung a buaina ziak a ihih vengvung lai bang unle, kuadang sangmah in Usiam toh bang ki omleh, amah bang in bang gen di anei dia aw, chih kia kana ngaihsun a, inlam painawn chikchik hoihtak a houlim pihdi chi’n note te bawl in, amah bang phone a houpih thethup in keimah khom in kana buai mahmah hi.

Hiai ka lunggulh gige amah toh kihou lim theihna hun June 25, 2013 amu in, dak kal nih sung vel S.A. Road a a Inn luahna uah kava houlim uhi. Damlou densim ahi a, hilele alung lutna, alungsim bei deklou ahih man in damdawi regular a treatment niteng a abawlzel hun hongtung a, ka kikhen dek bang unchu amah le ka kimuh tuung sang ua halh zawtham in kathei mai hi. Kuadang sang a Usiampu hichitel a ka lunggulh naziak ahih leh amah kaan a Zogam ana vei, ahun, atha leh lungsim leh mittui  huaidi mah a ana seng tam, banah Zogam toh kisai laa hon chawmtu di hiaizah tel ana phuak a ana sakhia, Zomi nationalist-poet omlou hi’n kathei.  ‘Tutan pha zi leh tate hilou a, a minam leh I gam kia kah pih thei mawk ing a, kenle  lamdang sa kahi’ achi a, dik mahmah di’n kagingta.

Usiampu midang abat louhna khat a katheih chu lasiam, miteng theih himah leh Minister/MLA tekhawng zui a adian lam kathei ngei hetkei hi. Adiang te ava gensiat siat lam le kathei tuankei. Ka genleh ahon dawnna: laisiam keileng le lawm-le-vual lak a akam teipawl ana kihi sam inchin, eimah mimal punna di zong leng zaw kimu samkha mah inte. Hilele, mawltawk lengle dinkip nakhat kinei inchin, eimah lungsim hon siamlouh tan thil vahih le ki zephawk a, gam ngaihla khawng phuak in I sasa ngam di hia, chih ahi. Lamdang sa I omdiam, I gamsung a miteng theih, album hiaizah bawl ban a inteng a a aw kiza suak chihtheih hihial ta mahleh midang inn, inluah man pia in tutan khosa lai hi. A itluat, akah pihpih Zogam a aman amah a achih di mun neilou daih.

Ahia, aman huai khawng buaipih luat in neihchi hetlou hi. ‘I gam mah mah nuamsa in paal henla, tui khawng, lampi khawng, electric khawng hoih henla, imi-isa te hausa in inveng tekhawng in car khawng hon nei in, nungak te khawng in gari khawng hek ziahziah maile uh, eibel I zawn dandan a ana zawng di hang a, hilele nuam sa law di, kuamah haza mahmah lou di kihi hia…ahi alah heutu gam puahnuam chi’n hong kipan ua, hiaite-huaite hih di honchi ua, ina gingta lua a, election chiang bang in party support  tebang sih ngam zen in ina gum a, lah anungzek in hong kina ua, mi ginom tak a ina theih tekhawng le anung zek a adeih uh amuhlouh chiang ua nam support te bang honkalh maimah ua, hong kidelh tuah maimah ua, ahong huchih det chiang ua, ei anuai nungpen a ginom tak a ana omte adia hong tawlhuai lawgawp hita…, louma kikhat, selung tuak theilou chihchu pom haksa eivoi; huchia anam a bangmah tan tung tuanlou di ihih uleh kinak nak louh a MLA khawng abeh beh a hawm mai di, tutung hiai behte, anawnchiah huaite, chih mai dia hoih eivoi’. Nam-le-gam adia nasep, mipi nasem dia kipiak na na ichihte botloh pi suakta, Jacob in atate vualzawlna a agen bang a, “Kakha aw, a omna uah va kihel ken”, chih nophuai hita’,  chidan eive.

Ahihleh, ZNC hatlai a nasa tak a ana pang hichin a (Kangkap a ZNC unit president), abang pen tak a nana matkhak uh, bang thu hong gen ua hichi khop a mipi hongzou thei uh a? PNC toh ana buaibuai dankhawng uh bangle ana kiza khachauh a… ‘Huai hunlai a ana kiman kha chu, Thangkhangin bang thugen lah siam ngal inchin, I rights uh nasa tak a hon gen eive. Mipi vaihawmna ihih dan; I omdi dan kha constitution a omsa ahi. Huai constitution a om bang akha, iki thutuah nak aleh deihsakna, dinmun hoihpi huai constitution a om ahi chih ahi aki pianthakna. Eile mi tanbang tangthei ihi chih ki ngaihtuah suah. Huai I lohchinna di le daichik bang a genkhe zou; dik le dik, huaidan a paithei hile chu. Ahihziak a PNC taisan le kihi tuanlou. A mipi mahmah lunglut a kihi dupdup mai. PNC heutu te kha ahong huchih chia hong patau mawk unchin, kimuh pih dikhawng a hongsek uh. Ahihleh, nou nam-le-gam adia bang a nahih sawm uh? Mipi te lunggulh hiaite eivoi, nou hiaitoh kisai bang gendi nei? Mipi te lunggulh hihpih sawmlou a, kei bang hongkhou mawk chihchu bangchi dan eita? Gamkek di chi nahih uleh koilam ah bangtan ma nasawn ta ua, kei bang leh lawmte Hausuanthang, etc. te’n gam ngaihla phuak ung a, Gangte kual khualzin ung ua, Simte, Gangte, Vaiphei te’n Paite la sa dupdup uh ahi. Nou tuni tan in gam nakek na ua nasep khiak uh bang atuana, nazak dah louh di un kana chih chia himah e chimai uh. Kei chu hongvau hiam, kuahiam toh kinak chih omlou, convince mai keive’.  

Zuunlouh Zogam, Vangsel Zolei, Tunnu Zogam series. Hiai album te 1990 lak a pan a hongpiang ahi ua, a late ingaih leh a awlmoh pipen te Sesum deihtakna, Unau kituah louhna, leh Zogam mahmah genthei lua, chihte khawng ahi. Hiaite kha muhkhawlna hia, ahihkei leh huai hunlai thil omdan mah ana hihia? ‘Ahi a zaw, huai hunlai a thiltung khawngmah ahi. Mata dam bangle hong kibawl dekpan a, Sum leh pai mah a heutute hongbuai pah uh.  Huaichiah amawng mawng a et ale, ei Zomite I khosak dan, I nekzon dan, I etleh ki lehpai chihtheih. I gam nuam mahmah napi in amite kizawng lua. Tuu ihon bawl a, seeng ihon phan a, hakkol ihon sui a, hiaite tengteng kha eimah tunggik nadi ngen, eimah liangzang a kinga dingen hi maimah. Midang te ihon en a, alem khawng hongelh masa ua, ahonzoh chiang un atung ah atuang ua (car chih bang), amau tha dawntu di ngen hong hi eive. “Zuang ding in Zogam zuangse, Liang ding in Zogam liangse” chihla kagelh khiak lai ahi di ka khitui tam aluan hun pen. Tukvelh ah kadak khia a, Kaihlam tang lam khawng, alang khat lam ah Chin Hills, Mizoram khawng le kimu thei ahi a, ka en kiimvel a, huaini chiah inchu ka khitui kanul seengkei’.

Usiam’ la tamtak tunnu itna thu hi a, hiai late hi mi tamtak inle koppih mahmah di’n aki gintak huai. Hiai bang a thakhat a hon sihsan Inu tekhawng I ngaihtuah kik chiang in I lungsim mitkha ah muhdan khat inei a, keibang in kanu ka ngaihtuah kik chiang in kisikna, chimaini, huaibang ana hihsak kha manleng, chihkha atam mahmah. Aman tuchiang khawng in bang khawng a ngaihtuah dia aw? Ahon dawnna: Pawt hat petmah, lawm-le-vual mahmah ana khelah, kamkhuah zou pawtkhiak toh thuah te ana kihi inchin, Inu-ipa te’n bel thumang dia hon thuhilh hilh uh. Enbel ina ngaihtuah dan a tun paanglen simle le denchia hong piching a hong khosa sam di, huaichia amaute imoh puakna hong hi di uh chi hi hanga; hilele gintak louh laitak a, thakhat a ahon sihsan mawk chiang a (A nu’n), ahonna it-le-duat na uh thukman hetlou tel a aki omchia kisik nakhawng a hong kidim…ka theih gige khat bel, nitak sawt pipi kipawt, zan sawtnung a ipai chia kongkhak a ginlouh nadi bang a sathau bang a kongkalhna kinuh hial; hilele, inn pai in, puante suah in lupna a aginglou theitawp dia kalup suk toh kiton a kanu’n ‘Siam’ chi a hon samchet zel. Kanu honna itna kana theihsiam louhdan laa tungtawn a ka genkhiak hoihna pen hidia ka gintak zaw tunai a Vungkhanching in asak ‘theisiam theilou, tunnu itna’ ahi mai di.

Usiampu late ingaih leh amalam a I late uh sang a, tuamna khat honnei unchin, minor key bang hongtam, akaihte kha hong modern mahmah, development stage dangkhat a honpi chihtheih ahi. Guiter bang a le asiamdeuh lou in sathei lou. Hiaitoh kisai in hiaidan in gen hi: Lamka kahong tung ua, Lamka tuailai te’n eila te ngaipeih lou, English la kia buaipih uh. Huaite eila a lunglut sak sawmna toh ka lakaih te ah chord tam theipen konvuah a, akaih le akivawk deuh ngen, mipi sak dupdup theih chiahlouh tuailai te lunglut na didan kon en a, huchih leh katup agah kadam sung mah a mu hi’n ka kithei. Nupi khenkhat bang in Nangla hong om nung ka naute un huaikia buaipih uh, English la ngaihsak nawnlou uh, chihbang hon gen ua, kipah huai kasa mahmah.

Usiam muhdan inbel music lam ah ei Manipur a Zomite ikiim a Mizo tekhawng toh the dia le achangkang masa kihi chih ahi. Video lakdan bangle ei nidang a amau sa kisiam zaw, hilele State honmuh chiang ua asum-le-pai mah a hong hausa unchin, Meitei te azil siamsa khawng valut uh, Music siam tatak Burma apan khawng a valut uh. Mizote mah inle atung achu ana welcome unchin, hilele amau mahmah le hongsiam tak ua hiai ava siamsak tute hon nawlkhin bawl nawn uh. Huchia vualzawlna, mahni State hon muh chiang ua thakhat a hon makhelh guih uh, chihdan ahi.

Laphuah dan toh kisai in bel, khatvei thu a lungsim a honglang guih chih dan hilou in, lungsim a akaih bang hong om masa. Lou lampi khawng a ngaihtuah tuah, huai azung hong omtou tou lawmte khawng toh houlim hiam, huaitoh kisai kha thiltung khawng hong om inchin, atawp a hong gahsuah hidan ahi. Lungsim tampi seng, hun sawt pipi kidiah nung a piangkhia la ahihziak ule himah inte hichi tel a tutan a tul theihlouh uh.

Hun lemtang mu sunsun chu thu tamtak ka genkhawm uhi. Zogam Artists Association (ZAA) toh kisai khawng, tulai a gam-le-nam sung a thil omdan, MLA/MDC te nasep dan, mipi te dinmun, leh music mah lunglut atate toh kisai khawng. Kiphatna hetlouh di’n, ka ngaihdan uleh thil ka etdan uh ana kibang mahmah hi. Laa toh kisai chauhlou, politics ah le Usiam hi mi dottaak, nguun tak athil ngaihtuah theileh, maban di bangle mukhawl theitak hi’n kamu. Hileleng, kuamah in dot di leh ngaihkhiak di vai a va enman nawnlou hita in kaki thei. Amah bel aphun hetkei a, adinmun leh ahihna ah lungkim mahmah hi. Hileleng, amah bang mite khawng, dot theih leh houpih theiha a omlai ua iva zat theih kei lebel amau sang a ei a jaangzaw kisuak di hilel hi. Sawttak hon dampih lai henla, amah damsung mah in bangtan hiam bek in athu-ala a ana lunggulh gige Zogam hong paallun man leh achihhuai mahmah e.

(Valte Paukhansiam 1962 kum in Palkhuang khua ah piang hi. Apa Pastor (Rtd) Tualzam ahi. Pawl 10 exam manlou in school kai tawp hi. Palkhuang, Geljang, Kangkap leh Lamka te ah ana khosa hi. Tu in SA Road, Children Training School sak a inluah in a sungkuan tetoh khosa lel hi.) A la te tamlou sample zualle:-

(Zogam nopna)
Sunni hongtang tul limnuai bel ing e
Zata ngaih Zo siktui dawn ing
Tulsing lel a ava ham ngai ing e
Tunnu Zogam nuam e.

(Pianna vangkhua mahmah)
Mualdawn vangkhua nun a kahei na
Vangkhua ka tuun zalna mun aw
Chikmah chiang lung in ngilhkei ning
Mualdawn vangkhua
Tenna Zawlpi* aw.

(*Kangkap ah Zawlpi kichi munnuam khat om hi)
 
(Selung tuaklou Zomite)
Geelngam lang e lungmawl in
Gamlei a itmi zatamte
Louma kikhat selung tuaklou
Bangchi’n machiang I suanta dia…?
….Mabang pat zata di’n nuam
Machiang suan na laizawl ah
Luai bang hong vei adiam aw

(Sesum aw sesum)
Sesum aw sesum
Sesum aw nalian
Sesum in simlei nazou hi
Ka vontawi te aw
Sesum na ngai zong
Na gam sesum in honkhawng kei un.

(Lai simlai te chouna)
Seinou lawmvual siamsin vonte aw
Pianna Zogam hong ngilhkei un aw
Zu le sa leh khamtheih kizuak toh
Kikhawl lou in siam hon sin un aw

Tulvuah luang nuai
Sunni sa nuai ah
I saunuam a khawlthei omlou
Pianna Zogam
 Pi-pu tun-le-zua
Gentheihna te ngilhkei un aw.

(Laisiamte chouna)
Selung vabang a pilte aw
Siamsil khaubang sutsiam te aw
Tuan a pupa huaisa gamlei
Albang mangdia nang hing ding maw
Zehzum lou maw?
…..Melmuh tongsan sang a tulmai ding maw
Na pianpih laizom lelliang lungmawlte
Vaimang in zuunding maw?

(Kuahiam kuan ding?)
Tulai khangnou lia le tang
Lungngai dih ve ni
I gam pupa satsa lei tulding bangzou hi
Ka gam kalei I chi a
Kamkei bang I hang
I gual in zingvai hong hawmkhum ta.

(Lametna (thawn?)
Gamlei zunding a, mabang a patpih sakmin omlou chi’n
Vangsel Zolei zunlouh Zogam aw chi’ng e
Hizong Zotate’n mabang panding simthu lawibang hong thang
Ka zalmang hiam chileng tak simthu mah hi.
…Amual in hal zong
Halzou nawnlou laizom vang kingai te
Pupa huaisa gamlei tuibang gawmkik ding.

(Vangsel Zolei)
Zolei anbang it zatam te
Bangdi’n simthu luangkhawm lou
Anbang itte dougal tangleh
Zogam zuunding zinmang maw?

Kong it chi uh, kong ngai chi uh
Tak in simthu na sang ing
Hizong kapak ning zou nuam uh
Vangsel zolei hi’ng e.