KUBLEI KA SHILLONG
By Kimbawi’ Pa, Columnist Zogam.com
    
Kum thum sung khawng Shillong a khawsa in ka om uhi. Kum 1 leh kha 6 vel Umkiang ah kei kia in hun ka va zang a, himahleh ka inkuante bel Shillong ah a om uhi. Umkiang ahihleh Bangladesh gamgi bul, luitui tamna mun ahi a, a gam a lum mahmah mai a, Khasi, Jaintia leh Bengali a ki-mixed mahmah uhi. Bangladesh gam tui-pai mahmah, a gal a et mai a le lui luang muh di a tam in a tam hi. Bazar nite in Assam a kipan in ngasa fresh mahmah khawng Kalain leh a sehvel a kipan in a hong zuak ua, a nuamtuam mahmah hi. Himahleh 2014 July a kipan in Shillong a suan in ka om nawn hi.
    
Shillong a ka kisuan ma a kipan in promotion di thu kia a kithang a, ken bel ka ngaihsak khol kei hi. Promotion mu di’n le ka kigingta ban khol kei. Huchia Shillong Customs Division, Statistics Branch a ka om lai in hun a hong liam zel a, promotion order a hong suak ngei mai a, ka telkha hi. Himahleh Superintendent (in situ), achi ua, Inspector na ka sem thou lai hi. Hiai pen thutuam hi phot leh.
    
Khasi leh Jaintia gam a om chu a society paidan uh ka thei kei na a gen zek ka ut phot hi. Niiknuai’ vaihawmna chih mah pasalte a beh min uh a tuam maimah a, lamdang kisa phet hi mai. Pata bang John Nongrum s/o Tailor Bridge Diengdoh, chih khawng hi maimah. A pa’ min gelh lou a, a nu’ min a son of, chih bang hi vanglak leh, chih sak in a om mawkmawk hi. Unau lak a numei naupangpen in gou a luah kia hilou a, amah a kipan a khangthu kisui ahi zawmah hi. Pasal’ thu sang a numei’ thu hatzawkna (matrilinial) sang a pasal in thu a neih di deih a laigelh khawng muh di a om zeuhzeuh samta hi.
    
Sihna toh kisai Khasi leh Jaintia-te’ chindan in zan khat bek in a misi koih teitei di, chih ahi. Himahleh amau lak ah ‘tlawmngaihna’ chihte a om kei a, misi neite’n nek leh tak a bawl zoh peuh uleh galtu/sunpihtu hau ahi mai uhi. A hausa deuhte un misi pen ni thum bang a koih uhi. Ka in luahna neitu pa’ makpa in a hon hilh a, ‘Kou Khasi leh Jaintia-te’ chindan a hoih kei mahmah a, a zawng deuh in misi ka neih uleh leiba tampi ka nei uh,’ achi hi.
    
Putek a tam kei ua, pitek, tek taktak muh di a tam uhi. A neu ua, a lungsim uh a neu. A melsia ua, a lungsim uh a se tangpi. A chil mahmah lai uh. In luahman advance a piak ahi tangpi. Himahleh a nopna khat a om a, huai tuh bazar a meh zuakte a kin kei mahmah ua, anteh-louhing zuakte bang le nitaklam dak 4 khawng in a kizalh pan uhi. Zingkal a sa meh i tup a leh nitak a lakkholh a ngai zel. Aksa ahihleh zingkal a meh man di’n a kimu a, bawng/vok chihte ahihleh zinglam dak 9 khawng in a kimu thei pan hi.
    
A Shillong himhim a mun a nopna tak khat a om a, huai tuh khawlum lua chih a om kei hi. Himahleh vun khawng a keu ut mahmah a, lotion tuamtuam bang a hah bawl zel uhi. A huih a keu dungzui in a mite le a keu uh hi’n a kilang. Kimbawi’ Nu takngial bang le Shillong a ‘moistureR lotion’ kiphamoh mawk ahi. Huchia huih keu leh chi keuna mun a teng ahih ziak ua a gam mite bang le neu deuh uh a diam, chih in a om hi.
    
Restaurant chihdan khawng ah an a zuak ua, stainless plate neu chik a buh leh meh tawm chik mah thukkhawm in, sikkeu neu chik in a ne uhi. Khatvei a tan tampi ne lou in an nek mun in a pang uhi. Sa ahihleh a kiphamoh mahmah ua, a pava (1/4 kg) khawng in a lei mai uhi. Meh di lam ah pateh (mushroom) nek a ham mahmah taget uhi. Ei lam khawng a a pateh nekte uh kimu hileh nek di et a en di’n ka kigingta kei hi. Masala (bawl-lou) lampang bang a hah bawl un ka thei hi.
    
Numei in laizial tep leh muam a ching kei tangpi uhi. Hiai chiah bang ei lak ah hithei leh a deihhuai vanglak hi. Hilele, pasal lam, naupang chikchik laizial tep a tam mahmah taget uhi. Zu dawn tam uh ahi dia, ‘wine store’ khawng ah numei natan zu lei muh di a tam thou uhi. Khawlai a zu kham a lampi kiang khawng a lum muh di a om lawtel sam uh. Himahleh kuama’n a subuai kei ua, a houpih khol kei uhi. Lamka khawng a huchibang a zu kham a lampi kiang a om mu hile’ng ‘ Nang koi vengte? Bangachia ka veng ua hichia hong om ngam?’ chia that ut phial di’n ka kigingta hi. Hiai toh kisai a ‘talawmngaihna’ a neih louh ziak un a ngaihsak kei ua, a hoihna tak khat om in ka thei hi. Ei lamte bel hiai toh kisai a tlawmngai law zawzen in mi bang vuak loh theite ihi uhi.
    
Meghalaya, a diak a, Khasi-Jaintiate ‘bah’ hiam ‘kawng’ ngen ahi uhi. Pasal teng ‘bah’, numei teng ‘kawng’ ahi mai uh, a min uh a kitheih kei uleh. Himahleh kisapna dan a nei tham ua, unau pasal a upapen ‘babah’ ahi a, a naupangpen ‘bahdeng’ ahi. Numei a naupangpen ‘duru’ ahi. Nik nuai vaihawmna ahi a, chiamnuih in ka gen sek hi. Pasal sang a numei a ‘lu’ hi mawk ahi a, Bible a ‘numei lu tuh pasal ahi’ chih bang ‘bah lu tuh kawng ahi’ chia a lehkhiak uh ngai leh kilawm ka sa hi. Hakkol a nei kei lai ua, Jesu’n ‘Ka hakkol a nuam a, ka pual leng a zang ahi,’a chih khawng bachi’n a let d’ua aw, chih khawng ka ngaihtuah maimai hi.
    
Kisuanna lai a hong pawt a, kei pen Central Excise & Service Tax Division, Silchar a posting piak ka hiziak in 17.02.2015 in Silchar a joining report pe di’n ASTC (Assam State Transport Corporation) bus ticket ka va la hi. Silchar tan pha a Shillong a kiknawn dia kisa himahle’ng 18.02.2015 a ka kipatkhiak ma in Aizawl Range a posting order om a hihlam a hon hilh uhi. Huchi ahihleh chi’n kisakhol loupi in Silchar Office le sik tuan lou in Silchar a kipan in TATA ‘Sumo’ Aizawl zuan di ticket la in ka paisuak hi. March kal tawp a Shillong a kik in ka inkuante toh 31.03.2015 in Shillong nusia in TATA ‘Sumo’ khat reserved in Aizawl ka zuan uhi.
    
Shillong k’on nusia u chu, ki-intek man sim, lungsim a thawmhau giugiau mahmah hi. Tanau-laina kingaina dek pan a pawtkhia a kihi a, Khasite’ lungsim sia le a kingaihtuah kha kei zawzen a, Shillong a lawm leh tanau-lainate ngaihna in a hon zou mahmah hi. Nitaklam dak 3.30 vel a kipankhia, ka van uh lah gik, motor hat tai theilou sim in ka kisawi noknok mai uhi. Assam state sung a khawpi khat, Kalain ka tun tan un ‘nungkaih’ ka vei sim mahmah hi. Ka theihlouh kal in Hailakandi district sung vel leh Mizoram gamgi pelh lai in ka ihmu kha a, bangchi-bang a pai ka hi ua, chihte ka theitum ngel kei hi.
    
Ka driverte un Silchar tawn lou a Bairabi lampi hon tot pih uh ana hi a, khua a hong vak a, ka dak kimvel zel a, theihna gam himhim ka nei kei hi. Kawnpui lampi tawn ka na hi ua, Durtlang ah ka pawt uhi. Hiai thu a theite’n a hon hilh uleh ka driverte un zu pua ua, Vairengte lampi hon zuih pih lou ua, check om louhna lampi hon totpih uh ana hi in a gen uhi. Aizawl tunnawnna toh kisai ahihleh hunlem a gelh di’n ka koih phot di.
    
Ut leh utlouh genlouh a Shillong mangpha khak ka hi phot hi. Sim dia lungluthuai hi kei mahleh k’on gelh trangtrang himhim ahi.
    
Khublei ka Shillong, khublei shibun. Ngan iaid noh maw!