I SAPTUAM HUNPI : KHRISMAS LEH KUM THAK LOP
(Shillong context a gelh ahi)
~ Kimbawi’ Pa
    
I saptuam un hunpi a neih a tung a kigente’ ban ah Good Friday leh Ester Sunday, chihte a om hi. Himahleh huaite ankuangluina toh kisai in i hih kei uhi. Tu lel a i zat uh Khrismas ahi a, a hong tung pah di pen Kum Thak lop di ahi mai hi. Hiai hunte ka ngaihtuah chiang in  ka lung a leng sek a, lenkhawm chih neilou gam a khawsa ihi phot ua, hon lung phawng sak di leh lunglenna kaithou di thawm a vang mahmah lai hi. Huaiziak in, in lam ngaihna na diak in ka thei hi. Lengkhawm thawm om mahmah lou, lenkhawm la play chihte omlou in zaw haksa ka sa hi.
    
Ahi a, Shillong a ka ngaihdan bang hileh, zuih di hilou, a remchang i sak uleh, saptuam heutute bang in December 24 khawng bang a i saptuam mite uh a tawmna deuh munte uh a bialtu saptuam upate’ makaih a kikaikhawm a lenkhawmna pan di’n tuapuan hon bawl maimai le uh uthuai sak in a om hi. Etsakna mai ahi, ‘Lapalang leh Law-U-Sib’ a lemtang na mun ah; Allukudam-Madanrting-Happy Valley’ tam uh; Nongthymmai-Nongshylliang-Laitumkhrah kigawm’; 101 leh a dangte amau lemchang bang in, chih khawng in hileh mahni veng bing a nuam thei thou di hi’n ka ngaihtuah hi. Hiai bang a saptuam heutu lamte a kipan a thilsawm khawng a om louh chiang a mahni veng bing a sawm bang kisuanlahhuai a hong bang hi.
    
Huan, hiai bang a i saptuam hunpite un ngai thupi lou deuh i bang uhi. Khrismas la bang tampi i nei uhi. Huaite khawng hiai hun a i sak kei uleh chik chiang a sak dia i neih uh ahia, chih bang ka ngaihtuah maimai hi. Lamka a ka veng uh, Elim veng bang ah Khrismas ni in Khrismas la biakin ah a hon sakpih kei ua, kum khat thu ka gen ahi. ‘Topa hoih hi, Topa lian hi’ chih la khawng a hon sak pih maimah ua, ka thangpaih tha bang a suak hial hi.
    
Mizoram lamte bang in a ngai thupi ua, ka theih hi kei mahleh a hon hilh a om hi. Khrismas leh Kum Thak lopna di thohlawm a hun a don nawn ngai lou di’n kum bul a kipan in biakna thohlawmte a kipan in hiai bang hun lopna di’n sum a khenkhe pah uh, achi uhi. Eilawi bel huai hilou in a hun tak a thohlawm dong tawm in i hih chiat uhi. Huan, Mizoram lamte bang in a ngai thupi ngei mai ua, khualzinna motor pute bang in ‘October ani tawh, Khrismas hla play a hun tawh e,’ chi’n September-October khawng a kipan in a motorte uah a play dumdum mai uhi. Huai i zui di uh, chi bel ka hi kei hi. Himahleh eilawi in bel a hun in hon phak chiang a top leh chilh in i hih ua, huchi’n veih uih then in i theng sak maimah uhi. Hi thei hileh hiai bang hunte a tun ma kal khat khawng bang a kilimsuah masak di’n hoih ka sa mahmah hi.
    
Huan, hiai bang hunpite i zat khawm lai ua i mangngilh louh di ua hoih mahmah tuh lungsim mun khat, ki-it tuah leh pumkhat a om dia zat ding ahi. Saptuam khenkhatte’n hiai bang hunte bangmah in a sim kei ua, zat le a zang kei lai ua, ei a zangte bang a hon dem mahmah lai ua, khelhna leh dan bohsiatna bang hial in a hon koih uhi. Himahleh eite’n bel zat dia hoih sa in i zang uh. A se lawmlawm di’n le i koih kei hi. Laisiangthou i sim di uh: ‘Thuchiam thak k’on pia ahi, ki-it un (love one another); ken noute k’on it bang in nou leng ki-it (ittuah-love one another) un. Na ki-ittuah uleh mi tengteng in ka nungzuite na hi uh, chih huai ah a thei ding uh,’ achi hi.
    
Johan bung 17na ah Jesu a thum a, A Pa a pahtawi masa a, huchi’n a nungzuite’ a din a thum zom lai hi. Huchi mah in A nungzuite’ a dia a thum khit in eite’ a di’n a thum a, hichi’n a gen hi (20 a kipan in): ‘Hiang khawngte’ a ding kia a ngetsak ka hi kei, a thu ziak a kei hon gingta lai dingte’ ding in leng ngetsak ka hi hi; a vek ua pumkhat a hihna ding un; Pa, kei nang a ka om leh kei nangmah a ka om bang in, amaute leng eimah a a omna ding un; nang kei no’n sawl  chih khawvel in a taksan theihna ding in,’ a chi hi. Hiai bang di khawng a hiai hunpite zang i hih uleh manpha diak di’n ka gingta hi.
    
Huan Khrismas bang a hun diktak thei a gen pawl bang le a om uhi. Himahleh kuama’n i thei kei uh. Theihlouh di mah a Laisiangthou in deih ahi dia, gelh le a hon gelhsak kei him hi. Theih dia deih hileh a kigelh mahmah di. Himahleh sui theihna chiang om di’n a gelh lel a, kumpi Kaisar lal lai, chih bang a kipan a leitung khangthu a sui theih di’n a hon gelhsak lel hi. Kum Thak i chih bang le Gregorian calender in khawvel a nawmvalh ziak a tua i kum thak lop di uh January ni 1 a suak hi. Judate’ kum thak khawng toh a kibang kei lai ngut hi. Bangteng hileh hiai calender kikhek nawn mawk lou di ahih ziak a khawvel in kum thak hiai ni mah a zang den di a bang hi.
    
Thil khat, Khrismas toh kisai a la a na phuak masate’n ‘Bethlehem bawng in’ a chih khawng uh i Laisiangthou a bang in in thei in, suahlam mipil thumte, chih bang le bangzah ahi ua, chih a kithei kei lai hi. Huaite chilou deuh in, ‘Bethlehem gan-anpiakna’ a kisial ahi a, bawng hia, lawi hia, belam hia, chih i thei kei. ‘Gan-anpiaknakuang’ chia gen di’n i khang un le daih hi’n ka thei hi. ‘Bawng’ pen gen pipen (mention) in nei kei le a hoih diam?
    
‘Suahlam mipilte thumte’ i chih veu ule LST in mipil tum achi kei hi. Thilpiak chi thum bel a pia uh. Huaiziak a ‘suahlam mipil tumte’ i chih veu ule taisan hun in ka thei hi. I mawl lai ua i gendan khawng uh meilet nilouh dia hoih nawnlou in ka ngaihtuah hi.
    
Abang-abang hileh hiai bang hunpite i zat ngal uleh am deuh leh thupi deuh a zang a, a manpha a zang dia kisakkholh a, phattuamna bang lam hiam bek toh zang teitei dia panlak di’n a hoih hi.
    
Dam a Kum Thak i muh uleh eite’ a dia vualzawlna kum 2015 hi chiat thei leh a deihhuai mahmah hi.