Zongsang chih toh ngeinaseh chih a kibatna tampi om ding hi, himahleh hiai kampau pen a thukzaw leh a kip zaw ahi hi. Mi khat taima mahmah henla, na taima tel, lou na kuan zougige a chih dong zenhouh le, ka zongsang a ahi chilou in ki ngeinaseh gawpta hiveh aw, achi ngei di. Skul kai, office kai, zingthoh, exercise, kikhop, hanlaih, leh adang dang tampi kingeinaseh theih om takpi hi. Dorkai pa/nu in a dawr zingbaihtak in hong gige henla, niteng in pellou in huai mah hih gige leh, chiing zongsang ding a, kingeinaseh gawp ngiingei khamohlou ding hi, dawr hong hak gige pa`n/nu`n dawr honhak kingeinaseh ding a, a kuan baih nii sunsun in haksa sakawmtak in kuankhe neelnuul ding hi. I chihna bel, I hihna, I omdan, I kizepdan, I nasep leh silbawl khempeuh, I ngeina hongsuak ding a, I taksa ah mantep bangin kibelh teetaw ding a, I mel ah tua omdan leh ngeina dan pen kilangkhia ding hi. Mite hon muhdan ah, hiai pa zaw huchimah ahi, Pathian thu awi diktak mah ahi, kuhkal petmah ahi, tlawmngai petmah ahi, zuaugen hat petmah ahi etc. ahon chihtheih chiang ua kingeinaseh tan tungtou chihna ahi hi. Sapte`n manner, habit, hobby etc. achih sangmah un a dinmun sangzaw hi, character ichi lamlam kawk thei hi.

Neulai in nasep ding tampha peuhmah hiven, zing baihtak a thou, sep ding teng I sapzoh chiangin sikul kikaiman thouthou hi, sikul kai zoh chiangin sepding omnawn zel a sikul kailou mah battheih zenhouh hi, himahleh kingeinaseh khin ahihna ah haksa lua omlou leh haksa sahetlou in maban kisawn thei thousam hi. Khaw gamlasim apat sikul kai gigete zong midangte thohma in thou gige ua, zing thohbaih zongsang uhi, Sumchinvum, Munpi, Tangpizawl etc. apat Singngat khua a sikul hong kai gigete ensin le, zing dak sagih in sikul kai dingin kuandok man gige uhi, homework bawl, tuitawi, ansuk, anhuan, laisim, hiai tengteng hihkim sipsip sa in sikul kai di kuankhia ua, Singngat khawmun a omte mah sangin beltak in sikul timing lap gige zawmah uhi, nitaklam chia`h le huchimah bangin, tawltak in a student hinkhua uh manphatak in zangthei uhi. Aziak bangdang hituanlou in a kingeinaseh ziak uh ahi.

I mihinzia ah midangte hon ngeinasehna tan bang chitun ahia le, akhente khouhkhouh, hilh hilh, taitai a leng phatuam nawn mahmah loute, a sungkuan te`n a omdan leh gamtatdante uh hoih salou pipi a ngeinaseh suk dildel, ngaihsak peih nawn mahmah louh tan a tun chiangin, hisuk maimai heh, a suahsuah suak hen aw, chia ngeinasehna tanpha tungthei hi. Huaiziakin, ngeinaseh hoih leh hoihlou om mahmah didan ahi.

(1) Thadah ziaka lup ngeunguau chiing zongsang mi tampitak om uhi, midangte`n minute khat lel leng awlmoh leh hawmthoh taka a zat keuhkeuh lai un, zing nisuak apat zing nisuahnawn tanpha a bangmah ngaihtuah peih hetlou, lupna a hun zangbei gige peih ki om takpi hi. Lum lum ke`n chih a le phatuamnawn mahmah lou tan chiang tungte a sungkuan te`n ngeinaseh ua, amah zaw huchimah ahi, zi leh ta hon nei leh bang chivak sawm adiam a? chiin koihdan khat neithei uhi. Mi khenkhatte tutna a lup zongsang om ua, mi inn leh nungak helna tanpha ah kilawmloutak in kizanpah ngeingoi uhi, inn neitute`n ngeinaseh thei mahle uh, huchidan a om mite mi thadah, om dingdan theilou, leh awlmoh neilou mihing ahi tangpi uhi. Inntekte a dia mi hnoksak, phattuamna bei a suak ua, mi peibuaitu ahi naknak uhi. Khatvei nungak helna ah kizan kha zenhouh ing, inntekpa heh lawtel mahmah, a lupna tung uapat hangsuah kuaukuau tazen, nuam koithahah kei hial, chintamlouh ahoih viau. Lupna bel tawldamna ding hi, a lum zongsangte loungal a hunlou leh a poimohlou a lup mokmok haksa sa uhi.

(2) Nu leh pate`n I tate kingeinaseh sakthei zenhouh hang, a huntawk theilou a tai deuhveu, thuhilh kichi gige, alang lang a sawl gige mawk, ommun apat samsam mai, huchidan chiingzongsang te`n a tate uh thangpaisak thei takpi uhi, ninhuai suak thei a, a tate a ding in ngeinaseh theih hi. A hun toh kituak loupi a tai vettak, salh vettak, leh thuhilh sawm vettak in a lungsim uh buaisak a hardened criminal suaksak thei hi. A hanglulu deuhrengte a tate`n a ngeingaih vak kei hial uh, kei tel in. Neulai in ka pu annkuang ah hang lulu deuhreng hiven, ei naupang bangin ann le kinehoih ngamlou sek, paneu te`n ngeinaseh ua, ann nekham zou kamkhuah zou in pawtmangsan hiau zel uhi, thuhilh dan dik ahi kei chih a chiang khop mai.

(3) Lungput diklou himhim a piang kiom takpi adiam, migensiatna ding keleu zong maimah kiom hi, kam kaat peuhmah leh kuahiam gensiat higeih geih mai, huchidan omzia chiingzongsangte kha midangte`n ngeinaseh ua, koihdan khat nei ua, amah zaw huchi khachimah ahi, a thugen lak di a om vakkei chih ahi leuleu. Mi lauhhuai, huathuai, leh thulaklouh mihing a suak ua, mi thulimlou a sim ahi ut viau uhi.

(4) Khamtheih hih zongsangte, laithai kap zongsangte, lottery hih zongsangte, zu kham zongsangte, ngeina dan lou a khosate ahi ut mahmah uhi. A zongsat ziak un a lungsim uh zangpangkai lou ua, hun, tha leh sum mangthangsak uhi. Taksa`n apoimoh sanga tam zaw peuhmah, singpi hi`n, ann hitaleh a hoih a om kei hial, sa ne zongsangte a dingin le kisumtheih a poimoh mahmah, thil himhim mahni taksa hoihna ding ahungeih theite bel a pil hizel uhi. Zu dawn ziaka khamsiat sese tumte mihai asuak ua, lah a hungeih theite a dingin hinkhua nuamsaktu, hunawl zatna, lawm bawlna leh khanvual polhna asuak thei veve. A leeklua a gamtatna in mi ahaisak a, midangte a dingin ninhuai thei ua, ngeinasehna tan tungthei hi, huaitan a tunchiang ua bel a buaihuai lam hi ut mahmah leuleu. Innkuan sung a papen in innsung khosakna ngaihsak lou hial a a kham gige lehbel sungkuante mangbang sak a, khosakna buaisak a, gougamna tan tungsak thei hi, nupite nasan in a ngeinaseh hial chiang ua chu, a buaihuai lampang hita.

(5) Khualzin zongsang le omthei ua, hun mangsak kia hilou in, sum tampipi senna ahi. Khualzin pen ahoih lou chihna hilou a, a hunlel theite leh sum leh pai kiningching neite a dia bel khovel muhna ahi hi. Tua igen pen bel, singtangpa, singtang nu, singtang naupang, sinlai nei te I genna ahi deuh. A poimoh kiikeei lou a khualzin pahpah te`n a sungkuante peibuai ua, a zinna te peibuai ua, a munluat mahmah chiang in ngeinasehna tan tungthei hi. Mite`n a hon ngeinaseh chiang ua bel, ngaihhuai hinawnlou in ninhuai a suak a, mite khosakna buaisaktu, inkuan kinawkna bul, leh sum paihmangna naak ahi hi.

(6) Mahni kingaipoimoh a thil tengteng a telkim sawmte (mahni inti poimoh) a buai in a pumbuai ua, “telkim” chih ahi uhi. Thilteng ah kigolh ua, a ningte a dingin mi ninhuai a suak uhi. Telkim ahih ziak un a khosakna uh, leh a innsung uh kem manlou ua, awlmoh haupa/nu in a innsung (tate/tute) khahsuah hilhel thei tazen hi. Huchidan te kha, mi`n pakta khempeuh ua, mite dawha, kamsiam khem douzou lou ua, kithalawptak in pang suangsuang zawmah uhi, popularity deihna, leadership deihna haipih ua, piansualna chikhat nei uhi, mite`n nang tellou a zaw, nang mahmah, achih chiang bang ua nui vurvur, pang vutvut, sum khong sengseng, pa tampi om uhi. Sungkuan te`n ngeinaseh ua, ka nu/pa inn a om ngeilou chi leltak uhi. Mi dangte`n zong ngeinaseh ua, sontawlawi in nei ua, kizen sangial uhi.

(7) Sumdawn`, vanzuak, leh mi in a pawt zongsang om ua, huaite a dou gige tut e`n ngeinaseh thei uhi, chihbel thutak laklouh asuak uhi. Kuahiam khat a poimoh loupi khat in hong pawt gige mawk leh, kuaman kingaihsak peihlou, kingaihsak manlou, innsung hon palbuai zawmah, I ngeina dan routine a kipaitheilou hial hi, ngeinaseh tan a tun chiang in thudonlouh a suak uhi. Vanzuak hong lut gige taleh koi a sum in daih zou di ahia, sum dong hong lut gige leh housiat sangin hih heihai a tuak uh. Mahni kisudere nu/pa tampi om lemlum ding uhi, mahni innsung a om peihlou, a tutna ua ling (thorn) om hileh kilawm a kholak leh mi inn a pawt khe gige mawk, inn sung a om peih mahmah louhial, ngeinaseh ahih chaing un naupang nasan in thupingaih lou hial uhi.

(8) Kei kia ka hi chih lungsim a pai tentun, zogam itpen dan a kikoih, tlawmgaipen dan a kikoih, Pathian thu hatpen dan a kikoih tamtak om ua, midangte khong simmoh bawl hial tampitak om uhi. MLA amah kia chingthei di kisa, a chinpen kisa, zogam amah omlou a pianglou ding sa, sih leh manna tuakte amah lou a vui theihlouh ding sa, Biakin kikhopna amah omlou a omthei lou ding sa, chihte kha kingeinaseh thei a, amah zaw huchisek mah ahi, chiin thupitak in kikoih lou maimah hi. Election teng a MLA tuh gige khenkhat na mitkha uah hong lang mah ve, ZNC haichilh, Pu Thanga Tonsing, Pu Thangkhangin Ngaihte, Pu Nehkhojang Aloysius etc. te`n Zogam thu a gen chiang un kingeinaseh a, a mel uah belh takpi a, zong amau haichilh hialthok uhi. Sepsuah leh lohsuah a muhlouh chiang un mipite`n ngeinaseh ua, hiaite zaw chia koihdan khat neih ahi naknak.

(9) Office kuanhak, office kai paihak, dukan honghak, dukan khakbaih chihte kichiamteh a, kuanhak sek him ahi, honghak sek him ahi, paihak sek him ahi, chiin ngeinadan in kikoih suk mawk thei hi. Biakin a om gigete a mau kipiak bawl a, a omlouh chiang un bukimlou sakna om hi, ngeinaseh na khat ahi. Facebook a om gige te kingeinaseh a, ahi di mah in kikoih suk mai hi. Kisuanglah pipi in kilut kulkul sek a, internet a maingal viaute lakah a upalam kihi ahih chiang in nopsak louhna piang thei hi, tate vual khong toh kinak kangkang hun chia`h kisuanlah huai simsek, hon ngeinaseh mahmah lawi om uhi, a hoih pen kei, himahleh a kick chih dandeuh om ahiam a, ki addict sim mawk a.

(10) Haksa thuakhat, taksa gimna thuakhat, natna thuakhat, leh mahni hoihna ding a kidektheihna chihte ngeinaseh theih hi, zing thohbaih, exercise lak, laisim chih khong a pattung in haksasim mahleh I taksa in a ngeinaseh chiangin nuampi khat ahi, midangte`n a hon ngeinaseh khum hial ualeh hoih zawsem.

(11) Doctorte leh sumdawngte a hihna uah chitak petmah ua, khopi deuh ngial ah houh, hunawl leh tawldamna hun neilou in haichilh ua, chiklaipeuh a muhtheih gige ahihna uah a nasep uh ngeinaseh gawp uhi. A sungkuan te`n le ngeinaseh ua, innsung lum ah om vaang mahmah uhi. Sum haupha ngeingut ua, himahleh a taksa un lehthuak thei thepthup, damlouhna tun hi.

(12) Biakin kai ngeinaseh, thohlawm thoh ngeinaseh chih le omthei hi, tuabang a om zongsangte midangte`n ngeinaseh sukgawp ua, sum khon ding hun ahihpeuh leh amaute mitsuan khanak uhi. A pethei tu chu mihampha ahi, piak zohlouh chiangin a minsiatpih khanak ua hiven. Thil himhim a nuam leh haksa ah positive tak a entheite mihampha ahi uh, lunggimna a neitawm deuh zel uhi, tuachibangte khovel nuamsaktute hi ua, mite`n a hoihna uh ngeinaseh ua, thanopna toh kidim densak hial hi. I tate houh lamdangpi hi ua, tailouhte hehbaih ua, nuak zong nuaknuam se uhi, mahleh a neulai ua, bawi tampipi ne in, hong lianpah ding na hi, ichih toh a letnung ua kidek deuh un aw, ichih maksa ua, thepthup mahmah achih chiang un, na hong kingeinaseh mai di uh, nektamluat in gilpuaksak, ektamsak, natna tunthei, phatuamlou I chih chih. Hon ngeinaseh ua leh hamphathuai hizawmah. Mite hon ngeinaseh ding lah uthuai, lah a hon ngeinaseh luat ding uh le lauhuai zel, hamhaihhuai, chi aw.