Leitung Khosakna pen I pipute hun in mawltak ahihna omtham mahleh, pilna lungtang nei mahmah ua, innsung kivaihawmna, khawsung kivaihawmna, leh hinkhua a chiamteh ding thugousiah nei in, omzeneitak in ana khosa uhi. A thiltuahte uapat leh hunsawtpi sunga a cheptehte uh thumanpha pipi hi a, a hinkhua uah lenkip in kimakaihsak uhi. Tu hun in bel a zattheih nawnlouh khenkhat om ding a, himahleh a poimohna ubel kiam taunlou hial hi. I pupate thugousiah leh thupilte, ngaihsun kawm in ensin le maw.

1, Lal ngeilou lal a na, a lal uh a kha. Mizawngtak a tangpithu in a hong hauhsak chiang in kichapousak ut ngial hi. A huntawk theikou in om velval thei ua, midangte haksat ding khualbanlou pahpah uhi, huaiziakin Lal ngeilou lal a na, chi uhi.

2. Suangpi le suangneu omlou in a kip kei. Kuamah kimusit tuan disam kiomlou, a neu omlu a a lian omtheilou chihna ahi.

3. Mahni kiphat leh sakhi ngal ah bangmah a belh kei. Kithupisak, mahni kia kigengen, kei , kou, ka chih kampau zang gigete a thupi hizawlou in a thupiloupi hizaw uhi. Mithupi te'n ka thupi chih genseselou hial uhi, kiniamkhiak zawmah ua, thupil hoihtak ahi hi.

4. Melse gensiat, sap sangin a nai. Mi I gensiat hiam, I houlim khak hiamte sapkhiak mah bangin hong dawkkhe nolh ut mahmah ua, tunitan in dik lailai.

5. Sial gial in sial gial suang, suaklu kung ah theidang agah ngeikei. Kichikhah sawndan genna ahi, melsetak in melhoihtak a hingsuah vaang mahmah, pa neu tringtreng in ta lian enon a nei vaang mahmah. Negro mivom neite'n mivom mah a suang uh.

6. Mihing melma lianpen amah mah ahi. Mahni taksa, lungsim, sa-utna etc. thunun hi thil haksa pi ahi, deihtakna, duhgawlna, duhaamna, hehna, khasiatna, chiinzongsak, kidektheihna tasam, thadahna, guktak laktak, hoih kisaklouhna, kimuhsiatna, kisaktheihna, muhsitna, hazatna, huaite tengteng midang hiam kua hiam honpiak hilou in eimah hihna ahi, I melma ngenta ahi uh. Kithunun siam a poimoh.

7. Mi pil in a pilman a ne seng kei, mi hai in a haiman a chawi seng kei. Mi pil leh pillou kikhaihdan a genchiang mahmah, a pilte siam ua, thil hihpeuhmah lungtang toh pangin hih ua a loh uh ne seng lou uhi. Mi hausa ichih mawkmawk a hailua omlou uhi, pil kisa mahmah lah khosamoh chu a pil huntawk kei ahipen. A pilte mah hilou hia nuamsatak a khopi a om riahriah theite.

8. Na tupna ah pan fan fan in, uipi le a vah ngial inchu ek khing a taisan. Tupguhna a poimoh penpen khat ahi, tupna omlou in lohchinna a om theikei, uipi gilkial in ek khing le a liak duam duam kei maw.

9. A hoih lam lampi a tou, a se lam lampi a phei. Haksatna tawn lou in nopna a omkei, lampi nuam kia zuih I tum inchu thih hoih muh a haksa, lampi haksa leh tou zuih ding mah ahi, kipahna in hon ngak hi.

10. Pian'sual leh meel a bawl theihkei, nungchang chu a bawl theih. Tuchiang in bel, piangsualte leng siamna sangtakte ziakin bawlhoih theih chiang omta hi, himahleh a tangpithu in I meel leh puam ei ikipiak himawklou ahihna ah, khasiatpih maimah sang in leh ngohding khong zon maimah sangin, I nungchang (character) bawlhoih le a phatuam zaw. Hiai nu, hiai pa zaw, a mel a se viau na a, a nungchang a hoih eem mai, zi/pasal ding in a etlahhuai chih mahtak tam hilou maw.

11. Piangsual nuihsan ke'n, pian'sual leh phaak in zekai luat a nei kei. Piangsual kichi leh natna hoihlou vei kichi pianphung ziak kia ahi kei, a hoih penpen zong zeng thei, mitduk thei, khebai thei, phaak thei, huaiziakin, naupang, piching piangsual leh lugsim kimlou te simmoh mawkmawk di ahi kei.

12. Mahni kia a lampi pailai in mi a hou-se ngeikei. Mi housiat bel lauhuai pi ahi, adiakin mahni keleu a lampi pailai in mi hou-se zenzen lebel I tuahlouh ding pi tuah thei lawtel mahmah.

13. Khualzina lampi a tamsawlte panpih ngeina ahi. Hih ngeingei dia chiamteh ahi, damlou, gilkial leh haksatna tuakte huh pahpah leh dawnzangkhai pen mohpuakna ahi. Ei tung a leng tung thei, tlawmngaihna neih mah hoihpen pen hi.

14. Lam man-na ah khekhap tam lamlam zuih ahoih. I theihchetlouh leh I hihkhak ngeilouh te tungtang ah, mi tamzawte paina zui le a dik tangpi. Gammanna ah le ahi veve.

15. Sih lak (dawp lak), sing lubuul pouna, zawnglu guh omna, Kang kang hamna, singzung leh suangbul a tuisam pawtna te, lou dia neihlouh ding. Sih leh tuisam pawtna I chih tuibulpi leh tuinak ahi, Gamsa leh ganhing, mihingte hinna naak ahi, dawi leh kau tenna zong ahi, suksiat chi ahi kei. Zawnglu guk omna bel mun lauhuai a chiamteh ahi, sing lubuul pouna ah kha hoihlou a teng nuam, vangtahna a tun nuamse. Hiai dan munte I pupa te'n kembit zawsop ua, pil huai pi ahi, tuchiang chiang in I vatmai sipsip ua, tuikang ngak in I kamka heuhou geuh uhi, I pil zaw kei hial. Kang kang pen pheisam ahi.

16. Mual tung a sa em sapi in a khoih nuam. Sakei, gialbem, vom leh chingnia in a gim za ua, mun lauhuai a suak sak. Sa dangdang in zong naih ut mahmah ua pilvaan huai khat ahi.

17. Loubuk kiimlak ah zouzaam ching in. Zouzam pak pen pipute ngaihdan in humbittu ahi, dawi leh kau hawlmangtu dan a a ngaih uh ahi.

18. Sem sem dam dam, pumbil a si. Thil phal di, a tawm a tam genlou a nek ding a om zahzah kihawm siausiau di. Duh-am leh mahni angmasial a si baih.

19. Nu leh pa te haibawl a siang kei. Nu leh pa te min nasan genkhe kongkong lou hial uhi, he nu, he pa chi ua, biak chawhchi chih dandeuh a nuihzat bawl di ahi kei. I vaang a hon hauhsak hamham ding uh ahi.

20. Hamsiat haat amah tung ah a tu. Mi siatna ding vei pen a neite leh kampau kilawmlou saalkhete a mau tung ah tu nuam mahmah.

21. Na zi toh thaksik na gawikhawm nilouh sang in khen le chin a hlawk zaw. Haksatak a tenkhawm teitei a hoih kei, zite khen ngeina ahi, chidan uh ahi.

22. Numei hangsawk pau sak maimai in, numei leh uipi chu ana rum tei maimai le uh, hun sawtlou nungin a lungkim nawn pah uh.

23. Mikhual kiangah bangtan a hia na om di chih sangin chikchiang a pai di na hia chih dong zaw in.

24. Lui tui na danw ding chiang in, tui siang tui dam, amah ziaka buh leh bal ka baak puuk puuk chih di.

25. Thang a awk gu ken, huchidan hihte sakei in a pet nuam.

26. Sungkhat hiam khanvual hoih te inn chihlouh ah, tuailaite nekna ah mawk tel thahah ken, a tantawk uh a kham kei kha ding uh. Tuailaite nekding bikhiah omsak ua, nethei ngenta hi ua, aam mahmah uhi.

27. Gul khe muh a siang kei. Na muh leh na si ngeingei di.

28. Sakei ek nahzial a tep toh vaan ek thakkhum sawm chu a poipen. Mahni kituisabuahna dan ahi.

29. Insak inkhangte leh mi mangbang panpih ngamlou chu paching ahikei puantum teng heh.

30. Numei, naupang lungkhamsak tu chu chikhah aneihtam ma a, hawlman', koihkhiak ahoih.

31. Heipi, tu leh puan gu mi chu, amah hankhuk tawhna leh ruang tuamna ding in zat a olsam viau.

32. Invengte toh kisukbuai sangin khaw sagih kidoupih a telhuai zaw.

33. Tui sunga lut di chiang a au ruairuai leh numei zak di a kikou ruairuai chu pa rawnttak ahi ngei kei.

34. Khawsung mite'n a tan uh (zek leh tan) zuihlouh chu mahni kigawtna thupitak ahi.

35. Lasi thaang hi sattan pahpah di ahi, awk khak di a lauhhuai. Dawi zawlte a hoih sawt kei uh.

36. Kham nei kawm a nungak hel leh khamnei kawm a khawlai vaak mi chu mi kisathei ahi nuam.

37. Nekkhawmna ah sa tengken, kuang dang ah le kisuan sam ken.

38. Gamlak a gamsa matna a lawmte hun ngamlou pa chu puantum teng heh.

39. Phiik piangtung etna ah, a thupi tel chih zawk di ahi.

40. Deihlouhpi toh nopmeltak a khosak sangin, deihpen toh kumthum suang zawn le a telhuai zaw.

41. Sing puak khat leh pasal khat muhzawhlouh thu gen chi ahi kei.

42. Sa tawbing inkhangte piak di, inkhang neilou ten insakte piak di.

43. Dai keek ken (suan), lampi khaak in dai bawl ken, huchidan hihte a khawsa thei sawt kei.

44. Numei naupang gilkial aa sihsual muzen a mahni buhbuak a buhhum gu ngamlou chu pasal ahi kei.

45. Sawnta panpih lou a buaina bawlsak zawsop tu sakei in a pet ut.

46. Singzung singkhuah-singchih diin zang ken, numeite nawi a eek in a per/zuan ut.

47. Mahni loumunlui mah khatvei sehna ah neih nawnlouh di ahi, ka ak a hong kiknawn ta chiin a hon gou ut uh.

48. Gamvakna ah naupang a nawnung ngeikei, thankik in chil a siat ut.

49. Sai in a nunglam ah sing a kham leh nungdelh ken, na hinna humbit zaw in.

50. Nupi leh nupi kisual, pa te'n a phelh ngei kei.

51. Vaphual, kawlhawk leh vahai bu na lak leh sing in a kua hu in(theisak).

52. Sakei in na thaang aa awk, sa a lak leh suh sawm sese ken.

53. Khawtung zawn vaanlai a muvanlai nupa lenglai sim leh hmar a a kikhen uh leh nupa kikhenna hiam tuailai sihna a tung ut.

54. Lampi khaktan zawng a sing amah a kipuk in tuailai sihna a tun ut.

55. Mi zawnna laang (gua a kibawl), tem a phelh louh ding ahi.

56. Belsawk kawm a ann neklouh di (belluh), naupang in a nek zenzen leh, khuavangte aw, ana ngaidam un, chih zawk di.

57. Vaphual, kawlhawk, vahai nou la chu nupa kikhensak toh kibang ahi.

58. Kiteng dingte insung ah sihna a om leh khawlsan phot ahoih, hun dang a gelthak di ahi.

59. Numei gailai in hiaite khoihlouh ahoih, sa thah, gul thah, laang zawn, vokkuang suih, seng leh tutna bawl, nau hong piang in khutzung vaal a nei ut.

60. Naupai in luitui a kaan leh nau a siat ut.

61. Mi inn toh kituaklou leh dawk tuanlua in inn lam ken, midangte hoihlouhna teng amoh na paw kha di.

62. Kawn ah inn bawl ken, gamhuaite paina na daal kha di, sihna a tung ut.

63. Konglam a inn pehsau chu siatna tuntu ahi, kizang nawnlou hihtuak.

64. Inn bawl diin na tenna inn phelsevek phot in, tenna in bawlkhum a hoih kei, ni na douzou kei di.

65. Khawsung leh vensung a lampi sukbin a hoih kei, sihna tunthei ahi.

66. Nungak leh tangval kigu dite'n a tailouhna ding lampi uah sawl a koih masak di uh ahi, sakei in a nungzuih louh na ding in.

67. Phaitam lam ah summun a bawl ngeikei uh, sihna a tun ut.

68. Lupna a puanzat luite (puanthuah) kihal ngeilou, gougam theihna tuntu a suak thei.

69. Puanpi gatsual zenzen in kiteng dingte a kipelsak. Hun neih ngai, hun leh tha tampi la ahih ziak.

70. Lou kigitna, gamgi suan ken, khoih di ahi kei, sih theihna hial ahi.

71. Ak gil a kidenna hi thil hoihlou tawpkhawk ahi, a dengtu leh den a om a ding in a hoihkei tuak tuak.

72. Khiangsing a ki hal ngeikei, misi koihkeuna singkuang dia zat ahih ziak in.

73. Numei gailai in ngafuan a veng ngeikei, lohsapna ahi. Aziak om inteh dik mahmah chi uhi.

74. Mahni sepsuahsa chih ziaka sungte tellou a nekgaih vek sianglou hi.

75. Nopbawlna leh kichapousakna te chiing tam ken, kiamna ahi (ton/khuangchawi).

76. Inn khanglam ah makpate koih ken, pute hu a zoukei ua a damthei kei ut uh.

77. Tapsak a maimom a hong luaikhiak leh lengla, lupna bul a a hong luaikhiak leh damlou veh.

78. Kum khat sung in innsung khat apat pasal nei khat kaan kuansak ahoih kei hial.

79. Aziak omlou a zaan thum zanhah chu genthei di chih chiamtehna ahi.

80. Nupa kinak lai in palai naa sem ken, na vaal pah kha di.

81. Nu leh pa lamsuahsa, sum leh pai tellou a khosasuah a tamkei hial.

82. Na lamman na ah singsat in na paina nung chhinchiah in, na kiknawn theihna ding in.

83. Khuai na lak chiangin a zu bangzahhiam nutsiat zel in.

84. Kichiam ken, vaan leh lei sial in leh sakei min lou kawma kichiam ahoih kei.

85. Zawl ngaih thu a kichiam thillauhuai khat ahi.

86. Ganhing tung a tatsiat ahoih kei, gelgawt ken.

87. Tungleng sa leh nuaileng sa nekhawm ken, meh lim khetching in (meh him).

88. Naupang, numei leh tuailai te'n upasa a ne ngeikei uh, sa him tata hizawmah lai.

89. Papak, patung leh sa himhim nekhawm ken, limsiit ding chihna.

90. Puum ah numei a lal, tuimun ah pasal. Meithaite ngialhouh siksekna ah hehpihna piak ahi.

91. Luinaak lam ah eek thaa ken, dik tawntung mahmah thupil ahi.

92. Lamkhang lam ah zunthaa in, lamsak lam ah eekthaa in, zun pen luangmang ding a, eek pen a uih in hon uuklou ding hi.

93. Gammang lak a kikou ahoih kei, mel theilouh in a dawng nuam se. Gamlak ah aisa ki-emlou bok.

.