Zogam architecture chizensam le, nam leh gam kivaihawmna leh vaisaina paidan lam ah hichidan in hih sin-le bang achi peuhmah hiam, chih kikum le, chidan ihi. Ngaihdan leh lunglutdan kibang kim sipsip lou ahihman in khemkhem peuh-set, kua thukup le hilou, kidaihlah-huai phet ichi maithei. Himahleh, lungsim a puaknat genkhiakna leh Zogam kivaipuakna haakkol pawtute kouzaanna di deihsakna ziak ahi zaw. Zogam it chiatchiat, septheih leh thohtheih tuamchiat ding a, lungsim zangpawl, leh a genkhepawl le om ngai hi.

Amasapen in I Zogam vaisai-na ah makaitu pen re-unification cum revolutionary organization ahihziakin a bulpi zaw sut kei ni, ZRO kivaipuakdan leh vaisaidan ah thukup neih a kilawm kei. Zomi Council pen bel I innpi uh leh kipumkhatna uh, I bitna bulpi uh ahi. Nam tuamtuam kigawmkhawmte bawlkhiak ahi, huaiziakin Zomi nam sunga tribe chihte representative te telna, tribe council chihte khuampi ahi. Tribe level a kivaisaina ah mahni tribe council chiat (indongta dandeuh) kineih chiat hi hang, insung vaisaina ah a matawng leh thukhensattu hi ua, vaihawmna (decision making process) leh thukhenna dan (law) kichuptak neih kiphamoh hi. Huaibel nambing sunga tribe leader te mohpuak hi a, mimal in va kigolh, gensau leh kup sauluat ahoih kei.
Kum nih leh thum paita in Zomi Council puahphatna leh kivaipuakdan ah kikhekna tamtak om a tunichiang in a piching mahmah ta, appellate power le tawi leuluau thei ta uh chi ua, Zomi insung kivaihawmna pen soverign power nei mah bang hialthok suaksak hi. Koi a pat power piak hi uh hiam chihbel thutuam hileh, mipite lungkimna, kipumkhatna, leh deihtelna ahihpeuh leh phamoh kei.

Tulel lel a ZC kivaipuakdan leh Nam vaisaina toh kisai a I paidan sang ua hoihzaw leh detdouzaw ding om khamohlou ding hi, huaibel Zomi Council pen shadow cabinet dandeuh a bawlkhiak ding, member te kianga portfolio guanding chih ahi hi. Etsakna dingin, Chairman in ZRO toh kikar leh Tribe Councils tengteng toh kikar, leh Member te mohpuakna piak, viz. Member (Youth/philanthropic affairs), Member (Students affairs) etc.

I gen utpen ah lutsin le, Zomi sung ah representative tribes tengteng in student organizations leh Youth or philanthropic organisations kineichiat hiven, huai associations omsa te tulel lel dinmun a phiat leh paih mawk hitheilou hi, hun hongpaizel ah bel kipumkhat tak leh sa-khat taka vaihawm theih hun chu tungthou maithei. Tribe level a recognition leh tribe certificate/identity nei ihihna uah, huaidan I paipih takdih kul hi. Pawl tuamtuam I neihte uh I nambing chiat in I khantouhna thuguk uh leh I hihna (culture and tradition) kepbitna khuampi uh ahi hi. Adiktakin, phatuamngaihna chituhtu, leadership kiseksuahna, khat-le-khat kihasotna, kihatsakna, kipahtoituahna leh midangte elna lungsim petu (competitive spirit), mahni mi-le-sate tunga itna latsak theihna ahi ua, nam-chihte a dingin a insung chiat uah phattuamna lianpi nei uhi. Siat leh phat, nat leh sat, sih leh man etc. tungtang ah a vaisaitu, khamuantu leh tuanvaina nasemtu ahi chiat ua, a loutheilou in I leitung khosakna ah dinmun lianpi neilou theilou suak hi, adiakin khual gamla leh gamdang (vaigam leh pawlam) mahmah ah. Laisinna leh siamsinna ah student's organization te'n tribe chih-te sungkuan chiat ah maikaitu hihna leh lamdik leh lamtang hon kawkmuhtu hi ua a poimohnate nialvuallouh in kichian huntok hi.

Zomi Nam vai a khanlohna in nasepkhiak khenkhat ei sung ah nei a, huaibel pawlpi phuhkhiak behlapna ahi. Pawl a tam leh hatna khat ahipeuhmah, mahleh sep leh bawl leh kivaisaina ah kinawktuah theihna leh tungnun' kituhna piangthei takpi hi. Huai in kimuhsiamlouhna tun thei a, leh I kipumkhatna kekse-sak thei hi thethup zel. Buaina piangthei te I pumpelh theihna (aphih) khat bawlkhiak leh gelsuah ngaiding bang maimah, huaituh a damdo ding I headquarter chih uapat a hong suahkhiak dingdan ahi. Chihbel a tung a kigensa mah bangin Zomi Council level a Member (youth/philanthropic affairs) portfolio len penpen in a khaikawm-vek ding hileh bang achi dia?, Zomi sung a nam tuamtuam level a huaidan organisations/associations I neihteng teng ua a saipipen (head) ahih ding. Etsakna in, YPA,ZYO,SYO etc. headquarters leh tribe dangte headquarters tengteng (Zomi sung a tribes) kigawmkhawm a Zomi Youth Association headquarter vai apuak ding uh, election zong ngaisese lou, by rotation a mohpuakna kihawm lel ding, ZC level a thusuak peuhmah ZYA headquarter in a sepsuah ding hilel mai. Nambing omna khua ah bel ZYA sik leh taang a panla ding YPA etc. hilel, a khaidiat di hoihtak leh kichiantak nei lebel haksatna omlou ding hi. Khopi zawdeuh, Lamka, Singngat, Shillong, Imphal, Delhi etc. te ah bel nambing tamtak kitengpolh nuaih ahihna ah, leh nambing pawl tuamtuam omkhinsa ahihna uah ZYA branch poimoh ding suak hi. Branch ah zong pawl tuamtuam omsa a avaisai lian teng rotation mah a letsak di hizel mai, aziakbel kitelna ah milip atamtam chingthei ahi, kikhasiatsak na leh kimuhsiamlouh na omthei te pumpelh ngai hi. Apeuhmah thu in, ZYA headquarters level ah paidan kichuptak omkhin lehbel, a constituent units (i.e. YPA, ZYO, SYO etc.) in sep leh bawl ding om te semsuah ziau lel ding hi, nasep ding zong kumkhat sung in Nam Ni lop, Kut lop, Anniversary lop etc. chihkhong kaan le om lawmlawm lou maimah ding zong hithei. Tlawmngaihna hna pen bel nambing a kisai siausiau ihihna uah, hichidan social service pen ZYA level a saizoh ding le hinawn mahmah lou zel, mihing kitamta ahih chia', kua-pa sepzoh ding le hizel lou a. Ham leh pau, ngeina dan, thu leh la, gen leh sak mahmah zong kibang kim sipsip lou ihihna ah. Tuaziak mah ahi, I paidan ngeina uh paipih kawm kawm a I Nampi vai pilvangtak a isai kiphamoh lua.

Huchidan mah in ZSF zong kipuahpha henla'n, Headquarters level ah ZC member khat thunuai ah I student organisations tengteng omsak in, ZSF general headquarter vaipaw ding in nambing a student organizations ineih firfer te'n a headquarter level ah rotation mah in vaihawmlian kiguang le uh, mundang apoimohna munte ah huchimah in. I pailel dan uh et in political movement bel kisai sawm nai tadih lou abang ve, I kivaisai dan uh hong pichingzaw peuhmah phot leh chih ahi di e.

Political thinkers leh shadow advisers zong poimoh khat hi leuleu, kithulak lou ngenta himah le, hiaipen apoimohna lian peetmah hi. Meitei te leh Assamese te apat kichian mahmah. Mizote movement apichi'n naziak atheilou om kei ni, misiam leh sorkar aa hihna neite mah ahi uh a mi zat guk te uh. Peace Accord a sign zoh ua a kipahpih penpente huaidan a shadow advisers leh worker te ahi ua, sorkar a bawlna uah zong hong kilang khia ua, misiam leh dan (law) thei mizat di kichiantak nei ngal ua, a background a pangte a backbone uh suak hi. Ceae fire group a om te a ding in aguk leh gal a thil hih khualkhual a ngai nawn kei, public forum hihial kei mahleh mi tamzaw te participate theihna lampi ding zon leh geel suah ngai sa ing. Heutute'n lauhluat aneih ua lehbel thutuam, kibuk hiam, top secret chia minautangte muhbatlouh a om ding hi laizanglou hita. Zogam vai leh zogam masuan a I lampi zuihna uah iki-tawtah ua leh zong I thawhkik theihna ding un, local politics sai lou a nam vai sai taktak ni ichih leh, chihna ziak lel ahi zaw. A bulpi apat a leek, I kibulphuhna uh, leh iki-vaipuakna uh etkik a, bawlrem hileh, I maban uh limchi zaw ding hi. A structure detdou peuhmah phot leh deihhuai penpen, chi aw. I bawlkhiak vanglak leh, ZYA/ZSF te kingaknatham suaksak le, organization dangte toh kikim, kibang, sep di kituh leh kitauhtuah thei leltak suaksak maimah lou in. Kum nga dan a kinawktuah gige le khamhuai lawtel mah2.