Hoih isaklouh kibang sipsip khollou hial, aziakbel ahoihlou taktakte I lungsim ngaihtuahna piakin phattuamna neilou hi. Huai ka chihna in, bawlhoih theih nawnlouhte ka genna ahi zaw, mahni thu a ut le dah a om tazen, khamtheih chiteng hihsuk zialzial, hoih sawm himhimlou kiom takpi ahih chi`a. 2004 in Pathian thugen khat in Delhi EBCC kikhopna ah thumanphatak genkhia hi, mahleh, “a poimohlou teng in zaa a taithuak, apoimoh te`n zakhalou taget zel (kikhawmlou chihna)”, ka chizenhouh hi. Huchidandeuh mah ahi, I gen leh sak utte mi vantang ahisek, khopi dakmual apat khodak sinle chidan ihi.
BANGMAHLOU KICHIMAWK: I thuginpi ah, khelhna paisa a piang, a nit a niin, a kihhuai phamah mah, a hoihlou penpen, a zawngkhaal penpen, leh a zatna`ng le om mawngmawng lou chihdandeuh I kisinsak uhi, diklawtel, himahleh khelhna khuuk apat asuaktate siangthou ding hileh kilawm. Niin den leh hoihlou den a kikoihna in mihing lungsim ah chituh hoihlou pousakthei hi, aziakbel mahni kimuanngamlouhna leh kipiaksiatna tunthei hi. Aneilou penpen zong mihing khat hi a, ase penpen zong mihing mah hi a, aniin phamah mah zong Siamtu thilsiam lamdang hiveve, tua hangin khovel a I khosakna ah panpihtu leh hehnemtu I poimoh mahmah, himahleh kisiik denna leh kiniamkoih tawntungna pen thil dik hilou in ngaihsun khasek ing. Hoihlou den leh diklou den a kisinsakna in mipa/minu atunna di tan tungsaklou thei dan ahi. Kingaihsiatna leh zahkainate ziakin mihinpih dangte lauhuai suaksak a, midangte maingallouhna pia a, lungsim kiniamkhiakluatna in a lungsim ngaihtuahna zangsaklou thei hi, midangte nuai a leeng niilneel den ding a kingaihsutna guan hi. Suahtakna I ngah chiangin suakta, siangthou, hoih leh bukim ihihta chithei le.
SIANGTE LEH SIANGLOUTE: Biakna I ngaipoimoh ua ahi ding mah ahi, I sahkhua biakna in I nam a tawisang a, I hinpih ua, namdangte muh in I pichingsuak uhi. Tuaziak mah in mikhenkhat sahkhua biakna ngaihsaklou te I musit ua I niamkoih ua mibanglou deuh leh vualphalou dan in ikoih uhi, mahni sia leh pha-theihna nei chiatchiat kihuchih sam keile. Ahi, asiangthouloute I suaksak zel ua, namtuilou, mibanglou asuak uhi. Sinsakna ah bel, koimun peuh leh chiklai peuh a biak ziangtheih a om gige, nai gige lah ahizel a. Coat suit leh tie toh om threkthrak, siangthou kisa mahmah, lah lungsim ngaihtuahna a sianghetlou kitam. Khentuam nei a khosa, a nunglam a tute, a kuan hakte, lasaloute, a kikoungaihloute, athuum kuunkuun loute, petamloute, kikhawm zihzehloute, buainatuam neite muhsithuai sa, khuangpuvual, eh VIP enclosure a tutkhaklouh bang chu ut bilbel lou, chihdan hitel in.
KIPELAWTEL KEN: I paidan khat ah, midangte tate sahkhua leh khotang vaisaina ah kipakta tuntun, mahleh mahni tate sawl kholzellou kitam. Pa pilvaang khat in tuailaite vaisainate ah khopi a khangliante kihellou, siamlou leh chinlou uh hia, chi, nu leh pate nusia a kuankhete mah makai in akipei ua, chi, “lungsim pichingsa a tup leh ngiim nei a hong diangsuahte ahi ua, pilvaangtak a gamta theite ahihna ziak uh hi`n teh”, ka chi lel hi. Adiktak in bel khopi a khangliante vakthapsak zenhouh le a huntawk hon thei mahmah lou ding uh hithei, khotual lua leh maingal lua ahihna uah, a innocent luatziak ua mangthang baihdiak ding un ngaihsun laizang ing. Vantang nasep leh bawl ding omte ah zong khotual naupangte sangin khualgam ate phatuamngai zaw uhi, feldan kibang mahmah lou hial hi. Tuahkhak tamtakte ziak ahi ngei di, phatuamngaih luatziaka mikhual te vaihawm deihlou, chih kei mimal mahmah tung ah tuakkha ngei laizang ing, lamdang kei. Ahia, mahni mohpuakna leh kuankhiakna san manghilh zen a gamtat bel lammanna khat hileuleu. Nangkeleu kisa ken,nangtellou ale hithei thousam ahi, hunpiakdan siam in.
AWLMOH HAU: Sep leh bawl ding omna peuhmah ah sum poimoh peetmah suakta, biakna natan ah kigen munpen. Thilthawnpiak omlouhna gam omnawnlou asuak, athoh tam theithei te lalna hiziang. Aneilou zawdeuhte khualna omlou mah bang, sum hat a pang sahkhua isuahsak ziak un meithai leh gentheite maimial dundun, mi lak a tel zong zumhuai asak nading uh tamsak peuhmah liang hang, khontesep thohtute min simsuah leh a thohzah uh gelhkhiak duanduan aom chiang in khenkhatte maizunna ding tampha ngial e. Khemkhem chikei ni, khontheih pen bituk hiam tukluih hiam hilou a, michihte kingapzah leh kipiakzohna ah koih le, abawm bawlkhiak (project guan) lam mahmah ah pilvang deuh thei le a phatuam dawm diai. Khenkhatte hakkol giksaktu suaklou a akouzanna ding uleh asuahtakna ding uh pe zaw le, chihhuai natel e. Thukhat ah, offering chih ahi, ei lakah bel offer hilou in ngetthoh leh batsiik a kisiik ahi ta ve. Tamsemsem leh anuam hi, chihna gam ahita, tel mahmah aw.
HUN RANGKACHAK AHI: Nu leh pate muhphaklouh a laisinna kalsang suante omdan I vei ua I awlmohna uh lian mahmah, pawl tuamtuamte ngaihpoimoh khat ahi, tuaziak mah hilou hia, khopi saptuam I bawlkhiak zungzung nasan uh. Kum nih leh thum lel laisin dia kuankhiate deihthohtak in I talkaih ua, saptuam nasem hizenlou lah mohpuakna aliangkou uah hakkol giktaktak inga liahluah ua, naupang pilvanglou in bel nuamsa in ahun peimang hi. Agintaklouh karin kum liam zungzung a, atheihsuahtak chiangin kikhelsau mahmah man sek hi. Mite pahtaak, mite mittukna leh mite deihthoh hihbel nuam kha mah ve, addictive khat le ahi, leadership neitheite nuamsa in om phenphan uhi, nekzon theihna lah hisamlou, damsung a kah leh hagoina manoh khak ding lauhuai mohlou hial. Thil lamdang khat leuleu bel, mahni khua (inn lam) a kikhop le ngaihsak ngellou, college kainamun a hahpan a pang mawkte ahi, laisin ding taisan zen leh manghilh zen a sithunam zen a kipei tampha peuhmah. Lungngai theite a ding in bel alungkhamhuai lam ahi, zirlai nei leh siamna delhte adingin tuachibang a kiheltamna in a gahsuah ding hutsak thei hi. Hoih I sakte hoihkim khollou a, kei hoihsakdan le a dikpen hituan samlou, mahleh, diksim lel. Kienthak ni.
MABAN DI TAM SEMSEM: Khopi ah laisin dia kuankhia a, mite theih khollouh a mahni omna kilkhat a hih chiuchiaute hong paksuah zaw uh ade aw, ahuntawk theilou kiikeei a pawlpi om teng leh sepdi omteng maipah gawgopte sangin. Nu leh pate theih dia hoih mahmah bel, tate maban kalsuanna ah, muhphak a le omlou, asinna ah lunglut lawtel petmah chih dan thute zaak hileh, mite`n a phattuamngaihna a gen kheukhou sang un, ahangbel, mi tamzawte tuachibang hih vialvial kawm a mahni sinna a bahloh tuansamlou mi kitawm mahmah lai, extraordinary kitamlou hial, I sinlai uh zoulou simpian ngenta kihi. I khotang vaisaidan leh paidan tangpi ah, khat sepkhit leh khat, anou dang piang zel, maban dang om zel, thupizawsem a vaisai dingdan gelna ngenta ahi, sepzoh chih a om kei, abuai khavanglakte buaiden uhi. Kawkhuk thukpi a kia toh kibattheih mahmah hi, kipeksuah malak ah tuachibang atmosphere leh environment tuankha vanglakte nungkik malak ah, hahpan semsem ut ua, leadership leh mipi husa nopna ah tengtakpi ua, numei toh kithuah khakna chance zong mu ua nuamtal in ommaimah uhi. College library a hunzang khinkhian, college functions a kihel thei, debate, seminar, sports, leh literary program a kihel, mahni heutute leh kaipihte toh kithuah tittit theite hihzawk ding ahi. Nam vaisai, saptuam vaisai leh khotang vaisai pen hun neite kia`h. Na hun ahong tun chia`h hih mahtham niteh, manmohhuai kei.
EI KIA: Mihing kibanglou takpi ihihna ah khanvual ngaivelvul kiom hi, eiloi bel midangte lawmbawl sang a eimi mah toh kithuah tuktuk utte ihi uhi. Midang toh kithuahkhate bel mimangthang hisak leltak, thumpih ngai suahzeihte ihi. Kum tamlou college kai hunsung khong a midang I thuah keileh hundang tamlou hial hi, I chipih kia toh valukang hon omkhawm dandeuh a I chiak nuanua pen khantouhvai lawtel lou hi. Khangthak te`n lungsim liandeuh pukawm a namdang leh hamdang neite toh kithuah a, horizon nasuklet deuh ding uh ahi, laigelhtupa sulnung zuihthahah ding hilou hial hi, tuabang chance mukha teilou pi chu aw. Khopi a om sam, khopi a lasim sam, khopi a khangkhe sam, vaipau lah sinlou, sappau lah siamtuan samlou, degree zaw latei sam, chih ningneng sangin, vaipau leh sappau a Pathian thu gen thei hial ding a kisak ding ahi. English worship service khong ah kikhop di aka, college kaiteisam a di inchu, kizir hun ahihziak in. Ei kikhopna ah chimzen in na damsung teng na chiam in na omsin ngal a.
TA-ZEN DE: Numeite hun neihdan leh pasalte hun neihdan kibanglou hi, atamzaw numei laisinte a melhoih laitak uh ahia, tua hun a ahitfuh ten a hinkhua uh bawlthei ua, koppih kichian laidok uhi. Pasalte bel sinzawh chia sep di zong, khosakna di ngaihtuah kiphamohte ihi, nungakte melmak ding chihna hipahlou in, ahuntawk a kithuahdan siam kiphamoh tazen hi. Khenkhatte nuamtal malawk in, khovel liau ziahziak ua, nungak nih leh thum kop ua, ahun uh leh a sum uh peimang zomah ua, lungkhamna in atawp chia`h tuisabuah pongmawk, tazen aw, pilvan` hun ahi, na hun manpha kikhelsak mahmah ke`n, golden chance tamtak mansuah ngapte mah a hangsan leh lohching hi ut ngial uhi. Mi eenhuai I sakte huchilawtel khollou hial ahi, lungsim senna lam kibanglou, na sinlai ah na lungsim bursak chot zaw in.
Kumei dandeuh, hun poimoh hau kholdiakte ihi, tuazoh chiah phuaktawm hunbi lopding nei deuhrengte ihi (birthday khong), mipi punkhawna teng a buaina bawlthei hunkhop kiom deuhreng, tuachidan mun leh mualte ah kiheltamlouh hoih hi, kisualzakna khong muh sangin muhlouh a chidam zaw. Lawm haumahmah, dawn deuhreng thei zong kiom, sinlai nei hisam a, nu leh pate vaaksa hizawmah, huchidan ding hilou hial hi, zu uum buara bag a khaikhiak loihloih ding neitheite maban ding ngaihtuah huai diak.
Mahmah aw; keizaw hichimai ka hi, suanding le neilou, ichih chih sung ua thil kikhel tam peetmah ahi, huai sangin kei le kua ka hia, mi`n ahihtheih ua leh ken le bang hang a hihtheilou di ka hia, ka siangthou a, ka pil a, ka fel a, ka hat a, chitek the le. Ki suneu neu lou in, kiniamsak sak lou in, kihhuai kisuah suah lou in, kisuaktasak takmai in om feefaa le khovel I maituahna ah I thoveng deuh mah na. Tulai khovel ah a chalngam ngam ahi a vualtung tuangte. Vaigam a teng ihi a, I hihtheihlouh pi leng hihthei hiawmtak a om fife ngai ahi. Kisinsakna dan le khek zek le phatuam zaw ding hi.
Vai naupang lakah na tate maingalloutak in om le uh kivuakhuan den di uh, soisa den di uh, aneih sunsun uh suhsak laidep di uhi. Huainaksang in “ bawite aw, na sikul uah vaite vuaksa aa na om ngeingei ualeh, vuakbehlap na hi din g uh” chih ka thupi ahi, khatvei mah le vaite khut thuak in kap neelnuul louhial uhi, huaimalak ah, vaite ngeibet zawdaih uhi. MK Gandhi moral lesson te a pangkai nawnkei, biang lehlam doh chu kahase. Kisuakta sak deuh a om thremthram didan aka, niin lua, bah lua, sawpsiang zohlouh, chih khong sangdaih a.
Midangte demdem ken, non chi ngei di, demna dan a ilakleh dikgeih, himahleh I etthak di leh I bawlphat di om khathei takpi hi. “Thou inla dingtang in, kuankhia inla, na lawmte delh in. Ommun a ektehtut maimahte gamlaat inla a mitmuh phak unle omsam ken. Mahni kibawlhoih sawmloute toh ankuang sawkkhawm kei zaw mai in”. Sek mai, chih awi louh, sekmai na chikha di uh.
.