APOIMOHNA: Hunawl zatdan siam haksapi ahi ngei ding, kisinsakna mite`n nasatak in neisek uhi. Khopi ah badam khehlouh sakhau a kuah kawm in bus ngakna, bus tuanna, rail sung ah ne ua, mungfali pen vaite`n time pass chisek uhi. Cinema etna ah kanpuak (pop corn) ne phunphun ua time pass chitaget zel uhi. Vaite time pass dan toh eiloi` time pass kibang khollou hial, amau hihdan sum heksak lua leh a poilua hilou hi. Michih in lunglutna tuam neih ding, hobby khat peuhpeuh neih hoih ahi, chih kinak- gen thei lawtel, college kaithak leh university kaitheite ngialhouh, admission na leh freshers meet hun chiangin mite dot pipen ahi. Nam changkang zawte lunglutna ziak, leh a poimoh ngaihna pen uh bel na hunawl zatdan ah na mihinzia leh na hihna kithei thei hi, tuaziak takin kimuhna masapen ah houlimna makaitu leh ice breaker ahi hi. Eiloi bel kuahiam khat in na hobby bang ahia hon chitaleh, ann nek, ihmut, nungak hel, vasa bet, music ngaih, migensiat, vansuksiat, biri tumbang zon, holak vak, om maimai, laithai kimawl, zu dawnkhawm, Zogam thu houlim, khamtheih hih, facebook khoih, SMS, phone a kihou, Pathian thugen, committee/meeting a tel, social work a kuan, lazir, kikhop, hotel a tut, le`nkhawm, chih khawng I dawnna uh ahi tangpi.

SINGTANGPA HINKHUA AH: Singtang pa leh singtang naupang a dingin hobby tumta om thei khollou himahleh, hunawl zangsiamte a dingin khutnasep leh thilbawl ah panlak theih veve. Khenkhatte bel gamvak in hunawl zang ua, meh ding leh nektheih minarante muhbatlouhte pawsuah leetluut theizel uhi. Nga mat, sava veh leh aisa sawk chih khong singtang naupangte hunawl zatna khat ahi. Lou lam a sunmeh huan, haichi poutung veen, singlukhuahkham put, leh inn lam a tui tawi, puan sawp, inn ngaak, nau don, inn hahsiang, huan khoh, puanphan, puankhui, naanglem, tutphah bawl chih khong om maimai tang a hihtheih ahi veve. Zodawn naupangte hun piakna tamzaw bel gamvak, kangtarai bawl, thaangkam, vasanou khoi leh sialkum toh chih khong ahi deuh. Hun awl ichih chiangin, nasepna a abuai phapen pen in zong hun awl mulou ki-om lou hial, lounasep apan tawldam hun, aziak om a lounasep kuan heihlouh hun, vuahchiin ziak etc. in nasepna nawngkaisak a om maimai hun asuak, himahleh mi kizen leh taimate a ding in tut maimai kawm a hih senglouh naanglem, herhsawp tutna bawl, vanzatte taathiam leh repair bawl, puan kisia leh kek siate thop leh repair, leen khui (fishing net), naupangte deihzawng bawlsak, numeite vanzat puahhoihsak, inn sung van, inn baang, inn tung, inn ka (verandah), lupna leh adangdang bawlhoih leh khoih ding muden uhi.

Huaiziakin, Zodawn papi te`n le hobby tamtak neithei ua, tua te`n noptuamna tha pia a khenkhatte mi tung a lengsaktu asuak bok. Naang lem koih hoih tiltel te`n apoimoh hun in thapaih zen in zong ngeilou ua ready made om ziang hi, Leen khuisiam te`n a hun geihgeih in Nga bengthei ua, midangte sangdaih in mehlim leh taksa in amamoh ngoihngoihte a khintung uah khai teertuar uhi. Thangkam siamte leh sabeng siamte zong a hihfuh chiang un nuamsa hiitheet ngiah uhi, a khindang uah sa meh seenglouh vom ngeingoi in athau leh atui kaikhe te`n mei taakpuak tuartuar hial. Gamvak hatte mah in meh ding leh nek ding pua ua, aisa thu, gawtuai hou leh a dangdang khawkhaal chiang a meh ding khetching thei uhi. Mite sang a hatzaw hibeekbeek tuanlou, lah silh leh teen a tasamlou singtang nu leh pate ichih chiang in, chiindan khat nei hi ut mahmah ua, huaibel mi naseplouh kara patkheek, puanphan, uankhui, puan gat hih ngitnget leh hunawl aneih dandan ua maban sunzom zelzelte hizaw uhi, a peihmawng ziak uh leh a hauhsak mawng ziak uh hilou hial. Huchidan a hunawl zatdan siamte mipil leh khosak siam suak uhi.

ZODAWN NAUPANGTE: Zodawn naupangte thapaihna lianpente anopsakna zawng uh khoih ahi, innocent tak a hun zattheih lai hunnuam ahi, khanvualte toh kithuah tiktik a apoithei leh poilou leng khual khollou a nileng leng a hun zat pen ah gim leh tawl zong kiphawklou, nitak chianga ann kam lim sak, ihmut lim saktu, mumang hoih taktak, lauhuai taktak musaktu a suak, khantheihna thuguk le ahi. Hunawl zatna ah kithunun leh kietkai pimoh zel a, midangte poikhoih khak theih leh amau theihbatlouh thil saupi poisaktu, a hinkhua uh bahsaktu ding a khoihkhak uh lauhuia pi ahi. Laizial tep, khamtheih hih leh guktak laktak, zuau genchiing chih khong a huntak a mekmit pahpah kul hi, huaidan hikei leh naupang in a hihpeuhmah uh, a khanvualte khoih peuhmah khoih ut ua, chiam tei ut ua, lampi diklou ah lampial khathei uhi. Nu leh pate mohpuak keleu hilou in a pilzaw leh a theizawte makaihna kiphamoh mahmah, kisinsakna neih zelzel tuakpi khat ahi.

Kou neulai in Singngat leh Lamka kikar lampi kibawlsan lai hiven, suangsek in kilohna ding tampha ngial hi, ka pu heu in hunawl zatna dan in seeksek ung, himahleh bawng zon` bawng chinna ah lampigei a suang kikoihkawmte lamkhang ah khukkhe tultul sek ung, alkatra barrel satvang in nisanuai ah kaikhesak ngeingoi ung, a lian tata a phur a pang zawmah uh, gul leh sava alkatara tui ah a taan chingin nuam kisa mahmah, ngaihtuah kik chiangin khasiathuai tazen, aphatuamlou a thapaihna ahipen, mahleh hon khoutu ding omlou hizel.

Lampaam singpeuh baan satpuk zialzial khong thil haihuai pi ahi chih kiphawk khonung. Kangtarai bawlin kithapaih naak thei ngial hi, apei di pilvangtak a satsiam ngai, singkung lian huntawk takin thuak, apei vutvang ngai, gawtaak tak guanlut a siamneeltak a sattan ngai, apei zawl di sing taaktak siamneel tak a suih ngai, sihzou singkung bangzah hiam in a body building na ah thuak nawn, a zawlpi pen lianhuntak ahih ngai zawmah, vanpuakna di leh midangte tuanna di a cabin bawl ngai, a driverpa seat chu nuamtak a kibawl, pute temhiam leh sikkilhna chu hektak ahi, tai chu kithuak zihzeh mai. Lamsuk tuanna ding kia a kangtarai zangte chu a phattuamna bei ahi, van puakna, tui tawina, singkhuah puakna leh siing leh haithak puakna ahihleh phatuampi hi, thaa hondawn mahmah a, zong mi thum leh lite nasep ding semzou pahpah. Singngat ah Pa Roubul pen Headmaster ahihlai nasan in kangtarai hahzat mahmah pawl ahi, azi toh skul kaitawp chia`h lou kuan dingin kikhoh khe churchur sek ua, khatvei Ngaikhanching class X exam theilou hial in a xcident pih kha chih chauhlouh chu.

SINGTANGPA HOBBY: Singtangpa Hobby ding gensak zual le, a poimoh loupi a Lamka hoh pahpah pen sum, hun leh thapaihna liantak khat ahi, a chiinchi kei. Awllen nikhua in inn sung puah, inn kiim puahhoih, inn sung van bawlhoih, naute makaih leh nupite panpih aki-thaman zaw di. Meh ding zon leh gamkuan zong thil hoih mahmah khat ahi. Laisim utte a ding in laigelh hoih leh Bible thute kipahpih tak a hun zat le a kisik-huai kei di. Pipute chiindan leh paidan pen (zu luup a kithuah, khuang leh dak tum a lasak pen a hunawl zatnadan khat uh ahi) hithei nawnlou ahihna ah, khosung, vengsung leh sahkhua thil a kihel, len`khawmna a khuangpu a pan chih khong hunawl phatuamtak a zatna ahi ta. Tuchiangchiang in chu thil peuhmah sum suahtheihna ngenta ahia, tuaziakin loupi (lou gamla) neih banah leipi (lou naivai dandeuh a farm neih) ahihke`h huan lianhuntawk neih di ahi. Manta, samphok, mantakha, thaksik, siing, zanah, tomato, allu, lengmasek, singthupi, khangkhuh, nahtang, kawlkai, baal, be, sipi, aigechil, chingiik, hakai, singkawlkai, kawltu, lengthei, theihai, theimul, vomva, theikha, theibuhphai, naspati, iskut, theihe, kawlsing, gua leh mau, leh adang dang chiintheih chiinmoh ching le, sum naak kangman mahmah lou hial ding hi.

I huanhai teng Lamka tung pahpah thei ahihna ah, hunawl zatna leh naupangte chiilna, sinsakna suak ding a, thil hoihlou leh lawm hoihlou a thuahkhak ding uh zong a daaltu liantak suak ding hi. Hithei ngial leh Ngakul, Akk khoina, Vok khoina, ui vulhna, bawng khoina, zawngtah farm, kel leh beram khoina, lung khoina (silk worm), chih khong a pansuah thei om le, hunawl zatna diktak leh sorkar panpihna luan`lutna naak hiding a, naupang om maimaite hih ding leh sep ding kitatsatlou hial ding hi. Zing baihtak in naupang hong thou ding ua, sep theih bawl theih hon maipah ding ua, mohpuakna guan le a sepsuahna ah pan hon lathei ding uhi. Nitak lam in huaimah dan in hih zelzel ding ua, a sikul kaina uh bahloh lou hial ding uhi, aziakbel a pimoh lou a hun leh tha sengseng thou ahihna uah, gamlak mun lauhuai khong leh lawm hoihlou thuah a khamtheih gu a I mansak sang in a nahloh peek zaw lou ding hiam?

LAMKA VAANGKHUA: Khopi zawdeuh Singngat leh Lamka khong ah bel huanhai bawltheihna tamtak omhi, mahni meh di bek chu chiin teisam di hia, ka chi chi sek, a lei a lei thoh di ringot in mipi himhim in I ngiim ua hiven. Zing thoubaih lah hihding theilou, kholak a vakvak maimah, hotel a tutu kitam lua, kou khote khat Vela a tangval lai in zing dak 5 in thou gige, station lam ah hihding nei hi-omtak in paiphei pahpah, singpi chu mi zingthoh ma a nou thum beiman, hobby khat peuhpeuh nei le bel hun leh sum kipaih mangthang tawm deuh ding hi.
Ak khoi le, kitchen garden nei le, inn sung ah workshop nei le, khenkhat siamna tuam neite khutsiam silbawl kisaan le a leitu ding hong piang mahmah ding uhi. Pupa vanzat, Zomipa ngeinadan a seeng leh tui um, helhhot, mui, siambu, sum, khuangta khuangpi, tuibuk um, dorhon, thuul, zabel, buuk, buhtuhbawm, nam, ngongkol, tu, heipi, veitem taktem, zomi meisah, dakta dakpi, annnek kuangpi, tuithawl, leh adang dang hihtheih bawltheih om di ahi, enkiimvel le. Game tuamtuam lunglutna neithei le, music khong pahtakdan thei le, lungsim leh taksa sawizoitu hiding ua, damtheihna hon pe ding a, hunawl mumallou tak a I zatna pen kiam tuan mahmah ding hi.

Zunkhum natna, BP natna, kawng natna, thgui natna, sung hatlou, ann duhlou chihte nuulman` hong hi ding a, Zu inn leh laithai (gambling) kimawlna zong kiam tuan mahmah ding hi, nohchizuak te`n le sepding dang a zon hial thok uh ngai di aka hia, maw le. Hahdamtak a om theihna chu music ngaihkhiak ahi, lungsim a tawldam sak a, hehna a paihmang bok. Meditation chih dandeuh hun fianrial neih zelzel zong ahoih hi, mualtung a kahtou in na kiim leh kiang, mual leh guam, vasa leh louhing dipdip enkiimvel lechin, na tawl a dam tuan viau di, lungsim leh taksa lam ah. Sungkuante gamvakpih leh hunnuam zatpih zong thilhoih mahmah khat ahi.

VAIGAMPUR AH: Khawpi zawdeuh a tengte ahih leh, sepna ziak, siamsinna ziak, sep ding zonna ziak khong ahi tangpi deuh. Internet, facebook, TV, computer games, music ngaikhiak chih khong a hun paihmanna uh ahi deuh pen. Papite hun awl zatna pen chu, zing dak giak ma a thoh louh, sun chiang a TV et, nitak chiang a movie leh football/cricket et, nitak chiang a lawmvual ngaihte toh hih zialzial, ut ut gen a gam leh nam thu khong a theipen hi-omtak a gen kuunkuun chih khong ahi. Hun sawtlou chik nungin gil hong puak a, maivun hong sah a, siatna in hon buak zawmah hi, zunkhum natna leh BP natna banah sin natna ahi deuhpen.

Khenkhate taget lah, mahni muhsuah bak a khosa, bank leh sumbuk tuamtuam a bat theih leh leitawi theih teng (credit card, GPF, Bank Loan, private loan, pawlpi loan) leh inn lam a sum ngenngen maimah kibeilou. Naupang om kholou vanglakte nu leh pa kiang tunkik ding utlou ua, lohsapnate selgu ua, hih tuamtuam nei hi-omtak in kibuaisak phian uhi. Huchidan hinkhaw zangte bel zing baihtak a dak 12 PM khong a thou pahpahte hi uhi. Zaan chiang a lah ihmut nachang theilou, buaina haupenpen hizel.

Khawpi ah recreation club, morning walk, tennis club, gym, football club, cricket club leh mahnitawk a hunawl zatna ding tampha peuhmah. Zing thoubaih te`n park a exercise ua, atek akhang om suausuaute a muh chiang un thathohna leh kithalawpna pia hi. Golf leh games tuamtuam lunglutte a ding in hunawl zatna leltak hilou in mahni kithununna leh taksa kisawizoina nei ua lungsim leh taksa ah damtheihna leh tawldamna pia hi. Music khoih theite leh music ngaina te a lungsim uh hahdam tuanse chi ua hobby hoih khat ahi, music siamlouh leh lasak siamlouh bel khatvei piangkhe sunsun a ding in thil poi mahmah khat ahi, khasiathuai hial lah aw. Laisim lunglute a ding in Library hoih taktak omna hi a hunawl zatna hoih khat ahi leuleu.

Annhuan mehhuan (cooking) le hun zatna hoih khat ahi, inn kiim inn kiang, inn sung hahsinthou zong. Pakkhoi leh kitchen garden neitheite a ding in kithaman pi khat ahim leuleu, lungsim tawldamna pia hi. Lunglutna khat peuhpeuh nei le I hinkhua manpha tak a zatna lampi khat hiding a, awlmohna te ziakin lungsim hoihlou leh kinak kiselnate thaimang ding a, migensiat utna lungsim lengmangsak ding hi. Laigelh utte a ding in hunawl leh hun thawveng muhlouh a om kei, utna leh tupna ahipen. Thadah ziaka lunglutna nei peihlou na hih zenhouh leh, kisakhe peuhmah phot in, zingkar dak guk vel in thou le chin a haksatna kar khat vel in hong bei ding a, huaikhit chia`h zaw habit a hong suak lel ding hi, na taksa mahmah in na lupna apat hon nawhdok ziang ding akei maw.

THUKHITNA: Midang leh namdang te`n na hobby bang e, a hon chih chiang un, itmut, ann nek, om maimai, zaw chi nawn mahmah kei ni, na vial vakvak sung in (tangin) bang hiam khat, thil phatuam di hih lechin a phatuam zaw in a gahloh ding a omzaw khamoh kei hial ding. Na seplouh ziak a, sep na tuplouh ziaka, ompih ding baanzon kualkual pa/nu na hi khamoh kei hial di, ki enthak in. Kei ka hobby maw, hiai ahi…………. chi a dawnna pe geihgeih thei ding in a teek a khang kisin in kihanchiam tek ni.