Sulnung: I pipute sulnung muhding tam hetlou hial, eite muhphak bel khawmual suangdoh khong a kigelh belbual ganhing lim leh mihing lim peuh atuanna te ahi. Khosakna haksapipi himah le uh ahunlai chiat un chiamtehna leh theihgigena suangte phut ua kihisak thei ngial uhi. Sakhuana leh Biakna lam ah bel gelhthoh omlou ahihna ah Siampute a beiu`toh kiton in mangthang suak hi. Ahangbel sumtawng biakna chi ua huailai a sumtawng bel innkil khat ahih maimah chiah (peem vialvialte) khangsawn sawnte muh ding omlou suak, milem belou ahihna uah muhtheih ding bei kiikei, akngesawm chih bel amukha kitam mahmah sam leh kilawm. Damlouhna leh tuahsia kisaknate ziakin kithoihna nei ua, huai banah numei leh pasal naupang apat piching ahih ding chiang un kithoihna buatsaih ua a utlou sasa leng chihluihna toh hihsek uhi. Ka theih banlouh himahleh innsung a thiltung ahihziakin kon taklang zual di`, ka pu naunu Ngaichin (ka pi) pen a nungak lai apat Christian ana hi a kithoihna neih utlou bilbel chi ua, a nungak lai in sihna tuakkha zenhouh hi. Pipute muhdan in bel a kithoih utlouh ziak chi maimah ding uhi, a hansuang ah “Kristian Nula Fel” chi`n kigelh kiukiau hi (1940`s).

Pipute sulnung I muhtheih bel zi leh pasal dia kiten dan leh mou vanken kipiak dan ahipen. Tunitan a zattheih leh zuihtuak mahmah paidan mumaltak, lungkimna toh neih le lam kikensak eem-uum sang in, bikhiahna chiang nei ua, man leh mual leh mou vanken tungtang ah dan kichiantak a neih ziak un hahdam tuan mahmah ding in gintak theih hi. Huai I chihna hangbel Thahdou leh Vaipheite kiten dan I muh chiang in chizauhuai hial thok sakna om, huchidan paidan diklou neilou te ihi, chihna ziak ahi zaw. Kiten dan ah gen leh sak a tam ta,Christian kitendan leh tianlou kitendan khong gelhkhiak muhtheih leh ngaihdan nei I tam, ahia mou vanken pentak ah kikhanglou nailou lailai suak hi. A neizoute hih ding gensak hilou in, a neilou te zong lungkimna toh a kikhakkhiak theihna ding un lampi khat bawlkhe le deihhuai sakna om hi. I paidan ah, kua pat chih sangin akpi ngoh phot le, kiten nitak chia`h kuanlamte kivual dendon in mou vanken saang dingin ding dim khepkhup ua, piak ding nei mumalloute dinmun derthawng suaksak pah. Kikensak louh ding chi hilaizang lou ihi,anei te`n kengsak mah ni, ahih dingdan tuam, leh kilawm zaw om khamohlou ding hi. Paite Tribe Council in dan tamtak bawl ua, mou man bikhiahna tanpha bawl uhi, ahihleh mou vanken pentak bikhiahna om theilou adiam? Lawii-nitak chiang in pupate kipiak teng mah toh kuansak baam baam le bang achi dia, ihihna a tawisang zaw diam? Kingaihsun ni. Gam kipiak, van thupi kipiak, gari kipiak etc. chihte kha a khongung deuh a kipiak khiall-khiall di`, leh mipi theih a hih sese kuul khollou ding hi.

Pipute mou vanken tangpi te: Sa seng, puanthuah, tu, sathau um khat, Puanbu, . Khenkhat te`n I pupate khosak dan ah tua van kikensakte thupi lua ahi, amau hun lai a dingin kilawm huntawk ahi ichi ngei ding. Hi e! I khosakna a changkang ta, neih leh lam leng ihau ta, iki pezou chiat, himahleh pipute sulnung zuihna pen a symbolic (cheptehna) bek in zui le, paidan leh ngeina dan kichuptak neite ihihna taklang ding hi. PTC te`n panmun hon khoh le uh I maban ah chiamtehtham ching kalsuanna hong hi ding hi. Tua dan ahih kei mawkleh, Meiteite leh Vaite kiten dan in hon zeelsuak ding bang maimah veh, leiba zen a kiten in kongrou a suukei, mihing kiitna in thupi gen zaw hi, chih I theih sa chiat lah ahi ngal a. Nagate vaisaidan hautak lawtel mahmah chih zong thutak ahi, leiba ek-ok in a kiteng ua, kiten zoh chiang in leiba a din kuihkuih ua, hoih salou in mass marriage a pansuah ua, kizen mahmah linlian, chi celchul uhi.

Kitaitehna: Pipute khangthu ah kitaitehna namenlou nei ua huai bel kithupisak utna leh mite tung a leen utna ahi. Galhang leh mihangsan te`n tanmun hoihtak nei ua, tei leh tempi, leh thakgum thatang a vaihawmna dinmun ahi. Lal/Hausa te bel pianken a kiluahsawn te hi ua Lal sungkuan te thuneipen suak uhi. Huai zoh in mihangsan leh khosakna a lohching tungtuante dinmun liantuan diak a, huai bel Thangsuah zou te hi uhi. A sakhuana u`toh kituak in, a phaktawk un nasep silbawl ah kidem takpi ua, leitung khosakna ah vualtungtuanna leh mite tung a leen utnate ziakin, leh sih nung tanpha a nopsakna a lunggulh ziak un hahpan thei-ngial hihtuak uhi.Mihangsan te gamvak ua, nisa leh vuahtui kai nuai ah gammang lak leh gamsate omna mun, minaran te phak ngamlouhna munte ah sabeng in thapai ua, azu asa khuallou leh mahni hinna tanpha pe-ngam hial in gamsa lauhhuai savom, ngal, sakei, zangsial etc. man uhi. Huchidan a gamsa tamkuamtak manthei mipa bel mihangsan leh mithupi suaksak ua, amah leh a Zi pen Thangsuah nupa suak thei uhi, huaibel gam lam a Thangsuah chi uhi. Inn lam a khosathei mahmah, buh leh bal hau mahmah, kum sawmnih vaal vingveng sung mahni khamkhop khoukhia leh gan hon tamkuamtak neite, adiakin sial honching tak neite a ding in le Thangsuahna omsak ua,Inn lam a Thangsuah chi uhi. A kipuahchahna un annsuk, annseep, singpuak leh tuitawi sikhop thei mahmah ua, zubilh tamkhop bawlkhe ding in hun sawt fe ngai hi. khosung mipi tengteng banah khokim khokiang a mi tamkuamtak paikhawmte zu leh sa in vaak uhi. Niang leh tai in nek leh tak vaisai ua, nitam kuamtak khuangchawi churchur maimah uhi. A gendan un, thangsuah dingte an-suk leh buh-seep in khozang in naasem ua, an-suk buakkhak leh seep buakkhak te luah (top) phallouh chihdan ahitel ve. Kichapousakna ahipen, zan khuakhua in laam buungbuung ua laphuak thei leh lasak siam khong tampha thei ngial chi uhi. Nuamtal kisa law-se-lam luu leh taw theilou hial in hun zang mahle uh kiakniamna in vaidawn a, Thangsuah himhim a suah nung ua a khangkhezou taktak om nawnlou chi ut hial uhi. Ahi, a vualzawl huailou nasepna le ahi khamoh kei hial di.Vawrtawp tung kichihna hiven, hoihlou mah zaw hi`n teh.

Banghang a huai Thangsuah hih sese ut u`hiam chih leh, Lal hihna pen khanggui kizui hi a, lal dinmun tuhkhiak theih hilou, lal teban a mithupi suahtheihna bel Thangsuah mah ngai ana hi ahi. Singtang ah tui haksa tawntung ahihna toh Lalnu in tui a tawi lebel tuikang a ngak ngailou, midangte kaan a tui dim ziau, huchimah bang a thangsuahnu in Lalnu zoh a tui dim thei chi uhi. Puan-gial baat thei ua (silh) hinman om sa mahmah ua, sih nung tanpha a nopsakna mu-ding in kilametna nei uhi. Pialgal paina lampi haksatak mai, khaam kenselak leh zum leh hiam karah a khaa (soul) uh a chiah ching in panpihtu hoih nei tuanse ua, a sa matte un maa kai a, a tung a tuangkawm in Sahnu leh Pawla in kong-khakpi honsak pah chi uhi. Huchiloute bel Sahnu in buaisak nilouh a, Pawla in thalpeu khauhtak in ana kaap ekek hihtuak, kum tampipi huai kong-khakpi kihon` ding ngak ngaisak hihtuak bok. Huchipi in zong mi narante leitung a akhosak dan mah un haksatak in khosa uh chi laidep uhi. Huai Thangsuah Nupate bel a taaksa/phaisa ne in niang leh tai in nuamsatak in paradise ah omsak uhi, mahleh a tate un zui theilou, a nopsakna uh siim theilou chi zomah uhi. Singtangpa mimawl lung-gelna leh ngaihtuahna ah chu, uthuai di mah akei.

Huchidan a dinmun ngaina mite ihihna uah, I gamsung a Pawlpi tamkuamtak ineih nasan uh le huai lungsim mah paisuak ade aw, the Land of presidents achihnasan tak uh. Mimaltak a muhdan in bel, leitung kitaitehna politics leh business a vualtungtuang, vualzawlna tangtuante tulai khovel ah Thangsuahte ichithei mai di e. Mitamtakte masuan leh kingakna hi ua, nam leh gam vaisaina ah mohpuakna liantak a liangkou uah kinga a, khangthak hong omzel dingte maban ding amaute khut ah kinga takpi hi. Pipute muhdan leltak toh kibanglou deuh, muhdan kichiantak nei a mipite a hon lamkaih uh deihhuai hi. Contractor class te I telsak diam le, amau khut ah le I gam maban ding kingatakpi hi.

Sulnung Zuihtuak: Hihna tumta neih (cultural identity), chih toh kizawtawn mahmah khat leuleu bel pipute hunnuam leh hunbikhiah zatdan khat sappau a Harvest festival ichisek ahi. Taanglai in Pawl Kut chi ua, Khuado pawi leh Chavang Kut toh kinaihpen hi, I omna leh tenna kibatlouh ziak leh I pau-le-ham a tuam ziak zong hi kha ve. Pawl Kut pen Zomite Kut poimohtak hi ngikngek a pawltlaak hun, buh leh bal lakkhit hun chiangin hiai hunnuam uangbawl thei ngial uhi. Gen zong nei takpi hihtuak. Kum khat sung vingveng nasem in thapai ua, gamgiak leh nektak zonna ah awllen hun neilou hulhual in azu asa nuai ah,a thaneih tengteng uh sengin kawl a nisuak apat kawl a nitum tan dong in septheih maimoh mai uhi. A sepgah uh muhkar ngaklah leh hun thawveng zaw muh kilamen kawm takin lungsim suangtuahna zang ua, huai hunnuam leh kipahhuai takmai mitkha a mu in hmuak khawl sek uhi. Pipute`n zong Pathian bia ua, leinuai Nuaizingmang le omsak ua, vualzawlna naak ahi zong chi uhi. A sepsuahte uh tungtawn a Pathian kiang a kipahthu genna (thanks giving ceremony) ahipen, Khuado Kut, Chavang kut, Pawl Kut ichihte kikhat hi aI zatna ziak leng kibang lel hi, mahleh amun leh mual a tuam dungzui in a vaisaidan kibangkim sipsip khollou. Eipau a Do ichih pen mikhual zintun (do), akipahhuai lam ahi, Khua I do chiang in Pathian zintun chihna leng ahi, do chihna khat ah kidou/galdou chih le a khiakna dang om thei thousam.Pawltak hun bel October hideuhse a, ei India a om Zomite a ding in Pawl Kut/Khuado pen October ni nih (Mahatma Gandhi pianni) toh kituak mahmah, National Holiday hi a thupitak a vaisai theihna hun ahi hi. I pipute zatdan ah bel a kum a kum in kabang khollou ding hi, aziak bel nek ding pianhoih deuh kum in hahbawl ua, a pian hoihlouh kum in thupitak in bawl zoulou uhi. Ahitak in, pipute muhdan ah bel kum kikheng dan in thei ua, kumthak muahna dan in leng nei uhi. Hiai la in genchian mahmah,

“Kum kikhen e, solkha dang e, ziin in a vangkhua zong hen aw, ziin in a vangkhua zong hen aw, khan kumsawt chiam lai leng e.Tu kawl tawi kum khua I khen a, ningzu khum lai aisa aw e, ningzu khum lai aisa aw e, khan kumsawt chiam lai leng e”.

Pawl Kut/Khuado Kut chiang in hihdan tuamtuam om mahleh, I pipute hihdan tak bel zu leh sa a nop bawlna ahi pen. Gen nei taktak vaisai nei ua, huaite bel siansuahna hunbi apoimoh khat ahi hi. Khosung ah sihna leh manna, kum paita a a tuahte uh, chi-nat leh lu-nat a tuahte ziak ua siansuahna bawl ahi zaw uhi. Kum bul a vok a vulhte uh gou ua, voksa lak a sahoih khenkhat, akal (kidney), a lung (heart) khong a themneng misi neite kiang ah pia ua, misi neite`n a si leh hingte kikhenna dan a ngai in hanmual ah zubilhsa leh huai sa themnengte tawi in kimangphakhakna va nei uhi (kahla sa in kikhenna hun haksatak in kitui naptui toh hun zang uhi). Nitak chiangin misi kahte a tunkikchiang un zu leh sa toh ann nekna thupitak nei ua nuamsa thei hemham mahmah uhi, paidan khat nei ua, a upapen in ann a nek masiah kuamah nah in nepan louhiai uhi.
Hiai hun in kha-hoihlou (evil spirit) ummangna (hawlkhiakna) le buatsaih ua, tangval tengteng lal inn kongtual ah kikaikhawm ua phiitlam dupdup kawm in meiser de ua, kha-hoihlou hawlkhiakna nei uhi. Siampupa makaih in kha-hoihloute ziaka sihna tuakte innsung leh innnuai luhsuak ua heigaa (heipi bul) leh singkhuah khong tawi in a holhtheihna teng leh a khettheih teng khenging tuartuak uhi. Kikou zuazua kawm in huai kha-hoihlou kikoukum ek-ek ua,

“Dawi hang kau hang nam hang aw, na zun na ek nam sia. Na ni na kha ching ta, na zi na ta te`n hon lametna sawt ta, Na inn na lou zuan in”.

Huchiin, khaa hoihlou a hawlkhiak uh cheptehna ding in a vanzatte uh (singkhuah, heipi gaa) dainawl ah paih ua, a khebuuk, a ngalguh khenkha ing ei,chi ua, meiser tawi kawm in khuang, dakpi leh selai toh kithuah ua khosung mipite`n meiser de seusuau uhi. Roupi churchur mahmah leh kilawm, nopchi lah aw.
Huaidan ahihna ziak uh chu, misi a om chiang in, hiai kut a kibawl masiah misi khaa pen omden, mi subuaiden, bichiing leh sumtawng khong a kibu maimah,huaiziak a,gal hawl, gamsa hawl a hawlkhiak ngaidan ahih chu. Misi khaa a laang chiangin, I nu leh pa te`n annkuang khat ah a nek ding luisak tei sek ua hon subuai nawnlou himah lou hia? Eiloi in le I thei voh oi, a thuakkha le I tam voh oi, misilaang thawmging ziaka ihmu ngamlou a om gekgawk maimah kitam lua, huai dan hikei leh sawmgiah angai dii.

Pipute hihdan sese in hih ni chihna hilou, hih dingdan khat kilawmtak, I ngeinadan kepbitna ding in Pawl Kut hihen aw, Khuado Kut hihen aw, Chavang Kut hihen aw, hahbawl in piibawl le hoih koi lehlam di`n ka gingta trlats. Mahleh, Miss Contest saina ding leltak a unau Kukite vaisai dan chu thringlua kasa zel. Zu leh sa pen a tellouh mah hoih pen, pupa khanggui zuihna beek in hiai hun poimoh mahmah zahna toh kilawmtak in zang zelzel le, mite hon theihna leh hon cheptehna khat hong suak ding a, I mi I sa, I khua I tui, I gam I lei hong pallun lou zong, a lamtoutu hong suak ngei ngei ding hi. Leivui pa`n a hon laaptou I Tung Pathian in zong I ngeina dan kepbitna ah hon kaambikkek thahah lou ding hi, zoouuzeen. A chhinchiahna di bek in khatzawsaam saam Spring Festival or Harvest Festival nei le a poina a om reng reng kei zuhia (cultural identity lampang zoh ahi ta, thahah aw chi I om khak sensen leh).