KHUALZINNA

by Vungzamuan Valte.

Nidanglai deuh chile I tangval lai khawngin khualzin haksa hetlou ana hi mawk a, tangzangtak leh kisakkholh luat nengnung poimoh lawmlawm khollou hial hi. Tuahkhak dandan a om, tuahkhak khak a tuan, tuahkhak khak nek leh utna munmun a nek, tuahkhak namun mun a giahsuk mai chihkhawng a adventurous luatna om hi. 1991-1992 sungin India sung mun tuamtuam ah government sum zangin leh achangchang chia pocket money zangin kizin nasa mahmah mai a, neulai a school subject khawng a General Knowledge kichite ah India gamsung a munpoimoh kichite aban ban in ka fangkual suak phial hi. Chhatisgarh state a pianmatham in MP nuai a District khat Raipur District sung leh Tribal belt khawng ah kikulh zawzen hial in village visit program bang ah ka va hoh kulkul a, singtang dawn lam mah ahihna ah nuam asak in kasak thoh maimah hi. A gam leilung pianzia leh a sing leh guate mahmah in hon hip ahingei ding a, pau theihlouhna gam ah ka kimaingalsak hialthok sek hi. India gam mun tamzawte ah eilam dan a security issues a om kikeilouhna munte ah gamtat anuam mahmah mai a, kizalen in utnana ah kidiang lehleh thei ahi hi. South India ah OOty (Ootacamund), Willingdon, Coonoor leh Kodaikanal chihte khawng munnuam leh thawveng ahi ua, huihkhisiang hiauhiau leh mualtungsang vevok a om ahihna uah lung hon khoih in tawldamhuai hiauhiau mahmah mai uhi. Singpi huan leh coffee plantation banah singkung hing dipdip ten mittaisak a, pianna vangkhua hon phawksak thakthak hial thei uhi.

North India (Himalayas) lam ah neulai a Hill Station minthang kichite khenkhat vehkhaklouh kinei hiven, Shimla bang Delhi apat naichik himahleh kumlui in ka mukha pan hi. Gintak sangin amun a kense zaw a, akhua ah tui a haksat toh, et ding leh muhding a tam khollouh toh nikhat kan zatna dingin hun a pammaih leltak hi. Manali, Mussoorie, Gangtok, Darjeeling chihte khawng ah kar khat sung om theihna ding hial in vak khualkhual theihna mun a tam mahmah mai a, ling konkon hial inle kidiang khiakhia peih hi. Miten a gam uleh a khuate uh a kepsingthou theihdan khawng uh imuh chiangin foreign gam a zin kibang thei mawkmawk sek hi.

Zinna ding a hoih kasak lah ka zin khak louhna mun Nainital zanlam zek in ka va tungkha thei khongkhong hi. Sungkuan a khualzin ichih bel hautak mahmah mai a, nasatak a kisakkholh poimoh ana hi mawkdan ahi a, khawlna ding mun kichup deuh, giahna ding mun kichup deuh, pai dingdan, khawsak khawhei dingdan, kuan leh pai etc aneuhneuh buaipih ding adim aha om mawkdan ahi hi. NAINITAL pen British te mun poimoh mahmah anahi ngei a History bu khawng ah kimutam mahmah sek hi, Jim Corbett ziak le hikha inteh. Vaite myth ah hiaimun a gendan uh tampi om mahleh lungluthuai khollou ahihna toh “hou maimai” dan in ka koih lel hi. Garhwal leh Kumaon gambuppite British ten Anglo-Nepal war 1814-16 khit in tangkha ua, 1815 in Kumaon region ah a gamsung a Commissioner masa Mr. G.W. Traill in va mukha masapen hi (gamsung mite gindan toh kituak in immmang maimah hi). 1839 kum in P. Barron kichi sugar baron khat Shahjahanpur apat a gamvak vialvial nalam ah va mukha chitchiat hi (hunting expedition). A gendan in “It is by far the best site I have witnessed in the course of a 2400 km trek in the Himalayas” chihial thok hi. Hiai mun toh kisai 1841 in “Englishman Calcutta” kichi journal ah khawvel pumpi theih dingin suahkhiak pat ahi hi. P Barron in building masapen dingin Pilgrim's Lodge kichi hiai khua ah bawlkhia a huchin awlawl in Britishte hong kiseklut ua khawnuam mahmah khat piangkhia hi.

Naini kichi Hausapivum chihdan a mualtung min ahi a, Tal kichi pen Dil (Rihdil dandeuh) chihna ahi hi, Naini-Lake chihna eihchu, A kawmin pen Myanmar a Rihkhawdar chihtoh kibang geih. Naini Peak pen sang vengvong mahmah mai a, feet 7500 danin chiamteh uhi, himahleh 1880 kum in sun 3 leh zan 3 vuahchin in lei nasatak in tolhsak a feet 200 val in keniam zouhial hi, mihing 151 si ua Britishte mi 45 lak telkha chi uhi. Hiai Naini lake pianzia apat Natural formation kichithei ding a, earthquake (zinling) in a bawl hihtuak pen hi. St. John In The Wilderness Church kichi 1846 in kibawlkhia a tunitan in zattheih lai hi. 1858 in Methodist Church kibawlkhia a Catholic Church khat leng om hi. Hiaite ziakin British Settlement kip deuhdeuh a, school hoih taktak tunitan in hiai khua ah om uhi. Diocesan Boy’s School (Sherwood College, Amitabh Bachan skul kaina), St. Joseph’s College, St. Mary’s School chihkhawng a minthang deuhte hi ua, sumdawng khat Sharmaji (Paona Bazar, Thangal Bazar khawng sikkha) kichi in Manipur apat hiai khua ah school naupang tampi om ahi uh chi hi. Manipurte le kidaih tak ihi di ua, sum hau mahmah tamtak zaw ki-om hidan ahihchu. Nidanglai in Britishte munpi hi a, India mi tengsak khollou uhi, huaiziakin a kongzingte khawng (Mall Road) ah India mi paisak utlou uh kichi hi. 1862 kum in Nainital khua pen Northwestern Provinces te “Summer Capital” chia minvuah ahi hi. British United Province (provinces of Agra and Oudh) a Governor pa summer capital ahih ban ah United Uttar Pradesh a dingin Summer Capital ana hi ngei hi. Tu in, hiai summer capital a Secretariate Building pen Uttarakhand state High Court building suakta hi.

Kumaon mite ei singtangpa mah toh kibang mahmah mai ua, puakgik taktak pua in lamsak lamtou ah pai kunkun lai uhi. Himahleh, a gamsung uah khualzinmi simsenglouhte ziakin nasatak in khangtou teisam ua, tourism pen nekzonna dingin zangthei uhi. Hotel, Taxi service leh tourism toh kisai a nektakzonna a kingakna thupipen uh hi a, High Court ziakin zong legal professionals tampitak hiaikhua ah om uhi. Local polulation tam hetlou hial a Nainital a permanent resident kichi mihing 60000 khawng lel hiding uhi. Company tuamtuam leh mimal mihausa ten inn leh lou nei ua, a tamzaw ten sumdawnna (paying guest/resort) danin zang uhi. Deodar sing, farsing leh tesaw sing (oak) tamna gam ahi a lunglenghuai mahmah mai hi. Hiaimun a lamdan mahmah na bel, India mi khat peuhpeuh in gam leh innmun, inn leithei ua mihausa ten nasatak in resort khawng bawlin puah zezua uhi. Himachal, Kashmir, Sikkim leh NE tanggam mundang khawng ah bel state tuam apat kuaman gam leithei louhial uhi. Summer chiangin mihing dimlet nawinawi zel ua, mihing a tamluat louh lai u’leh bouruak a sian hunlai mah a khualzin phatuam zaw hi. Vuahzu, meipizing leh nisuak nasan muh theihlouhna mun a khualzin khak zaw, kisikhuai velvul thei ahi a, traffic tamlua bang le buaihuaipi khat ahi thei veve.

Kumaon mi ten a culture uh kembit hoih mahmah mai ua, apau uh tuam mahmah nohnoh maimah a, ka tanu in a nakpau ua, achi hi. Traditional Costume kichi (dress) kembit hoih mahmah mai ua, a pupa ngeina uh, a pupa khawsakdante uleh a singtangpa ngeinadante uh film leh Television khawng ah nasatak in suahkia ua kembit uhi. A lungluthuai in a lunglenhuai thei ngoihngoih khopmai, Ngeisok pak siusiaute lak khawng, mualtung sang ngekngok lak a singnuai a nungak tangval kihel hialhialte khawng, bawng leh sakor zang a van pawsak truihtruih te khawng, numei bawng ann ding pua, sing pua chihte khawng. bawng long king loklok khawng leh Dil tui siangtak tekelkel kimlak khawng a hunnuam zangte khawng..., amuh a hahdam mahmah mai, ei dinmun toh kibatna tampi om hitah e...heiha. Ngeisok paklut lai ngialin houh agam pumpi ngeisok pakin mun khenkhat pumtuam hialthok ahi chi ua, lampi khawng ah kiphah san zezua dan hihtuak. Hiai Ngeisok pak pen manphatak in zang thei ua, azu (ngeisok local wine) bang le om hihtuak. Farsingte anai khikhia ua paint industry a dingin hoih mahmah chi uhi.

Nainital pen bareilly apat Haldwani pelh a Khatgodam Rail station ah, huchi in gari a pai in, mualtung dakkar 1.30 khawng lel kaltouh a tun mai ahi hi. Delhi leh India khawpi mun tuamtuam apat bus hire zenin a group a group in zin nawinawi ua, khenkhatte private gari zangin tai hehu hial uhi. Delhi apat Km 280 khawng lel ahi chi ua, Corbett Park toh kinai ahihna ah khualzinmi tamthei mahmah hihtuak uhi. Naupang neulai khawng toh khualzinte bel boating, Ropeway (cable car), pony trail a va tuan, cave garden, Himalaya vukkhal va gal-et leh bazaar lak khawng ahi mai dia, a adventurous deute a dingin karkhat deihkhophuai lou ding bang maimah hi. Hiking/Trekking pai theihna mun, Cheena pek kaltouh, Tiffintop kaltouh, Naini Peak a kaltouh, Corbett Park lam (2 hours journey) va lenglat, Bhimtal lam a Para Gliding va hih, Lake tuamtuam va veh kual (Kuamon region ah lake 60 lam om hi), Rock Climbing, Mountain Climbing, Almora lam va lenglat (50 Kms) etc etc tampi om hihtuak. Institute of Mountaineering khat le a om hi. Forest department te cottage advance booking bawlin nuamtak leh mantawm chik in tuntheihna zong om hi, zoo mahmah le ettuak lua chi ua, bird lovers te a dingin Pangot leh Kilbury sanctuary te chihchi mahmah ding hi. Tiffintop pen Britishte a omlai un nupa kina (kihehsuah) aom chiang un beer khawng tawi in hill top ah va pai zel ua, huchi in a thangpaihna uh huaimun a sungkhia in lungkimtak in paikik zel uh chi uhi, tuaziak ahi di TIFF IN TOP achihse naziak uh. Tibetan mi 2000 vel om ua hiaimun ah sumdawng in khamuang mahmah mawk uhi, Tibetan market ah eimi hileh kilawm mel vak kiukiau khawng va muh a nuamtuam a va kilut khanak sek hi. Bazar kaina munpi ahi a, Kolktata port apat van alom a hong lut ahi achi zenhouh uh aka! TB hospital (sanatorium) minthangtak mai aom a local ten kisaktheihpih mahmah sam uhi. Land’s End ah va khawdak sin mah dih, a lauhuai vengvong eive, Suicide Point achih utoh bang toh.

Nainital Lake ah nupa thak hi-awmtak in va om tei tehreng dih ua khai, na harh huaihuai mai ding uh, huai lake athukdan feet 100 khawng hidingin gen ua, sanga mat ngeilouhna ahihziak in mihing chiachia om dingin gen uhi. Bhimtal lake ah, Sattal Lake ah, Temple kaltou utte a dingin leng atam mai...vuk akiak hunchiang in vukgam a suak chi uhi, Naini Peak dakkar 2 sung ka va kaltouh leh, huaimun a khosate Nepali melpu sungkuan bangzahhiam Forest te chowkidar a om ua, phalbi chiangin mualtunglam ah vukkhal feet 3 leh 4 tantan khawng a sah in om memouh sek chi uhi, bangchi khosak aduam a, amau bel nikhat in khatvei bek kumsuk un kaltou hamtang ahihdan uh gen kheukhou ua, haksa salou ahihdan uh gen zawmah uhi. Bawng leh ui toh khosa ua, anak lunglenhuai e; I etsuk leh, kha nei hileng lengsuk nuam veng e...chih ding mah bang, I lungsim kikhai vengvong hial..
Hiai khua a siangthoudan imuh leh kuaman nin paih mawkmawk lou ahihna uah, India mite huchithei ahi umaw chihchih in a om a, kuva hai san zuazua omlou (lei ding le omlou), laizial tep phulphul muhding vang mahmah, nitak chia khat leh nih chu a kham neknek localte muhding omsam. Nainital a Diwali zang chia, enjoy sawm lua, enjoy khial kha (over deuh) vaite muh ding a om zeuhzeuh ua, nitak dak 6 apat dak 8 tan Mall Road (main street) ah gari no entry zone ahisak ua, mihing khe in paidim motmot mai uhi. Lake sung leh khawlai ah talab neng leh sarang (plastic) neng muhding a omlouh mahmah lamdang sa ing. A khawpi sung ua drainage bangchipai ahia kachih leh, lake zulzul ah sewerage hoihtak paisak ua, ektui, tuinin tengteng khawpawlam ah luangkhesak dan ahih u’chu. Landslide leh vukkhal tolh thei ahihna ah, khawpi leh mualsang kikar ah storm water drain hoihtakin bawl ua, khawpi a buaisak louhna dingin suangtuk mattang nading wiremesh adan adan in zanphei deudou ua, retaining wall danin concrete wall mun khenkhat ah athuah athuah in bawl uhi.

A lungluthuai mahmah pen chu hiai ahi, a gamsung ua thil piangkhete Kawlkai (sweet potato) leh bal khawng imuh mai inle vutphual a em utna lungsim kipu a, I nak ah agim khawng hong nam vingveng thei mawk hiveh aw, siimai ngialhouh meiphual a va emsak soksok dia hoih aka! Kawltu hahchin ahi duam a Diwali lai in khawlai ah pu-ngawngaw ua, bike khawng a tuang kawm in tai vialvial uhi.

Gawtuai ichih mai (bamboo shoot) om ahi ding a, ei’ nekdan in nelou hial uhi. Mau leh gua kichi neuchikchik ahi a, Shillong mau toh kinaipen ding hi. A gawtuai nelou un, achar a bawl in factory process ngat zuakkhia uhi. Bhowali khua pen fruit market a minthang ahi a, Nainital apat km 15 lel ahi hi, hiaimun ah a gamsung ua thei (fruit) chituamtuamte muhtheih in om a, leitheihna munpi leng ahi hi. Hiailak a factory in Fruit Processing bawl a, huchi in nasemmite, louneimite leh huanhai neitute a dingin kouzanna nasatak pia hi. Naini Fruit Products kichi local miten factory a bawlkhiak uh a lunglut huai khopmai le. Rhododendron kichi (NGEISOK) pak a gam ua tam hiven, a tui suk khia ua squash leh juice limtaktak bawlkhia uhi. A tam vanglak chiangin ngeisok pak mun khenkhat ah lohseng ding hilou hial in lampi khawng ah kiphah san zezua ahi chi ua, huchia taksa a ding a hoihna nei, paktui dawn theih ding a abawlkhiak uh pilhuai sa ing. Squash chituamtuam bawlkhia ua, Buransh squash (ngeisok), Orange squash, Lemon squash, Litchi squash, Plum squash (theikha), Apricot squash, Ginger appetizer, Strawberry squash, Bel squash, Amla (suaklu) squash chihkhawng ahi tangpi hi. Apple jam, Mix fruit jam, Apricot jam, Plum jam, Strawberry jam toh bang toh. Apple chutney (chatney), Plum Chutney leh pickle tuamtuam, Mixed pickle, mango pickle, Red Chilly pickle, Garlic pickle, Green Chilly pickle, Seasonal vegetable pickle (etsakna dia tangkha pickle) nasatak in bawlkhia ua, zuakkhe zungzung uhi. Juice a bawlkhiak minthang deuhte uh Buransh juice (ngeisok), Apple juice, Litchi juice, Plum Juice te khawng ahi hi.

Ei gam a omlou hiai theimanpha (KIWI) kichi khovot gam a omse ahi diam a, Arunachal ten a hahchin uh achi ua, Meghalaya ah bel omsam hihtuak, a chinna mun uh muhkhak ding a om kei a hiven (iskut chu a ching nasa ua..), Kumaon ah Kiwi product hoih mahmah hihtuak vial venchin, bazaar ah a kg in zuak mawk ve uh aw, export nak mahmah chu ahihtuak ua...

Huchidan a louneimite/nasemmite khohsuahte khawng chatlop (subsistence living) hinkhua himai loudeuh ding a, kidomsang tuahna in a gammite a dingin nasatak in khantouhna lam ah panpih mahmah mai a, nektak zonna ah kouzanna mu uhi. I thaksuahte a zuakna ding om pahpah hileh muatmang mailou ding a, kitoudelh theihna suak ding zaw hi. Sing pickle (ginger), Sing appetizer chihdan deuh a, maltakhawng bang leng a processed dingdan ngaihtuah khiak kul lua hi. Sapthei (passion) juice I bawl ua large scale in kihih zoulou hial hi, ai-eng bang leng I gam ah hoih hinazenpi in processing lam ah kitasam lua hi.

Gawtuai thu tin, singthupi tin, baibing tin, khangkhuh tin, zawngtah tin, kawlsing tin, nga tin leh adang dang banah, akeu, ahou a preserve a, pack (package) a zuak dingdan I bawlkhiak uh hunlawta hi. Lemon Grass/Lemon Oil kia process theih sa houh ihi uhia le?

Leitung mun khenkhat ah natural formation kichite nasan thupitak leh hoihtakin kemsiangthou ua, kembit ua, puahpha ua, huchin mite etnop leh hunawl zatna dingin sithuai louhial suahsak uhi. A local mite a dingin vualzawlna simsenglouh tun thei a, sum leh pai muhna dingin nakpitakin zangthei uhi. En bel, kum 20 val hilhial a kibawlkhia leh sumtang crore 400 khawng bei a I lamkhiak uh, zatlouh in koih memouh hangh! India government in a sum sente (Loktak Project danin) muhkik ngai ding chileh bel “Manipur mite ki-hali fifia leltak lou ding hia?”....

Hiaite kava muhleh mitvakna hon pia hileh kilawm hial in ngaihtuahna saupipi a paipai mawk a, ima/nupi te market ah zuak ding en ibawlkhiak keileh midangte haithak leh thil thaksuahte mah kizuak tultul den ding a, Meitei nupite mah hong chalngam zawzel ding uh hiveh aw!!

Muhkhak khenkhatte....

Para Gliding

Governor Inn

NAINITAL KHUA

BHIMTAL KHUA

HIGH COURT COMPLEX