PATHIAN LEMCHING
By Vungzamuan Valte
Hindute sakhua kichi mythology a kinga ahitangpi a mihingtak hidia gintak theih chiah louh lah Pathian toh kikimphial a akoih uh tam mahmah mai hi. Gingta ahihchiang ua va soiselsak luat ding nuam chiah lou ahi zel hi. Hiai Hindu kulmutte kingakna leh a society uh peibuai penpen tuh Manusmriti kichi BC hunlai pek a Hindute code of conduct chihdandeuh khat Manu in a bawlkhiak pen ahi hi. Hiai code in a society uh khaukhih nasa mahmah mai a, a gakin gak kip tenton maimah hi. Class system hilou in Caste System bawlkhia a namsang leh namniam danin Hindu Society khenkhia hi. Namsang kichite toh namniam kichite teng khawm theilou ua, mihing tuk inle a namniamte uh mulou uhi. Manlai society ah huchidan a kisehkhenna om chiat ahi a, hiai Manusmiriti in a society uah vaihawm pawl, Siampu pawl, sepaih pawl, nasem pawl, sumdawng pawl leh eksom-sapul vunlip pawl etc in khenkhia hi. A niam mahmahte untouchables (khoih theihlouh) chi ua, a khawsung nangawn uah lutsak utlou hial uhi. Tuimun leh nektak zonna, market khawngte nasan ah namniamte lutsak phallou ua, muntuam leh khawpua ah tengsak sese sek uhi. A biakna munpite uah Pathian a biak tei ding uh phallou ua, tunitan in Dalit namniamte temple sung ah lutsak utlou lai uhi. Zanlam zek in Kanpur a temple khat ah puja karkhat sung a siampu khat un nei ding ahihziakin namniamte temple kimlak a omlou ding leh a innsung ua kikhumbichilh dingin theihsakna notice takkhia hi. Banghang hiam chihleh, namniam ten a puja bawllai ninsak kha ding uh chi hi, Pathian pomtak biakna ahihtheihna dingin namniamte a kihepmang ding uh ahi chi hi.
Huchia kulmuttak leh khauhtak a kivaipuakna dan a neih ziak un Hindu sakhua kichi a pom utlou leh deihlou tampitak piangkhia ua, sakhaw dang beel in taisan khanak sek uhi. India gamsung ah Muslimte atam uh ichihleh, mel le puam, pau le ham, pianken leh sisan a Indian Race hingal, lah Muslim sakhua beel tampi a om ziak uh ahi hi. Namniam ten Buddhist sakhua lam zuan ua nasatak in Hindu biakna taisan pawl om bok uhi. Hindu society sung a a om sungteng uh suahtakna lampi mulou ahihna uah sakhaw dang belh theih theih bel ua, Britishte hunlai in Hindu namniam tamtak ten Christianity ah kipiakna nei ua, tunitan in vaigam muntampi ah Christian tamlou chikchik muhding om uhi. Hiaidan a mihingte kideidanna nasalua ahihman in suahtak theihna ding lampi zong ua, miphatuamngai leh kipezou khenkhat hong piangkhia ua, huaite nungzui in mihing tampipi kizui noinoi mai uhi. Guru Nanak in banghang a Sikkhism bawlkhia ahia? Hindu sakhua kivaipuakdan a deihlouh ziak ahitangpi ding, reformist kichi, tampitak ahunhun in piangkhia ua, hiai caste system bondage apat suahtakna deih ten a boh in boh luailuai mai uhi.
Hindute sakhua bel missionary sakhua hilou a, sisan apat pianken leh khanggui a paisawn, society sung a dinmun kiptak Hindu society in a piaksa, kheklamdang theih vual hilou, a khang a khang a beitheilou ding caste system ah awk den uhi. Neih le lam ziak a tungnunna gam hilou a, pilna leh siamna a tungnunna gam hilou a, hatna ziak a tungnunna gam hilou a, pianna nu leh pate khanggui ziak a society sung a dinmun niampen, mite muhsit leh siahloh leltak a om nilouh theihna society ahi hi. Hiai in Hindu Religion zuitu pungsak theilou a, Hindu caste system a telkhaloute a dingin Hindu va suah mawk theih leng ahi kei hi. Sakhua tampite lak ah a punglou penpen khat ahihim hi. Manipur a Meiteite bangchidan a hiai Hindute culture leh Caste system a va kizeplut thei mawk ahi ua, chihpen suithampi khat ahi ding.
Huaiziakin, Hindute lak ah hiai Caste barrier paikan a namniam leh namsang khentuam lou a, culture tuam deuh biakna dan mikhat in ahon patkhiak chiang in mipi mangbang leh Pathian biakna a tel ut tei tampitakte thuzoh pahpah mai uhi. Satsang chi ua, Pathian thu genna ngaikhia ua, Pathian phatna la sa ua, kideidanna omlou himhim ahih chiangin lungkim mahmah mai uhi. Huchin, Hindu sung ah om lah bang, omlou lah bang, Hindu kulmutte khoihbatlouh namun ah DERA (Biakna mun) ah lungkimna leh khalam damna va mu uhi. Punjab, Haryana, Delhi leh UP lak khawng ah huchidan godman kichi tampitak piangkhia ua, nungjui ding tasam louhial uhi. Khentuam neilou in kipanpih tuah ua, nektak zonna, school, college, Hospital, orphanage leh a dangdang tampitak mipite phattuampih theih ding pankhia uhi. Huchidan a hun bangtan hiam ahong paitouh chiangin nungjui lakh tampipi hon nei ua, thuneitak leh sum leh pai a buailou in political influence sangtak hon nei mai uhi. Election chiang in party tuamtuam ten kidelhhuan kheukhou ua thupisuak semsem zawmah lai uhi.
Tulaitak a India gam in a buaipih mahmah Dera chief khat Gurmeet Ram Rahim Singh kichi driver khat ahi. Bangchidan a godman suak thei mawk hihiam chihpen sut I sawm kei, a zei himhim a ahi di. Trick tuamtuam zangin mipite khemhai sek ua, huchi in thuneitak in om liuliau thei mawk uhi. Pathian biakna pen, mihingte namsang hileh namniam hileh a nei utlou omlou ahihna uah, biaktheihna ding mun a neihna munmun uh naih maidan ahi uhi. Hiai kha Hindu Culture leh Hindu society te failure lianpi ahi hi. Mahatma Gandhi nasan in Harijan te dopsangna dingin pan nasatak in la a, India in suaktakna amuh khitnung in untouchabilty kichi hingphum mahleh a kelluphum hong dawkkhe gawkgawk thouthou zel hi. Hiai Manusmriti dan in, Sati system (practice) omsak a, nidanglai in Hindu numeite a pasalte uh a sihchiang un a kihalna meiphual uah tuaklut zel uhi, tu in bel prohibited ahita.
Hiaidan a society kivaipuakna dan mumalloutak ichi khempeuh diam a, sisan a kideidanna pen Muslimte society nasan ah om lawtel dan himawk veh aw, namniam chituam tuam omsak tei unchin, Hindu sakhua apat Muslim sakhua a lut lai ua a tonpih uh himaithei ahi. Muslimte lak ah numeite gelgawtna nasa mahmah mai a, pasalte sihna tanpha ah, hanmun nasa phatheilou uhi. Biakna ah Namaz dingin hoh theilou ua, purdah toh kholumpi nuai ah hak tekulkul mai uhi. Numeiten right nei tawm mahmah mai ua, pasal ten a khen ut chiang un talaq thumvei a samkhum chiang un gending bei ahi mai. Tunai chin in Supreme Court in session khat a huchih phut pen diklou ahi chiin danpawlam ah koihsakta hi. Hiai Muslimte biakna sung ah kithuhilhna diklou tampi a om ziakin sakhua min a sih leh man poisalou tampitak piangkhia ua, khawvel pumpi in buaipih mahmah lel hi. Muslimte sung ah Sunni leh Sia a kikhen himahle uh, sect tampitak omsam ahi ua, Sufi Saints kichiten biakna leh sakhua dangte soisel lou in zautak in biakna paipih thei uhi, hiaite reformist khat ahi leuleu uhi.
Khawvel pumpi ah mihingte' kivaipuakna dan neilou I omkei ua, nam tuamtuam ten gam tuamtuam ah traditional practice kinei chiat hi. I pipute hunlai in Hausapu leh Siampute a thunei ahi mai ua, khawnbawl upa hithei ding leh tanbang kim a aomtheihna ding un, leh Hausapu zubel teppih theihna dingin nasatak in kisiak sek uhi. Gal-aih, sa-aih, Thangsuah ahih chiang un Hausapu pangbel in lungmuang thei pan uhi, tuate ahi I society a kideidanna om tei neuhneuh te. Christian ihih nung un suak leh sal a kikaih a om nawn kei a, suahtakna chikhat ahi tei mai hi. India leh Burma in Independence amuh lai un hausa theuneihna ichi hia, hiaidan a kivaipuakna pen muntampi ah beisak ahi ngeingut uhi. Tu in Christian ihi ua, kideidanna lawmlawm omlou in I society ah commonerte leh nerloute omsam bang mah leh kizalen mahmahta hi. Mikhual kisakna lungsim bel singtangpa lungsim ah om geuguai den chu ahih tuak.
Manusmriti code dandeuh in paite sung ah PTC Code (Bye-law) omsam hiven, huai kha eite traditional system ahitei mai dichu. Judaten leng code khirhtak mai aneih ziak un midangte a dingin juda mi suah ding haksapi ahi, race leh blood line a kinga ahihziak mah ahi hi. Roman ten Juda gam a ukkhum lai un Judate leh daloute genthei kisa mahmah mai ua, slave dan dinmun ahi mai uhi. Suahtakna ding lampi zong den mai uhi, huchi kawmkar ah Judate sung a namniam leh Jentelte a dingin haksa zawsem hihtuak maimah hi. Meithai tagah leh liangvai, phak leh mitdel, namniam leh simmoh kaite a dingin Juda sakhua haksa petmah a, a society uh chimhuai petmah hihtuak hi. Ganhing sisan a kithoihna bang ngaipoimoh mahmah zawmah lai ua, namniamte leh genthei liangvaite a dingin haksapetmah hihtuak dan ahi. Jerusamlem temple kiim a vakhu zuakte bang ngialhouh kithupisak mahmah mai uhi, beram nou leh bawngnou zuakte zaw a thupi ngot duchu.. Huchia Romante khutsung apat suahtakna ding, Judaten azon zon laitak un, Jentelten Judate khut apat suahtak utna lungsim a neih laitak un,, Toupa Jesu a hong kilangkhe nolh mai hi. Judaten bel gingtalou ahi ua, Jentelte leh namniam, liangvai, khebai, zeng, phak, dawi zolh, mitdel, damlou leh meithai leh tagahte a dingin suahtakna thupi chanchinhoih a puak hi. Hiaiziaktak ahi khovel history suituten Toupa Jesu pen reformer khat dan a akoih nasan uh.
Eiloi in vaigam ah missionary chia nasepna ineihte bangleng ensin le...hindu kulmutte khutsung a suahtakna deih tenten leh lametna vak poimoh ngoihngoihte, hiai namniamte ahi tangpi uhi
Namsang ten bel hon uksak vak khollou uh abang hi...
Christian gam ichi a, ei society bang le ensin le, kideidanna tampi a om ngei ding. Noupawl, koupawl kichina a lian semsem ding a, Pathian biakna nasan kikhatlou in I kideidan khinta uhi. Thohlawm thu leh gou le gam thu, a annniam leh a annsang chihdante a kideidanna ahong nasa semsem ding a reformist khat ahong piankiak kul khong dingdan ahi hi. Mizote lak ah Pathian dan a kibawl a, commune tuam nei khenkhat a piangta uhi, nasa mahmah supsup uhi. Eisung leng ahon peh kei ding ichi thei keihial, banghanghiam chihleh, I society paidan, I biakpiakna paidan te ahun toh kituak a kikhekna I neih zelzel dingdan ahi hi.
Vai kulmutte ziakin Hindu society abuai den ding a, gamdai a kikou awging a ngaih semsem ding a, Ram Rahim te, Asaram Bapu te, Narayan Sai te, Sant Rampal te, Swami Nithyananda te, Mahesh Yogi te leh, a dangdang gensenglouh a piang toutou thouthou lai ding uhi.