HAMPHATNATE ZATSIAM POIMOH
By Vungzamuan Valte

Tulai hinkhua toh nidang deuh lai, kum 50 lel khawng paita hunte enkik sinle, lei leh van toh kikhia ahita. Nektak zonna ah sinlaite I buai nawn kei ua, sungkuan leh insung nuam taktak apat I khanglian uhi. Laisin ding sanga poimoh zaw, nu leh pate a louma ua huh ding chihte manglam inleng kimanpha nawnlou hial hi. Sin ut ngoih ngoih, lah hithei mahmah louhial, khasiathuai sa vulvul, leh khanvualte eng ngoihngoih kawm a louma khuat khuat mai chihte atheih leng kithei ut nawnlou mah ahi hi. Hun a kidangta, hinkhua a kidangta, hiai vualzawlna thupitakte, I Biak Pa Pathian apat imuh ahi chih mangngilh kei hial ni. Deihtelna ziaka innsung nuamtak a piangkhia ihi kei ua, Siamtu deihsakna mah toh hichibang dinmun hoihtak mukha ihizaw uhi. Huchidan background hoihtak leh springboard muanhuaitak ineihte zangkhiallou in, I hamphatnate lohchintheihna kalbi dingin zangthei chiat leng, chih I kideihsakna ziakin, hiai ah thu tamlo kikum sinle chidan ihi zaw hi.
1. HUN ZATDAN: Leitung a mihing khempeuh ten ahun neihdan uh kibang vek sipsip himahleh a zangsiam leh siamloute kikar gamla mahmah a, a siamten bel nathupi taktak semkhia ua, a siamlouten bel bangmahlou in ahun uh peimang uhi. Unau piangkhawm hilhelte nangawn ensinle, sia leh pha theihna, nu leh pate itna, kikepdan leh khanletna kibang hinazenpi, awlmohna nei toh, a neiloute hong kikhai pah genggong thei mawk uhi. Tha-itna toh kuhkaltak a panlatun bel, a lohtak ahon mu a, tha-itna neilou a hun zangmang maimai pen inbel, lohtak ding neilou in ahong khasiat bawl khawnung nelnul thei laizang hi. Hun in ngak neilou ahihna ah, I mailam hunding ngaihtuah vengveng kawm aikisakpah vitvit kuldan ahi hi. Hun mualliamsate kisamkik theilou a, ahuntak a isep khaklouhte leng kisemthak phing theilou hial hi. Khosakna pen mawk tawpsan maitheih ahikei hial hi, kisik in phattuamna anei kei, ahunlaitak in hahpan in pang in, huaipen kisiklouhna damdoi hoih penpen ahi hi.

2. KHANVUAL: Leitung a mihingte social being ihi ua, mahni kia a tolten thei ihi kei hial uhi. Sungkuan laina, u leh nau, lawm leh vual neite ihi uhi. Khanvualte toh kithuah anuam mahmah a, leitung nuamsaktu leh buchingsaktu ahi ngitnget uhi. Khanvual thuah ding teelsiam poimoh mahmah a, thulou lalou genkhawm a hun zatmang baihsam mahmah vial laizang hi. I sinna lam toh kituak a kihuhtuah theidingte mahtoh kithuah dingdan ahi hi. Khanvualte omdan, nek leh tak, tep leh muam, leh lunglut lam thilten hon influence baih mahmah ahi ua, mitampite hiai thaang ah awkkha uhi. Hoih lou hi a imuhte kithuahpih sese louh dingdan mah ahi, en I influence zoh keileh, amau hon influence thouthou ding uhi. Hoihlou ichihte gentam ngailou in theichiat dingin kikoih le, tulai a drug addiction khaamzoh ding vual hiloute khawng, mikhat leh khat kilohsawn ngenta ahi ua, AIDS natna nasan kilohsawn theilai zawsop uhi.

3. LUNGLUTNA TUMTA NEIH DING: Hun tampi mangsak, sum tampi bei in, leh tha tampite sengin lai isin ua, schools, Colleges leh institutions tuamtuamte ah siamna tuamtuam kitaiteh in kum 20-25 tanpha lametna lianpi toh nu leh pa ten ahon kem uhi. I lunglutna ah lungsim kiseng peih a, tha leh zung kiseng peih a, kithalawpna toh kipang teitei zou lai hi. Huaiziak in, lunglutna tumta neih ding mah ahi hi. Midangte hihna lamlam lunggulh tei mawk ihihleh lohsapna kipatna ahi a, I siamna lam ahih kei leh kituitum zoulou ding mah ahi hi. Subject haksa isak ngoih ngoihte sual teitei leng, mite kiphazou tuanlou ding ahihna ah, ei tempaina lam zonsiam kiphamoh mahmah ahi hi. Kuhkaltak a pang trangtrang in, B.A/M.A./Doctorate degree tanpha degree certificate tawi leuluau himahle, huaipen lohchinna honpetu hilou khathei ahina ah, I siamnel theihna lampi zonfuh poimoh lawtel hi.

Degree sangtak nei veuvou napi a nekzong zou mahmah lou mihing tampitak omta ahihna uah, mechanic siamneltak hilechin nekmuh mohna, leh sungkuan vakmohna omloupi ahi hi. Tulai khovel ah specialization a poimoh penpen ahita, I sinlaite ah, I sepnate ah, I nektak zonnate ah, siamnelna (specialization) khat peuhpeuh ineih kei lehbel, field khat peuhpeuh ah, zattaklouh mihing suahtheih laizang ahi hi. Bank ten computerization hahtakin kum 20 paita in bawlpan uhi, computer sin utloute bel zattaklouh leh pampaih ahih mah bang un, saptuam nasepna nasan ah tech savvy te mah hong piisuak pah mai uhi. Khekhap tam lamlam chilou a, muhkholhna nei a, alunglutna leh tempaina lam uh luh gulgul, tuampai vilvel theite, ahong lohchin chiang un thupi tuanse ut mahmah uhi.

4. INTERNET etc. ZATDAN: Technology tuamtuam ten I khovel a pumtuamta a, automation ichihten mihing nasep ding tampitak suhsakta hi, adiakin information technology paihat mahmah zungzung hial hi. Email zang a chat box buaipih nilouhte hun abeita. Chat box ziaka hun, tha leh zung leh sum tampipi zangmangte I thei mahmah ding ua, mi tampitakte, huai kol a tangin buailoh hial mah uhi. Habit leh addiction chikhat asuak a, ihmulou hial leh gilkial leh eksuah nasan phawkphalou in chat box chauh buaipih ua, hithei kisa mahmah zawsop uhi. Tampite a student life uh buaisak a lohsapna in welcome in ngawngkoi tonton hialmah hi. Short Messaging Service hong omsuah leuleu a kipumbuai nawn get hi, nungak tangvalte kihelna dingin hoih kawi thahah laizang. Message en lou a om theilou, lungsim tengteng huai in peimang gaivek, huchia I hinkhua peibuai sak maimah tampitak kiom leuleu hi.

Computer games apat, Video Games ah graduate tounawn in, ONLINE games kimawl nawn ziahziah, nuamtak chu ahina ve. Ahia, hiai ten hun nemang ua, lungsim lamang ua, lunglutna dang hon neisak lou ua, taksa leh lungsim kisawizoina beisak a, khanvual, u leh nau, nu leh pa te nasan toh I kilainatna/kitanauna dausak zou hit het tel hi. Kiim leh kiangnai a omte sang a mun gamlapi a omte toh kihou kang kang, kimawl zauzau; nuamsa lua hanga I sinlai uh phawkpha nawnlou. Tulai ngial inhouh WHATSAPP chive unchin, a neu alian, atek akhang, chiamnuih leh thil khawloupipi, banah video mak deuhdeuh kishare tuah in, laisim sangin kithupibawl zawta hi. Sensationalism in hon pumtuam a, gamitna ichi hia, naupang sinlai neite kibuallouhna ding ah mitampite kikailut manta hi. Hiai ten I society ah impact hoihlou tamtak ahon neitou laizel ding ua, sinlaite nasatak a influence ahihna toh, kiakniam lam manoh hiai hiai kihidan ahi hi. Huaiziakin, I maban uah, Sinlai naupang ten hiaidan tongsan kimawlnate, kithuzaknate, leh ki socialize nate, a zatdan I kisin ua, I siam mahmah uh kulta ahi hi. A changkang zawsem, tampi hong om toutou laidingte mahmah, hong nuam semsem laiding ahihziak in.

5. TEXT BOOK KNOWLEDGE MAHMAH: Internet leh readymade material tampitak sinlaite panpihtu ding olsam chik a click khiak ziauziau theihna khovel ah ilengta uhi. Serious tak leh khuakngaihtuahna zatngailou hial a, mite bawlsate tungtawn a kingak hithiat mai olsam mahmah vial laizang hi. Project work bawlsa, readymade materials, degree nasan click khiak theihna khovel ah zaw, hahkatluat kullou mah abang maimah hi. Himahleh, hiaidan materials a kingakna in eimah mimal (personal) phone number tanpha memorize ngaplouhna khuak hon neisak beubuauta hi. Kum 50 tunglamte zaw,a ngaihtuahna khuak uh hatnawnlou le hithei, ahia hiai technology leh memory card sung a kithun teng mahtoh khosa ihih lehbel, buaihuai mahmah ding hi. Tuailai thahat ten a khuak hatna mah utoh pan ahonlak thakthak uh poimoh lua ahi.

Laibu tuamtuam ihon sim a, melmuhlouhte leh muhphaklouh gamte I mitkha leh lungsim a suangtuahna toh, khuaksazen a pangkawm in, I theihtheihna izat chiangin, hong piching zawtham tham hi.Theihna detdou leh critical analysis bawltheihna dingin, textbook knowledge mah poimoh teitei a, I mailam hunding ngaihtuahna in, textbook mah pansan tinten theileng chih deihhuai lau hi. Internet I access theihlouh chiang a, khuak neilou mah bat hemhom theihna khovel ah pilvan kul kholdiak ahita hi. Maimah, ka phone ka mangsak a, mihai mah ka bang heihoi chihdan tampi kituakta a, kituak tou zel laiding ahi, a uangzaw semsem toh. Sinlai ten khuak exercise sak sek unla, theihna kibehlap sak zungzung un, a memory card a tui-ek chiang a zaw, I theihsa le mang kikkik theita ahia, thil himhim in ahunlai leh vanglainite nei chiat uhi.

6. SUM LEH PAI ZATNA: Internet banking, mobile phone tungtawn nasan a sum transfer theihna khovel bel nuam mahmah ziauziau hi. Nidang deuh lai in sum kithon tuah loutheilou te ihi ua, commission in sum tampipi iseng sek uhi, tulai inbel nuamtak in banking channel zangin I kithon ziauziau theita ua, nuamtuam mahmah ngeingut hi. Sum neiloupi inzong credit card zat zauzau theihna khovel ah ilengta uhi. Ahia, technology ichite buaithei leh luhtheih hilaizang inchin, second khat sunga I sum neih sunsunte mangduak thei hilaizang thepthup zel hi. A zatdan a nop luat chingin, sum chilzat dingdan haksa mahmah zel a, huaiziak in I theihlouh karin sum tampipi kizang mang khanak sek hi.

Mobile phone sung ah applications tampitak kinei tektuk hiven, huaite I zat ziauziau chiangin, ei kizawng hulhul a, company te hausa hulhul uhi. Data mahmah kihahzat lawtel mahmahta ahihna ah, pilvan kul petmah ahi hi. Nu leh pa ten haksatak a lohsuah ua, ei ahon khualna ziak ua zum leh zah theilou khophial a, sun leh zan a sum zong ua, en I tutmun a nuamtak a nui kuhkuh kawm a numei/pasal toh kichiamnuih nilouh na ding a, I zatmang gige lehbel apap om lawtel dingdan ahi. I sinna leh siamsil bawlna te ah ahonpanpihtu muanhuai hihenla, nu leh pa te guhtui, sisan leh neihsa tawpkangtu hikeithei mahmah leh, chih ikihasuan ngutngut ut hi. Nopsakna I masaksak chiangin khasiatna leh khanvual phakzohlouhna hontun thei ahi chih mangngilh kei ni. Na laisin/siamsin hun lai a na buaipih mahmah numei/pasal pen buaipih taklou ahihdan na theihsuah poimoh mahmah a, khosakna ichih awl a bawl dingdan ahi hi. Sum seng zen in vial diandian kenla, hun mangsak zenin panla sam ken, khuak ngaihtuahna buaisak sam kenla, na phone zatdan mahmah pilvang in, panpihtu dingin zang in, a koihkhiak hun thei in,(lock out)panla thak ni.

7. JOB MARKET: Tulai khovel ah siamna zongin mihing tengteng phial schools, colleges leh institutions hoih taktak te ah dimlet nawinawi hialin, kumteng in millions a sim graduate suah souhsouh gige uhi. Vualtungtuanna ding haksa mahmah ahihna ah, kuhkalna toh hahkat takpi ngai ahi hi. Stream tuam deuh a siamna neite a tungsang baih deuh ua, nekching baih zawdeuh tangpi uhi. General stream a painawinawi in gahsuah ding nei tawm deuhdeuh ta ahihna ah, specialize course tuamdeuh, skill zattak ding sinsuah poimoh mahmah ta hi. Uttar Pradesh ah railways recruitment, staff selection commission te vaisai, UPSC, UPPSSC, Banking, Defence etc. exams chiangin railway stations khawng ah stampede om thei ding dinmun higige mawkta hi. Dakgingngaitu (peon) lakna ding nasan ah M.A/M.Com, M.Phil, B.E, B.Tech etc. candidate tampitak omta mawk uhi. Sepna ding zongtu tam semsem, sepna muhding tawm semsem, reservation nasan phatuam zoulou khong ding bangmaimah ta hi.

A paidan I etet chiangin reservation deihlouhna toh, deihgohna toh, alang alang ah buaina tamsemsem dingdan in omta hi. Huaiziakin, government a sepna I kingakna lianpen himahleh, workforce kumteng a pung hulhulte absorb zoh seng ding hithahah louhial ahihna ah, Manipur government lah I theihsa hiven, I maban ding uh lunggel vengveng kawm a, siamsinna lam ah stream hoih leh lohchinna ding I telsiam mahmah poimoh pen hi. Ichihsa mah bangin, degree hoih in kaam honpe lou ding a, competition a ilohchinna in kaam hon guan zaw ding ahi hi. Siamna tuam deuh, Hotel management, Hospital Management, Hospitality, Tours and travels, Software development, Event management, Marketing, Finance, Social works, Bio technology, Animation, Sports management, Sports medicine, physiology, psychology, sports coaching, Technology tuamtuam, B.Ed, M.Ed, Mass Communication,Civil aviation, shipping, Transport management, Building technology, Human resource management, Law, mechanic, technician, Radiology, Nursing, school management, Skill tuamtuam, leh adang tampitak gensenglouh omlaite poimoh ngaih le phatuam zawtham tham ding hi.

Conventional education ichimai dia, Humanities ah M.A. degree muhna dingin taksa kum 24-26 khawng ngai hi, huai leng kaam muhziau theihna degree hinawnlou mawk ahi hi. Specialization lam ah luh gulgul le, Manipur state sung ah tunung chiang in business opportunities ahong hoih tou ding a, government kaam poimoh selou in, iki toudelh hiuhiau thei mai ding uhi. Manipur ah National Sports University ompahta ding ahihna ah, sepna ding kaam awng sangtampi omding ahi hi, huaiding a kisakhawl kua kua I om ua le? Reservation ziak a chin hizawlou ding a, specialized degree neite a ding tuam vilvel hong hisese ding ahi hi.

8. KIPAHTHU GEN HUN: Tuailai khenkhatte, nu leh pate a dinga laisim kisamawk om uhi, sawlhatthu a kuante ahitangpi uhi. Tuadan nu/pate deihsakna theisiamloute bel mihehpihhuai asuak ua, gim kisadiak ding uhi. Nu/pate itna a thupidan theisiam a, hunhoih ineih lailai a, hahkat akuldan itheihsiam mahmah ding uh ahi hi. Mihing tampitakte laisin ut-tet-tet, lah hithei mahmah lou adim-aha om ahi ua, I hamphatnate theihsiam kullua hi. Sum leh pai zatna ah kisuuk mahmah poimoh leuleu hi, I zat tam peuh leh nute pate a dingin haksatna leh puakgik kiguan sawnsawn ahi chih thei ni. Nu/pa ten lametna sangtak leh, ei khosakna ding ahonkhual luat na ziak ua deihthohtak a hon enkol ahi ua, I pichin chiangin, khasiatsak hetlouh pen tup tinten ding ahi. A vualzawlna uh Van Vualzawmna naak ahi chih thei ni.

9. MAHNI POTENTIAL KITHEIH: Sepaih ut mahmah lah physical a ching mahmah louhial chihdan omthei hi, huchidan mah in sepna leh nektak zonna ah qualification chituamtuam omlou theilou hi. Mit toh kisai (colour Blindess/Eye sight), Hearing toh kisai, Dinsan' lam toh kisai, Chest expansion, Medical condition etc. tampi mahmah om hi. Tupna ineihleh alampi aom, chihmawk ziaka ahitheilou dingpi sual/tup teitei bel haivai suak ziang thei hi. Damtheihna kephoih ngai a, taksa kepsiangthou ban ah, physical fitness poimoh mahmah hi, taksa damtheihna mahmah kepbit kullua hi.

THUKHITNA: Mimal chih ah hihtheihna talent piak tuam kineichiat ahi a, huai potential ineihte, zonsuah a, sukpichin pen ei mimal mal mohpuakna ahi hi. Football pek ongong dingin mi I delhpha kei ahi maithei, I taksa lah neu thingtheng hiven. Ahia, football kimawl siam taktak na bawlkhe thei a, alang alang aa taisaktu inleng na pang thei veve, hamrit na mutna lamlam ah diangkual saksak ding himai neivoi. Boxing dingin kuamah ngapthoh ding nanei kei ahi maithei, mi thalianpipi kisusak onon tu in napangthei veve hi. Lenna lianpi vanlaizawl ah, a tawlam a meikuang pawtkhe zenin na lengkual saksak thei zawmah lai hi.

Technology kikheng thithe ten khovel kivaipuakdan leh nekzonna te kheklamdang thithe thei zelzel a, nekzonna hoihtak leh detdoutak ichihte nangawn vut lak a veihsan, vailak a zun thak mah bangsak thei veve hi. Nidang lai in Land Line telephone lou omlou ahihna ah Telegraph khawng, PCO khawng kithuzatna hoihpen ahi uhi, tua huaite bei dildelta. Banking nasan hun hongpai zel leh, core banking business ziakin sepna tampitak beiduak thei mawk ahi, Sumdawnna hoih taktak retail market pipute hun a goumanpha taktak te, tuchiang in buaisan mahmah ua, Mall culture, Multi level marketing culture, leh ONLINE SHOPPING ten traditional business buaisak gaivekta hi. Kitenna, kithumsakna, religious ceremony tuamtuam tanpha ONLINE a hihtheih ahihtak ziakin, business model tuamtuam hongpiang touzel ding a, technology toh panlakdan (catch up), siam mahmah poimoh semsem ding hi. Medical service nasan, ATM ah damdoi lakkhiak ziau theihna omta a, diagnosis leh surgery (operation) tanpha galgam apat hih ziauziau theita mawk uhi. Hiaite ziakin, om mun a ektehtut hun nawnlou hial hi, I laisin dan, I nekzon sawm dan, leh I maban dingte michih in, lunggel vengveng kawm a, a tuam deuh, tulai khovel toh kituak ding, I lunglutna leh siamnelna lampi tuamdeuh I zonsiam uh kisam hi.

I hamphatnate a phatuam dingin zangsiam hile, ei a hampha pa/nu kihi lel ding a, I hunhoih tampitakte mangsak a, internet tungtawng a mi toh kinak loiloi, gam leh nam itpen dan a kikoih khak chihte, khanvual phakzohlouhna kalbi hoihtak ahi hi, zi leh ta vakna ding leh nektak zonna dingin phatuam khollou khathei hi. I lohsap chiangin kuamah hehnemtu ding kineilou ahi chih thei kilkel kawm in ... DELH LENG KA PHALAI DIAM? Chih thupi in nei ni. Online popularity zong in Twitter, Instagram etc. khong ah maingal lawmlawm khol kei ni, you really miss nothing! Tuailaite lohchinna in Siamtu a pahtawi a, nam a tawisang a, insung ah kipahna atun naknak ngal a!Lohsapna in singbul suangbul ngohding azongsak a, tatsiatna leh kingaihsiatna atun naknak zaw hi. Hun hoih leh chance hoih zangkhialte mah ahi, hinkhua ninhuai sa a, depress kichi a, mualphouhuai tak a gamtang khanak sek te.