Mihingte sihnung hinkua - pipute muhdan ....
By Vungzamuan Valte

GINDAN: Huchi'n a hinkhua awl awl in ahong bei hiaihiai ta hi. Kiit in kingai mahmah le u'leng sapkik theih omlou ahihna ah misi khua lam manoh in apaita hi. Pialgal beek ah kimu ni maw....chi in a kimangpha khak tuaituai ua, mittui naptui toh kikhaakliam a kulta hi, teksepi himah leh a hunluite uh amang tuan teuhkei mai.

Misite a khaa uh kha li sung vialvak den ahi achi uhi, huaiziak in sungkhat tengkhawm hi awmtak in nektak a pia ua, hiai ah na nekding chi in si annsiah a koih sek uhi.
Hun ahong sawt hiai hiai a, misi pen misikhua ah apai a ngaita hi. Utloupipi leh lin ngoihngoih kawm in phengphelep ichi hia, dumde ichi hia, in a changta a, misikhua lam manoh in a paita hi.

Pialgal tunna dingin lampi sautak pai angai a..
Misikhua a paidingte phallou in lampi ah ana lambun sek uhi, mattang sawm in kisaten sek mahle uh, a kawng a mantang chet akichih chiang un, a mang duak zel hi. Khutsung aa mantang a kisak chiang u'n dumde mankha khawng ahi maimah sek ua, akhutzung kar khawng uah a lengkhe zel hi.

A tawp a tawp in Rihdil lam manoh in a paipai ua, misikhaate a pau tumtum sek uhi. Kimukhawm ahihna uah a gending uh mah tam hiven a kihoulim tumtum ua, paisuak pah theilou in a khensate uh nung-et kawm leh khelahtak kawm in misikhua lam manoh in aleng tou diai diai ta uhi.
Mualsangtak mai a tung ua, Teutevum kichihna mun ah a khawl tawldam ua, aneu alian, atek akhang a kingakkhawm tiktekta uhi. Mualtung nuamtak leh thawveng tak ahi a, nungkaih veitheihna mun leng ahi hi....

Sakhua kichi mumaltak neilou himahle uh i pipute hunlai in kha kap, kha hang, kha hoihlou, kha lauhuai leh kha khasia chih khawng nei hihtuak uhi. Sikha pen misite khaa hi a, kha sual leh buaina bawl ut himhim om danin leng thei uhi. Huaiziakin, sihdan pangngai loudeuh a sihna tuak khate saksih (sarsih) achi ua, sa keih, tuk lum, sing a kia, tui a kia, gal thah etc. sihdan pangngalou asuak ua, huchidan a sihna tuak khate ani mahmah in vuiliam sese sek uhi, insung nasan tungsak lou lawi om uhi.

Sihna ziaka kha alaan ding lau mahmah sek ua, mialnuai leh gamlak peuh a khawsa ahihna uah, thawmgingthei tamdiak hihtuak hi. Buhbel kisawk ging hiam, thawmging danglam deuh khawng aom chiang in, ....aw na gilkial ahi maw, vahtak in ne inla...

Mihingte theihtheih ding aa kilaak aom chiang un, mutheih hilou ahihna uah, sikha ten va lausak hiam, va hih hialhial, khoih thiam thiam uh zong hithei...huchih hunin..aw hong lengla nahi maw, damtak in leh, lungkim takin pai in aw...chisek tangpi uhi.

Huchih hun chiang in lauhthawn'na laukha leeng a, insung a om ngamlou leh khawhar kisakna intek ten nei ahihna uah, sawmgiak kichi, pasal piching ten giahpih sek uhi. Huchidan a sawmgiak omna ah leng kha gilou taktakte a gamtang thouthou sek uhi.

Haan mun ah kap ngau ngau khawng bangle om sek ahihna ah kha kap chise uhi, thawm maktak ahi ngei ding, Shillong a Khasite gam ah, Hanmual nai lak a om ten za sek hidan in kigen ua, ani Niang in ka chian kei, chi hi, a tanu khat inbel dak 12 nung chiangin ka za gige chimawk venchin, a za thei tuam om bangmaimah...dawilok ziak le hithei. Pa Liankhosiam telawi a tangval lai un sikhapi mu ua, hangsan taka singkhuah toh a delh uleh akbawm sia hizawzen.
A kha hong lang mah ei, ka feel thei, hon khoih hian hian ahi.....achithei bangle omzel, experience dan tuamtuam omthei mah hinte..a tangpi thu in zansawt nunga gamtangte bel zusapi/sazupi leh zohngeu/sangak khawng ahi ut chitchiat ua hiven. Ak ngawng heeksak hat mahmah khat om taget venchin, sikha in ak ngawng aheek ziak a, zaanlai a thohkhiak lunglung hun tam mahmah, heektakpi hi, kawi beibui maidan ahi, asi om, asilou leng om uhi...ak dangte kikou kheukhou ua, kawk-kawlek chuahchuah sek mah uh ei.
SIHSIA: Pipute hunin sih hoihlou tuakte khawng aziak om dingin gingta tinten sek uhi...sia leh pha khenthei ahihna uah, gu ken, zuau gen ken, khem ken, tualthat ken etc. chihdan pian moral lesson hoih taktak paipih nei ua, zui tinten naknak uhi. Sih hoihlou leh nat hoihlou khawng atuah khak chiang un.... aw a huchi a eive, aw a khachi a eive, a tatse lua a ahi..a kam mahmah a sum kei lua a eive...chih khawng gen naknak uhi. Huaiziakin, pipu ten thusia lasia a gen chiang un, huaite mihoih ahi uh, zuau genlou/gu lou/diktat...chihdan in mi a muhdan uh, sungkuan a muhdan uh ngaihdan kiptak nei tinten sek uhi. Tuadante mah ziakin zi/pasal kizon tungtang ah a lamkaitu hoihpen suaksak uhi. Liau leh paan omtheite zahna lianpi nei ua, thumangtak in hinkhua a kembit uhi, u zawte zahna, pitek putek leh nu leh pa zahna liantak nei uhi.

MISI KHAA: Sikhaa ichih dawi hi hiam? chihdan i sui chiangin thu haksapi hi a, misite, a kha un taisan pah ahi chi toh, a kha uh om nilouh ahi chi toh, tulai christian sakhua neite nasan in kithei chiang zoulou lai hi.
Paradise lut pah uhia, paradise apat vangam chik hun chia kai ding, meidil lut pah rokrok ahi duam..etc. ei a hinglaite' theih but ding zaw hilou mah dan ahi hi. Ahia, sihna a om chiangin thawmhauna lianpi kinei a, mihing teimai ihihna uah, sihnung chia bangchi di..chih leh, a si thei mai, huai leng houchik a sih beibui theih ahihna ziakin, mihingte patausak in thawmhausak den hi. Sihnung khamuanna ichi ua, a delh in i delh kheukhou lou thei kei. Himahleh, pipute hunin diktatna, hoihna, migitna, thuakzohna leh hinkhua zathoih ichihte ziaka Pialgal kaitheihna lampi genkhalou mawk uhi....

Misi kha pen Teutevum ah a khawltawldam tadih sek uhi, kingakkhawmna mun chihdan pian ahia, sial gamtatna mun mah bangin kolh vetvut hial chi uhi. Munthawveng tak chu ahihtuak mahmah ve.

Huai mun apat painawn leuleu ua Hinglang Tang kichihna mun munsangtak leh nuamtak tung nawn leuleu uhi. Hinglang Tang ah khawvel mukik thei ua, kigaldoh hoih mahmah hihtuak dan ahi. Huchi in, a khensate uh, azi atete uh, anu apate uh, a pi a pute uh, ani agangte uh, leh khanvual it taktakte mel leh puam, a khosakdante uh mitkha in galdot thei uhi. A khente gendan ngial in houh, a innsung ua khosa tiktikte khawng, a khawsung ua nuamsatak a lawm le vual omkhawm tiktikte khawng amuh chiang un lungleng thei mahmah ua, kap ngoihngoih zeldan ahi uhi. Nungkaih veilou kua aom mah dia maw..

Hinglang Tang apat khitui naptui toh paikhia nawn leuleu uhi, huchi in Zingvanzawl kichihna mun ...mun sangtak leh nuamtak mai tung nawn leuleu uhi. Huaimun apat a khawdak chiang un, munsangtak ahihziak in muhtheih hau mahmah mai uhi. Gam nuamtak leh etlawmtak mai, valley of flowers chihdandeuh Hoiloupak te hing dipdip a, agampumpi tuamsuak in kiphah zezuata hi. Etlawm sa in phurtakin maban sawn zel ua, tuiluang ging biahbiah te zathei ta uhi. A gam noptuak mahmah ahihna ah a khekhai uh kingang zawzen hial a, utna lam ah chu a kalsuan uh kinlua in khetul khawng kipalsak noknok hialsek uhi..chi uhi.

Hoiloupakte omna mun atun chiang un hoihlawtel mahmah ahih chia, lou lou thei lou, khiak lou thei lou, lawng lou thei lou in, hipnatak khat hiai pak lamdangtak ten nei uhi. Huchi in lamsak lamkhang a pak omte a loumasa ding kituh hialthok in a manohna gam uh phurtakin masuanta uhi. Huchia, tai thoh zawzen hial a apai lai un Hoiloupakte nektheih ahihdan theikhia ua, huai pak namtuitak te a nek chiang un, a leitung hinkhuate uh ngamkhat in, lamdangtak in mang duak hialthok hi. Lunglenna lungsim, nungkaih veina khagau neinawnlou ua, kipaktak leh kithaloptak in Lunglouhtui luang diim diim omna lam manoh in paizom zel ta uhi....

PIALGAL: Hoiloupakte omna paikan in, khekhai zangtak mai in pheiphung suanta uhi. Lunglouh Tui (Damtui/Ngilhlouh Tui) siang kilkel, te seksek zawzen luang ging biahbiah hi. Tuamun a tun chiang un tawldamna leh dangtak nemsakna dingin dawn lou theilou uhi. Huai tui limtak mai a dawn chiang un lamdanna khattak nei uhi. Khawvel thil tengteng mangngilh ta ua, a maban uah, Pialgal/Chiaugal kimuthei ta hi. Tua Chiaugal mun nuamtak mai a omte galmuh thei ua, nuam sak mel thei mahmah uhi. Gam nuamtak leh sing leh louhing, pak chituamtuam leh tungleng vasate ban ah, gamsa chiteng toh mihingte khawsa khawm uhi.

PUPAWL LEH SAHNU: Himahleh, Pialgal lutna ding lampi hoihlou mahmah mawk thepthup hi. Mun kense lakpi hi a, lampi kawchik tak mai, atung anuai lamte et ngam ding leng hilou, tua mun ah Pupawl leh Sahnu ten misite ana lambun/ambush den mawk uhi. Pupawl in gawphel khauhtak leh liantak keng fenfun a, sailim tang aktui chiachia in mi ana kaap ek ek sek zawmah hi. Naa sathei mahmah ua, a kaap khakte dup keihkuih zawzen uhi, meima damtheilou leh meimapawm kum tampipi a mangtheilou nei zawmah ua, a paisuak ngap tamlou hial uhi. A paisuak om sunsun te Sahnu in puansia se nepnuappi toh nungdelh den zawmah lai a, genthei sak mahmah sawnsawn laitel hi. Misi kha te mihing suakkik ua nat le sat theithak phing uhia! Chihbel kisui bun lou ding hi. Ahia, Sahnu zahmoh sawk ding pen kihhuaipi hihtuak maimah a, kisawk saklouh teitei sawm in a thaneih tengteng un gamlakpi leh kenselakpi ah taitai maimah sek uhi, chi uhi. Pialgal tunna ding lampi haksa in lauhuai mahmah hihtuak venchin, a suakta zoulou te kibu ua, kigelguk sawm in gem khiankhian zel dan hihtuah uhi.
Huai Pupawl leh Sahnu soisak ding lau penpen ua, pipute hunin kitaiteh naak thei ngial uhi. Mihingte, a leitung hinkhua ua, sa-aih, gal-aih, Thangsuah zou ichihte kia'n, hiai Pialgal gate nuamtakin galkai zou phet uhi, chi uhi. Mihangsan leh mithupi a chihte u'bel thupitak in pialgal lampi ah sial tung a tuangin a kiim a kiangnai uah vengbit tu nei ua, gulngan in makaih a, a tung uah muvanlai in veng den zawmah hi. Thupitak a lut ahihna uah, Pupawl leh Sahnu te lau leh ling kawm in taikhia ua, suang pang khawng bel in kibumang sek uhi. Pialgal a lut chiang un phaisa (buhsih) ne in, nuamtakin khawsa ta uhi. Buh tuh ngailou, lou khawh ngailou, buh suk ngailou, buh sep ngailou a phaisa nek ichih pen, pipute ngaihdan in thupi mahmah ahi hi.

HINKHAW HAKSA: Leitung ah khawsakna haksa mahmah a nekkhop muh pen thunamai hilou hial hi. Buh hum om mahleh, phoukeu ngai a, sum a suk ngai a, lawhpi a sepsiang ngailai ahihna ah, phaisa nek bei zohlouh om ichih pen a manglam utoh kibang mahmah ding hi. Tangtawn in niang leh tai in, a galmatte uh sikha a nei in, a suak leh salte uh nasemtu a nei in nuam takin khawsa dan in gen uhi. Tulai dinmun in bel phaisa ne ngenta kihi ahihna ah pipute hun aa Chiaugal kaikhin sate toh kibang vek ihi uhi.
Huchia Pupawl leh Sahnu ten a lutsak louhte uh pialgal ngai in misikhua ah thamden maimah hihtuak ua, mihoih mahmah khawng himawk le uh buaihuaipi suak leh kilawm hi. Galhat leh galhang ichihte mihuham hinaknak ahihna uah. Himahleh, huai migi mahmah khenkhat te Sahnu zahmoh sawk ngai chitchiat ahih chiangin, namsia mahmah hihtuak a, huai Sahnu bangkhem gimnam vengvung a beitheilou toh Pialgal kaizoute bel pialgal ah mite siahloh leh sontawlawi in pang maimah hihtuak leuleu ua..bang hang hiam aw?

SIH LEH MAN: Mihingte hinkhua ah siatni phatni omlou theilou ahihna ah, nidanglai in lungdonna leh hamhaih kisakna tamdiak dingin gintakhuai hi. Ahang bel, apiang khiate nasan, piching suak zoulou a, atamzawte mangthang leh, nat le sat gensenglouh te omna ahi a, hinkhaw nuam chihding vang mahmah leh kilawm hi. Huihpi...Vuahpi... Gialpi leh Vanpi ging dumdumte lau ua, gamsa lauhuai tamipitak lak ah teng ua, theihsiamlouh lah muhtheih hisilou te ziakin...zahngai ding leh theisiam hamham a ahaksatnate uh vaivengsaktu ding poimoh ngohngoih sek uhi. Khuanu, Khuavang, chih nei ua, leitung leh leinuai a vaihawmtu omdingin gintakna nei uhi. Khuavang siam ahi uh, chihdan bang nei ua, chivom neite bangle khuavang chiamtehna chihialthok uhi. Lasi dawi nungak in misiamthei a, a kizawlpihte bangtuh hauhulhul maidan ahi uhi. Pheisam toh kizawl chihmahtak nei hamtang ua, Pheisam in mi vualzawl theidan in gintakna nei tinten bok uhi. Natna satna tungtang ah, dawi giloute ziak hiding in gingta tinten leuleu ua, sukthangpaih khak ding lau penpen uhi. Suklungdam sawm in nakpitakin panla den ua, a hinkhua uh tawl mahmah mai hi.

KIVAIHAWMDAN: A damdawi ding hiam, beidot hun a manoh ding omlouhna hinkhua ahihna ah, gintak ding leh gintaklouh ding theihkhen haksa mahmah lai ding hi. Khua khat ah Hausapu intekna nuai ah khosa himahle uh, gal leh melma omden ahih ziakun, lungmuangtak leh khamuangtak a tawldam hithiat theihna khawvel ahikei himhim mai. Hausapu panpihtu dingin Siampu a om ngai a, spiritual leader ichithei ding e, phuisamtu, dawi le kaute lak a kivenna dingin phuisamtu leh kithawisaktu ding poimoh petmah mai uhi. Kingakna ding dang omlou ahihna ah, Siampu ten a hinkhua uh thuzoh zou mahmah mai ua, siampute thu nialvual louh in koih maidan ahi uhi. Siksektu leh tangkou alou theilou hinawn leuleu ua, siksektu ngialhouh a poimohna lian petmah dan ahi hi. Thauvui thautang a om masang in, teipi leh hiamhei zangin galte dou ua, sa leh gal lak ah bitna mu uhi. Siksek tu'n loulam leh gamlam a zatding, inten louten a akiphamohte... tu, heipi, tempawng, temta, tei, suankual, tuphulh leh adang dang bawlsak den hi, huchi in siksektu te khawsungmite a dingin, kingakna pen leh panpihtu naigige ahi nginget uhi. Tuabang bokin, galhang leh mihangsante poimoh nawn mahmah leuleu ua, Hausapu toh pangkhawm in khawsung ah bitna pia uhi. Nek leh dawn ah dinmun neisang diak ua, khawnbawl upa lak ah panmun poimohtak nei hamtang uhi.

DAWI LEH KAU: Huchidan hinkhua ahihziak in, dawi leh kau gingta ua, dawikungpu, dawisekawngkang, Penglam dawi-um, Kahngaibawmpi, In kau, gam kaupi leh adang dang tampitakte gintakpen in nei uhi. Sikha ichih mai leng dawi chikhat ahihna chiang om maimah leh kilawm hi, tulai in setan nasep ichita ua hiven. Toupa Jesu leitung a aomlai nasan in mihing sunga dawi simsenglouh lutte hawlkhia in vokpi hon sung ah lutsak a, huchi in bualtui ah tuaklum lemlum uhi, ichi hi. Damlouhna chituam tuam om gige ahihna leh natsiat leh hisia leng gige ahihna ah, sihna leh mangbatna simsenglouhte tuak ngitnget uhi. Tuate ziakin, lunat, lainat, sinnat, sungnat, zengnat, gilnat, kumzawn leh adang dangte ziakin gindan chikhat, natna tuntheitu dawi leh kaute hidan in koih tinten uhi. Huaiziakin, lauhding leh zahding in koih ua, muhtheihlouhte suklungkim sawm in damna a deihna lam uah kithoi lou theilou mah ahi uhi. Awl awl in a theihnate uh kibehlap toutou zel a, singzung apat dawmdawi, aizung apat damdawi, saki , gulpi sinkha leh vompi sinkha te apat sungna, santen leh adang dang damna ding musuah uhi. Huaite traditional medicine ichi thei ding a, himahleh natna leh haksatna tampitakte in pumtuam den ahihna ah ngoh ding mah tamsak ua, thoidam ding mah tamsak mahmah hial uhi. Blind faith chihsak mawk dan omkei inchin, amau tawk a gindan leh damsakna amuhdan uh ahia, ahuntoh kituak in namdang leh midang ten le huchimah in panla ahi uhi. Gulpi sinkha bang kinekha hitel a, sungna dampah geih dan ahi hi.

LUNAT CHINAT: Damtheihlouhna khenkhat, tuam diak asak uh om hiven, kumzawn natna ichi hia, zeng natna khawng thawidam theih ding sa uhi. Lungsim leh khuak natna nasan lamdangtak in dawite bawl ding sa ua, kaih ichih khawng phungzawl chiteltawk uhi. Epilepsy ichih kaih natna ahia, khuak a nerves simsenglouh kizam neihnuaih te ah neurons kichi billions a sim om uhi, huai neurons te tungtawn in signal, electrical impulse paiden ahi hi. Tua nerves gui kizamte a fuhlouh chiangin (genetic disorder), khuaksung ah signal paite kipalbuai in kiphutuah khasek ua, reverse direction khawng in paikhasek uhi, neurons te sisak ua, khawtheihna (consciousness) ngamkhatthu in bei duak mawk hi, huai in kaih piangsak sek dan ahi hi. Mimasate muhdan inbel dawi leh kaute nasep hingel dingin gingta tinten ua, kithoi lou theilou ahimah uhi. Tuchiang in bel damdawi toh surgery khawng in a damthei pawl a omta a hiven. Himahleh, short circuit brain sunga a omna kawmbulua ahihleh bel surgery bawl ngaihna omlou hileuleu zel, vangtahna ziak ahi mahmah mai.

Kau keih kichi bang le lamdangtak ahi a, tunitan in bei nailou lailai tel hi. Khangthak ten a mu kitam hetlou ding ahihna ah gintak haksa maithei hi, ahia om mahtham tham ahi ve, Pioneer labour te Bukpi pau ngaungau ichih bangchu naichik hilai inchin, singtang mun khenkhat ah om lai mah ahi hi. Lamdangtak ahi ding a, kau in suangkhua pak ahua a, pheisam in singkung khenkhat boh ut deuh ahi leng chi uhi. Bangteng hileh, pipute hunlai a thillamdangte mah tunitan inleng omlailai pawl tamtak, genmai mai theih hilou, leh aziak ding theih butlouh om veve lai hi. Gam kaupi keih khakte bangtu si teitei dan ahi chi uhi, ka lau.
Tangthu kumluite ah witchcraft kichi tamtak muhtheih in om hi, huaite bel KIBUMNA ichi hia, dawikungpu dawibuk, Penglam dawi-um, Ngambawm Dawi-um, Liandou leh Thanghou te Dawi-um ichih khawng tampi mahmah om ding hi....

KIBUMNA: Dawi leh kau, dawimangpa, setan, sikha, khuavang, khuanu, lasi, leinuaimang leh adang dangte banah I pipute hunlai in dawi thilhihtheihna koppih thei mihing tampi om hihtuak ua, tangthu kumluite aa Dahpa ichih bangtu Mihing hidingin gintakhuai khollou bang maimah hi. Pitek' nu khuang lamdangtak mai bengging khauh khauh in kihihhausa hulhul mai a, tong hialdan ahi hi, a tong masa aa chiamteh mihing ahi zawmah lai hi. Penglam tangthu I ngaihtuah chiangin mihing taktak hilou maithei lai hi, himahleh a dawi um/buk va-ak in tuahsak inchin gunlui ah kesak kha hi, huaitakin Komte'n kitangeih ahihchiang un, Penglam' thilhihtheihna lamdangtak, a magic box namdangte khut ah omta hi. Huaiziakin Komte mibum hat dan a gen pawl kiom hi, a taktak adiam a?

Kibumna tam mahmah ahi ngei ding a, nidang lai in akgesawn leh kel mei khawng naupang oksak sek uhi. Khualzinna khawng ah nek ding dawng ding tungtang ah pilvang thei mahmah ua, phuisam masa hial sek uhi. Zu mun ah zu a tep ma un neuchik sungbaw se sek ua, zu nou apat nengchik bek bawsak se uhi. Nek leh tak ah kibum theih hiding hiven, pilvang thei mahmah ua, kibumna leng a tam chihna ahi mai hi. Huai kibumnate bang hi hiam? Chihbel kithei bunlou ding hi, a chingzongsang leh a kiguizop loute a dingin theih but ding hilou hial hi. Trade secret dandeuh hihtuak a, ai chitampi om hihtuak a, huai ai khenkhatte a hatdeuh om hiding hiven, mi bumlum thei ahi chi uhi. Kibumdan chituam tuam om ahingei ding a, nungak/tangval kibumna bel kingaihsak ahitangpi hi, zawl-ai-di achi ua. Khenkhat ten sangak bangin mi bumhai thei ua, sangak zahmoh zatna hoihtak om ahi chih khawng gendan khat nei uhi.
BANG HI HIAM: Dawi leh kau te nasep ahi hia, tulai a hypnotism ichihdan ahi hia? Chihbel kithei lou lai hi, himahleh hiai kibumnate haat mahmah hihtuak a, pasal in numei a bum khak chiangin a numei in huaipa ngai ngoih ngoih mai, amulou a om thei mawngmawng louhial chihdan hihtuak mawk hi, haatchi kha vanglak...

Dawi biakna chikhat ahi ngei ding a, nidang lai in Khanthuam Sukte haat mahmah ahi chih I thei chiat uhi, dawi toh kizawl ahi chia laigelh pawl om uhi. Khatvei, thah sawm a melmate zonzon ahihlai in singnuai khat ah mangbangtakin tukhinkhian hi, kingaihtuah paisuak ahiding a, biak chikhat leh kichiampih nei ahi chi uhi. A banpuam ah khauhual in nakpitakin kigak hi, a lungphu khawlsak zou ahi ngei ding a, a sou beisak thei mawk hihtuak hi. Huchi in daang dildel in sih ding sual hileh kilawm in om hi, soudomtute nasan in siding sa ua, melma ten taisan ua, huaiziakin suakta hi, kichi hi (melmate khut apat taikhia).
Langza Manlun hausa thupi mahmah khat Khuangnung ah teng ngei hi, kiim leh paam te zahtak hi a, thunei mahmah khat ahi hi. Zubel lianpipi puakin khaw tuamtuam apat vehtu neithei mahmah hihtuak hi. Khatvei Lusuang ten zu puak ua zu nekna nei uhi. Ann nek huntakin Langza zi Dimmang in a zinte ann ne dingin samta hi, Lusuang suang sawnsawn te, an hong kinek un, achih thahah leh lusuangte heh mahmah ua, bumta uhi. Langza zi huukna gu in bum ua huuk chihtakpi in huuk mawk hi. A khawsung ua pasal teng le deihkhop nawnlou in om maimah a, Sialthah Hausa Phutthang Hauzel naupa Henhong Hauzel khualzin bangle akut in kun maimah hihtuak, mikhual pa'n lah, kei a gol lua chi. A khat nu'n lah, sathau nuh lechin paksa in teh, chi. Henhong in tempawng a satna tuak aa Khanthuam Sukte kongtual a khuang beng a lamkimlai, a khuang leilak ah paihkhia in Langza tung ah hehpetmah mai hi. Huchia Langza zi alan mawk ziakin thubuai labuai tampi omtouta a, huchi in a lalgam mansuah dildel hial hi, Khanthuam Sukte khut ah om vekta hi.

Khanthuam tapa Kamhau Sukte a lal lai in Teddim gam leh akiim a kiang a khuate simgawp in siah gam lianpi sung ah kai hi. Huchia a siah kaihna gamsung a khua tampitakte ah zin kualkual sek hi. Khatvei Thadoute khua Mualpi ah Mangvum hausa ahihlai in Kamhau Sukte toh a tapa Sawmpau vazin uhi. Mangvum leh a khawmipi ten hoihtakin zintun ua, gan gou zenin nektak bawl uhi. Himahleh, Mualpi te Zamkang a laksak ziakin lungkim lou ua, a tapa Sawmpau bumsak uhi. Hun sawtlou chik nungin sawmpau in sihna tuak mawk a, Kamhau thangpai mahmah ahihziak in, Mualpi khua simgawp ngiingeeii a vaivut suaksak hi. Thadoute taidarh vek ua, a khawnunglam in Mualpi ah Mangsum Guite kiseklut hi.
Kichiamna ichih khawng hahbawl thei mahmah ua, kibumna mahmah tam hihtuah mahmah hi. English te a honglut tunglai un, bum haat chia chiamteh khawng a tribe danin khen uhi, guk haat, khem haat, leh zuauthei chia a chiamteh uh, gintak ding hilou huai Siyin te chihdan deuh aa khendan nei uhi.

WITCHCRAFT: Vaite lak ah witchcraft kichi tunitan in omlai hi, human sacrifice chih khawng tantric ten hihlai lai uhi. Huchimah bangin, Kawl te mibum haat chia chizauhuai danin kithei bok hi. Kawl ten tangmite mibum haat danin thei nawn leuleu ua, kichizat tuah tuaktuak hihtuak uhi. Kibumna vanzat bang hi hiam chih sut mawk le, houchik khawng himaimah leh, kibum chelchul kha ding hihang, sut kul kei. Meitei te Maibi, Maiba ten Lai gamtatna, Lai paina, Lai omna achih khong uh omsak sek uhi. Maibi, Maiba ten mi bum thei ua, bumna tuakte leng suithei uhi. Huai omdan bel, kibumna I kiim I kiang uah, I nam sung uah omvek hihtuak mawk hi. Kibumna tuakkhate bel, a lehkikna hiam, damsakna dingin lamdangtak in damdawi zattheih hilou mawk hi, pilvanhuai mahmah. Tangthu kumluite ensin le Liandou leh Thanghoute unau leng dawi-ai nei hihtuak ua, dawi pitek in asiam ahi uhi. Thupitakin hausa ua, melmate muhtheihlouh dingin omtheidan ahi uhi, himahleh, lamdangtak in a dawi-ai sang ua hatzawtham neitute mai ah bel suakta tuanlou zel uhi. Dawi toh kizawl ichihte bangleng akisiat hun uh, a taisan hun uh omzel dan hileh kilawm hi.

Meitei te bum, Vaite Bum, Khasite Bum, Kabuite Bum, Komte Bum, Burmate Bum, Tangvalpa Bum, Nungaknu Bum etc. chihdan tam mahmah a, thumna toh pangin dawi thuneihna kihawlmang sek hi. A khente pawt utlou leh phatheilou ichi ua, Maibate I suizuisak sek uhi, lamdangtak ahi chi ua..

Pipute hunin Bumlehna kichi nasatak a gan si toh kithoihna neisek dan ahi ua, tuchiang in bel phuisam leh gan si a kithoihna a omnawn kei a hiven, ahia kibum chihmawk, lungsim siathuai tak zaw ahi. Tulai in setan nasep chihdan a tamsim a, setan bia bang I omdek simta uh abang maimah a, hiai kibumna ichih khawngte mial nasepna ahi a, setan toh kizawlna ahi mahmah mai hi. I namsung, i khawsung honluh ahingei ding, kibumna omveu sek hidan a theihna tamtak om mawk hi. Christian sakhua in hiai kibumnate deih hetlou himahleh, eisung mahmah ah om zihzeh tamawk a, lamdang sakna lianpi om hi. Dawi thuneihna, dawi zawl theihna, dawi toh pangkhawm mite, I lak uah aom chihna himai lou di hia, keukou gouh. Sikha meihaal chihmahtak toh, bang toh!!!

MISI VANKEN: Mihingte isih chiangin vanken kikengsak sek tanpi hi, pipute hun toh kibang lai veve suak hi. Pipute hunlai in hiamhei chituam tuam kengsak sek ua, misi pe'n vanpoimoh teng leng kengsak tangpi uhi, numeite bangtuh buk tep ding alou theilou ahi a, pasalte bel lum leh tei, leh tempawng, zabel, tuibuk, zubel etc. alou theilou ahi hi. Naupang neu asih chiang u'n aktui pum a khut nih tuak uah tawisak/simsak se uhi, Pialgal lutna ding toh kisai ahi leuleu zel hi, Kicheina van tuamtuam leng misite kengsak zelzel uhi. Nidanglai in mithupi a sihchiang in thoudoutu ding leh thandoutu ding khawng toh phumkhawm sek zawmah uhi, gallu lak leh samatte bang poimoh ngaih diak ua, nungzuitu danin koih tangpi uhi, ahia a thoukik chihbel kithei zel lou hial hi.

LEITUNG IN A PIANPIH: Egyptian Pharo te dandeuh a thoukik dingdan a kikoihna leh ginna zaw neisam dan ahi uhi. Greek te muthology khawng ah love potion leh sihtheihlouhna damdawi kihah gen mahmah a, William Shakespeare tangthu gelhte ah huchidan mah in tampitak tuang hi. Love potion, zawl-ai-di, kibumna vanzat kichite khovel pumpi ah mihingte'n ahunhun in zatdan nei hihtuak ua, muntuamtuam ah akizatdan tuamchiat maithei hi, himahleh, kineivek hihtuak a, i pipute nasan in hahzat mahmah hihtuak maimah uhi. Haankhuuk a kiphum/vui pen pipute ngeina mah kipaipih lai tadih hi. A gindan tangpi khat leuleu u'bel, hinsung a gal that/man tamte mihampha hi ua, Pialgal ah siahloh ding tampi nei uh chihna ahi hi. Gal mat/thah neizouloute bel, Pialgal nasan lut zoulou laitel dingdan ahi uhi. Phuba lak kichi ngaipoimoh mahmah ua, gal a sihna tuak sungkuan ten misipa/nu phuba (sanggamte sisan luang) a lakzoh keu u'leh bel, tangtawn tangtawn in galmantupa kol ah tangden ding ua, siahloh in omdenta ding uhi. Tuaziak mah ahi hi, pipute hunin huchitel a phuba lak ding a ngaihpoimoh nasan tak uh. Huaiziakin, Gal guk bawl ua, kithat kithat se uhi. A thah zohlouhte nasan uh BUM maidan hihtuak uhi.

TULAI DINMUN: Pipute hunlai aa ahinkhua uh buaisaktute mah hongkilehkik dekdek abang simta a, pilvanhuai mahmah ding bang maimah hi. Kibumna ichihkhawng chizauhuaipi khat ahina leh, Setan Dawimangpa nasep ahihna ah, huai mial nasepna pen I khawsung, Innsung leh, Society apat beisak kiikeeii hunta hi, Pathian Hing Bia ihihna uah, hiaidan mial nasepnate toh I ginna le kituak mohten hi. India Dan in, hichidan kibumnate (witchcraft) khaam bikbek ahi chih thei in, huchidan a gamtang omte peuhmah mansuah in khumbichilh pahpah le, Miabi Maiba kipoimoh louding hi. A taktak inbel, kibumna ichihte setan nasep ahi ichi, gamtat kuitung lou mahmah khat ahi hi. A gu a bei chiang in, ek nin in kining thei hihtuak ua, itna mit a en nawnlou in, huatna lungsim piangsak chi uhi, thil phatuamloupi ahi ve.

Internet khovel ah ilengta ua, kikhemna chituam tuam a tam mahmahta hi. Lottery cut loupi a lottery prize kimatsak, kaam/sepna ding apply loupi a sepna kimuhsak, van thukhak loupi a van hoih taktak kithon (athu in) dandeuh a kikhemnate tulai hunin Lusei pau koppih zualta le Kibumna ahi veve hi. Tampitakte huchidan kikhemna ah awkkha ua, buaihuai mahmah mawk hi. Negrote siamkholdiak a duam a; i nungak hoihtaktak te hon khemsak sak mawk ve unchin, drug case, bank fraud case, leh kikhemna tuamtuam, pasal ding nasan a khemna douzoulou a suakta mohten kitamta hi. Tulai a kithang mahmah sumpung thei (chiahpuam), Shradha Scam leh scam simsenglouh hong omtoutou ahihna ah, kivensiam kul mahmah ta hi. Bank account number, password leh PIN number te kinget suah ichihte bangleng kibumna khat ahi veve uhi, smooth talking siam kitamta ahihna ah, trade chikhat, siamneltak a gintakhuaipi genkhe zangzang thei kitam mahmah leuleu (highly confident), hichidan te ahong tam deuhdeuh ding ua, kibumna khovel aa kitengta ahina ah pilvan' seng ding le bang nawnlou maimah hi. Meltheihlouh leh muhngeilouh leitung muntuampi aa omte khawng toh kihou aa kilawmbawl maimah ta ihih chiang un, nupi/pasal ding a pitek/putek nelnolpi zawllut khak ding lauhipi ahi hi.