HUN LEH NI TE`N MUALKHUM JEL
Written by Vungzamuan Valte, Columnist Zogam.com

Ni leh kha te`n mihingte ngaklou hial in pailiam zungzung ua, kumbul isak lai in kumkim himan naknak, kumkim isak Karin kum beikuan anahi manzel. Ni 1, kha 1, 2014 in kikhopna nuamtak kinei hi, nupi leh papite van-laukhasiangthou ngai ngoihngoih leh thathoutak kawmin sa-ki leh khuang tumtheihte toh phatna laa pi uhi, huaite mitkha ah thamden laitel hi. Mipite`n phatkhawmna laa “Thangvan Meikung Hong Leng Inla…” kichi dupdup mai, “Van laukha Siangthou Hong Leng in…Meikuang bang..Hon Veh in…Na Hong Hih Harh Nawn Kei Dia Hia…Toupa Aw…” chia mittui kai niuniau a ki-om, Van-Gam naidiak bangsak hial hi. Nungak melfeltak khat in,“Aw! Nang Tuailai, na zaitha hat lai… na mit in khuavak amuh theih lai…na khe in ahon paisak theih lai…na khut in na asep thei lai… na lungtang a hat lai…Toupa di`n zanglou ding na hiam…” chi`n siamtak leh zouthohtakin hon awi ngiaungiau hi. Thugentu`n, “Ki-lunghihmohna neite, lungkimlouhna neite, hehna neite, noplouhna neite, lungsim natna neite, huatna neite….kumthak ahih toh kiton in MAISAK TA UN, kingaidam tuah un, kihehnemtuah un, lungsim siangthou puchiatta ni….kumthak in I nopmohnate tengteng mangsakta hen…nithak, hunthak leh kumthakin kikhekna leh ki-ittuahna hon peta hen”, chi in lungkuaitak mai thumopna nei hi. Khaih, zanlam zek abang tel, lah kha nih erh orh in huai hun atunnawnna ding sam chiltel laizang hi.

Ahi, kumthak chiangin New year Pledge, kichiamna kinei naknak hi, Toupa di`n theitawp ka suah ding, hiai ka hih ding, huai ka hih ding, tukum chu nupi/pasal ka neita mahmah ding, khaini, kuva, tuibuk, zarda…ka tawpsanta ding, dawntheih guihtheih ka pai`mang ding, sianthouna in hun ka zangta ding, pasalte tung ah ginomna ka chiam, zite tung ah ginomna ka chiam, tate tung ah hihtheih lamlam ahoihthei pen ka suah ding etc. kichi kheukhou hialmah hi. Hun ahong pai a, kar khat, kha khat lou in, I thuchiamte a muih maimah zel, atamzawte angeimah a kesuk dup, kikhekna taktak omlou, angei a ngeinawn thou kitam mahmah zelzul hial hi. Banghang hiam chihleh, kichiamna pen a poimoh pen hilou hi, mite mitmuh a akilawmsakna dan a hihpen thupha ngahna hizawlou hi, lungsim kikhekna mah apoimoh pen hizawlim ahi hi. External influence ichi hiam, extraneous factors, abang hileh, tuptaktakna omlou in, hih zongsatsa, chiin zongsatsa, ichi a belh, imel a belh, mantep bangmai a kip tetawte paihmang leh lakkhiak hamsa ngial mah ahi uhi.

Politics sai te`n tukum chu hiai teng kisemkhia henla, huailak ah %; Contractor te`n, tukum chu huai contract kitang henla, sum hul hiaizah sai-ip dim kitung hnerhnur leh, dorkai te`n, tukum chu summet hiaizah kilamsuah henla, dawr nih leh thum kibawl belh leh; doctor te`n, damlou etman hiaizah in kisupung henla, tukum sungin sum hiaizah tax piak ngailou kilaisuah leh; saptuam te`n, project lianpipi bawl ua, sum muhna ding leh zatna ding suangtuah den hialmah uhi. Khamangthang zongtute`n, target kibawl ua, sanga manlou in mihing man un, kichi tuartuar den uhi. De-addiction centre bawlte`n, tukum mi hiaizah kikulkhum henla, kumtawpchiah sum mah zangin room 3 bek kibawl belh leh, addictte lah pung hulhul hive un, a ki-ngen teng kikhumzou mahmah lou a. Zu zuak, khamtheih zuak leh nohchi zuak te`n leng target abawl kei ding uh chih kuan agen thei a? Bihari pan dukan pa nasan in khateng a amuhsuah ding, a thotkhiak ding hisap detdet ahihna ah. New bazar, Zenhang bazar, Damkam bazar a nupi mehzuak leh nepnoi zuakte nasan in a niksakhau uh deihkhop nawnlou ua, branded leather bag ngat khai dingin kisa bemten uhi. Nupila khenkhat lah, target nei hiawmtak in, alan in lan sawsaw maimah ua, papila khankhat toh a target uh kibang vial hihtuak, khovel in ngak neilou..nuamsatak a I hinsung zatding ahi, chi`n a bilbuk uah kihilh suausuau den uhi. Commission agent te ngialhouh, agency charge regulate louh hiven, nupi feldeuhte tata in nuamsa hemham mahmah ua, zuaktheih maidok pahpah ua, zuakmoh zong neilou hial uhi. School neite, gam zuakte, sumpung hawmte, gari service te, kaam zuakte, license issue te, gas hawmte, oil zuakte, MNREGS vaisaite, MLA agente, civil supply te, sammettu te, khedap bawlte, furniture bawlte…akuapeuhmah, sep ding, bawl ding, muhna ding ngaihtuah leh atamsem muhsuah sawmna in tha leh lungsimte pai`uhi. Banghang hiam chihleh, mihingte lung-hin-a-hin theih hilou a, vasate`n nekding kholkhawm lou, chi a tangkou ngaih tatate kihahkhualpen uhi, biakin leh biakin loute kahpasik zangin lam den hialmah uhi. Lei ah gou khol kei un, ichih chiangin kikhemna bang maimah hi, vuaktang a suak, vuaktang a kik ding chih thudik tawpkhawk himahleh, a gen tampenpente a kikhual tata hizawmah ut viau. Ahi, vasa in zong bu asep sam vaw oi!

Niteng khosakna ah kibuai den a, nektak zonna ah khenkhatte si leh thau polh in, sih leh hin kikar ah ki-khosa hi. Khenkhatte leuleu, nuamtak in mi`muhsuahsa thagum thatang in laksak ziauziau theipawl omzel ua, khenkhatte` suaikaih man tamthei ngial chi chi pawl om uhi. Tuachibang dinmun a dingkha te`n, poisakna neilou in hih hmiahhmiah lel ua, petute` haksatna thei ut lou hial uhi; a thuakkhate`n, kei hileng chu ka hih nasa viau di, chi`n chillum toh valhpuap zel ua, ki-guizuih vek ding bang maimah hang. One way, helmet, registration, driving license, insurance laipek endik ut phe suausuau ua, nisa nuai, vuahzu nuai ah duty kuhkal thei ngial uhi, police medal mutak ngen hizawmah maithei lai uhi. Khumzamba luhna, nupite` chetna, zu matsak, zu buaksak, ATSUM kiphelkhap, bandh, blockade, Jacintha in pasal nei, D.C pa transfer, athak in ofis luah, Z te`n hiai khaam huai khaam, breaking news ah politiciante nasep khong hotel leh fb houlimna thupi asuak, tuihawk in  Tedim Road a luahsek a hiven.

Leitung pumpi a Tuailai khawmpi lianpenpen a tunkum hiven, FIFA World Cup in leitung zelsuak hial hi, nungakte` kithalawp penpen hun ahi, muh nuampi zong ahi uhi, kichei sexy thei rapthlak uh himai. Tangval thahat football siam penpente kitaitehna, kum tampi a kisakkholhna uh vuaksuak thei takpi a, Brazilte kinepna lianpen Neymar dikloutak a pekpuk ahihna in nupi leh nungak tampite mittui kesak hi. Lionel Messi in amah siamna liauliau in final kaipih a, atawpna bel kah leh mitui simsenglouh kiakna asuak maimah. Miroslav Klose in a tangtawn mim manmohna ding sekkhia a, Mario Goetze in nungakte apat Germany te Chancellor nu Angela Marker tanpha anuihmai uh beitheilou in kipahna tun hialthok hi, Goetze min ata atu khangin mang nawnlou ding hi. Hiai khawmpi in comdom vending machine tamkuamtak poimoh sak hi, Wags achihte uh leh prostitutes asang asim Brazil ah tualleng uhi.

Hun leh nite pai hulhul ua, Holi abei toh khawlum in hon pumtuam tazen, vuahzu hak in louneitute patausak mahleh, khuga dam canal kichim den penin mi patausak diak hi. Singtangpa hinkhua ah, nuhpi zoh in phavang in lap pah mawk hi, nupite khawmpi dingin kisa bemten ua, puanmanthupi taktak tengin kilawm vualvual mahmah uhi, apuan-gat uh target khat hiven, a lawmte puan ding gat-sak toh bang toh. Tuailaite kisan mahmah leuleu ua, school sports, college week, tuailai day, naupang day, dorka khompi, Durga Puja, Dussehra, Siamsinpawlpi sports/conference, Flag day, SWACHH BHARAT campaign, hun pai zungzung petmah zaw ahi. Diwali in ahon zui a, puak taktak maisam eive, akoi akoi ah. Sual leh Hoih kidouna a vualtungtuang (Dussehra) Ram leh Sita te nupa, a lalgam uh atun u`toh kiton in festival of lights kizang neunouta hi. Hiai kumei (KUT) thupitak in Khuadou leh CHAVANG KUT boruak kaithou ua, mihingte tung ah lunglawpna leh thathohna guan hial hi. Ahi, nisuak zong nemtuam mahmahta a, meikai thiithiai leh nizung nou-ngiingei te`n thathak hon-guan ahingei di, buhlak gimnamta ahihna ah, mailam a om Khawmpi lian mitsuan phak in omta hi, Christmas boruak gimsi leng panpanta. Eh, I khanglou guih uhia?

Kumbul a I kichiamnate bang a suak a le? Kum beikuan lah ahi maimah a? School kaite, college, University etc. a sinlaite, ihmu kha I om zenhouh uhia? Buailouhna ding a kipumpei kha, catch up zohvuallouh backlog I kol tektuk uhia? Social networking site a pumbuai, lawmte toh chet zankhua theite` sum heksak banah hun paihmangtu lianpen ahi. Ki-enthak mah dih ni; kha nih lel hun I neita, December ni 20 apat zaw, lungsim leh ngaihtuahna class room leh laibu ah, om nawn taktak theilou ahi. Nungdelh leng ka pha lai diam? Khenkhat te`n December in, I sep-gah I lou ding ua, khenkhat te`n February chiangin kitaitehna final I pek sin ngal ua, hun aomlai in panla ni, chih ikichialna hihen aw!

Government te kum simdan zaw March tan ahi, target neilou ki-omlou ding ahihna ah, hun tamtak kineilai veve hi, ki-khahkol theih bel hisamlou. Central a semte ngialhouh Manji hunlai toh kibanglou hial hi, Modiji in septakpi a nasem maimah, nasemtu teng munphiah toh a taw uh hawlh den maizen, target fulfill louh khak lau in phesuausuau liang uhi. Aw le! Mimal mal in target kinei chiat ding hiven, tukum chu holiday Goa ah, Gari ka lei di anuam kei lua mi gari kop det tel zaw, Tax saving scheme tamtheipen ka la dia tax saving ka bawl ding, Insurance policy hoih taktak ka lei di.. zi leh ta kineisam hiven, fb leh Aap tuamtuam zattheihna high end mobile phone aw le, tate maban khualna in RD hia Fix hiam ka koih di, bike apat AC car in graduate aw le, split AC ngat aw, inn mun ka lei di, inn ka bawl di, saving bank account ah hiaizah bek aw, loan ki-din gai mai leh, zi neihna dingin hiai zah aw le, Christmas paina dingin  ticket a kimatlai in aw le, leh adang dang tampitak I lungsim ngaihtuahna ah omsek hi. Savings concept neitheite bel azia zia omlai, ahia neih zahzah, muh zahzah banah, neiloupi a zong bank loan olsamchik a laktheih tamlawtel zel, leiba toh khosak el ul khak theihna khovel ahi hi. A pangkhial kha vanglakte hun in ngaklou hial hi, tengkol pangsual battheih mawk hi, leiba sik ding kituh zelzul thok ua, bat sikte` phone lak utlouh ziakin, phone kheng zihzeh mah le, phatuam diaklou hi, technology in hon pumtuamta.

Kumtawp ding ngaklah hetlou a om khak theih ahihna ah, tuni in ki-enchian thak le, hun aom lai kei maw? Target ineihte enthak dih ni, tax savings I bawl sawmte tangtun sawm ni, Christmas leh kumthak nuamtak a zangzou, kipahna leh, I bil a khuangging leng beinailoupi a, December khaloh leh January khaloh lak ding teng tax deduction at source a bei chih omthei inchin, sum I poimoh laitak hizawmah. Inn lam paizou tawbeng a tung, leiba neihloh zawmah, huchia I loh lakding aom kei maimah leh zaw aw, tuike nuih veivui theih takpi ahi hi. Naute school fee, admission fee, laibu leina ding, uniform leina ding, ana kikholkhawm tektuk zawmah, taisiat theih lah hilou, nupa kibauh tuah bakbak a phatuam dingleng omsam lou. Vaite hile zaw, zite kiang ah, na pa sum hiaizah; huai dan leng ahoih pen hituam diak lou.

Kare, khagau khat piangkhe leuleu, mi sum sinna mah zaw hi, Delhi lam ah Tomchon, inn lam ah Memorial football achuom chuom. Tua Indian Super League (Football) India a mihausa penpen Mukesh Ambani Zi, Nita Ambani in hon pansuah taget zel. Tuailai khawmpi ahi mai, sum senna ahi, lah nuam boksi, khovel ah zaw anuam atam, tam semsem lai zawmah ding hi. Huchi kawmkar ah, hihna lamlam ah kuhkaltak a pang trangtrang theite mah hong vualtungtuang ding hilel zaw uhi. A khekhap tam lamlam zui noinoi, a nuam nuam delh huthut, kikulkhum peihloute azaang hiliang ding. I society ah social events leh saptuam events atam, I kim leh kiang ah lah dimlet nawinawi, I innsung tanpha hon zelsuakta, mobile mahmah in I hinkhua control petmah. Kihoulim tiptip, thukhawchang genkhawm chih om thei nawnlou, agin kei leh KLUK chi, huchihlouh kar a tuiluang bangmai a lut zungzung, Lusei te`n inbeng dai roh achihdandeuh ua kibetdaih mai theih lah hilou. Na zi, na pasal, na nu, na pa sangin na phone na it-zaw hia? Chi le, it-zaw chithei pawl kitamta leh kilawm maw. Leitung ah kitaitehna asang semsem, a sa`n semsem dungjui in, hun, tha leh lungsim piaktam diak kul zel hi. A nuam I masak chiangin, lawm te`n va-uk a hon lensan naknak ahizaw uhi. Company hiam, government hiam in bill a piaksak hikhollou, applications (Twitter, FB, WhatsAapp, Instagram etc.) I buaipih chiat ua, awl in phatuamloupi ahihdan kithei ding hi, addictive mahmah khat hizel inchin, kihaichilh maidan ahi ve, mi sumsinna hoihtak, a neiloupi eiloi in kitha-it lawkha laizang. Internet zaw phatuam lua ahi, ki misuse kha zel; leak etna ding leh kinakna ding in zaw sum a pammaih, chaw.

Aw le, December gimsi hong leng nawn panpanta ahihna ah, kiginkhawl petmah kul ahihchu. Kha-sawm vel paisa enkik leng, thupoimoh, na poimoh, laa poimoh taktak I mangngilh khak, I nutsiat khak, I taisan khak, zohlouh a koihdap khak omgun nuam viau a`ihkha. Kiging gige a om ding chih, thuginpi a neite lah ihi ngal ua.